ପିଏମଇଣ୍ଡିଆ

ପ୍ରବାସୀ ଏବଂ ସ୍ୱଦେଶ ପ୍ରତ୍ୟାବର୍ତ୍ତନ କରୁଥିବା ଲୋକମାନଙ୍କ ସହାୟତା ଏବଂ ଥଇଥାନ ଲାଗି ଏକ ବଡ ଯୋଜନାକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ମଞ୍ଜୁର କରିଛନ୍ତି । ବୃହତ ଯୋଜନା ଅନ୍ତର୍ଗତ ଗୃହ ମନ୍ତ୍ରଣାଳୟର 8ଟି ବର୍ତ୍ତମାନର ଯୋଜନା ମାର୍ଚ୍ଚ, 2020 ପର୍ଯ୍ୟନ୍ତ ଜାରି ରଖିବା ପ୍ରସ୍ତାବକୁ ମଧ୍ୟ କ୍ୟାବିନେଟ ଅନୁମୋଦନ ମିଳିଛି ।

ଆର୍ଥିକ ପ୍ରଭାବ :

2017-18 ଠାରୁ 2019-20 ସମୟରେ ଏହି ଉଦ୍ଦେଶ୍ୟ ଲାଗି ଆର୍ଥିକ ବ୍ୟୟ ଆନୁମାନିକ 3083 କୋଟି ଟଙ୍କା ହେବ । ବର୍ଷୱାରୀ ଆର୍ଥିକ ବ୍ୟୟ ଅଟକଳ 2017-18 ବର୍ଷ ଲାଗି 911 କୋଟି ଟଙ୍କା, 2018-19 ଲାଗି 1372 କୋଟି ଟଙ୍କା ଏବଂ 2019-20 ବର୍ଷ ଲାଗି 900 କୋଟି ଟଙ୍କା ଅଟେ ।

ଲାଭ :

ଏହି ଯୋଜନା ଦ୍ୱାରା ଶରଣାର୍ଥୀ, ବିସ୍ଥାପିତ ଲୋକ ଆତଙ୍କ/ଜାତିଭିତ୍ତିକ ହିଂସାରେ ପୀଡ଼ିତ ଏବଂ ସୀମାରେ ହେଉଥିବା ଗୁଳିମାଡ଼ରେ ପୀଡ଼ିତ ଏବଂ ଖଣି/ଆଇଇଡି ବିସ୍ଫୋରଣ ଏବଂ ସାମ୍ପ୍ରଦାୟିକ ହିଂସାରେ ପୀଡ଼ିତ ଲୋକମାନଙ୍କ ସହାୟତା ଏବଂ ଥଇଥାନ ପ୍ରଦାନ କରାଯିବ ।

ବିବରଣୀ : ମଞ୍ଜୁର କରାଯାଇଥିବା 8ଟି ଯୋଜନା ବର୍ତ୍ତମାନ ପ୍ରଚଳିତ ଅଛି ଏବଂ ମଞ୍ଜୁରୀପ୍ରାପ୍ତ ନିର୍ଦ୍ଦେଶ ଅନୁଯାୟୀ ଯୋଜନାର ଲାଭକୁ ନିର୍ଦ୍ଧାରିତ ସମୂହଙ୍କ ନିକଟରେ ପହଁଚାଯିବ ।

ଯୋଜନାଗୁଡ଼ିକ ନିମ୍ନରେ ଦିଆଗଲା :

ପାକ ଅଧିକୃତ ଜାମ୍ମୁ କାଶ୍ମୀର (ପିଓକେ)ରୁ ବିସ୍ଥାପିତ ପରିବାର ଏବଂ ଜାମ୍ମୁ କାଶ୍ମୀର ରାଜ୍ୟରେ ରହୁଥିବା ଚାମ୍ବମାନଙ୍କର ଥଇଥାନ ଲାଗି ସମ୍ପୂର୍ଣ୍ଣ କେନ୍ଦ୍ରୀୟ ସହାୟତା ।

ସୀମା ଭୂମି ବୁଝାମଣା ଅନ୍ତର୍ଗତ ଭାରତ ଏବଂ ବାଂଲାଦେଶ ମଧ୍ୟରେ ଜନବସତି ଇଲାକାର ହସ୍ତାନ୍ତର ପରେ ବାଂଲାଦେଶ ଏବଂ କୁଚବିହାର ଜିଲ୍ଲାର ଜନବସତି ଇଲାକାରେ ଥଇଥାନ ପ୍ୟାକେଜ ଏବଂ ଭିତ୍ତିଭୂମି ବିକାଶ ।

ତାମିଲନାଡ଼ୁ ଏବଂ ଓଡ଼ିଶାର କ୍ୟାମ୍ପରେ ରହୁଥିବା ଶ୍ରୀଲଙ୍କା ଶରଣାର୍ଥୀମାନଙ୍କୁ ରିଲିଫ ସହାୟତା ।

ତିବ୍ବତୀୟ ଶରଣାର୍ଥୀସ୍ଥଳରେ ପ୍ରଶାସନିକ ଏବଂ ସାମାଜିକ କଲ୍ୟାଣ ବ୍ୟୟ ନିମନ୍ତେ ପାଞ୍ଚ ବର୍ଷ ପର୍ଯ୍ୟନ୍ତ କେନ୍ଦ୍ରୀୟ ତିବ୍ବତୀୟ ଥଇଥାନ ସମିତି (ସିଟିଆରସି)କୁ ଆର୍ଥିକ ସହାୟତା ।

ତ୍ରିପୁରାର ଥଇଥାନ ଶିବିରରେ ରହୁଥିବା ବ୍ରୁସର ରକ୍ଷଣାବେକ୍ଷଣ ଲାଗି ତ୍ରିପୁରା ସରକାରଙ୍କୁ ଆର୍ଥିକ ସହାୟତା ।

ତ୍ରିପୁରାର ବ୍ରୁସ/ରିୟାଙ୍ଗ ପରିବାରଗୁଡ଼ିକୁ ମିଜୋରାମରେ ଥଇଥାନ ।

1984 ଶିଖ ବିରୋଧୀ ଦଙ୍ଗାରେ ମୃତକଙ୍କ ପାଇଁ ଥଇଥାନ ରାଶି ବୃଦ୍ଧି କରି ପାଞ୍ଚ ଲକ୍ଷ ଟଙ୍କା କରାଗଲା ।

ଆତଙ୍କ/ଜାତିଗତ ହିଂସାରେ ଏବଂ ସୀମା ପାର ଫାୟାରିଂରେ ଏବଂ ଖଣି/ଆଇଇଡି ବିସ୍ଫୋରଣର ପୀଡ଼ିତମାନଙ୍କ ସହାୟତା ଲାଗି କେନ୍ଦ୍ରୀୟ ଯୋଜନା ।

**********