ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଝାଡ଼ଖଣ୍ଡର ହଜାରିବାଗ ଗସ୍ତ କରିଛନ୍ତି । ସେ ଝାଡ଼ଖଣ୍ଡରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଲୋକାର୍ପଣ କରିଥିଲେ । ଏହି ଅବସରରେ ଝାଡ଼ଖଣ୍ଡ ରାଜ୍ୟପାଳ ଶ୍ରୀମତି ଦ୍ରୌପଦୀ ମୁର୍ମୁ, କେନ୍ଦ୍ର ମନ୍ତ୍ରୀ ଶ୍ରୀ ଜୟନ୍ତ ସିହ୍ନା ଏବଂ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ଶ୍ରୀ ରଘୁବର ଦାସଙ୍କ ସମେତ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ଥିଲେ ।

ଉପସ୍ଥିତ ଜନସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ, “ରାଷ୍ଟ୍ରପାଇଁ ପ୍ରାଣବଳି ଦେଇଥିବା ଝାଡ଼ଖଣ୍ଡର ବୀର ସୁପୁତ୍ର ଶ୍ରୀ ବିଜୟ ସୋରେନଙ୍କ ପ୍ରତି ମୁଁ ଶ୍ରଦ୍ଧାସୁମନ ଅର୍ପଣ କରୁଛି । ପ୍ରତ୍ୟେକ ପଦକ୍ଷେପରେ ଆମେ ସହିଦଙ୍କ ପରିବାରର ଯତ୍ନ ନେବୁ ।”

ପ୍ରଧାନମନ୍ତ୍ରୀ ହଜାରିବାଗ, ଦୁମକା ଏବଂ ପାଲାମୁ ଠାରେ ମେଡ଼ିକାଲ କଲେଜର ଉଦଘାଟନ କରିଥିଲେ । 2017ରେ ପ୍ରଧାନମନ୍ତ୍ରୀଙ୍କ ଦ୍ୱାରା ଏହି କଲେଜଗୁଡ଼ିକ ପାଇଁ ଶିଳାନ୍ୟାସ କରାଯାଇଥିଲା । ଏହି ନୂଆ ମେଡ଼ିକାଲ କଲେଜଗୁଡ଼ିକ 885 କୋଟି ଟଙ୍କା ଖର୍ଚ୍ଚ କରାଯାଇ ନିର୍ମାଣ କରାଯାଇଛି । ପ୍ରତ୍ୟେକ କଲେଜ କ୍ୟାମ୍ପସକୁ ଦିବ୍ୟାଙ୍ଗଙ୍କ ପାଇଁ ଅନୁକୂଳ କରାଯାଇଛି । ଏହି ଅତ୍ୟାଧୁନିକ ମେଡ଼ିକାଲ ସୁବିଧା ଦ୍ୱାରା ଝାଡ଼ଖଣ୍ଡର 11ଟି ଜିଲ୍ଲାର 1.5 କୋଟି ଲୋକ ଉପକୃତ ହୋଇପାରିବେ । ପ୍ରଧାନମନ୍ତ୍ରୀ କହିଥିଲେ, “ଏହି ଝାଡ଼ଖଣ୍ଡ ମାଟିରୁ ଆୟୁଷ୍ମାନ ଭାରତ ଯୋଜନାର ଶୁଭାରମ୍ଭ କରାଯାଇଥିଲା ଯାହା ଝାଡ଼ଖଣ୍ଡର ହଜାର ହଜାର ଲୋକଙ୍କ ସମେତ ଦେଶର ଲକ୍ଷାଧିକ ଲୋକଙ୍କୁ ଲାଭାନ୍ୱିତ କରିଛି । ଆହୁରି ରାଜ୍ୟରେ ସ୍ୱାସ୍ଥ୍ୟ ଭିତ୍ତିଭୂମିର ଉନ୍ନତି ଲାଗି ନିରନ୍ତର ପ୍ରୟାସ କରାଯାଉଛି ।” ସେ ହଜାରିବାଗ, ଦୁମକା, ପାଲାମୁ ଏବଂ ଜାମଶେଦପୁର ଠାରେ 500 ଶଯ୍ୟା ବିଶିଷ୍ଟ ହସପିଟାଲ ପାଇଁ ଶିଳାନ୍ୟାସ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ସ୍ୱାସ୍ଥ୍ୟ ଏବଂ ସ୍ୱଚ୍ଛ ପାନୀୟ ଜଳ ଜୀବନର ଅବିଚ୍ଛେଦ୍ୟ ଅଙ୍ଗ । ଏବଂ ଆଜି ଝାଡ଼ଖଣ୍ଡରେ ଲୋକାର୍ପଣ ହୋଇଥିବା ଜଳପ୍ରକଳ୍ପ ରାଜ୍ୟବାସୀଙ୍କ ଉତମ ସ୍ୱାସ୍ଥ୍ୟ ସୁନିଶ୍ଚିତ କରିବ । ରାମଗଡ଼ ଏବଂ ହଜାରୀବାଗ ଜିଲ୍ଲାରେ 4ଟି ଗ୍ରାମୀଣ ଜଳ ଯୋଗାଣ ଯୋଜନାକୁ ଉଦଘାଟନ କରିଥିଲେ । ସେ ଏହି ଦୁଇଟି ଜିଲ୍ଲାରେ ଅତିରିକ୍ତ 6ଟି ଗ୍ରାମୀଣ ଜଳ ଯୋଗାଣ ଯୋଜନା ପାଇଁ ଶିଳାନ୍ୟାସ କରିଥିଲେ । ଏଥିସହିତ ଦୁର୍ବଳ ଜନଜାତି ସମୁଦାୟ ରହୁଥିବା ଅଂଚଳ ପାଇଁ ଜଳଯୋଗାଣ ଯୋଜନା ନିମନ୍ତେ ସେ ଶିଳାନ୍ୟାସ କରିଥିଲେ । ସେ ମଧ୍ୟ ହଜାରିବାଗ ଠାରେ ସହରାଂଚଳ ଜଳଯୋଗାଣ ଯୋଜନା ପାଇଁ ଶିଳାନ୍ୟାସ କରିଥିଲେ । 500 କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ ହଜାରିବାଗର 56ହଜାର ପରିବାରକୁ ସ୍ୱଚ୍ଛ ପାନୀୟ ଜଳ ଯୋଗାଇବ ।

ପ୍ରଧାନମନ୍ତ୍ରୀ ମଧ୍ୟ ନମାମି ଗଙ୍ଗେ ଯୋଜନା ଅଧୀନରେ ସାହିବଗଞ୍ଜ ବର୍ଜ୍ୟ ଜଳ ପରିଚାଳନା ପ୍ଲାଂଟ ଏବଂ ମଧୁସୁଦନ ଘାଟକୁ ଉଦଘାଟନ କରିଥିଲେ ।

ଇ-ନାମ ଅଧୀନରେ ମୋବାଇଲ ଫୋନ କ୍ରୟ ଲାଗି କୃଷକମାନଙ୍କୁ ଡିବିଟି ଯୋଜନାରେ ସହାୟତା ଯୋଗାଇ ଦେବା ନିମନ୍ତେ ବଛା ବଛା ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଚେକ ବଂଟନ କରିଥିଲେ । ପ୍ରଧାନମନ୍ତ୍ରୀ କହିଥିଲେ, “ଏହି ଯୋଜନା ଦ୍ୱାରା 27 ଲକ୍ଷ କୃଷକ ଲାଭାନ୍ୱିତ ହେବେ । ସ୍ପାର୍ଟଫୋନ ଜରିଆରେ ସେମାନେ କେବଳ ପାଣିପାଗ ସୂଚନା ନୁହେଁ ବରଂ ଫସଲ ଦର, ସରକାରୀ ଯୋଜନା ଏବଂ ନୂତନ ଚାଷ ପ୍ରଣାଳି ସମ୍ପର୍କରେ ସୂଚନା ପାଇପାରିବେ ।”

ରାମଗଡ଼ ଠାରେ ପ୍ରଧାନମନ୍ତ୍ରୀ ଏକମାତ୍ର ମହିଳା ଇଞ୍ଜିନିୟରିଂ କଲେଜର ଉଦଘାଟନ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ପୂର୍ବ ଭାରତରେ ଏହା ହେଉଛି ପ୍ରଥମ କଲେଜ ଏବଂ ସାରା ଭାରତରେ ତୃତୀୟ ଏପରି ଏକ ଇଞ୍ଜିନିୟରିଂ କଲେଜ ଯେଉଁଠି କେବଳ ମହିଳାମାନେ ଇଞ୍ଜିନିୟରିଂ ପଢ଼ିପାରିବେ । ହଜାରିବାଗ ଆଚାର୍ଯ୍ୟ ବିନୋବା ଭାବେ ବିଶ୍ୱବିଦ୍ୟାଳୟର ଜନଜାତି ଅଧ୍ୟୟନ କେନ୍ଦ୍ର ପାଇଁ ମଧ୍ୟ ପ୍ରଧାନମନ୍ତ୍ରୀଙ୍କ ଦ୍ୱାରା ଶିଳାନ୍ୟାସ କରାଯାଇଥିଲା । ପ୍ରଧାନମନ୍ତ୍ରୀ କହିଥିଲେ ଯେ ସବକା ସାଥ ସବକା ବିକାଶର ଉଦ୍ଦେଶ୍ୟ ହେଉଛି ଗରିବ, ମହିଳା, ଯୁବକ ଏବଂ ଜନଜାତିଙ୍କ ସମେତ ସମାଜର ସବୁବର୍ଗଙ୍କ ସଶକ୍ତିକରଣ । ମହିଳା ଓ ଜନଜାତିଙ୍କ ପାଇଁ କଲେଜ ଏ ଦିଗରେ ଏକ ପ୍ରୟାସ ।
ସରକାରୀ ସ୍କୁଲ ଛାତ୍ରଛାତ୍ରୀଙ୍କ ପାଇଁ କାହ୍ନା ଦୁଗ୍ଧ ଯୋଜନାର ଶୁଭାରମ୍ଭ କରି ପ୍ରଧାନମନ୍ତ୍ରୀ ଚୟନ ହୋଇଥିବା ସ୍କୁଲ ପିଲାମାନଙ୍କୁ କ୍ଷୀର ପ୍ୟାକେଟ ବଂଟନ କରିଥିଲେ । ଏହି ଯୋଜନାରେ ଛାତ୍ରଛାତ୍ରୀଙ୍କୁ ଦିନକୁ 200 ମିଲି କ୍ଷୀର ଦୈନିକ ଯୋଗାଇ ଦିଆଯିବ ଯାହା ଅପପୁଷ୍ଟି ବିରୋଧରେ ଲଢ଼ିବା ଲାଗି ସେମାନଙ୍କୁ ବଳ ଯୋଗାଇବ । ପ୍ରଧାନମନ୍ତ୍ରୀ କହିଥିଲେ “ପ୍ରତ୍ୟେକ ଶିଶୁ ନିଜର ପୂର୍ଣ୍ଣ ସମ୍ଭାବନାକୁ ବାସ୍ତବ ରୂପ ଦେବ ଏବଂ ଦେଶକୁ ଗୌରାବାନ୍ୱିତ କରିବ” ।

ପ୍ରଧାନମନ୍ତ୍ରୀ ଦୋହରାଇଥିଲେ ଯେ ତାଙ୍କ ସରକାର ସଂଗ୍ରହାଳୟ ଏବଂ ସ୍ମାରକୀରେ ଆମ ସ୍ୱାଧୀନତା ସଂଗ୍ରାମର ଜନଜାତି ନାୟକମାନଙ୍କ ସ୍ମୃତିକୁ ସଂରକ୍ଷିତ ଓ ସୁରକ୍ଷିତ ରଖିବା ଲାଗି ପ୍ରୟାସ କରୁଛି । ଝାଡ଼ଖଣ୍ଡରେ ବିର୍ସାମୁଣ୍ଡା ସଂଗ୍ରହାଳୟ ଏହାର ଏକ ଉଦାହରଣ ।