ପିଏମଇଣ୍ଡିଆ

ପୁଣିଥରେ ଆଫଗାନିସ୍ତାନ ଆସିଥିବାରୁ ମୁଁ ଆନନ୍ଦିତ । ଯେଉଁ ଲୋକମାନେ ସାହସର ପରିଭାଷା ସ୍ଥିର କରିଛନ୍ତି ସେହିମାନଙ୍କ ଗହଣକୁ ଆସି ମୁଁ ନିଜକୁ ଗୌରବାନ୍ୱିତ ମନେ କରୁଛି । ଭାରତକୁ ଭଲ ପାଇବାର ସାଗରରେ ବନ୍ଧୁତ୍ୱର ଉତ୍ତାଳ ତରଙ୍ଗ ଦେଖି ମୁଁ ନିଜକୁ ଧନ୍ୟ ମନେ କରୁଛି । ଆଫଗାନିସ୍ତାନ ପ୍ରଗତି ପଥରେ ଅଗ୍ରସର ହେବା ପାଇଁ ଏହା ଆଉ ଗୋଟିଏ ବଡ ପଦକ୍ଷେପ ଏବଂ ଭାରତ-ଆଫଗାନିସ୍ତାନ ସମ୍ପର୍କରେ ଭାବ ଓ ଗୌରବର ଆଉ ଏକ ଐତିହାସିକ କ୍ଷଣ ।

ଋାଷ୍ଟ୍ରପତି ମହୋଦୟ, ଆପଣଙ୍କ ନିମନ୍ତ୍ରଣ ଏବଂ ଏହି ବନ୍ଧକୁ ଆଫଗାନିସ୍ତାନ-ଭାରତ ମୈତ୍ରୀ ଡ୍ୟାମ୍ ଭାବେ ନାମିତ କରିଥିବାରୁ ଆପଣଙ୍କୁ ଧନ୍ୟବାଦ ଜଣାଉଛି । ଆଫଗାନିସ୍ତାନର ଉଦାର ମନୋବୃତ୍ତିକୁ ଆମେ ବିନମ୍ରତା ସହ ଗ୍ରହଣ କରିଆସିଛୁ । ବିଶ୍ୱର ମହାନ ମାନବ-ସଭ୍ୟତାମାନ ନଦୀତଟରେ ହିଁ ବିକଶିତ ହୋଇଛି । ମାନବର ପ୍ରଗତିର ଧାରା ନଦୀ ଜଳର ଶ୍ରୋତରେ ପ୍ରବାହମାନ । ପବିତ୍ର କୋରାନ କହେ, ନଦୀ ସ୍ୱର୍ଗର ଛବିର କେନ୍ଦ୍ରବିନ୍ଦୁ । ଭାରତର ପୁରାତନ ଧର୍ମଗ୍ରନ୍ଥମାନଙ୍କରେ ନଦୀଗୁଡିକ ହିଁ ଆମ ଦେଶର ପରିଚୟ ଥିଲା ଏବଂ ଏଗୁଡିକ ଜୀବନଦାୟିନୀ ଭାବରେ ପରିଗଣିତ ହେଉଥିଲା । ଆଫଗାନିସ୍ତାନର ଗୋଟିଏ ଶିକ୍ଷଣୀୟ ଜନୋକ୍ତି ଅନୁଯାୟୀ – କାବୁଲ ବେ ଜର ବଶା ବେ ବର୍ଫ ନେ – ଅର୍ଥାତ କାବୁଲ୍ ରେ ପଛେ ସୁନା ନ ଥାଉ, ହେଲେ ବରଫ ଥାଉ – କାରଣ ଏହା ଯୋଗୁ ହିଁ କୃଷି ଓ ଜୀବନ ବଞ୍ଚାଉଥିବା ନଦୀ ତିଷ୍ଠିଛି । ତେଣୁ ଆଜି ଏହା ମାତ୍ର ଏଭଳି ଏକ ପରିଯୋଜନାର ଶୁଭ ଉଦ୍ଘାଟନ ନୁହେଁ, ଯାହା କେବଳ ଜମିକୁ ଜଳ ଯୋଗାଇବ ଓ ଘରକୁ ଆଲୋକ, ବରଂ ଆମେ ଗୋଟିଏ ଅଞ୍ଚଳକୁ ପୁନର୍ଜିବୀତ କରୁଛୁ, ଆଶା ସଂଚାର କରୁଛୁ, ଜୀବନକୁ ନୂଆ ରୂପ ଦେଉଛୁ ଏବଂ ଆଫଗାନିସ୍ତାନର ଭବିଷ୍ୟତକୁ ପୁନଃପରିଭାଷିତ କରୁଛୁ । ଏହି ବନ୍ଧ କେବଳ ବିଦ୍ୟୁତ ଶକ୍ତି ନୁହେଁ ବରଂ ଆଫଗାନିସ୍ତାନର ଭବିଷ୍ୟତର ଆଶା ଓ ବିଶ୍ୱାସ ମଧ୍ୟ ଉତ୍ପାଦନ କରିବ ।

ଏହି ପରିଯୋଜନା ଚିସ୍ତେ, ଓବେ, ପାସ୍ତୁନ୍ ଜାରଗୁନ୍, କାରୋଖ, ଗୋଜାରା, ଇନଜିଲ୍, ଜିନ୍ଦଜାନ, କୋହ୍ସାନ ଏବଂ ଘୋର୍ୟାନ ର ଛଅ ଶହ ଚାଳିଶଟି ଗାଁକୁ ଜଳସେଚିତ କରିବା ସଙ୍ଗେ ସଙ୍ଗେ ଏହି ଅଞ୍ଚଳର ଦୁଇ ଲକ୍ଷ ପଚାଶ ହଜାର ଘରକୁ ଆଲୋକିତ କରିବ । ଗତ ଡିସେମ୍ବରରେ ମୁଁ କାବୁଲ୍ ରେ ଆଫଗାନିସ୍ତାନର ସଂସଦ ଭବନକୁ ଉଦ୍ଘାଟନ କରି ଗୌରବାନ୍ୱିତ ହୋଇଥିଲି । ବନ୍ଧୁକ ଏବଂ ହିଂସା ମାଧ୍ୟମରେ ନୁହେଁ, ବରଂ ଭୋଟ ଏବଂ ଆଲୋଚନା ମାଧ୍ୟମରେ ନିଜ ଦେଶର ଭବିଷ୍ୟତ ଗଢିବାକୁ ପ୍ରୟାସ କରିଥିବା ଆଫଗାନିସ୍ତାନର ଜନସାଧାରଣଙ୍କ ପ୍ରତି ଶ୍ରଦ୍ଧାଞ୍ଜଳି । ଗ୍ରୀଷ୍ମର ଆଜିର ଏହି ଦିବସରେ ହେରାତ୍ ରେ ଆଫଗାନିସ୍ତାନର ସମୃଦ୍ଧ ଭବିଷ୍ୟତ ନିର୍ମାଣର ନିଷ୍ପତ୍ତିକୁ ସମ୍ମାନ ଜଣାଇବା ପାଇଁ ଆମେ ଏକତ୍ରିତ । ଆଫଗାନ ଏବଂ ଭାରତୀୟମାନେ ସତୁରି ଦଶକରେ ଏହାର ସ୍ୱପ୍ନ ଦେଖିଥିଲେ । ବିଗତ ଦଶନ୍ଧିଗୁଡିକ ଆମକୁ ଯୁଦ୍ଧର ଧ୍ୱଂସଲୀଳା କଥା କହେ । ଏହା ଆଫଗାନ ନିର୍ମାଣର ଯୁଦ୍ଧ ନ ଥିଲା ବରଂ ଏହା ଆଫଗାନୀମାନଙ୍କର ଗୋଟିଏ ପିଢିର ଭବିଷ୍ୟତ ନଷ୍ଟ କରିଦେଲା । ୨୦୦୧ ରେ ଆଫଗାନିସ୍ତାନରେ ନବ ସୂର୍ଯ୍ୟୋଦୟ ସହ ଆମେ ଏହି ପରିଯୋଜନା ପୁନର୍ବାର ଆରମ୍ଭ କରିଦେଲୁ ।

ପ୍ରତିଜ୍ଞା ଏବଂ ଧୈର୍ଯ୍ୟ, ସାହସ ଏବଂ ବିଶ୍ୱାସ ସହ ଆମେ ଏକାଠି ମିଶି ଦୂରତା ଓ ବାଧାବିଘ୍ନକୁ, ଭୟ ଏବଂ ହିଂସାକୁ ଜୟ କରିପାରିଛୁ । ବିଧ୍ୱଂସ ଓ ମୃତ୍ୟୁ, ପ୍ରତ୍ୟାଖ୍ୟାନ ଏବଂ ପ୍ରଭୁତ୍ୱର ଶକ୍ତି ତିଷ୍ଠିବା ଅସମ୍ଭବ ହୋଲି ଆଜି ସାହସୀ ଆଫଗାନବାସୀ ବାର୍ତ୍ତା ଦେଉଛନ୍ତି । ଆଫଗାନ ଲୋକଙ୍କ ସ୍ୱପ୍ନ ଏବଂ ଆଶାର ମାର୍ଗରେ ଏହା ପ୍ରତିବନ୍ଧକ ହୋଇପାରିବ ନାହିଁ । ନଦୀର ସ୍ୱଚ୍ଛ ଜଳରେ ସୁମଧୁର ଫଳ ଏବଂ କେଶର ଉତ୍ପନ୍ନ କରୁଥିବା ଏହି ଜମି ପୁଣିଥରେ ଜୀବନ୍ତ ହୋଇ ଉଠିବ । ଭୟର ଅନ୍ଧକାରରେ ରାତ୍ରିଯାପନ କରିଥିବା ଘରଗୁଡିକ ଆଶାର ଆଲୋକରେ ଉଦ୍ଭାସିତ ହେବ । ପୁରୁଷ ଓ ମହିଳାମାନେ ପୁଣିଥରେ ଆନନ୍ଦ ମନରେ ଶାନ୍ତି ଏବଂ ସୁରକ୍ଷାର ବାତାବରଣରେ କୃଷି କ୍ଷେତ୍ରରେ ପରିଶ୍ରମ କରିବେ । ବନ୍ଧୁକ ଧାରଣ କରିଥିବା କାନ୍ଧ ଉପରେ ଏବେ ଭୂମିରେ ସବୁଜିମା ଭରିଦେବା ପାଇଁ ଲଙ୍ଗଳ ଥିବ । ପିଲାଙ୍କ ମନରେ ଭବିଷ୍ୟତର ଶିକ୍ଷା ଓ ସୁଯୋଗର ସ୍ୱପ୍ନ ଭରିଯିବ ।

ପୁଣିଥରେ ଗୋଟିଏ କମ୍ ବୟସର କବୟୀତ୍ରିକୁ ଯନ୍ତ୍ରଣା, ଉପେକ୍ଷା ଏବଂ ପ୍ରତିଶୃତି ଅସ୍ୱୀକାର କରିବାର ଜୀବନ ଜୀଇଁବାକୁ ପଡିବ ନାହିଁ । ହେରାତ୍ ଅନେକ ଗୌରବଗାଥା ଏବଂ ବିଧ୍ୱଂସର ସାକ୍ଷୀ । ଏକଦା ଜଲାଲୁଦ୍ଦିନ ରୁମିଙ୍କ ସମୟର ଉତ୍କର୍ଷକୁ ଏହା ପୁଣି ଥରେ ଦେଖିବ । ଦିନେ ପଶ୍ଚିମ, ଦକ୍ଷିଣ ଏବଂ ମଧ୍ୟ ଏସିଆର ପ୍ରବେଶ ଦ୍ୱାର ଥିବା ଏହି ସହର ପୁଣି ଥରେ ଏହି ସମସ୍ତ ଅଞ୍ଚଳ ସମୃଦ୍ଧିର କେନ୍ଦ୍ର ପାଲଟିବ । ତେଣୁ ହେରାତ୍ ର ଜନସାଧାରଣ, ପ୍ରଶାସନ ଏବଂ ଆଫଗାନିସ୍ତାନ ସରକାରଙ୍କୁ ଆପଣମାନଙ୍କର ସହଯୋଗ, ଧୈର୍ଯ୍ୟ, ବୁଝାମଣା ଏବଂ ପରିଶେଷରେ ଆମ ଉପରେ ରଖିଥିବା ବିଶ୍ୱାସ ପାଇଁ ଗଭୀର ପ୍ରଶଂସା କରୁଛି ।

ଏହି ବନ୍ଧ ଇଟା, ବାଲି, କଂକ୍ରିଟରେ ତିଆରି ହୋଇ ନାହିଁ, ବରଂ ବନ୍ଧୁତ୍ୱ, ଆମ ବିଶ୍ୱାସ ଓ ଆଫଗାନ ଏବଂ ଭାରତୀୟମାନଙ୍କ ବୀରତ୍ୱରେ ତିଆରି ହୋଇଛି । ଗୌରବର ଏହି ମୁହୁର୍ତ୍ତରେ ଆମେ ବଳିଦାନ ଦେଇଥିବା ସେହି ଲୋକଙ୍କ ପ୍ରତି ଆମର ସହାନୁଭୁତି ଏବଂ ଗଭୀର କୃତଜ୍ଞତା ଜ୍ଞାପନ କରୁଛୁ ଯାହା ଫଳରେ ଆଫଗାନିସ୍ତାନର ଲୋକମାନେ ସେମାନଙ୍କ ବାଞ୍ଛିତ ଏବଂ ଉଜ୍ଜ୍ଵଳ ଭବିଷ୍ୟତ ପାଇପାରିବେ । ଆମ ରକ୍ତ, ସ୍ୱେଦ ଏବଂ ଅଶ୍ରୁ ଏହି ମାଟିରେ ମିଶି ଆମକୁ ଏହି ମାଟିରେ ଲେଖା ଏକ ଚିରସ୍ଥାୟୀ ବନ୍ଧନରେ ବାନ୍ଧିଦେଇଛି । ସେହି ବନ୍ଧନ ଯାହା ଆମକୁ ଏହି ଅଞ୍ଚଳ ସହ ଭାରତର ସମ୍ବନ୍ଧ କଥା ମନେ ପକାଏ । କିଛି ଲୋକଙ୍କ ପାଇଁ, ହରି ରୁଦ୍ ନଦୀ ବୈଦିକ ଯୁଗରୁ ଆମ ସମ୍ପର୍କର ଗୋଟିଏ ସୁତ୍ର । ବିଶ୍ୱ ଆଜି ଏହି ନଦୀକୁ ଆମ ପ୍ରଗତି ପାଇଁ ସହଯୋଗର ପ୍ରତିଶୃତିର ପ୍ରତୀକ ରୂପେ ଦେଖିବ । ଶହ ଶହ ବର୍ଷ ପୂର୍ବେ ଚିସ୍ତି ଆମକୁ ବନ୍ଧୁତ୍ୱର ବନ୍ଧନରେ ବାନ୍ଧିଥିବା ପରି ଏହି ମୈତ୍ରୀ ନଦୀବନ୍ଧ ମଧ୍ୟ ଆମକୁ ବାନ୍ଧିରଖିବ ।

କାରଣ, ଏହି ସ୍ଥାନରୁ ହିଁ ସୁଫିବାଦର ଚିସ୍ତି ପରମ୍ପରା ଭାରତକୁ ଆସିଥିଲା ଯାହାର ଗୌରବମୟ ପରମ୍ପରା ଏବଂ ଶିକ୍ଷା ଆଜମେର୍, ଦିଲ୍ଲୀ ଏବଂ ଫତେପୁର-ସିକ୍ରିର ଦରଗାହ୍ ରୁ ନିନାଦିତ ହେଉଛି । ଏହାର ପ୍ରେମ, ଶାନ୍ତି, ଅନୁକମ୍ପା, ସର୍ବଧର୍ମ ସମନ୍ୱୟ – ଭଗବାନଙ୍କ ସୃଷ୍ଟିରେ ସମସ୍ତ ପ୍ରତି ସମ୍ମାନ ଏବଂ ମାନବ ସେବାର ବାର୍ତ୍ତା ଆଜି ମଧ୍ୟ ସବୁ ଧର୍ମର ଲୋକଙ୍କୁ ଆକର୍ଷିତ କରୁଛି । ଭାରତ ଏବଂ ଆଫଗାନିସ୍ତାନର ଲୋକ ଜାଣନ୍ତି ଯେ ପ୍ରେମର କବିତା ଏବଂ ଶାନ୍ତି ଓ ଅଧ୍ୟାତ୍ମର ଦେଶ ଆଫଗାନିସ୍ତାନର ପ୍ରକୃତ ପରିଚୟ ହିଂସା ଏବଂ ଚରମପନ୍ଥୀ ଭାବନା ନୁହେଁ ବରଂ ଏହି ମୂଲ୍ୟବୋଧ । ଏହି ମୂଲ୍ୟବୋଧ ହିଁ ମହାନ୍ ଆଫଗାନବାସୀଙ୍କୁ ହିଂସା ଆପଣେଇନେଇଥିବା ସେମାନଙ୍କ ନିଜ ଲୋକ ଏବଂ ସେମାନଙ୍କ ସହଯୋଗୀଙ୍କ ସହ ଶାନ୍ତି ସ୍ଥାପନା ପାଇଁ ଧୈର୍ଯ୍ୟ ଏବଂ ଦୃଢତା ପ୍ରଦାନ କରୁଛି ।

ବିଶ୍ୱର ଅନ୍ୟ ଯେକୌଣସି ଜାତି ପରି ନିଜ ସ୍ୱାଧୀନତାକୁ ନିଜେ ରକ୍ଷା କରିପାରିବାର ବିଶ୍ୱାସ ବହନ କରୁଥିବା ସତ୍ତ୍ୱେ ଆଫଗାନବାସୀ ଏହି ମାର୍ଗକୁ ଆପଣେଇ ନେଇଛନ୍ତି । ଏହି ମୂଲ୍ୟବୋଧକୁ ଭିତ୍ତିକରି ଆଫଗାନବାସୀ ଏବଂ ଭାରତବାସୀ ପରସ୍ପର ସହଯୋଗର ଆବଶ୍ୟକତା ଅନୁଭବ କରୁଛନ୍ତି । ଭାରତରେ ଚିସ୍ତି ସମ୍ପ୍ରଦାୟର ପ୍ରଥମ ସନ୍ଥ ଖ୍ୱାଜା ମୋଇନୁଦ୍ଦିନ ଚିସ୍ତି କହିଥିଲେ ଯେ, ମାନବଜାତି ସୂର୍ଯ୍ୟଙ୍କର ସ୍ନେହ, ନଦୀମାନଙ୍କର ବଦାନ୍ୟତା ଏବଂ ପୃଥିବୀର ଆତିଥ୍ୟଲାଭ କରିବା ଉଚିତ୍ । ଏହା କହିବାରେ ତାଙ୍କ ମନରେ କେବଳ ଯେ ଆଫଗାନର ତାଙ୍କ ପୂର୍ବପୁରୁଷଙ୍କ ଭୂମି ନ ଥାଇ ହୁଏତ ଆଫଗାନବାସୀଙ୍କ କଥା ଥିବ । ସେଥିପାଇଁ, ଡିସେମ୍ବରରେ ମୋର କାବୁଲ୍ ଗସ୍ତ ସମୟରେ ମୁଁ ଆପଣମାନଙ୍କ ହୃଦୟରେ ଦୟାଳୁ ସ୍ୱଭାବ ଦେଖିଥିଲି । ଭାରତ ପାଇଁ ଗଭୀର ସ୍ନେହ ଆପଣଙ୍କ ଚକ୍ଷୁରେ ସ୍ପଷ୍ଟ ଝଲସୁଥିଲା । ଆପଣମାନଙ୍କ ସ୍ମିତହାସ୍ୟରେ ବନ୍ଧୁତ୍ୱର ଆନନ୍ଦକୁ ମୁଁ ଦେଖିପାରିଥିଲି । ଆପଣଙ୍କ ଦୃଢ ଆଲିଙ୍ଗନରେ ମୁଁ ଅନୁଭବ କରିଥିଲି ମିତ୍ରତାର ବିଶ୍ୱାସ । ସେହି ସ୍ମରଣୀୟ ମୁ୍ହୁର୍ତ୍ତରେ ଭାରତ ପୁଣି ଥରେ ଆପଣଙ୍କ ଲୋକମାନଙ୍କ ଉଦାରତା, ଏହି ଭୂମିର ସୌନ୍ଦର୍ଯ୍ୟ ଏବଂ ଗୋଟିଏ ରାଷ୍ଟ୍ରର ବନ୍ଧୁତା ଦେଖିଥିଲା । ଆଜି ମୁଁ ଶହେ ପଚିଶ କୋଟି ଲୋକଙ୍କ କୃତଜ୍ଞତା, ପ୍ରଶଂସା ଏବଂ ସହଯୋଗର ପ୍ରତିଜ୍ଞାକୁ ନେଇ ପୁଣି ଥରେ ଆସିଛି ।

ଆମ ସହଭାଗୀତାରେ ବିଦ୍ୟାଳୟ, ସ୍ୱାସ୍ଥ୍ୟ କେନ୍ଦ୍ର ଏବଂ ଗ୍ରାମାଞ୍ଚଳ ଲୋକଙ୍କ ପାଇଁ ଜଳସେଚନ ସୁବିଧାର ନିର୍ମାଣ ହୋଇଛି । ଏହା କୌଶଳଧାରୀ ମହିଳା ଏବଂ ଶିକ୍ଷିତ ଯୁବକମାନଙ୍କୁ ଆଫଗାନିସ୍ତାନର ଭବିଷ୍ୟତକୁ ନେଇ ଦାୟୀତ୍ୱ ବହନ କରିବା ପାଇଁ ସଶକ୍ତ କରିଛି । ଆମ ଦେଶ ମଧ୍ୟରେ ଦୂରତ୍ୱକୁ ହ୍ରାସ କରିବା ପାଇଁ ଆମେ ଜରଞ୍ଜ ଠାରୁ ଦେଲରାମ୍ ପର୍ଯ୍ୟନ୍ତ ସଡକ ନିର୍ମାଣ ଏବଂ ଆପଣଙ୍କ ଘରକୁ ବିଦ୍ୟୁତ ଶକ୍ତି ପହଞ୍ଚାଇବା ପାଇଁ ହାତ ମିଳାଇଛୁ । ଇରାନ୍ ର ଚାବହାର ବନ୍ଦରରେ ଭାରତର ଅର୍ଥଲଗାଣ ଆଫଗାନିସ୍ତାନକୁ ପୃଥିବୀର ଅନ୍ୟ ସ୍ଥାନ ସହ ସଂଯୁକ୍ତ କରିବା ସହ ଏହା ପାଇଁ ସମୃଦ୍ଧିର ଦ୍ୱାର ଫିଟାଇବ ।

ଏବଂ ଏହି ପରିଦୃଶ୍ୟକୁ କାର୍ଯ୍ୟକାରୀ କରିବା ପାଇଁ ଏହି ମାତ୍ର ଗତ ମାସରେ ରାଷ୍ଟ୍ରପତି ଘନି, ଇରାନ୍ ର ରାଷ୍ଟ୍ରପତି ରୁହାନୀ ଏବଂ ମୁଁ ଆଫଗାନିସ୍ତାନ, ଇରାନ୍ ଓ ଭାରତ ମଧ୍ୟରେ ଚାବହାର ବାଣିଜ୍ୟ ଏବଂ ଗମନାଗମନ ରାଜିନାମା ସ୍ୱାକ୍ଷର କରିବାକୁ ଏକାଠି ହୋଇଥିଲୁ ।

ଆମ ବନ୍ଧୁତ୍ୱର ଫଳ କେବଳ କାବୁଲ୍, କାନ୍ଦାହାର, ମଜାର ଏବଂ ହେରାତ୍ ମଧ୍ୟରେ ସୀମିତ ହୋଇ ରହିବ ନାହିଁ । ଆମର ସହଯୋଗ ସମଗ୍ର ଆଫଗାନିସ୍ତାନ ପାଇଁ ରହିବ । ଆମର ସହଭାଗୀତା ଆଫଗାନିସ୍ତାନର ସମସ୍ତ ଲୋକଙ୍କ ପାଇଁ ଲାଭପ୍ରଦ ହେବ । କାରଣ ଭିନ୍ନ ଭୌଗୋଳିକ ପରିସ୍ଥିତି ଏବଂ ପୁସ୍ତୁନ୍, ତାଜିକ୍, ଉଜବେକ ଏବଂ ହଜ୍ରାନ୍ ଭଳି ଭିନ୍ନ ପରିଚୟ ସତ୍ତ୍ୱେ ଆଫଗାନିସ୍ତାନ ଏକ ହୋଇ ରହୁ ଏବଂ ସମୃଦ୍ଧ ହେଉ । କାରଣ ଆଫଗାନ ଲୋକଙ୍କ ମଧ୍ୟରେ ବିଭାଜନ କେବଳ ପ୍ରଧାନ୍ୟ ବିସ୍ତାର କରିବାକୁ ଚାହୁଁଥିବା ବାହ୍ୟ ଶକ୍ତିମାନଙ୍କୁ ସହାୟକ ହେବ । ଆମେ ଏକାଠି କାମ କଲେ, ଆମ ସହଭାଗୀତାକୁ ରକ୍ଷା କରିବାର ଆପଣମାନଙ୍କ ଦୃଢ ପ୍ରତିଜ୍ଞାରୁ ଆମ ମଧ୍ୟରେ ଶକ୍ତି ଏବଂ ବିଶ୍ୱାସର ସଂଚାର ହୁଏ ।

ଆମ ଉପରେ ଆକ୍ରମଣ ହେଉଥିବା ସମୟରେ ବୀର ଆଫଗାନମାନେ ଆମକୁ ସେମାନଙ୍କ ନିଜର ଭଳି ରକ୍ଷା କରନ୍ତି । ଭାରତୀୟ ବନ୍ଧୁମାନେ ସୁରକ୍ଷିତ ରହନ୍ତୁ ସେଥିପାଇଁ ସେମାନେ ନିଜେ ସୀମାନ୍ତରେ ପ୍ରହରୀ ହୋଇ ରହନ୍ତି । ଏହାହିଁ ଆପଣଙ୍କ ହୃଦୟର ମହାନତା ଏବଂ ଆପଣଙ୍କ ବନ୍ଧୁତ୍ୱର ଶକ୍ତି । ମୁଁ ପ୍ରଧାନମନ୍ତ୍ରୀ ଭାବେ ଦାୟୀତ୍ୱ ଗ୍ରହଣ କରିବା ଦିନ ଠାରୁ ଏହା ଲକ୍ଷ୍ୟ କରିଛି । କାରଣ, ସେହିଦିନ ଯେତେବେଳେ ଆତଙ୍କବାଦୀମାନେ ହେରାତ୍ ରେ ଥିବା ଆମ ବାଣିଜ୍ୟ ଦୂତାବାସ ଉପରେ ଭୟଙ୍କର ଆକ୍ରମଣ କଲେ, ସେତେବେଳେ ଆଫଗାନ ସୈନିକମାନଙ୍କ ବୀରତ୍ୱପୂର୍ଣ୍ଣ ପ୍ରୟାସ ଓ ଆମ କର୍ମଚାରୀମାନଙ୍କ ପ୍ରଚେଷ୍ଟା ଗୋଟିଏ ବଡ ଦୁର୍ଘଟଣାକୁ ଏଡାଇବା ସହ ଅନେକ ଜୀବନକୁ ରକ୍ଷା କରିପାରିଲା ।

ରାଷ୍ଟ୍ରପତି ମହୋଦୟ, ବନ୍ଧୁଗଣ,

ପ୍ରତ୍ୟେକ ଭାରତୀୟଙ୍କ ଦ୍ୱାରା ଆଫଗାନିସ୍ତାନର ସଫଳତା କାମ୍ୟ । ଏହା ଆଫଗାନମାନଙ୍କ ପ୍ରତି ଆମ ହୃଦୟରେ ଥିବା ପ୍ରେମ ଏବଂ ଆଦରର ଫଳ । ଆମେ ଆପଣଙ୍କ ଗଣତନ୍ତ୍ରକୁ ସୁଦୃଢ, ଲୋକଙ୍କୁ ଏକ ଏବଂ ଅର୍ଥବ୍ୟବସ୍ଥାକୁ ସମୃଦ୍ଧ ରୂପରେ ଦେଖିବାକୁ ଚାହୁଁ । ଏହାର କଳା, ସଂସ୍କୃତି ଏବଂ କବିତା ସମୃଦ୍ଧ ହେବା ଚାହୁଁ । ଆମେ ଆପଣଙ୍କ କ୍ରିକେଟରମାନଙ୍କୁ ଟେଷ୍ଟ କ୍ରିକେଟର ଉପରକୁ ଉଠିବା ଏବଂ ଆଇପିଏଲରେ ଗୌରବଶାଳୀ ପ୍ରଦର୍ଶନ କରୁଥିବା ଦେଖିବାକୁ ଚାହୁଁ ।

ଆଫଗାନିସ୍ତାନ ସଫଳ ହେଲେ ସମଗ୍ର ବିଶ୍ୱ ସୁରକ୍ଷିତ ଏବଂ ଅଧିକ ସୁନ୍ଦର ହେବ । ଆଫଗାନମାନଙ୍କ ପରିଚୟ ପ୍ରଦାନ କରୁଥିବା ମୂଲ୍ୟବୋଧ ପ୍ରଚଳିତ ହେଲେ, ଆତଙ୍କବାଦ ଏବଂ ଚରମପନ୍ଥୀ ଶକ୍ତି ପଛଘୁଞ୍ଚା ଦେବେ । କାରଣ ଆତଙ୍କବାଦ ଏବଂ ଚରମପନ୍ଥୀ ଶକ୍ତି ଆପଣଙ୍କ ସୀମାରେ କି ଆମ ସୀମାରେ ତିଷ୍ଠି ପାରିବ ନାହିଁ ।

ଆମ ସମୟର କ୍ରମବର୍ଦ୍ଧିଷ୍ଣୁ ଅଶାନ୍ତି ମଧ୍ୟରେ ବିଶ୍ଵ କେବେହେଲେ ଆଫଗାନ ଲୋକଙ୍କ ବୀରତ୍ଵପୂର୍ଣ୍ଣ ଓ ମହନୀୟ ସଂଗ୍ରାମ – ଯାହା ସେମାନଙ୍କ ପାଇଁ ଏବଂ ବିଶ୍ଵ ଲାଗି ଉଦ୍ଦିଷ୍ଟ – ତାକୁ କେବେହେଲେ ଭୁଲି ପାରିବ ନାହିଁ । ଭାରତ ଏ କଥାକୁ ସବୁବେଳେ ମନେ ରଖିଥିବ ।

ଯାହା ମୁଁ ସେତେବେଳେ କହିଥିଲି, ଏବଂ ପୁଣି ଥରେ କହୁଛି, ଆପଣଙ୍କ ବନ୍ଧୁତା ଆମ ପାଇଁ ଗୌରବର ବିଷୟ । ଆପଣଙ୍କ ସ୍ୱପ୍ନ ଆମର ଦାୟୀତ୍ୱ । ଭାରତର କ୍ଷମତା ସୀମିତ ହୋଇପାରେ, କିନ୍ତୁ ଆମ ପ୍ରତିଶୃତି ସୀମାହୀନ । ଆମ ସମ୍ବଳ ଅନତିରିକ୍ତ ହୋଇପାରେ, କିନ୍ତୁ ଆମର ଇଚ୍ଛା ସୀମାହୀନ । ଅନ୍ୟମାନଙ୍କ ପ୍ରତିଶୃତିରେ କୌଣସି ସୀମା ଥାଇପାରେ, କିନ୍ତୁ ଆମ ସମ୍ପର୍କ କାଳାତୀତ । ଆମ ମଧ୍ୟରେ ଭୌଗୋଳିକ ଏବଂ ରାଜନୈତିକ ସୀମା ଥାଇପାରେ, କିନ୍ତୁ ଆମେ ଆମ ଉଦ୍ଦେଶ୍ୟର ସ୍ପଷ୍ଟତାକୁ ନେଇ ଆମ ମାର୍ଗ ତିଆରି କରୁ । ଆମେ ଅନ୍ୟମାନଙ୍କ ପ୍ରତିରୋଧ ଏବଂ ସନ୍ଦେହର ଶୀକାର ହେଉଁ, କିନ୍ତୁ ଆମର ସଙ୍କଳ୍ପ ଦୃଢ । ଆପଣଙ୍କ ବିଶ୍ୱାସ ଆମର ମାର୍ଗଦର୍ଶନ କରୁଛି ।

କିଛି ଲୋକ ଆପଣଙ୍କ ଭବିଷ୍ୟତ ପ୍ରତି ସନ୍ଦୀହାନ ହୋଇପାରନ୍ତି, କିନ୍ତୁ ଆମର ବିଶ୍ୱାସ ଯେ, ଆପଣ ବାଛିନେଇଥିବା ପଥ, ଯାହାର ଯାତ୍ରା କେତେ କଠିନ କିମ୍ବା ଦୁରୂହ ହୋଇଥାଉ, ସେଥିରୁ ଆପଣଙ୍କୁ କୌଣସି ଶକ୍ତି ବିଚ୍ୟୁତ କରିପାରିବ ନାହିଁ । ତେଣୁ, ଆନ୍ତର୍ଜାତିକ ଏବଂ ଆଞ୍ଚଳିକ ମଞ୍ଚରେ ଶାନ୍ତି, ସମୃଦ୍ଧି, ଏକତା, ଏବଂ ଗଣତନ୍ତ୍ର ପାଇଁ ଆଫଗାନିସ୍ତାନର ଅଧିକାର ସମ୍ପର୍କରେ ଆମର ସ୍ୱର ଏକ ହେବ । ଏହି ଭବିଷ୍ୟତ ପାଇଁ ଆଫଗାନିସ୍ତାନର ଗାଁ, ସହର ଏବଂ କ୍ଷେତରେ ଆମେ ଏକାଠି କାମ କରିବୁ ।

ଯେକୌଣସି ପରିସ୍ଥିତି ହେଉ, ସୁଖ-ଦୁଃଖର ମୁହୁର୍ତ୍ତ ହେଉ, ଆମେ ହେରାତ୍ ର ମହାନ୍ ସୁଫି କବି ହକିମ୍ ଜାମିଙ୍କ ଭାଷାରେ ବନ୍ଧୁତାର ଶୀତଳ ପବନର ତାଜାପଣ ଏବଂ ସୁଖ ଅନୁଭବ କରିବୁ ।

ଏହି ସମ୍ମାନ, ସ୍ନେହ ଏବଂ ବନ୍ଧୁତ୍ୱ ପାଇଁ ଧନ୍ୟବାଦ ।

ଧନ୍ୟବାଦ ।