పిఎంఇండియా
‘అందరికీ ఇల్లు’ అందించాలనే తన నిబద్ధతకు అనుగుణంగా ఢిల్లీలోని అశోక్ విహార్‌లోని స్వాభిమాన్ గృహసముదాయంలో నిర్మించిన ఫ్లాట్లను ప్రధానమంత్రి శ్రీ నరేంద్రమోదీ ఈ రోజు సందర్శించారు. యధాస్థానంలో మురికివాడ పునరావాస ప్రాజెక్టులో భాగంగా జుగ్గీ జోప్రి (జేజే) క్లస్టర్లలోని నివాసితుల కోసం వీటిని నిర్మించారు. స్వాభిమాన్ అపార్ట్మెంట్ల లబ్ధిదారులతో ప్రధాని శ్రీ మోదీ ముచ్చటించారు.
స్వాభిమాన్ గృహసముదాయంలోకి మారబోతున్న లబ్ధిదారులతో ప్రధానమంత్రి సంభాషిస్తూ, ప్రభుత్వ గృహ నిర్మాణ కార్యక్రమం తీసుకొచ్చిన మార్పుల పట్ల తన సంతోషం వ్యక్తం చేశారు. గతంలో మురికివాడల్లో నివసించిన వారికి శాశ్వత గృహాలు పొందిన అనంతరం వారి జీవితాల్లో వచ్చిన సానుకూల మార్పులు ఈ సంభాషణలో ప్రతిఫలించాయి.
లబ్ధిదారుల సంభాషణలో భాగంగా ‘‘మీరు ఇల్లు తీసుకున్నారా?’’ అని ప్రధాని ప్రశ్నించారు. దానికి ‘‘అవును సార్, మేం దాన్ని తీసుకున్నాం. గుడిసె నుంచి రాజభవనంలోకి మమ్మల్ని తీసుకొచ్చిన మీకు కృతజ్ఞులం’’ అని ఓ లబ్ధిదారుడు జవాబిచ్చారు. దీనికి ప్రధాని ప్రతిస్పందిస్తూ తనకంటూ ఒక ఇల్లు లేదని, మీ అందరికీ ఇల్లు ఉందని వినయంగా తెలిపారు.
మరో లబ్ధిదారుడు తన కృతజ్ఞతను వ్యక్తం చేస్తూ.. ‘‘అవును సార్, మీ జెండా ఎల్లప్పుడూ మరింత ఎత్తులో ఎగురుతూనే ఉండాలి, మీరు గెలుస్తూనే ఉండాలి’’ అని అన్నారు. దీనికి ప్రతిగా ప్రజల బాధ్యతను గుర్తు చేస్తూ ‘‘మా జెండా ఎగురుతూ ఉండాలి అంటే, అది మీ చేతుల్లోనే ఉంది’’ అని ప్రధానమంత్రి జవాబిచ్చారు. కష్టమైన జీవన పరిస్థితుల నుంచి సొంత ఇంటిలోకి మారుతున్నామనే ఆనందాన్ని పంచుకుంటూ ఆ లబ్ధిదారుడు ‘‘చాలా ఏళ్ల పాటు శ్రీ రాముని కోసం ఎదురుచూశాం. అలాగే మీ కోసం కూడా ఎదురుచూస్తూ ఉన్నాం. మీరు చేసిన కృషి వల్లే మురికివాడల నుంచి ఈ భవనానికి మారుతున్నాం. మీరు మాకు ఇలా చాలా దగ్గరగా ఉండటం మా అదృష్టం’’ అని అన్నారు.
ఐక్యత, ప్రగతి గురించి ప్రస్తావిస్తూ, ‘‘మనమంతా సమష్టిగా ఈ దేశంలో చాలా సాధించగలమని మనల్ని చూసి ఇతరులు స్ఫూర్తి పొందాలి’’ అని ప్రధాని శ్రీ మోదీ వివరించారు.
అట్టడుగు స్థాయి నుంచి ప్రయాణం ప్రారంభించిన పేద కుటుంబాలకు చెందిన పిల్లలు వివిధ రంగాల్లో ముఖ్యంగా క్రీడల్లో రాణిస్తూ దేశం గర్వించేలా ఎలా విజయాలు సాధిస్తున్నారో ప్రధానమంత్రి శ్రీ నరేంద్ర మోదీ వివరించారు. వారు తమ కలల్ని కొనసాగించాలని ప్రదానమంత్రి వారిని ప్రోత్సహించారు. తాను సైన్యంలో చేరాలనుకుంటున్నానని ఓ లబ్ధిదారుడు చెప్పగా ప్రధాని సానుకూలంగా స్పందించారు.
అలాగే, నూతన గృహాల విషయంలో వారి ఆకాంక్షల గురించి లబ్ధిదారులను ప్రధానమంత్రి అడిగి తెలుసుకున్నారు. ఓ యువతి తన చదువుపై దృష్టి పెట్టాలని భావిస్తున్నట్టు తెలిపింది. ఏమవ్వాలనుకుంటున్నావని ఆమెను ప్రశ్నించినప్పుడు ‘టీచర్’ అని ఆత్మవిశ్వాసంతో సమాధానమిచ్చింది.
మురికివాడల్లో నివసిస్తున్న ప్రజలు ఎదుర్కొంటున్న సవాళ్లను కూడా స్పృశిస్తూ ప్రధానమంత్రి తన సంభాషణను కొనసాగించారు. కార్మికులుగా లేదా ఆటో రిక్షా డ్రైవర్లుగా పనిచేసేవారి కుటుంబాలు ఇప్పుడు తమ కోసం మంచి భవిష్యత్తును సృష్టించుకునే అవకాశం దొరికిందని ప్రధాని అన్నారు. రాబోతున్న పండగలను కొత్త ఇళ్లలో ఎలా జరుపుకొంటారని ప్రధాని అడిగారు. సమాజంలో ఐక్యత, ఆనందం వెల్లివెరిసేలా సామూహికంగా జరుపుకుంటామని లబ్ధిదారులు పంచుకున్నారు.
లబ్ధిదారులకు, దేశానికి భరోసా ఇస్తూ ప్రధానమంత్రి తన సంభాషణను ముగించారు. ఇంకా శాశ్వత గృహాలు పొందని వారికి కూడా ఇల్లు వస్తుందనేది తన హామీ అన్నారు. ఈ దేశంలోని ప్రతి పేదవాడికీ శాశ్వత నివాసం ఉండేలా ప్రభుత్వం భరోసా ఇస్తుందని తెలియజేశారు.
