ପିଏମଇଣ୍ଡିଆ

ମହାମହିମ, ରାଷ୍ଟ୍ରପତି ଅନୁରା କୁମାର ଦିଶାନାୟକ,

ଉଭୟ ଦେଶର ପ୍ରତିନିଧି,

ଗଣମାଧ୍ୟମର ବନ୍ଧୁମାନେ,

ଶୁଭେଚ୍ଛା!

ମୁଁ ରାଷ୍ଟ୍ରପତି ଦିଶାନାୟକଙ୍କୁ ଭାରତକୁ ସ୍ୱାଗତ କରୁଛି । ମୁଁ ଆନନ୍ଦିତ ଯେ ଆପଣ ରାଷ୍ଟ୍ରପତି ଭାବରେ ନିଜର ପ୍ରଥମ ବିଦେଶ ଗସ୍ତ ପାଇଁ ଭାରତକୁ ବାଛିଛନ୍ତି । ରାଷ୍ଟ୍ରପତି ଦିଶାନାୟକଙ୍କ ଗସ୍ତ ଆମ ସମ୍ପର୍କରେ ନୂତନ ଗତିଶୀଳତା ଏବଂ ଶକ୍ତି ସୃଷ୍ଟି କରିଛି । ଆମର ଭାଗିଦାରୀ ପାଇଁ ଆମେ ଏକ ଭବିଷ୍ୟତ ଦୃଷ୍ଟିକୋଣ ଗ୍ରହଣ କରିଛୁ । ଆମେ ଆମର ଅର୍ଥନୈତିକ ଭାଗିଦାରୀରେ ନିବେଶ ଭିତ୍ତିକ ଅଭିବୃଦ୍ଧି ଏବଂ ଯୋଗାଯୋଗ ଉପରେ ଗୁରୁତ୍ୱ ଦେଇଛୁ ଏବଂ ସ୍ଥିର କରିଛୁ ଯେ ଭୌତିକ, ଡିଜିଟାଲ ଏବଂ ଶକ୍ତି ସଂଯୋଗ ଆମର ଭାଗିଦାରୀର ମୁଖ୍ୟ ସ୍ତମ୍ଭ ହେବ । ଆମେ ଉଭୟ ଦେଶ ମଧ୍ୟରେ ବିଦ୍ୟୁତ-ଗ୍ରିଡ୍ ସଂଯୋଗ ଏବଂ ମଲ୍ଟି-ପ୍ରଡକ୍ଟ ପେଟ୍ରୋଲିୟମ ପାଇପଲାଇନ ସ୍ଥାପନ ଦିଗରେ କାର୍ଯ୍ୟ କରିବୁ । ସାମପୁର ସୌର ଶକ୍ତି ପ୍ରକଳ୍ପକୁ ତ୍ୱରାନ୍ୱିତ କରାଯିବ । ଏହାବ୍ୟତୀତ ଶ୍ରୀଲଙ୍କାର ପାୱାର ପ୍ଲାଣ୍ଟ ପାଇଁ ଏଲଏନଜି ଯୋଗାଇ ଦିଆଯିବ । ଦ୍ୱିପାକ୍ଷିକ ବାଣିଜ୍ୟକୁ ପ୍ରୋତ୍ସାହିତ କରିବା ପାଇଁ ଉଭୟ ପକ୍ଷ ଖୁବଶୀଘ୍ର ଇଟିସିଏ ସମ୍ପୂର୍ଣ୍ଣ କରିବାକୁ ପ୍ରୟାସ କରିବେ ।

ବନ୍ଧୁଗଣ,

ବର୍ତ୍ତମାନ ସୁଦ୍ଧା ଭାରତ ଶ୍ରୀଲଙ୍କାକୁ ୫ ବିଲିୟନ ଡଲାରର ଅନୁଦାନ ଓ ଋଣ ପ୍ରଦାନ କରିଛି । ଆମେ ଶ୍ରୀଲଙ୍କାର ସମସ୍ତ ୨୫ଟି ଜିଲ୍ଲାକୁ ସହାୟତା ପ୍ରଦାନ କରୁଛୁ । ଆମର ପ୍ରକଳ୍ପଗୁଡ଼ିକ ସର୍ବଦା ଆମର ଅଂଶୀଦାର ଦେଶଗୁଡ଼ିକର ବିକାଶମୂଳକ ପ୍ରାଥମିକତା ଆଧାରରେ ଚୟନ କରାଯାଇଛି । ଏହି ଉନ୍ନୟନମୂଳକ ସହାୟତାକୁ ଆଗେଇ ନେଇ ଆମେ ମାହୋ ଅନୁରାଧାପୁରା ରେଳ ସେକ୍ସନ ଏବଂ କାଙ୍କେସାନ୍ଥୁରାଇ ବନ୍ଦରକୁ ସିଗନାଲିଂ ବ୍ୟବସ୍ଥାର ପୁନରୁଦ୍ଧାର ଦିଗରେ ଅନୁଦାନ ସହାୟତା ପ୍ରଦାନ କରିବାକୁ ନିଷ୍ପତ୍ତି ନେଇଛୁ । ଆମର ଶିକ୍ଷାଗତ ସହଯୋଗର ଏକ ଅଂଶ ଭାବରେ, ଆମେ ଜାଫନା ଏବଂ ଶ୍ରୀଲଙ୍କାର ପୂର୍ବାଞ୍ଚଳର ବିଶ୍ୱବିଦ୍ୟାଳୟଗୁଡ଼ିକର ୨୦୦ ଛାତ୍ରଛାତ୍ରୀଙ୍କୁ ମାସିକ ବୃତ୍ତି ପ୍ରଦାନ କରିବୁ । ଆସନ୍ତା ପାଞ୍ଚ ବର୍ଷ ମଧ୍ୟରେ ୧୫୦୦ ଶ୍ରୀଲଙ୍କା ପ୍ରଶାସନିକ ଅଧିକାରୀଙ୍କୁ ଭାରତରେ ତାଲିମ ଦିଆଯିବ। ଗୃହ ନିର୍ମାଣ, ଅକ୍ଷୟ ଶକ୍ତି ଏବଂ ଭିତ୍ତିଭୂମି ସହିତ ଭାରତ କୃଷି, ଦୁଗ୍ଧ ଓ ମତ୍ସ୍ୟ ଚାଷ କ୍ଷେତ୍ରରେ ମଧ୍ୟ ଶ୍ରୀଲଙ୍କାକୁ ସହଯୋଗ କରିବ। ଭାରତ ଶ୍ରୀଲଙ୍କାରେ ୟୁନିକ୍ ଡିଜିଟାଲ ଆଇଡେଣ୍ଟିଟି ପ୍ରକଳ୍ପ ପାଇଁ ଅଂଶୀଦାର ହେବ ।

ବନ୍ଧୁଗଣ,

ରାଷ୍ଟ୍ରପତି ଦିଶାନାୟକ ଏବଂ ମୁଁ ସମ୍ପୂର୍ଣ୍ଣ ସହମତ ଯେ ଆମର ସୁରକ୍ଷା ସ୍ୱାର୍ଥ ପରସ୍ପର ସହ ଜଡ଼ିତ । ଆମେ ସୁରକ୍ଷା ସହଯୋଗ ଚୁକ୍ତିକୁ ଶୀଘ୍ର ଚୂଡ଼ାନ୍ତ କରିବାକୁ ନିଷ୍ପତ୍ତି ନେଇଛୁ। ହାଇଡ୍ରୋଗ୍ରାଫି ଉପରେ ସହଯୋଗ କରିବାକୁ ମଧ୍ୟ ଆମେ ରାଜି ହୋଇଛୁ । ଆଞ୍ଚଳିକ ଶାନ୍ତି, ନିରାପତ୍ତା ଏବଂ ବିକାଶ ପାଇଁ କଲମ୍ବୋ ସୁରକ୍ଷା ସମ୍ମିଳନୀ ଏକ ଗୁରୁତ୍ୱପୂର୍ଣ୍ଣ ମଞ୍ଚ ବୋଲି ଆମେ ବିଶ୍ୱାସ କରୁଛୁ । ସାମୁଦ୍ରିକ ନିରାପତ୍ତା, ଆତଙ୍କବାଦ ମୁକାବିଲା, ସାଇବର ନିରାପତ୍ତା, ଚୋରା ଚାଲାଣ ଓ ସଂଗଠିତ ଅପରାଧର ମୁକାବିଲା, ମାନବିକ ସହାୟତା ଓ ବିପର୍ଯ୍ୟୟ ମୁକାବିଲା କ୍ଷେତ୍ରରେ ସହଯୋଗ ଯୋଗାଇ ଦିଆଯିବ।

ବନ୍ଧୁଗଣ,
ଭାରତ ଓ ଶ୍ରୀଲଙ୍କା ମଧ୍ୟରେ ଜନସାଧାରଣଙ୍କ ମଧ୍ୟରେ ସମ୍ପର୍କ ଆମ ସଭ୍ୟତାର ମୂଳମନ୍ତ୍ର । ଯେତେବେଳେ ଭାରତ ପାଲି ଭାଷାକୁ ଶାସ୍ତ୍ରୀୟ ଭାଷା ଭାବରେ ଘୋଷଣା କଲା, ଶ୍ରୀଲଙ୍କା ଏହି ଉତ୍ସବରେ ଆମ ସହିତ ଯୋଗ ଦେଇଥିଲା । ଫେରି ସେବା ଏବଂ ଚେନ୍ନାଇ-ଜାଫନା ବିମାନ ଯୋଗାଯୋଗ କେବଳ ପର୍ଯ୍ୟଟନକୁ ପ୍ରୋତ୍ସାହିତ କରିନାହିଁ ବରଂ ସାଂସ୍କୃତିକ ସମ୍ପର୍କକୁ ମଧ୍ୟ ସୁଦୃଢ଼ କରିଛି । ଆମେ ମିଳିତ ଭାବରେ ନିଷ୍ପତ୍ତି ନେଇଛୁ ଯେ, ନାଗାପଟ୍ଟିନମ୍ – କାଙ୍କେସାନ୍ଥୁରାଇ ଫେରି ସେବାର ସଫଳ ଶୁଭାରମ୍ଭ ପରେ, ଆମେ ରାମେଶ୍ୱରମ୍ ଏବଂ ତାଲାଇମନ୍ନାର ମଧ୍ୟରେ ଏକ ଫେରି ସେବା ମଧ୍ୟ ଆରମ୍ଭ କରିବୁ । ବୌଦ୍ଧ ସର୍କିଟ ଏବଂ ଶ୍ରୀଲଙ୍କାର ରାମାୟଣ ମାଧ୍ୟମରେ ପର୍ଯ୍ୟଟନର ପ୍ରଚୁର ସମ୍ଭାବନାକୁ ଉପଲବ୍ଧ କରିବା ପାଇଁ ମଧ୍ୟ କାର୍ଯ୍ୟ ଆରମ୍ଭ କରାଯିବ ।

ବନ୍ଧୁଗଣ,

ମତ୍ସ୍ୟଜୀବୀଙ୍କ ଜୀବିକା ସହ ଜଡ଼ିତ ସମସ୍ୟା ବିଷୟରେ ମଧ୍ୟ ଆମେ ବିସ୍ତୃତ ଭାବେ ଆଲୋଚନା କରିଥିଲୁ। ଆମେ ଦୁହେଁ ସହମତ ହୋଇଥିଲୁ ଯେ ଆମେ ଏହି ପ୍ରସଙ୍ଗରେ ଏକ ମାନବୀୟ ଆଭିମୁଖ୍ୟ ଗ୍ରହଣ କରିବା ଉଚିତ୍ । ଆମେ ଶ୍ରୀଲଙ୍କାରେ ପୁନଃନିର୍ମାଣ ଏବଂ ସମନ୍ୱୟ ବିଷୟରେ ମଧ୍ୟ ଆଲୋଚନା କରିଥିଲୁ । ରାଷ୍ଟ୍ରପତି ଦିଶାନାୟକ ମୋତେ ତାଙ୍କ ସାମଗ୍ରିକ ଦୃଷ୍ଟିକୋଣ ବିଷୟରେ ଅବଗତ କରାଇଥିଲେ । ଆମେ ଆଶା କରୁଛୁ ଯେ ଶ୍ରୀଲଙ୍କା ସରକାର ତାମିଲ ଲୋକଙ୍କ ଆକାଂକ୍ଷା ପୂରଣ କରିବେ । ଏବଂ ସେମାନେ ଶ୍ରୀଲଙ୍କାର ସମ୍ବିଧାନକୁ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ କରିବା ଏବଂ ପ୍ରାଦେଶିକ ପରିଷଦ ନିର୍ବାଚନ ପରିଚାଳନା ଦିଗରେ ସେମାନଙ୍କର ପ୍ରତିଶ୍ରୁତି ପୂରଣ କରିବେ ।

ବନ୍ଧୁଗଣ,

ମୁଁ ରାଷ୍ଟ୍ରପତି ଦିଶାନାୟକଙ୍କୁ ଆଶ୍ୱାସନା ଦେଇଛି ଯେ ଦେଶ ନିର୍ମାଣ ଦିଗରେ ତାଙ୍କ ପ୍ରୟାସରେ ଭାରତ ଏକ ବିଶ୍ୱସ୍ତ ଏବଂ ବିଶ୍ୱସନୀୟ ଅଂଶୀଦାର ଭାବରେ ଠିଆ ହେବ । ପୁଣି ଥରେ ମୁଁ ରାଷ୍ଟ୍ରପତି ଦିଶାନାୟକ ଏବଂ ତାଙ୍କ ପ୍ରତିନିଧି ଦଳକୁ ଭାରତ ଗସ୍ତରେ ସ୍ୱାଗତ ଜଣାଉଛି । ମୁଁ ତାଙ୍କୁ ବୋଧଗୟା ଗସ୍ତ ପାଇଁ ଶୁଭେଚ୍ଛା ଜଣାଉଛି ଏବଂ ଆଶା କରୁଛି ଯେ ଏହା ଆଧ୍ୟାତ୍ମିକ ଶକ୍ତି ଏବଂ ପ୍ରେରଣାରେ ପରିପୂର୍ଣ୍ଣ ହେବ ।

ଆପଣଙ୍କୁ ବହୁତ ବହୁତ ଧନ୍ୟବାଦ ।

HS