ପିଏମଇଣ୍ଡିଆ

ଦକ୍ଷିଣ ଆଫ୍ରିକାର ମହାମହିମ ରାଷ୍ଟ୍ରପତି ଶ୍ରୀଯୁକ୍ତ ଜାକୋବ ଜୁମା ମହୋଦୟ,
ବନ୍ଧୁଗଣ,

ମହାଭାଗ, ଆପଣଙ୍କର ଉଷ୍ମ ସ୍ୱାଗତ ସମ୍ବର୍ଦ୍ଧନା ଓ ଆତିଥ୍ୟ ନିମନ୍ତେ ଆପଣଙ୍କୁ ଧନ୍ୟବାଦ । ଯଦିଚ ଏହି ମହାନ ଦେଶକୁ ଏହା ମୋର ପ୍ରଥମ ଗସ୍ତ, ତଥାପି ଏହି ଇନ୍ଦ୍ରଧନୁର ଦେଶରେ ମୋର ପ୍ରତିନିଧିମଣ୍ଡଳ ଏବଂ ମୁଁ ବେଶ୍ ଆପଣାର ମନେକରୁଛୁ । ଏଥିପାଇଁ, ଆମେମାନେ ଆପଣମାନଙ୍କ ନିକଟରେ ଗଭୀର ଭାବେ ଋଣୀ । ବ୍ୟକ୍ତିଗତ ଭାବେ ମୋ ପାଇଁ ଏହି ଗସ୍ତ ଏକ ଅପୂର୍ବ ସୁଯୋଗ ଆଣିଛି, ଯଦ୍ୱାରା ଏ ଧରା ପୃଷ୍ଠରେ ଅବତୀର୍ଣ୍ଣ ହୋଇଥିବା ଦୁଇଟି ମହାନ୍ ଆତ୍ମାଙ୍କ ପ୍ରତି ମୁଁ ମୋର ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରିପାରିଛି । ସେହି ମହାନ ଆତ୍ମ ହେଲେ ମହାତ୍ମା ଗାନ୍ଧୀ ଓ ନେଲସନ୍ ମାଣ୍ଡେଲା ।

ବନ୍ଧୁଗଣ,

ଶତାଦ୍ଦୀ ଶତାବ୍ଦୀ ଧରି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଲୋକ-ଲୋକଙ୍କ ମଧ୍ୟରେ ଦୃଢ଼ ସମ୍ପର୍କ ଗଢ଼ି ହୋଇ ଆସିଛି । ବର୍ଣ୍ଣବୈଷମ୍ୟବାଦ ଓ ଉପନିବେଶବାଦ ବିରୋଧରେ ଆମେ ସଂଗ୍ରାମରେ ସମାନ ଭାବେ ଏକତ୍ର ଠିଆହୋଇ ଆସିଛୁ । ଏହି ଦକ୍ଷିଣ ଆଫ୍ରିକା ଭୂଇଁରେ ହିଁ ଗାନ୍ଧୀ ତାଙ୍କ ବିବେକର ବାସ୍ତବ ଆହ୍ୱାନକୁ ଅନୁଭବ କରିଥିଲେ । ସେ ଯେତିକି ଭାରତୀୟ ସେତିକି ଦକ୍ଷିଣ ଆଫ୍ରିକୀୟ ।

ବନ୍ଧୁଗଣ,

ଆମର ସମାନ ମୂଲ୍ୟବୋଧ, ଯାତନା ଏବଂ ସଂଗ୍ରାମ ଆମର ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ସମ୍ପର୍କ ପାଇଁ ଏକ ଦୃଢ଼ ଭିତ୍ତିଭୂମି ପ୍ରଦାନ କରେ ଏବଂ ଏହାର ସଫଳତା ଅନେକ କ୍ଷେତ୍ରରେ ଜଳଜଳ ହୋଇ ଦୃଶ୍ୟମାନ । ଆଜି ଆମର ଆଲୋଚନା କାଳରେ ଆମ ସମ୍ପର୍କ ଓ ଘନିଷ୍ଠତାର ସମ୍ପୂର୍ଣ୍ଣ ପୃଷ୍ଠଭୂମିକୁ ରାଷ୍ଟ୍ରପତି ଜୁମା ଏବଂ ମୁଁ ସମୀକ୍ଷା କରିଛୁ । ଆମେ ସହମତ ହୋଇଛୁ ଯେ ଗତ ଦୁଇ ଦଶନ୍ଧି ମଧ୍ୟରେ ଆମ ସମ୍ପର୍କ ବଳିଷ୍ଠ ଭାବେ ଅଗ୍ରଗତି କରିଛି ଏବଂ ସେଥିରୁ ନିର୍ଦ୍ଦିଷ୍ଟ ସଫଳତା ମିଳିଛି । ଗତ ଦଶବର୍ଷ ଭିତରେ ଦ୍ୱିପାକ୍ଷିକ ବାଣିଜ୍ୟ କାରବାର 300 ପ୍ରତିଶତ ବୃଦ୍ଧି ପାଇଛି । ଭାରତୀୟ କମ୍ପାନୀମାନଙ୍କର ଦକ୍ଷିଣ ଆଫ୍ରିକାରେ ଏକ ଦୃଢ଼ ବ୍ୟବସାୟିକ ସ୍ୱାର୍ଥ ରହିଛି । ଆଫ୍ରିକାରେ ଆମ ଦେଶ ପକ୍ଷରୁ ହୋଇଥିବା ମୋଟ ନିବେଶର ପ୍ରାୟ ଏକ ଚତୁର୍ଥାଂଶ କେବଳ ଦକ୍ଷିଣ ଆଫ୍ରିକାରେ ହିଁ ଘଟିଛି ।

ଏବଂ ଏହି ବ୍ୟବସାୟିକ ଓ ନିବେଶ ସମ୍ପର୍କକୁ ଆହୁରି ବ୍ୟାପକ କରିବାର ଯଥେଷ୍ଟ ସାମର୍ଥ୍ୟ ରହିଛି । ବିଶେଷ କରି ନିମ୍ନଲିଖିତ କ୍ଷେତ୍ରରେ :

• ଖଣିଜ ଓ ଖନନ କ୍ଷେତ୍ର

• ଋସାୟନ ଓ ଫାର୍ମାସିଉଟିକାଲ(ଔଷଧ ପ୍ରସ୍ତୁତି)

• ଉଚ୍ଚ ପ୍ରଯୁକ୍ତିଯୁକ୍ତ ଉତ୍ପାଦନ କ୍ଷେତ୍ର ଏବଂ

• ସୂଚନା ଓ ଯୋଗାଯୋଗ ପ୍ରଯୁକ୍ତି କ୍ଷେତ୍ରରେ

ମୋର ଦୃଢ଼ ବିଶ୍ୱାସ ଯେ ଶିଳ୍ପ-ଶିଳ୍ପ ମଧ୍ୟରେ ସମ୍ପର୍କ ସ୍ଥାପନ କେବଳ ପ୍ରଚୁର ଆର୍ଥିକ ଲାଭ ପହଞ୍ଚାଇନାହିଁ, ପରନ୍ତୁ ଆମ ଉଭୟ ଦେଶର ସମାଜ ପାଇଁ ଏହା ହିତକର । ଏହା ଆମ ସମ୍ପର୍କକୁ ଏକ ନୂଆ ରୂପ ପ୍ରଦାନ କରିବ । ଏବଂ ଆମକୁ ଏକ ନୂଆ ସ୍ତରରେ ପହଞ୍ଚାଇବ । ତେଣୁ ଆମକୁ ଆଞ୍ଚଳିକ ଓ ବିଶ୍ୱସ୍ତରରେ ଏକ ନୂଆ ଭୂମିକାରେ ଅବତୀର୍ଣ୍ଣ ହେବାକୁ ଏହା ସୁଯୋଗ ପ୍ରଦାନ କରିବ । ଆଜି ଏହାପରେ ରାଷ୍ଟ୍ରପତି ଏବଂ ମୁଁ ଉଭୟ ରାଷ୍ଟ୍ରର ବ୍ୟବସାୟିକ ନେତୃବୃନ୍ଦଙ୍କ ସହ ଏକତ୍ର ବସି ଆମ ସମ୍ପର୍କରେ ସାଦୃଶ୍ୟ ଥିବା କ୍ଷେତ୍ରଗୁଡିକୁ ଚିହ୍ନଟ କରିବୁ ।

ବନ୍ଧୁଗଣ,

ଆମ ବିକାଶଶୀଳ ଅର୍ଥବ୍ୟବସ୍ଥାରେ ସ୍ୱଭାବ ଦାବିକରେ ଯେ, ମାନବ ସମ୍ବଳ ଓ ପୁଞ୍ଜିର ଉନ୍ନତିକୁ ଆମ ସହଯୋଗରେ ଅଗ୍ରପ୍ରାଧାନ୍ୟ ଦିଆଯିବା ଉଚିତ । ଧନ୍ଦାମୂଳକ, ବୈଷୟିକ ଓ ବୃତ୍ତିଗତ ଶିକ୍ଷା କ୍ଷେତ୍ରରେ ଆମର ଦକ୍ଷତା ପରସ୍ପରର ପରିପୂରକ ହେବା ଆବଶ୍ୟକ ଯଦ୍ୱାରା ଉଭୟ ଦେଶର ଜନତା ଉପକୃତ ହୋଇପାରିବେ । ଦକ୍ଷିଣ ଆଫ୍ରିକାରେ କ୍ଷୁଦ୍ର ଓ ମଧ୍ୟମ ଧରଣର ବ୍ୟବସାୟର ବିକାଶ ଲାଗି ଭାରତ ନିକଟରେ ଥିବା ବିଶେଷ ଜ୍ଞାନ ଓ ଦକ୍ଷତାକୁ ଭାରତ ଦକ୍ଷିଣ ଆଫ୍ରିକାକୁ ଯୋଗାଇ ଦେବାକୁ ପ୍ରସ୍ତୁତ ଅଛି । ଆର୍ଥିକ ସହଯୋଗ, ବ୍ୟବସାୟିକ ସମ୍ପର୍କ, ବାଣିଜ୍ୟ ଓ ନିବେଶ ବାହାରେ, ପ୍ରତିରକ୍ଷା ଓ ନିରାପତ୍ତା କ୍ଷେତ୍ରରେ ମଧ୍ୟ ଆମେ ଆମ ସହଯୋଗ ବୃଦ୍ଧି କରିପାରିବା । ଉଭୟ ଶିଳ୍ପସ୍ତରରେ ଏବଂ ଆମ ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ଓ ନିରାପତ୍ତା ଆବଶ୍ୟକତା କ୍ଷେତ୍ରରେ ଏହା ଘଟିପାରିବ । ଭାରତର ଏହା ଏପରି ଏକ କ୍ଷେତ୍ର ଯେଉଁଠି ଆମୂଳଚୂଳ ପରିବର୍ତ୍ତନ ଘଟୁଥିବା ପରିଲକ୍ଷିତ ହେଉଛି । ପ୍ରତିରକ୍ଷା ବାଣିଜ୍ୟ କ୍ଷେତ୍ରକୁ ଏହା ଆକର୍ଷଣୀୟ ସୁଯୋଗ ପ୍ରଦାନ କରୁଛି । ମିଳିତ ଭାବେ ପ୍ରତିରକ୍ଷା ଉପକରଣ ଉତ୍ପାଦନ ଏବଂ ପ୍ଲାଟଫର୍ମ ବିକାଶ ସକାଶେ ଆମ ଦେଶର କମ୍ପାନୀମାନେ ସେମାନଙ୍କ ସାମର୍ଥ୍ୟ ଯୋଗାଇଦେବାକୁ ପ୍ରସ୍ତୁତ ଅଛନ୍ତି । ଏବଂ କେବଳ ଆମର ପ୍ରତିରକ୍ଷା ଆବଶ୍ୟକତା ନୁହେଁ, ଏହା କ୍ଷେତ୍ରୀୟ ଏବଂ ବିଶ୍ୱ ଚାହିଦାକୁ ମଧ୍ୟ ପୂରଣ କରିବା ଦିଗରେ ସହାୟକ ହୋଇପାରିବ ।

ବନ୍ଧୁଗଣ,

ରାଷ୍ଟ୍ରପତି ଜୁମା ଏବଂ ମୁଁ ବିଭିନ୍ନ ଅନ୍ତରାଷ୍ଟ୍ରୀୟ ପ୍ରସଙ୍ଗ ଏବଂ ଉତ୍ପନ୍ନ ବିଶ୍ୱ ଚାଲେଞ୍ଜ ଦିଗରେ ଅଧିକ ଘନିଷ୍ଠତାର ସହ କାର୍ଯ୍ୟକରିବାର ଆବଶ୍ୟକତା ଘେନି ସହମତି ହୋଇଛୁ । ପରମାଣୁ ଯୋଗାଣକାରୀ ଗୋଷ୍ଠୀ (ଏନଏସଜି)ରେ ଭାରତର ସଦସ୍ୟତା ପାଇଁ ଦକ୍ଷିଣ ଆଫ୍ରିକାର ସମର୍ଥନ ଲାଗି ମୁଁ ରାଷ୍ଟ୍ରପତି ଜୁମାଙ୍କୁ ଧନ୍ୟବାଦ ଜଣାଉଛି । ଆମେ ଜାଣୁ ଯେ, ଦକ୍ଷିଣ ଆଫ୍ରିକା ଭଳି ବନ୍ଧୁ ରାଷ୍ଟ୍ରଙ୍କ ସକ୍ରିୟ ସହଯୋଗ ଉପରେ ଆମେ ନିର୍ଭର କରିପାରିବୁ । ଜଳବାୟୁ ପରିବର୍ତ୍ତନ ଓ ବିଶ୍ୱ ଉପରେ ଏହାର ପ୍ରଭାବ ଘେନି ଆମେ ଆମ ମିଳିତ ଉଦ୍ବେଗ ପ୍ରକଟ କରୁ । ଏହି ଚାଲେଞ୍ଜର ମୁକାବିଲା ସକାଶେ ଅକ୍ଷୟ ଶକ୍ତି ଉପରେ ଗୁରୁତ୍ୱ ଆରୋପ ଏବଂ ଏହାର ବ୍ୟାପକ ଉତ୍ପାଦନ ଏକାନ୍ତ ଜରୁରୀ । ଏହି ଆବଶ୍ୟକତାକୁ ଦୃଷ୍ଟିରେ ରଖି ପ୍ୟାରିସଠାରେ ଅନୁଷ୍ଠିତ COP 21 ସମ୍ମିଳନୀ ବେଳେ ଭାରତ ଅନ୍ତରାଷ୍ଟ୍ରୀୟ ସୌର ସହଯୋଗ ସଂଗଠନ ଗଠନ ଲାଗି ନେତୃତ୍ୱ ଗ୍ରହଣ କରିଥିଲା । ମୋର ବିଶ୍ୱାସ ଯେ ସୌରଶକ୍ତି ଉତ୍ପାଦନ ବୃଦ୍ଧି ନିମନ୍ତେ ଜ୍ଞାନ, ପ୍ରଯୁକ୍ତି ଏବଂ ଅର୍ଥପ୍ରାପ୍ତି ନିମନ୍ତେ ଏହା ସବୁଠାରୁ ସଫଳ ପ୍ଲାଟଫର୍ମ । ଏହି ସହଯୋଗରେ ଅଂଶୀଦାର ହୋଇଥିବାରୁ ମୁଁ ରାଷ୍ଟ୍ରପତି ଜୁମାଙ୍କୁ ଧନ୍ୟବାଦ ଜଣାଉଛୁ । ଏଥିଲାଗି 120ଟି ରାଷ୍ଟ୍ର ସମର୍ଥନ ଜ୍ଞାପନ କରିସାରିଛନ୍ତି । ଆତଙ୍କବାଦ ଆଉ ଏକ ସମାନ ବିପଦ ଯେଉଁଥି ଲାଗି ଉଭୟ ରାଷ୍ଟ୍ର ସମଭାବରେ ଉଦ୍ବେଗ ପ୍ରକଟ କରନ୍ତି ଏବଂ ଉଭୟ ରାଷ୍ଟ୍ରର ଜନତାଙ୍କ ସୁରକ୍ଷା ଓ ନିରାପତ୍ତା ଲାଗି ଏହା ବିପଦ ସୃଷ୍ଟି କରେ । ଏହା ଆମ ସମାଜର ମୂଳଭୂତ୍ତିକୁ ସଂକ୍ରମଣ କରେ । ତେଣୁ ରାଷ୍ଟ୍ର ସକ୍ରିୟ ଭାବେ ସତର୍କ ରହିବା ଓ ସହଯୋଗ କରିବା ଲାଗି ରାଷ୍ଟ୍ରପତି ମହୋଦୟ ଓ ମୁଁ ସହମତ ହୋଇଛୁ ।

ବନ୍ଧୁଗଣ,

ଭାରତ ମହାସାଗରର ଜଳ ରାଶି ହେଲା ଆମର ସମାନ ସାମୁଦ୍ରିକ ସୀମା । ଏବଂ ଭାରତ ମହାସଗର ରିମ୍ ସଂଗଠନ (IORA) ଏବେ ଭାରତ ମହାସାଗର ତଟୀୟ ପ୍ରତିବେଶୀ ରାଷ୍ଟ୍ରଙ୍କ ମଧ୍ୟରେ ସହଯୋଗ ସ୍ଥାପନ ନିମନ୍ତେ ଏକ ବଳିଷ୍ଠ ମଞ୍ଚ ରୂପେ ମୁଣ୍ଡ ଟେକିଛି । 2017-19 ନିମନ୍ତେ ଏହି ସଂଗଠନର ଅଧ୍ୟକ୍ଷତା ପାଇଁ ମୁଁ ଦକ୍ଷିଣ ଆଫ୍ରିକାକୁ ସ୍ୱାଗତ କରୁଛି । IBSA (ଭାରତ, ବ୍ରାଜିଲ ଏବଂ ଦକ୍ଷିଣ ଆଫ୍ରିକା) ଏବଂ ବ୍ରିକ୍ସ (BRICS) ମାଧ୍ୟମରେ ବିଭିନ୍ନ ଅନ୍ତରାଷ୍ଟ୍ରୀୟ ଏଜେଣ୍ଡା ଉପରେ ଗୁରୁତ୍ୱର ସହ ଉଭୟ ଭାରତ ଓ ଦକ୍ଷିଣ ଆଫ୍ରିକା କାର୍ଯ୍ୟ କରୁଛନ୍ତି । ଚଳିତ ବର୍ଷ ଅକ୍ଟୋବର ମାସରେ ଗୋଆଠାରେ ଅନୁଷ୍ଠିତ ହେବାକୁ ଥିବା ବ୍ରିକ୍ସ ଶିଖର ସମ୍ମିଳନୀକୁ ମୁଁ ରାଷ୍ଟ୍ରପତି ଜୁମାଙ୍କୁ ସ୍ୱାଗତ କରୁଛି ।

ବନ୍ଧୁଗଣ,

ପରିଶେଷରେ ମୁଁ କହିବାକୁ ଚାହେଁ,

• ଗାନ୍ଧୀଙ୍କ ସତ୍ୟାଗ୍ରହଠାରୁ ମାଡିବାଙ୍କ କ୍ଷମା ପର୍ଯ୍ୟନ୍ତ;

• ଗୁଜରାଟ ଉପକୂଳର ବନ୍ଦରମାନଙ୍କ ଠାରୁ ଡର୍ବାନ ପର୍ଯ୍ୟନ୍ତ;

• ଆମର ସମାନ ମୂଲ୍ୟବୋଧ ଓ ସମାନ ସଂଗ୍ରାମ ପରିଦୃଶ୍ୟ

• ଆମ ସମୁଦ୍ର ଓ ଅର୍ଥବ୍ୟବସ୍ଥା ମଧ୍ୟରେ ପର୍ଯ୍ୟାପ୍ତ ସୁଯୋଗ ନିହିତ ଅଛି ଏବଂ

• ବସୁଧୈବ୍ୟ କୁଟୁମ୍ବକମ୍ ଏବଂ ଉବୁଣ୍ଟୁ ଚିନ୍ତାଧାରା ମାଧ୍ୟମରେ ଆମ ସମ୍ପର୍କର ଗାଥା ଏକ ପ୍ରତିଜ୍ଞା, ପ୍ରତିବଦ୍ଧତା, ନ୍ୟାୟ ଏବଂ ମାନବୀୟ ଉଦ୍ୟମର ଉତ୍କର୍ଷରେ ପରିଣତ ହୋଇଛି । ବାସ୍ତବିକ ଏହା ଅନନ୍ୟ ଓ ମହାନ ।

ଆପଣଙ୍କୁ ଧନ୍ୟବାଦ,

ଆପଣମାନଙ୍କୁ ଅଶେଷ ଧନ୍ୟବାଦ ।