పిఎంఇండియా

ప్రధాన మంత్రి శ్రీ నరేంద్ర మోదీ జనవరి 27న సాయంత్రం 4 గంటల 30 నిమిషాలకు ఢిల్లీలోని కరియప్ప పరేడ్ గ్రౌండ్‌లో జరగనున్న ఎన్‌సీసీ పీఎం ర్యాలీని ఉద్దేశించి ప్రసంగించనున్నారు. ఈ తరహా ర్యాలీని ఏటా నిర్వహిస్తూ వస్తున్నారు.

ఈ సంవత్సరం రిపబ్లిక్ డే క్యాంపులో మొత్తం 2361 మంది ఎన్‌సీసీ కేడెట్లు పాల్గొన్నారు. వారిలో 917 మంది బాలికలు కూడా ఉన్నారు. బాలికలు ఇంత ఎక్కువ సంఖ్యలో పాలుపంచుకోవడం ఇదే మొదటిసారి. ఢిల్లీలో నెల రోజులుగా నిర్వహించిన ఎన్‌సీసీ రిపబ్లిక్ డే క్యాంపు ముగింపు కార్యక్రమంగా ఈ ర్యాలీ నిర్వహిస్తారు. ‘యువ శక్తి, వికసిత్ భారత్’ను ఈ ఏడాది ఎన్‌సీసీ పీఎం ర్యాలీకి ఇతివృత్తంగా ఎంపిక చేశారు.

ముగింపు రోజు 800కు పైగా కేడెట్లు దేశ నిర్మాణంలో ఎన్‌సీసీ తోడ్పాటు అనే అంశంపై సాంస్కృతిక కార్యక్రమాన్ని సమర్పించనున్నారు. 18 మిత్ర దేశాలకు చెందిన 144 మంది యువ కేడెట్లు పాలుపంచుకోవడం ఈ సంవత్సరం ర్యాలీ ఉత్సాహాన్ని మరింత పెంచనుంది.

దేశవ్యాప్తంగా మేరా యువ (ఎంవై) భారత్, విద్యాశాఖ, గిరిజన వ్యవహారాల శాఖలకు చెందిన 650కి పైగా స్వచ్ఛంద కార్యకర్తలు ఎన్‌సీసీ పీఎం ర్యాలీకి ప్రత్యేక అతిథులుగా హాజరు కానున్నారు.