ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ 16 ଫେବୃଆରୀ, 2019ରେ ମହାରାଷ୍ଟ୍ରର ୟବତମାଲ ଏବଂ ଧୁଲେ ଗସ୍ତରେ ଯିବେ । ସେ ରାଜ୍ୟରେ ଅନେକ ପ୍ରକଳ୍ପର ଲୋକାର୍ପଣ କରିବେ ।

ୟବତମାଲ

ପ୍ରଧାନମନ୍ତ୍ରୀ ଆସନ୍ତାକାଲି ନାନ୍ଦେଡ଼ରେ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟର ଉଦଘାଟନ କରିବେ । ଆଧୁନିକ ସୁବିଧାରେ ସମ୍ପନ୍ନ ଏହି ବିଦ୍ୟାଳୟର ମୋଟ ଛାତ୍ରଛାତ୍ରୀ ଧାରଣ କ୍ଷମତା 420 ରହିଛି । ଏହାଦ୍ୱାରା ଜନଜାତିର ଛାତ୍ରଛାତ୍ରୀଙ୍କ ମଧ୍ୟରେ ଶିକ୍ଷାର ସ୍ତରରେ ଉନ୍ନତି ଆସିବାରେ ସହାୟତା ମିଳିପାରିବ । ଏଥିସହିତ ଏହା ସେମାନଙ୍କ ସାମଗ୍ରୀକ ଉନ୍ନତି ଏବଂ ବ୍ୟକ୍ତିତ୍ୱ ବିକାଶର ପରିବେଶ ଯୋଗାଇବ ।

ଆସନ୍ତାକାଲି ପ୍ରଧାନମନ୍ତ୍ରୀ ଆବାସ ଯୋଜନାରେ ଚୟନ ହୋଇଥିବା ହିତାଧିକାରୀମାନଙ୍କୁ ପ୍ରଧାନମନ୍ତ୍ରୀ ଇ-ଗୃହ ପ୍ରବେଶର ଚାବି ଅର୍ପଣ କରିବେ ।

ପ୍ରଧାନମନ୍ତ୍ରୀ ଭିଡ଼ିଓ ଲିଙ୍କ ଜରିଆରେ ଅଜନୀ (ନାଗପୁର)-ପୁଣେ ଟ୍ରେନକୁ ସବୁଜ ପତାକା ଦେଖାଇ ଶୁଭାରମ୍ଭ କରିବେ । ଏହି ଟ୍ରେନରେ ଥ୍ରୀ-ଟାୟାର ଶୀତତାପନିୟନ୍ତ୍ରିତ କୋଚ ରହିବ ଏବଂ ଏହା ନାଗପୁର ଏବଂ ପୁଣେ ମଧ୍ୟରେ ରାତ୍ରୀ ସେବା ଉପଲବ୍ଧ କରାଇବ । ପ୍ରଧାନମନ୍ତ୍ରୀ ବଟନ ଚିପି କେନ୍ଦ୍ରୀୟ ସଡ଼କ ପାଣ୍ଠି (ସିଆରଏଫ) ଅନ୍ତର୍ଗତ ନିର୍ମିତ ହେବାକୁ ଥିବା ସଡ଼କର ଆଧାରଶିଳା ରଖିବେ ।

ମହାରାଷ୍ଟ୍ର ରାଜ୍ୟ ଗ୍ରାମୀଣ ଜୀବିକା ମିଶନ (ଏମଏସଆରଏଲଏମ) ଅନ୍ତର୍ଗତ ମହିଳା ସ୍ୱୟଂ ସହାୟିକା ଗୋଷ୍ଠୀଗୁଡ଼ିକୁ ପ୍ରଧାନମନ୍ତ୍ରୀ ପ୍ରମାଣପତ୍ର/ଚେକ ବଂଟନ କରିବେ । ଆର୍ଥିକ ଅନ୍ତର୍ଭୂକ୍ତୀକରଣ ଉଦ୍ଦେଶ୍ୟରେ ଏମଏସଆରଏଲଏମ ସାମାଜିକ ପରିବର୍ତ୍ତନ କାର୍ଯ୍ୟ କରିଥାଏ ଯାହାଦ୍ୱାରା ଘରେ ଘରେ ଆର୍ଥିକ ସେବା ଜରିଆରେ କୃଷି ଏବଂ ଅଣକୃଷି ଜୀବିକା ସୁଯୋଗ ସୁନିଶ୍ଚିତ କରିବାରେ ସହାୟତା ମିଳିଥାଏ ।

ଧୁଲେ

ପ୍ରଧାନମନ୍ତ୍ରୀ ୟବତମାଲ ପରେ ଆସନ୍ତକାଲି ଧୁଲେଠାରେ ପହଁଚିବେ । ସେଠାରେ ସେ ପ୍ରଧାନମନ୍ତ୍ରୀ କୃଷି ସିଂଚାଇ ଯୋଜନା (ପିଏମକେଏସୱାଇ) ଅନ୍ତର୍ଗତ ଲୋଅର ପଞ୍ଜାରା ମିଡ଼ିୟମ ପ୍ରକଳ୍ପର ଉଦଘାଟନ କରିବେ । ଏହି ପ୍ରକଳ୍ପକୁ 2016-17ରେ ପିଏମକେଏସୱାଇରେ ସାମିଲ କରାଯାଇଥିଲା । ଏହାର ମୋଟ ଜଳ ସଂଚୟ କ୍ଷମତା 109.31 ନିୟୁତ ଘନମିଟର ରହିଛି । ଯାହାଦ୍ୱାରା ଧୁଲେ ଜିଲ୍ଲାରେ 21ଟି ଗ୍ରାମର 7,585 ହେକ୍ଟର ଚାଷଜମିକୁ ଜଳସେଚନ ସୁବିଧା ମିଳିପାରିବ ।

ପ୍ରଧାନମନ୍ତ୍ରୀ ସୁଲୱାଡ଼େ ଜାମଫଳ କନୋଲି ଉଠା ଜଳସେଚନ ଯୋଜନାର ଶିଳାନ୍ୟାସ କରିବେ । ଏହି ଯୋଜନା ଅନ୍ତର୍ଗତ 124 ଦିନର ମୌସୁମୀ ଋତୁରେ ତାପି ନଦୀର 9.24 ଟିଏମସି ବନ୍ୟାଜଳ ଉଠାଯାଇପାରିବ । ଏହାଦ୍ୱାରା ଧୁଲେ ଜିଲ୍ଲାରେ ପାଖାପାକି 100ଟି ଗ୍ରାମର 33,367 ହେକ୍ଟର ଚାଷଜମିକୁ ଜଳସେଚନ ମିଳିବ ବୋଲି ଆଶା କରାଯାଉଛି ।

ଅମୃତ ଯୋଜନା ଅନ୍ତର୍ଗତ ଧୁଲେ ସହରକୁ ଜଳଯୋଗାଣ ପାଇଁ ପ୍ରଧାନମନ୍ତ୍ରୀ ଶିଳାନ୍ୟାସ କରିବେ । ଏହାଦ୍ୱାରା ଶିଳ୍ପ ଏବଂ ବାଣିଜ୍ୟିକ ବିକାଶ ଲାଗି ଜଳ ଉପଲବ୍ଧତା ସୁନିଶ୍ଚିତ ହେବ ।

ପ୍ରଧାନମନ୍ତ୍ରୀ ମଧ୍ୟ ଧୁଲେ-ନରଦାନା ରେଳ ଲାଇନ ଏବଂ ଜଲଗାଁଓ-ମନମାଡ଼ ତୃତୀୟ ରେଳ ଲାଇନର ଶିଳାନ୍ୟାସ କରିବେ । ପ୍ରଧାନମନ୍ତ୍ରୀ ଭିଡ଼ିଓ ଲିଙ୍କ ଜରିଆରେ ଭୁସାବଲ-ବାନ୍ଦ୍ରା ଖନ୍ଦେଶ ଏକ୍ସପ୍ରେସ ଟ୍ରେନକୁ ସବୁଜ ପତାକା ଦେଖାଇ ଶୁଭାରମ୍ଭ କରିବେ । ଏହା ରାତ୍ରି ସେବା ପ୍ରଦାନ କରୁଥିବା ଟ୍ରେନ ଯାହା ମୁମ୍ବାଇ-ଭୁସାୱଲକୁ ସିଧାସଳଖ ଯୋଡ଼ିବ । ଏହି ଟ୍ରେନ ସପ୍ତାହକୁ ତିନି ଥର ଚଳାଚଳ କରିବ ।

ପ୍ରଧାନମନ୍ତ୍ରୀ ଜଲଗାଁଓ-ଉଢ଼ାନା ଲାଇନର ଦୋହରୀକରଣ ଏବଂ ବିଦ୍ୟୁତକରଣ ରେଳ ପ୍ରକଳ୍ପର ଉଦଘାଟନ କରିବେ । ଏହି ପ୍ରକଳ୍ପ ଦ୍ୱାରା ଯାତ୍ରୀ ଏବଂ ସାମଗ୍ରୀ ପରିବହନ କ୍ଷମତା ବୃଦ୍ଧି ପାଇବ । ଏହା ନନ୍ଦୁରବାର, ବ୍ୟାରା, ଧରନଗାଁଓ ଏବଂ ଏହି ଅଂଚଳର ଅନ୍ୟ ସ୍ଥାନଗୁଡ଼ିକର ବିକାଶ ପାଇଁ ମାଧ୍ୟମ ହୋଇପାରିବ ।

**********