ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ ମରିସସ ପ୍ରଧାନମନ୍ତ୍ରୀ ଶ୍ରୀ ପ୍ରବିନ୍ଦ ଜଗନ୍ନାଥ ମିଳିତ ଭାବେ ଆଜି ଭିଡିଓ ଲିଙ୍କ ଜରିଆରେ ମରିସସରେ ନୂଆ ଇଏନଟି ହସପିଟାଲ ଓ ମେଟ୍ରୋ ଏକ୍ସପ୍ରେସର ଉଦଘାଟନ କରିଛନ୍ତି ।

ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ ମରିସସ ଲୋକଙ୍କ ଜୀବନ ଧାରଣର ମାନ ବୃଦ୍ଧି କରିବା ଦିଗରେ ଏହି ମେଟ୍ରୋ ଏବଂ ସ୍ୱାସ୍ଥ୍ୟସେବା ପ୍ରକଳ୍ପର ବିଶେଷ ଗୁରୁତ୍ୱ ରହିଛି । ଏହା ମଧ୍ୟ ଦୁଇ ଦେଶ ମଧ୍ୟରେ ସମ୍ପର୍କକୁ ଆହୁରି ନିବିଡ଼ କରିବ । ସେ ଆହୁରି ମଧ୍ୟ କହିଥିଲେ ଯେ ଭାରତ ମହାସାଗରର ଦୁଇଟି ଭିନ୍ନ ଭିନ୍ନ ଭାଗରେ ଥିବା ଭାରତ ଓ ମରିସସର ନେତାମାନେ ଏହି ଭିଡିଓ ଲିଙ୍କ ଜରିଆରେ ପ୍ରଥମ ଥର ଲାଗି ଏକତ୍ର ହୋଇପାରିଛନ୍ତି ।

ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ବହୁପ୍ରତିକ୍ଷିତ ମେଟ୍ରା ଏକ୍ସପ୍ରେସ (ହାଲକା ରେଳ ପରିବହନ) ପ୍ରକଳ୍ପ ଦ୍ୱାରା ମରିସସର ପରିବହନ କ୍ଷେତ୍ରରେ ବ୍ୟାପକ ପରିବର୍ତନ ଆସିପାରିବ । ଏହା ଏକ ଦକ୍ଷ, ଦ୍ରୁତ ଏବଂ ସ୍ୱଚ୍ଛ ଗଣପରିବହନ ମାଧ୍ୟମ ହୋଇପାରିବ । ଏହାଛଡ଼ା ଶକ୍ତି ସଞ୍ଚୟକ୍ଷମ ଇଏନଟି ହସପିଟାଲ ଉନ୍ନତ ମାନର ସ୍ୱାସ୍ଥ୍ୟ ସେବା ଯୋଗାଇ ଦେବା ସହିତ ମରିସସର ପ୍ରଥମ କାଗଜମୁକ୍ତ ଇ-ହସପିଟାଲ ଭାବେ ଲୋକମାନଙ୍କୁ ଲାଭାନ୍ୱିତ କରିବ ।

ମରିସସରେ ଏହି ଦୁଇଟି ପ୍ରକଳ୍ପ ସହିତ ଅନ୍ୟ ବିକାଶମୂଳକ ପ୍ରକଳ୍ପ ଲାଗି ଭାରତର ସହଯୋଗ ନିମନ୍ତେ ପ୍ରଧାନମନ୍ତ୍ରୀ ଜଗନ୍ନାଥ କୃତଜ୍ଞତା ବ୍ୟକ୍ତ କରିଥିଲେ । ଏହି ଦୁଇଟି ଜନ-କଲ୍ୟାଣମୂଳକ ପ୍ରକଳ୍ପକୁ ନିର୍ଦ୍ଧାରିତ ସମୟରେ କାର୍ଯ୍ୟକାରୀ କରିବା ଦିଗରେ ସମସ୍ତ ଅଂଶୀଦାରମାନଙ୍କ ଭୂମିକାକୁ ମଧ୍ୟ ସେ ପ୍ରଶଂସା କରିଥିଲେ ।

ଅନୁଦାନ ସହାୟତା ବଳରେ ମରିସସରେ ବୃକକ ଚିକିତ୍ସା କେନ୍ଦ୍ର, ମେଡି କ୍ଲିନିକ ଏବଂ ଆଞ୍ଚଳିକ ସ୍ୱାସ୍ଥ୍ୟ କେନ୍ଦ୍ର ପ୍ରତିଷ୍ଠା ଲାଗି ଭାରତ ସରକାରଙ୍କ ନିଷ୍ପତ୍ତିକୁ ପ୍ରଧାନମନ୍ତ୍ରୀ ଜଣାଇଥିଲେ ।

ଉଭୟ ରାଷ୍ଟ୍ରର କଲ୍ୟାଣ ତଥା ଭାରତ ମହାସାଗର କ୍ଷେତ୍ର ଏବଂ ସାରା ବିଶ୍ୱରେ ଶାନ୍ତି ଓ ସମୃଦ୍ଧି ଲାଗି ଭାରତ-ମରିସସ ସହଯୋଗ ବୃଦ୍ଧିକୁ ଦୁଇ ନେତା ପ୍ରଶଂସା କରିଥିଲେ ।

*********