ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ସୈନିକମାନଙ୍କ ସହିତ ଦୀପାବଳି ପାଳନ କରିବା ପାଇଁ ହିମାଚଳ ପ୍ରଦେଶର କିନ୍ନୌର ଜିଲ୍ଲାର ଭାରତ-ଚୀନ ସୀମା ନିକଟ ସୁମଡୋ ଅଞ୍ଚଳ ଗସ୍ତ କରିଛନ୍ତି ।

ପ୍ରଧାନମନ୍ତ୍ରୀ ଏହି ଅବସରରେ ITBPର ଯବାନ ଏବଂ ଭାରତୀୟ ସେନାଙ୍କ ସହିତ ମତବିନିମୟ କରିବା ସଙ୍ଗେ ସଙ୍ଗେ ସେମାନଙ୍କୁ ମିଠା ବାଣ୍ଟିଥିଲେ ।

ସୈନିକମାନଙ୍କୁ ସମ୍ବୋଧିତ କରି ସେ କହିଥିଲେ ଯେ, 2001 ରୁ ପ୍ରତିବର୍ଷ ଦୀପାବଳିରେ ପ୍ରତ୍ୟକ୍ଷ ଭାବେ ସେ ସଶସ୍ତ୍ର ବଳ କର୍ମଚାରୀଙ୍କ ନିକଟକୁ ଗସ୍ତ କରି ଆସୁଛନ୍ତି ।

“ସନ୍ଦେଶ2ସୋଲଜର୍ସ” ଅଭିଯାନରେ ସୈନିକମାନଙ୍କୁ ବାର୍ତ୍ତା ପଠାଇବା ପାଇଁ ସେ ନିବେଦନ କରିଥିଲେ । ଏହାକୁ ଦେଶର ଅଧିକାଂଶ ଉତ୍ସାହୀ ଜନତା ସାଦରେ ଗ୍ରହଣ କରି ଆମର ବୀର ଯବାନମାନଙ୍କ ଉଦ୍ଦେଶ୍ୟରେ ବାର୍ତ୍ତା ମାନ ପ୍ରେରଣ କରିଛନ୍ତି ବୋଲି ପ୍ରଧାନମନ୍ତ୍ରୀ ଦର୍ଶାଇଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ, ଅବସରପ୍ରାପ୍ତ ସେନା କର୍ମଚାରୀଙ୍କ ପାଇଁ ଏକ ପାହ୍ୟା ଏକ ପେନସନ ଯୋଜନା ଲାଗୁ କରିବାକୁ ଦେଇଥିବା ପ୍ରତିଶୃତିକୁ କାର୍ଯ୍ୟକାରୀ କରିବାରେ ସକ୍ଷମ ହୋଇଥିବାରୁ ସେ ଅତ୍ୟନ୍ତ ଆନନ୍ଦିତ । ଏହି ଅବସରରେ ସେନାଧ୍ୟକ୍ଷ ଜେନେରାଲ ଦଳବୀର ସିଂହ ଉପସ୍ଥିତ ଥିଲେ ।

ସୁମଡୋରୁ ପ୍ରତ୍ୟାବର୍ତ୍ତନ କରିବା ସମୟରେ ପ୍ରଧାନମନ୍ତ୍ରୀ ନିକଟସ୍ଥ ଚାଙ୍ଗୋ ଗ୍ରାମରେ କିଛି କ୍ଷଣ ବିତାଇଥିଲେ । ସେଠାରେ ସେ ଗ୍ରାମବାସୀଙ୍କୁ ଦୀପାବଳିର ଅଭିନନ୍ଦନ ଜଣାଇବା ସହିତ ଛୋଟ ଛୋଟ ପିଲାମାନଙ୍କୁ ମିଠା ବାଣ୍ଟିଥିଲେ ।