ਪੀਐੱਮਇੰਡੀਆ

ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਕੱਲ੍ਹ ਆਪਣੇ ਪੁਰਤਗਾਲ, ਸੰਯੁਕਤ ਰਾਜ ਅਮਰੀਕਾ ਅਤੇ ਨੀਦਰਲੈਂਡ ਦੇ ਦੌਰੇ ਲਈ ਚਲ ਪੈਣਗੇ । ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਸ ਦੌਰੇ ਦਾ ਉਦੇਸ਼ ਅਲੱਗ-ਅਲੱਗ ਖੇਤਰਾਂ ਵਿੱਚ ਬਹੁਪੱਖੀ ਰੁਝਾਨਾਂ ਨੂੰ ਵਧਾਉਣਾ ਹੈ ।

ਪ੍ਰਧਾਨ ਮੰਤਰੀ ਨੇ ਕਿਹਾ ,“24 ਜੂਨ, 2017 ਨੂੰ ਮੈਂ ਸਰਕਾਰੀ ਕੰਮ ਦੇ ਸਿਲਸਿਲੇ ਵਿੱਚ ਪੁਰਤਗਾਲ ਜਾਵਾਂਗਾ । ਮਹਾਮਹਿਮ ਪ੍ਰਧਾਨ ਮੰਤਰੀ ਐਨਟੋਨੀਓ ਕੋਸਟਾ (Antonio Costa) ਦੇ ਜਨਵਰੀ, 2017 ਵਿੱਚ ਭਾਰਤੀ ਦੌਰੇ ਤੋਂ ਬਾਅਦ ਸਾਡੇ ਨਜ਼ਦੀਕੀ, ਇਤਿਹਾਸਕ ਅਤੇ ਦੋਸਤਾਨਾ ਰਿਸ਼ਤਿਆਂ ਨੂੰ ਬਲ ਮਿਲਿਆ ਹੈ ।

ਮੈਨੂੰ ਪ੍ਰਧਾਨ ਮੰਤਰੀ ਕੋਸਟਾ ਨਾਲ ਮੀਟਿੰਗ ਦਾ ਇੰਤਜ਼ਾਰ ਹੈ । ਕੁਝ ਸਮਾਂ ਪਹਿਲਾਂ ਹੋਈਆਂ ਗੋਸ਼ਟੀਆਂ ਦੇ ਅਧਾਰ `ਤੇ ਅਸੀਂ ਅਲੱਗ-ਅਲੱਗ ਸਾਂਝੀਆਂ ਪਹਿਲਕਦਮੀਆਂ ਅਤੇ ਫੈਸਲਿਆਂ ਦੀ ਪ੍ਰਗਤੀ ਦਾ ਲੇਖਾ-ਜੋਖਾ ਕਰਾਂਗੇ । ਅਸੀਂ ਬਹੁਪੱਖੀ ਰੁਝਾਨਾਂ, ਖਾਸ ਕਰਕੇ ਆਰਥਕ ਸਹਿਯੋਗ, ਵਿਗਿਆਨ ਤੇ ਟੈਕਨੋਲੋਜੀ, ਪੁਲਾੜ ਸਹਿਯੋਗ ਅਤੇ ਲੋਕਾਂ ਨਾਲ ਸਬੰਧ ਆਦਿ ਖੇਤਰਾਂ ਵਿੱਚ ਹੋਰ ਵਾਧਾ ਕਰਨ ਦੇ ਰਸਤਿਆਂ `ਤੇ ਵਿਚਾਰ-ਵਿਮਰਸ਼ ਕਰਾਂਗੇ । ਅਸੀਂ ਆਤੰਕਵਾਦ ਦੇ ਵਿਰੋਧ ਅਤੇ ਹੋਰ ਸਾਂਝੇ ਹਿਤ ਨਾਲ ਸਬੰਧਤ ਅੰਤਰਰਾਸ਼ਟਰੀ ਮੁੱਦਿਆਂ ਵਿੱਚ ਸਾਡੇ ਸਹਿਯੋਗ ਨੂੰ ਗਹਿਰਾ ਕਰਨ ਵਾਲੇ ਸਾਧਨਾਂ `ਤੇ ਵਿਚਾਰ-ਵਟਾਂਦਰਾ ਕਰਾਂਗੇ । ਮੈਨੂੰ ਬਹੁਪੱਖੀ ਵਪਾਰ ਅਤੇ ਨਿਵੇਸ਼ ਸਬੰਧਾਂ ਵਿੱਚ ਗਹਿਰਾਈ ਦੀ ਵੀ ਜ਼ਬਰਦਸਤ ਸੰਭਾਵਨਾ ਨਜ਼ਰ ਆਉਂਦੀ ਹੈ ।

ਮੈਂ ਇਸ ਯਾਤਰਾ ਦੌਰਾਨ ਪੁਰਤਗਾਲ ਵਿੱਚ ਭਾਰਤੀ ਸਮੁਦਾਇ ਨਾਲ ਗੱਲਬਾਤ ਕਰਨ ਲਈ ਵੀ ਉਤਸੁਕ ਹਾਂ। ”

24 ਤੋਂ 26 ਜੂਨ ਨੂੰ ਪ੍ਰਧਾਨ ਮੰਤਰੀ ਡੀ.ਸੀ. ਵਾਸ਼ਿੰਗਟਨ ਦਾ ਦੌਰਾ ਕਰਨਗੇ ।

ਪ੍ਰਧਾਨ ਮੰਤਰੀ ਨੇ ਕਿਹਾ,“ ਰਾਸ਼ਟਰਪਤੀ ਡੋਨਾਲਡ ਜੇ. ਟਰੰਪ ਦੇ ਸੱਦੇ `ਤੇ ਮੈਂ ਡੀ.ਸੀ ਵਾਸ਼ਿੰਗਟਨ ਦਾ ਦੌਰਾ ਕਰਾਂਗਾ । ਇਸ ਤੋਂ ਪਹਿਲਾਂ ਰਾਸ਼ਟਰਪਤੀ ਟਰੰਪ ਅਤੇ ਮੇਰੀ ਟੈਲੀਫੋਨ `ਤੇ ਗੱਲ ਹੋ ਚੁੱਕੀ ਹੈ । ਸਾਡੀ ਗੱਲਬਾਤ, ਸਾਡੇ ਲੋਕਾਂ ਦੇ ਸਾਂਝੇ ਫਾਇਦੇ ਲਈ, ਲਾਹੇਵੰਦ ਅਤੇ ਸਰਬਪੱਖੀ ਰੁਝਾਨ ਨੂੰ ਅੱਗੇ ਲੈ ਜਾਣ ਵਾਲੀ ਸਾਂਝੀ ਨੀਤੀ ਤੱਕ ਪਹੁੰਚ ਚੁੱਕੀ ਹੈ । ਮੈਨੂੰ ਇਸ ਮੌਕੇ ਦਾ ਇੰਤਜ਼ਾਰ ਹੈ ਜਦੋਂ ਭਾਰਤ ਅਤੇ ਸੰਯੁਕਤ ਰਾਜ ਅਮਰੀਕਾ ਵਿਚਕਾਰ ਮਜ਼ਬੂਤ ਅਤੇ ਵਿਸ਼ਾਲ ਦਾਇਰੇ ਵਾਲੀ ਭਾਈਵਾਲਤਾ ਨੂੰ ਹੋਰ ਅੱਗੇ ਵਧਾਉਣ ਤੇ ਗਹਿਰਾਈ ਨਾਲ ਵਿਚਾਰ-ਵਟਾਂਦਰਾ ਕੀਤਾ ਜਾਏਗਾ ।

ਸੰਯੁਕਤ ਰਾਜ ਅਮਰੀਕਾ ਨਾਲ ਭਾਰਤ ਦੀ ਭਾਈਵਾਲੀ ਵੰਨ-ਸੁਵੰਨੀ ਅਤੇ ਬਹੁ-ਪਰਤੀ ਹੈ ਜਿਸ ਨੂੰ ਕੇਵਲ ਸਰਕਾਰਾਂ ਹੀ ਨਹੀਂ ਸਗੋਂ ਦੋਹਾਂ ਪਾਸਿਆਂ ਦੇ ਸਾਰੇ ਹਿੱਸੇਦਾਰਾਂ ਦਾ ਵੀ ਸਹਿਯੋਗ ਪ੍ਰਾਪਤ ਹੈ । ਮੈਨੂੰ ਰਾਸ਼ਟਰਪਤੀ ਟਰੰਪ ਦੀ ਅਗਵਾਈ ਹੇਠ ਸੰਯੁਕਤ ਰਾਜ ਅਮਰੀਕਾ ਵਿਚਲੇ ਨਵੇਂ ਪ੍ਰਸ਼ਾਸਨ ਨਾਲ ਸਾਡੀ ਭਾਈਵਾਲੀ ਲਈ ਇੱਕ ਅਗਾਂਹ-ਵਧੂ ਵਿਜ਼ਨ ਬਣਾਏ ਜਾਣ ਦੀ ਉਮੀਦ ਹੈ । ਰਾਸ਼ਟਰਪਤੀ ਟਰੰਪ ਅਤੇ ਉਸ ਦੇ ਮੰਤਰੀ ਮੰਡਲ ਵਿਚਲੇ ਸਹਿਯੋਗੀਆਂ ਨਾਲ ਦਫਤਰੀ ਮੀਟਿੰਗਾਂ ਦੇ ਇਲਾਵਾ ਮੈਂ ਕੁਝ ਉੱਘੇ ਅਮਰੀਕਨ ਮੁੱਖ ਕਾਰਜਕਾਰੀ ਅਧਿਕਾਰੀਆਂ ਨੂੰ ਵੀ ਮਿਲਾਂਗਾ । ਪਹਿਲਾਂ ਦੀ ਤਰ੍ਹਾਂ ਹੀ ਸੰਯੁਕਤ ਰਾਜ ਅਮਰੀਕਾ ਵਿੱਚ ਰਹਿ ਰਹੇ ਪ੍ਰਵਾਸੀ ਭਾਰਤੀਆਂ ਨਾਲ ਮਿਲਣ ਲਈ ਵੀ ਮੈਂ ਉਤਸੁਕ ਹਾਂ” ।

ਪ੍ਰਧਾਨ ਮੰਤਰੀ 27 ਜੂਨ, 2017 ਨੂੰ ਨੀਦਰਲੈਂਡ ਦਾ ਦੌਰਾ ਕਰਨਗੇ ।

ਪ੍ਰਧਾਨ ਮੰਤਰੀ ਨੇ ਕਿਹਾ,“ ਮੈਂ 27 ਜੂਨ, 2017 ਨੂੰ ਨੀਦਰਲੈਂਡ ਜਾਵਾਂਗਾ । ਇਸ ਸਾਲ ਅਸੀਂ ਇੰਡੋ-ਡੱਚ ਡਿਪਲੋਮੈਟਿਕ ਰਿਲੇਸ਼ਨਜ਼ ਦੀ ਸਥਾਪਨਾ ਦੇ 70 ਸਾਲ ਪੂਰੇ ਹੋਣ `ਤੇ ਜਸ਼ਨ ਮਨਾ ਰਹੇ ਹਾਂ । ਇਸ ਦੌਰੇ ਦੌਰਾਨ ਮੈਂ ਡੱਚ ਪ੍ਰਧਾਨ ਮੰਤਰੀ ਮਹਾਮਹਿਮ ਸ਼੍ਰੀ ਮਾਰਕ ਰੁੱਤੇ (Mr. Mark Rutte) ਨਾਲ ਸਰਕਾਰੀ ਮੀਟਿੰਗ ਕਰਾਂਗਾ । ਮੈਂ ਨੀਦਰਲੈਂਡ ਦੇ ਬਾਦਸ਼ਾਹ ਵਿਲੈਮ- ਐਲੇਗਜ਼ੈਂਡਰ ਅਤੇ ਰਾਣੀ ਮੈਕਸਿਮਾ ਨੂੰ ਵੀ ਮਿਲਣ ਜਾਵਾਂਗਾ ।

ਮੈਂ ਪ੍ਰਧਾਨ ਮੰਤਰੀ ਰੁੱਤੇ ਨਾਲ ਮਿਲਣ ਅਤੇ ਸਾਡੇ ਬਹੁਪੱਖੀ ਸਬੰਧਾਂ `ਤੇ ਵਿਚਾਰ-ਚਰਚਾ ਕਰਨ ਲਈ ਉਤਸੁਕ ਹਾਂ । ਮੈਂ ਪ੍ਰਧਾਨ ਮੰਤਰੀ ਰੁੱਤੇ ਨਾਲ ਆਤੰਕਵਾਦ ਵਿਰੋਧਤਾ ਅਤੇ ਵਾਤਾਵਰਣ ਪਰਿਵਰਤਨ ਆਦਿ ਮਹੱਤਵਪੂਰਨ ਅੰਤਰਰਾਸ਼ਟਰੀ ਮੁੱਦਿਆਂ `ਤੇ ਵਿਚਾਰ-ਵਟਾਂਦਰਾ ਕਰਾਂਗਾ ।

ਆਰਥਕ ਸਬੰਧ ਸਾਡੇ ਬਹੁਪੱਖੀ ਸਬੰਧਾਂ ਦੇ ਧੁਰੇ ਦੀ ਸਿਰਜਣਾ ਕਰਦੇ ਹਨ । ਨੀਦਰਲੈਂਡ ਯੂਰਪੀਅਨ ਸੰਘ ਵਿੱਚ ਸਾਡਾ ਛੇਵਾਂ ਸਭ ਤੋਂ ਵੱਡਾ ਤਜਾਰਤੀ ਭਾਈਵਾਲ ਹੈ ਅਤੇ ਵਿਸ਼ਵ ਪੱਧਰ `ਤੇ ਪੰਜਵਾਂ ਸਭ ਤੋਂ ਵੱਡਾ ਨਿਵੇਸ਼ ਭਾਈਵਾਲ ਹੈ । ਪਾਣੀ ਅਤੇ ਕੂੜਾ ਪ੍ਰਬੰਧਨ, ਖੇਤੀਬਾੜੀ ਅਤੇ ਫੂਡ ਪ੍ਰੋਸੈੱਸਿੰਗ, ਅਖੁੱਟ ਊਰਜਾ ਅਤੇ ਬੰਦਰਗਾਹਾਂ, ਜਹਾਜ਼ਰਾਨੀ ਆਦਿ ਖੇਤਰਾਂ ਵਿੱਚ ਡੱਚ ਨਿਪੁੰਨਤਾ ਸਾਡੀਆਂ ਵਿਕਾਸ ਜ਼ਰੂਰਤਾਂ ਨਾਲ ਮੇਲ ਖਾਂਦੀ ਹੈ । ਇੰਡੋ-ਡੱਚ ਆਰਥਕ ਰੁਝਾਨ ਦੋਹਾਂ ਧਿਰਾਂ ਲਈ ਫਾਇਦੇ ਵਾਲੀ ਤਜਵੀਜ਼ ਹੈ । ਮੈਂ ਪ੍ਰਧਾਨ ਮੰਤਰੀ ਰੁੱਤੇ ਨਾਲ ਇਸ ਗੱਲ `ਤੇ ਵੀ ਚਰਚਾ ਕਰਾਂਗਾ ਕਿ ਕਿਵੇਂ ਆਪਸੀ ਤਾਲ-ਮੇਲ ਨੂੰ ਹੋਰ ਪਕੇਰਾ ਕਰਨ ਵਾਸਤੇ ਦੋਹਾਂ ਧਿਰਾਂ ਨੂੰ ਕੰਮ ਕਰਨਾ ਚਾਹੀਦਾ ਹੈ । ਮੈਂ ਵੱਡੀਆਂ ਡੱਚ ਕੰਪਨੀਆਂ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀਆਂ ਨਾਲ ਵੀ ਮੁਲਾਕਾਤ ਕਰਾਂਗਾ ਅਤੇ ਭਾਰਤੀ ਵਿਕਾਸ ਕਹਾਣੀ ਨਾਲ ਜੁੜਨ ਲਈ ਉਨ੍ਹਾਂ ਨੂੰ ਉਤਸ਼ਾਹਤ ਕਰਾਂਗਾ ।

ਨੀਦਰਲੈਂਡ ਵਿੱਚ ਪ੍ਰਵਾਸੀ ਭਾਰਤੀਆਂ ਦੀ ਗਿਣਤੀ ਯੂਰਪ ਭਰ ਵਿੱਚੋਂ ਦੂਜੇ ਨੰਬਰ `ਤੇ ਹੋਣ ਨਾਲ ਦੋਹਾਂ ਦੇਸ਼ਾਂ ਦੇ ਲੋਕਾਂ ਦੇ ਆਪਸੀ ਸਬੰਧ ਬਹੁਤ ਮਜ਼ਬੂਤ ਹਨ । ਨੀਦਰਲੈਂਡ ਵਿੱਚ ਭਾਰਤੀ ਸਮੁਦਾਇ ਨਾਲ ਰੁਝੇਵਿਆਂ ਦਾ ਮੈਨੂੰ ਇਤਜ਼ਾਰ ਹੈ। “

*****

AK/HS