پی ایم انڈیا

وزیر اعظم جناب نریندر مودی نے اساطیری شخصیت جناب راج کپور کو ان کی پیدائش کی 100ویں سالگرہ کے موقع پر خراج عقیدت پیش کیا۔ انہوں نے ایک صاحب بصیرت فلم ساز، اداکار  اور ابدی شو مین کے طور پر ان کی ستائش کی۔ انہوں نے جناب راج کپور کو نہ صرف ایک فلم ساز بتایا بلکہ انہیں ایک ثقافتی سفیر بھی قرار دیا جو بھارتی سنیما کو مطلع عالم تک لے گئے۔ جناب مودی نے کہا کہ فلم سازوں اور اداکاروں کی کئی پیڑھیاں ان سے بہت کچھ سیکھ سکتی ہیں۔

ایکس پر پوسٹ کے ایک سلسلے کے تحت، جناب مودی نے لکھا:

’’آج، ہم اساطیری شخصیت راج کپور کی 100ویں سالگرہ منا رہے ہیں، جو کہ ایک صاحب بصیرت فلم ساز، اداکاراور ایک ابدی شومین تھے! ان کی ذہانت نے کئی پیڑھیوں کو متاثر کیا ہے، اور بھارتی و عالمی سنیما پر نہ مٹنے والے نقوش مرتب کیے ہیں۔‘‘

’’سنیما کے تئیں جناب راج کپور کے شوق و جذبے کا آغاز کم عمری میں ہی ہوگیا تھا اور انہوں نے ایک پیش رو قصہ گو کے طور پر اپنی شناخت قائم کرنے کے لیے سخت محنت کی۔ ان کی فلمیں فن، جذبات اور سماجی تبصروں کا ایک مرقع تھیں۔ انہوں نے عام شہریوں کی امنگوں اور جدوجہد کی عکاسی کی۔ ‘‘

’’راج کپور کی فلموں کے معروف کردار اور ناقابل فراموش نغموں کی بازگشت دنیا بھارت کے فلم شائقین کے درمیان سنائی دیتی ہے۔ عوام اس امر کی ستائش کرتے ہیں کہ کس طرح ان کی فلمیں مختلف موضوعات کو آسانی اور عمدگی کے ساتھ اجاگرکرتی ہیں۔ ان کی فلموں کی موسیقی  بھی ازحد مقبول عام ہے۔‘‘

’’جناب راج کپور محض ایک فلم ساز ہی نہیں بلکہ ایک ثقافتی سفیر بھی تھے جو بھارتی سنیما کو مطلع عالم تک لے گئے۔ فلم سازوں اور اداکاروں کی کئی پیڑھیاں ان سے بہت کچھ سیکھ سکتی ہیں۔ میں ایک مرتبہ پھر انہیں خراج عقیدت پیش کرتا ہوں اور تخلیقی دنیا کے لیے ان کے تعاون کو یاد کرتا ہوں۔‘‘

Today, we mark the 100th birth anniversary of the legendary Raj Kapoor, a visionary filmmaker, actor and the eternal showman! His genius transcended generations, leaving an indelible mark on Indian and global cinema.

— Narendra Modi (@narendramodi) December 14, 2024

**********

 (ش ح –ا ب ن)

U.No:4017