ପିଏମଇଣ୍ଡିଆ

2018 ଜୁନ 21ରେ ଡେରାଡୁନଠାରେ ପାଳନ ହେବାକୁ ଥିବା ଚତୁର୍ଥ ଆନ୍ତର୍ଜାତିକ ଯୋଗ ଦିବସର ନେତୃତ୍ୱ ନେବେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ।

ହିମାଳୟ କୋଳରେ ଅବସ୍ଥିତ ବନ୍ୟ ଗବେଷଣା ପ୍ରତିଷ୍ଠାନ ମଇଦାନରେ ହଜାର ହଜାର ସ୍ୱେଚ୍ଛାକର୍ମୀଙ୍କ ଗହଣରେ ପ୍ରଧାନମନ୍ତ୍ରୀ ଯୋଗାସନ କରିବେ ।

ଏହି ଅବସରକୁ ପାଳନ କରିବା ପାଇଁ ବିଶ୍ୱବ୍ୟାପୀ ଯୋଗ ସହିତ ସଂପୃକ୍ତ ଅନେକ କାର୍ଯ୍ୟକ୍ରମର ଆୟୋଜନ କରାଯିବ ।

ପୂର୍ବରୁ ପ୍ରଧାନମନ୍ତ୍ରୀ ଯୋଗ ଦିବସ ପାଳନ ଅବସରରେ ବିଭିନ୍ନ କାର୍ଯ୍ୟକ୍ରମରେ ଯୋଗଦାନ କରିଛନ୍ତି ଓ ଏଥିରେ ସାମିଲ ରହିଛି 2015ରେ ନୂଆଦିଲ୍ଲୀର ରାଜପଥ, 2016ରେ ଚଣ୍ଡିଗଡର କ୍ୟାପିଟଲ କମ୍ପ୍ଲେକ୍ସ ଏବଂ 2017ରେ ଲକ୍ଷ୍ନୌର ରମାବାଇ ଆମ୍ବେଦକର ସଭାସ୍ଥଳରେ ଆୟୋଜିତ ଉତ୍ସବ ।

ଏହି ଅବସରରେ ବଶ୍ୱବ୍ୟାପୀ ଯୋଗର ସମର୍ଥକମାନଙ୍କୁ ଅଭିନନ୍ଦନ ଜଣାଇ ପ୍ରଧାନମନ୍ତ୍ରୀ କହିଛନ୍ତି ଯେ ଯୋଗ ହେଉଛି ପ୍ରାଚୀନ ଭାରତୀୟ ଋଷିମାନଙ୍କ ଦ୍ୱାରା ମାନବତାକୁ ପ୍ରଦାନ କରାଯାଇଥିବା ଏକ ବହୁମୂଲ୍ୟ ଉପହାର ।

“ଶରୀରକୁ ସମର୍ଥ/ଫିଟ୍ ରଖିବା ପାଇଁ ଯୋଗ କେବଳ ଏକ ବ୍ୟାୟାମ ପ୍ରକ୍ରିୟା ନୁହେଁ । ଏହା ସ୍ୱାସ୍ଥ୍ୟ ବୀମା ପାଇଁ ଏକ ପାସପୋର୍ଟ ଏବଂ ଫିଟନେସ ଓ ସୁସ୍ଥତା ପାଇଁ ଗୁରୁତ୍ୱପୂର୍ଣ୍ଣ । ଯୋଗ ସକାଳେ ଅଭ୍ୟାସ କଲାଭଳି କେବଳ ଏକ ଜିନିଷ ନୁହେଁ । ନିଜର ଦୈନଦିନ କାର୍ଯ୍ୟକଳାପକୁ ତତ୍ପରତାର ସହ ଏବଂ ସମ୍ପୂର୍ଣ୍ଣ ସଚେତନତାର ସହ କରିବା ମଧ୍ୟ ଯୋଗର ଅନ୍ୟ ଏକ ରୂପ,” ବୋଲି ପ୍ରଧାନମନ୍ତ୍ରୀ କହିଛନ୍ତି ।

“ଅତିଶୟତାର ଦୁନିଆାରେ, ଯୋଗ ମଣିଷକୁ ସଂଯମ ଓ ସନ୍ତୁଳିତ ଜୀବନର ପ୍ରତିବଦ୍ଧତା ପ୍ରଦାନ କରେ । ମାନସିକ ଅବସାଦର ଯନ୍ତ୍ରଣାରେ ଜର୍ଜରିତ ଦୁନିଆ ପାଇଁ ଯୋଗ ଶାନ୍ତିର ବାର୍ତ୍ତା ପ୍ରଦାନ କରେ । ଏକ ବିଚଳିତ ବିଶ୍ୱରେ ଯୋଗ ଲୟବଦ୍ଧତା ଆଣିବାରେ ସହାୟତା କରେ । ଏକ ଭୟଭୀତ ପୃଥିବୀରେ ଯୋଗ ଆଶା, ସାମର୍ଥ୍ୟ ଏବଂ ସାହସର ସଂଚାର କରେ,” ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଆନ୍ତର୍ଜାତିକ ଯୋଗ ଦିବସ ପୂର୍ବରୁ ପ୍ରଧାନମନ୍ତ୍ରୀ ସାମାଜିକ ଗଣମାଧ୍ୟମରେ ବିଭିନ୍ନ ଯୋଗ ଆସନର ଜଟିଳତାକୁ ସେୟାର କରିଛନ୍ତି । ସେ ମଧ୍ୟ ବିଶ୍ୱବ୍ୟାପୀ ବିଭିନ୍ନ ସ୍ଥାନରେ ଯୋଗ କରୁଥିବା ଜନସାଧାରଣଙ୍କ ଛବି ସେୟାର କରିଛନ୍ତି ।

***