ପିଏମଇଣ୍ଡିଆ

1. ମହାମହିମ ଜାପାନ ପ୍ରଧାନମନ୍ତ୍ରୀ ଶ୍ରୀ ଶିଞ୍ଜୋ ଆବେଙ୍କ ଆମନ୍ତ୍ରଣ କ୍ରମେ ଭାରତର ମହାମହିମ  ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବେ ଜାପାନ ଗସ୍ତରେ ଅଛନ୍ତି । ଆଜି ୨୦୧୬ ନଭେମ୍ବର ୧୧ ତାରିଖ ଦିନ ପୂର୍ବରୁ ଦୁଇ ଦେଶର ପ୍ରଧାନମନ୍ତ୍ରୀ ପରସ୍ପର ମଧ୍ୟରେ ଟୋକିଓ ଠାରେ ବିଭିନ୍ନ ପ୍ରସଙ୍ଗ ଉପରେ ବ୍ୟାପକ ଆଲୋଚନା କରିଛନ୍ତି । ଯେଉଁଥିରେ ସେମାନେ ୨୦୧୫ ଡିସେମ୍ବର ୧୨ ତାରିଖ ଦିନ ସ୍ଵାକ୍ଷରିତ “ଭାରତ ଓ ଜାପାନ ଭିଜନ ୨୦୧୫” ରାଜିନାମାରେ ଥିବା ଗୁରୁତ୍ଵପୂର୍ଣ୍ଣ ସ୍ଵତନ୍ତ୍ର ସୁରକ୍ଷା ଏବଂ ବୈଶ୍ୱିକ ସହଭାଗୀତା ସର୍ତ୍ତାବଳୀ ସମ୍ପର୍କରେ ବ୍ୟାପକ ସମୀକ୍ଷା କରିଥିଲେ । ୨୦୧୪ ମସିହା ଅଗଷ୍ଟ/ସେପ୍ଟେମ୍ବର ମାସରେ ପ୍ରଧାନମନ୍ତ୍ରୀ ଶ୍ରୀ ମୋଦୀଙ୍କ ଜାପାନ ଗସ୍ତ ପରେ ଗତ ଦୁଇ ବର୍ଷ ଭିତରେ ଦ୍ଵିପାକ୍ଷିକ ସମ୍ପର୍କରେ ବ୍ୟାପକ ଉନ୍ନତି ଘଟିଥିବା ସେମାନେ ସ୍ଵୀକାର କରିଛନ୍ତି ।

ସହଭାଗୀତାର ସମୀକରଣ

2. ଦୁଇ ପ୍ରଧାନମନ୍ତ୍ରୀ ଦୁଇ ରାଷ୍ଟ୍ରର ଲୋକମାନଙ୍କ ମଧ୍ୟରେ ଥିବା ଗଭୀର ସଭ୍ୟତାଭିତ୍ତିକ ଘନିଷ୍ଠ ସମ୍ପର୍କକୁ ପ୍ରଶଂସା କରିଛନ୍ତି । ଯେଉଁଥିରେ ବୌଦ୍ଧ ଚିନ୍ତାଧାରାର ସମାନ ଐତିହ୍ୟ ଏବଂ ଗଣତନ୍ତ୍ର ପ୍ରତି ସେମାନଙ୍କ ମନରେ ଥିବା ସମାନ ପ୍ରତିବଦ୍ଧତାର ଗୁରୁତ୍ଵ, ମୁକ୍ତ ହୃଦୟରେ ଚିନ୍ତନ ଏବଂ ବିଧିବ୍ୟବସ୍ଥା ଯାହାକି ଶାନ୍ତିପୂର୍ଣ୍ଣ ସହାବସ୍ଥାନ ଲକ୍ଷ୍ୟ ହାସଲ ନିମନ୍ତେ ଏକାନ୍ତ କାମ୍ୟ । ଉଭୟ ରାଷ୍ଟ୍ର ମଧ୍ୟରେ ଥିବା ରାଜନୈତିକ, ଆର୍ଥିକ ଓ ସୁରକ୍ଷା ସ୍ଵାର୍ଥର ସମୀକରଣ ଉଭୟଙ୍କ ମଧ୍ୟରେ ଥିବା ଦୀର୍ଘସ୍ଥାୟୀ ସହଭାଗୀତା ନିମନ୍ତେ କ୍ଷେତ୍ର ପ୍ରସ୍ତତ କରେ ।

3. ଦୁଇ ରାଷ୍ଟ୍ରର ପ୍ରଧାନମନ୍ତ୍ରୀ ବିଶ୍ଵ ସମୃଦ୍ଧି ନିମନ୍ତେ ଏସିଆ-ପ୍ରଶାନ୍ତ ମହାସାଗରୀୟ କ୍ଷେତ୍ରର ଗୁରୁତ୍ଵ ବୃଦ୍ଧି ଉପରେ ପ୍ରାଧାନ୍ୟ ଆରୋପ କରିଛନ୍ତି । ସେମାନେ ଗଣତନ୍ତ୍ର, ଶାନ୍ତି ଏବଂ ପ୍ରଚଳିତ ବିଧି ବ୍ୟବସ୍ଥା, ସହନଶୀଳତାର ମହତ୍ଵ ଏବଂ ଏହି କ୍ଷେତ୍ରର ବିବିଧ ଏବଂ ସମାବେଶୀ ବିକାଶ ହାସଲ ନିମନ୍ତେ ପରିବେଶ ସୁରକ୍ଷା ପ୍ରତି ଉପଯୁକ୍ତ ସମ୍ମାନ ପ୍ରଦର୍ଶନ ଉପରେ ଗୁରୁତ୍ଵାରୋପ କରିଛନ୍ତି । ଏହି ପରିପ୍ରେକ୍ଷୀରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ଏକ୍ଟ ଇଷ୍ଟ ପଲିସି”ରେ ସକ୍ରିୟ ଅଂଶଗ୍ରହଣକୁ ପ୍ରଧାନମନ୍ତ୍ରୀ ଶ୍ରୀ ଆବେ ପ୍ରଶଂସା କରିଛନ୍ତି ଓ ପ୍ରଧାନମନ୍ତ୍ରୀ ମୋଦୀଙ୍କୁ “ମୁକ୍ତ ଏବଂ ସ୍ଵଚ୍ଛ ଭାରତ-ପ୍ରଶାନ୍ତ ମହାସାଗରୀୟ ସୁରକ୍ଷା ବ୍ୟବସ୍ଥା” ସମ୍ପର୍କରେ ଅବଗତ କରାଇଛନ୍ତି । ଏହି କ୍ଷେତ୍ରର ସୁରକ୍ଷା କାର୍ଯ୍ୟକ୍ରମରେ ଜାପାନ ଗୁରୁତ୍ଵର ସହ ନିୟୋଜିତ ଥିବାରୁ ପ୍ରଧାନମନ୍ତ୍ରୀ ଶ୍ରୀ ମୋଦୀ ଏହାକୁ ପ୍ରଶଂସା କରିଛନ୍ତି । ଏହି ନୀତି ଓ କାର୍ଯ୍ୟକ୍ରମରେ ଅଧିକ ନିବିଡ ସହଯୋଗ ଏବଂ ସମନ୍ୱୟର ସହ ଜଡିତ ହେବାର ସାମର୍ଥ୍ୟକୁ ଉଭୟ ନେତା ଭୂୟସୀ ପ୍ରଶଂସା କରିଛନ୍ତି ।

4. ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ର ଦେଇ ଏସିଆ ଓ ଆଫ୍ରିକା ମଧ୍ୟରେ ସଂଯୋଗ ସ୍ଥାପନ ଉପରେ ସେମାନେ ଅଧିକ ଗୁରୁତ୍ଵ ଆରୋପ କରିଛନ୍ତି ଯାହାକି ସମଗ୍ର କ୍ଷେତ୍ରର ସମୃଦ୍ଧି ହାସଲ ନିମନ୍ତେ ଏକାନ୍ତ ଜରୁରୀ । ଉଭୟ ନେତା ଭାରତର “ଏକ୍ଟ ଇଷ୍ଟ ପଲିସି” ଏବଂ ଜାପାନର “ଗୁଣାତ୍ମକ ଭିତ୍ତିଭୂମି କ୍ଷେତ୍ର ନିମନ୍ତେ ସହଭାଗୀତାର ସଂପ୍ରସାରଣ” ମଧ୍ୟରେ ସମନ୍ୱୟର ଆବଶ୍ୟକତା ଉପରେ ସେମାନେ ପ୍ରଧାନ୍ୟ ଦେଇଛନ୍ତି । ଏହା ଦ୍ଵିପାକ୍ଷିକ ଏବଂ ଅନ୍ୟ ସହଭାଗୀମାନଙ୍କ ମଧ୍ୟରେ ଘନିଷ୍ଠ ସମନ୍ୱୟ ବୃଦ୍ଧି ମାଧ୍ୟମରେ ହାସଲ କରାଯାଇପାରିବ ଏବଂ ତାହା ପାରସ୍ପିକ ଆଲୋଚନା ଓ ଆସ୍ଥା ମାଧ୍ୟମରେ କ୍ଷେତ୍ରୀୟ ସମନ୍ୱୟ ଏବଂ ଉନ୍ନତି ସଂଯୋଗୀକରଣ ତଥା ଶିଳ୍ପ ନେଟୱାର୍କିଂକୁ ସାକାର କରିପାରିବ ।

5. ବୈଶ୍ୱିକ କାର୍ଯ୍ୟ ଯୋଜନା ପାରସ୍ପରିକ ନିର୍ଭରଶୀଳ ଓ ଜଟିଳତାର ଗଭୀରତାକୁ ସମୀକ୍ଷା କରି ଉଭୟ ପ୍ରଧାନମନ୍ତ୍ରୀ ମହାକାଶର ସମାନ କ୍ଷେତ୍ର ଓ ଏଥିରେ ସହଯୋଗ ବୃଦ୍ଧି ସକାଶେ ସ୍ଥିର କରିଛନ୍ତି । ଏହା ଜଳବାୟୁ ପରିବର୍ତ୍ତନ, ଆତଙ୍କବାଦ ମୁକାବିଲା ଏବଂ ଭୟଙ୍କର ଉଗ୍ରବାଦ ଭଳି ବୈଶ୍ୱିକ ଚାଲେଞ୍ଜର ମୁକାବିଲା କରିବା ଦିଗରେ ତଥା ନିରାପତ୍ତା ପରିଷଦ ସମେତ ମିଳିତ ଜାତିସଂଘ ବ୍ୟବସ୍ଥାରେ ସଂସ୍କାର ଏବଂ ନ୍ୟାୟଭିତ୍ତିକ ଅନ୍ତରାଷ୍ଟ୍ରୀୟ ଶୃଙ୍ଖଳା ବଜାୟ ରଖିବା ଦିଗରେ ସହାୟକ ହେବ ।

6. ଜାପାନର ପୁଞ୍ଜି, ନବସୃଜନ ଓ ପ୍ରଯୁକ୍ତିର ପ୍ରଭୂତି ସମନ୍ୱିତ ସାମର୍ଥ୍ୟ ଏବଂ ଭାରତର ଉଚ୍ଚ-ବିକାଶଶୀଳ ଅର୍ଥନୈତିକ ପୃଷ୍ଠଭୂମିରେ ଉପଲବ୍ଧ ଉନ୍ନତ ମାନବସମ୍ବଳ ଓ ଆର୍ଥିକ ସୁଯୋଗକୁ ଦୃଷ୍ଟିରେ ରଖି ଦୁଇ ଦେଶର ପ୍ରଧାନମନ୍ତ୍ରୀ ଉଚ୍ଚତର ପ୍ରଯୁକ୍ତି, ମହାକାଶ, ସ୍ଵଚ୍ଛ ବିଜୁଳି ଶକ୍ତି ଏବଂ ଶକ୍ତି କ୍ଷେତ୍ରର ବିକାଶ, ଭିତ୍ତିଭୂମି ଓ ସ୍ମାର୍ଟ ସିଟି ବିକାଶ, ଜୈବ ପ୍ରଯୁକ୍ତି ବିଦ୍ୟା, ଫାର୍ମାସିଉଟିକାଲ୍ସ, ଆଇସିଟି ତଥା ଶିକ୍ଷା ଓ ଦକ୍ଷତା ବିକାଶ କ୍ଷେତ୍ରରେ ସହଯୋଗକୁ ଅଧିକ ଘନିଷ୍ଠ କରିବା ଏବଂ ସେମାନଙ୍କର ସ୍ଵତନ୍ତ୍ର ସୁରକ୍ଷା ଭଳି ଗୁରୁତ୍ଵପୂର୍ଣ୍ଣ କ୍ଷେତ୍ର ଓ ବୈଶ୍ୱିକ ସହଭାଗୀତାକୁ ଅଧିକ ବ୍ୟାପକ କରିବାକୁ ସହମତ ହୋଇଛନ୍ତି ।

ଏକ ନିରାପଦ ଓ ସ୍ଥିର ବିଶ୍ଵପାଇଁ ସୁଦୃଢ଼ ସମ୍ପର୍କ ସ୍ଥାପନ

7. ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ସ୍ଥିରତା ରକ୍ଷା ଏବଂ ସମୃଦ୍ଧି ନିମନ୍ତେ ଭାରତ ଓ ଜାପାନର ଭୂମିକା ଉପରେ ଗୁରୁତ୍ଵ ଆରୋପ କରି ଦୁଇ ରାଷ୍ଟ୍ରର ପ୍ରଧାନମନ୍ତ୍ରୀ ସେମାନଙ୍କର ନିରାପତ୍ତା ଓ ପ୍ରତିରକ୍ଷା ସହଯୋଗ ବୃଦ୍ଧି ଉପରେ ପ୍ରାଧାନ୍ୟ ଆରୋପ କରିଛନ୍ତି । ଏହି ପରିପ୍ରେକ୍ଷୀରେ ସେମାନେ ଉଭୟ ରାଷ୍ଟ୍ର ମଧ୍ୟରେ ସ୍ଵାକ୍ଷରିତ ଦୁଇଟି ପ୍ରତିରକ୍ଷା ସହଯୋଗ ଆଧାର ପଦ୍ଧତି ଯଥା – ପ୍ରତିରକ୍ଷା ଉପକରଣ ଓ ପ୍ରଯୁକ୍ତି ହସ୍ତାନ୍ତର ଏବଂ ଗୋପନୀୟ ସାମୟିକ ସୂଚନାର ସୁରକ୍ଷା ନିମନ୍ତେ ନିରାପତ୍ତା ବ୍ୟବସ୍ଥା କାର୍ଯ୍ୟକାରୀ ହେବାକୁ ସ୍ଵାଗତ କରିଛନ୍ତି । ସେହିପରି ଅଧିକ ଦ୍ଵିପାକ୍ଷିକ ସହଯୋଗ ଏବଂ ପ୍ରଯୁକ୍ତି ସହଯୋଗ, ସହ-ବିକାଶ ଓ ସହ-ଉତ୍ପାଦନକୁ ପ୍ରତିରକ୍ଷା ସଂକ୍ରାନ୍ତ ମିଳିତ କାର୍ଯ୍ୟକାରୀ ଗୋଷ୍ଠୀ ଦ୍ଵାରା ଆଲୋଚନା ତ୍ଵରିତ କରିବା ସହ ନିର୍ଦ୍ଦିଷ୍ଟ ଉପକରଣଗୁଡିକର ଚୟନର ଗୁରୁତ୍ଵକୁ ଉପଲବ୍ଧି କରିଛନ୍ତି ।

8. ଦୁଇ ଦେଶର ପ୍ରଧାନମନ୍ତ୍ରୀ ନୂଆଦିଲ୍ଲୀଠାରେ ଅନୁଷ୍ଠିତ ବାର୍ଷିକ ପ୍ରତିରକ୍ଷା ମନ୍ତ୍ରୀସ୍ତରୀୟ କଥାବାର୍ତ୍ତାର ସଫଳତାକୁ ପ୍ରଶଂସା କରିଛନ୍ତି । ସେହିପରି ମାଲାବାର ଉପକୂଳରେ ନୈସମରାଭ୍ୟାସ ଏବଂ ବିଶାଖାପାଟଣାଠାରେ ଅନୁଷ୍ଠିତ ଅନ୍ତରାଷ୍ଟ୍ରୀୟ ନୌସମରାଭ୍ୟାସରେ ଜାପାନର ନିୟମିତ ଅଂଶଗ୍ରହଣକୁ ମଧ୍ୟ ପ୍ରଶଂସା କରାଯାଇଛି । ୨+୨ କଥାବାର୍ତ୍ତା, ପ୍ରତିରକ୍ଷା ନୀତି ସମ୍ପର୍କୀତ ଆଲୋଚନା, ସେନାବାହିନୀସ୍ତରୀୟ ବାର୍ତ୍ତାଳାପ ଏବଂ ତଟରକ୍ଷୀ ବାହିନୀ-ତଟରକ୍ଷୀ ବାହିନୀସ୍ତରୀୟ ସହଯୋଗ ମାଧ୍ୟମରେ ଦ୍ଵିପାକ୍ଷିକ ନିରାପତ୍ତା ଏବଂ ପ୍ରତିରକ୍ଷା କଥାବାର୍ତ୍ତାକୁ ଅଧିକ ନିବିଡ କରିବା ସକାଶେ ସେମାନେ ନିଜର ପ୍ରତିବଦ୍ଧତା ପୁନଃ ପ୍ରକଟ କରିଛନ୍ତି । ସେମାନେ ସ୍ଵାଗତ କରିଛନ୍ତି ଯେ ଚଳିତ ବର୍ଷ ପ୍ରାରମ୍ଭରେ ଆରମ୍ଭ ହୋଇଥିବା ବାୟୁସେନାସ୍ତରୀୟ ଆଲୋଚନା ପରେ ଉଭୟ ରାଷ୍ଟ୍ରଙ୍କ ତିନିବାହିନୀ ମଧ୍ୟରେ ଆନୁଷ୍ଠାନିକ ସ୍ତରରେ ବ୍ୟାପକ ଆଲୋଚନା ନିମନ୍ତେ ସୁବ୍ୟବସ୍ଥା କରାଯିବା ଏକ ବଳିଷ୍ଠ ପଦକ୍ଷେପ । ଉଭୟ ରାଷ୍ଟ୍ରର ପ୍ରଧାନମନ୍ତ୍ରୀ ପ୍ରତିରକ୍ଷା କ୍ଷେତ୍ରରେ ଆଲୋଚନାର ପରିସରକୁ ବୃଦ୍ଧି କରିବା ସହ ସହଯୋଗ ବଢ଼ାଇବା ନିମନ୍ତେ ଅନୁକୂଳ ମନୋଭାବ ପ୍ରକଟ କରିଛନ୍ତି ଯଦ୍ଵାରା ମାନବୀୟ ସହାୟତା ଦୃଷ୍ଟିକୋଣରୁ ପର୍ଯ୍ୟବେକ୍ଷକ ଆଦାନପ୍ରଦାନ ଏବଂ ବିପର୍ଯ୍ୟୟକାଳୀନ ରିଲିଫ ଏବଂ ଅନ୍ୟାନ୍ୟ କ୍ଷେତ୍ରରେ ପାରସ୍ପରିକ ଜ୍ଞାନକୌଶଳ ଆଦାନପ୍ରଦାନ ଏବଂ ଅଧିକାରୀସ୍ତରୀୟ ତାଲିମ ସୁଯୋଗ ମିଳିପାରିବ ।

9. US-2 ଉଭୟଚର(Amphibious) ବିମାନ ଭଳି ଅତ୍ୟାଧୁନିକ ପ୍ରତିରକ୍ଷା ପ୍ଲାଟଫର୍ମ ଭାରତକୁ ଯୋଗାଇଦେବା ଲାଗି ଜାପାନର ଆଗ୍ରହକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଶଂସା କରିଛନ୍ତି । ଏହା ଉଭୟ ରାଷ୍ଟ୍ର ମଧ୍ୟରେ ଥିବା ଗଭୀର ଆସ୍ଥା ଏବଂ ପ୍ରତିରକ୍ଷା କ୍ଷେତ୍ରରେ ଭାରତ ଓ ଜାପାନ ଦ୍ଵିପାକ୍ଷିକ ସହଯୋଗ ବୃଦ୍ଧି ନିମନ୍ତେ କରିଥିବା ପ୍ରଗତିର ପ୍ରତୀକ ବୋଲି କୁହାଯାଇଛି ।

ସମୃଦ୍ଧି ପାଇଁ ସହଭାଗୀତା

10. ଅଭିନବ ଉଦ୍ୟମ ଓ କାର୍ଯ୍ୟକ୍ରମ ଯଥା “ମେକ ଇନ ଇଣ୍ଡିଆ”, “ଡିଜିଟାଲ ଇଣ୍ଡିଆ”, “ସ୍କିଲ ଇଣ୍ଡିଆ”, “ସ୍ମାର୍ଟ ସିଟି”, “ସ୍ଵଚ୍ଛ ଭାରତ” ଏବଂ “ଷ୍ଟାର୍ଟ ଅପ ଇଣ୍ଡିଆ” ମାଧ୍ୟମରେ କିପରି ଆର୍ଥିକ ବିକାଶକୁ ତାଙ୍କ ସରକାର ତ୍ଵରାନ୍ୱିତ କରୁଛନ୍ତି । ସେ ସମ୍ବନ୍ଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ଆବେଙ୍କୁ ଅବଗତ କରାଇଛନ୍ତି । ଏ ଦିଗରେ ଜାପାନ ସରକାର ଅତ୍ୟାଧୁନିକ ଜ୍ଞାନକୌଶଳ ଓ ପ୍ରଯୁକ୍ତି ଯୋଗାଇଦେବାକୁ ନିର୍ଭର ପ୍ରତିଶ୍ରୁତି ପ୍ରଦାନ କରିଛନ୍ତି ଯାହାକି ଓଡିଏ ସମେତ ଜାପାନର ସରକାରୀ ଓ ଘରୋଇ ସେକ୍ଟରର ନିବେଶ ନିମନ୍ତେ ପଦକ୍ଷେପ ଗ୍ରହଣ ଜରିଆରେ ସାକାର କରାଯିବ । ଭାରତ ଓ ଜାପାନର ଘରୋଇ ଉଦ୍ୟୋଗ ମଧ୍ୟରେ ଅଧିକ ସହଯୋଗ ସ୍ଥାପନ ଦିଗରେ ଏଭଳି ଉଦ୍ୟମ ଯଥେଷ୍ଟ ସୁଯୋଗ ପ୍ରଦାନ କରିବ ବୋଲି ଉଭୟ ପ୍ରଧାନମନ୍ତ୍ରୀ ଉପଲବଧି କରନ୍ତି ।

11. ମୁମ୍ବାଇ-ଅହମ୍ମଦାବାଦ ହାଇସ୍ପିଡ ରେଳ ପ୍ରକଳ୍ପ ଦ୍ରୁତ ପ୍ରଗତିକୁ ଦୁଇ ଦେଶର ପ୍ରଧାନମନ୍ତ୍ରୀ ସ୍ଵାଗତ କରିଛନ୍ତି । ଉଭୟ ରାଷ୍ଟ୍ର ମଧ୍ୟରେ ଏହା ଏକ ଧ୍ଵଜାଧାରୀ(Flagship) ପ୍ରକଳ୍ପ ଯାହା ୨୦୧୬ରେ ତିନି ପର୍ଯ୍ୟାୟ ଆଲୋଚନା ମାଧ୍ୟମରେ କାର୍ଯ୍ୟକାରୀ କରାଯାଉଛି ।

12. ମୁମ୍ବାଇ-ଅହମ୍ମଦାବାଦ ଦ୍ରୁତ ରେଳ ପ୍ରକଳ୍ପ (MAHSR) ପ୍ରକଳ୍ପର ପୂର୍ଣ୍ଣାଙ୍ଗ ଲକ୍ଷ୍ୟ କାର୍ଯ୍ୟକ୍ରମ ନିର୍ଦ୍ଧାରଣ ଘେନି ଦୁଇ ଦେଶର ପ୍ରଧାନମନ୍ତ୍ରୀ ସହମତ ହୋଇଛନ୍ତି ଯେ “ଜେନେରାଲ କନସଲଟାଣ୍ଟ” ୨୦୧୬ ଡିସେମ୍ବର ମାସରେ ଏହି କାର୍ଯ୍ୟ ଆରମ୍ଭ କରିବ ଏବଂ ୨୦୧୮ ଶେଷ ପର୍ଯ୍ୟନ୍ତ ଏହାର ନିର୍ମାଣ କାର୍ଯ୍ୟ ଜାରି ରହିବ ଏବଂ ୨୦୨୩ ଠାରୁ ଏହି ପ୍ରକଳ୍ପ କାର୍ଯ୍ୟକାରୀ ହେବ ।

13. ଉଭୟ ରାଷ୍ଟ୍ରର ପ୍ରଧାନମନ୍ତ୍ରୀ ଦ୍ଵୟ ଏହି ସିଦ୍ଧାନ୍ତକୁ ସ୍ଵାଗତ କରିଛନ୍ତି ଯେ ଦୁଇ ଦେଶର ପ୍ରତିନିଧିମାନଙ୍କୁ ନେଇ ଏକ ଟାସ୍କଫୋର୍ସ ଗଠନ କରାଯିବ ଯେଉଁମାନେ ପର୍ଯ୍ୟାୟଭିତ୍ତିକ ପ୍ରଯୁକ୍ତି ହସ୍ତାନ୍ତରଣ ଏବଂ “ମେକ ଇନ ଇଣ୍ଡିଆ” ସକାଶେ ସମ୍ପୂର୍ଣ୍ଣ ରୋଡମ୍ୟାପ ପ୍ରସ୍ତୁତ କରିବେ । ହାଇସ୍ପିଡ ରେଳପଥ ବିକାଶ କ୍ଷେତ୍ରରେ ସହଯୋଗ ବୃଦ୍ଧି ନିମନ୍ତେ ଉଭୟ ପକ୍ଷ ସମ୍ପର୍କ ସୁଦୃଢ଼ କରିବାକୁ ଉଦ୍ୟମ ଜାରି ରଖିବେ । ହାଇସ୍ପିଡ ରେଳ ପ୍ରଯୁକ୍ତି ଏବଂ ଏହାର ଯୋଜନାବଦ୍ଧ କାର୍ଯ୍ୟକାରିତା ଓ ରକ୍ଷଣାବେକ୍ଷଣ ଏବଂ ଏକ ଏଚଏସଆର ପ୍ରତିଷ୍ଠାନ ନିମନ୍ତେ ପ୍ରାରମ୍ଭିକ କରାଯିବା ଘେନି ମାନବ ସମ୍ବଳର ଯଥେଷ୍ଟ ଆବଶ୍ୟକତା ଥିବା ଉପରେ ଉଭୟ ଦେଶର ପ୍ରଧାନମନ୍ତ୍ରୀ ଗୁରୁତ୍ଵ ଆରୋପ କରିଛନ୍ତି । ୨୦୧୭ ମସିହାରେ ଏଥିଘେନି ଏକ ଶିଳାନ୍ୟାସ ସମାରୋହ  ଆୟୋଜନ କରାଯିବ ଯାହାକି MAHSR ପ୍ରକଳ୍ପ କାର୍ଯ୍ୟକୁ ତ୍ଵରାନିତ କରିବା ଦିଗରେ ମହତ୍ଵପୂର୍ଣ୍ଣ ଏହାର ଗୁରୁତ୍ଵକୁ ଉଭୟ ପ୍ରଧାନମନ୍ତ୍ରୀ ଗ୍ରହଣ କରିଛନ୍ତି । ଭାରତର ପାରମ୍ପରିକ ରେଳ ବ୍ୟବସ୍ଥାର ଆଧୁନିକୀକରଣ ଓ ସଂପ୍ରସାରଣର ଆବଶ୍ୟକତା ଓ  ଏ କ୍ଷେତ୍ରରେ ସହଯୋଗ ବୃଦ୍ଧି ଗୁରୁତ୍ଵକୁ ଉଭୟ ପ୍ରଧାନମନ୍ତ୍ରୀ ସନ୍ତୋଷର ସହ ଗ୍ରହଣ କରିଛନ୍ତି ।

14. ଉଭୟ ଦେଶର ପ୍ରଧାନମନ୍ତ୍ରୀ “ବିନିର୍ମାଣ କୌଶଳ ହସ୍ତାନ୍ତରଣ ପ୍ରୋତ୍ସାହନ କାର୍ଯ୍ୟକ୍ରମ” ମାଧ୍ୟମରେ ଭାରତରେ ଉତ୍ପାଦନ କ୍ଷେତ୍ରରେ ମାନବ ସମ୍ବଳର ବିକାଶ ଦିଗରେ ସହଯୋଗ କରିବାକୁ ନିଷ୍ପତ୍ତି କରିଛନ୍ତି । ଏହି କାର୍ଯ୍ୟକ୍ରମ ଭାରତର ଉତ୍ପାଦନ ଭିତ୍ତିକୁ ବୃଦ୍ଧି କରିବ ଏବଂ ଆଗାମୀ ୧୦ ବର୍ଷ ମଧ୍ୟରେ ପ୍ରାୟ ୩୦,୦୦୦ ଲୋକଙ୍କୁ ତାଲିମ ପ୍ରଦାନ କରିବ ଯାହାକି ମେକ ଇନ ଇଣ୍ଡିଆ ଏବଂ “ସ୍କିଲ ଇଣ୍ଡିଆ” କାର୍ଯ୍ୟକ୍ରମକୁ ଯଥେଷ୍ଟ ମାତ୍ରାରେ ସହାୟକ ହେବ । ଏଥିପାଇଁ ଜାପାନୀ ଢ଼ାଂଚାରେ ଉତ୍ପାଦନ କୌଶଳ ଓ କାର୍ଯ୍ୟଧାରାର ବିକାଶ ଘଟାଯିବ ଓ ଏହା ଇଂଜିନିୟରିଂ କଲେଜଗୁଡିକରେ ଜାପାନ-ଭାରତ ବିନିର୍ମାଣ ପ୍ରତିଷ୍ଠାନ (JIM) ଏବଂ ଜାପାନ ଏଣ୍ଡୋଡ କୋର୍ସେସ (JEC) ସ୍ଥାପନ କରାଯାଇ ଏହାରି ମାଧ୍ୟମରେ ସମ୍ପାଦନ କରାଯିବ । ଏଥିପାଇଁ ଜାପାନୀ କମ୍ପାନୀମାନଙ୍କ ଦ୍ଵାରା ଏହିସବୁ ଇଂଜିନିୟରିଂ କଲେଜ ଚୟନ କରାଯିବ ଏବଂ ଏଥିରେ ସରକାରୀ ଓ ଘରୋଇ ଉଦ୍ୟୋଗର ସହଯୋଗ ରହିବ । ଏହି କାର୍ଯ୍ୟକ୍ରମ ମାଧ୍ୟମରେ ପ୍ରଥମ ତିନୋଟି JIM ୨୦୧୭ ମସିହା ଗ୍ରୀଷ୍ମଋତୁ ସୁଦ୍ଧା ଗୁଜରାଟ, କର୍ଣ୍ଣାଟକ ଓ ରାଜସ୍ଥାନରେ କାର୍ଯ୍ୟକାରୀ କରାଯିବ ।

15. “ଜାପାନ-ଭାରତ ନିବେଶ ପ୍ରୋତ୍ସାହନ ସହଭାଗୀତା” କାର୍ଯ୍ୟକ୍ରମ ମାଧ୍ୟମରେ ପାଂଚ ବର୍ଷ ମଧ୍ୟରେ ଭାରତ ପାଇଁ ୫.୩ ଟ୍ରିଲିୟନ ୟେନ ସରକାରୀ ଓ ଘରୋଇ ପାଣ୍ଠି ସଂଗ୍ରହ ଦିଗରେ ହୋଇଥିବା ଦ୍ରୁତ ପ୍ରଗତିକୁ ଉଭୟ ପ୍ରଧାନମନ୍ତ୍ରୀ ସ୍ଵାଗତ କରିଛନ୍ତି । ସେହିଭଳି ସେମାନେ ପଶ୍ଚିମାଂଚଳ ସମର୍ପିତ ମାଲପରିବହନ କରିଡର (ଡିଏଫସି), ଦିଲ୍ଲୀ-ମୁମ୍ବାଇ କରିଡର (ଡିଏମଆଇସି) ଏବଂ ଚେନ୍ନାଇ-ବେଙ୍ଗାଲୁରୁ ଶିଳ୍ପ କରିଡର (ସିବିଆଇସି) ପ୍ରକଳ୍ପରେ ଘଟିଥିବା ପ୍ରଗତିକୁ ସ୍ଵାଗତ କରିଛନ୍ତି ।

16. ଭାରତର ଭିତ୍ତିଭୂମି ବିକାଶ ଏବଂ ଆଧୁନିକୀକରଣ ପ୍ରକଳ୍ପରେ ଜାପାନ ଓଡିଏର ଗୁରୁତ୍ଵପୂର୍ଣ୍ଣ ଅବଦାନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଶଂସା କରିଛନ୍ତି । ଏହି ପରିପ୍ରେକ୍ଷୀରେ ଉଭୟ ଦେଶର ପ୍ରଧାନମନ୍ତ୍ରୀ ଓଡିଏ ପ୍ରକଳ୍ପ ମାଧ୍ୟମରେ କାର୍ଯ୍ୟକାରୀ କରାଯାଇଥିବା ସହରାଂଚଳ ପରିବହନ ବ୍ୟବସ୍ଥା, ଯଥା ଚେନ୍ନାଇ ଓ ଅହମ୍ମଦାବାଦ ମେଟ୍ରୋ, ମୁମ୍ବାଇ ଟ୍ରାନ୍ସ-ହାରବର ଲିଙ୍କ ପ୍ରକଳ୍ପ ଏବଂ ଦିଲ୍ଲୀର ଇଷ୍ଟର୍ଣ୍ଣ ପେରିଫେରାଲ ହାଇେୱରେ “ଇଂଟେଲିଜେନ୍ସ ଟ୍ରାନ୍ସପୋର୍ଟ ସିଷ୍ଟମ” ବ୍ୟବସ୍ଥା ପ୍ରବର୍ତ୍ତନର ପ୍ରଗତିକୁ ସ୍ଵାଗତ କରିଛନ୍ତି । ସେହିଭଳି ଗୁଜରାଟର ଭାବନଗର ଦିଲ୍ଲୀସ୍ଥିତ ଅଲାଙ୍ଗ ଜାହାଜ-ଭଙ୍ଗା ୟାର୍ଡର ଉନ୍ନତିକରଣ କାର୍ଯ୍ୟକ୍ରମରେ ଜାପାନ ସହଯୋଗ ପାଇଁ ଆଗ୍ରହୀ ବୋଲି ପ୍ରଧାନମନ୍ତ୍ରୀ ଆବେ ଇଚ୍ଛାପ୍ରକଟ କରିଛନ୍ତି ।

17. ଉଭୟ ଦେଶର ପ୍ରଧାନମନ୍ତ୍ରୀ ଦ୍ଵୟ ସଂଯୋଗୀକରଣ ଦିଗରେ ସହଯୋଗ ବୃଦ୍ଧି ନିମନ୍ତେ ସେମାନଙ୍କର ଦୃଢ଼ ପ୍ରତିବଦ୍ଧତା ପ୍ରକଟ କରିଛନ୍ତି ଏବଂ ଉତ୍ତରପୂର୍ବ ଭାରତରେ ସଡକ ସଂଯୋଗୀକରଣ ସଂପ୍ରସାରଣ ପ୍ରକଳ୍ପଗୁଡିକର କାର୍ଯ୍ୟ ପ୍ରଗତିକୁ ସ୍ଵାଗତ କରିଛନ୍ତି । ସ୍ମାର୍ଟ ସିଟି ବିକାଶ ପରି ସ୍ମାର୍ଟ ଦ୍ଵୀପର ବିକାଶ କ୍ଷେତ୍ରରେ ଉଭୟପକ୍ଷ ସହଯୋଗ ବୃଦ୍ଧି ସକାଶେ ରାଜି ହୋଇଥିବାବେଳେ ଏ ଦିଗରେ ଆଲୋଚନା ଆରମ୍ଭ କରି ଉପଯୁକ୍ତ ପ୍ରଯୁକ୍ତି, ଭିତ୍ତିଭୂମି, ବିକାଶ କାର୍ଯ୍ୟକ୍ରମ ଏବଂ ପରିଚାଳନା ପ୍ରକ୍ରିୟାର ଚିହ୍ନଟକରଣ ପାଇଁ ସ୍ଥିର କରିଛନ୍ତି ଯଦ୍ଵାରା ସଫଳ ଓ ସକ୍ରିୟ ପଦ୍ଧତିରେ ସ୍ମାର୍ଟ ଦ୍ଵୀପ ଗୁଡିକର ବିକାଶ ପ୍ରକ୍ରିୟା ସହଜସାଧ୍ୟ ହୋଇପାରିବ ।

18. ଝାଡ଼ଖଣ୍ଡର ଜଳସେଚନ ପ୍ରକଳ୍ପ, ଓଡିଶାର ଜଙ୍ଗଲ ସମ୍ପଦ ପରିଚାଳନା ନିମନ୍ତେ ପ୍ରାରମ୍ଭିକ ପ୍ରସ୍ତୁତି ସର୍ଭେ ଏବଂ ରାଜସ୍ଥାନ ଓ ଆନ୍ଧ୍ରପ୍ରଦେଶରେ ଜଳସେଚନ ବ୍ୟବସ୍ଥାର ଉନ୍ନତିକରଣ ସକାଶେ ଓଡିଏ ଋଣ ବ୍ୟବସ୍ଥାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଶଂସା କରିଛନ୍ତି ।

19. ବାରାଣାସୀଠାରେ ଏକ ସମ୍ମିଳନୀ କେନ୍ଦ୍ର(Advanced Convention Hall) ନିର୍ମାଣ ଦିଗରେ ଜାପାନର ସହଯୋଗ ଉଦ୍ୟମକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଧୁବାଦ ଜଣାଇଛନ୍ତି ଏବଂ ଏଥିସହ ଦ୍ଵିପାକ୍ଷିକ ସମ୍ପର୍କର ସୁଦୃଢ଼ୀକରଣ ଦିଗରେ ଏହାର ସାଂକେତିକ ଗୁରୁତ୍ଵକୁ ସ୍ଵୀକାର କରିଛନ୍ତି ।

20. ଭାରତରେ ବ୍ୟବସାୟିକ ବାତାବରଣରେ ଉନ୍ନତି ଘଟାଇବା ନିମନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୃଢ଼ ପ୍ରତିବଦ୍ଧତାକୁ ପ୍ରଧାନମନ୍ତ୍ରୀ ଆବେ ଉଚ୍ଚ ପ୍ରଶଂସା କରିଛନ୍ତି ଏଥିସହ ଉଦାର ତଥା କୋହଳ ନିବେଶ ନୀତିକୁ ସରଳ କରିବା ଏବଂ କର ବ୍ୟବସ୍ଥାକୁ ସୁସଂଗତ କରିବା ନିମନ୍ତେ ଐତିହାସିକ ବସ୍ତୁ ଓ ସେବା କର ବିଲ, ଦେବାଳିଆ ଓ ପରିଶୋଧକ୍ଷମତା କୋର୍ଡ ଏବଂ ଅନ୍ୟାନ୍ୟ ବ୍ୟବସ୍ଥା ଗ୍ରହଣକୁ ସ୍ଵାଗତ ଜଣାଇଛନ୍ତି ।

21. ଭାରତରେ ବ୍ୟବସାୟିକ ବାତାବରଣ ଉନ୍ନତିକରଣ ଏବଂ ଜାପାନୀ ନିବେଶ ନିମନ୍ତେ ସକାରାତ୍ମକ ପରିବେଶ ସୃଷ୍ଟି ସକାଶେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗ୍ରହଣ କରିଥିବା କାର୍ଯ୍ୟପନ୍ଥାକୁ ପ୍ରଧାନମନ୍ତ୍ରୀ ଆବେ ପ୍ରଶଂସା କରିଛନ୍ତି । ସେହିଭଳି ଜାପାନ ଶିଳ୍ପ ନଗରୀ (JITs) ପ୍ରତିଷ୍ଠା ଦିଗରେ ପ୍ରଧାନମନ୍ତ୍ରୀ ଆବେଙ୍କ ଉଦ୍ୟମକୁ ପ୍ରଧାନମନ୍ତ୍ରୀ ମୋଦୀ ପ୍ରଶଂସା କରିଛନ୍ତି । ସେ ଦୃଢ଼ ଆଶାପୋଷଣ କରିଛନ୍ତି ଯେ ଏଭଳି ଟାଉନସିପର ପ୍ରତିଷ୍ଠା ଦ୍ଵାରା ଭାରତର ଉତ୍ପାଦନ ସେକ୍ଟରରେ ପ୍ରଯୁକ୍ତି ମିଶ୍ରଣ, ନବସୃଜନ ଏବଂ ଶ୍ରେଷ୍ଠ କାର୍ଯ୍ୟାନ୍ୱୟନ ସଂପ୍ରସାରିତ ହୋଇପାରିବ । ଜେଆଇଟିଏସ ପ୍ରତିଷ୍ଠା କ୍ଷେତ୍ରରେ ହୋଇଥିବା ପ୍ରଗତିକୁ ଉଭୟ ପ୍ରଧାନମନ୍ତ୍ରୀ ସ୍ଵାଗତ କରିଛନ୍ତି ଏବଂ ପାଇଲଟ ପ୍ରବର୍ତ୍ତନ ଓ ସ୍ଵତନ୍ତ୍ର ନିବେଶ ପ୍ରୋତ୍ସାହନ ସକାଶେ ବାରଟି ଜେଆଇଟିଏସ ମଧ୍ୟରୁ କେତୋଟିର କ୍ଷେତ୍ର ଚୟନକୁ ଉଭୟ ନେତା ସ୍ଵାଗତ ଜଣାଇଛନ୍ତି । ଜେଆଇଟିଏସର ବିକାଶ ନିମନ୍ତେ ସହଯୋଗ ବୃଦ୍ଧି ଏବଂ ଆଲୋଚନା ଜାରି ସକାଶେ ଉଭୟ ପକ୍ଷ ସହମତି ହୋଇଛନ୍ତି ।

22. ଭାରତରେ ଜାପାନୀ କମ୍ପାନୀମାନଙ୍କ ନିମନ୍ତେ ନିବେଶ ସୁବିଧା ସକାଶେ “ଜାପାନ ପ୍ଲସ” ପକ୍ଷରୁ ଯୋଗାଇ ଦିଆଯାଇଥିବା ସୁବିଧା ସୁଯୋଗକୁ ପ୍ରଧାନମନ୍ତ୍ରୀ ଆବେ ପ୍ରଶଂସା କରିଛନ୍ତି । ସେହିଭଳି ଜାପାନ-ଭାରତ ନିବେଶ ପ୍ରୋତ୍ସାହନ ସହଭାଗୀତା ନିମନ୍ତେ ସୁଯୋଗ ସୃଷ୍ଟି ଲାଗି କ୍ୟାବିନେଟ ସଚିବଙ୍କ ଅଧ୍ୟକ୍ଷତାରେ ଗଠିତ “କୋର ଗ୍ରୁପ”କୁ ପ୍ରଧାନମନ୍ତ୍ରୀ ଶ୍ରୀ ଆବେ ସାଧୁବାଦ ଜଣାଇଛନ୍ତି । ଚଳିତ ବର୍ଷ ଅନୁଷ୍ଠିତ ଦ୍ଵିପାକ୍ଷିକ ଗୁରୁତ୍ଵପୂର୍ଣ୍ଣ ରଣନୀତିକ ଭାଗିଦାରୀ ସଂକ୍ରାନ୍ତ ଆର୍ଥିକ କଥାବାର୍ତ୍ତା, ଆର୍ଥିକ ଆଲୋଚନା ଏବଂ ବ୍ୟାପକ ଆର୍ଥିକ ସହଭାଗୀତା ରାଜିନାମା (CEPA)ର ସଫଳତା ନିମନ୍ତେ ଉଭୟ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଛନ୍ତି ଏବଂ ଏଭଳି ଆଲୋଚନାର ଆବଶ୍ୟକତା ଏବଂ ସବକମିଟି ଗଠନ ଉପରେ ଗୁରୁତ୍ଵ ଆରୋପ କରିଛନ୍ତି । ଏହା ଦ୍ଵିପାକ୍ଷିକ ସହଯୋଗକୁ ଅଧିକ ନିବିଡ କରିବ ବୋଲି ସେମାନେ ମତପୋଷଣ କରିଛନ୍ତି । ୨୦୧୬ ଅକ୍ଟୋବର ମାସଠାରୁ କାର୍ଯ୍ୟକାରୀ ହୋଇଥିବା ସାମାଜିକ ନିରାପତ୍ତା ରାଜିନାମା ନିମନ୍ତେ ଦୁଇ ନେତା ସନ୍ତୋଷ ବ୍ୟକ୍ତ କରିଛନ୍ତି । ଏହା ବ୍ୟବସାୟିକ ବ୍ୟୟ ମାତ୍ରାକୁ ହ୍ରାସ କରିବା ସହ ଭାରତ ଓ ଜାପାନ ମଧ୍ୟରେ ମାନବୀୟ ଓ ଅର୍ଥନୈତିକ ଆଦାନପ୍ରଦାନର ସୁଯୋଗକୁ ଅଧିକ ସୁଗମ କରିବ ।

23. ଉଭୟ ପ୍ରଧାନମନ୍ତ୍ରୀ ନିପନ ରପ୍ତାନୀ ଏବଂ ନିବେଶ ବୀମା (NEXI) ଏବଂ ଜାପାନ ଆନ୍ତର୍ଜାତିକ ସହଯୋଗ ବ୍ୟାଙ୍କ (JBIC) ଦ୍ଵାରା ୧.୫ ଟ୍ରିଲିୟନ ୟେନ ସଂଗ୍ରହ ସକାଶେ “ଜାପାନ-ଭାରତ ମେକ ଇନ ଇଣ୍ଡିଆ ସ୍ଵତନ୍ତ୍ର ଆର୍ଥିକ ବ୍ୟବସ୍ଥା” କୁ ପ୍ରବର୍ତ୍ତନ କରାଯିବାର ଆବଶ୍ୟକତା ଉପରେ ଗୁରୁତ୍ଵାରୋପ କରିଛନ୍ତି । ଏହା ଦ୍ଵାରା ଭାରତରେ ଜାପାନୀ କମ୍ପାନୀମାନଙ୍କ ପ୍ରତ୍ୟକ୍ଷ ନିବେଶ ସହଜସାଧ୍ୟ ହୋଇପାରିବ । ଭାରତରେ ଭିତ୍ତିଭୂମି ପ୍ରକଳ୍ପଗୁଡିକୁ ପାଣ୍ଠି ଯୋଗାଣ ନିମନ୍ତେ ଜାତୀୟ ନିବେଶ ଓ ଭିତ୍ତିଭୂମି ପାଣ୍ଠି (NIIF) ଏବଂ ପରିବହନ ଓ ସହରାଂଚଳ ବକାଶ ପାଇଁ ଜାପାନ ଦରିଆପାରି ଭିତ୍ତିଭୂମି ନିବେଶ ନିଗମ (JOIN) ମଧ୍ୟରେ ସ୍ଵାକ୍ଷରିତ ବୁଝାମଣା ପତ୍ରକୁ ଉଭୟ ନେତା ସ୍ଵାଗତ କରିଛନ୍ତି ।

ସ୍ଵଚ୍ଛ ଓ ସବୁଜ ଭବିଷ୍ୟତ ପାଇଁ ମିଳିତ ଭାବେ କାର୍ଯ୍ୟକରିବା

24. ଦୁଇ ଦେଶର ପ୍ରଧାନମନ୍ତ୍ରୀ ସ୍ଵୀକାର କରିଛନ୍ତି ଯେ ଉଭୟ ଦେଶର ଆର୍ଥିକ ବିକାଶ ନିମନ୍ତେ ନିର୍ଭରଯାଗ୍ୟ, ସ୍ଵଚ୍ଛ ଏବଂ ସୁଲଭ ମୂଲ୍ୟରେ ଶକ୍ତି ଉପଲବଧ ହେବା ଏକାନ୍ତ ଜରୁରୀ । ଏବଂ ଏହି ପରିପ୍ରେକ୍ଷୀରେ ୨୦୧୬ ମସିହା ଜାନୁଆରୀ ମାସରେ ଅନୁଷ୍ଠିତ ଜାପାନ-ଭାରତ ଅଷ୍ଟମ ଶକ୍ତି ସହଯୋଗ ଆଲୋଚନା ମାଧ୍ୟମରେ ହୋଇଥିବା ଜାପାନ-ଭାରତ ସହଭାଗୀତା ପ୍ରୟାସକୁ ସେମାନେ ସ୍ଵାଗତ କରିଛନ୍ତି । ସେମାନେ ଏ ଦିଗରେ ଦ୍ଵିପାକ୍ଷିକ ଶକ୍ତି ସହଯୋଗକୁ ଅଧିକ ନିବିଡ କରିବାକୁ ଇଚ୍ଛା ପ୍ରକଟ କରିଛନ୍ତି ଯାହାକି ଉଭୟ ଦେଶର ଶକ୍ତି ଉତ୍ପାଦନ ବୃଦ୍ଧିରେ ସହାୟକ ହେବନାହିଁ । ପରନ୍ତୁ ବିଶ୍ଵବ୍ୟାପୀ ଶକ୍ତି ନିରାପତ୍ତା, ଶକ୍ତି ଉପଲବ୍ଧତା ଏବଂ ଜଳବାୟୁ ନିୟନ୍ତ୍ରଣ ପ୍ରୟାସକୁ ମଧ୍ୟ ସୁନିଶ୍ଚିତ କରିବ । ସେହିଭଳି ସେମାନେ ସ୍ଵଚ୍ଛ ତଥା ବିବିଧ ତରଳୀକୃତ ପ୍ରାକୃତିକ ବାଷ୍ପ(LNG) ବଜାରର ସଂପ୍ରସାରଣ ସମତେ ସେଥିରୁ ଲକ୍ଷ୍ୟସ୍ଥଳୀ ସର୍ତ୍ତାବଳୀର ବିଲୋପ ପାଇଁ ସେମାନଙ୍କର ପ୍ରତିବଦ୍ଧତା ପୁନଃପ୍ରକଟ କରିଛନ୍ତି ।

25. ପ୍ୟାରିସ ଜଳବାୟୁ ପରିବର୍ତ୍ତନ ରାଜିନାମା ଯଥାଶୀଘ୍ର କାର୍ଯ୍ୟକାରୀ ହୋଇଥିବା ହେତୁ ଉଭୟ ପ୍ରଧାନମନ୍ତ୍ରୀ ଏହାକୁ ସ୍ଵାଗତ କରିଛନ୍ତି ଏବଂ ଏହି ରାଜିନାମାକୁ ସଫଳ ଭାବେ ପ୍ରବର୍ତ୍ତନ କରିବା ସକାଶେ ଏକ ନିୟମାବଳୀର ବିକାଶ ଦିଗରେ ମିଳିତ ଭାବେ କାର୍ଯ୍ୟକରିବା ଲାଗି ସେମାନଙ୍କର ପ୍ରତିବଦ୍ଧତା ପ୍ରକଟ କରିଛନ୍ତି । ସେହିଭଳି ମିଳିତ କ୍ରେଡିଟ ପରିଚାଳନା (JIM) ଉପରେ ଯଥାଶୀଘ୍ର ସମ୍ଭବ ଅଧିକ ଆଲୋଚନା ସେମାନଙ୍କର ମିଳିତ ଅଭିପ୍ରାୟ ପ୍ରକଟ କରିଛନ୍ତି ।

26. ବିଶେଷ ଭାବେ ଅକ୍ଷୟ ଶକ୍ତି କ୍ଷେତ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉଦ୍ୟମ ଏବଂ ଏଥିସହ ଅନ୍ତର୍ଜାତିକ ସୌର ସହଯୋଗ (ISA) ଗଠନ ପାଇଁ ପ୍ରଧାନମନ୍ତ୍ରୀ ଆବେ ଶ୍ରୀ ମୋଦୀଙ୍କୁ ସ୍ଵାଗତ କରିଛନ୍ତି ।
27. ପରମାଣୁ ଶକ୍ତିର ଶାନ୍ତିପୂର୍ଣ୍ଣ ବିନିଯୋଗ ଘେନି ଜାପାନ ସରକାର ଏବଂ ଭାରତ ସରକାରଙ୍କ ମଧ୍ୟରେ ସ୍ଵାକ୍ଷରିତ ସହଯୋଗ ଚୁକ୍ତିନାମାକୁ ଉଭୟ ପ୍ରଧାନମନ୍ତ୍ରୀ ସ୍ଵାଗତ ଜଣାଇଛନ୍ତି ଯାହାକି ସ୍ଵଚ୍ଛ ଶକ୍ତି, ଆର୍ଥିକ ବିକାଶ ଏବଂ ଶାନ୍ତିପୂର୍ଣ୍ଣ ତଥା ନିରାପଦ ବିଶ୍ଵ ଗଠନ ଦିଗରେ ନୂତନ ପର୍ଯ୍ୟାୟର ପାସ୍ପରିକ ଆସ୍ଥା ଓ ବିଶ୍ଵାସ ତଥା ଗୁରୁତ୍ଵପୂର୍ଣ୍ଣ ସହଯୋଗକୁ ପ୍ରତିଫଳନ କରେ ।

28. ପର୍ଯ୍ୟାବରଣ ଅନୁକୂଳ ଏବଂ ଶକ୍ତି ସଂରକ୍ଷଣକାରୀ ପ୍ରଯୁକ୍ତି କ୍ଷେତ୍ରରେ ସରକାରୀ ଓ ଘରୋଇ କ୍ଷେତ୍ରର କ୍ରମବର୍ଦ୍ଧିଷ୍ଣୁ ସହଭାଗୀତାକୁ ସ୍ଵାଗତ କରି ଉଭୟ ରାଷ୍ଟ୍ରର ପ୍ରଧାନମନ୍ତ୍ରୀ ଏଭଳି ଅନ୍ୟାନ୍ୟ କ୍ଷେତ୍ର ଯଥା ସ୍ଵଚ୍ଛ କୋଇଲା ଭିତ୍ତିକ ପ୍ରଯୁକ୍ତି, ପରିବେଶ ଅନୁକୂଳ ଯାନବାହନର ଲୋକପ୍ରିୟତା ବୃଦ୍ଧି, ହାଇବ୍ରିଡ ଯାନବାହନ, ଇଲେକ୍ଟ୍ରୋନିକ ଯାନ ଆଦିର ବହୁଳ ପ୍ରଚଳନ କ୍ଷେତ୍ରରେ ଅଧିକ ସହଯୋଗ ନିମନ୍ତେ ସେମାନଙ୍କ ପ୍ରତିବଦ୍ଧତା ପ୍ରକଟ କରିଛନ୍ତି ।

29. ନିରାପଦ ଏବଂ ପରିବେଶ ଦୃଷ୍ଟିରୁ ସୁରକ୍ଷିତ ପୁରୁଣା ଜାହାଜ ପୁନଃଚକ୍ରଣ ଘେନି ୨୦୦୯ ରେ ଘୋଷିତ ହଂକଂ ଆନ୍ତର୍ଜାତୀୟ ସମ୍ମିଳନୀର ଘୋଷଣାନାମାକୁ ଯଥାଶୀଘ୍ର କାର୍ଯ୍ୟକାରୀ କରିବା ଦିଗରେ ଉଭୟ ପ୍ରଧାନମନ୍ତ୍ରୀ ସେମାନଙ୍କର ଅଭିପ୍ରାୟ ପ୍ରକଟ କରିଛନ୍ତି ।

ଭବିଷ୍ୟତ ଆଧାରିତ ସହଭାଗୀତାର ଆଧାରଶୀଳା ସ୍ଥାପନ

30. ଉଭୟ ଦେଶର ସମାଜରେ ମୌଳିକ ସଂସ୍କାର ଘଟାଇବା ନିମନ୍ତେ ବିଜ୍ଞାନ ଓ ପ୍ରଯୁକ୍ତି କ୍ଷେତ୍ରରେ ଦୁଇ ଦେଶ ମଧ୍ୟରେ ଘନିଷ୍ଠ ଦ୍ଵିପାକ୍ଷିକ ସହଯୋଗର ପ୍ରଭୂତ କ୍ଷେତ୍ର ରହିଥିବା ବିଷୟ ଉଭୟ ପ୍ରଧାନମନ୍ତ୍ରୀ ସ୍ଵୀକାର କରିଛନ୍ତି । ଏହି ଦୃଷ୍ଟିରୁ ସେମାନେ ମହାକାଶ ଗବେଷଣା କ୍ଷେତ୍ରରେ ସହଯୋଗ ବୃଦ୍ଧି ଉପରେ ଗୁରୁତ୍ଵ ଆରୋପ କରିଛନ୍ତି ଏବଂ JAXA ଓ ISRO ମଧ୍ୟରେ ସ୍ଵାକ୍ଷରିତ ବୁଝାମଣା ପତ୍ରକୁ ସ୍ଵାଗତ ଜଣାଇଛନ୍ତି । ସେହିଭଳି ସାମୁଦ୍ରିକ, ଭୂ ତଥା ପରିବେଶ ବିଜ୍ଞାନ, ଯାହାକି ଭାରତର ଭୂବିଜ୍ଞାନ ମନ୍ତ୍ରଣାଳୟ ଏବଂ JAMSTEC ମଧ୍ୟରେ ସ୍ଵାକ୍ଷରିତ ବୁଝାମଣା ପତ୍ର (MOU) ମାଧ୍ୟମରେ କାର୍ଯ୍ୟକାରୀ ହେବାକୁ ଯାଉଛି। ଏହି ଉଦ୍ୟମକୁ ସେମାନେ ପ୍ରଶଂସା କରିଛନ୍ତି । ଆଇଟି ଏବଂ ଇଲେକ୍ଟ୍ରୋନିକ୍ସ, ଜାପାନ-ଭାରତ ଆଇଓଟି  ନିବେଶ ପ୍ରୟାସ ଯାହାକି JETRO ଏବଂ ବିଜ୍ଞାନ ଓ ପ୍ରଯୁକ୍ତି ଘେନି ମିଳିତ କମିଟି ସହଯୋଗରେ କାର୍ଯ୍ୟକାରୀ କରାଯାଉଛି । ଏଥିଘେନି ଦ୍ଵିପାକ୍ଷିକ ଆଇଟି ଏବଂ ଆଇଓଟିର ସହଯୋଗ ପ୍ରଗତିକୁ ସେମାନେ ସ୍ଵୀକାର କରିଛନ୍ତି ।

31. ମିଳିତ ଜାତିସଂଘ ଆନୁକୂଲ୍ୟରେ ଅନୁଷ୍ଠିତ ବିପର୍ଯ୍ୟୟ ଆଶଙ୍କା ପ୍ରଶମନ ସଂକ୍ରାନ୍ତ ତୃତୀୟ ସମ୍ମିଳନୀ ପରେ ନୂଆଦିଲ୍ଲୀଠାରେ ଅନୁଷ୍ଠିତ “ବିପର୍ଯ୍ୟୟ ଆଶଙ୍କା ପ୍ରଶମନ ସଂକ୍ରାନ୍ତ ୨୦୧୬ ଏସୀୟ ମନ୍ତ୍ରୀସ୍ତରୀୟ ସମ୍ମିଳନୀ”ର ସଫଳ ଆୟୋଜନକୁ ଉଭୟ ପ୍ରଧାନମନ୍ତ୍ରୀ ସ୍ଵାଗତ କରିଛନ୍ତି । ଏଥିସହ ବିପର୍ଯ୍ୟୟ ପରିଚାଳନା ଓ ବିପର୍ଯ୍ୟୟ ଆଶଙ୍କା ପ୍ରଶମନ ଦିଗରେ ସହଯୋଗ ପାଇଁ ଥିବା ବିପୁଳ ସମ୍ଭାବନାକୁ ସେମାନେ ସ୍ଵୀକାର କରିଛନ୍ତି । ସେହିପରି ଅନ୍ତର୍ଜାତୀୟ ସୁନାମୀ ସଚେତନତା ଦିବସର ଗୁରୁତ୍ଵ ସେମାନେ ସ୍ଵୀକାର କରିବା ସହ ଏହି ଅବସରରେ ସଚେତନତା ବୃଦ୍ଧି, ବିପଦ ଆଶଙ୍କାକୁ ଉତ୍ତମ ରୂପେ ହୃଦୟଙ୍ଗମ କରିବା ଏବଂ ଏହାର ମୁକାବିଲା ନିମନ୍ତେ ସାଧନ ଉପକରଣର ବିକାଶ ପାଇଁ ସହମତ ହୋଇଛନ୍ତି ।

32. ସ୍ଵାସ୍ଥ୍ୟସେବା କ୍ଷେତ୍ରରେ ସହଯୋଗର ପ୍ରଗତି ଯେଉଁଥିରେ ଆଂଟି-ମାଇକ୍ରୋବିଏଲ ସହନଶୀଳତା, ଷ୍ଟେମସେଲ ଗବେଷଣା, ଫାର୍ମାସିଉଟିକାଳ ଓ ମେଡିକାଲ ଉପକରଣ ବିକାଶ ଆଦି ସାମିଲ ଏହାକୁ ଦୁଇ ଦେଶର ପ୍ରଧାନମନ୍ତ୍ରୀ ସ୍ଵାଗତ କରିଛନ୍ତି । ଏହି ମର୍ମରେ ଭାରତ ଓ ଜାପାନର ଫାର୍ମାସିଉଟିକାଲ କମ୍ପାନୀମାନଙ୍କ ମଧ୍ୟରେ ସହଯୋଗର ସୁଯୋଗ ସମ୍ପର୍କରେ ଉଲ୍ଲେଖ କରିବା ସହ ଉଭୟ ପକ୍ଷ ଜାପାନରେ ଜେନେରିକ-ମେଡିସିନର ପରିମାଣାତ୍ମକ ଉତ୍ପାଦନ ଲକ୍ଷ୍ୟ ହାସଲ ଉପରେ ଗୁରୁତ୍ଵ ଆରୋପ କରିଛନ୍ତି ।

ଦୀର୍ଘସ୍ଥାୟୀ ସହଭାଗୀତା ଲାଗି ମାନବୀୟ ନିବେଶ

33. ସଂସ୍କୃତି ଓ ପର୍ଯ୍ୟଟନ କ୍ଷେତ୍ରରେ ୨୦୧୭ ମସିହାକୁ ଭାରତ-ଜାପାନ ବନ୍ଧୁତ୍ଵ ଆଦାନପ୍ରଦାନର ବର୍ଷ ରୂପେ ଗ୍ରହଣ କରିବା ଉଦ୍ଦେଶ୍ୟରେ ଉଭୟ ରାଷ୍ଟ୍ରର ପ୍ରଧାନମନ୍ତ୍ରୀ ପର୍ଯ୍ୟଟନ, ଯୁବଗୋଷ୍ଠୀଙ୍କ ପାରସ୍ପରିକ ରାଷ୍ଟ୍ର ଭ୍ରମଣ, ଶିକ୍ଷା କ୍ଷେତ୍ରରେ ସହଯୋଗ ବୃଦ୍ଧିର ଆବଶ୍ୟକତା ଉପରେ ଗୁରୁତ୍ଵ ଆରୋପ କରିଛନ୍ତି । ସାଂସ୍କୃତିକ ଭାବ ବିନିମୟ ଘେନି ସ୍ଵାକ୍ଷରିତ ଏମଓୟୁକୁ ସେମାନେ ସ୍ଵାଗତ କରିଛନ୍ତି । ଉଭୟ ରାଷ୍ଟ୍ରଙ୍କ ମଧ୍ୟରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ଉପରେ ଗୁରୁତ୍ଵ ଆରୋପ କରିବା ସହ ଭାରତ-ଜାପାନ ପର୍ଯ୍ୟଟନ ପରିଷଦର ପ୍ରଥମ ବୈଠକର ଫଳାଫଳ ଉପରେ ଦୁଇ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଛନ୍ତି । ୨୦୧୭ ଜାନୁଆରୀ ମାସରେ ଏହାର ଦ୍ଵିତୀୟ ବୈଠକକୁ ସେମାନେ ଉତ୍କଣ୍ଠାର ସହ ଅପେକ୍ଷାରତ ଅଛନ୍ତି । ୨୦୧୬ ଆର୍ଥିକ ବର୍ଷରେ ଦିଲ୍ଲୀଠାରେ ଜାପାନ ଜାତୀୟ ପର୍ଯ୍ୟଟନ ସଂଗଠନ (JNTO)ର କାର୍ଯ୍ୟାଳୟ ପ୍ରତିଷ୍ଠା ଯୋଜନାକୁ ସେମାନେ ସ୍ଵାଗତ କରିଛନ୍ତି ।

34. ଭାରତୀୟ ଛାତ୍ରଛାତ୍ରୀମାନଙ୍କ ପାଇଁ ଭିସା ଆବଶ୍ୟକତା କୋହଳ କରିବା ସକାଶେ ପ୍ରଧାନମନ୍ତ୍ରୀ ଆବେ ଘୋଷଣା କରିଛନ୍ତି ଏବଂ ଏଥିପାଇଁ ଭାରତୀୟ ଛାତ୍ରଙ୍କ ନିମନ୍ତେ ଭିସା ଆବେଦନ କେନ୍ଦ୍ର ସଂଖ୍ୟା କୋଡିଏକୁ ବୃଦ୍ଧି କରିବା ନିମନ୍ତେ ତାଙ୍କ ଇଚ୍ଛା ପ୍ରକଟ କରିଛନ୍ତି । ସେହିଭଳି ଜାପାନୀ ପର୍ଯ୍ୟଟନ ଓ ନିବେଶକାରୀଙ୍କ ସକାଶେ ଭାରତ ଆଗମନ ମାତ୍ରେ ଭିସା ପ୍ରଦାନ ଏବଂ ସେମାନଙ୍କ ଲାଗି ଭିସା ଅବଧି ୧୦ବର୍ଷ ପର୍ଯ୍ୟନ୍ତ ବୃଦ୍ଧି ସକାଶେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଘୋଷଣା ଲାଗି ପ୍ରଧାନମନ୍ତ୍ରୀ ଆବେ ତାଙ୍କୁ ଧନ୍ୟବାଦ ଜଣାଇଛନ୍ତି ।

35. ଏସିଆରେ କୁଶଳୀ ମାନବସମ୍ବଳର ଆଦାନପ୍ରଦାନର ମାତ୍ରାକୁ “ଅଭିନବ ଏସିଆ” ଉଦ୍ୟମ ମାଧ୍ୟମରେ ବୃଦ୍ଧି କରିବା ଲାଗି ଜାପାନର ନିଷ୍ପତ୍ତି ସମ୍ପର୍କରେ ପ୍ରଧାନମନ୍ତ୍ରୀ ଆବେ ସୂଚନା ପ୍ରଦାନ କରିଛନ୍ତି । ଉଭୟ ପ୍ରଧାନମନ୍ତ୍ରୀ ଆଶା ପ୍ରକଟ କରିଛନ୍ତି ଯେ ଏହି ପଦକ୍ଷେପ ମାଧ୍ୟମରେ ଭାରତୀୟ ଛାତ୍ରମାନଙ୍କୁ ଛାତ୍ରବୃତ୍ତି ସୁଯୋଗ ପାଇବାର ନୂତନ ମାର୍ଗ ମିଳିପାରିବ ଏବଂ ଏହାଦ୍ଵାରା ସେମାନେ ଅଧିକ ଅଭନବତ୍ଵର ବିକାଶ ଘଟାଇ ପାରିବେ ।

36. ଶିକ୍ଷା ସଂକ୍ରାନ୍ତ ଦ୍ଵିପାକ୍ଷିକ ଉଚ୍ଚସ୍ତରୀୟ ନୀତିଜନିତ କଥାବାର୍ତ୍ତାକୁ ସଫଳତାର ସହ ସାକାର କରାଯାଇଥିବା ହେତୁ ଉଭୟ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଛନ୍ତି ଏବଂ ଏହାକୁ ଅଧିକ ସୁଦୃଢ଼ କରିବା ନିମନ୍ତେ ଶିକ୍ଷା କ୍ଷେତ୍ରରେ ସମ୍ପର୍କକୁ ଅଧିକ ନିବିଡ କରିବା, ବିଶ୍ଵବିଦ୍ୟାଳୟ-ବିଶ୍ଵବିଦ୍ୟାଳୟ ମଧ୍ୟରେ ଆନୁଷ୍ଠାନିକ ସମ୍ପର୍କକୁ ଘନିଷ୍ଠ କରିବା ଉପରେ ଗୁରୁତ୍ଵ ଆରୋପ କରିଛନ୍ତି । ସେହିଭଳି ଶିକ୍ଷା କ୍ଷେତ୍ରରେ ଉତ୍ତମ ପ୍ରଚଳିତ ବ୍ୟବସ୍ଥା ଗ୍ରହଣ ଯଥା ଶିକ୍ଷା ମଡେଲ, ତଥା “ସାକୁରା” ବିଜ୍ଞାନ ଯୋଜନା ଜାପାନ-ଏସିଆ ଯୁବ ଆଦାନପ୍ରଦାନ କାର୍ଯ୍ୟକ୍ରମ ଉଦ୍ୟମ ଗ୍ରହଣ ଉପରେ ବିଜ୍ଞାନ କ୍ଷେତ୍ରରେ ଦୁଇ ଦେଶର ପ୍ରଧାନମନ୍ତ୍ରୀ ପ୍ରାଧାନ୍ୟ ଆରୋପ କରିଛନ୍ତି । ଏହି କାର୍ଯ୍ୟକ୍ରମ ମାଧ୍ୟମରେ ଭାରତୀୟ ଯୁବ ଛାତ୍ରଛାତ୍ରୀ ଏବଂ ଗବେଷକମାନେ ଭାରତ ଭ୍ରମଣରେ ଯାଇପାରିବେ ।

37. ଦୁଇ ଦେଶର ପ୍ରଧାନମନ୍ତ୍ରୀ କ୍ରୀଡା କ୍ଷେତ୍ରରେ ସ୍ଵାକ୍ଷରିତ ଏମଓୟୁକୁ ସ୍ଵାଗତ କରିଛନ୍ତି । ଏହି ସହଯୋଗ ରାଜିନାମା ଭାରତ ସରକାରଙ୍କ ଯୁବବ୍ୟାପାର ଓ କ୍ରୀଡା ଏବଂ ଜାପାନ ସରକାରଙ୍କ ଶିକ୍ଷା, ସଂସ୍କୃତି, କ୍ରୀଡା, ବିଜ୍ଞାନ ଓ ପ୍ରଯୁକ୍ତି ମନ୍ତ୍ରଣାଳୟ ମଧ୍ୟରେ ସ୍ଵାକ୍ଷରିତ ହୋଇଛି । ଏହା ଫଳରେ ଉଭୟ ରାଷ୍ଟ୍ରଙ୍କ ମଧ୍ୟରେ ଅଭିଜ୍ଞତା, କୌଶଳ, ଦକ୍ଷତା, ସୂଚନା ଓ ଜ୍ଞାନ ଆଦାନପ୍ରଦାନ ଘଟିପାରିବ । ବିଶେଷ କରି ୨୦୨୦ରେ ଟୋକିଓଠାରେ ଆୟୋଜିତ ହେବାକୁ ଥିବା ଅଲିମ୍ପିକ୍ସ ଏବଂ ପାରାଅଲମ୍ପିକ୍ସ କ୍ରୀଡା ଉପରେ ବିଶେଷ ଧ୍ୟାନ ଦିଆଯାଇଛି । ୨୦୨୦ ଅଲିମ୍ପିକ୍ସ ଏବଂ ପାରାଅଲିମ୍ପିକ୍ସ କ୍ରୀଡାର ସଫଳ ଆୟୋଜନ ସକାଶେ ସବୁ ପ୍ରକାର ସହଯୋଗ ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରସ୍ତାବକୁ ପ୍ରଧାନମନ୍ତ୍ରୀ ଆବେ ସ୍ଵାଗତ କରିଛନ୍ତି ।

38. ଦୁଇ ଦେଶର ପ୍ରଧାନମନ୍ତ୍ରୀ ଉଭୟ ରାଷ୍ଟ୍ର ମଧ୍ୟରେ ସମସ୍ତ ସରକାରୀ ସ୍ତରରେ, ସଂସଦ ସଦସ୍ୟଙ୍କ ମଧ୍ୟରେ, ବିଭିନ୍ନ କ୍ଷେତ୍ର ଓ ରାଜ୍ୟସ୍ତରରେ ଭାବବିନିମୟ ଓ ସମ୍ପର୍କ ସ୍ଥାପନ ଉପରେ ଗୁରୁତ୍ଵ ଆରୋପ କରିଛନ୍ତି । ଗୁଜରାଟ ରାଜ୍ୟ ସରକାର ଏବଂ ହାଇଗୋ ପ୍ରଦେଶ ମଧ୍ୟରେ ପାରସ୍ପରିକ ସହଯୋଗ ନିମନ୍ତେ ସ୍ଵାକ୍ଷରିତ ବୁଝାମଣାପତ୍ରକୁ ସେମାନେ ସ୍ଵାଗତ କରିଛନ୍ତି । ଦୁଇ ଦେଶର ଦୁଇଟି ପ୍ରାଚୀନ ସହର କିଓଟୋ ଏବଂ ବାରାଣାସୀ ମଧ୍ୟରେ ସମ୍ପର୍କର ସୂତ୍ରକୁ ମଜଭୁତ କରିବା ଏବଂ ପରସ୍ପର ମଧ୍ୟରେ ସାଂସ୍କୃତିକ ଐତିହ୍ୟର ଆଦାନପ୍ରଦାନକୁ ସେମାନେ ସ୍ଵାଗତ କରିଛନ୍ତି ।

39. ଜାପାନର ଅନ୍ତରାଷ୍ଟ୍ରୀୟ ଯୋଗ ଦିବସ ପାଳନ ପାଇଁ ବୃଦ୍ଧି ପାଉଥିବା ଆଗ୍ରହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସନ୍ତୋଷ ବ୍ୟକ୍ତ କରିଛନ୍ତି । ଭାରତର ଲବ୍ଧପ୍ରତିଷ୍ଠିତ ଯୋଗ ପ୍ରତିଷ୍ଠାନମାନଙ୍କରେ ବୃତ୍ତିଧାରୀ ଜାପାନୀ ବ୍ୟକ୍ତିବିଶେଷ ତାଲିମ ଗ୍ରହଣ କରିବା ସକାଶେ ପ୍ରଧାନମନ୍ତ୍ରୀ ଯୋଗ ଆଗ୍ରହୀମାନଙ୍କୁ ପ୍ରୋତ୍ସାହନ ଜଣାଇଛନ୍ତି ।

40. ଉଭୟ ରାଷ୍ଟ୍ରର ପ୍ରଧାନମନ୍ତ୍ରୀ ମହିଳା ସଶକ୍ତିକରଣର ଗୁରୁତ୍ଵକୁ ସ୍ଵୀକାର କରିଛନ୍ତି ଏବଂ ଏଥି ନିମନ୍ତେ ଏହି କ୍ଷେତ୍ରରେ ପାରସ୍ପରିକ ସହଯୋଗ ବୃଦ୍ଧି ତଥା ବିଶ୍ଵ ମହିଳା ସମ୍ମିଳନୀ (WAWI) ଏବଂ ଅନ୍ୟାନ୍ୟ ଆଲୋଚନାଚକ୍ର ଆଦିର ଆୟୋଜନର ଆବଶ୍ୟକତା ଉପରେ ଜୋର ଦେଇଛନ୍ତି ।

41. ଏସିଆର ଭବିଷ୍ୟତ ସମ୍ପର୍କରେ ନିଜ ନିଜର ମତ ଉପସ୍ଥାପନ ପୂର୍ବକ ଏସିଆରେ ଅହିଂସା ସହନଶୀଳତା ଏବଂ ଗଣତାନ୍ତ୍ରିକ ପରମ୍ପରାର ଭିତ୍ତିକୁ ସୁଦୃଢ଼ କରିବା ଦିଗରେ ଉଭୟ ଦେଶର ପ୍ରଧାନମନ୍ତ୍ରୀ ୨୦୧୬ରେ ଟୋକିଓଠାରେ ଅନୁଷ୍ଠିତ “ଏସିଆରେ ସମଭାବାପନ୍ନ ମୂଲ୍ୟବୋଧ ଏବଂ ଗଣତନ୍ତ୍ର” ଶୀର୍ଷକ ସଂପାନର ସଫଳ ଆୟୋଜନକୁ ସ୍ଵାଗତ କରିଛନ୍ତି ତଥା ୨୦୧୭ରେ ଅନୁଷ୍ଠିତ ହେବାକୁ ଥିବା ଆଗାମୀ ସମ୍ମିଳନୀର ସଫଳତାର ପ୍ରତ୍ୟାଶା ପ୍ରକଟ କରିଛନ୍ତି ।

ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ର ଓ ତତପରବର୍ତ୍ତୀ ଅଂଚଳରେ ନୀତିଭିତ୍ତିକ ଅନ୍ତରାଷ୍ଟ୍ରୀୟ ଶୃଙ୍ଖଳତାକୁ ସୁଦୃଢ଼ କରିବା ଦିଗରେ ମିଳିତ ଭାବେ କାର୍ଯ୍ୟ କରିବାକୁ ପ୍ରତିବଦ୍ଧତା ପ୍ରକଟ

42. ଏକବିଂଶ ଶତାଦ୍ଦୀରେ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରକୁ ଏକ ସମୃଦ୍ଧିର କ୍ଷେତ୍ରରେ ପରିଣତ କରିବା ସକାଶେ ଭାରତ ଓ ଜାପାନ ମଧ୍ୟରେ ସହଯୋଗ ଓ ସାମର୍ଥ୍ୟ ଉପରେ ଦୁଇ ଦେଶର ପ୍ରଧାନମନ୍ତ୍ରୀ ଗୁରୁତ୍ଵ ଆରୋପ କରିଛନ୍ତି । ଉଭୟ ଦେଶ ମଧ୍ୟରେ ଥିବା ସମାନ ମୂଲ୍ୟବୋଧ, ପାରସ୍ପରିକ ସ୍ଵାର୍ଥ, ପରିପୂରକ କୌଶଳ ଓ ସଂପଦରୁ ସାମର୍ଥ୍ୟ ଆହରଣ କରି ଏହି କ୍ଷେତ୍ରର ଆର୍ଥିକ ତଥା ସାମାଜିକ ବିକାଶ, ଦକ୍ଷତା ବୃଦ୍ଧି, ସଂଯୋଗୀକରଣ ଓ ଭିତ୍ତିଭୂମିର ବିକାଶ ଘଟାଇବା ଉପରେ ସେମାନେ ଜୋର ଦେଇଛନ୍ତି ।

43. ଆଫ୍ରିକାରେ ସହଯୋଗ ଓ ସହଭାଗୀତା କାର୍ଯ୍ୟକ୍ରମ ବୃଦ୍ଧି ନିମନ୍ତେ ଭାରତ-ଜାପାନ ଆଲୋଚନା ଉପରେ ଉଭୟ ପ୍ରଧାନମନ୍ତ୍ରୀ ଗୁରୁତ୍ଵ ପ୍ରଦାନ କରିଛନ୍ତି । ଏହାଦ୍ଵାରା ଉଭୟଙ୍କ ଉଦ୍ୟମ ଓ କାର୍ଯ୍ୟକ୍ରମମାନଙ୍କ ମଧ୍ୟରେ ସମନ୍ୱୟ ରକ୍ଷା କରାଯାଇପାରିବ ଓ ମିଳିତ ଭାବେ ପ୍ରକଳ୍ପ କାର୍ଯ୍ୟାନ୍ୱୟନ ଉଦ୍ୟମରେ ଉଭୟ ରାଷ୍ଟ୍ର ହାତ ମିଳାଇପାରିବେ । ଫଳରେ, ଏହିସବୁ କ୍ଷେତ୍ରରେ ତାଲିମ ଓ ଦକ୍ଷତା ବୃଦ୍ଧି, ସ୍ଵାସ୍ଥ୍ୟସେବା, ଭିତ୍ତିଭୂମି ଓ ସଂଯୋଗୀକରଣ ଆଦି କ୍ଷେତ୍ରରେ କାର୍ଯ୍ୟକ୍ରମକୁ ତ୍ଵରାନ୍ୱିତ କରିହେବ । ଏହି ପରିପ୍ରେକ୍ଷୀରେ ସେମାନେ ମିଳିତ ଭାବେ ଏବଂ ସହଯୋଗ ଭିତ୍ତିରେ ଅନ୍ତରାଷ୍ଟ୍ରୀୟ ସମୁଦାୟଙ୍କ ସହ କାର୍ଯ୍ୟ କରିବା ନିମନ୍ତେ ସହମତ ହୋଇଛନ୍ତି । ଏହାଦ୍ଵାରା ଏସିଆ ଓ ଆଫ୍ରିକାରେ ଶିଳ୍ପ କରିଡରର ବିକାଶ ଏବଂ ଶିଳ୍ପ ନେଟୱାର୍କ ବୃଦ୍ଧି ପାଇବ ।

44. ଦକ୍ଷିଣ ଏସିଆ ଏବଂ ପ୍ରତିବେଶୀ କ୍ଷେତ୍ରରେ ଶାନ୍ତି ଓ ସମୃଦ୍ଧିର ବାତାବରଣ ବୃଦ୍ଧି ଘେନି ଦୁଇ ଦେଶ ମଧ୍ୟରେ ସହଯୋଗର ସମ୍ଭାବନାକୁ ଉଭୟ ରାଷ୍ଟ୍ରର ପ୍ରଧାନମନ୍ତ୍ରୀ ଦ୍ଵୟ ସ୍ଵାଗତ କରିଛନ୍ତି । ଏଥି ମଧ୍ୟରେ ଇରାନ ଓ ଆଫଗାନିସ୍ତାନ ଆଦି ରାଷ୍ଟ୍ର ସାମିଲ । ଏଥି ନିମନ୍ତେ ଦ୍ଵିପାକ୍ଷିକ ଏବଂ ତ୍ରିପାକ୍ଷିକ ସହଯୋଗ ସମେତ, ଚାବାହାରକୁ ସଂଯୋଗ ଓ ଏହାର ଭିତ୍ତିଭୂମି ବିକାଶ ଉପରେ ସେମାନେ ଗୁରୁତ୍ଵ ଆରୋପ କରିଛନ୍ତି । ଏଭଳି ସହଯୋଗ ନିମନ୍ତେ ଯଥାଶୀଘ୍ର ବିସ୍ତୃତ ଖସଡା ପ୍ରସ୍ତୁତ ଲାଗି ସେମାନେ ନିଜ ନିଜ ରାଷ୍ଟ୍ରର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ।

45. ଜାପାନ, ଭାରତ ଓ ଯୁକ୍ତରାଷ୍ଟ୍ର ଆମେରିକା ମଧ୍ୟରେ ତ୍ରିପାକ୍ଷିକ ଆଲୋଚନା ଅନୁଷ୍ଠିତ କରାଯିବାକୁ ଉଭୟ ପ୍ରଧାନମନ୍ତ୍ରୀ ସ୍ଵାଗତ କରିଛନ୍ତି । HA/HR କ୍ଷେତ୍ରୀୟ ସଂଯୋଗୀକରଣ ଏବଂ ସାମୁଦ୍ରିକ ସୁରକ୍ଷା ଓ ନିରାପତ୍ତା ଆଦି କ୍ଷେତ୍ରରେ ସହଯୋଗ ଓ ସମନ୍ୱୟ ରକ୍ଷା ବ୍ୟବସ୍ଥାର ସୁଦୃଢ଼ୀକରଣ ଉପରେ ସେମାନେ ଜୋର ଦେଇଛନ୍ତି । ସେହିଭଳି ଜାପାନ, ଭାରତ ଓ ଅଷ୍ଟ୍ରେଲିଆ ମଧ୍ୟରେ ଜାରି ରହିଥିବା ଘନିଷ୍ଠ ଆଲୋଚନା ଓ ସହଯୋଗକୁ ଦୁଇ ପ୍ରଧାନମନ୍ତ୍ରୀ ସ୍ଵାଗତ କରିଛନ୍ତି ।

46. ପୂର୍ବ ଏସିଆ ସମ୍ମିଳନୀ (EAS) ପ୍ରକ୍ରିୟାର ସୁଦୃଢ଼ୀକରଣ ଉଦ୍ୟମ ଓ ଏ ଦିଗରେ ଘଟିଥିବା ପ୍ରଗତିକୁ ଉଭୟ ରାଷ୍ଟ୍ର ପକ୍ଷରୁ ସ୍ଵାଗତ କରାଯାଇଛି । କ୍ଷେତ୍ରୀୟ ରାଜନୈତିକ, ଅର୍ଥନୈତିକ ଓ ନିରାପତ୍ତା ପ୍ରସଙ୍ଗରେ ଏହା ଏକ ପ୍ରମୁଖ ଅନୁଷ୍ଠାନ ହୋଇଥିବାରୁ ଦୁଇ ଦେଶର ପ୍ରଧାନମନ୍ତ୍ରୀ ଏହି ସମ୍ମିଳନୀକୁ ଅଧିକ ସକାରାତ୍ମକ ଭାବେ ସଫଳ କରାଇବାକୁ ମିଳିତ ଭାବେ କାର୍ଯ୍ୟ କରିବାକୁ ସ୍ଥିର କରିଛନ୍ତି । ଏହି ପରିପ୍ରେକ୍ଷୀରେ ସେମାନେ ଜାକର୍ତ୍ତାଠାରେ EAS ରାଷ୍ଟ୍ରଦୂତ (ପ୍ରତିନିଧି) ସ୍ତରୀୟ ବୈଠକ ଆହ୍ଵାନକୁ ସ୍ଵାଗତ କରିଛନ୍ତି । ସେହିଭଳି ଏସିଆନ ସଚିବାଳୟ ମଧ୍ୟରେ ଇଏଏସ ୟୁନିଟ ଗଠନକୁ ମଧ୍ୟ ସ୍ଵାଗତ କରାଯାଇଛି ।

47. ଏସିଆନ ନେତୃତ୍ଵାଧୀନ ଫୋରମ ସହଯୋଗ ମାଧ୍ୟମରେ କ୍ଷେତ୍ରୀୟ ସଂଗଠନର ବିକାଶ ଏବଂ ଏହାର ସୁଦୃଢ଼ୀକରଣ କରାଯିବା ନିମନ୍ତେ ଉଭୟ ପ୍ରଧାନମନ୍ତ୍ରୀ ସେମାନଙ୍କ ଇଚ୍ଛାପ୍ରକଟ କରିଛନ୍ତି । ଏଭଳି ସଂଗଠନ ମଧ୍ୟରେ ASEAN କ୍ଷେତ୍ରୀୟ ଫୋରମ, ASEAN ପ୍ରତିରକ୍ଷା ମନ୍ତ୍ରୀ ବୈଠକ, ପରିବର୍ଦ୍ଧିତ ASEAN ସାମୁଦ୍ରିକ ଫୋରମ ସାମିଲ ଏବଂ ସାମୁଦ୍ରିକ ସୁରକ୍ଷା, ଆତଙ୍କବାଦ ଓ ହିଂସାତ୍ମକ ଉଗ୍ରବାଦ, ତଥା ଜଳବାୟୁ ପରିବର୍ତ୍ତନ ଭଳି କ୍ଷେତ୍ରୀୟ ଓ ବୈଶ୍ୱିକ ଚାଲେଞ୍ଜର ମୁକାବିଲା ସକାଶେ ଏହି ସବୁ ସଂଗଠନ ଗ୍ରହଣ କରୁଥିବା କାର୍ଯ୍ୟାବଳୀ ପ୍ରଣୀଧାନଯୋଗ୍ୟ ।
48. ଏଭଳି କ୍ଷେତ୍ରୀୟ ଓ ତ୍ରିପାକ୍ଷିକ ଆଲୋଚନା ବ୍ୟବସ୍ଥାକୁ ଆହୁରି ବଢ଼ାଇବା ସକାଶେ ସେମାନେ ନିଜର ଦୃଢ଼ ଆଶା ପୋଷଣ କରିଛନ୍ତି ଯାହାକି ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ସନ୍ତୁଳିତ, ମୁକ୍ତ, ସମାବେଶୀ, ସ୍ଥିର, ସ୍ଵଚ୍ଛ ତଥା ବିଧି ଉପରେ ଆଧାରିତ ଅର୍ଥନୈତିକ, ରାଜନୈତିକ ଓ ନିରାପତ୍ତା ବ୍ୟବସ୍ଥା ଗଠନ କରିପାରିବ ।

49. ଉଭୟ ପ୍ରଧାନମନ୍ତ୍ର କୌଣସି ଆକାର ଓ ପ୍ରକାର ଆତଙ୍କବାଦକୁ ଦୃଢ଼ ସ୍ଵରରେ ନିନ୍ଦା କରିଛନ୍ତି ଏବଂ ଏହାକୁ କୌଣସି ଭାବେ ସହ୍ୟ କରାଯିବ ନାହିଁ (Zero Tolerance) ବୋଲି ସେମାନଙ୍କର ପ୍ରତିବଦ୍ଧତା ପ୍ରକଟ କରିଛନ୍ତି । ଗଭୀର ଉଦବେଗ ସହ ସେମାନେ ଆତଙ୍କବାଦ ଓ ଭୟଙ୍କର ଉଗ୍ରବାଦ ଏବଂ ଏହାର ଜାଗତିକ ବ୍ୟାପ୍ତିର କୁପ୍ରଭାବ ଘେନି ଉଦବେଗ ପ୍ରକଟ କରିଛନ୍ତି । ଢ଼ାକା ଓ ଉରି ସମେତ ଉଭୟ ରାଷ୍ଟ୍ରରେ ନିକଟ ଅତୀତରେ ଆତଙ୍କବାଦୀ କାଣ୍ଡରେ ପ୍ରାଣ ହରାଇଥିବା ବ୍ୟକ୍ତି ବିଶେଷଙ୍କ ପରିବାରବର୍ଗଙ୍କ ପ୍ରତି ସେମାନେ ସମବେଦନା ବ୍ୟକ୍ତ କରିଛନ୍ତି । ଏହି ପରିପ୍ରେକ୍ଷୀରେ ଆତଙ୍କାବାଦୀ ତତ୍ତ୍ଵଙ୍କୁ ଅସିଦ୍ଧ ଘୋଷଣା କରିବା ସକାଶେ ଜାତିସଂଘ ନିରାପତ୍ତା ପରିଷଦର ପ୍ରସ୍ତାବ ୧୨୬୭ ଏବଂ ତତସଂକ୍ରାନ୍ତ ଅନ୍ୟ ପ୍ରସ୍ତାବଗୁଡିକୁ ଯଥାଶୀଘ୍ର ଗୃହୀତ କରାଇବା ସକାଶେ ସେମାନେ ସମସ୍ତ ରାଷ୍ଟ୍ରଙ୍କୁ ଆହ୍ଵାନ ଜଣାଇଛନ୍ତି । ସେହିଭଳି ଆତଙ୍କବାଦୀମାନଙ୍କ ନିରାପଦ ଆଶ୍ରୟସ୍ଥଳୀ ଏବଂ ସେମାନଙ୍କ ସଂଗଠନଗୁଡିକୁ ଧ୍ଵଂସ କରିବା, ଆତଙ୍କବାଦୀ ନେଟୱାର୍କକୁ ପ୍ରତିହତ କରିବା, ସେମାନେ ଅର୍ଥ ହାସଲ କରୁଥିବା ସମସ୍ତ ମାର୍ଗକୁ ବନ୍ଦ କରିବା, ସୀମାପାର ଆତଙ୍କବାଦୀ ଚଳପ୍ରଚଳକୁ ସବୁ ମତେ ରୋକିବା ନିମନ୍ତେ ମିଳିତ ଭାବେ କାର୍ଯ୍ୟ କରିବାକୁ ଉଭୟ ନେତା ସମସ୍ତ ରାଷ୍ଟ୍ରଙ୍କୁ ଆହ୍ଵାନ ଜଣାଇଛନ୍ତି । ଅନ୍ତରାଷ୍ଟ୍ରୀୟ ଆତଙ୍କବାଦର ମୁକାବିଲା ଲାଗି ସମସ୍ତ ରାଷ୍ଟ୍ରଙ୍କ ସହଯୋଗର ଆବଶ୍ୟକତା ଉପରେ ଗୁରୁତ୍ଵ ଆରୋପ କରି ସେମାନେ ଯେ କୌଣସି ରାଷ୍ଟ୍ରରୁ ଉତ୍ପନ୍ନ ଆତଙ୍କବାଦର ମୂଳୋତ୍ପାଟନ ଜରୁରୀ ବୋଲି ସେମାନେ ମତପୋଷଣ କରିଛନ୍ତି । ଆତଙ୍କବାଦ ଏବଂ ଭୟଙ୍କର ଉଗ୍ରବାଦର ଦମନ ନିମନ୍ତେ ଅନ୍ତରାଷ୍ଟ୍ରୀୟ ସ୍ତରରେ ଘନିଷ୍ଠ ସହଯୋଗ, ସୂଚନା ଓ ଗୁଇନ୍ଦା ତଥ୍ୟର ଆଦାନପ୍ରଦାନ ଉପରେ ସେମାନେ ଜୋର ଦେଇଛନ୍ତି । ଆତଙ୍କବାଦ ନିରୋଧ ଘେନି ଜାରି ରହିଥିବା ଦ୍ଵିପାକ୍ଷିକ ଆଲୋଚନା ଉପରେ ଦୁଇ ପ୍ରଧାନମନ୍ତ୍ରୀ ପ୍ରାଧାନ୍ୟ ଦେଇ କହିଛନ୍ତି ଯେ ଉଭୟ ପକ୍ଷ ଏ ଦିଗରେ ଅଧିକ ସୂଚନା ଓ ଗୁଇନ୍ଦା ତଥ୍ୟ ଆଦାନପ୍ରଦାନ କରିବେ । ଏହି ପରିପ୍ରେକ୍ଷୀରେ ୨୦୦୮ ମସିହା ନଭେମ୍ବରରେ ମୁମ୍ବାଇ ଆତଙ୍କବାଦୀ ଆକ୍ରମଣ ଏବଂ ୨୦୧୬ରେ ପଠାଣକୋଟ ଆକ୍ରମଣର ସୂତ୍ରଧର ଆତଙ୍କବାଦୀମାନଙ୍କ ପ୍ରତି ଯଥାଶୀଘ୍ର ଶାସ୍ତିବିଧାନ କରିବା ସକାଶେ ସେମାନେ ପାକିସ୍ତାନକୁ ଆହ୍ଵାନ ଜଣାଇଛନ୍ତି ।

50. ବୈଶ୍ୱିକ ସାର୍ବଜନିନ କ୍ଷେତ୍ର ଯଥା ସାମୁଦ୍ରିକ, ମହାଶୂନ୍ୟ ଏବଂ ସାଇବର କ୍ଷେତ୍ରର ସୁରକ୍ଷା ଦିଗରେ ଘନିଷ୍ଠ ସହଯୋଗ ଭିତ୍ତିରେ କାର୍ଯ୍ୟ କରିବାକୁ ଉଭୟ ପ୍ରଧାନମନ୍ତ୍ରୀ ସେମାନଙ୍କ ପ୍ରତିବଦ୍ଧତା ପ୍ରକଟ କରିଛନ୍ତି ।

51. ଉଭୟ ପ୍ରଧାନମନ୍ତ୍ରୀ ଜାହାଜ ଏବଂ ବିମାନ ଚଳାଚଳର ସ୍ଵାଧୀନତା ପ୍ରତି ସମ୍ମାନ ପ୍ରଦର୍ଶନ ନିମନ୍ତେ ନିଜର ପ୍ରତିବଦ୍ଧତା ପ୍ରକଟ କରିଛନ୍ତି । ସେହିଭଳି ଅପ୍ରତିହିତ ଆଇନସିଦ୍ଧ ବାଣିଜ୍ୟ କାରବାର ଯାହାକି ଆନ୍ତର୍ଜାତୀୟ ଆଇନ ଦୃଷ୍ଟିରୁ ସିଦ୍ଧ ଏବଂ ମିଳିତ ଜାତିସଂଘର ସାମୁଦ୍ରିକ ଆଇନ ପରିସରଭୁକ୍ତ (UNCLOS) ସେଥିପ୍ରତି ଉଭୟପକ୍ଷ ସେମାନଙ୍କର ସମର୍ଥନ ଓ ସହଯୋଗ ଜାରି ରଖିବେ । ଏହି ପରିପ୍ରେକ୍ଷୀରେ, କୌଣସି ପ୍ରକାର ଧମକ ପ୍ରଦାନର ପନ୍ଥା ଅନୁସରଣ ଅଥବା ବଳପ୍ରୟୋଗ ନକରି ଏବଂ ସେମାନଙ୍କର ଆଚରଣରେ ସବୁ ପ୍ରକାର ଆତ୍ମସଂଯମ ଅନୁସରଣ ଓ ସମସ୍ତ ପ୍ରକାର ଏକପକ୍ଷୀୟ କାର୍ଯ୍ୟାନୁଷ୍ଠାନ ଗ୍ରହଣ ଯାହାକି ଉତ୍ତେଜନା ବୃଦ୍ଧି ଦିଗରେ ସହାୟକ ହେବ ସେପରି ପନ୍ଥା ଅବଲମ୍ବନ ନକରିବାକୁ ସମସ୍ତପକ୍ଷଙ୍କୁ ଆହ୍ଵାନ ଜଣାଇଛନ୍ତି। UNCLOS ର ରାଷ୍ଟ୍ର ପକ୍ଷର ନେତୃତ୍ଵ ବହନ କାରଣରୁ, ଦୁଇ ପ୍ରଧାନମନ୍ତ୍ରୀ ସେମାନଙ୍କର ମତକୁ ପୁନର୍ବାର ଦୋହରାଇଛନ୍ତି ଯେ UNCLOS ପ୍ରତି ସମସ୍ତପକ୍ଷ ସର୍ବୋଚ୍ଚ ସମ୍ମାନ ପ୍ରଦର୍ଶନ କରିବା ଉଚିତ । ଏହି ନିୟମ ସମୁଦ୍ର ଏବଂ ମହାସାଗରୀୟ କ୍ଷେତ୍ରରେ ଅନ୍ତରାଷ୍ଟ୍ରୀୟ ଆଇନଗତ ଶୃଙ୍ଖଳା ରକ୍ଷା କରିଥାଏ । ଦକ୍ଷିଣ ଚୀନ ସାଗର ପରିପ୍ରେକ୍ଷୀରେ, ଶାନ୍ତିପୂର୍ଣ୍ଣ ଉପାୟରେ ବିବାଦ ସମାଧାନର ଗୁରୁତ୍ଵ ଉପରେ ଦୁଇ ପ୍ରଧାନମନ୍ତ୍ରୀ ଜୋର ଦେଇଛନ୍ତି । ଏଭଳି ସମାଧାନ UNCLOS ସମେତ ସର୍ବଜନ ସ୍ଵୀକୃତ ଅନ୍ତରାଷ୍ଟ୍ରୀୟ ଆଇନ ଓ ନିୟମାବଳୀ ଅନୁସାରେ ହେବା ଆବଶ୍ୟକ ।

52. ଉଭୟ ପ୍ରଧାନମନ୍ତ୍ରୀ ଉତ୍ତର କୋରିଆର କ୍ରମାଗତ ଆଣବିକ ଅସ୍ତ୍ରଶସ୍ତ୍ରର ବିକାଶ ଏବଂ ବାଲିଷ୍ଟିକ କ୍ଷେପଣାସ୍ତ୍ର କାର୍ଯ୍ୟକ୍ରମକୁ ଦୃଢ଼ ସ୍ଵରରେ ନିନ୍ଦା କରିଛନ୍ତି । ଏଥିସହ ସେମାନେ ଉତ୍ତର କୋରିଆର ୟୁରାନିଅମ ସମ୍ବର୍ଦ୍ଧନ କାର୍ଯ୍ୟକଳାପକୁ ନାପସନ୍ଦ କରିବା ସହ ଅଧିକ ଉତ୍ତେଜନା ସୃଷ୍ଟିରୁ ନିବୃତ ରହିବାକୁ ସେହି ରାଷ୍ଟ୍ରକୁ ପରାମର୍ଶ ଦେଇଛନ୍ତି । ଏଥିସହ ଆନ୍ତର୍ଜାତିକ ସ୍ତରରେ ନିଜର ଦାୟିତ୍ଵବୋଧ ଓ ପ୍ରତିବଦ୍ଧତା ପାଳନ କରିବା ତଥା ଜାତିସଂଘ ନିରାପତ୍ତା ପରିଷଦ ଦ୍ୱାରା ଗୃହୀତ ସଂପୃକ୍ତ ପ୍ରସ୍ତାବାବଳୀକୁ ମାନିବା ଓ କୋରିଆ ଉପଦ୍ଵୀପ କ୍ଷେତ୍ରକୁ ପରମାଣୁମୁକ୍ତ କରିବା ଦିଗରେ କାର୍ଯ୍ୟ କରିବାକୁ ପରାମର୍ଶ ଦେଇଛନ୍ତି । ଏହି କ୍ଷେତ୍ରପ୍ରତି ପରମାଣରୁ ଅସ୍ତ୍ର ପ୍ରସାର ସୃଷ୍ଟି କରୁଥିବା ବିପଦ ବିରୋଧରେ କାର୍ଯ୍ୟାନୁଷ୍ଠାନ ଦିଗରେ ସହଯୋଗ କରିବା ନିମନ୍ତେ ଉଭୟ ପ୍ରଧାନମନ୍ତ୍ରୀ ସେମାନଙ୍କ ପ୍ରତିବଦ୍ଧତା ଦୋହରାଇଛନ୍ତି । ଅନ୍ୟପକ୍ଷରେ ସେମାନେ ଅଟକ ରଖିଥିବା ବିଦେଶୀ ନାଗରିକଙ୍କ ମୁକ୍ତି ପ୍ରସଙ୍ଗର ତୁରନ୍ତ ସମାଧାନ ଲାଗି ଉତ୍ତର କୋରିଆକୁ ପରାମର୍ଶ ଦେଇଛନ୍ତି ।

53. ଏହି କ୍ଷେତ୍ରରେ ଶାନ୍ତି, ସ୍ଥିରତା ଓ ସମୃଦ୍ଧି ନିମନ୍ତେ ଜାପାନର ପୁନଃଉଦ୍ୟମ ଏବଂ ଏଥିସହ “ଶାନ୍ତି କାଏମ ରଖିବା ଦିଗରେ ସକାରାତ୍ମକ ଅବଦାନ” ପ୍ରୟାସ ଆଦି ସମ୍ପର୍କରେ ପ୍ରଧାନମନ୍ତ୍ରୀ ଆବେ ପ୍ରଧାନମନ୍ତ୍ରୀ ମୋଦୀଙ୍କୁ ଅବଗତ କରାଇଛନ୍ତି । କ୍ଷେତ୍ରୀୟ ଏବଂ ବୈଶ୍ୱିକ ସ୍ଥିରତା ରକ୍ଷା ଏବଂ ସମୃଦ୍ଧି ଦିଗରେ ଜାପାନର ସକାରାତ୍ମକ ଅବଦାନକୁ ପ୍ରଧାନମନ୍ତ୍ରୀ ଶ୍ରୀ ମୋଦୀ ଗ୍ରହଣ  ପୂର୍ବକ ପ୍ରଶଂସା କରିଛନ୍ତି ।

54. ଉଭୟ ପ୍ରଧାନମନ୍ତ୍ରୀ ମିଳିତ ଜାତିସଂଘ ବ୍ୟବସ୍ଥାରେ ତୁରନ୍ତ ସଂସ୍କାର ଘଟାଇବା ସହ ମିଳିତ ଜାତିସଂଘ ନିରାପତ୍ତା ପରିଷଦକୁ ଅଧିକ ଯଥାର୍ଥ, ସକ୍ରିୟ ଏବଂ ପ୍ରତିନିଧିମୂଳକ କରିବା, ଏକବିଂଶ ଶତାଦ୍ଦୀର ସାଂପ୍ରତିକ ବାସ୍ତବତା ପ୍ରତି ଅଧିକ ଗୁରୁତ୍ଵର ସହ ଧ୍ୟାନ ଦେବା ନିମନ୍ତେ ଏବଂ ଏହି ଲକ୍ଷ୍ୟ ହାସଲ ସକାଶେ ସମଭାବାପନ୍ନ ସହଭାଗୀଙ୍କ ସହ ଘନିଷ୍ଠ ଭାବେ ମିଶି କାର୍ଯ୍ୟକରିବାକୁ ନିଜ ନିଜର ପ୍ରତିବଦ୍ଧତାକୁ ଦୋହରାଇଛନ୍ତି । ମିଳିତ ଜାତିସଂଘ ନିରାପତ୍ତା ପରିଷଦରେ ସଂସ୍କାର କଳ୍ପେ “ବନ୍ଧୁ ଗୋଷ୍ଠୀ” (Group of Friends) ଗଠନକୁ ସେମାନେ ସ୍ଵାଗତ ଜଣାଇଛନ୍ତି । ଯାହାକି ଏବେ ଜାରି ରହିଥିବା ଆନ୍ତଃ-ସରକାରସ୍ତରୀୟ ବିଚାର ବିମର୍ଷକୁ ପ୍ରୋତ୍ସାହନ ପ୍ରଦାନ କରିବ । ଏଥିସହ ଲିଖିତ ଓ ଆନୁଷ୍ଠାନିକ କଥାବାର୍ତ୍ତା ଦିଗରେ ଯଥେଷ୍ଟ ମାତ୍ରାରେ ପ୍ରୋତ୍ସାହନ ଯୋଗାଇବ । ଉଭୟ ପ୍ରଧାନମନ୍ତ୍ରୀ ପ୍ରତ୍ୟେକ ପକ୍ଷଙ୍କ ପ୍ରାର୍ଥୀତ୍ଵକୁ ସମର୍ଥନ କରିବା ଲାଗି ପ୍ରତିବଦ୍ଧତା ପ୍ରକଟ କରିଛନ୍ତି ଯାହାକି ଉଭୟପକ୍ଷଙ୍କ ସହମତି ଉପରେ ଆଧାରିତ ଯେ ମିଳିତ ଜାତିସଂଘ ନିରାପତ୍ତା ପରିଷଦରେ ସ୍ଥାୟୀ ସଦସ୍ୟ ପଦ ହାସଲ ନିମନ୍ତେ ଉଭୟ ଭାରତ ଓ ଜାପାନର ପ୍ରାର୍ଥୀତ୍ଵ ଯଥାର୍ଥ ଓ ଯୁକ୍ତିଯୁକ୍ତ ।

55. ଭାରତକୁ ସର୍ବବୃହତ ଗଣତନ୍ତ୍ର ଭାବେ ସ୍ଵୀକାରପୂର୍ବକ ଏବଂ ଏସିଆ-ପ୍ରଶାନ୍ତ ମହାସାଗରୀୟ କ୍ଷେତ୍ରର ଏକ ଦ୍ରୁତ ପ୍ରଗତିଶୀଳ ବିଶାଳ ଅର୍ଥବ୍ୟବସ୍ଥା ଭାବେ ଗ୍ରହଣ କରେ, APECର ସଦସ୍ୟ ପଦ ନିମନ୍ତେ ଭାରତର ପ୍ରାର୍ଥୀତ୍ଵକୁ ଜାପାନ ଦୃଢ଼ଭାବେ ସମର୍ଥନ କରେ । ଦୁଇ ଦେଶର ପ୍ରଧାନମନ୍ତ୍ରୀ ଏସିଆ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ବାଣିଜ୍ୟ ଓ ନିବେଶ ଉଦାରୀକରଣ ଓ ପ୍ରସାର ଦିଗରେ କାର୍ଯ୍ୟ କରିବାକୁ ସହମତ ହୋଇଛନ୍ତି । ଏଥି ନିମନ୍ତେ ସେମାନେ ଏକ ଅତ୍ୟାଧୁନିକ, ବିସ୍ତୃତ, ଉଚ୍ଚଗୁଣାତ୍ମକ ଏବଂ ପାରସ୍ପରିକ ଲାଭପ୍ରଦ ଏକ “କ୍ଷେତ୍ରୀୟ ବିସ୍ତୃତ ଆର୍ଥିକ ସହଭାଗୀତା (RCEP) ରାଜିନାମା” ସ୍ଵାକ୍ଷର ଦିଗରେ ସେମାନଙ୍କ ସହଯୋଗ ଜ୍ଞାପନ ପ୍ରତିବଦ୍ଧତା ପ୍ରକଟ କରିଛନ୍ତି । ଦୁଇ ପ୍ରଧାନମନ୍ତ୍ରୀ ବାଣିଜ୍ୟ ସରଳୀକରଣ ଓ ସୁଗମ ବ୍ୟବସ୍ଥା ପ୍ରଚଳନ ନିମନ୍ତେ ନିଷ୍ପତ୍ତି ଗ୍ରହଣ କରିଛନ୍ତି ଯାହା WTO ର ବାଣିଜ୍ୟ ସୁଗମନ ରାଜିନାମା ଏବଂ ଦ୍ରବ୍ୟ ଓ ସେବା ବାଣିଜ୍ୟ ପରିବର୍ଦ୍ଧନ ମାଧ୍ୟମରେ ସାକାର ହୋଇପାରିବ । ଏବଂ ଏହାଦ୍ୱାରା ଏସିଆ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ନିବେଶ ପରିମାଣ ବୃଦ୍ଧିପାଇବ । ଉଭୟ ଦେଶର ପ୍ରଧାନମନ୍ତ୍ରୀ ଇସ୍ପାତ ଶିଳ୍ପର ମାତ୍ରାଧିକ କ୍ଷମତା ଦୃଷ୍ଟିରୁ ଯୋଗାଯୋଗ ସଂପ୍ରସାରଣ ଏବଂ ସହଯୋଗର ଗୁରୁତ୍ଵକୁ ହୃଦୟଙ୍ଗମ କରିଛନ୍ତି । ତେଣୁ ଚଳିତ ବର୍ଷ G-20 ନେତୃବର୍ଗଙ୍କ ଦ୍ୱାରା ଦିଆଯାଇଥିବା ଆହ୍ଵାନ ଅନୁସାରେ ଇସ୍ପାତର ଆଧିକ୍ୟ କ୍ଷମତା ନିମନ୍ତେ ଏକ “ଗ୍ଲୋବାଲ ଫୋରମ” ଗଠନ ଉପରେ ଗୁରୁତ୍ଵାରୋପ କରିଛନ୍ତି ।

56. ଦୁଇ ପ୍ରଧାନମନ୍ତ୍ରୀ ଆଣବିକ ଅସ୍ତ୍ରଶସ୍ତ୍ରର ସମ୍ପୂର୍ଣ୍ଣ ବିଲୋପ ପ୍ରତି ସେମାନଙ୍କର ସହଭାଗୀ ପ୍ରତିବଦ୍ଧତା ପୁନଃପ୍ରକଟ କରିଛନ୍ତି । ବିସ୍ତୃତ ଆଣବିକ ପରୀକ୍ଷଣ ନିଷେଧ ଚୁକ୍ତିନାମା (CTBT)କୁ ତୁରନ୍ତ କାର୍ଯ୍ୟକାରୀ କରାଯିବାର ଗୁରୁତ୍ଵ ଉପରେ ପ୍ରଧାନମନ୍ତ୍ରୀ ଆବେ ଜୋର ଦେଇଛନ୍ତି । ଉଭୟ ନେତା ଫିଜାଇଲ ମେଟେରିଆଲ କଟ ଅଫ ଟ୍ରିଟି (FMCT)କୁ ସାନୁନ ଘୋଷଣାନାମା ଅନୁସାରେ କୌଣସି-ପକ୍ଷପାତିତା ବିନା, ପାରସ୍ପରିକ ଏବଂ ବୈଶ୍ୱିକ ତଥା ସଫଳତାର ସହ ଯାଂଚ କରାଯିବା ଦିଗରେ ତୁରନ୍ତ ଆଲୋଚନା ଶେଷ ଏବଂ ଏହାର ତତ୍କାଳ ପ୍ରବର୍ତ୍ତନ ଉପରେ ଗୁରୁତ୍ଵାରୋପ କରିଛନ୍ତି । ସେହିଭଳି ଆଣବିକ ପ୍ରସାର ଓ ଆଣବିକ ଆତଙ୍କବାଦ ବିପଦର ମୁକାବିଲା ସକାଶେ ଅନ୍ତରାଷ୍ଟ୍ରୀୟ ସହଯୋଗକୁ ମଜଭୁତ କରିବା ଦିଗରେ ସେମାନେ ନିଜର ପ୍ରତିବଦ୍ଧତା ଜଣାଇଛନ୍ତି ।

57. ଉଭୟ ପ୍ରଧାନମନ୍ତ୍ରୀ ଜାତୀୟ ରପ୍ତାନୀ ନିୟନ୍ତ୍ରଣ ବ୍ୟବସ୍ଥାର ସକ୍ରିୟ ପରିଚାଳନାର ଗୁରୁତ୍ଵକୁ ସ୍ଵୀକାର କରିଛନ୍ତି । ନିକଟରେ କ୍ଷେପଣାସ୍ତ୍ର ପ୍ରଯୁକ୍ତି ନିୟନ୍ତ୍ରଣ ବ୍ୟବସ୍ଥା (MTCR)ରେ ଭାରତର ପ୍ରବେଶକୁ ଜାପାନ ସ୍ଵାଗତ ଜଣାଇଛି । ସେହିଭଳି The Hague Code of Conduct aganist Ballistic Missile Proliferation (HCOC) ରେ ଭାରତର ସଦସ୍ୟତାକୁ ଜାପାନ ସ୍ଵାଗତ ଜଣାଇଛି । ସେହିଭଳି ଏହାର ରପ୍ତାନି ନିୟନ୍ତ୍ରଣ ବ୍ୟବସ୍ଥା ଘେନି ଭାରତର ସକ୍ରିୟ କାର୍ଯ୍ୟାନୁଷ୍ଠାନକୁ ଜାପାନ ପ୍ରଶଂସା କରିଛି । ଅବଶିଷ୍ଟ ତିନିଗୋଟି ରପ୍ତାନି ନିୟନ୍ତ୍ରଣ ବ୍ୟବସ୍ଥା : ଆଣବିକ ଯୋଗାଣକାରୀ ଗୋଷ୍ଠୀ (NSG), ୱାସେନର ବ୍ୟବସ୍ଥା ଓ ଅଷ୍ଟ୍ରେଲିଆ ଗୋଷ୍ଠୀ, ଯାହାକି ଅନ୍ତରାଷ୍ଟ୍ରୀୟ ସ୍ତରରେ ଅଣୁଅସ୍ତ୍ର ଅପ୍ରସାର ଉଦ୍ୟମ ଲାଗି କାର୍ଯ୍ୟରତ, ସେଥିରେ ଭାରତ ସଦସ୍ୟ ଭାବେ ସ୍ଥାନ ପାଇବା ଦିଗରେ ମିଳିତ ଭାବେ ପ୍ରୟାସ ଜାରି ରଖିବା ନିମନ୍ତେ ଦୁଇ ପ୍ରଧାନମନ୍ତ୍ରୀ ଅଙ୍ଗୀକାରବଦ୍ଧ ।

ଉପସଂହାର

58. ଜାପାନର ଉଷ୍ମ ଓ ଭବ୍ୟ ଆତିଥ୍ୟ ନିମନ୍ତେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାପାନ ସରକାର ଓ ସେ ଦେଶବାସୀଙ୍କୁ ଧନ୍ୟବାଦ ଜଣାଇଛନ୍ତି ଏବଂ ପରବର୍ତ୍ତୀ ବୈଠକ ଲାଗି ଉଭୟପକ୍ଷଙ୍କ ନିମନ୍ତେ ଗ୍ରହଣୀୟ ହେବା ଭଳି ଏକ ସମୟରେ ଭାରତ ଗସ୍ତରେ ଆସିବାପାଇଁ ସାଦର ନିମନ୍ତ୍ରଣ ଜଣାଇଛନ୍ତି । ପ୍ରଧାନମନ୍ତ୍ରୀ ଶ୍ରୀ ଆବେ ଏହି ନିମନ୍ତ୍ରଣକୁ ପ୍ରଶଂସା ପୂର୍ବକ ସାଦରେ ଗ୍ରହଣ କରିଛନ୍ତି ।

**********