ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ରବିବାର ସନ୍ଧ୍ୟାରେ(୦୫.୦୬.୨୦୧୬) ଜେନେଭା ଯାତ୍ରା କରିବା ପୂର୍ବରୁ କତାରର ଦୋହାଠାରେ ପ୍ରବାସୀ ଭାରତୀୟ ସଂପ୍ରଦାୟ ସହ ମତ ବିନିମୟ କରି ସେମାନଙ୍କ ସମାବେଶକୁ ସମ୍ବୋଧିତ କରିଛନ୍ତି ।

ଉତ୍ସୁକ ପ୍ରବାସୀମାନଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ ସେମାନେ କତାରରେ ରହିବା ଏବଂ କାର୍ଯ୍ୟ କରିବା ସତ୍ତ୍ୱେ ଭାରତ ସହ ସଂପର୍କ ତୁଟାଇ ନାହାଁନ୍ତି । ଏବେ ବିଶ୍ୱ ଦରବାରରେ ଭାରତର ଛବି ବେଶ୍ ଉଜ୍ଜ୍ୱଳ ଏବଂ ଏହା ବୃଦ୍ଧି ପାଉଛି । ବିଶ୍ୱ ସମୁଦାୟ ଭାରତର ଅଭିବୃଦ୍ଧି ପ୍ରତି ଆଗ୍ରହ ଦେଖାଉଛନ୍ତି । ଏଭଳି ପରିବର୍ତ୍ତନ କେବଳ ୧୨୫ କୋଟି ଭାରତୀୟ ଜନତାଙ୍କ ଉତ୍ସାହ ଓ ଉଦ୍ଦୀପନା ଯୋଗୁଁ ସମ୍ଭବ ହୋଇପାରିଛି ।

ବିଶ୍ୱିକ ସଂସ୍ଥାମାନେ ଭାରତର ଅର୍ଥ ବ୍ୟବସ୍ଥାକୁ ସବୁଠାରୁ ଦୃତ ପ୍ରଗତିଶୀଳ ବୋଲି ବିବେଚନା କଲେଣି । ଆମ ଅର୍ଥ ବ୍ୟବସ୍ଥା ୨୦୧୫-୧୬ ଆର୍ଥିକ ବର୍ଷର ଅନ୍ତିମ ତ୍ରୈମାସିକରେ ସର୍ବାଧିକ ୭.୯ ପ୍ରତିଶତ ଜିଡିପି ଅଭିବୃଦ୍ଧି ଘଟିଛି । ବିଶ୍ୱରେ ଆର୍ଥିକ ମାନ୍ଦା ଅବସ୍ଥା ସତ୍ତ୍ୱେ ଭାରତୀୟ ଅର୍ଥ ବ୍ୟବସ୍ଥା ଆଗକୁ ଆଗକୁ ବଢି ଚାଲିଛି ।

ପ୍ରଧାନମନ୍ତ୍ରୀ କହିଥିଲେ ଯେ ଭାରତରେ ବହୁଦିନ ହେଲା ଭ୍ରଷ୍ଟାଚାର ସମସ୍ତଙ୍କୁ ବ୍ୟଥୀତ କରିଥିଲା । ତାଙ୍କ ସରକାର ଏହାର ମୂଳୋତ୍ପାଟନ ପାଇଁ ଏବେ ପ୍ରତିବଦ୍ଧ ହୋଇଛନ୍ତି ।

ପ୍ରଧାନମନ୍ତ୍ରୀ କହିଥିଲେ ଯେ ତାଙ୍କର କତାର ଗସ୍ତ ବେଳେ ସେଠାକାର ନେତୃବର୍ଗଙ୍କ ସହ ଫଳପ୍ରଦ ଏବଂ ଯୋଜନାବଦ୍ଧ ଦ୍ୱିପାକ୍ଷିକ ଆଲୋଚନା ହୋଇଛି । ଏହା ଦୁଇ ଦେଶ ମଧ୍ୟରେ ସଂପର୍କ ବୃଦ୍ଧିର ଏକ ନୂଆ ଅଧ୍ୟାୟ ସୃଷ୍ଟି କରିବ । ଏହି ଗସ୍ତ କାଳରେ କତାର ସରକାର ତାଙ୍କୁ ଯେଭଳି ଭବ୍ୟ ସ୍ୱାଗତ ସମ୍ବର୍ଦ୍ଧନା ଓ ଆତିଥ୍ୟ ଦେଇଛନ୍ତି ସେଥିଲାଗି କତାର ଦେଶବାସୀ ଏବଂ ସେଠାକାର ସରକାରଙ୍କୁ ପ୍ରଧାନମନ୍ତ୍ରୀ ଅଶେଷ କୃତଜ୍ଞତା ଜଣାଇଛନ୍ତି ।