ପିଏମଇଣ୍ଡିଆ

ଭୁବନେଶ୍ଵରସ୍ଥିତ ବିଜୁ ପଟ୍ଟନାୟକ ବିମାନ ବନ୍ଦର ରାସ୍ତାକୁ ଓସାରିଆ କରିବା ନିମନ୍ତେ ଆବଶ୍ୟକ ହେଉଥିବା ଜମି ଓଡ଼ିଶା ସରକାର ଭାରତୀୟ ବିମାନ ବନ୍ଦର କର୍ତ୍ତୃପକ୍ଷଙ୍କୁ ପ୍ରଦାନ କରିବେ । ଏହା ପ୍ରତିବଦଳରେ ବିମାନ ବନ୍ଦର କର୍ତ୍ତୃପକ୍ଷ ରାଜ୍ୟ ସରକାରଙ୍କୁ ସମପରିମାଣର ଜମି ହସ୍ତାନ୍ତର କରିବେ । ଏହି ଜମି ଅଦଳବଦଳ ପ୍ରସ୍ତାବକୁ କେନ୍ଦ୍ର କେବିନେଟ ଅନୁମୋଦନ କରିଛନ୍ତି । ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କେବିନେଟ ବୈଠକରେ ଏହି ବିଷୟରେ ଚର୍ଚ୍ଚା କରାଯାଇ ନିଷ୍ପତ୍ତି ନିଆଯାଇଛି । ରାଜ୍ୟ ସରକାର ବିମାନ ବନ୍ଦର ରାସ୍ତା ପ୍ରଶସ୍ତିକରଣ ବାବଦରେ ଆବଶ୍ୟକ ହେଉଥିବା ୧.୬ ଏକର ଜମି ଭାରତୀୟ ବିମାନ ବନ୍ଦର ପ୍ରାଧିକରଣ (ଏଏଆଇ)କୁ ପ୍ରଦାନ କରିବେ ଏବଂ ସମ ପରିମାଣର ଜମି ପ୍ରାଧିକରଣ ପକ୍ଷରୁ ରାଜ୍ୟ ସରକାରଙ୍କୁ ଦିଆଯିବ ।

ବିଜୁ ପଟ୍ଟନାୟକ ବିମାନ ବନ୍ଦରକୁ ଏକ ସମାନ୍ତରାଳ ଟାକ୍ସି ରାସ୍ତା ନିର୍ମାଣ ନିମନ୍ତେ ଏହି ଜାଗା ବ୍ୟବହୃତ ହେବ । ଏହା ଦ୍ଵାରା ଯାନବାହନ ଓ ଯାତ୍ରୀ ପରିବହନରେ ବିଶେଷ ସୁବିଧା ହେବ । ବିମାନ ବନ୍ଦର ନିକଟରେ ସୁରକ୍ଷା ବ୍ୟବସ୍ଥାକୁ ସୁସଂଗତ କରିବା ଏବଂ ଯାତ୍ରୀ ଗମନାଗମନ ପାଇଁ ବିମାନ ବନ୍ଦର ପର୍ଯ୍ୟନ୍ତ ରାଜ୍ୟ ସରକାରଙ୍କ ସଡ଼କ (ଏକାମ୍ର ମାର୍ଗ/ପଳାସପଲ୍ଲୀ ରାସ୍ତା)କୁ ପୃଥକ ଭାବେ ନିର୍ମାଣ କରିବାକୁ ଓଡ଼ିଶା ସରକାର ୧.୬ ଏକର ଜମି ଅଦଳବଦଳ କରିବାକୁ ବିମାନ ବନ୍ଦର ପ୍ରାଧିକରଣକୁ ପ୍ରସ୍ତାବ ଦେଇଥିଲେ ।