ପିଏମଇଣ୍ଡିଆ

ମଞ୍ଚ ଉପରେ ଉପସ୍ଥିତ ରାଜସ୍ଥାନର ରାଜ୍ୟପାଳ ଶ୍ରୀମାନ କଲରାଜ ମିଶ୍ର ମହୋଦୟ, କେନ୍ଦ୍ର ମନ୍ତ୍ରୀ ଶ୍ରୀ ନିତିନ ଗଡକରୀ ମହାଶୟ, ଅର୍ଜୁନ ମେଘୱାଲ ମହାଶୟ, ଗଜେନ୍ଦ୍ର ଶେଖାୱତ ମହାଶୟ, କୈଲାଶ ଚୌଧରୀ ମହାଶୟ, ସଂସଦରେ ମୋର ସାଥୀଗଣ, ବିଧାୟକ-ଗଣ, ଏବଂ ରାଜସ୍ଥାନର ମୋର ପ୍ରିୟ ଭାଇ ଓ ଭଉଣୀମାନେ !

ବୀରଙ୍କ ମାଟି ରାଜସ୍ଥାନକୁ ମୋର କୋଟି- କୋଟି ପ୍ରଣାମ! ଏହି ମାଟି ବାରମ୍ବାର ଯେଉଁମାନେ ବିକାଶ ପାଇଁ ସମର୍ପିତ ଲୋକ ଅଛନ୍ତି ସେମାନଙ୍କର ପ୍ରତୀକ୍ଷା କରିଥାଏ, ଆମନ୍ତ୍ରଣ ମଧ୍ୟ ପଠାଇଥାଏ । ଆଉ ମୁଁ ଦେଶ ତରଫରୁ ବିକାଶର ନୂଆ- ନୂଆ ଉପହାର, ଏହି ବୀର ମାଟିକୁ ତାହାର ଚରଣରେ ସମର୍ପିତ କରିବା ପାଇଁ ନିରନ୍ତର ପ୍ରୟାସ କରୁଛି । ଆଜି ଏଠାରେ ବିକାନେର ଏବଂ ରାଜସ୍ଥାନ ପାଇଁ 24 ହଜାର କୋଟି ଟଙ୍କାର ବିକାଶ ମୂଳକ ପ୍ରକଳ୍ପ ଗୁଡିକର ଲୋକାର୍ପଣ ହୋଇଛି । ରାଜସ୍ଥାନକୁ ମାତ୍ର କିଛି ମାସ ମଧ୍ୟରେ ହିଁ ଦୁଇ- ଦୁଇଟି ଆଧୁନିକ ଛଅ ଧାଡିଆ(ସିକ୍ସ ଲେନ) ଏକ୍ସପ୍ରେସ ମିଳିଛି । ଫେବୃୟାରୀ ମାସରେ ମୁଁ ଦିଲ୍ଲୀ- ମୁମ୍ବଇ ଏକ୍ସପ୍ରେସ କରିଡରର ଦିଲ୍ଲୀ- ଦୌସା- ଲାଲସୋଟ ସେକ୍ସନର ଲୋକାର୍ପଣ କରିଥିଲି । ଆଉ ଆଜି, ଏଠାରେ ଅମୃତସର- ଜାମନଗର ଏକ୍ସପ୍ରେସ-ୱେର 500 କିଲୋମିଟର ସେକ୍ସନକୁ ଦେଶ ଉଦ୍ଦେଶ୍ୟରେ ସମର୍ପିତ କରିବାର ସୌଭାଗ୍ୟ ମିଳିଛି । ଅର୍ଥାତ ଅନ୍ୟ ପକ୍ଷରେ ଦେଖିବାକୁ ଗଲେ ରାଜସ୍ଥାନ ଏକ୍ସପ୍ରେସ ବାବଦରେ ଦୁଇ ଶତକ ମାରି ଦେଇଛି ।

ସାଥୀଗଣ,

ଆଜି ନବୀକରଣୀୟ ଶକ୍ତି କ୍ଷେତ୍ରରେ ରାଜସ୍ଥାନକୁ ଆଗକୁ ନେଇଯିବା ପାଇଁ ସବୁଜ ଶକ୍ତି କରିଡରର ମଧ୍ୟ ଲୋକାର୍ପଣ ହୋଇଛି । ବିକାନେରରେ ଇଏସଆଇସି ହାସ୍ପାତାଳର କାର୍ଯ୍ୟ ମଧ୍ୟ ସଂମ୍ପୂର୍ଣ୍ଣ ହୋଇଯାଇଛି । ମୁଁ ଏହି ସମସ୍ତ ବିକାଶ କାର୍ଯ୍ୟ ପାଇଁ ବିକାନେର ଏବଂ ରାଜସ୍ଥାନର ଲୋକଙ୍କୁ ବହୁତ- ବହୁତ ଶୁଭେଚ୍ଛା ଜଣାଉଛି ।

ସାଥୀଗଣ,

ଯେ କୌଣସି ରାଜ୍ୟ ବିକାଶର ଦୌଡରେ ସେତେବେଳେ ଆଗକୁ ଚାଲି ଯାଇଥାଏ, ଯେତେବେଳେ ତାହାର ସାମର୍ଥ୍ୟର, ତାହାର ସମ୍ଭାବନାର ସଠିକ ଆକଳନ କରାଯାଏ । ରାଜସ୍ଥାନରେ ତ’ ଅପାର ସାମର୍ଥ୍ୟ ଏବଂ ସମ୍ଭାବନାର କେନ୍ଦ୍ର ରହିଛି । ରାଜସ୍ଥାନରେ ବିକାଶକୁ ଦ୍ରୁତ ଗତି ଦେବାର ଶକ୍ତି ଅଛି, ଏଥିପାଇଁ ଆମେ ଏଠାରେ ରେକର୍ଡ ପରିମାଣରେ ନିବେଶ କରୁଛୁ । ରାଜସ୍ଥାନରେ ଶିଳ୍ପ ବିକାଶର ଅପାର ସମ୍ଭାବନାମାନ ରହିଛି, ଏଥିପାଇଁ ଆମେ ଏଠାରେ ଯୋଗାଯୋଗକୁ, ଭିତିଭୁମିକୁ ହାଇଟେକର ରୂପ ଦେଉଛୁ । ଦ୍ରୁତ ଗତିର ଏକ୍ସପ୍ରେସ-ୱେ ଏବଂ ରେଳପଥ ସହିତ ସମଗ୍ର ରାଜସ୍ଥାନରେ ପର୍ଯ୍ୟଟନ ସହିତ ଜଡିତ ସୁଯୋଗର ମଧ୍ୟ ସଂପ୍ରସାରଣ ହେବ । ଏହାର ସବୁଠାରୁ ବଡ଼ ଲାଭ ଏଠାକାର ଯୁବକମାନଙ୍କୁ ମିଳିବ, ରାଜସ୍ଥାନର ପୁଅ- ଝିଅମାନଙ୍କୁ ମିଳିବ ।

ସାଥୀଗଣ,

ଆଜି ଯେଉଁ ଗ୍ରୀନ ଫିଲ୍ଡ ଏକ୍ସପ୍ରେସ-ୱେର ଲୋକାର୍ପଣ ହେଲା, ଏହି କରିଡର ରାଜସ୍ଥାନକୁ ହରିୟାଣା, ପଞ୍ଜାବ, ଗୁଜରାଟ ଏବଂ ଜମ୍ମୁ- କଶ୍ମୀର ସହିତ ଯୋଡିବ । ଜାମନଗର ଏବଂ କାଣ୍ଡଲା ଭଳି ବଡ଼ ବାଣିଜ୍ୟିକ ସାମୁଦ୍ରିକ ବନ୍ଦର ମଧ୍ୟ ଏହା ଦ୍ୱାରା ରାଜସ୍ଥାନ ଏବଂ ବିକାନେର ସହିତ ସିଧାସଳଖ ଯୋଡି ହୋଇ ଯିବ । ଗୋଟିଏ ପଟେ ଯେତେବେଳେ ବିକାନେର ସହିତ ଅମୃତସର ଏବଂ ଯୋଧପୁରର ଦୂରତା ହ୍ରାସ ପାଇବ ସେତେବେଳେ ଅନ୍ୟପକ୍ଷରେ ଯୋଧପୁରରରୁ ଜାଲୌର ଓ ଗୁଜରାଟର ଦୂରତା ମଧ୍ୟ କମ୍ ହୋଇଯିବ । ଏହାର ଲାଭ ଏହି ସମଗ୍ର ଅଂଚଳର କୃଷକ ଏବଂ ବ୍ୟବସାୟୀମାନଙ୍କୁ ବ୍ୟାପକ ସ୍ତରରେ ମିଳିବ । ଅର୍ଥାତ ଅନ୍ୟ ପକ୍ଷରେ ଏହି ଏକ୍ସପ୍ରେସ-ୱେ ସମଗ୍ର ପଶ୍ଚିମ ଭାରତକୁ ତାହର ଔଦ୍ୟୋଗିକ କାର୍ଯ୍ୟକଳାପକୁ ନୂତନ ଶକ୍ତି ଦେବ । ବିଶେଷକରି, ଦେଶର ତୈଳ କ୍ଷେତ୍ର ବିଶୋଧନାଗାର ଗୁଡିକ ଏହା ସହିତ ଯୋଡି ହେବେ, ଯୋଗାଣ ଶୃଙ୍ଖଳ ସୁଦୃଢ ହେବ, ଏବଂ ଦେଶକୁ ଏକ ଆର୍ଥିକ ଗତି ମିଳିବ ।

ସାଥୀଗଣ,

ଆଜି ଯେତେବେଳେ ବିକାନେର ରତନଗଡ଼ ରେଳ ଲାଇନର ଦୋହରୀକରଣର କାର୍ଯ୍ୟ ମଧ୍ୟ ଆରମ୍ଭ ହୋଇଛି । ଆମେ ରାଜସ୍ଥାନରେ ରେଳବାଇର ବିକାଶକୁ ମଧ୍ୟ ନିଜର ପ୍ରାଥମିକତାରେ ରଖିଛୁ । 2004ରୁ 20014 ମଧ୍ୟରେ ରାଜସ୍ଥାନକୁ ରେଳବାଇ ପାଇଁ ପ୍ରତ୍ୟେକ ବର୍ଷ ହାରାହାରି ଏକ ହଜାର କୋଟି ଟଙ୍କାରୁ ମଧ୍ୟ କମ୍ ମିଳୁଥିଲା । ଯେତେବେଳେ କି ଆମ ସରକାର ରାଜସ୍ଥାନରେ ରେଳବାଇର ବିକାଶ ପାଇଁ ପ୍ରତ୍ୟେକ ବର୍ଷ ହାରାହାରି ପାଖାପାଖି 10 ହଜାର କୋଟି ଟଙ୍କା ଦେଇଛନ୍ତି । ଆଜି ଏଠାରେ ଦ୍ରୁତ ଗତିରେ ନୂତନ ରେଳ ଲାଇନଗୁଡିକ ବିଛା ଯାଉଛି, ଦ୍ରୁତ ଗତିରେ ରେଳ ଟ୍ରାକର ବିଦ୍ୟୁତୀକରଣ ହେଉଛି ।

ସାଥୀଗଣ,

ଭିତିଭୁମିର ଏହି ବିକାଶର ସବୁଠାରୁ ଅଧିକ ଲାଭ କ୍ଷୁଦ୍ର ବ୍ୟବସାୟୀମାନଙ୍କୁ ଏବଂ କୁଟୀର ଶିଳ୍ପକୁ ମିଳିଥାଏ । ବିକାନେର ତ’ ଆଚାର, ପାମ୍ପଡ, ନମକିନ୍‌, ଏବଂ ଏଭଳି ସମସ୍ତ ଉତ୍ପାଦଗୁଡିକ ପାଇଁ ହେଉଛି ସାରା ଦେଶରେ ପ୍ରସିଦ୍ଧ । ଯୋଗାଯୋଗ ଆହୁରି ଭଲ ହେବ, ତେବେ ଯାଇଁ ଏଠାକାର କୁଟୀର ଶିଳ୍ପ କମ୍ ଖର୍ଚ୍ଚରେ ନିଜର ସାମଗ୍ରୀ ଦେଶର କୋଣ- ଅନୁକୋଣ ପର୍ଯ୍ୟନ୍ତ ପହଂଚାଇ ପାରିବେ । ଦେଶବାସୀଙ୍କୁ ମଧ୍ୟ ବିକାନେରର ସ୍ୱାଦିଷ୍ଟ ଉତ୍ପାଦର ଆନନ୍ଦ ଅଧିକ ସହଜରେ ମିଳି ପାରିବ ।

ସାଥୀଗଣ,

ବିଗତ 9 ବର୍ଷରେ ଆମେ ରାଜସ୍ଥାନର ବିକାଶ ପାଇଁ ଯଥା ସମ୍ଭବ ପ୍ରୟାସ କରିଛୁ । ଯେଉଁ ସୀମାନ୍ତ ଅଞ୍ଚଳ ଦଶକ ଦଶକ ଧରି ବିକାଶରୁ ବଂଚିତ ରହିଥିଲା, ତହାର ବିକାଶ ପାଇଁ ଆମେ ଜୀବନ୍ତ ବା ଭାଇବ୍ରେଂଟ ଗ୍ରାମ ଯୋଜନା ଆରମ୍ଭ କରିଛୁ । ଆମେ ସୀମାନ୍ତ ଗ୍ରାମଗୁଡିକୁ ଦେଶର ପ୍ରଥମ ଗ୍ରାମ ଭାବେ ଘୋଷଣା କରିଛୁ । ଏହାଦ୍ୱାରା ଏଇ ଅଞ୍ଚଳରେ ବିକାଶ ହେଉଛି, ଦେଶର ଲୋକମାନଙ୍କୁ ମଧ୍ୟ ସୀମାନ୍ତ ଅଞ୍ଚଳକୁ ଯିବାପାଇଁ ଆଗ୍ରହ ବୃଦ୍ଧି ପାଉଛି । ଏହାଦ୍ୱାରା ସୀମାନ୍ତ ଅଞ୍ଚଳରେ ବସବାସ କରୁଥିବା ଲୋକଙ୍କ ପାଖରେ ମଧ୍ୟ ବିକାଶର ନୂତନ ଉର୍ଜ୍ଜା ପହଂଚିଛି ।

ସାଥୀଗଣ,

ଆମର ରାଜସ୍ଥାନକୁ ସାଲାସର ବାଲାଜୀ ଏବଂ କରଣୀ ମାତା ଏତେ କିଛି ଦେଇଛନ୍ତି । ଏଥିପାଇଁ ତ’ ବିକାଶ କ୍ଷେତ୍ରରେ ମଧ୍ୟ ସବୁଠାରୁ ଉପରେ ରହିବା ଆବଶ୍ୟକ । ଆଜି ଭାରତ ସରକାର ଏହି ଭାବନା ସହିତ କ୍ରମାଗତ ଭାବେ ବିକାଶର କାର୍ଯ୍ୟକୁ ଗୁରୁତ୍ୱ ଦେଉଛନ୍ତି, ସମ୍ପୁର୍ଣ୍ଣ ଶକ୍ତି ଲଗାଇ ଦେଇଛନ୍ତି । ମୋର ବିଶ୍ୱାସ ଯେ, ଆମେ ସମସ୍ତେ ଏକାଠି ମିଳିମିଶି ରାଜସ୍ଥାନର ବିକାଶକୁ ଆହୁରି ମଧ୍ୟ ଦ୍ରୁତ ଗତିରେ ଆଗକୁ ବଢାଇବା । ମୁଁ ପୁଣି ଥରେ ଆପଣ ସମସ୍ତଙ୍କୁ ବହୁତ- ବହୁତ ଶୁଭକାମନା ଜଣାଉଛି । ବହୁତ- ବହୁତ ଧନ୍ୟବାଦ !

*****

AH