పిఎంఇండియా

జాఫ్నా లో నవీకరించిన దురైయప్ప స్టేడియమ్ ను ప్రధాన మంత్రి శ్రీ నరేంద్ర మోదీ, శ్రీలంక అధ్యక్షుడు శ్రీ మైత్రిపాల సిరిసేన లు ఇరువురూ రేపు ఉదయం శ్రీ లంక ప్రజలకు అంకితం చేయనున్నారు. జాఫ్నాలోని ఈ స్టేడియమ్ లో అధ్యక్షుడు శ్రీ సిరిసేన పాల్గొంటారు. కాగా, ప్రధాన మంత్రి శ్రీ నరేంద్ర మోదీ న్యూ ఢిల్లీ నుండి వీడియో సమావేశం మాధ్యమం ద్వారా ఈ కార్యక్రమంలో పాలుపంచుకొంటారు.

జాఫ్నా పూర్వ మేయర్ కీర్తి శేషుడు ఆల్ఫ్రెడ్ తంబిరాజా దురైయప్ప గౌరవార్థం దురైయప్ప స్టేడియమ్ కు ఆ పేరును పెట్టారు. రూ. 7 కోట్లకు పైగా వ్యయంతో భారత ప్రభుత్వం ఈ స్టేడియమ్ ను నవీకరించింది.

ఈ స్టేడియమ్ లో 1850 మంది కూర్చోవడానికి తగిన ఏర్పాట్లు చేశారు. ఇది క్రీడలు తదితర వినోద కార్యకలాపాల ప్రోత్సాహానికి ఉపయోగపడడమే కాకుండా, శ్రీ లంకలోని ఉత్తర ప్రాంతం యువజనుల సర్వతోముఖ అభివృద్ధికి కూడా తోడ్పడనుంది.

ఈ స్టేడియమ్ ను 1997 నుండి ఉపయోగించడం లేదు.

నవీకరించిన స్టేడియమ్ లో జరుగనున్న మొట్టమొదటి ప్రధాన కార్యక్రమం యోగా రెండవ అంతర్జాతీయ దిన వేడుకలు. ఈ కార్యక్రమాన్ని ప్రధాన మంత్రి శ్రీ మోదీ మరియు అధ్యక్షుడు శ్రీ సిరిసేన లు ఇరువురు తిలకించనున్నారు. యోగాభ్యాస ప్రదర్శనలో 8,000 మందికి పైగా ప్రజలు పాలుపంచుకొనే అవకాశం ఉంది.