ପିଏମଇଣ୍ଡିଆ

ଭିଏଣ୍ଟିଆନେରେ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଲାଓ ପିଡିଆରର ପ୍ରଧାନମନ୍ତ୍ରୀ ଶ୍ରୀ ସୋନେକ୍ସେ ସିଫାଣ୍ଡୋନେଙ୍କ ସହ ଦ୍ୱିପାକ୍ଷିକ ଆଲୋଚନା କରିଛନ୍ତି । ୨୧ତମ ଆସିଆନ–ଭାରତ ଏବଂ ୧୯ତମ ପୂର୍ବ ଏସିଆ ଶିଖର ସମ୍ମିଳନୀ ସଫଳତାର ସହ ଆୟୋଜନ କରିଥିବାରୁ ଲାଓ ପ୍ରଧାନମନ୍ତ୍ରୀଙ୍କୁ ଶ୍ରୀ ମୋଦୀ ଅଭିନନ୍ଦନ ଜଣାଇଥିଲେ ।

ଦୁଇ ପ୍ରଧାନମନ୍ତ୍ରୀ ଭାରତ–ଲାଓସ ମଧ୍ୟରେ ପ୍ରାଚୀନ ଏବଂ ସମକାଳୀନ ସମ୍ବନ୍ଧକୁ ଆହୁରି ମଜବୁତ କରିବା ଉପରେ ସଫଳ ଆଲୋଚନା କରିଥିଲେ । ବିକାଶରେ ସହଯୋଗିତା, କ୍ଷମତା ନିର୍ମାଣ, ବିପର୍ଯ୍ୟୟ ପରିଚାଳନା, ନବୀକରଣ ଉର୍ଜା, ଐତିହ୍ୟ ପୁନଃସ୍ଥାପନ, ଅର୍ଥନୈତିକ ସମ୍ପର୍କ, ପ୍ରତିରକ୍ଷା ସହଯୋଗ ଏବଂ ଲୋକଙ୍କ ସହ ଲୋକଙ୍କର ଭାବ ବିନିମୟ ଆଦି ଉପରେ ଉଭୟ ଆଲୋଚନା କରିଥିଲେ । ପ୍ରଧାନମନ୍ତ୍ରୀ ସିଫାଣ୍ଡୋନେ ସାମୁଦ୍ରିକ ଝଡ଼ ୟାଗି ପରେ ଲାଓ ପିଡିଆରକୁ ଭାରତ ଦେଇଥିବା ବନ୍ୟା ସହାୟତା ପାଇଁ ପ୍ରଧାନମନ୍ତ୍ରୀ ମୋଦୀଙ୍କୁ ଧନ୍ୟବାଦ ଜଣାଇଥିଲେ । ୟୁନେସ୍କୋ ବିଶ୍ୱ ଐତିହ୍ୟ ସ୍ଥଳ ଭାଟ ଫୋଉଠାରେ ଭାରତର ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସଆଇ) ଦ୍ୱାରା ଚାଲିଥିବା ପୁନଃସ୍ଥାପନା ଓ ସଂରକ୍ଷଣ ଦ୍ୱିପାକ୍ଷିକ ସମ୍ପର୍କକୁ ବିଶେଷ ସ୍ଥାନ ପ୍ରଦାନ କରିଛି ।

କ୍ଷେତ୍ରୀୟ ଓ ବହୁ–ପକ୍ଷୀୟ ମଞ୍ଚରେ ଦୁଇ ଦେଶ ମଧ୍ୟରେ ଥିବା ଘନିଷ୍ଠ ସହଯୋଗ ଉପରେ ଉଭୟ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଛନ୍ତି । ପ୍ରଧାନମନ୍ତ୍ରୀ ସିଫାଣ୍ଡୋନେ ଆନ୍ତର୍ଜାତିକ ମଞ୍ଚରେ ଭାରତର ଭୂମିକାକୁ ସମର୍ଥନ କରିଥିଲେ । ୨୦୨୪ ପାଇଁ ଆସିଆନର ଅଧ୍ୟକ୍ଷତା ସକାଶେ ଲାଓ ପିଡିଆରକୁ ଭାରତ ଦୃଢ଼ତାର ସହ ସମର୍ଥନ କରିଛି ।

ଆଲୋଚନା ପରେ ଦୁଇ ନେତାଙ୍କ ଉପସ୍ଥିତିରେ ରକ୍ଷା, ପ୍ରସାରଣ, ସୀମା ଶୁଳ୍କ ସହଯୋଗ ଏବଂ ମେକାଙ୍ଗ–ଗଙ୍ଗା ସହଯୋଗ କ୍ଷେତ୍ରର ତିନୋଟି ତ୍ୱରିତ ପରିଯୋଜନା (କ୍ୟୁଆଇପି)ର ବୁଝାମଣାପତ୍ର ଓ ଚୁକ୍ତିନାମାର ଆଦାନ ପ୍ରଦାନ ହୋଇଥିଲା । କ୍ୟୁଆଇପି ଲାଓ ରାମାୟଣ ଐତିହ୍ୟର ସଂରକ୍ଷଣ, ରାମାୟଣ ସମ୍ବନ୍ଧିତ ଭିତ୍ତି ଚିତ୍ର ସହିତ ୱାଟ ଫ୍ରା ଇଉ ବୌଦ୍ଧ ମନ୍ଦିରର ପୁନରୁଦ୍ଧାର ଏବଂ ଚମ୍ପାସକ ପ୍ରଦେଶରେ ରାମାୟଣ ଆଧାରିତ ଛାୟା କଣ୍ଢେଇ ଥିଏଟରକୁ ସମର୍ଥନ ସମ୍ପର୍କରେ ହୋଇଛି । ପ୍ରତ୍ୟେକ କ୍ୟୁଆଇପିକୁ ଭାରତ ସରକାରଙ୍କ ଦ୍ୱାରା ୫୦ ହଜାର ଆମରିକୀୟ ଡଲାରର ସହାୟତା ପ୍ରାପ୍ତ ହୋଇଛି । ଲାଓ ପିଡିଆରରେ ପୋଷଣ ସୁରକ୍ଷାରେ ସୁଧାର ଆଣିବାକୁ ଭାରତ ପ୍ରାୟ ଦଶ ନିୟୁତ ଆମେରିକୀୟ ଡଲାରର ସହାୟତା ପ୍ରଦାନ କରିବ । ଭାରତ–ସଂଯୁକ୍ତ ରାଷ୍ଟ୍ର ବିକାଶ ପାଣ୍ଠି ମାଧ୍ୟମରେ ପ୍ରଦାନ କରାଯାଉଥିବା ଏହି ସହାୟତା ରାଶି ପାଇବାରେ ଦକ୍ଷିଣ–ପୂର୍ବ ଏସିଆରେ ଏହା ପ୍ରଥମ ପ୍ରକଳ୍ପ । ବୁଝାମଣା ପତ୍ର, ଚୁକ୍ତିନାମା ଏବଂ ଘୋଷଣାର ସମ୍ପୂର୍ଣ୍ଣ ବିବରଣୀ ଏଠାରେ ଦେଖିପାରିବେ ।

SR