ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ତିଳକ ମାର୍ଗଠାରେ ଭାରତୀୟ ପ୍ରତ୍ନତତ୍ତ୍ଵ ଗବେଷଣା ସଂସ୍ଥାନ(ASI)ର ନୂତନ ହେଡକ୍ୱାର୍ଟର-ଦେଓଧର ଭବନର ଉଦଘାଟନ କରିଛନ୍ତି ।

ଏହି ଅବସରରେ ବକ୍ତବ୍ୟ ରଖି ସେ କହିଥିଲେ ଯେ ଗତ ପ୍ରାୟ 150 ବର୍ଷ ଧରି ଭାରତୀୟ ପ୍ରତ୍ନତତ୍ତ୍ଵ ସର୍ଭେ ସଂସ୍ଥା ଗୁରୁତ୍ୱପୂର୍ଣ୍ଣ କାର୍ଯ୍ୟ ସମ୍ପାଦନ କରିଛି ।

ପ୍ରଧାନମନ୍ତ୍ରୀ ଆମ ଇତିହାସ ଏବଂ ଆମ ସମୃଦ୍ଧ ପ୍ରତ୍ନତତ୍ତ୍ଵର ଐତିହ୍ୟକୁ ନେଇ ଗର୍ବ କରିବାର ଗୁରୁତ୍ୱ ଉପରେ ଜୋର ଦେଇଥିଲେ । ସେ କହିଲେ ଯେ ନିଜର ଆଞ୍ଚଳିକ ଐତିହ୍ୟ, ନିଜ ସହର ଓ ଅଞ୍ଚଳର ପ୍ରତ୍ନତତ୍ତ୍ଵ ସମ୍ବନ୍ଧରେ ଜାଣିବା ଉପରେ ଜନସାଧାରଣ ଆଗଭର ହେବା ଉଚିତ । ସେ କହିଲେ ଯେ ଆଞ୍ଚଳିକ ପ୍ରତ୍ନତତ୍ତ୍ଵକୁ ବିଦ୍ୟାଳୟ ପାଠ୍ୟକ୍ରମର ଅଂଶବିଶେଷ କରାଯାଇପାରେ । ଏ ପ୍ରସଙ୍ଗରେ ସେ ମଧ୍ୟ ଉତ୍ତମ ତାଲିମପ୍ରାପ୍ତ ପର୍ଯ୍ୟଟକ ଗାଇଡମାନଙ୍କ ଗୁରୁତ୍ୱ ସମ୍ବନ୍ଧରେ ପ୍ରକାଶ କରିଥିଲେ, ଯେଉଁମାନେ କି ସେମାନଙ୍କ ଅଞ୍ଚଳର ଇତିହାସ ଏବଂ ଐତିହ୍ୟ ସମ୍ବନ୍ଧରେ ସୁପରିଚିତ ଥିବେ ।

ସେ କହିଲେ ଯେ ଦୀର୍ଘ ଦିନ ଧରି ପ୍ରତ୍ନତତ୍ତ୍ଵବିତମାନଙ୍କ ଦ୍ୱାରା କଠିନ ଶ୍ରମ ଫଳରେ କରାଯାଇଥିବା ପ୍ରତ୍ନତାତ୍ତ୍ୱିକ ଆବିଷ୍କାର ପଛରେ ଏହାର ଏକ ଚମତ୍କାର କାହାଣୀ ସଂଶ୍ଳିଷ୍ଟ ରହିଛି । ଏ ପ୍ରସଙ୍ଗରେ ସେ ମନେ ପକାଇଥିଲେ ଯେ କିପରି ଭାବେ ଭାରତ ଓ ଫ୍ରାନ୍ସ ଟିମ ଦ୍ୱାରା ମିଳିତ ଭାବେ କରାଯାଇଥିବା ଏକ ପ୍ରତ୍ନତାତ୍ତ୍ୱିକ ଆବିଷ୍କାରର ପ୍ରାଥମିକ ଅନୁଭବ ପାଇବା ପାଇଁ ସେ ଓ ଫ୍ରାନ୍ସର ରାଷ୍ଟ୍ରପତି କିଛି ବର୍ଷ ତଳେ ଚଣ୍ଡିଗଡ ଗସ୍ତ କରିଥିଲେ ।

ପ୍ରଧାନମନ୍ତ୍ରୀ କହିଲେ ଯେ ଭାରତ ଏହାର ମହାନ ଐତିହ୍ୟକୁ ଗର୍ବ ଏବଂ ବିଶ୍ୱାସର ସହିତ ବିଶ୍ୱ ଆଗରେ ପ୍ରଦର୍ଶିତ କରିବା ଆବଶ୍ୟକ ।
ନୂତନ ଏଏସଆଇ ମୁଖ୍ୟାଳୟରେ ଅତ୍ୟାଧୁନିକ ପ୍ରଯୁକ୍ତି ବ୍ୟବସ୍ଥା ରହିଛି, ଯେଉଁଥିରେ ସାମିଲ ଅଛି ଶକ୍ତି ସାମର୍ଥ୍ୟ ଯୁକ୍ତ ଆଲୋକୀକରଣ ଏବଂ ବର୍ଷା ଜଳ ଅମଳ ବ୍ୟବସ୍ଥା । ଏଥିରେ ମଧ୍ୟ ରହିଛି ଏକ କେନ୍ଦ୍ରୀୟ ପ୍ରତ୍ନତାତ୍ତ୍ୱିକ ପାଠାଗାର ଯେଉଁଥିରେ କି ପାଖାପାଖି 1.35 ଲକ୍ଷ ପୁସ୍ତକ ଏବଂ ଜର୍ଣ୍ଣାଲ ସ୍ଥାନିତ ହୋଇଛି ।