ପିଏମଇଣ୍ଡିଆ

ମହାମହିମ ରାଷ୍ଟ୍ରପତି ଦୁତେର୍ତେ

ମହାନୁଭବମାନେ

ମାନନୀୟ ରାଷ୍ଟ୍ରପତି,

ଆସିଆନ ପ୍ରତିଷ୍ଠା ହେବାର 50ତମ ବର୍ଷ ପୂର୍ତ୍ତିର ଐତିହାସିକ ମୁହୂର୍ତ୍ତରେ ମାନିଲାକୁ ମୋର ପ୍ରଥମ ଗସ୍ତ ପାଇଁ ମୁଁ ଆନନ୍ଦ ଅନୁଭବ କରୁଛି ।

ଆମେ ମଧ୍ୟ ଆସିଆନ-ଭାରତ ବାର୍ତ୍ତାଳାପ ସହଭାଗୀତାର 25 ବର୍ଷ ପୂର୍ତ୍ତି ପାଳନ କରୁଛୁ ।

ଏହି ଗୁରୁତ୍ୱପୂର୍ଣ୍ଣ ବର୍ଷରେ ଆସିଆନର ସଫଳ ପରିଚାଳନା ପାଇଁ ମୁଁ ଫିଲିଫାଇନ୍ସକୁ ସାଧୁବାଦ ଜଣାଉଛି ଏବଂ ସମ୍ମିଳନୀର ଚମତ୍କାର ଆୟୋଜନ କରିଥିବାରୁ ମାନନୀୟ ରାଷ୍ଟ୍ରପତିଙ୍କୁ ଧନ୍ୟବାଦ ଜଣାଉଛି ।

ଆସିଆନ-ଭାରତ ଭାଗିଦାରୀକୁ ଆହୁରି ସୁଦୃଢ଼ କରିବା ଲାଗି ରାଷ୍ଟ୍ର ସଂଯୋଜକ ଭାବେ ଭିଏତନାମର ଯୋଗଦାନ ନିମନ୍ତେ ମୁଁ ଭିଏତନାମର ମାନନୀୟ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଉଛି ।

ମହାନୁଭବମାନେ,

ଆସିଆନର ଏହି ଉଲ୍ଲେଖନୀୟ ଯାତ୍ରା ଉତ୍ସବ ପାଳନ ଅପେକ୍ଷା ବାସ୍ତବ ଭାବେ ପ୍ରତିଫଳନଯୋଗ୍ୟ ଅଟେ ।

ଏହି ଐତିହାସିକ ମୁହୂର୍ତ୍ତରେ, ମୋର ବିଶ୍ୱାସ ଯେ ଗୋଟିଏ ଲକ୍ଷ୍ୟ, ଗୋଟିଏ ପରିଚୟ ଏବଂ ଗୋଟିଏ ସ୍ୱାଧୀନ ସମୂହ ଭାବେ ଆସିଆନ ଆହୁରି ସମର୍ପିତ ହୋଇ କାର୍ଯ୍ୟ କରିବ ।

ଆସିଆନ ଚତୁଃପାଶ୍ୱର୍ରେ ଭାରତର ଏକ୍ଟ ଇଷ୍ଟ ନୀତି ରୂପ ନେଇଛି ଏବଂ ଭାରତ-ପ୍ରଶାନ୍ତ ମହାସାଗର କ୍ଷେତ୍ରରେ ଆଂଚଳିକ ସୁରକ୍ଷା ଢାଂଚାକୁ ନେଇ ଏହା କେନ୍ଦ୍ରୀଭୂତ ହୋଇଛି ।

ତିନୋଟି ଗୁରୁତ୍ୱପୂର୍ଣ୍ଣ ସ୍ତମ୍ଭ ରାଜନୈତିକ-ସୁରକ୍ଷା, ଆର୍ଥିକ ଏବଂ ସାଂସ୍କୃତିକ ଭାଗିଦାରୀ ଦିଗରେ ତୃତୀୟ ଆସିଆନ-ଭାରତ କାର୍ଯ୍ୟ ଯୋଜନା ଅଧୀନରେ ସହଯୋଗ ଲାଗି ଆମର ବିସ୍ତୃତ କାର୍ଯ୍ୟସୂଚୀ ଯଥେଷ୍ଟ ଅଗ୍ରଗତି ହାସଲ କରିଛି  ।

ମହାନୁଭବମାନେ,

ହଜାର ହଜାର ବର୍ଷ ପୂର୍ବେ ଭାରତ ଏବଂ ଆସିଆନ ରାଷ୍ଟ୍ରଗୁଡ଼ିକ ମଧ୍ୟରେ ସାମୁଦ୍ରିକ ଯୋଗାଯୋଗ ଅତୀତରେ ଆମ ବାଣିଜ୍ୟ ସମ୍ପର୍କକୁ ସଶକ୍ତ କରିଥିଲା ଏବଂ ଏବେ ଏହାକୁ ଆହୁରି ସୁଦୃଢ଼ କରିବା ଦିଗରେ ଆମକୁ ନିକଟତର ହୋଇ କାର୍ଯ୍ୟ କରିବାକୁ ହେବ । କ୍ଷେତ୍ରୀୟ ସ୍ୱାର୍ଥ ଏବଂ ଏହାର ଶାନ୍ତିପୂର୍ଣ୍ଣ ବିକାଶକୁ ସର୍ବଶ୍ରେଷ୍ଠ ମାନ୍ୟତା ପ୍ରଦାନ କରୁଥିବା ନିୟମ ଆଧାରିତ ଆଂଚଳିକ ସୁରକ୍ଷା ଲକ୍ଷ୍ୟ ହାସଲ ଦିଗରେ ଆସିଆନକୁ ସ୍ଥିର ସହଯୋଗ ଯୋଗାଇ ଦେବା ପାଇଁ ଭାରତ ଆଶ୍ୱାସନା ଦେଉଛି ।

ଆତଙ୍କବାଦ ଏବଂ ହିଂସାତ୍ମକ ଉଗ୍ରବାଦ ବିରୋଧରେ ଆମେ ବ୍ୟକ୍ତିଗତ ଭାବେ ଖୁବ ପରିଶ୍ରମର ସହ ଲଢ଼େଇ କରିଛୁ । ଏହି ଗୁରୁତ୍ୱପୂର୍ଣ୍ଣ କ୍ଷେତ୍ରରେ ସହଯୋଗକୁ ତ୍ୱରାନ୍ୱିତ କରିବା ଦ୍ୱାରା ଆମେ ମିଳିତ ଭାବେ ଏହି ଆହ୍ୱାନର ମୁକାବିଲା ପାଇଁ ସମୟ ଆସିଛି ।

ମହାନୁଭବମାନେ,

ଆମର 25ତମ ବର୍ଷ ପୂର୍ତ୍ତି ସମାରୋହକୁ ଉପଯୁକ୍ତ ବିଷୟବସ୍ତୁ ‘ସହଭାଗୀ ମୂଲ୍ୟବୋଧ, ସାଧାରଣ ଲକ୍ଷ୍ୟ’ ସହ ଆମେ ସଂଖ୍ୟାଧିକ ସ୍ମାରକୀ ଗତିବିଧି ମାଧ୍ୟମରେ ମିଳିତ ଭାବେ ପାଳନ କରୁଛୁ । ମୁଁ ସ୍ମରଣୀୟ ବର୍ଷର ଉଚିତ ପରିଣତି ଏବଂ 25 ଜାନୁଆରୀ 2018ରେ ନୂଆଦିଲ୍ଲୀଠାରେ ଅନୁଷ୍ଠିତ ହେବାକୁ ଥିବା ଭାରତ-ଆସିଆନ ସ୍ଵତନ୍ତ୍ର ସ୍ମାରକୀ ସମ୍ମିଳନୀରେ ଆପଣମାନଙ୍କୁ ସ୍ୱାଗତ ଜଣାଇବା ପାଇଁ ଆଗ୍ରହର ସହ ଅପେକ୍ଷା କରିଛି ।

ଭାରତର 69ତମ ସାଧାରଣତନ୍ତ୍ର ଦିବସ ସମାରୋହରେ ମୁଖ୍ୟ ଅତିଥି ଭାବେ ଆସିଆନ ନେତାମାନଙ୍କୁ ସ୍ୱାଗତ ଜଣାଇବା ଲାଗି ଭାରତର 125 କୋଟି ଦେଶବାସୀ ଆଗ୍ରହର ସହ ଅପେକ୍ଷା କରିବସିଛନ୍ତି ।

ଆପଣମାନଙ୍କ ସାଧାରଣ ସ୍ୱପ୍ନକୁ ବାସ୍ତବ ରୂପ ଦେବା ଲାଗି କାର୍ଯ୍ୟ କରିବା ନିମନ୍ତେ ମୁଁ ଆଗ୍ରହୀ ।

ଧନ୍ୟବାଦ ।

**********