ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସେପ୍ଟେମ୍ବର 2 ରୁ 3 ତାରିଖ ଭିଏତନାମ ଗସ୍ତରେ ଯିବେ । ଚୀନର ହାଙ୍ଗଝୁ ଠାରେ 3 ସେପ୍ଟେମ୍ବରରୁ 5 ସେପ୍ଟେମ୍ବର ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ବାର୍ଷିକ ଜି-20 ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ଯୋଗଦେବାର କାର୍ଯ୍ୟକ୍ରମ ରହିଛି ।
ପ୍ରଧାନମନ୍ତ୍ରୀ ତାଙ୍କ ଫେସବୁକ ପୃଷ୍ଠାରେ ବିଭିନ୍ନ ପୋଷ୍ଟ ମାଧ୍ୟମରେ କହିଛନ୍ତି ଯେ…….

“ଜାତୀୟ ଦିବସରେ ଭିଏତନାମ ଜନସାଧାରଣଙ୍କୁ ମୋର ଅଭିନନ୍ଦନ । ଭିଏତନାମ ଆମର ବନ୍ଧୁ ରାଷ୍ଟ୍ର ଯାହା ସହିତ ଆମେ ଆମର ସମ୍ପର୍କକୁ ଗଢି ତୋଳିଛୁ ।

ଆଜି ସନ୍ଧ୍ୟାରେ, ମୁଁ ଭିଏତନାମ ସ୍ଥିତ ହାନୋଇରେ ପହଂଚିବି । ଭାରତ ଓ ଭିଏତନାମ ମଧ୍ୟରେ ସଂପର୍କକୁ ଆହୁରି ନିବିଡ କରିବା ପାଇଁ ଏହା ମହତ୍ତ୍ୱପୂର୍ଣ୍ଣ ଗସ୍ତ ହେବ । ଭିଏତନାମ ସହିତ ଭାରତର ଦ୍ୱିପାକ୍ଷୀକ ସଂପର୍କକୁ ମୋ ସରକାର ପ୍ରାଧାନ୍ୟ ଦେଇଆସିଛି । ଭାରତ ଓ ଭିଏତନାମ ମଧ୍ୟରେ ଭାଗିଦାରୀତା ଏସିଆ ସହିତ ବିଶ୍ୱର ଅନ୍ୟ ରାଷ୍ଟ୍ରଗୁଡିକ ପାଇଁ ଫଳପ୍ରଦ ହେବ ।

ଏହି ଗସ୍ତ କାଳରେ ପ୍ରଧାନମନ୍ତ୍ରୀ ମିଷ୍ଟର ଗୁୟେନ ସୁଆନ ଫୁକଙ୍କ ସହିତ ମୁଁ ବିସ୍ତୃତ ଭାବେ ଆଲୋଚନା କରିବି । ଦ୍ୱିପାକ୍ଷୀକ ସଂପର୍କର ବିଭିନ୍ନ ଦିଗ ଉପରେ ସଂପୂର୍ଣ୍ଣ ସମୀକ୍ଷା କରିବୁ ।

ଭିଏତନାମର ରାଷ୍ଟ୍ରପତି ମିଷ୍ଟର ତ୍ରାନ ଦାଇ କାଂଗ, ଭିଏତନାମ କମ୍ୟୁନିଷ୍ଟ ପାର୍ଟିର ସାଧାରଣ ସଚିବ ମିଷ୍ଟର ଗୁୟେନ ଫୁ ଟ୍ରଙ୍ଗ ଏବଂ ଭିଏତନାମ ରାଷ୍ଟ୍ରୀୟ ଆସେମ୍ବ୍ଲିର ଅଧ୍ୟକ୍ଷ ସୁଶ୍ରୀ ଗୁୟେନ ଥି କିମ ଗାନଙ୍କ ସହିତ ମଧ୍ୟ ମୁଁ ସାକ୍ଷାତ କରିବି ।

ଭିଏତନାମ ସହିତ ଭାରତ ଏକ ମଜବୁତ ଆର୍ଥିକ ସଂପର୍କ ସ୍ଥାପନ କରିବା ପାଇଁ ଆଗ୍ରହୀ ଯାହା ପାରସ୍ପରିକ ଭାବେ ଦୁଇ ଦେଶର ନାଗରୀକମାନଙ୍କ ହିତ ସାଧନ କରିବ । ଦୁଇ ଦେଶର ଜନସାଧାରଣଙ୍କ ମଧ୍ୟରେ ସଂପର୍କକୁ ସୁଦୃଢ କରିବା ପାଇଁ ମୋର ଭିଏତନାମ ଗସ୍ତର ଅନ୍ୟ ଏକ ପ୍ରଚେଷ୍ଟା ହେବ ।

ଭିଏତନାମଠାରେ ବିଂଶ ଶତାବ୍ଦୀର ତୁଙ୍ଗ ଜନନାୟକ ହୋ ଚି ମିନଙ୍କୁ ମୁଁ ଶ୍ରଦ୍ଧାଞଳି ଜ୍ଞାପନ କରିବାର ସୁଯୋଗ ପାଇବି । ସେଠାରେ ଜାତୀୟ ସ୍ତରର ନେତୃତ୍ୱ ଏବଂ ଶହୀଦ ମାନଙ୍କ ସ୍ମୃତିଚିହ୍ନରେ ପୁଷ୍ପମାଲ୍ୟ ଅର୍ପଣ କରିବା ସହିତ କାନ ସୁ ପାଗୋଡା ପରିଦର୍ଶନ କରିବି ।

ଚୀନର ହାଙ୍ଗଝୁ ଠାରେ 3 ରୁ 5 ସେପ୍ଟେମ୍ବର, 2016 ରେ ଅନୁଷ୍ଠିତ ହେବାକୁ ଥିବା ଜୀ-20 ବାର୍ଷିକ ଶିଖର ସମ୍ମିଳନୀରେ ମୁଁ ଯୋଗ ଦେବି । ଭିଏତନାମରୁ ହାଙ୍ଗଝୁ ପହଂଚିବା ପରେ ଗୁରୁତ୍ୱପୂର୍ଣ୍ଣ ଦ୍ୱିପାକ୍ଷୀକ ଗସ୍ତ ସମାପ୍ତ କରିବି ।

ଜି-୨୦ ଶିଖର ସମ୍ମିଳନୀରେ ବିଶ୍ୱର ଅନ୍ୟ ନେତୃତ୍ୱମାନଙ୍କ ସହିତ ଅନ୍ତର୍ରାଷ୍ଟ୍ରୀୟ ସ୍ତରର ବିଭିନ୍ନ ଆହ୍ୱାନର ମୁକାବିଲା ପାଇଁ ଆଲୋଚନାର ସୁଯୋଗ ମିଳିବ । ବିଶ୍ୱ ଅର୍ଥନୀତିର ଚିରସ୍ଥାୟୀ ଏବଂ ସ୍ଥିର ଅଭିବୃଦ୍ଧି ସହିତ ସଂପ୍ରତି ଦେଖାଦେଇଥିବା ସାମାଜିକ ନିରାପତ୍ତା ଏବଂ ଆର୍ଥିକ ଆହ୍ୱାନଗୁଡିକ ଉପରେ ଆମେ ଆଲୋଚନା କରିବୁ ।

ବିଶ୍ୱ ସ୍ତରରେ ସାମାଜିକ- ଅର୍ଥନୈତିକ ଅଭିବୃଦ୍ଧି ଖାସକରି ପ୍ରଗତିଶୀଳ ରାଷ୍ଟ୍ରଗୁଡିକର ଜନସାଧାରଣଙ୍କ ଆବଶ୍ୟକତାକୁ ଦୃଷ୍ଟିରେ ରଖି ବିଭିନ୍ନ ସମସ୍ୟାର ସମାଧାନ ଉପରେ ଭାରତ ଗଠନମୂଳକ ଭାବେ କାର୍ଯ୍ୟକରିବ ।

ଏହି ଶିଖର ସମ୍ମିଳନୀ ଏକ ଫଳପ୍ରଦ ସମ୍ମିଳନୀ ହେବ ବୋଲି ମୁଁ ଆଶା କରୁଛି” ବୋଲି ପ୍ରଧାନମନ୍ତ୍ରୀ କହିଛନ୍ତି ।