ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଏକାଦଶ ପ୍ରଶାସନିକ ସେବା ଦିବସରେ ଉଲ୍ଲେଖନୀୟ ସେବା ପାଇଁ ପ୍ରଶାସନିକ ଅଧିକାରୀମାନଙ୍କୁ ପୁରସ୍କାର ପ୍ରଦାନ ସହ ସେମାନଙ୍କୁ ସମ୍ବୋଧିତ କରିଥିଲେ ।

ଏହି ଦିବସକୁ ପୁନଃସମର୍ପଣ ଦିନ ଭାବେ ବର୍ଣ୍ଣନା କରି ପ୍ରଧାନମନ୍ତ୍ରୀ କହିଥିଲେ ଯେ, ପରିବର୍ତ୍ତିର ସମୟରେ ପ୍ରଶାସନିକ ଅଧିକାରୀମାନେ ସେମାନଙ୍କର ଶକ୍ତି, ସାମର୍ଥ୍ୟ, ଆହ୍ଵାନ ଏବଂ ଦାୟିତ୍ଵବୋଧ ସମ୍ପର୍କରେ ପୂର୍ଣ୍ଣରୂପେ ସଚେତନ ଅଛନ୍ତି ।

ସେ କହିଥିଲେ ଯେ, ଦୁଇ ଦଶନ୍ଧି ପୂର୍ବେ ଥିବା ପରିସ୍ଥିତି ଏବେ ଆଉ ନାହିଁ । ବହୁତ ପରିବର୍ତ୍ତନ ଘଟିଛି । ଆଗାମୀ ପାଞ୍ଚ ବର୍ଷ ମଧ୍ୟରେ ଆହୁରି ପରିବର୍ତ୍ତନ ଘଟିବ । ଏ ସମ୍ପର୍କରେ ଅଧିକ ବର୍ଣ୍ଣନା କରି ପ୍ରଧାନମନ୍ତ୍ରୀ କହିଥିଲେ ଯେ, ପୂର୍ବରୁ ସରକାରମାନେ ଏକମାତ୍ର
ସେବା ଓ ସାମଗ୍ରୀ ପ୍ରଦାନକାରୀ ଥିଲେ । ଏହିପରି ବ୍ୟବସ୍ଥାରେ ଅନେକ ତ୍ରୁଟିବିଚ୍ୟୁତି ରହୁଥିଲା ଯାହାକୁ ଅଣଦେଖା କରାଯିବାର ବହୁତ ସୁଯୋଗ ରହିଥିଲା । ଏବେ ସାଧାରଣ ଲୋକମାନେ ଜାଣିଲେଣି ଯେ, ସରକାରଙ୍କ ଅପେକ୍ଷା ଘରୋଇ ଉଦ୍ୟୋଗ ବେଶ ଭଲ ସେବା ଯୋଗାଇ ଦେଉଛନ୍ତି । ବିଭିନ୍ନ ସ୍ତରରେ ଏବଂ ବିଭିନ୍ନ କ୍ଷେତ୍ରରେ ବିକଳ୍ପ ସେବା ମିଳୁଥିବାରୁ ଏହା ସରକାର ଏବଂ ସରକାରୀ ଅଧିକାରୀମାନଙ୍କ ପାଇଁ ଏକ ବଡ ଚାଲେଞ୍ଜ ହେବା ସହ ଉତ୍ତରଦାୟିତ୍ଵ ବଢି ଯାଇଛି ।

ଏହି ଅବସରରେ ପ୍ରଧାନମନ୍ତ୍ରୀ ପ୍ରତିଯୋଗିତାମୂଳକ ଭାବନାର ଗୁରୁତ୍ଵ ସମ୍ପର୍କରେ ଅବତାରଣା କରିଥିଲେ । ଏଭଳି ଭାବନା ସମାଜର ପ୍ରତ୍ୟେକ ସ୍ତରରେ ଗୁଣାତ୍ମକ ପରିବର୍ତ୍ତନ ଆଣିଥାଏ । ଯେତେ ଶୀଘ୍ର ସରକାରୀ ସ୍ତରରେ ନିୟନ୍ତ୍ରକ ମନୋଭାବ ସୁଯୋଗ ପ୍ରଦାନକାରୀ ରୂପେ ପରିବର୍ତ୍ତିତ ହେବ ସେତେ ଶୀଘ୍ର ଆହ୍ଵାନଗୁଡିକ ସୁଯୋଗରେ ପରିଣତ ହେବ ବୋଲି ପ୍ରଧାନମନ୍ତ୍ରୀ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ, କେତେକ କାର୍ଯ୍ୟକ୍ଷେତ୍ରରେ ସରକାରୀ ଉପସ୍ଥିତିର ଅଭାବ ଜଳ ଜଳ ହୋଇ ଉପଲବ୍ଧି ହେଉଥିବା ବେଳେ ଏହା ଲୋକଙ୍କ ଉପରେ ବୋଝ ହେବା ଉଚିତ ନୁହେଁ । ପ୍ରଶାସନ ସବୁବେଳେ ଲୋକଙ୍କ ସେବାରେ ନିୟୋଜିତ ହେବାକୁ ପଡିବ ବୋଲି ପ୍ରଧାନମନ୍ତ୍ରୀ କହିଥିଲେ ।

ପ୍ରଶାସନିକ ସେବା ଦିବସ ପୁରସ୍କାର ପାଇଁ କ୍ରମେ କ୍ରମେ ଦରଖାସ୍ତକାରୀଙ୍କ ସଂଖ୍ୟା ବଢୁଥିବା ସୂଚନା ଦେଇ ସେ କହିଥିଲେ ଯେ, ଗତବର୍ଷ ଏହି ସଂଖ୍ୟା 100ରୁ କମ ଥିବା ବେଳେ ଏବର୍ଷ ତାହା 500 ରୁ ଅଧିକରେ ପହଞ୍ଚିଛି । ଏବେ ସେବାର ମାନ ବୃଦ୍ଧି କରିବା ଏବଂ ଏହାକୁ ନୂତନ ଶୀର୍ଷରେ ପହଞ୍ଚାଇବା ଦିଗରେ ପ୍ରୟାସ ହେବା ଜରୁରୀ ।

ଅନୁଭୂତି କେବେ ହେଲେ ଯୁବ ଅଧିକାରୀମାନଙ୍କ ସୃଜନାତ୍ମକ ଭାବନାର କଣ୍ଠରୋଧ କରିବା ଉଚିତ ନୁହେଁ । ବରିଷ୍ଠ ଅଧିକାରୀମାନେ ଏ ଦିଗରେ ଅଧିକ ଯତ୍ନଶୀଳ ହେବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ ।

ଶ୍ରୀ ନରେନ୍ଦ୍ର ମୋଦୀ କହିଥିଲେ ଯେ, ବିନା ପ୍ରଶଂସାରେ ଲୋକଙ୍କ ସେବା କରିବା ହେଲା ପ୍ରଶାସନିକ ସେବାର ଏକ ବଡ ଶକ୍ତି । ତେବେ ସାମାଜିକ ଗଣମାଧ୍ୟମର ବ୍ୟାପକ ଉପଯୋଗ ଦ୍ଵାରା ଏହି ସାମର୍ଥ୍ୟର ହ୍ରାସ ଘଟିବା ଉଚିତ ନୁହେଁ । ସାମାଜିକ ଗଣମାଧ୍ୟମ ଓ ଇ-ପ୍ରଶାସନ ପରିବ୍ୟାପ୍ତ ହେବା ଦ୍ଵାରା ସରକାରୀ ଯୋଜନାଗୁଡିକର ସୁଫଳ ଲୋକଙ୍କ ପାଖରେ ପହଞ୍ଚିବା ସହଜ ହୋଇଥାଏ ।

ସଂସ୍କାର, କାର୍ଯ୍ୟ ସମ୍ପାଦନ ଓ ବିବର୍ତ୍ତନ ସମ୍ପର୍କରେ ସୂଚନା ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ସଂସ୍କାର ପାଇଁ ଦୃଢ ରାଜନୈତିକ ଇଚ୍ଛାଶକ୍ତି ଆବଶ୍ୟକ । କିନ୍ତୁ କାର୍ଯ୍ୟ ସମ୍ପାଦନ ଦିଗଟି ପ୍ରଶାସନିକ ଅଧିକାରୀମାନଙ୍କ ପାଖରୁ ଆସିବାକୁ ପଡିବ । ଅପରପକ୍ଷରେ ଜନ ଭାଗିଦାରୀ ବଢିଲେ ବିବର୍ତ୍ତନ ସଫଳ ହୋଇଥାଏ ।

ପ୍ରଧାନମନ୍ତ୍ରୀ କହିଥିଲେ ଯେ, ଜାତୀୟ ସ୍ଵାର୍ଥକୁ ଦୃଷ୍ଟିରେ ରଖି ପ୍ରଶାସନିକ ଅଧିକାରୀମାନେ ପ୍ରତ୍ୟେକ ନିଷ୍ପତ୍ତି ନେବାକୁ ପଡିବ । ଏହାହିଁ ସେମାନଙ୍କ ନିର୍ଣ୍ଣୟ ବା ନୀତି ନିର୍ଦ୍ଧାରଣ ପ୍ରକ୍ରିୟାର ପରିମାପକ ହେବା ଉଚିତ ।

ଆସନ୍ତା 2022ରେ ସ୍ୱାଧିନତା ପ୍ରାପ୍ତିର 75 ବର୍ଷ ପୂର୍ତ୍ତି ହେଉଥିବାରୁ ପ୍ରଶାସକମାନେ ସ୍ଵାଧୀନତା ସଂଗ୍ରାମୀଙ୍କ ସ୍ଵପ୍ନକୁ ସାକାର କରିବା ଦିଗରେ କାରକ ଭାବେ ଭୂମିକା ତୁଲାଇବାକୁ ପ୍ରଧାନମନ୍ତ୍ରୀ ଆହ୍ଵାନ ଦେଇଥିଲେ ।

**********