ପିଏମଇଣ୍ଡିଆ

ନମସ୍କାର,

ଜାତିର ପିତା, ବଙ୍ଗବନ୍ଧୁ ଶେଖ ମୁଜିବୁର ରେହମାନଙ୍କ 100ତମ ଜନ୍ମ ବାର୍ଷିକୀ ସମାରୋହ ଅବସରରେ ବାଂଲାଦେଶବାସୀଙ୍କୁ 130 କୋଟି ଭାରତୀୟଙ୍କ ତରଫରୁ ଅନେକ ଶୁଭେଚ୍ଛା ଓ ଶୁଭକାମନା ।

ବନ୍ଧୁଗଣ, ଶେଖ ହାସିନାଜୀ ଏହି ଐତିହାସିକ ସମାରୋହରେ ଭାଗ ନେବା ପାଇଁ ମୋତେ ବ୍ୟକ୍ତିଗତ ଭାବେ ନିମନ୍ତ୍ରଣ ଜଣାଇଥିଲେ । ହେଲେ କରୋନା ଭାଇରସ ଯୋଗୁଁ ଏହା ସମ୍ଭବ ହୋଇପାରିଲା ନାହିଁ । ତେବେ ଶେଖ ହାସିନାଜୀ ମତେ ଏକ ବିକଳ୍ପ ପ୍ରଦାନ କଲେ ଓ ମୁଁ ଭିଡିଓ ଲିଙ୍କ୍ ମାଧ୍ୟମରେ ଆପଣମାନଙ୍କ ଗହଣରେ ଉପସ୍ଥିତ ହୋଇପାରିଲି ।

ବନ୍ଧୁଗଣ, ବଙ୍ଗବନ୍ଧୁ ଶେଖ ମୁଜିବୁର ରେହମାନ ଗତ ଶତାବ୍ଦୀର ଅନ୍ୟତମ ମହାନ ବ୍ୟକ୍ତିତ୍ୱ ଥିଲେ । ତାଙ୍କର ସମଗ୍ର ଜୀବନ ଆମ ସମସ୍ତଙ୍କ ପାଇଁ ବେଶ ପ୍ରେରଣାଦାୟୀ ହୋଇରହିଛି ।

ବଙ୍ଗବନ୍ଧୁର ଅର୍ଥ-

ସାହସୀ ନେତା

ଦୃଢ଼ ବିଶ୍ୱାସୀ

ଶାନ୍ତିର ପୂଜାରୀ

ନ୍ୟାୟ, ସମାନତା ଓ ଆତ୍ମସମ୍ମାନର ପ୍ରତୀକ

ନିଷ୍ଠୁରତା ବିରୋଧୀ

ଓ ଜୋରଜବରଦସ୍ତି ବିରୋଧରେ ଢାଲ !!

ତାଙ୍କର ଏସବୁ ମୂଲ୍ୟବୋଧ ସେ ସମୟର ଲକ୍ଷ ଲକ୍ଷ ଯୁବପିଢ଼ିଙ୍କୁ ବାଂଲାଦେଶକୁ ମୁକ୍ତ କରିବା ପାଇଁ ନୂତନ ଶକ୍ତି ପ୍ରଦାନ କରିଥିଲା । ଆଜି ବାଂଲାଦେଶବାସୀ ନିଜ ପ୍ରିୟ ଦେଶକୁ ଶେଖ ମୁଜିବୁର ରେହମାନଙ୍କ ସ୍ୱପ୍ନ ସୁନାର ବାଂଲା ଭାବେ ଗଢ଼ି ତୋଳିବାକୁ ଲାଗି ପଡ଼ିଥିବା ଦେଖି ବେଶ ଖୁସି ଲାଗୁଛି ।

ବନ୍ଧୁଗଣ, ବଙ୍ଗବନ୍ଧୁଙ୍କ ଜୀବନ ଏକବିଂଶ ଶତାବ୍ଦୀର ବିଶ୍ୱକୁ ମହତ୍ୱପୂର୍ଣ୍ଣ ସନ୍ଦେଶ ଦେଉଛି । କିପରି ଏକ ଦମନକାରୀ ଓ ଅତ୍ୟାଚାରୀ ଶାସନତନ୍ତ୍ର ସମସ୍ତ ଗଣତାନ୍ତ୍ରିକ ମୂଲ୍ୟବୋଧକୁ ନାକଚ କରି ବାଂଲା ଭୂମିରେ ଅନ୍ୟାୟର ଶାସନ ଓ ବିଧ୍ୱଂସଲୀଳା ଚଳାଇଥିଲା ତାହା ସମସ୍ତଙ୍କ ମନେ ଥିବ ।
ବାଂଲାଦେଶକୁ ଏହି ବିଧ୍ୱଂସ ଓ ଗଣହତ୍ୟାର ବିପର୍ଯ୍ୟୟରୁ ମୁକୁଳାଇ ସକାରାତ୍ମକ ଓ ପ୍ରଗତିଶୀଳ ସମାଜରେ ପରିଣତ କରିବାକୁ ସେ ନିଜ ଜୀବନର ପ୍ରତିଟି ମୁହୂର୍ତ୍ତକୁ ବିନିଯୋଗ କରିଥିଲେ । କୌଣସି ଦେଶର ବିକାଶର ମୂଳଦୁଆ କେବେ ବି ଘୃଣା ଓ ନକାରାତ୍ମକତା ହୋଇପାରିବ ନାହିଁ ବୋଲି ସେ ବିଶ୍ୱାସ କରୁଥିଲେ ।

ତେବେ ତାଙ୍କର ଏହି ଚିନ୍ତାଧାରା ଓ ଉଦ୍ୟମକୁ କିଛି ଲୋକ ପସନ୍ଦ କଲେ ନାହିଁ ଓ ତାଙ୍କୁ ଆମ ଗହଣରୁ ଛଡାଇ ନେଲେ । ବାଂଲାଦେଶ ତଥା ଆମେ ସମସ୍ତେ ଭାଗ୍ୟବାନ ଯେ, ପ୍ରଧାନମନ୍ତ୍ରୀ ଶେଖ ହାସିନା ଓ ଶେଖ ରେହାନାଙ୍କ ଉପରେ ଭଗବାନଙ୍କ ଆଶୀର୍ବାଦ ଥିଲା । କାରଣ ହିଂସା ଓ ଘୃଣାର ସମର୍ଥକମାନେ ସେମାନଙ୍କୁ ହତ୍ୟା କରିବା ପାଇଁ ସମସ୍ତ ଉଦ୍ୟମ କରିଥିଲେ ।

ଆତଙ୍କ ଓ ହିଂସାକୁ ରାଜନୀତି ତଥା କୂଟନୀତିର ଅସ୍ତ୍ର ଭାବେ ସଜାଇ କିପରି ଏକ ସମାଜ ତଥା ଦେଶ ଧ୍ୱଂସ ଆଡ଼କୁ ଯାଉଛି ତାହା ଆମେ ସମସ୍ତେ ଦେଖୁଛୁ । ବାଂଲାଦେଶ ସଫଳତାର ଶିଡି ଚଢୁଥିବା ବେଳେ ଆତଙ୍କ ଓ ହିଂସାର ସମର୍ଥକମାନେ କେଉଁଠି, କିପରି ପରିସ୍ଥିତିରେ ଅଛନ୍ତି ତାହା ସାରା ବିଶ୍ୱ ଦେଖୁଛି ।

ବନ୍ଧୁଗଣ, ବଙ୍ଗବନ୍ଧୁଙ୍କ ପ୍ରେରଣା ଓ ଶେଖ ହାସିନାଙ୍କ ନେତୃତ୍ୱରେ ବାଂଲାଦେଶ ଯେପରି ସମସ୍ତଙ୍କୁ ସାଥିରେ ନେଇ ତଥା ବିକାଶମୂଳକ ନୀତି ଆପଣେଇ ଆଗେଇ ଚାଲିଛି ତାହା ସତରେ ପ୍ରଶଂସନୀୟ ।

ଅର୍ଥନୀତି ହେଉ କି ସାମାଜିକ ସୂଚୀ ହେଉ କିମ୍ବା କ୍ରୀଡା, ବାଂଲାଦେଶ ଆଜି ନୂଆ କୀର୍ତ୍ତିମାନ ସ୍ଥାପନ କରିଛି । ଦକ୍ଷତା, ଶିକ୍ଷା, ସ୍ୱାସ୍ଥ୍ୟ, ମହିଳା ସଶକ୍ତିକରଣ ଓ ମାଇକ୍ରୋ ଫାଇନାନ୍ସ ଆଦି କ୍ଷେତ୍ରରେ ବାଂଲାଦେଶ ଅଭୂତପୂର୍ବ ଅଗ୍ରଗତି କରିଛି ।

ମୁଁ ଖୁସିର ସହ କହିବାକୁ ଚାହେଁ ଯେ, ଗତ 5-6 ବର୍ଷ ମଧ୍ୟରେ ଭାରତ ଓ ବାଂଲାଦେଶ ଦ୍ୱିପାକ୍ଷିକ ସମ୍ପର୍କର ସୁବର୍ଣ୍ଣ ଅଧ୍ୟାୟ ରଚିଛନ୍ତି ଓ ଆମ ଭାଗିଦାରୀକୁ ନୂଆ ଦିଶା ଓ ଦିଗନ୍ତ ପ୍ରଦାନ କରିଛନ୍ତି । ଦୁଇ ଦେଶ ମଧ୍ୟରେ ବଢ଼ିଥିବା ସମ୍ପର୍କ ଯୋଗୁଁ ଦୁଇ ଦେଶ ମଧ୍ୟରେ ଥିବା ସ୍ଥଳ ସୀମା ଓ ସମୁଦ୍ର ସୀମା ଭଳି ଜଟିଳ ପ୍ରସଙ୍ଗ ଆମେ ଶାନ୍ତିର ସହ ସମାଧାନ କରିପାରିଛୁ ।

ଆଜି ବାଂଲାଦେଶ କେବଳ ଦକ୍ଷିଣ ଏସିଆରେ ଭାରତର ସବୁଠାରୁ ବଡ଼ ବ୍ୟବସାୟିକ ଅଂଶୀଦାର ନୁହେଁ ବରଂ ବିକାଶର ଭାଗୀଦାର ମଧ୍ୟ ପାଲଟିଛି । ଭାରତରେ ଉତ୍ପାଦିତ ହେଉଥିବା ବିଦ୍ୟୁତ ଶକ୍ତି ବାଂଲାଦେଶର ଲକ୍ଷ ଲକ୍ଷ ଘର ଓ କାରଖାନାକୁ ଯୋଗାଣ ହେଉଛି । ବନ୍ଧୁତାର ପାଇପ ଲାଇନ ମାଧ୍ୟମରେ ଆମ ସମ୍ପର୍କରେ ଏକ ନୂଆ ଦିଗନ୍ତ ଯୋଡ଼ି ହୋଇଛି ।

ରାସ୍ତା, ରେଳପଥ, ଆକାଶମାର୍ଗ, ଜଳପଥ କିମ୍ବା ଇଣ୍ଟରନେଟ ଭଳି ଅନେକ କ୍ଷେତ୍ରରେ ଆମ ସହଯୋଗ ଯୋଗୁଁ ଦୁଇ ଦେଶର ଲୋକେ ଆହୁରି ଘନିଷ୍ଠ ହୋଇ ପାରିଛନ୍ତି ।

ବନ୍ଧୁଗଣ, ଆମର ଐତିହ୍ୟ ଟାଗୋର, କାଜି ନଜରୁଲ ଇସଲାମ, ଉସ୍ତାଦ ଆଲ୍ଲାଉଦ୍ଦିନ ଖାନ, ଲାଲୋନ ଶାହ, ଜୀବନାନନ୍ଦ ଦାସ ଓ ଇଶ୍ୱରଚନ୍ଦ୍ର ବିଦ୍ୟାସାଗରଙ୍କ ଭଳି ବୁଦ୍ଧିଜୀବିଙ୍କ ଠାରୁ ଆସିଛି । ବଙ୍ଗବନ୍ଧୁଙ୍କ ଏହି ଉତ୍ତରଦାୟିତ୍ୱ ଓ ପ୍ରେରଣା ଆମ ଐତିହ୍ୟକୁ ଆହୁରି ବ୍ୟାପକ କରିଛି । ତାଙ୍କ ଚିନ୍ତାଧାରା ଓ ମୂଲ୍ୟବୋଧ ସହିତ ଭାରତ ସବୁବେଳେ ଜଡିତ ରହିଛି । ଭାରତ ଓ ବାଂଲାଦେଶ ମଧ୍ୟରେ ଥିବା ଏହି ଗଭୀର ସମ୍ପର୍କ ଐତିହ୍ୟକୁ ବାଣ୍ଟିବାର ମୂଳଦୁଆ ପକାଇଛି । ଆମମାନଙ୍କ ଐତିହ୍ୟ, ଗଭୀର ବନ୍ଧନ ଓ ବଙ୍ଗବନ୍ଧୁଙ୍କ ଦ୍ୱାରା ପ୍ରଦର୍ଶିତ ପଥ ଏହି ଦଶନ୍ଧିରେ ଦୁଇ ଦେଶଙ୍କ ଭାଗିଦାରୀ, ପ୍ରଗତି ଓ ସମୃଦ୍ଧିର ଦୃଢ ଆଧାର ସାଜିଛି ।

ଆଗାମୀ ବର୍ଷ ବାଂଲାଦେଶ ମୁକ୍ତିର 50 ବର୍ଷ ହେବ ଓ 2022ରେ ଭାରତର ସ୍ୱାଧୀନତାର 75ତମ ଜୟନ୍ତୀ ହେବ । ମୁଁ ଦୃଢ ବିଶ୍ୱାସୀ ଯେ, ଏହି ଦୁଇ ମାଇଲଖୁଣ୍ଟ ଭାରତ ଓ ବାଂଲାଦେଶର ବିକାଶକୁ ନୂତନ ଉଚ୍ଚତାକୁ ନେଇଯିବ, ଦୁଇ ଦେଶ ମଧ୍ୟରେ ବନ୍ଧୁତା ଆହୁରି ମଜବୁତ ହେବ ।
ପୁଣି ଥରେ ମୁଁ ବଙ୍ଗବନ୍ଧୁଙ୍କ ଶତବାର୍ଷିକୀ ବର୍ଷ ଅବସରରେ ସମଗ୍ର ବାଂଲାଦେଶକୁ ଶୁଭେଚ୍ଛା ଜଣାଉଛି ।

ଜୟ ବାଂଲା, ଜୟ ହିନ୍ଦ!!