پی ایم انڈیا

وزیر اعظم جناب نریندر مودی نے آج بنکاک میں تھائی لینڈ کی  وزیر اعظم محترمہ پیتونگ تارن شیناواترا سے ملاقات کی۔ گورنمنٹ ہاؤس پہنچنے پر وزیر اعظم شیناوترا نے ان کا  شاندار استقبال کیا۔ یہ ان کی دوسری ملاقات تھی۔ اس سے قبل، دونوں رہنماؤں کی ملاقات اکتوبر 2024 میں وینتیانے میں آسیان سے متعلق سربراہی اجلاس کے موقع پر ہوئی تھی۔

دونوں رہنماؤں نے ہندوستان اور تھائی لینڈ کے درمیان دو طرفہ تعاون کے پورے دائرہ کار کا جائزہ لیا۔ انہوں نے سیاسی تبادلوں، دفاعی اور سیکورٹی شراکت داری، اسٹریٹجک مصروفیات، تجارت اور سرمایہ کاری اور عوام سے عوام کے تعلقات کو مزید مضبوط بنانے کے طور طریقوں پر تبادلہ خیال کیا۔ انہوں نے رابطے، صحت، سائنس اور ٹیکنالوجی، اسٹارٹ اپس، اختراع، ڈیجیٹل، تعلیم، ثقافت اور سیاحت میں تعاون بڑھانے کی ضرورت پر زور دیا۔ انہوں نے انسانی اسمگلنگ، منشیات کی ا سمگلنگ اور سائبر کرائم سمیت بین الاقوامی منظم جرائم سے نمٹنے کے لیے تعاون کو گہرا کرنے کے طریقوں پر بھی تبادلہ خیال کیا۔ دونوں وزرائے اعظم نے عالمی مسائل پر تبادلہ خیال کیا اور ذیلی علاقائی اور کثیر جہتی فورموں بشمول بمسٹیک، آسیان اور میکونگ گنگا میں قریبی تعاون کو فروغ دینے کےطور طریقوں پر تبادلہ خیال کیا۔

دونوں رہنماؤں نے ہندوستان-تھائی لینڈ اسٹریٹجک پارٹنرشپ کے قیام کے بارے میں ایک مشترکہ اعلامیہ کا تبادلہ کیا۔ انہوں  نے ڈیجیٹل ٹیکنالوجی، بہت چھوٹی، چھوٹی اور اوسط درجے کی صنعتوں (ایم ایس ایم ای) اور سمندری ورثے کے شعبوں میں مفاہمت نامے  کا تبادلہ بھی کیا۔ دونوں رہنماؤں نے ہندوستان-تھائی لینڈ قونصلر مذاکرات کا بھی خیرمقدم کیا، جس سے دونوں ممالک کے درمیان عوام سے عوام کے رابطوں کو مزید سہولت ملے گی۔ نتائج کی فہرست یہاں دیکھی جا سکتی ہے۔

خیر سگالی کے طور پر، تھائی حکومت نے وزیر اعظم کے دورے کے موقع پر 18ویں صدی کی رامائن کی پینٹنگز کی عکاسی کرنے والا ایک خصوصی ڈاک ٹکٹ جاری کیا۔ دونوں ممالک کے درمیان قریبی ثقافتی اور مذہبی روابط کو اجاگر کرتے ہوئے، وزیر اعظم کو وزیر اعظم شیناواترا نے پالی میں بدھ مت کے مقدس صحیفے ٹی آئی-پی آئی ٹی اے کے اے کا خصوصی ایڈیشن پیش کیا۔ ہندوستان اور تھائی لینڈ کے درمیان قریبی تہذیبی تعلقات کو مزید گہرا کرنے کے طور پر، وزیر اعظم نے گجرات سےکھدائی کرکے لائے گئے بھگوان بدھ کے باقیات  کو تھائی لینڈ بھیجنے کی پیشکش کی تاکہ لوگ ان کے تئیں  احترام پیش کر سکیں۔  گزشتہ سال بھگوان بدھ اور ان کے دو شاگردوں کے مقدس باقیات  ہندوستان سے تھائی لینڈ پہنچے تھے اور 40 لاکھ سے زائد لوگوں نے انہیں خراج عقیدت پیش کیا تھا۔

ہندوستان اور تھائی لینڈ سمندری ہمسایہ ممالک ہیں جن کی ثقافتی، لسانی اور مذہبی رشتوں سے جڑے مشترکہ تہذیبی روابط  ہیں،  جن میں رامائن اور بدھ مت کے رشتے شامل ہیں۔ تھائی لینڈ کے ساتھ ہندوستان کے تعلقات ہماری ‘ایکٹ ایسٹ’ پالیسی، آسیان کے ساتھ جامع اسٹریٹجک شراکت داری، وژن مہاساگر اور ہند-بحرالکاہل کے ہمارے وژن کا ایک لازمی ستون ہیں۔ دونوں ممالک کے درمیان پائیدار بات چیت  سے قدیمی  تعلقات اور مشترکہ مفادات پر مبنی مضبوط اور کثیر جہتی روابط  کو تقویت ملی ہے۔ 

***

ش ح۔ ک ا۔ ع ر