ପିଏମଇଣ୍ଡିଆ

କୁଏତର ଅମୀର ଶେଖ ମେସାଲ ଅଲ–ଅହମଦ ଅଲ–ଜାବେର ଅଲ–ସବାହଙ୍କ ଆମନ୍ତ୍ରଣ କ୍ରମେ ଡିସେମ୍ବର ୨୧ରୁ ୨୨ ତାରିଖ ଯାଏ ଦୁଇ ଦିନିଆ ସରକାରୀ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଥିଲେ । ଏହା ତାଙ୍କର ପ୍ରଥମ କୁଏତ ଗସ୍ତ । ଡିସେମ୍ବର ୨୧ ତାରିଖରେ ଆରମ୍ଭ ହୋଇଥିବା ୨୬ତମ ଆରବିଆନ ଗଲଫ କପ ଉଦଘାଟନୀ ମ୍ୟାଚରେ କୁଏତର ଅମୀରଙ୍କ ସମ୍ମାନିତ ଅତିଥି ଭାବେ ପ୍ରଧାନମନ୍ତ୍ରୀ ମୋଦୀ ଯୋଗ ଦେଇଥିଲେ ।

ଡିସେମ୍ବର ୨୨ ତାରିଖରେ କୁଏତର ଅମୀର ଶେଖ ମସାଲ ଅଲ–ଅହମଦ ଅଲ–ଜାବେର ଅଲ–ସବାହ ଓ କୁଏତର କ୍ରାଉନ ପ୍ରିନ୍ସ ଶେଖ ସବାହ ଅଲ–ଖାଲେଦ ଅଲ–ସବାହ ଅଲ–ହାମଦ ଅଲ–ମୁବାରକ ଅଲ–ସବାହ ପ୍ରଧାନମନ୍ତ୍ରୀ ମୋଦୀଙ୍କୁ ବାୟାନ ପ୍ୟାଲେସରେ ସ୍ୱାଗତ ସମ୍ବର୍ଦ୍ଧନା କରିଥିଲେ । କୁଏତର ସର୍ବୋଚ୍ଚ ବେସାମରିକ ସମ୍ମାନ ଦ ଅର୍ଡର ଅଫ ମୁବାରକ ଅଲ–କବୀର ସମ୍ମାନରେ ସମ୍ମାନିତ ହୋଇଥିବାରୁ ପ୍ରଧାନମନ୍ତ୍ରୀ ମୋଦୀ କୁଏତର ଅମୀର ଶେଖ ମସାଲ ଅଲ–ଅହମଦ ଅଲ–ଜାବେର ଅଲ–ସବାହଙ୍କୁ ଧନ୍ୟବାଦ ଜ୍ଞାପନ କରିଥିଲେ । ବିଭିନ୍ନ ଦ୍ୱିପାକ୍ଷିକ, ବୈଶ୍ୱିକ, ଆଂଚଳିକ ଓ ବହୁମୁଖୀ ପ୍ରସଙ୍ଗ ଉପରେ ଦୁଇ ନେତା ଭାବ ବିନିମୟ କରିଥିଲେ ।

ପାରମ୍ପରିକ ଓ ଐତିହାସିକ ସମ୍ବନ୍ଧକୁ ପାଥେୟ କରି ବିଭିନ୍ନ ପ୍ରସଙ୍ଗ ଉପରେ ସମ୍ପର୍କ ମଜଭୂତ କରିବାକୁ ଏକ ଉଦ୍ଦେଶ୍ୟ ସାଧିତ ସହଭାଗିତା ସ୍ଥାପନ କରିବାକୁ ଦୁଇ ନେତା ସହମତ ହୋଇଛନ୍ତି । ଦୁଇ ଦେଶର ସ୍ୱାର୍ଥ ସୁରକ୍ଷା ଓ ଦୁଇ ନେତାଙ୍କ ଫାଇଦା ଲାଗି ଏହା ବିଶେଷ ସହାୟକ ହେବ ବୋଲି କୁହାଯାଇଛି । ଉଦ୍ଦେଶ୍ୟ ସାଧିତ ସହଭାଗିତା ଦୁଇ ଦେଶ ଭିତରେ ରହିଥିବା ଦୀର୍ଘ ଦିନର ଐତିହାସିକ ସମ୍ପର୍କକୁ ଆହୁରି ବଳିଷ୍ଠ କରିବ ବୋଲି କୁହାଯାଇଛି ।

ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗ ଉପରେ କୁଏତ ପ୍ରଧାନମନ୍ତ୍ରୀ ଶେଖ ଅହମଦ ଅବଦ୍ଦୁଲ୍ଲା ଅଲ–ଅହମଦ ଅଲ–ଜାବେର ଅଲ–ମୁବାରକ ଅଲ–ସବାହଙ୍କ ସହ ପ୍ରଧାନମନ୍ତ୍ରୀ ମୋଦୀ କଥା ହୋଇଛନ୍ତି । ରାଜନୀତି, ବାଣିଜ୍ୟ, ପୁଞ୍ଜି ନିବେଶ, ପ୍ରତିରକ୍ଷା, ସୁରକ୍ଷା, ଊର୍ଜା, ସଂସ୍କୃତି, ଶିକ୍ଷା, ପ୍ରଯୁକ୍ତି ବିଦ୍ୟା ପରି ବିଭିନ୍ନ କ୍ଷେତ୍ରରେ ଦ୍ୱିପାକ୍ଷିକ ସମ୍ପର୍କ ବୃଦ୍ଧି ଲାଗି ଦୁଇ ନେତା ରାଜି ହୋଇଛନ୍ତି ।

ଦୁଇ ଦେଶର ନେତା ପିଢି ପିଢି ପରେ ଦୁଇ ଦେଶ ଭିତରେ ରହିଥିବା ଐତିହାସିକ ଓ ସାଂସ୍କୃତିକ ସମ୍ପର୍କ କଥାକୁ ମନେ ପକାଇଥିଲେ । ବିଭିନ୍ନ ଦ୍ୱିପାକ୍ଷିକ ସମ୍ପର୍କ ଆଧାରରେ ଦୁଇ ଦେଶ ଭିତରେ ଚାଲିଥିବା ମନ୍ତ୍ରୀସ୍ତରୀୟ ଓ ବିଭାଗସ୍ତରୀୟ ନିୟମିତ ଆଲୋଚନା ନେଇ ନେତାମାନେ ଖୁସି ପ୍ରକଟ କରିଥିଲେ ।     

ନିକଟରେ ଗଠିତ ହୋଇଥିବା ଜଏଂଟ କମିଶନ ଅନ କୋଅପରେସନ (ଜେସିସି)କୁ ଦୁଇ ନେତା ସ୍ୱାଗତ କରିଛନ୍ତି । ଦୁଇ ଦେଶର ବୈଦେଶିକ ମନ୍ତ୍ରୀଙ୍କ ନେତୃତ୍ୱରେ ପରିଚାଳିତ ହେବାକୁ ଥିବା ଏହି କମିଟି ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗରେ କାମର ଅଗ୍ରଗତି ନେଇ ସମୀକ୍ଷା କରିବେ । ତେବେ ବାଣିଜ୍ୟ, ପୁଞ୍ଜି ନିବେଶ, ଶିକ୍ଷା, ଦକ୍ଷତା ବୃଦ୍ଧି, ବିଜ୍ଞାନ ଓ ପ୍ରଯୁକ୍ତି ବିଦ୍ୟା, ସୁରକ୍ଷା ଓ ଆତଙ୍କବାଦ, କୃଷି, ସଂସ୍କୃତି ପରି କ୍ଷେତ୍ରରେ ନୂଆକରି ଜଏଂଟ ବାର୍କିଂ ଗ୍ରୁପ ଗଠନ କରାଯିବ । ପୂର୍ବରୁ ସ୍ୱାସ୍ଥ୍ୟ, ମାନବ ସମ୍ବଳ, ହାଇଡ୍ରୋ କାର୍ବନ ଉପରେ ଜଏଂଟ ବାର୍କିଂ ଗ୍ରୁପ (ଜେଡବ୍ଲୁଜି) ଗଠନ କରାଯାଇଛି । ଖୁବଶୀଘ୍ର ଜେସିସି ଓ ଜେଡବ୍ଲୁଜିର ବୈଠକ ବସିବ ବୋଲି ବି ସୂଚନା ଦିଆଯାଇଛି ।

ଦୁଇ ଦେଶ ଭିତରେ ସମ୍ପର୍କ ବୃଦ୍ଧି ଲାଗି ବାଣିଜ୍ୟ ଏକ ପ୍ରକୃଷ୍ଟ ମାଧ୍ୟମ ଓ ଆଗକୁ ଏ କ୍ଷେତ୍ରରେ ସମ୍ପର୍କ ଆହୁରି ମଜଭୂତ ହେବ ବୋଲି କୁହାଯାଇଛି । ଭାରତୀୟ ଅର୍ଥନୀତି ଅଗ୍ରଗତି କରୁଥିବା ବେଳେ ପୁଞ୍ଜି ନିବେଶ ଲାଗି କୁଏତର ସାମର୍ଥ୍ୟକୁ ପ୍ରଧାନମନ୍ତ୍ରୀ ମୋଦୀ ଦୋହରାଇଛନ୍ତି । ବୈଦେଶିକ ପୁଞ୍ଜି ନିବେଶ ଲାଗି ବାତାନୁକୂଳ ପରିବେଶ ସୃଷ୍ଟି କରିଥିବାରୁ କୁଏତ ବାସିନ୍ଦା ଭାରତକୁ ପ୍ରଶଂସା କରିଛନ୍ତି । ପ୍ରଯୁକ୍ତି ବିଦ୍ୟା, ପର୍ଯ୍ୟଟନ, ସ୍ୱାସ୍ଥ୍ୟ, ଖାଦ୍ୟ ନିରାପତା ପରି କ୍ଷେତ୍ରରେ ବି ପୁଞ୍ଜି ନିବେଶ କରିବାକୁ ଆଗ୍ରହାନ୍ୱିତ ବୋଲି କୁଏତ କହିଛି । ଭାରତୀୟ ଅନୁଷ୍ଠାନ, କମ୍ପାନୀ ସହ ଯୋଗସୂତ୍ର ରକ୍ଷା କରି କୁଏତରେ ଅଧିକ ପୁଞ୍ଜି ନିବେଶ କରିବାକୁ କୁଏତ ଆଗ୍ରହ ପ୍ରକାଶ କରିଛି । ଭିତିଭୂମି ସୁଦୃଢ କରିବା କ୍ଷେତ୍ରରେ ଦୁଇ ଦେଶର କମ୍ପାନୀଗୁଡିକୁ ଆହ୍ୱାନ ଦିଆଯାଇଛି । ଦ୍ୱିପାକ୍ଷିକ ବାଣିଜ୍ୟିକ ଚୁକ୍ତି ଶୀଘ୍ର ସମ୍ପନ୍ନ କରିବାକୁ ଦୁଇ ଦେଶର ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି ।

ଊର୍ଜା କ୍ଷେତ୍ରରେ ଦ୍ୱିପାକ୍ଷିକ ସମ୍ପର୍କକୁ ଆହୁରି ବୃଦ୍ଧି ଲାଗି ଦୁଇ ଦେଶ ସହମତି ପ୍ରକାଶ କରିଛନ୍ତି । ଏ କ୍ଷେତ୍ରରେ ଦୁଇ ଦେଶ କେବଳ କ୍ରେତା–ବିକ୍ରେତା ସମ୍ପର୍କ ଭିତରେ ସୀମିତ ନରହି ବିଭିନ୍ନ ସ୍ତରରେ ଏହାକୁ ଆହୁରି ବ୍ୟାପକ କରିବାକୁ ଆଲୋଚନା କରାଯାଇଛି । ତୈଳ ଓ ଗ୍ୟାସର ଅନୁସନ୍ଧାନ ଓ ଉତ୍ପାଦନ, ପ୍ରକ୍ରିୟାକରଣ, ଇଞ୍ଜିନିୟରିଂ ସେବା, ପେଟ୍ରୋକେମିକାଲ ଶିଳ୍ପ, ନବୀକରଣକ୍ଷମ ଊର୍ଜା ପରି ବିଭିନ୍ନ କ୍ଷେତ୍ରରେ କାମ କରୁଥିବା କମ୍ପାନୀକୁ ସହଯୋଗ କରିବାକୁ ଦୁଇ ଦେଶ ସହମତି ପ୍ରକାଶ କରିଛନ୍ତି । ଭାରତର ଷ୍ଟ୍ରାଟେଜିକ ପେଟ୍ରୋଲିୟମ ରିଜର୍ଭ ପ୍ରୋଗ୍ରାମରେ କୁଏତର ଯୋଗଦାନକୁ ନେଇ ଆଲୋଚନା କରିବାକୁ ଦୁଇ ଦେଶ ରାଜି ହୋଇଥିବା କୁହାଯାଇଛି ।

ଭାରତ ଓ କୁଏତ ଭିତରେ ରହିଥିବା ଉଦ୍ଦେଶ୍ୟ ସାଧିତ ସହଭାଗିତାରେ ପ୍ରତିରକ୍ଷା ଏକ ଗୁରୁତ୍ୱପୂର୍ଣ ଅଂଶ ଭାବେ ବିବେଚିତ କରାଯାଇଛି । ଯୁଗ୍ମ ସାମରିକ ସମରାଭ୍ୟାସ, ପ୍ରତିରକ୍ଷା ତାଲିମ, ଉପକୂଳ ସୁରକ୍ଷା, ନୌବାଣିଜ୍ୟ ନିରାପତା, ପ୍ରତିରକ୍ଷା ସାମଗ୍ରୀ ଉତ୍ପାଦନ ପରି କ୍ଷେତ୍ର ସହ ଦ୍ୱିପାକ୍ଷିକ ସମ୍ପର୍କ ବୃଦ୍ଧି କ୍ଷେତ୍ରରେ ସ୍ୱାକ୍ଷରିତ ହୋଇଥିବା ଏମଓୟୁକୁ ଦୁଇ ଦେଶ ସ୍ୱାଗତ କରିଛନ୍ତି ।

ଆତଙ୍କବାଦର ସବୁ ରୂପକୁ ଦୁଇ ଦେଶ କଡା ଭାଷାରେ ନିନ୍ଦା କରିଛନ୍ତି । ସୀମାପାର ଆତଙ୍କବାଦ ଲାଗି କାମ କରୁଥିବା ଅର୍ଥ ସଂଗ୍ରହକାରୀ ସଂସ୍ଥା, ଭିତିଭୂମିର ବିଲୟ ଲାଗି ଦୁଇ ଦେଶ ରାଜି ହୋଇଛନ୍ତି । ଆତଙ୍କବାଦ କାର୍ଯ୍ୟକଳାପକୁ ଲଗାମ ଦେବା, ସୂଚନା ସହଭାଗିତା, ଅନୁଭୂତି ବିନିମୟ, ଆଇନ କାର୍ଯ୍ୟକାରିତା, ମନି ଲଣ୍ଡ୍ରିଂ, ନିଶା କାରବାର ପରି ବିଭିନ୍ନ କ୍ଷେତ୍ରରେ ରହିଥିବା ଦ୍ୱିପାକ୍ଷିକ ସମ୍ପର୍କକୁ ଆହୁରି ବୃଦ୍ଧି କରିବାକୁ ଦୁଇ ଦେଶ ସହଯୋଗ କରିବେ ବୋଲି ରାଜି ହୋଇଛନ୍ତି । ସାଇବର ନିରାପତା କ୍ଷେତ୍ରରେ ସହଯୋଗ, ଆତଙ୍କବାଦ ଲାଗି ସାଇବର ସ୍ପେସ ବ୍ୟବହାର, ଆତଙ୍କବାଦୀ କାର୍ଯ୍ୟକଳାପକୁ ଲଗାମ ଦେବା ଲାଗି ଦୁଇ ଦେଶ ସହମତି ପ୍ରକାଶ କରିଛନ୍ତି । ଚଳିତବର୍ଷ ନଭେମ୍ବର ୪ରୁ ୫ ତାରିଖ ଯାଏ କୁଏତ ଦ୍ୱାରା ଆୟୋଜିତ ହୋଇଥିବା ଚତୁର୍ଥ ଉଚ୍ଚସ୍ତରୀୟ ବୈଠକର ସୁଫଳକୁ ଭାରତ ପକ୍ଷରୁ ପ୍ରଶଂସା କରାଯାଇଛି । ତେବେ ଆତଙ୍କବାଦ ଦମନ କରିବା ଲାଗି ଅନ୍ତର୍ଜାତୀୟ ସହଯୋଗ ଓ ସୀମା ସୁରକ୍ଷା ବଳର ସୁଦୃଢୀକରଣ ଉପରେ ଏହି ବୈଠକ କରାଯାଇଥିଲା ।

 ସ୍ୱାସ୍ଥ୍ୟ କ୍ଷେତ୍ରରେ ବି ଦ୍ୱିପାକ୍ଷିକ ସମ୍ପର୍କ ବୃଦ୍ଧି ନେଇ ଦୁଇ ଦେଶ ଭିତରେ ଆଲୋଚନା କରାଯାଇଛି । କୋଭିଡ ମହାମାରୀ ବେଳେ ଦୁଇ ଦେଶ ପରସ୍ପର ଭିତରେ କରିଥିବା ସହଯୋଗକୁ ଭୁରି ଭୁରି ପ୍ରଶଂସା କରାଯାଇଛି । କୁଏତରେ ଭାରତୀୟ ଫାର୍ମାସିଟ୍ୟୁକାଲ ପ୍ଲାଂଟ ସ୍ଥାପନା ଲାଗି ରହିଥିବା ସମ୍ଭାବନା ସମ୍ପର୍କରେ ଦୁଇ ଦେଶ କଥାବାର୍ତା ହୋଇଛନ୍ତି । ଡ୍ରଗ ନିୟନ୍ତ୍ରଣ ଅଧିକାରୀମାନଙ୍କ ଭିତରେ ସ୍ୱାକ୍ଷରିତ ହୋଇଥିବା ଚୁକ୍ତି ଅନୁସାରେ ବିଭିନ୍ନ ମେଡିକାଲ ସାମଗ୍ରୀ ନିୟନ୍ତ୍ରଣ ଉପରେ ବି ଚର୍ଚ୍ଚା ହୋଇଛି ।

ବିକାଶଶୀଳ ଯାନ୍ତ୍ରିକ ବିଦ୍ୟା, ସେମି କଣ୍ଡକ୍ଟର, କୁତ୍ରିମ ବୁଦ୍ଧମତା ପରି କ୍ଷେତ୍ରରେ ସହଯୋଗ ଲାଗି ଦୁଇ ଦେଶ ସକରାତ୍ମକ ଆଭିମୁଖ୍ୟ ଆପଣେଇଛନ୍ତି । ବି–ଟୁ–ବି ସହଯୋଗ ଅନୁସନ୍ଧାନ, ଇ–ଗଭର୍ଣାନ୍ସ, ସୂଚନା ଓ ପ୍ରଯୁକ୍ତି ବିଦ୍ୟା କ୍ଷେତ୍ରରେ ଦୁଇ ଦେଶର ବିଭିନ୍ନ ଯୋଜନାରେ ସରଳୀକରଣ ପରି ବିଭିନ୍ନ ପ୍ରସଙ୍ଗରେ ଦୁଇ ଦେଶର ନେତା ଆଲୋଚନା କରିଛନ୍ତି ।

ଖାଦ୍ୟ ନିରାପତା ନେଇ ବି କୁଏତ ପକ୍ଷରୁ ଆଲୋଚନା କରାଯାଇଛି । ଫୁଡ ପାର୍କ ନେଇ ଭାରତରେ କୁଏତ କମ୍ପାନୀର ପୁଞ୍ଜି ନିବେଶ ସମ୍ପର୍କରେ ବି ଆଲୋଚନା କରାଯାଇଛି ।

ଅନ୍ତର୍ଜାତୀୟ ସୋଲାର ଆଲିୟାନ୍ସ (ଆଇଏସଏ) ସଙ୍ଗଠନର ସଦସ୍ୟ ହେବାକୁ କୁଏତ ପକ୍ଷରୁ ପ୍ରକାଶ ପାଇଥିବା ସହମତିକୁ ଭାରତ ପକ୍ଷରୁ ସ୍ୱାଗତ କରାଯାଇଛି ।  ଆଇଏସଏ ସଙ୍ଗଠନ ଅଧୀନରେ ସାରା ବିଶ୍ୱରେ ସୌର ଶକ୍ତିର ବିକାଶ କରିବାକୁ ଦୁଇ ଦେଶ ସହମତି ପ୍ରକାଶ କରିଛନ୍ତି ।

ଦୁଇ ଦେଶର ବେସାମରିକ ବିଭାଗ ପକ୍ଷରୁ ହୋଇଥିବା ବୈଠକ ସମ୍ପର୍କରେ ଦୁଇ ନେତାଙ୍କ ମଧ୍ୟରେ କଥାବାର୍ତା ହୋଇଥିଲା । ଦୁଇ ପକ୍ଷ ଭିତରେ ବେସାମରିକ ବିମାନରେ ସିଟ ବୃଦ୍ଧି ନେଇ ବି ଆଲୋଚନା କରାଯାଇଛି । ତେବେ ଏ ଦିଗରେ ଖୁବଶୀଘ୍ର ମିଳିତ ନିଷ୍ପତି ନେବାକୁ କଥାବାର୍ତା ଜାରି ରହିବ ବୋଲି କୁହାଯାଇଛି ।

୨୦୨୫–୨୦୨୯ ପର୍ଯ୍ୟନ୍ତ ସାଂସ୍କୃତିକ ଭାବ ବିନିମୟ ପ୍ରୋଗ୍ରାମ (ସିଇପି)ର ନବୀକରଣକୁ ସ୍ୱାଗତ କରାଯାଇଛି । କଳା, ସାହିତ୍ୟ ଓ ସଙ୍ଗୀତ କ୍ଷେତ୍ରରେ ଅଧିକରୁ ଅଧିକ ଉତ୍ସବ କରାଯାଇ ଏ କ୍ଷେତ୍ରରେ ପ୍ରୟାସ ଜାରି ରହିବ ବୋଲି ସୂଚନା ଦିଆଯାଇଛି ।

୨୦୨୫–୨୦୨୮ ପର୍ଯ୍ୟନ୍ତ କ୍ରୀଡା କ୍ଷେତ୍ରରେ ସହଯୋଗ ବୃଦ୍ଧି କରିବା ଲାଗି ସ୍ୱାକ୍ଷରିତ ହୋଇଥିବା ଚୁକ୍ତି ଅନୁସାରେ ଦୁଇ ଦେଶ କାର୍ଯ୍ୟ କରିବେ ବୋଲି କଥା ହୋଇଛନ୍ତି । ଯୋଜନା ଅନୁସାରେ ଦେଶ ଦେଶ ଭିତରେ କ୍ରୀଡା ପ୍ରେମୀ ଓ ଖେଳାଳି ଯିବା ଆସିବା କରିପାରିବା ସହ ନିୟମିତ ସେମିନାର, କର୍ମଶାଳା ଓ କନଫରେନ୍ସ ଆୟୋଜନ କରାଯିବା ଫଳରେ ଏହା ସୁଦୂରପ୍ରସାରୀ ହୋଇପାରିବ ।

ଦୁଇ ଦେଶର ବିଭିନ୍ନ ଶିକ୍ଷାନୁଷ୍ଠାନ ଭିତରେ ଭାବ ବିନିମୟ କରାଯାଇ ଶିକ୍ଷା ମାଧ୍ୟମରେ ଦୁଇ ଦେଶ ଭିତରେ ବନ୍ଧୁତା ମଜଭୂତ ହୋଇପାରିବ । ଶିକ୍ଷାଗତ ଭାବ ବିନିମୟ, ଅନଲାଇନ ଶିକ୍ଷା, ଡିଜିଟାଲ ଲାଇବ୍ରେରୀ ପରି ବିଭିନ୍ନ କ୍ଷେତ୍ରରେ ସହଯୋଗ ବୃଦ୍ଧି ପାଇବ ବୋଲି ଦୁଇ ଦେଶ ଆଶାବାଦୀ ଅଛନ୍ତି ।

ଶେଖ ସାଉଦ ଅଲ ନସିର ଅଲ ସବାହ କୁଏତୀ ଡିପ୍ଲୋମାଟିକ ଇନଷ୍ଟିଚ୍ୟୁଟ ଏବଂ ସୁଷମା ସ୍ୱରାଜ ଇନିଷ୍ଟିଚ୍ୟୁଟ ଅଫ ଫରେନ ସର୍ଭିସ (ଏସଏସଆଇଏଫଏସ) ଦ୍ୱାରା ସ୍ୱାକ୍ଷରିତ ହୋଇଥିବା ଏମଓୟୁ ଅନୁସାରେ ନୂଆଦିଲ୍ଲୀରେ କୁଏତୀ କୂଟନୀତିଜ୍ଞ ଓ ଅଧିକାରୀଙ୍କ ଲାଗି ଉଦ୍ଦିଷ୍ଟ ସ୍ୱତନ୍ତ୍ର କୋର୍ସକୁ ଦୁଇ ଦେଶ ପକ୍ଷରୁ ସ୍ୱାଗତ କରାଯାଇଛି ।      

ଉଭୟ କୁଏତ ଓ ଭାରତର ଲୋକମାନଙ୍କ ଭିତରେ ରହିଥିବା ସୌହାର୍ଦ୍ଦ୍ୟ ଲାଗି ପିଢି ପରେ ପିଢି ଦୁଇ ଦେଶ ଭିତରେ ସମ୍ପର୍କ ମଜଭୂତ ରହିଛି । କୁଏତର ସାମଗ୍ରିକ ବିକାଶ ଲାଗି ପ୍ରବାସୀ ଭାରତୀୟ ସମୁଦାୟଙ୍କ ଯୋଗଦାନକୁ ଉଚ୍ଚ ପ୍ରଶଂସା କରାଯାଇଛି । କୁଏତରେ ବସବାସ କରୁଥିବା ଭାରତୀୟମାନେ ନିଜର ଶାନ୍ତିପ୍ରିୟତା ଓ କର୍ମନିଷ୍ଠତା ଲାଗି ସମ୍ମାନର ଅଧିକାରୀ ହୋଇପାରିଥିବା କୁହାଯାଇଛି । ପ୍ରବାସୀମାନଙ୍କ ସୁରକ୍ଷା ଓ ଅଗ୍ରଗତି କ୍ଷେତ୍ରରେ କୁଏତର ଅଭୂତପୂର୍ବ ଯୋଗଦାନ ଲାଗି କୁଏତ ସରକାରଙ୍କୁ ପ୍ରଧାନମନ୍ତ୍ରୀ ମୋଦୀ ଧନ୍ୟବାଦ ଜ୍ଞାପନ କରିଛନ୍ତି ।

ଦୁଇ ଦେଶ ଭିତରେ ମାନବ ସମ୍ବଳର ଉପଯୋଗ କ୍ଷେତ୍ରରେ ରହିଥିବା ସମ୍ପର୍କକୁ ନେଇ ଗୁରୁତ୍ୱ ବୃଦ୍ଧି ହୋଇଛି । ବିଭିନ୍ନ ପ୍ରସଙ୍ଗ ଉପରେ କନସୁଲାର ଡାଇଲଗ, ଶ୍ରମ ଓ ମାନବ ସମ୍ବଳ ଡାଇଲଗ କରାଇବାକୁ ଉଭୟ ପକ୍ଷ ରାଜି ହୋଇଛନ୍ତି ।

ମିଳିତ ଜାତିସଂଘ ସମେତ ଅନ୍ୟାନ୍ୟ ମଂଚରେ ଉଭୟ ଦେଶ ଭିତରେ ରହିଥିବା ଅଭୂତପୂର୍ବ ସଂଯୋଗକୁ ଉଭୟ ପକ୍ଷ ପ୍ରଶଂସା କରିଛନ୍ତି । ୨୦୨୩ରେ ଅନୁଷ୍ଠିତ ହୋଇଥିବା ସାଙ୍ଘାଇ କୋଅପରେସନ ଅର୍ଗାନାଇଜେସନ (ଏସସିଓ)ରେ ଡାଇଲଗ ପାର୍ଟନର ଭାବେ କୁଏତର ପ୍ରବେଶକୁ ଭାରତ ପକ୍ଷରୁ ସ୍ୱାଗତ କରାଯାଇଛି । ଏସିଆନ କୋଅପରେସନ ଡାଇଲଗ (ଏସିଡି)ରେ ବି କୁଏତର ଭୂମିକାକୁ ଭାରତ ସ୍ୱାଗତ କରିଛି । ଏସିଡିକୁ ଏକ ଆଂଚଳିକ ସଙ୍ଗଠନର ରୂପ ଦେବାକୁ ରହିଥିବା ସମ୍ଭାବ୍ୟ ଦିଗକୁ ଉନ୍ମୋଚନ କରିବାକୁ ପ୍ରୟାସ କରାଯିବା ଉପରେ କୁଏତ ପକ୍ଷରୁ ଗୁରୁତ୍ୱାରୋପ କରାଯାଇଛି ।

ଚଳିତବର୍ଷ ଜିସିସିର ଅଧ୍ୟକ୍ଷତା ଲାଗି କୁଏତ ବିବେଚିତ ହୋଇଥିବାରୁ କୁଏତ ଅମୀର ନେତୃତ୍ୱରେ ଭାରତ–ଜିସିସି ବନ୍ଧୁତା ପକ୍କା ହୋଇପାରିବ ବୋଲି ପ୍ରଧାନମନ୍ତ୍ରୀ ଆଶାବ୍ୟକ୍ତ କରିଛନ୍ତି । ସେପ୍ଟେମ୍ବର ୯ ତାରିଖରେ ରିଆଦରେ ଅନୁଷ୍ଠିତ ହୋଇଥିବା ବୈଦେଶିକ ମନ୍ତ୍ରୀସ୍ତରୀୟ ଭାରତ–ଜିସିସି ବୈଠକର ଫଳାଫଳ ଭଲ ରହିଥିବା ଉଭୟ ପକ୍ଷରୁ କୁହାଯାଇଛି । ସ୍ୱାସ୍ଥ୍ୟ, ବାଣିଜ୍ୟ, ସୁରକ୍ଷା, କୃଷି, ଖାଦ୍ୟ ନିରାପତା, ପରିବହନ, ଊର୍ଜା, ସଂସ୍କୃତି ପରି କ୍ଷେତ୍ରରେ ନିଆଯାଇଥିବା ଯୁଗ୍ମ ଆକ୍ସନ ପ୍ଲାନ ଅଧୀନରେ ଭାରତ ସହ ରହିଥିବା ସହଯୋଗ ଭାରତ–ଜିସିସିରେ କୁଏତର ଅଧ୍ୟକ୍ଷତା ସମୟରେ ଆହୁରି ବୃଦ୍ଧି ପାଇବ ବୋଲି କୁଏତ ପକ୍ଷରୁ କୁହାଯାଇଛି । ଭାରତ–ଜିସିସି ମୁକ୍ତ ବାଣିଜ୍ୟ ଚୁକ୍ତିର ଶୁଭାଶୁଭ ମିଳିବା ନେଇ ଉଭୟ ପକ୍ଷ ଗୁରୁତ୍ୱ ଦେଇଛନ୍ତି ।

ମିଳିତ ଜାତିସଂଘର ସଂସ୍କାର ପରିପ୍ରେକ୍ଷୀରେ ବୈଶ୍ୱିକ ସମସ୍ୟାର ମୁକାବିଲା କରିବା ଲାଗି ଏକ ବହୁମୁଖୀ ଆଭିମୁଖ୍ୟ ଆପଣେଇବାକୁ ଦୁଇ ନେତା କଥା ହୋଇଛନ୍ତି । ଅଧିକ କ୍ରିୟାଶୀଳ କରିବା ଲାଗି ମିଳିତ ଜାତିସଂଘର ନିରାପତା ପରିଷଦର କାଟୋଗୋରୀରେ ସଦସ୍ୟ ସଂଖ୍ୟା ବୃଦ୍ଧି ନେଇ ଦୁଇ ନେତା ଗୁରୁତ୍ୱାରୋପ କରିଛନ୍ତି ।

ସ୍ୱାକ୍ଷରିତ ହୋଇଥିବା ବିଭିନ୍ନ ଏମଓୟୁ

ପ୍ରତିରକ୍ଷା କ୍ଷେତ୍ରରେ ଭାରତ ଓ କୁଏତ ମଧ୍ୟରେ ହୋଇଥିବା ଏମଓୟୁ

୨୦୨୫–୨୯ ଲାଗି ଭାରତ ଓ କୁଏତ ଭିତରେ ସାଂସ୍କୃତିକ ଭାବ ବିନିମୟ ପ୍ରୋଗ୍ରାମ

୨୦୨୫–୨୮ ଲାଗି କ୍ରୀଡା ଲାଗି ଦୁଇ କ୍ରୀଡା ମନ୍ତ୍ରଣାଳୟ ଭିତରେ ଏମଓୟୁ

ଅନ୍ତର୍ଜାତୀୟ ସୋଲାର ଆଲିୟେନ୍ସ (ଆଇଏସଏ)ରେ କୁଏତର ସଦସ୍ୟତା

କୁଏତ ସରକାର ଓ ପ୍ରଶାସନକୁ ଅଭୂତପୂର୍ବ ଆତିଥେୟତା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଧନ୍ୟବାଦ ଜ୍ଞାପନ କରିଛନ୍ତି । ପ୍ରଧାନମନ୍ତ୍ରୀଙ୍କ କୁଏତ ଗସ୍ତ ଦୁଇ ଦେଶ ଭିତରେ ରହିଥିବା ପୁରୁଣା ସମ୍ପର୍କକୁ ଆହୁରି ମଜଭୂତ କରିପାରିଛି । ଆଂଚଳିକ ତଥା ବୈଶ୍ୱିକ ସ୍ଥିରତା ଆଣିବା ଦିଗରେ ଦୁଇ ଦେଶ ଭିତରେ ହୋଇଥିବା ପରିବର୍ତିତ ସହଭାଗିତା ବେଶ କାମ କରିବ ବୋଲି ଦୁଇ ନେତା ଆଶା ପ୍ରକଟ କରିଛନ୍ତି । କୁଏତର ଅମୀର ଶେଖ ମେସାଲ ଅଲ–ଅହମଦ ଅଲ ଜାବେର ଅଲ ସବାହ, କୁଏତର କ୍ରାଉନ ଅଫ ପ୍ରିନ୍ସ ଶେଖ ସବାହ ଅଲ–ଖାଲେଦ ଅଲ–ସବାହ ଅଲ–ହାମାଦ ଅଲ–ମୁବାରକ ଅଲ–ସବାହ ଓ କୁଏତ ପ୍ରଧାନମନ୍ତ୍ରୀ ଶେଖ ଅହମଦ ଅବଦ୍ଦୁଲ୍ଲା ଅଲ–ଅହମଦ ଅଲ–ଜାବେର ଅଲ–ମୁବାରକ ଅଲ–ସବାହଙ୍କୁ ଭାରତ ଆସିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମନ୍ତ୍ରଣ ଜଣାଇଛନ୍ତି ।

PBD