ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଚେନ୍ନାଇରେ ୩୧ ହଜାର ୫୦୦ କୋଟି ଟଙ୍କା ବ୍ୟୟରେ ୧୧ଟି ପ୍ରକଳ୍ପର ଲୋକାର୍ପଣ ଓ ଶିଳାନ୍ୟାସ କରିଛନ୍ତି । ଏସବୁ ପ୍ରକଳ୍ପ ଭିତ୍ତିଭୂମି ବିକାଶକୁ ପ୍ରୋତ୍ସାହନ ଦେବା ସହିତ, ଯୋଗାଯୋଗ ବ୍ୟବସ୍ଥାକୁ ବଢ଼ାଇବ ଏବଂ ସ୍ଥାନୀୟ ଅଞ୍ଚଳରେ ସହଜ ଜୀବନ ଧାରଣ ସୁନିଶ୍ଚିତ କରିବ । ତାମିଲନାଡ଼ୁ ରାଜ୍ୟପାଳ ଶ୍ରୀ ଆର.ଏନ. ରବି, ମୁଖ୍ୟମନ୍ତ୍ରୀ ଶ୍ରୀ ଏମ.କେ ଷ୍ଟାଲିନ, କେନ୍ଦ୍ର ମନ୍ତ୍ରୀ ଶ୍ରୀ ଏଲ. ମୁରୁଗାନ ପ୍ରମୁଖ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।

ସମବେତ ଜନସାଧାରଣଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ ପୁଣିଥରେ ତାମିଲନାଡ଼ୁ ଆସିଥିବାରୁ ଖୁସି ବ୍ୟକ୍ତ କରିଥିଲେ । ‘‘ତାମିଲନାଡ଼ୁକୁ ଫେରିବା ସବୁବେଳେ ଏକ ସୁନ୍ଦର ଅନୁଭବ ଆଣିଥାଏ । ଏହି ମାଟି ସ୍ବତନ୍ତ୍ର । ଏ ରାଜ୍ୟର ଜନସାଧାରଣ, ସଂସ୍କୃତି ଓ ଭାଷା ଚମତ୍କାର’’, ପ୍ରଧାନମନ୍ତ୍ରୀ ପ୍ରାରମ୍ଭରେ କହିଥିଲେ । ସେ କହିଥିଲେ ଯେ, ପ୍ରତିଦିନ ତାମିଲନାଡ଼ୁରେ କେହି ନା କେହି ବିଭିନ୍ନ କ୍ଷେତ୍ରରେ ଉତ୍କର୍ଷ ଲାଭ କରୁଛନ୍ତି । ଡିଫ୍‌ (ବଧିର) ଅଲିମ୍ପିକ୍ସ ପ୍ରତିଯୋଗୀମାନଙ୍କୁ ସାକ୍ଷାତ କରିବା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ଚଳିତ ବର୍ଷ ଏହି ପ୍ରତିଯୋଗିତାରେ ଭାରତ ସର୍ବଶ୍ରେଷ୍ଠ ପ୍ରଦର୍ଶନ କରିଛି । ଦେଶ ଚଳିତ ଥର ହାସଲ କରିଥିବା ୧୬ଟି ପଦକ ମଧ୍ୟରୁ କେବଳ ତାମିଲନାଡ଼ୁର ଯୁବ ତାରକାମାନେ ୬ଟି ପଦକ ପାଇଛନ୍ତି ।

ସମୃଦ୍ଧ ତାମିଲ ସଂସ୍କୃତି ଉପରେ ମତବ୍ୟକ୍ତ କରି, ପ୍ରଧାନମନ୍ତ୍ରୀ କହିଥିଲେ ଯେ, ‘‘ତାମିଲ ଭାଷା ଚିରନ୍ତନ ଏବଂ ତାମିଲ ସଂସ୍କୃତି ବିଶ୍ବସ୍ତରୀୟ । ଚେନ୍ନାଇରୁ କାନାଡ଼ା, ମଦୁରାଇରୁ ମାଲେସିୟା, ନମକ୍କଲରୁ ନ୍ୟୁୟର୍କ, ସାଲେମରୁ ଦକ୍ଷିଣ ଆଫ୍ରିକା ପର୍ଯ୍ୟନ୍ତ, ପୋଙ୍ଗଲ ଓ ପୁତନ୍ଦୁ ପର୍ବ ବ୍ୟାପକ ଉତ୍ସାହ ଓ ଉଦ୍ଦୀପନାର ସହିତ ପାଳନ କରାଯାଇଥାଏ । ସେ ଆହୁରି ସୂଚନା ଦେଇ କହିଥିଲେ ଯେ, ନିକଟରେ କାନ୍ସ ଚଳଚ୍ଚିତ୍ର ମହୋତ୍ସବରେ, ମହାନ ତାମିଲନାଡ଼ୁ ମାଟିର ପୁତ୍ର ଏବଂ କେନ୍ଦ୍ର ମନ୍ତ୍ରୀ ତିରୁ ଏଲ ମୁରୁଗାନ ପାରମ୍ପରିକ ତାମିଲ ପୋଷାକ ପରିଧାନ କରି ରେଡ କାର୍ପେଟରେ ଚାଲିଥିଲେ । ଏହା ସାରା ବିଶ୍ବରେ ଥିବା ତାମିଲନାଡ଼ୁର ଜନସାଧାରଣଙ୍କୁ ବିଶେଷ ଭାବେ ଗର୍ବିତ କରିଥିଲା ।

ପ୍ରଧାନମନ୍ତ୍ରୀ କହିଥିଲେ ଯେ ଆଜି ଉଦଘାଟନ ଏବଂ ଶିଳାନ୍ୟାସ ହୋଇଥିବା ପ୍ରକଳ୍ପଗୁଡ଼ିକରେ ସଡ଼କ ଯୋଗାଯୋଗ ଉପରେ ବିଶେଷ ଧ୍ୟାନ ଦିଆଯାଇଛି, ଯାହାକି ସ୍ପଷ୍ଟ ଭାବେ ପରିଲକ୍ଷିତ ହେଉଛି । ଆର୍ଥିକ ସମୃଦ୍ଧି ସହ ସମ୍ପର୍କ ରହିଥିବାରୁ ଏପରି କରାଯାଇଛି । ସେ କହିଥିଲେ ଯେ ବେଙ୍ଗାଲୁରୁ-ଚେନ୍ନାଇ ଏକ୍ସପ୍ରେସ ୱେ ଦୁଇଟି ପ୍ରମୁଖ ସହରକୁ ଯୋଡ଼ିବ ଏବଂ ଚେନ୍ନାଇ ବନ୍ଦରରୁ ମଦୁରଭୋୟଲକୁ ଯୋଡ଼ୁଥିବା ଚାରି ଲେନ୍‌ ବିଶିଷ୍ଟ ଦୁଇ ଥାକିଆ ଉଚ୍ଚ ସଡ଼କ ଚେନ୍ନାଇ ବନ୍ଦରର କାର୍ଯ୍ୟଦକ୍ଷତା ବଢ଼ାଇବା ସହିତ ସହରରେ ଟ୍ରାଫିକ ଭିଡ଼ କମାଇବ ।  ପାଞ୍ଚଟି ରେଳ ଷ୍ଟେସନ ପୁନଃବିକଶିତ କରାଯାଉଥିବାରୁ ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଥିଲେ । ସେ କହିଥିଲେ ଯେ, ଭବିଷ୍ୟତର ଆବଶ୍ୟକତାକୁ ଦୃଷ୍ଟିରେ ରଖି ଆଧୁନିକୀକରଣ ଓ ବିକାଶ କାର୍ଯ୍ୟ କରାଯାଉଛି । ଅନୁରୂପ ଭାବେ, ଏହା ସ୍ଥାନୀୟ କଳା ଓ ସଂସ୍କୃତି ସହ ମିଶିବାକୁ ଯାଉଛି । ସେ କହିଥିଲେ,  ମଦୁରାଇ-ତେନି ରେଳ ଗଜ୍‌ କନଭର୍ସନ ପ୍ରକଳ୍ପ ସ୍ଥାନୀୟ ଚାଷୀଙ୍କ ପାଇଁ ସହାୟକ ହେବ କାରଣ ଏହା ସେମାନଙ୍କୁ ନୂଆ ବଜାର ଦେବ ।

ଐତିହାସିକ ଚେନ୍ନାଇ ଲାଇଟ୍‌ ହାଉସ୍‌ ପ୍ରକଳ୍ପର ଅଂଶବିଶେଷ ଭାବେ ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ପକ୍କା ଘର ପାଇଥିବା ଲୋକମାନଙ୍କୁ ପ୍ରଧାନମନ୍ତ୍ରୀ ଅଭିନନ୍ଦନ ଜଣାଇଥିଲେ । ପ୍ରଧାନମନ୍ତ୍ରୀ କହିଥିଲେ, ଆମେ ଏକ ବିଶ୍ବସ୍ତରୀୟ ପରିବର୍ତ୍ତନ ଆରମ୍ଭ କରିଥିବାରୁ ଏହା ଅତ୍ୟନ୍ତ ସନ୍ତୋଷଜନକ । ପ୍ରଥମ ପ୍ରକଳ୍ପ ରେକର୍ଡ ସମୟ ମଧ୍ୟରେ ସମ୍ପୂର୍ଣ୍ଣ ହେବା ଏବଂ ଏହା ଚେନ୍ନାଇରେ ନିର୍ମାଣ କରାଯିବା ତାଙ୍କ ପାଇଁ ଖୁସିର ବିଷୟ ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ, ବହୁମୁଖି ଲଜିଷ୍ଟିକ ପାର୍କଗୁଡ଼ିକ ଆମ ଦେଶରେ ମାଲ ପରିବହନ ଇକୋସିଷ୍ଟମ କ୍ଷେତ୍ରରେ ଏକ ଯୁଗାନ୍ତକାରୀ ପରିବର୍ତ୍ତନ ଆଣିବ । ବିଭିନ୍ନ କ୍ଷେତ୍ରରେ ଏପରି ପ୍ରକଳ୍ପ ନିଯୁକ୍ତି ସୁଯୋଗ ବଢ଼ାଇବା ସହିତ ଆତ୍ମନିର୍ଭର ଭାରତ ସଂକଳ୍ପକୁ ସାକାର କରିବ ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ, ଭିତ୍ତିଭୂମି ବିକାଶକୁ ସର୍ବାଧିକ ପ୍ରାଥମିକତା ଦେଉଥିବା ଦେଶ ବିକାଶଶୀଳରୁ ବିକଶିତ ରାଷ୍ଟ୍ର ହୋଇପାରିଛି । ଇତିହାସରୁ ଆମକୁ ଏହି ଶିକ୍ଷା ମିଳିଛି । ଉଚ୍ଚ ଗୁଣବତ୍ତା ଏବଂ ଦୀର୍ଘସ୍ଥାୟୀ ଭିତ୍ତିଭୂମି ନିର୍ମାଣ କରିବା ଲାଗି ଭାରତ ସରକାର ସମ୍ପୂର୍ଣ୍ଣ ଭାବେ ଗୁରୁତ୍ବାରୋପ କରୁଛନ୍ତି ବୋଲି ସେ କହିଥିଲେ । ଏହି କ୍ରମରେ ସେ ଉଭୟ ଭୌତିକ ଏବଂ ଉପକୂଳ ଭିତ୍ତିଭୂମି ବିଷୟରେ ଉଲ୍ଲେଖ କରିଥିଲେ । ଆମେ ଗରିବ କଲ୍ୟାଣ ଲକ୍ଷ୍ୟ ହାସଲ ପାଇଁ କାର୍ଯ୍ୟ କରୁଛୁ । ସାମାଜିକ ଭିତ୍ତିଭୂମି ଉପରେ ଆମେ ଗୁରୁତ୍ବାରୋପ କରୁଛୁ, ଯେଉଁଥିରେ ‘ସର୍ବ ଜନ ହିତାୟ ଏବଂ ସର୍ବ ଜନ ସୁଖାୟ’ ନୀତି ପ୍ରତିଫଳିତ ହେଉଛି ବୋଲି ସେ କହିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଭାରତ ସରକାର ସବୁ ପ୍ରମୁଖ ଯୋଜନାକୁ ସମ୍ପୂର୍ଣ୍ଣ ଭାବେ କାର୍ଯ୍ୟକାରୀ କରିବାର ଲକ୍ଷ୍ୟ ହାସଲ ଦିଗରେ ସମର୍ପିତ ହୋଇ କାର୍ଯ୍ୟ କରୁଛନ୍ତି । ଶୌଚାଳୟ, ଆବାସ, ଆର୍ଥିକ ଅନ୍ତର୍ଭୂକ୍ତୀକରଣ… ଯେକୌଣସି କ୍ଷେତ୍ର ହେଉ- ଆମେ ସମ୍ପୂର୍ଣ୍ଣ ପ୍ରସାର ଦିଗରେ ଅଗ୍ରସର ହେଉଛୁ । ଏହା ସମ୍ପୂର୍ଣ୍ଣ ହେଲେ କେହି ଜଣେ ହେଲେ ବଞ୍ଚିତ ବାଦ୍‌ ପଡ଼ିବେ ନାହିଁ ବୋଲି ସେ କହିଥିଲେ ।

ପାରମ୍ପରିକ ଭାବେ ଯାହାକୁ ଭିତ୍ତିଭୂମି ବୋଲି କୁହାଯାଇଥାଏ, ସେଥିରୁ ଊର୍ଦ୍ଧ୍ବକୁ ଯାଇ ସରକାର କାର୍ଯ୍ୟ କରୁଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ । ସେ କହିଥିଲେ ଯେ, କିଛି ବର୍ଷ ପୂର୍ବରୁ ଭିତ୍ତିଭୂମିର ଅର୍ଥ କେବଳ ସଡ଼କ, ଶକ୍ତି ଓ ଜଳ ବୋଲି ବୁଝାଉଥିଲା । ଆଜି ଆମେ ଭାରତର ଗ୍ୟାସ ପାଇପଲାଇନ ନେଟୱର୍କକୁ ବିସ୍ତାର କରିବା ଦିଗରେ କାର୍ଯ୍ୟ କରୁଛୁ । ଆଇ-ୱେ ଉପରେ କାର୍ଯ୍ୟ ଜାରି ରହିଛି । ସବୁ ଗାଁରେ ହାଇ ସ୍ପିଡ୍‌ ଇଣ୍ଟରନେଟ୍‌ ପହଞ୍ଚାଇବା ଆମର ସଂକଳ୍ପ ।

ପ୍ରଧାନମନ୍ତ୍ରୀ ଜୋର ଦେଇ କହିଥିଲେ ଯେ, ତାମିଲ ଭାଷା ଓ ସଂସ୍କୃତିକୁ ଆହୁରି ଲୋକପ୍ରିୟ କରିବା ଲାଗି ଭାରତ ସରକାର ସମ୍ପୂର୍ଣ୍ଣ ଭାବେ ସଂକଳ୍ପବଦ୍ଧ । ଚଳିତ ବର୍ଷ ଜାନୁଆରୀ ମାସରେ, ଚେନ୍ନାଇ ଠାରେ କେନ୍ଦ୍ରୀୟ ସାଂସ୍କୃତିକ ତାମିଲ ସଂସ୍ଥାନର ନୂତନ କ୍ୟାମ୍ପସ ଉଦଘାଟିତ ହୋଇଥିଲା। ନୂଆ ପରିସର ନିର୍ମାଣ ପାଇଁ କେନ୍ଦ୍ର ସରକାର ସମ୍ପୂର୍ଣ୍ଣ ଅର୍ଥ ଯୋଗାଇ ଦେଇଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ, ନିକଟରେ ବନାରସ ହିନ୍ଦୁ ବିଶ୍ବ ବିଦ୍ୟାଳୟ ଠାରେ ତାମିଲ ଅଧ୍ୟୟନ ଉପରେ ‘ସୁବ୍ରମଣ୍ୟମ ଭାରତୀ ଚେୟାର’ ପ୍ରତିଷ୍ଠା ପାଇଁ ଘୋଷଣା କରାଯାଇଛି । ସେ କହିଥିଲେ ଯେ, ତାଙ୍କ ସଂସଦୀୟ କ୍ଷେତ୍ରରେ ବନାରସ ହିନ୍ଦୁ ବିଶ୍ବ ବିଦ୍ୟାଳୟ ରହିଥିବାରୁ, ଏଥିରେ ସେ ବିଶେଷ ଭାବେ ଆନନ୍ଦିତ ହୋଇଛନ୍ତି ।

ପ୍ରଧାନମନ୍ତ୍ରୀ କହିଥିଲେ ଯେ, ଶ୍ରୀଲଙ୍କା ଅତି ସଙ୍କଟପୂର୍ଣ୍ଣ ସମୟ ଦେଇ ଗତି କରୁଛି । ସେଠାରେ ଘଟୁଥିବା ଘଟଣାକୁ ନେଇ ଆପଣମାନେ ନିଶ୍ଚିତ ଭାବେ ଚିନ୍ତିତ ଥିବା ମୁଁ ଜାଣିପାରୁଛି । ଏକ ନିବିଡ଼ ସହଯୋଗୀ ଓ ପଡ଼ୋଶୀ ଭାବେ ଶ୍ରୀଲଙ୍କାକୁ ଭାରତ ଯଥାସମ୍ଭବ ସହାୟତା ଯୋଗାଇ ଦେଉଛି । ପ୍ରଧାନମନ୍ତ୍ରୀ ସ୍ମରଣ କରି କହିଥିଲେ ଯେ, ପ୍ରଥମ ଭାରତୀୟ ପ୍ରଧାନମନ୍ତ୍ରୀ ଭାବେ ସେ ଜାଫନା ଗସ୍ତ କରିଥିଲେ । ଶ୍ରୀଲଙ୍କାରେ ତାମିଲ ଲୋକମାନଙ୍କୁ ସହାୟତା କରିବା ଲାଗି ଭାରତ ସରକାର ସଂଖ୍ୟାଧିକ ପ୍ରକଳ୍ପ କାର୍ଯ୍ୟକାରୀ କରୁଛନ୍ତି । ସ୍ବାସ୍ଥ୍ୟସେବା, ପରିବହନ, ଆବାସ ଓ ସଂସ୍କୃତି କ୍ଷେତ୍ରରେ ଏସବୁ ପ୍ରକଳ୍ପ ସାମିଲ ରହିଛି ।

ଶେଷରେ ପ୍ରଧାନମନ୍ତ୍ରୀ କହିଥିଲେ ଯେ, ଆଜାଦୀ କା ଅମୃତ ମହୋତ୍ସବ କାଳରେ ଆମ ସ୍ବାଧୀନତା ସଂଗ୍ରାମୀମାନଙ୍କର ସ୍ବପ୍ନକୁ ପୂରଣ କରିବା ଲାଗି ଦେଶ ମିଳିତ ଭାବେ କାର୍ଯ୍ୟ କରିବା ନିମନ୍ତେ ସଂକଳ୍ପ ନେବା ଆବଶ୍ୟକ ।

ପ୍ରଧାନମନ୍ତ୍ରୀ ୨୯୬୦ କୋଟି ଟଙ୍କାର ୫ଟି ପ୍ରକଳ୍ପକୁ ରାଷ୍ଟ୍ର ଉଦ୍ଦେଶ୍ୟରେ ଲୋକାର୍ପଣ କରିଥିଲେ ।  ୭୫ କିଲୋମିଟର ଲମ୍ବ ମଦୁରାଇ-ତେନି (ରେଳ ଗଜ୍‌ କନଭର୍ସନ ପ୍ରକଳ୍ପ) ପ୍ରକଳ୍ପ ୫୦୦ କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଛି, ଏହା ସ୍ଥାନୀୟ ଅଞ୍ଚଳରେ ସଡ଼କ ଯୋଗାଯୋଗରେ ସୁଧାର ଆଣିବା ସହିତ ପର୍ଯ୍ୟଟନକୁ ପ୍ରୋତ୍ସାହନ ଦେବ । ତମ୍ବରମ-ଚେଙ୍ଗଲପଟ୍ଟୁ ମଧ୍ୟରେ ୫୯୦ କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଥିବା ୩୦ କିମି ବିଶିଷ୍ଟ ରେଳ ଲାଇନ ଅଧିକ ସଂଖ୍ୟକ ଯାତ୍ରୀଙ୍କୁ ଉପସହରାଞ୍ଚଳ ରେଳ ସେବା ଯୋଗାଇ ଦେବାରେ ସହାୟକ ହେବ । ଏହା ଯାତ୍ରୀମାନଙ୍କୁ ଭଲ ବିକଳ୍ପ ଦେବା ସହିତ ଆରାମଦାୟକ ଯାତ୍ରା ଅନୁଭୂତି ପ୍ରଦାନ କରିବ । ଇଟିବି ପିଏନଏମଟି ପ୍ରାକୃତିକ ବାଷ୍ପ ପାଇପଲାଇନର ୧୧୫ କିମି ଲମ୍ବ ଏନ୍ନୋର-ଚେଙ୍ଗଲପଟ୍ଟୁ ସେକ୍ସନ ଏବଂ ୨୭୧ କିମି ଲମ୍ବ ତିରୁଭଲ୍ଲୁର-ବେଙ୍ଗାଲୁରୁ ସେକ୍ସନକୁ ଯଥାକ୍ରମେ ପ୍ରାୟ ୮୫୦ କୋଟି ଏବଂ ୯୧୦ କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଛି । ଏହି ପ୍ରାକୃତିକ ବାଷ୍ପ ପାଇପଲାଇନ ତାମିଲନାଡ଼ୁ, ଆନ୍ଧ୍ରପ୍ରଦେଶ, କର୍ଣ୍ଣାଟକର ଉପଭୋକ୍ତା ଏବଂ ଶିଳ୍ପଗୁଡ଼ିକୁ ଗ୍ୟାସ ଯୋଗାଇ ଦେବ ।

ଚେନ୍ନାଇ – ଲାଇଟ୍‌ ହାଉସ ପ୍ରକଳ୍ପର ଅଂଶବିଶେଷ ଭାବେ ପ୍ରଧାନମନ୍ତ୍ରୀ ଆବାସ ଯୋଜନା-ସହରାଞ୍ଚଳ ଅଧୀନରେ ୧୧୬ କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଥିବା ୧୧୫୨ଟି ଆବାସକୁ ଏହି ଅବସରରେ ଉଦଘାଟନ କରାଯାଇଥିଲା ।

ପ୍ରଧାନମନ୍ତ୍ରୀ ଶ୍ରୀ ମୋଦୀ ୨୮ ହଜାର ୫୪୦ କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ୬ଟି ପ୍ରକଳ୍ପ ପାଇଁ ଶିଳାନ୍ୟାସ କରିଛନ୍ତି ।  ୨୬୨ କିମି ଲମ୍ବ ବେଙ୍ଗାଲୁରୁ-ଚେନ୍ନାଇ ଏକ୍ସପ୍ରେସୱେ ୧୪ ହଜାର ୮୭୦ କୋଟି ଟଙ୍କା ଖର୍ଚ୍ଚ କରାଯାଇ ନିର୍ମାଣ କରାଯିବ । ଏହି ଜାତୀୟ ରାଜପଥ କର୍ଣ୍ଣାଟକ, ଆନ୍ଧ୍ରପ୍ରଦେଶ ଓ ତାମିଲନାଡ଼ୁ ରାଜ୍ୟ ଦେଇ ଅତିକ୍ରମ କରିବ ଏବଂ ବେଙ୍ଗାଲୁରୁ ଓ ଚେନ୍ନାଇ ମଧ୍ୟରେ ଯାତ୍ରା ସମୟ ପ୍ରାୟ ୨-୩ ଘଣ୍ଟା କମାଇବ । ୫୮୫୦ କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ୨୧ କିଲୋମିଟର ଲମ୍ବ ୪ ନମ୍ବର ଜାତୀୟ ରାଜପଥର ଚାରି ଲେନ୍‌ ବିଶିଷ୍ଟ ଦୁଇ ଥାକିଆ ଉଚ୍ଚା ସଡ଼କ (ଏଲିଭେଟେଡ୍‌ ରୋଡ) ଚେନ୍ନାଇ ବନ୍ଦରକୁ ମଦୁରାଭୟଲ ସହ ଯୋଡ଼ିବ । ଏହା ଚେନ୍ନାଇ ବନ୍ଦରକୁ ଦିନ ରାତି ୨୪ ଘଣ୍ଟା ମାଲବାହୀ ବାହନ ଚଳାଚଳ ନିମନ୍ତେ ସୁବିଧା ଯୋଗାଇ ଦେବ । ୮୪୪ ନମ୍ବର ଜାତୀୟ ରାଜପଥର ୯୪ କିଲୋମିଟର ଲମ୍ବ ଚାରି ଲେନ୍‌ ବିଶିଷ୍ଟ ନେରଲୁରୁ ଠାରୁ ଧର୍ମପୁରୀ ସେକ୍ସନ ନିର୍ମାଣ ପାଇଁ ୩୮୭୦ କୋଟି ଟଙ୍କା ଖର୍ଚ୍ଚ କରାଯିବ । ଏହାଛଡ଼ା ୨୨୭ ନମ୍ବର ଜାତୀୟ ରାଜପଥର ଦୁଇ ଲେନ ବିଶିଷ୍ଟ ମୀନାସୁରୁତ୍ତି ଓ ଚିଦାମ୍ବରମ ସେକ୍ସନ ନିର୍ମାଣ ପାର୍ଇ ୭୨୦ କୋଟି ଟଙ୍କା ଖର୍ଚ୍ଚ କରାଯିବ । ଏସବୁ ସଡ଼କ ସ୍ଥାନୀୟ ଅଞ୍ଚଳରେ ଯୋଗାଯୋଗ ବା କନେକ୍ଟିଭିଟୀ ବଢ଼ାଇବାରେ ମହତ୍ବପୂର୍ଣ୍ଣ ଭୂମିକା ନିର୍ବାହ କରିବେ ।

ଏହି କାର୍ଯ୍ୟକ୍ରମ ଅବସରରେ ପ୍ରଧାନମନ୍ତ୍ରୀ ପାଞ୍ଚଟି ରେଳ ଷ୍ଟେସନର ପୁନଃବିକାଶ ପାଇଁ ଆଧାରଶୀଳା ରଖିଥିଲେ । ଏସବୁ ଷ୍ଟେସନ ହେଲେ : ଚେନ୍ନାଇ ଏଗମୋର, ରାମେଶ୍ବରମ, ମଦୁରାଇ, କାଟପାଡ଼ି ଓ କନ୍ୟାକୁମାରୀ । 1800 କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ ସମ୍ପୂର୍ଣ୍ଣ କରାଯିବ । ଆଧୁନିକ ସୁବିଧା ସହିତ ଯାତ୍ରୀଙ୍କୁ ଆରାମଦାୟକ ଓ ସୁବିଧାଜନକ ଅନୁଭୂତି ପ୍ରଦାନ କରିବା ଲକ୍ଷ୍ୟ ନେଇ ରେଳଷ୍ଟେସନର ବିକାଶ କରାଯାଉଛି । ପ୍ରଧାନମନ୍ତ୍ରୀ ପ୍ରାୟ ୧୪୩୦ କୋଟି ଟଙ୍କା ବ୍ୟୟରେ ଚେନ୍ନାଇ ଠାରେ ଏକ ବହୁମୁଖୀ ଲଜିଷ୍ଟିକ ପାର୍କ ନିର୍ମାଣ ପାଇଁ ଶିଳାନ୍ୟାସ କରିଛନ୍ତି । ଏହା ବାଧାମୁକ୍ତ ବହୁମୁଖି ମାଲ ପରିବହନ ସୁବିଧା ଦେବା ସହିତ ଏକାଧିକ ଗତିବିଧିକୁ ପ୍ରୋତ୍ସାହିତ କରିବ ।

******

P.S.