ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଗୁଜରାଟର ଭଦୋଦରାଠାରେ ଏକ ସାଧାରଣ ସଭାରେ ଭଦୋଦରା ସିଟି କମାଣ୍ଡ କଣ୍ଟ୍ରୋଲ କେନ୍ଦ୍ର; ୱାଘୋଦିୟା ଆଂଚଳିକ ଜଳଯୋଗାଣ ଯୋଜନା ଏବଂ ବ୍ୟାଙ୍କ ଅଫ୍ ବରୋଦାର ନବନିର୍ମିତ ମୁଖ୍ୟ କାର୍ଯ୍ୟାଳୟକୁ ଉଦ୍ଘାଟନ କରିଛନ୍ତି ।
ଏଠାରେ ପ୍ରଧାନମନ୍ତ୍ରୀ ଆବାସ ଯୋଜନା (ଉଭୟ ଗ୍ରାମାଂଚଳ ଏବଂ ସହରାଂଚଳ)ର ହିତାଧିକାରୀମାନଙ୍କୁ ପ୍ରଧାନମନ୍ତ୍ରୀ ଘର ଚାବି ହସ୍ତାନ୍ତର କରିଥିଲେ । ସେ ବିଭିନ୍ନ ଭିତ୍ତିଭୂମି ଏବଂ ଉନ୍ନୟନ ମୂଳକ ପ୍ରକଳ୍ପର ଶିଳାନ୍ୟାସ କରିଥିଲେ । ଏଥିମଧ୍ୟରେ ରହିଛି ସମନ୍ୱିତ ପରିବହନ କେନ୍ଦ୍ର, ଆଂଚଳିକ ଜଳଯୋଗାଣ ଯୋଜନା, ଗୃହ ନିର୍ମାଣ ପ୍ରକଳ୍ପ ଏବଂ ଏକ ଫ୍ଲାଏଓଭର । ସେ ମଧ୍ୟ ଭଦୋଦରାଠାରେ ମୁନ୍ଦ୍ରା-ଦିଲ୍ଲୀ ପେଟ୍ରୋଲିୟମ ଉତ୍ପାଦ ପାଇପଲାଇନ କ୍ଷମତା ସମ୍ପ୍ରସାରଣ ପ୍ରକଳ୍ପ ଏବଂ ହିନ୍ଦୁସ୍ତାନ ପେଟ୍ରୋଲିୟମ ନିଗମର ଏକ ପରିବେଶଧର୍ମୀ ମାର୍କେଟିଂ ଟର୍ମିନାଲ ପ୍ରକଳ୍ପର ଶିଳାନ୍ୟାସ କରିଥିଲେ ।

ସେଠାରେ ସମବେତ ଜନତାଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଥିଲେ ଯେ ଭଦୋଦରାରେ ଯେଉଁ ସ୍ତରର ଉନ୍ନୟନମୂଳକ କାର୍ଯ୍ୟର ଶୁଭାରମ୍ଭ କରାଯାଇଛି ତାହା ଅଭୂତପୂର୍ବ ।

ପ୍ରଧାନମନ୍ତ୍ରୀ କହିଥିଲେ ଯେ ସରକାର ସ୍ପଷ୍ଟ ଭାବେ ବିକାଶକୁ ପ୍ରାଥମିକତା ଦେଉଛନ୍ତି ଏବଂ ସମ୍ବଳର ଉପଯୋଗ ଜନସାଧାରଣଙ୍କ କଲ୍ୟାଣ ନିମନ୍ତେ କରାଯାଉଛି ।

ପ୍ରଧାନମନ୍ତ୍ରୀ କହିଥିଲେ ଯେ ଛୋଟ ଥିବା ବେଳେ ସେ ଘୋଘାରୁ ଦହେଜ ମଧ୍ୟରେ ନୌଯାତ୍ରା ବିଷୟରେ ଶୁଣି ଆସୁଥିଲେ । ସେ କହିଥିଲେ ଯେ ସରକାର ସାମଗ୍ରୀକ ବିକାଶ ପ୍ରତି ଗୁରୁତ୍ୱ ଦେଉଛନ୍ତି ଏବଂ ନୌପରିବହନ ସେବା ଆଜି କାର୍ଯ୍ୟକାରୀ ହୋଇଛି ।

ପ୍ରଧାନମନ୍ତ୍ରୀ କହିଥିଲେ ଯେ ପୂର୍ବବର୍ଷ ଭଳି ଏଥର ମଧ୍ୟ ଅକ୍ଟୋବର 31 ତାରିଖ, ସର୍ଦ୍ଦାର ପଟେଲଙ୍କ ଜୟନ୍ତୀରେ “ଏକତା ଦୌଡ” (Run For Unity) ନାମକ ଗଣଦୌଡ଼ ଆୟୋଜନ କରାଯିବ । ଉତ୍ସାହର ସହ ଏଥିରେ ଭାଗ ନେବା ପାଇଁ ସେ ଜନସାଧାରଣଙ୍କୁ ଆହ୍ୱାନ କରିଥିଲେ ।

**********