ପିଏମଇଣ୍ଡିଆ

• 1400 କୋଟି ଟଙ୍କାର ବିକାଶମୂଳକ ପ୍ରକଳ୍ପର କଲେ ଉଦଘାଟନ ଓ ଶିଳାନ୍ୟାସ
• ଦାଦ୍ରା ଓ ନଗର ହାଭେଳୀ ପାଇଁ ଆଇଟି ନୀତି ଉନ୍ମୋଚିତ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଦାଦ୍ରା ଓ ନଗର ହାଭେଳୀର ସିଲଭାସା ଗସ୍ତ କରି ବିଭିନ୍ନ ବିକାଶମୂଳକ ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରିଥିଲେ ।

ସେ ଦାଦ୍ରା ଓ ନଗର ହାଭେଳୀର ସାୟଲୀଠାରେ ଏକ ମେଡ଼ିକାଲ କଲେଜ ପାଇଁ ଶିଳାନ୍ୟାସ କରିଥିଲେ ।

ପ୍ରଧାନମନ୍ତ୍ରୀ ଦାଦ୍ରା ଓ ନଗର ହାଭେଳୀ ପାଇଁ ଆଇଟି ନୀତି ଉନ୍ମୋଚନ କରିଥିଲେ । ଏମ-ଆରୋଗ୍ୟ ମୋବାଇଲ ଆପ ଏବଂ ଦ୍ୱାରରୁ ଦ୍ୱାର ଆବର୍ଜନା ସଂଗ୍ରହ, କଠିନ ବର୍ଜ୍ୟ ସଂଗ୍ରହ ଏବଂ ପ୍ରକ୍ରିୟାକରଣ କାର୍ଯ୍ୟର ମଧ୍ୟ ଶୁଭାରମ୍ଭ କରାଯାଇଥିଲା । ସେ ମଧ୍ୟ ଆୟୁଷ୍ମାନ ଭାରତର ହିତାଧିକାରୀମାନଙ୍କୁ ଗୋଲ୍ଡ କାର୍ଡ ଏବଂ ହିତାଧିକାରୀମାନଙ୍କୁ ବନ ଅଧିକାର ପତ୍ର ବଂଟନ କରିଥିଲେ ।

ଉପସ୍ଥିତ ଜନସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଆଜି 1400 କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପମାନ ଉଦଘାଟିତ ଓ ଶିଳାନ୍ୟାସ ହୋଇଛି । ଏହି ପ୍ରକଳ୍ପଗୁଡ଼ିକ ଯୋଗାଯୋଗ, ଭିତ୍ତିଭୂମି, ସ୍ୱାସ୍ଥ୍ୟ, ଶିକ୍ଷା ଆଦି ସହିତ ଜଡ଼ିତ ।

ଉଦ୍ୟୋଗୁଡ଼ିକୁ ପ୍ରୋତ୍ସାହନ ଦେବା ଲାଗି ନୂଆ ଆଇଟି ନୀତି ଏବଂ ନୂଆ ଶିଳ୍ପ ନୀତି ଶୁଭାରମ୍ଭ କରାଯାଇଛି ।

ଦେଶର ଲୋକମାନଙ୍କ କଲ୍ୟାଣ ଲାଗି ସରକାରଙ୍କ ପ୍ରତିବଦ୍ଧତାକୁ ପ୍ରଧାନମନ୍ତ୍ରୀ ଦୋହରାଇଥିଲେ । ସେ କହିଥିଲେ, ଆମେ ସବକା ସାଥ, ସବକା ବିକାଶ ମନ୍ତ୍ର ଉପରେ କାର୍ଯ୍ୟ କରୁଛୁ ।

ସେ ଉଲ୍ଲେଖ କରିଥିଲେ ଯେ ଉଭୟ ଦାମନ, ଦିଉ ଏବଂ ଦାଦ୍ରା ଓ ନଗର ହାଭେଳୀ ଖୋଲା ଶୌଚ ମୁକ୍ତ ଘୋଷିତ ହୋଇସାରିଛନ୍ତି । ଉଭୟ କେନ୍ଦ୍ର ଶାସିତ ଅଂଚଳ କେରୋସିନ ମୁକ୍ତ ହୋଇସାରିଛନ୍ତି । ସେ ଉଲ୍ଲେଖ କରିଥିଲେ ଯେ ଏହି ଦୁଇଟି କେନ୍ଦ୍ର ଶାସିତ ଅଂଚଳର ପ୍ରତ୍ୟେକ ପରିବାର ନିକଟରେ ଏଲପିଜି ସଂଯୋଗ, ବିଦ୍ୟୁତ ସଂଯୋଗ ଏବଂ ଜଳଯୋଗାଣ ଉପଲବ୍ଧ ଅଛି ।

ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ପ୍ରଧାନମନ୍ତ୍ରୀ ଆବାସ ଯୋଜନାରେ ଉଭୟ କେନ୍ଦ୍ର ଶାସିତ ପ୍ରଦେଶର ଗରିବ ବାସୀନ୍ଦାଙ୍କୁ ଆବାସ ଯୋଗାଇ ଦିଆଯାଇଛି । ଆୟୁଷ୍ମାନ ଯୋଜନାର ଲାଭ ଦେବା ଲାଗି ଦୁଇ କେନ୍ଦ୍ର ଶାସିତ ପ୍ରଦେଶର ଲୋକମାନଙ୍କୁ ଗୋଲ୍ଡ କାର୍ଡ ଜାରି କରାଯାଇଛି ।

ଏହି ଦୁଇଟି କେନ୍ଦ୍ର ଶାସିତ ଅଂଚଳରେ ଗତ 3 ବର୍ଷ ମଧ୍ୟରେ 9 ହଜାର କୋଟି ଟଙ୍କାର ନିବେଶ କରାଯାଇଛି, ଯାହା ସଂଖ୍ୟାଧିକ ବିକାଶମୂଳକ ପ୍ରକଳ୍ପ ଛିଡ଼ା କରିପାରିଛି । ସେ କହିଥିଲେ ଯେ ଏଠାରେ ମେଡ଼ିକାଲ କଲେଜ ଲାଗି ଶିଳାନ୍ୟାସ କରାଯିବା ପରେ ଦାଦ୍ରା ଓ ନଗର ହାଭେଳୀ ଏବଂ ଡାମନ ଓ ଡିଉରେ ପ୍ରଥମ ମେଡ଼ିକାଲ କଲେଜ ନିର୍ମାଣ କରାଯିବ । ସେ ଉଲ୍ଲେଖ କରିଥିଲେ ଯେ ଏହି ମେଡ଼ିକାଲ କଲେଜକୁ ଚଳିତ ବର୍ଷଠାରୁ କାର୍ଯ୍ୟକ୍ଷମ କରିବା ପାଇଁ ପ୍ରୟାସ କରାଯାଉଛି । ପ୍ରଧାନମନ୍ତ୍ରୀ ଆହୁରି କହିଥିଲେ ଯେ ବର୍ତ୍ତମାନ ସୁଦ୍ଧା ଏହି ଦୁଇଟି କେନ୍ଦ୍ର ଶାସିତ ପ୍ରଦେଶ ପାଇଁ ମାତ୍ର 15ଟି ମେଡ଼ିକାଲ ସିଟ ଉପଲବ୍ଧ ହୋଇପାରିଥିଲା, ଏବେ 150ଟି ସିଟ ଉପଲବ୍ଧ ହେବ । ସେ କହିଥିଲେ ମେଡ଼ିକାଲ କଲେଜ ଦ୍ୱାରା ଲୋକମାନଙ୍କ ପାଇଁ ଡାକ୍ତରୀ ସୁବିଧା ଉପଲବ୍ଧ ହୋଇପାରିବ ।

ଆୟୁଷ୍ମାନ ଭାରତ ସମ୍ପର୍କରେ ସେ କହିଥିଲେ ଏହା ହେଉଛି ବିଶ୍ୱର ସର୍ବବୃହତ ସ୍ୱାସ୍ଥ୍ୟସେବା ପ୍ରକଳ୍ପ ଏବଂ ପ୍ରତିବର୍ଷ 10 ହଜାର ଗରିବ ଜନସାଧାରଣ ଏହାର ଲାଭ ପାଇପାରୁଛନ୍ତି । ଏହା ଆରମ୍ଭ ହେବାର ମାତ୍ର 100 ଦିନ ମଧ୍ୟରେ 7 ଲକ୍ଷ ଗରିବ ରୋଗୀ ଲାଭାନ୍ୱିତ ହୋଇପାରିଛନ୍ତି ।

ସେ କହିଥିଲେ ଯେ ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ, ସହର ଏବଂ ଗ୍ରାମର ଗରିବ ଲୋକଙ୍କୁ ସ୍ଥାୟୀ ବାସଗୃହ ଯୋଗାଇବାକୁ ଏକ ବ୍ୟାପକ ଅଭିଯାନ ଆରମ୍ଭ ହୋଇଛି ।

ସେ କହିଥିଲେ ଯେ ଗତ ସରକାର ଅମଳରେ 5 ବର୍ଷ ମଧ୍ୟରେ ମାତ୍ର 25 ଲକ୍ଷ ବାସଗୃହ ନିର୍ମିତ ହୋଇଥିଲା, ଏହା ତୁଳନାରେ ଆମେ 5 ବର୍ଷ ମଧ୍ୟରେ 1.25 କୋଟି ଆବାସ ନିର୍ମାଣ କରିଛୁ ।

ପ୍ରଧାନମନ୍ତ୍ରୀ ଆହୁରି ଆଲୋକପାତ କରିଥିଲେ ଯେ କେବଳ ଦାଦ୍ରା ଓ ନଗର ହାଭେଳୀରେ 13,000 ମହିଳାଙ୍କୁ ମାଗଣା ରୋଷେଇ ଗ୍ୟାସ ସଂଯୋଗ ଦିଆଯାଇଛି । ଆଦିବାସୀଙ୍କ କଲ୍ୟାଣ ସୁନିଶ୍ଚିତ କରିବା ପାଇଁ ପଦକ୍ଷେପ ନିଆଯାଉଛି । ଜନ ଧନ ଯୋଜନା ଅଧୀନରେ ଜଙ୍ଗଲଜାତ ଉତ୍ପାଦର ମୂଲ୍ୟ ବୃଦ୍ଧି ପାଇଁ କେନ୍ଦ୍ରମାନ ପ୍ରତିଷ୍ଠା କରାଯାଉଛି । ଆଦିବାସୀ ସଂସ୍କୃତିର ସଂରକ୍ଷଣ ପାଇଁ ବିଭିନ୍ନ ପଦକ୍ଷେପମାନ ନିଆଯାଉଛି ।

ପ୍ରଧାନମନ୍ତ୍ରୀ କହିଥିଲେ ଯେ ଦାଦ୍ରା ଓ ନଗର ହାଭେଳୀରେ ପର୍ଯ୍ୟଟନର ଅପାର ସମ୍ଭାବନା ରହିଛି । ପର୍ଯ୍ୟଟନ ମାନଚିତ୍ରରେ ଏହି ଅଂଚଳକୁ ସ୍ଥାନିତ କରିବା ଲାଗି ବିଭିନ୍ନ ପଦକ୍ଷେପମାନ ନିଆଯାଉଛି ।

ସେ କହିଥିଲେ ମତ୍ସ୍ୟଜୀବୀମାନଙ୍କ ଆୟ ବୃଦ୍ଧି ଲାଗି ନୀଳ ବିପ୍ଳବ ଯୋଜନା କାର୍ଯ୍ୟକାରୀ କରାଯାଉଛି । ମତ୍ସ୍ୟପାଳନ କ୍ଷେତ୍ରରେ ଉନ୍ନତି ଆଣିବା ଲାଗି ଏକ ସ୍ୱତନ୍ତ୍ର ପାଣ୍ଠି ବ୍ୟବସ୍ଥା କରାଯାଇଛି । ଏହି ପାଣ୍ଠି ଅଧୀନରେ ଉପରୋକ୍ତ କ୍ଷେତ୍ରର ପ୍ରୋତ୍ସାହନ ଲାଗି 7500 କୋଟି ଟଙ୍କାର ବ୍ୟବସ୍ଥା କରାଯାଇଛି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ ଯେ 125 କୋଟି ଭାରତୀୟ ତାଙ୍କ ପରିବାର ଏବଂ ସେ ସେମାନଙ୍କ କଲ୍ୟାଣ ପାଇଁ କାର୍ଯ୍ୟ କରିବା ଲାଗି ପ୍ରତିବଦ୍ଧ ।

**********