ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀସ୍ଥିତ ତାଙ୍କ ସରକାରୀ ବାସଭବନ ୭, ଲୋକ କଲ୍ୟାଣ ମାର୍ଗଠାରେ ଶିଖ ପ୍ରତିନିଧି ଦଳକୁ ଅଭ୍ୟର୍ଥନା ଜଣାଇଛନ୍ତି । ପ୍ରତିନିଧି ଦଳରେ ସମାଜର ବିଭିନ୍ନ ବର୍ଗର ବ୍ୟକ୍ତିମାନେ ରହିଥିବା ବେଳେ, କେନ୍ଦ୍ରମନ୍ତ୍ରୀ ଶ୍ରୀ ହରଦୀପ ସିଂ ପୁରୀ ମଧ୍ୟ ଏହି ଅବସରରେ ଉପସ୍ଥିତ ଥିଲେ ।

ପ୍ରଧାନମନ୍ତ୍ରୀ ଏହି ଅବସରରେ ତାଙ୍କର ଶିଖ ସମ୍ପ୍ରଦାୟ ସହ ଥିବା ଦୀର୍ଘଦିନର ସମ୍ପର୍କର ସ୍ମୃତିଚାରଣ କରିଥିଲେ । ଗୁରୁଦ୍ୱାରା ଯିବାସହ ସେବାରେ ସମୟ କାଟିବା, ଲାଙ୍ଗରରେ ଯୋଗ ଦେବା ତଥା ଶିଖ ପରିବାର ସହ ରହିବା ମୋ ଜୀବନର ଏକ ଅଂଶ ବୋଲି ସେ କହିଥିଲେ । ଶିଖ ସନ୍ଥମାନଙ୍କ ପାଦ ପ୍ରଧାନମନ୍ତ୍ରୀଙ୍କ ବାସଭବନରେ ପଡିଥାଏ । ସେମାନଙ୍କ ମଧ୍ୟରେ ମୁଁ ନିଜକୁ ଭାଗ୍ୟବାନ ମନେକରେ ବୋଲି ସେ କହିଥିଲେ । ତାଙ୍କର ବିଦେଶ ଯାତ୍ରା ବେଳେ ସେ ଶିଖ ଐତିହ୍ୟର ବିଶ୍ୱର ପ୍ରତ୍ୟେକ ସ୍ଥାନ ପରିଦର୍ଶନ କରିଥିବା ପ୍ରକାଶ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଆମର ଗୁରୁମାନେ ଆମକୁ ସାହସିକତା ଓ ସେବାର ଶିକ୍ଷା ଦେଇଛନ୍ତି । ଭାରତର ଜନସାଧାରଣ ପୃଥିବୀର ଅନ୍ୟାନ୍ୟ ସ୍ଥାନକୁ ବିନା ସମ୍ବଳରେ ଯାଇ ନିଜର ପରିଶ୍ରମ ବଳରେ ସେଠାରେ ସଫଳତା ହାସଲ କରିଛନ୍ତି । ଏହା ହିଁ ନବ ଭାରତର ଉତ୍ସାହ ବୋଲି ସେ କହିଥିଲେ ।

ନବଭାରତ ମତିଗତି ଉପରେ ସନ୍ତୋଷ ପ୍ରକଟ କରି ଜୋର ଦେଇ ପ୍ରଧାନମନ୍ତ୍ରୀ କହିଥିଲେ ଯେ ନୂତନ ଭାରତ ଗତିଶୀଳ ହୋଇ ଆଗେଇବା ସହ ସମଗ୍ର ପୃଥିବୀରେ ଏହାର ଛାପ ଛାଡୁଛି । କରୋନା ବୈଶ୍ୱିକ ମହାମାରୀ ଏହାର ବୃହତ୍ତମ ଦୃଷ୍ଟାନ୍ତ । ମହାମାରୀର ପ୍ରଥମ ଅବସ୍ଥାରେ ପୁରୁଣାକାଳିଆ ଢ଼ଙ୍ଗରେ ଲୋକମାନେ ଭାରତର ଅବସ୍ଥା ନେଇ ସନ୍ଦେହ ପ୍ରକଟ କରୁଥିଲେ । ମାତ୍ର ଏବେ ସେମାନେ ବୈଶ୍ୱିକ ମହାମାରୀ ପରିଚାଳନା ଢ଼ଙ୍ଗ ଦେଇ ଭାରତର ଦୃଷ୍ଟାନ୍ତ ଦେଉଛନ୍ତି । ଆଗରୁ ଭାରତର ବିଶାଳ ଜନସଂଖ୍ୟା ତଥା ସମୂହ ଟିକାକରଣ ନେଇ ସମସ୍ତେ ସନ୍ଦେହ ପ୍ରକଟ କରୁଥିଲେ । ମାତ୍ର ଆଜି ଭାରତ ସର୍ବବୃହତ ଟିକା ପ୍ରସ୍ତୁତକାରୀ ଭାବେ ଉଭା ହୋଇଛି । ଆପଣମାନେ ଗର୍ବ କରିବା ଉଚିତ ଯେ ଶତକଡା ୯୯ ଭାଗ ଟିକାକରଣ ଆମର ସ୍ୱଦେଶ ପ୍ରସ୍ତୁତ ଟିକା ଯୋଗେ ହିଁ ହୋଇଛି ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଏଭଳି କଠିନ ପରିସ୍ଥିତିରେ ମଧ୍ୟ ଭାରତ ବିଶ୍ୱର ସର୍ବବୃହତ ଷ୍ଟାର୍ଟଅପ ଅନୁକୂଳ ପରିବେଶ ସୃଷ୍ଟି କରିପାରିଛି । ଆମର ୟୁନିକର୍ଣ୍ଣ ସଂଖ୍ୟା ନିରନ୍ତର ବୃଦ୍ଧି ପାଉଛି । ଏହି ଅଭିବୃଦ୍ଧି ଧାରା ଓ ଭାରତର ବିଶ୍ୱସନୀୟତା ସର୍ବାଧିକ ସନ୍ତୋଷ ଓ ଗର୍ବ ଆମ ପ୍ରବାସୀ ଭାରତୀୟଙ୍କୁ ଦେଇଛି । ମୁଁ ସବୁବେଳେ ଆମର ପ୍ରବାସୀମାନଙ୍କୁ ଭାରତର ରାଷ୍ଟ୍ରଦୂତ ଭାବେ ବିବେଚନା କରେ । ଆପଣମାନେ ସମସ୍ତେ ବିଦେଶରେ ମାଆ ଭାରତୀଙ୍କ ପରିଚୟ ଓ ଦୃପ୍ତ କଣ୍ଠସ୍ୱର ବୋଲି ସେ କହିଥିଲେ । ଏପରିକି ପ୍ରବାସୀମାନେ ମଧ୍ୟ ଭାରତର ଅଭିବୃଦ୍ଧି ନେଇ ନିଜକୁ ଗର୍ବିତ ମନେ କରୁଛନ୍ତି । ଆମେ ବିଶ୍ୱରେ ଯେଉଁଆଡେ ଥାଉନା କାହିଁକି ‘ଇଣ୍ଡିଆ ଫାଷ୍ଟ’ ଆମର ପ୍ରଥମ ବିଶ୍ୱାସ ହେବା ବିଧେୟ ବୋଲି ସେ କହିଥିଲେ ।

ଗୁରୁମାନଙ୍କ ମହାନ ଅବଦାନ ଓ ତ୍ୟାଗ ପ୍ରତି ନତମସ୍ତକ ହୋଇ ପ୍ରଧାନମନ୍ତ୍ରୀ, ଗୁରୁନାନକ ଦେବ କିପରି ସମଗ୍ର ଦେଶର ଚେତନାଜାଗ୍ରତ କରାଇବା ସହ ଦେଶକୁ ଅନ୍ଧାରରୁ ଆଲୋକ ପଥରେ ବାଟ କଢ଼ାଇ ନେଇଥିଲେ ତାହା ପ୍ରକାଶ କରିଥିଲେ । ସେ କହିଥିଲେ ଯେ ଗୁରୁମାନେ ଦେଶସାରା ଭ୍ରମଣକରୀ ସେମାନଙ୍କ ଉତ୍ସାହର ପଦଚିହ୍ନ ସେ ସବୁ ସ୍ଥାନରେ ଛାଡି ଦେଇ ଯାଇଛନ୍ତି । ସେମାନେ ପୂଜା ପାଉଥିବା ବେଳେ ସେମାନଙ୍କ ପ୍ରତି ବିଶ୍ୱାସ ସବୁଆଡେ ରହିଛି । ଗୁରୁମାନଙ୍କ ପାଦଚିହ୍ନ ଦ୍ୱାରା ଏହି ମହାନ ଦେଶ ପବିତ୍ର ହେବା ସହ ତାହା ଜନସାଧାରଣଙ୍କୁ ଉତ୍ସାହିତ କରିଛି । ଶିଖ ପରମ୍ପରା ହେଉଛି ଏକ ଭାରତ, ଶ୍ରେଷ୍ଠ ଭାରତର ପରମ୍ପରା ବୋଲି ସେ କହିଥିଲେ । ପ୍ରଧାନମନ୍ତ୍ରୀ ଭାରତର ସ୍ୱାଧୀନତା ସଂଗ୍ରାମ ଓ ସ୍ୱାଧୀନ ଭାରତରେ ଶିଖମାନଙ୍କ ଅବଦାନ ପ୍ରତି ଦେଶର କୃତଜ୍ଞତା ଜ୍ଞାପନ କରିଥିଲେ । ଶିଖ ସମ୍ପ୍ରଦାୟ ସାହସ, ପରାକ୍ରମ ଓ ଦେଶ ପାଇଁ କଠିନ ପରିଶ୍ରମ ସହ ସମାନ ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ ପୁଣି ଥରେ ଭାରତୀୟ ସ୍ୱାଧୀନତା ସଂଗ୍ରାମରେ ତାଙ୍କ ଦୃଷ୍ଟିକୋଣର ଅବତାରଣା କରିଥିଲେ । ସେ କହିଥିଲେ ଯେ ଏହି ସଂଗ୍ରାମ କେବଳ ଗୋଟିଏ ନିର୍ଦ୍ଦିଷ୍ଟ ସମୟ ଅବଧି ମଧ୍ୟରେ ସୀମିତ ନୁହେଁ, ଏହା ହଜାର ହଜାର ବର୍ଷର ଚେତନା, ଆଦର୍ଶ, ଆଧ୍ୟାତ୍ମିକ ମୂଲ୍ୟବୋଧ ଓ ତପସ୍ୟାର ଫଳ ବୋଲି ସେ କହିଥିଲେ ।

ଗୁରୁ ତେଗବାହାଦୁରଙ୍କ ୪୦୦ତମ ପ୍ରକାଶ ପର୍ବ, ଗୁରୁ ନାନକ ଦେବଜୀଙ୍କ ୫୫୦ତମ ପ୍ରକାଶ ପର୍ବ ଓ ଗୁରୁ ଗୋବିନ୍ଦ ସିଂଜୀଙ୍କ ୩୫୦ତମ ପ୍ରକାଶ ପର୍ବରେ ନିଜକୁ ସାମିଲ କରିଥିବାରୁ ଶ୍ରୀ ମୋଦୀ ନିଜକୁ ଭାଗ୍ୟବାନ ମଣି ସନ୍ତୋଷ ପ୍ରକଟ କରିଥିଲେ । ସେ ମଧ୍ୟ କର୍ତ୍ତାରପୁର ଚଲାପଥର ନିର୍ମାଣ, ଲାଙ୍ଗର ଟିକସ ମୁକ୍ତ କରିବା, ହାରମନ୍ଦିର ସାହିବ ନିମନ୍ତେ ଏଫସିଆରଏ ଅନୁମତି ଓ ଗୁରୁଦ୍ୱାର ଗୁଡିକର ଭିତ୍ତିଭୂମି ବିକାଶ ଓ ଗୁରୁଦ୍ୱାର ଆଖପାଖ ଅଞ୍ଚଳର ସଫେଇ କାର୍ଯ୍ୟ ତାଙ୍କ ସରକାରଙ୍କ ଅମଳରେ କରାଯାଇଥିବା ପ୍ରକାଶ କରିଥିଲେ ।

ପ୍ରଧାନମନ୍ତ୍ରୀ ଗୁରୁମାନଙ୍କ ସେବା ଉପରେ ଗୁରୁତ୍ୱକୁ ଅମ୍ରିତ କାଳର ମନ୍ତ୍ର ସବକା ସାଥ, ସବକା ବିକାଶ, ସବକା ବିଶ୍ୱାସ ଓ ସବକା ପ୍ରୟାସ ସହ ଯୋଗକରି ଏହା ସେହି ଉତ୍ସାହର ପ୍ରତୀକ ବୋଲି କହିଥିଲେ । ଏହି ସେବା ମନୋଭାବ କେବଳ ବର୍ତ୍ତମାନ ନୁହେଁ ଆମର ଭବିଷ୍ୟତ ବଂଶଧରମାନଙ୍କ ନିମନ୍ତେ ମଧ୍ୟ ଗୁରୁତ୍ୱପୂର୍ଣ୍ଣ । ପରିବେଶ, ପୌଷ୍ଟିକତା ଓ ସାଂସ୍କୃତିକ ମୂଲ୍ୟବୋଧର ସୁରକ୍ଷା ପାଇଁ ଶିଖମାନଙ୍କ ସଦାସର୍ବଦା ସଚେତନତା ଯୋଗୁଁ ତାହାର ପ୍ରଶଂସା କରିଥିଲେ । ନିକଟରେ ଆରମ୍ଭ କରାଯାଇଥିବା ଅମୃତ ସରୋବର ଯୋଜନାକୁ ସାକାର କରିବାକୁ ଶ୍ରୀ ମୋଦୀ ସମସ୍ତଙ୍କୁ ଅନୁରୋଧ କରିଥିଲେ ।

Elated to host a Sikh delegation at my residence. https://t.co/gYGhd5GI6l

— Narendra Modi (@narendramodi) April 29, 2022

SM/DD