ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ବେଙ୍ଗାଲୁରୁ ଠାରେ ପ୍ରତିରକ୍ଷା ଗବେଷଣା ଓ ବିକାଶ ସଂଗଠନ (ଡିଆରଡିଓ)ର 5ଟି ଯୁବ ବୈଜ୍ଞାନିକ ବିଜ୍ଞାନାଗାରକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି ।

ଡିଆରଡିଓ ଯୁବ ବୈଜ୍ଞାନିକ ବିଜ୍ଞାନାଗାର (ଡିୱାଇଏସଏଲଏସ) 5ଟି ସହର ଯଥା ବେଙ୍ଗାଲୁରୁ, ମୁମ୍ବାଇ, ଚେନ୍ନାଇ, କୋଲକାତା ଓ ହାଇଦ୍ରାବାଦରେ ରହିଛି । ଭବିଷ୍ୟତ ପ୍ରତିରକ୍ଷା ବ୍ୟବସ୍ଥା ଯଥା ଆର୍ଟିଫିସିଆଲ ଇଂଟେଲିଜେନ୍ସ, କ୍ୱାଂଟମ ପ୍ରଯୁକ୍ତି, କଗ୍ନିଟିଭ ପ୍ରଯୁକ୍ତି, ଆସିମେଟ୍ରିକ ପ୍ରଯୁକ୍ତି ଓ ସ୍ମାର୍ଟ ମ୍ୟାଟେରିଆଲ୍ସ ଆଦିର ବିକାଶ ଲାଗି ଗୁରୁତ୍ୱପୂର୍ଣ୍ଣ ଅତ୍ୟାଧୁନିକ ପ୍ରଯୁକ୍ତି ଉପରେ ଏସବୁ ବିଜ୍ଞାନାଗାରରେ କାମ କରାଯିବ ।
ଏପରି ବିଜ୍ଞାନାଗାର ନିର୍ମାଣ କରିବାର ପ୍ରେରଣା ପ୍ରଧାନମନ୍ତ୍ରୀଙ୍କ ଠାରୁ ଅଗଷ୍ଟ 24, 2014ରେ ଅନୁଷ୍ଠିତ ଡିଆରଡିଓର ପୁରସ୍କାର ବିତରଣୀ ସମାରୋହରେ ମିଳିଥିଲା । ଯୁବକମାନଙ୍କୁ ନିର୍ଣ୍ଣୟ ନେବାର କ୍ଷମତା ପ୍ରଦାନ କରିବା ଏବଂ ଆହ୍ୱାନପୂର୍ଣ୍ଣ ଗବେଷଣାର ସୁଯୋଗ ଦେଇ ସେମାନଙ୍କୁ ସଶକ୍ତ କରିବା ଲାଗି ଡିଆରଡିଓକୁ ସେତେବେଳେ ଆହ୍ୱାନ କରିଥିଲେ ଶ୍ରୀ ନରେନ୍ଦ୍ର ମୋଦୀ ।

ଏହି ଅବସରରେ ଉଦବୋଧନ ଦେଇ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ କହିଥିଲେ ଯେ ଦେଶରେ ଉଦୀୟମାନ ପ୍ରଯୁକ୍ତି କ୍ଷେତ୍ରରେ ଗବେଷଣା ଏବଂ ବିକାଶକୁ ରୂପ ଦେବାରେ ଏହି ବିଜ୍ଞାନାଗାରଗୁଡ଼ିକ ସହାୟକ ହୋଇପାରିବ ।

ପ୍ରଧାନମନ୍ତ୍ରୀ ନୂଆ ଦଶନ୍ଧି ଲାଗି ବୈଜ୍ଞାନିକମାନଙ୍କୁ ଏକ ନିର୍ଦ୍ଧାରିତ ରୋଡମ୍ୟାପ ପ୍ରସ୍ତୁତ କରିବା ଲାଗି ଆହ୍ୱାନ କରିଥିଲେ ଯେଉଁଥିରେ ଡିଆରଡିଓ ଭାରତରେ ବିଭିନ୍ନ କ୍ଷେତ୍ରରେ ବିଜ୍ଞାନ ଗବେଷଣାର ମାର୍ଗ ଏବଂ ଗତି ନିର୍ଦ୍ଧାରଣ କରିପାରିବ ।

ବୈଜ୍ଞାନିକମାନଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଭାରତର କ୍ଷେପଣାସ୍ତ୍ର କାର୍ଯ୍ୟକ୍ରମ ହେଉଛି ସାରା ବିଶ୍ୱରେ ଉଲ୍ଲେଖନୀୟ କାର୍ଯ୍ୟକ୍ରମ ମଧ୍ୟରୁ ଅନ୍ୟତମ । ସେ ମଧ୍ୟ ଭାରତର ମହାକାଶ କାର୍ଯ୍ୟକ୍ରମ ଏବଂ ବାୟୁ ପ୍ରତିରକ୍ଷା ବ୍ୟବସ୍ଥାର ପ୍ରଶଂସା କରିଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ ବିଜ୍ଞାନ ଗବେଷଣା କ୍ଷେତ୍ରରେ ଭାରତରେ ପଛରେ ପଡ଼ି ପାରିବ ନାହିଁ । ବୈଜ୍ଞାନିକ ସମୁଦାୟ ସହ ଅଧିକ ବାଟ ଯିବା ଲାଗି ସରକାର ଆଗ୍ରହୀ ଯାହାଦ୍ୱାରା ଏହା ଦେଶର ସୁରକ୍ଷା ପାଇଁ ଉଦୀୟମାନ ପ୍ରଯୁକ୍ତି ଓ ନବୋନ୍ମେଷ ଲାଗି ସମୟ ବ୍ୟତିତ କରିପାରିବ ।

ମେକ ଇନ ଇଣ୍ଡିଆ ଭଳି କାର୍ଯ୍ୟକ୍ରମକୁ ସୁଦୃଢ଼ କରିବା ଏବଂ ଦେଶର ଉଜ୍ଜ୍ୱଳ ପ୍ରତିରକ୍ଷା କ୍ଷେତ୍ରକୁ ପ୍ରୋତ୍ସାହନ ଦେବାରେ ଡିଆରଡିଓ ଉଦ୍ଭାବକମାନେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିପାରିବେ ବୋଲି ସେ କହିଥିଲେ ।

ପାଞ୍ଚଟି ଡିଆରଡିଓ ଯୁବ ବୈଜ୍ଞାନିକ ବିଜ୍ଞାନାଗାର ପ୍ରତିଷ୍ଠା ହେବା ସହ ଦେଶରେ ଭବିଷ୍ୟତ ପ୍ରଯୁକ୍ତିର ଗବେଷଣା ଓ ବିକାଶ ଲାଗି ମୂଳଦୁଆ ପଡ଼ିଛି । ପ୍ରତିରକ୍ଷା ପ୍ରଯୁକ୍ତିରେ ଭବିଷ୍ୟତର ଆହ୍ୱାନ ପାଇଁ ଭାରତକୁ ଆତ୍ମନିର୍ଭରଶୀଳ କରାଇବା ଉଦ୍ଦେଶ୍ୟରେ ଡିଆରଡିଓ ପାଇଁ ଏହା ଏକ ବୃହତ ପଦକ୍ଷେପ ସାବ୍ୟସ୍ତ ହେବ ।

ଦ୍ରୁତ ବେଗରେ ବିକଶିତ ହେଉଥିବା ଆର୍ଟିଫିସିଆଲ ଇଂଟେଲିଜେନ୍ସ କ୍ଷେତ୍ରରେ ଗବେଷଣା ବେଙ୍ଗାଲୁରୁରେ କରାଯିବ । କ୍ୱାଂଟମ ପ୍ରଯୁକ୍ତି କ୍ଷେତ୍ରରେ ସମସ୍ତ ଗୁରୁତ୍ୱପୂର୍ଣ୍ଣ କ୍ଷେତ୍ରର ଆଧାର ହେବ ଆଇଆଇଟି ମୁମ୍ବାଇ । କଗ୍ନିଟିଭ ଟେକନୋଲୋଜି ଉପରେ ଭବିଷ୍ୟତ ନିର୍ଭର କରିଥାଏ । ଏହି କ୍ଷେତ୍ରରେ ଗବେଷଣା ପାଇଁ ଆଇଆଇଟି ଚେନ୍ନାଇ ହେବ ଗବେଷଣାଗାର । ଆସିମ୍ମେଟିକ ଟେକନୋଲୋଜି ହେଉଛି ଏକ ନୂତନ ତଥା ଭବିଷ୍ୟତର ପ୍ରଯୁକ୍ତି କ୍ଷେତ୍ର, ଯାହା ଆଗାମୀ ଦିନରେ ଯୁଦ୍ଧ ଲଢ଼ିବାର ପଦ୍ଧତିକୁ ବଦଳାଇ ଦେବ । ଏହି କ୍ଷେତ୍ରରେ କୋଲକାତାର ଯାଦବପୁର ବିଶ୍ୱବିଦ୍ୟାଳୟ ପରିସରରେ ଗବେଷଣା କରାଯିବ । ହାଇଦ୍ରାବାଦରେ ହଟ ଓ ସ୍ମାର୍ଟ ମ୍ୟାଟେରିଆଲ୍ସର ଗୁରୁତ୍ୱପୂର୍ଣ୍ଣ କ୍ଷେତ୍ର ଏବଂ ସେଗୁଡ଼ିକର ପ୍ରୟୋଗ ଉପରେ ଗବେଷଣା କରାଯିବ ।

*****