ପିଏମଇଣ୍ଡିଆ

୨୦୨୫ ଜାନୁଆରୀ ୩ ତାରିଖ ମଧ୍ୟାହ୍ନ ପ୍ରାୟ ୧୨ଟା ୧୦ ବେଳକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦିଲ୍ଲୀ ଅଶୋକ ବିହାରସ୍ଥିତ ସ୍ୱାଭିମାନ ଆପାର୍ଟମେଣ୍ଟର ଇନ-ସିଟୁ ସ୍ଲମ ରିହାବିଲିଟେସନ ପ୍ରୋଜେକ୍ଟ (ବସ୍ତି ଥଇଥାନ ପ୍ରକଳ୍ପ) ଅଧୀନରେ ଝୁଗି ଝୋପରୀ (ଜେଜେ) କ୍ଲଷ୍ଟରରେ ନବନିର୍ମିତ ଫ୍ଲାଟ ଅଞ୍ଚଳ ପରିଦର୍ଶନ କରିବେ । ‘ସମସ୍ତଙ୍କ ପାଇଁ ଆବାସ’ ପ୍ରତିବଦ୍ଧତା ସ୍ୱରୂପ ପ୍ରଧାନମନ୍ତ୍ରୀଙ୍କ ଏହି ଗସ୍ତ ଉଦ୍ଦିଷ୍ଟ । ସେଠାରେ ଅପରାହ୍ଣ ପ୍ରାୟ ୧୨ଟା ୪୫ ମିନିଟରେ ପ୍ରଧାନମନ୍ତ୍ରୀ ଅନେକଗୁଡ଼ିଏ ବିକାଶମୂଳକ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କରିବେ ।

ପ୍ରଧାନମନ୍ତ୍ରୀ ଜେଜେ କ୍ଲଷ୍ଟରରେ ବାସିନ୍ଦାଙ୍କ ପାଇଁ ନବନିର୍ମିତ ୧୬୭୫ଟି ଫ୍ଲାଟକୁ ଉଦଘାଟନ କରିବା ସହିତ ଦିଲ୍ଲୀ ଅଶୋକ ବିହାରର ସ୍ୱାଭିମାନ ଆପାର୍ଟମେଣ୍ଟରେ ଯୋଗ୍ୟ ହିତାଧିକାରୀମାନଙ୍କୁ ଚାବି ହସ୍ତାନ୍ତର କରିବେ । ଏହି ନବନିର୍ମିତ ଫ୍ଲାଟ ଗୁଡ଼ିକର ଉଦଘାଟନ କାର୍ଯ୍ୟକ୍ରମ ସହ ଦିଲ୍ଲୀ ଡେଭଲପମେଣ୍ଟ ଅଥରିଟି (ଡିଡିଏ) ଦ୍ୱାରା ଇନ-ସିଟୁ ସ୍ଲମ ରିହାବିଲିଟେସନ ପ୍ରକଳ୍ପର ଦ୍ୱିତୀୟ ପର୍ଯ୍ୟାୟ ସଫଳତାର ସହ ସମ୍ପନ୍ନ ହେବ । ଏହି ପ୍ରକଳ୍ପର ମୂଳ ଲକ୍ଷ୍ୟ ଦିଲ୍ଲୀସ୍ଥିତ ଜେଜେ କ୍ଲଷ୍ଟରର ବାସିନ୍ଦାମାନଙ୍କୁ ସୁସ୍ଥ ପରିବେଶରେ ଆବଶ୍ୟକ ମୌଳିକ ସୁବିଧା ଥାଇ ଆବାସ ଯୋଗାଇ ଦେବା ।

ପ୍ରତି ଫ୍ଲାଟ ପାଇଁ ସରକାର ୨୫ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି । ଯୋଗ୍ୟ ହିତାଧିକାରୀମାନଙ୍କୁ କେବଳ ମୋଟ ମୂଲ୍ୟର ୭% ଅର୍ଥାତ ୧.୪୨ ଲକ୍ଷ ଟଙ୍କା ଟୋକନ ଅର୍ଥ ଭାବେ ଏବଂ ପାଞ୍ଚ ବର୍ଷର ରକ୍ଷଣାବେକ୍ଷଣ ଖର୍ଚ୍ଚ ୩୦ ହଜାର ଟଙ୍କା ଦେବାକୁ ପଡ଼ିବ ।

ପ୍ରଧାନମନ୍ତ୍ରୀ ମଧ୍ୟ ଦୁଇଟି ସହରାଞ୍ଚଳ ପ୍ରକଳ୍ପ – ନାଉରୋଜୀ ନଗରରେ ୱାର୍ଲ୍ଡ ଟ୍ରେଡ ସେଣ୍ଟର (ଡବ୍ଲୁଟିସି) ଏବଂ ସରୋଜିନୀ ନଗରରେ ଜେନେରାଲ ପୁଲ ରେସିଡେନ୍ସିଆଲ ଆକମୋଡେସନ (ଜିପିଆରଏ) ଟାଇପ -୨ କ୍ୱାର୍ଟର୍ସକୁ ଉଦଘାଟନ କରିବେ ।

ନାଉରୋଜୀ ନଗରରେ ୬୦୦ଟି ଭଗ୍ନ ପ୍ରାୟ କ୍ୱାର୍ଟର୍ସକୁ ହଟାଇ ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ବାଣିଜ୍ୟିକ ଟାୱାର ଦ ୱାର୍ଲ୍ଡ ଟ୍ରେଡ ସେଣ୍ଟରରେ ରୂପାନ୍ତର କରାଯାଇଛି । ଏହି ସେଣ୍ଟରରେ ଅତ୍ୟାଧୁନିକ ସୁବିଧା ଥାଇ ୩୪ ଲକ୍ଷ ବର୍ଗଫୁଟର ପ୍ରିମିୟମ ବାଣିଜ୍ୟିକ ସ୍ଥାନ ଉପଲବ୍ଧ କରାଯାଇଛି । ଏହି ପ୍ରକଳ୍ପରେ ପରିବେଶ ଅନୁକୂଳ କୋଠା, ଶୂନ୍ୟ ନିର୍ବହନ ଅବଧାରଣା, ସୌର ଶକ୍ତି ଉତ୍ପାଦନ ଏବଂ ବର୍ଷାଜଳ ଅମଳ ବ୍ୟବସ୍ଥା ପ୍ରତି ଗୁରୁତ୍ୱ ଦିଆଯାଇଛି ।

ସରୋଜିନୀ ନଗରରେ ନିର୍ମିତ ଜିପିଆରଏ ଟାଇପ -୨ କ୍ୱାର୍ଟର୍ସରେ ୨୮ଟି ଟାୱାର ରହିଛି, ଯେଉଁଥିରେ ଅତ୍ୟାଧୁନିକ ସୁବିଧା ଓ ଯଥେଷ୍ଟ ବ୍ୟାବହାରିକ ସ୍ଥାନ ଥାଇ ୨୫୦୦ ଆବାସିକ ୟୁନିଟ ନିର୍ମାଣ କରାଯାଇଛି । ପ୍ରକଳ୍ପ ନିର୍ମାଣ କୌଶଳରେ ବର୍ଷାଜଳ ଅମଳ ବ୍ୟବସ୍ଥା, ସିୱେଜ ଏବଂ ଜଳ ଉପଚାର ସଂଯନ୍ତ୍ର ଏବଂ ପରିବେଶ ସଚେତନ ଜୀବନଶୈଳୀକୁ ପ୍ରୋତ୍ସାହିତ କରୁଥିବା ସୌରଶକ୍ତି ଚାଳିତ ବର୍ଜ୍ୟ ପରିଚାଳନା ବ୍ୟବସ୍ଥା ରହିଛି ।

ପ୍ରଧାନମନ୍ତ୍ରୀ ମଧ୍ୟ ଦିଲ୍ଲୀର ଦ୍ୱାରକାଠାରେ ୩୦୦ କୋଟି ଟଙ୍କାରେ ନିର୍ମିତ ସିବିଏସଇର ସମନ୍ୱିତ ଅଫିସ କମ୍ପେ୍ଲକ୍ସକୁ ଉଦଘାଟନ କରିବେ । ଏହା ମଧ୍ୟରେ କାର୍ଯ୍ୟାଳୟ, ଉନ୍ନତ ଡାଟା ସେଣ୍ଟର, ବିସ୍ତୃତ ଜଳ ପରିଚାଳନ ବ୍ୟବସ୍ଥା ଆଦି ରହିଛି । ଏହି ପରିବେଶ ଅନୁକୂଳ ବିଲ୍ଡିଂ ଇଣ୍ଡିଆନ ଗ୍ରୀନ ବିଲ୍ଡିଂ କାଉନସିଲର ପ୍ଲାଟିନମ ରେଟିଂ ଷ୍ଟାଣ୍ଡାର୍ଡ ଅନୁସାରେ ଉଚ୍ଚ ପରିବେଶୀୟ ମାନାଙ୍କକୁ ଦେଖି ନିର୍ମାଣ କରାଯାଇଛି ।

ପ୍ରଧାନମନ୍ତ୍ରୀ ଦିଲ୍ଲୀ ବିଶ୍ୱବିଦ୍ୟାଳୟରେ ୬୦୦ କୋଟି ଟଙ୍କାରେ ନିର୍ମାଣ ହେବାକୁ ଥିବା ତିନୋଟି ନୂତନ ପ୍ରକଳ୍ପର ଶିଳାନ୍ୟାସ କରିବେ । ଏହା ମଧ୍ୟରେ ରହିଛି, ଇଷ୍ଟ ଦିଲ୍ଲୀର ସୁରଜମଲ୍ଲ ବିହାରସ୍ଥିତ ଇଷ୍ଟର୍ଣ୍ଣ କ୍ୟାମ୍ପସରେ ଏକାଡେମିକ ବ୍ଲକ ଏବଂ ଦ୍ୱାରକାସ୍ଥିତ ୱେଷ୍ଟର୍ଣ୍ଣ କ୍ୟାମ୍ପସରେ ଏକ ଏକାଡେମିକ ବ୍ଲକ । ସ୍ୱଦେଶୀ ଜ୍ଞାନକୌଶଳରେ ଉତ୍ତମ ଶିକ୍ଷା ପ୍ରଦାନ ପାଇଁ ନଜଫଗଡ଼ର ରୋଷନପୁରା ଠାରେ ପ୍ରଧାନମନ୍ତ୍ରୀ ବୀର ସବରକର କଲେଜ ପାଇଁ ଶିଳାନ୍ୟାସ ମଧ୍ୟ କରିବେ । 

SR