ପିଏମଇଣ୍ଡିଆ

ମହାମହିମ ପ୍ରଧାନମନ୍ତ୍ରୀ ଲୀ ସିଏନ ଲୁଙ୍ଗ,

ଗଣମାଧ୍ୟମର ପ୍ରତିନିଧିଗଣ,

ଚାଳକ ବିହୀନ କାରକୁ ରାସ୍ତାରେ ଛାଡିବାରେ ସିଙ୍ଗାପୁର ବିଶ୍ୱରେ ଅଗ୍ରଣୀ ଦେଶ ବୋଲି ମୋତେ ସୂଚନା ଦିଆଯାଇଛି । ହେଲେ, ଆମର ଦ୍ୱିପାକ୍ଷିକ ସମ୍ପର୍କ ପାଇଁ ମୁ ନିଶ୍ଚିତ, ଆମେ ସମସ୍ତେ ନିଶ୍ଚିତ । ଭାରତର ଜଣେ ଦୃଢ ଶୁଭେଚ୍ଛୁ ପ୍ରଧାନମନ୍ତ୍ରୀ ଲୀ ସିଙ୍ଗାପୁରର ଚାଳକ ସିଟ୍ ରେ ବସିଛନ୍ତି ତାହା ମଧ୍ୟ ଆମ ପାଇଁ ଆଶ୍ୱସ୍ତିର ବିଷୟ । ମହାମହିମ ଲୀ, ଆପଣ ଭାରତର ଜଣେ ବନ୍ଧୁ । ଆମର ସମ୍ବନ୍ଧକୁ ସୁଦୃଢ କରିବାରେ ଆପଣଙ୍କ ସମର୍ପଣ ଏବଂ ଅବଦାନକୁ ଆମେ ପ୍ରଶଂସା କରୁ । ଆଜି ଏଠାରେ ଆପଣଙ୍କୁ ସ୍ୱାଗତ କରିବା ମୋ ପାଇଁ ବଡ ଗୌରବର କଥା ।

ବନ୍ଧୁଗଣ,

ପ୍ରଧାନମନ୍ତ୍ରୀ ଭାବେ ମୋର ପ୍ରଥମ ସିଙ୍ଗାପୁର ଯାତ୍ରା, କେବଳ ସିଙ୍ଗାପୁରର ନୁହେଁ, ବରଂ ସମଗ୍ର ଏସିଆର ମହାନ ପଥପ୍ରଦର୍ଶକ ଲୀ କ୍ୟୁଆନ ୟୂଙ୍କୁ ସମ୍ମାନ ପ୍ରଦର୍ଶନ ଭଳି ଏକ ପବିତ୍ର ଉଦ୍ଦେଶ୍ୟକୁ ନେଇ ହୋଇଥିଲା । ଚଳିତ ବର୍ଷ ସିଙ୍ଗାପୁରର ଅନ୍ୟ ଏକ ବରପୁତ୍ର ତଥା ପୂର୍ବତନ ରାଷ୍ଟ୍ରପତି ଏସ.ଆର. ନାଥନଙ୍କ ବିୟୋଗ ଆମକୁ ବ୍ୟଥିତ କରିଥିଲା । ସେ ଭାରତର ଜଣେ ଘନିଷ୍ଠ ବନ୍ଧୁ ଥିଲେ । ତାଙ୍କୁ ପ୍ରବାସୀ ଭାରତୀୟ ସମ୍ମାନ ପ୍ରଦାନ କରି ଆମେ ଗୌରବାନ୍ୱିତ ହୋଇଥିଲୁ । ଆମେ ତାଙ୍କୁ ସବୁବେଳେ ମନେରଖିଥିବୁ ।

ବନ୍ଧୁଗଣ,

“Majulah Singapura” – ଅର୍ଥାତ “ଅଗ୍ରସର ସିଙ୍ଗାପୁରା” . . . ହେଉଛି ସିଙ୍ଗାପୁରର ଜାତୀୟ ସଙ୍ଗୀତ । ତେଣୁ ଏଥିରେ ଆଶ୍ଚର୍ଯ୍ୟ ହେବାର କିଛି ନାହିଁ ଯେ, ଯଦି କୌଣସି ଦେଶ ଥାଏ, ଯିଏ ଭବିଷ୍ୟତର ଆବଶ୍ୟକତାକୁ ଆଖିଆଗରେ ରଖି ବର୍ତ୍ତମାନ କାର୍ଯ୍ୟ କରୁଛି, ତେବେ ତାହା ସିଙ୍ଗାପୁର । ନିର୍ମାଣ, ପରିବେଶ, ନବୀନତ୍ୱ, ଜ୍ଞାନକୌଶଳ କିମ୍ବା ଜନସାଧାରଣଙ୍କୁ ସେବା ପ୍ରଦାନ, ଯେ କୌଣସି କ୍ଷେତ୍ର ହେଉ, ଏସବୁରେ ସିଙ୍ଗାପୁର ଆଜି ଯାହା କରୁଛି, ଦୁନିଆ ତାହା କାଲି କରୁଛି ।

ବନ୍ଧୁଗଣ,

ବାର ମାସରୁ ମଧ୍ୟ କମ୍ ସମୟ ପୂର୍ବେ, ମୋର ସିଙ୍ଗାପୁର ଗସ୍ତ ସମୟରେ, ଆମେ ଆମ ଦ୍ୱିପାକ୍ଷିକ ସମ୍ପର୍କକୁ ରଣନୀତିକ ଭାଗୀଦାରିତାରେ ପରିଣତ କରିବାର ନୂତନ ଉତ୍ସାହ ଓ ଶକ୍ତି ନେଇ ଆଗକୁ ବଢିଥିଲୁ ଓ ସେ ଦିଗରେ ଉନ୍ନତି କରିଥିଲୁ । ଉଭୟ ଦେଶର ଜନସାଧାରଣଙ୍କୁ ଏହାର ଲାଭ ପହଞ୍ଚାଇବା ପାଇଁ ସିଙ୍ଗାପୁରର ସାମର୍ଥ୍ୟ ଏବଂ ଭାରତର ମାପଦଣ୍ଡକୁ ଏକାଠି କରିବା ଏବଂ ସିଙ୍ଗାପୁରର ପରିବର୍ତ୍ତନଶୀଳତା ଓ ଆମ ରାଜ୍ୟଗୁଡିକର ଗତିଶୀଳତାକୁ ଯୋଡିବା ଏହି ସହଭାଗୀତାର ଲକ୍ଷ୍ୟ । ଗତ ବର୍ଷ ମୋ ଗସ୍ତ ସମୟରେ ଆମେ ଆମର ମହତ୍ୱାକାଂକ୍ଷୀ ସହଯୋଗ କାର୍ଯ୍ୟସୂଚୀକୁ ବାସ୍ତବତାର ରୂପରେଖ ଦେବାପାଇଁ ଗୋଟିଏ ଯୋଜନା ପ୍ରସ୍ତୁତ କରିଥିଲୁ । ରାଜି ହୋଇଥିବା ନିଷ୍ପତ୍ତିଗୁଡିକୁ ଶୀଘ୍ର କାର୍ଯ୍ୟକାରୀ କରିବା ଆମ ବଚନବଦ୍ଧତା ଏକ ଗୁରୁତ୍ୱପୂର୍ଣ୍ଣ ଉପାଦାନ । ଆଜି ମହାମହିମ ଲୀ ଏବଂ ମୁଁ ଆମର ରଣନୀତିକ ଭାଗୀଦାରିତାର ଆକାର ଏବଂ ଉପାଦାନ ସମ୍ପର୍କରେ ସମୀକ୍ଷା କରିଛୁ । ମୋର ସିଙ୍ଗାପୁର ଗସ୍ତ ସମୟରେ ପ୍ରଧାନମନ୍ତ୍ରୀ ଲୀ ମୋତେ ଇନଷ୍ଟିଚ୍ୟୁଟ ଫର୍ ଟେକ୍ନିକାଲ୍ ଏଡୁକେଶନ୍ ପରିଦର୍ଶନ ପାଇଁ ନେଇଯାଇଥିଲେ । ଆଜି ଆମେ ଦକ୍ଷତା ବୃଦ୍ଧି ସମ୍ପର୍କରେ ଗୁରୁତ୍ୱ ବହନ କରୁଥିବା ଦୁଇଟି ବୁଝାମଣା ଉପରେ ସ୍ୱାକ୍ଷର କରିଛୁ । ପ୍ରଥମଟି ହେଲା- ଆମ ଉତ୍ତରପୂର୍ବାଞ୍ଚଳ ରାଜ୍ୟଗୁଡିକ ପାଇଁ ଗୁଆହାଟୀଠାରେ ଗୋଟିଏ ସ୍କିଲ୍ ଡେଭେଲପମେଣ୍ଟ ସେଣ୍ଟର ପ୍ରତିଷ୍ଠା ଏବଂ ଅନ୍ୟଟି ନେସନାଲ ସ୍କିଲ୍ ଡେଭଲପମେଣ୍ଟ କାଉନସିଲ ସମ୍ପର୍କରେ । ଉଦୟପୁରରେ ରାଜସ୍ଥାନ ସରକାରଙ୍କ ସହେଯାଗରେ ଉଦ୍ଘାଟିତ ହେବାକୁ ଥିବା ସେଣ୍ଟର ଅଫ ଏକ୍ସେଲେନ୍ସ ଫର୍ ଟୁରିଜମ୍ ଟ୍ରେନିଂ ପାଇଁ ମଧ୍ୟ ମୁଁ ସ୍ୱାଗତ ଜଣାଉଛି । ସହରୀ ବିକାଶ ଏବଂ ବର୍ଜ୍ୟବସ୍ତୁ ପରିଚାଳନା କ୍ଷେତ୍ରରେ ରାଜସ୍ଥାନ ମଧ୍ୟ ସିଙ୍ଗାପୁର ସହିତ ସହଭାଗୀତା କରୁଛି । ଅମରାବତୀର ବିକାଶ ଏବଂ ଆନ୍ଧ୍ର ପ୍ରଦେଶର ନୂଆ ରାଜଧାନୀ ନିର୍ମାଣ ପାଇଁ ମଧ୍ୟ ସିଙ୍ଗାପୁର ଆମ ସହଯୋଗୀ ରହିଛି ।

ବନ୍ଧୁଗଣ,

ବାଣିଜ୍ୟ ଏବଂ ବିନିଯୋଗ କ୍ଷେତ୍ରରେ ଥିବା ଆମ ସହଭାଗିତା ହିଁ ଆମ ଦ୍ୱିପାକ୍ଷିକ ସମ୍ପର୍କର ଭିତ୍ତିଭୂମି ନିର୍ମାଣ କରୁଛି । ବ୍ୟବସାୟ ସହ ବ୍ୟବସାୟର ଏକ ଦୃଢ ନେଟୱାର୍କଜନିତ ଲାଭ ମଧ୍ୟ ଆମେ ଉଠାଉଛୁ । ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ଲୀ ଏବଂ ମୁଁ ଆମ ସୁପରିକଳ୍ପିତ ଅର୍ଥନୈତିକ ସହଯୋଗ ରାଜିନାମାର ଦ୍ୱିତୀୟ ସମୀକ୍ଷାକୁ ତ୍ୱରାନ୍ୱିତ କରିବା ପାଇଁ ରାଜି ହୋଇଛୁ । ବୌଦ୍ଧିକ ସମ୍ପତ୍ତି ସମ୍ପର୍କରେ ଆଜି ସ୍ୱାକ୍ଷରିତ ହୋଇଥିବା ବୁଝାମଣା ପତ୍ର ବ୍ୟବସାୟ ବ୍ୟବସାୟ ମଧ୍ୟରେ ଅଧିକ ବିନିମୟ ଏବଂ ସହଯୋଗିତା ପାଇଁ ପଥ ପରିଷ୍କାର କରିବ । ସିଙ୍ଗାପୁରରେ କର୍ପୋରେଟ ରୂପି ବଣ୍ଡ ଜାରି ହେବାକୁ ମଧ୍ୟ ପ୍ରଧାନମନ୍ତ୍ରୀ ଲୀ ଏବଂ ମୁଁ ସ୍ୱାଗତ କରୁଛୁ । ଭାରତର ବୃହତ୍ ଭିତ୍ତିଭୂମି ବିକାଶର ଆବଶ୍ୟକତା ପୂରଣ ନିମନ୍ତେ ପୁଞ୍ଜି ଯୋଗାଡ ଦିଗରେ ଏହା ହେବ ଆଉ ଗୋଟିଏ ପଦକ୍ଷେପ ।

ବନ୍ଧୁଗଣ,

ଆମର ପ୍ରତିରକ୍ଷା ଏବଂ ସୁରକ୍ଷା ସହଯୋଗିତା ଆମ ରଣନୀତିକ ଭାଗୀଦାରିତାର ମୂଖ୍ୟ ଆଧାର । ଦୁଇଟି ତଟବର୍ତ୍ତୀ ଦେଶ ଭାବରେ ଯୋଗାଯୋଗ ପାଇଁ ସାମୁଦ୍ରିକ ମାର୍ଗକୁ ଖୋଲା ରଖିବା ଏବଂ ସାଗର ଓ ମହାସାଗର ପାଇଁ ରହିଥିବା ଆନ୍ତର୍ଜାତିକ ଆଇନଗତ ଆଦେଶକୁ ସମ୍ମାନ ଜଣାଇବା ଆମ ଉଭୟ ଦେଶର ପ୍ରାଥମିକତା ଅଟେ । ଆସିଆନର ଆଦର୍ଶ ଆଧାରରେ ବିଶ୍ୱାସର ବାତାବରଣ ମଧ୍ୟରେ ରହି ଆଞ୍ଚଳିକ ସହଯୋଗିତା ପାଇଁ ଗୋଟିଏ ଖୋଲା ଏବଂ ସମାବେଶୀ ଢାଞ୍ଚାର ନିର୍ମାଣ ପୂର୍ବ ଏସିଆ ଶିଖର ବୈଠକ ଏବଂ ଏସିଆନ ରିଜିଓନାଲ ଫ୍ରେମୱାର୍କର ଲକ୍ଷ୍ୟ । ବୃଦ୍ଧି ପାଉଥିବା ଆତଙ୍କବାଦ, ବିଶେଷକରି ସୀମାପାର ଆତଙ୍କବାଦ ଏବଂ ମୌଳବାଦର ଅଭ୍ୟୁଦୟ ଆମ ସୁରକ୍ଷା ପାଇଁ ବଡ ଆହ୍ୱାନ ସୃଷ୍ଟି କରିଛି । ସେମାନେ ଆମ ସମାଜକୁ ଭୟଭୀତ କରୁଛନ୍ତି । ଯେଉଁମାନେ ଶାନ୍ତି ଏବଂ ମାନବିକତା ଉପରେ ବିଶ୍ୱାସ କରନ୍ତି ସେମାନେ ଏହି ଧମକ ବିରୁଦ୍ଧରେ ଗୋଟିଏ ମଞ୍ଚରେ ଠିଆ ହୋଇ ଏକ ସଙ୍ଗେ କାର୍ଯ୍ୟ କରବା ଆବଶ୍ୟକ ବୋଲି ମୋର ଦୃଢ ବିଶ୍ୱାସ । ସାଇବର ସୁରକ୍ଷା ସମେତ ଏହି ଆଶଙ୍କାର ମୁକାବିଲା କରିବା ପାଇଁ ସହଯୋଗ ବୃଦ୍ଧି ନିମନ୍ତେ ଆଜି ଆମେ ଏକମତ ହୋଇଛୁ ।

ମହାମହିମ ଲୀ,

ଏକ ଦୃଢ ଅର୍ଥନୈତିକ ଅଭିବୃଦ୍ଧି ଏବଂ ରୂପାନ୍ତର ଦିଗରେ ଭାରତ ଅଗ୍ରସର ହୋଇଛି । ଏହି ଯାତ୍ରାରେ ସିଙ୍ଗାପୁରକୁ ଆମେ ପ୍ରମୁଖ ସହଭାଗୀ ମନେକରୁଛୁ । ନିକଟ ଅତୀତରେ ଆମେ ରୂପାନ୍ତର ଦିଗରେ ଉପପ୍ରଧାନମନ୍ତ୍ରୀ ଶ୍ରୀଯୁକ୍ତ ସନମୁଗରତ୍ନମଙ୍କ ଚିନ୍ତାଧାରାରୁ ଲାଭାନ୍ୱିତ ହୋଇଛୁ । ଆପଣଙ୍କ ବ୍ୟକ୍ତିଗତ ବନ୍ଧୁତ୍ୱ ଏବଂ ଦ୍ୱିପାକ୍ଷିକ ସମ୍ପର୍କକୁ ସୁଦୃଢ କରିବାରେ ଆପଣଙ୍କ ନେତୃତ୍ୱକୁ ମଧ୍ୟ ମୁଁ ଗଭୀର ସମ୍ମାନ ଜଣାଉଛି । ମୁଁ ପୁଣିଥରେ ଆପଣ ଏବଂ ଆପଣଙ୍କ ପ୍ରତିନିଧି ଦଳକୁ ସ୍ୱାଗତ କରୁଛି । ଆପଣଙ୍କ ଭାରତ ଗସ୍ତ ଫଳପ୍ରଦ ଏବଂ ସଫଳ ହେବ ବୋଲି ମୋର ବିଶ୍ୱାସ ।

ଧନ୍ୟବାଦ ।

ବହୁତ ବହୁତ ଧନ୍ୟବାଦ ।