ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜୁଲାଇ ୨୧, ୨୦୨୪ ସନ୍ଧ୍ୟା ୭ଟାରେ ନୂଆଦିଲ୍ଲୀର ଭାରତ ମଣ୍ଡପମ୍ ଠାରେ ବିଶ୍ୱ ଐତିହ୍ୟ କମିଟିର ୪୬ତମ ଅଧିବେଶନକୁ ଉଦଘାଟନ କରିବେ । ଏହି ଅବସରରେ ପ୍ରଧାନମନ୍ତ୍ରୀ ସମାବେଶକୁ ମଧ୍ୟ ସମ୍ବୋଧିତ କରିବେ । ଉଦଘାଟନୀ ଉତ୍ସବରେ ୟୁନେସ୍କୋ ମହାନିର୍ଦ୍ଦେଶିକା ଅଡ୍ରେ ଆଜୋଲେ ଯୋଗ ଦେବେ ।

ଭାରତ ପ୍ରଥମ ଥର ପାଇଁ ବିଶ୍ୱ ଐତିହ୍ୟ କମିଟି ବୈଠକ ଆୟୋଜନ କରୁଛି । ୨୦୨୪ ଜୁଲାଇ ୨୧ରୁ ୩୧ ତାରିଖ ପର୍ଯ୍ୟନ୍ତ ନୂଆଦିଲ୍ଲୀର ଭାରତ ମଣ୍ଡପମ୍ ଠାରେ ଏହା ଅନୁଷ୍ଠିତ ହେବ । ବିଶ୍ୱ ଐତିହ୍ୟ କମିଟି ବର୍ଷକୁ ଥରେ ବୈଠକ କରି ବିଶ୍ୱ ଐତିହ୍ୟ ସମ୍ବନ୍ଧୀୟ ସମସ୍ତ ମାମଲାର ପରିଚାଳନା କରିବା ଏବଂ ବିଶ୍ୱ ଐତିହ୍ୟ ତାଲିକାରେ ସ୍ଥାନିତ ହେବାକୁ ଥିବା ସ୍ଥାନଗୁଡିକ ଉପରେ ନିଷ୍ପତ୍ତି ନେବା ପାଇଁ ଦାୟୀ ରହିଥାଏ । ଏହି ବୈଠକରେ ବିଶ୍ୱ ଐତିହ୍ୟ ତାଲିକାରେ ନୂତନ ସ୍ଥାନ ମନୋନୀତ ପ୍ରସ୍ତାବ, ୧୨୪ଟି ବିଦ୍ୟମାନ ବିଶ୍ୱ ଐତିହ୍ୟ ସମ୍ପତ୍ତିର ସଂରକ୍ଷଣ ସ୍ଥିତି ରିପୋର୍ଟ, ଅନ୍ତର୍ଜାତୀୟ ସହାୟତା ଏବଂ ବିଶ୍ୱ ଐତିହ୍ୟ ପାଣ୍ଠିର ଉପଯୋଗ ଇତ୍ୟାଦି ଉପରେ ଆଲୋଚନା ହେବ । ଏହି ବୈଠକରେ ୧୫୦ରୁ ଅଧିକ ଦେଶର ୨୦୦୦ରୁ ଅଧିକ ଅନ୍ତର୍ଜାତୀୟ  ଓ ଜାତୀୟ ପ୍ରତିନିଧି ଯୋଗ ଦେବେ ।

ବିଶ୍ୱ ଐତିହ୍ୟ କମିଟି ବୈଠକ ସହିତ ବିଶ୍ୱ ଐତିହ୍ୟ ଯୁବ ପେସାଦାର ମଂଚ ଏବଂ ବିଶ୍ୱ ଐତିହ୍ୟ ସ୍ଥଳ ପରିଚାଳକ ମଂଚ ମଧ୍ୟ ଏହି ଅବସରରେ ଅନୁଷ୍ଠିତ ହେଉଛି ।

ଏହାବ୍ୟତୀତ ଭାରତର ସଂସ୍କୃତିକୁ ପ୍ରଦର୍ଶିତ କରିବା ପାଇଁ ଭାରତ ମଣ୍ଡପମ୍ ଠାରେ ବିଭିନ୍ନ ପ୍ରଦର୍ଶନୀ ମଧ୍ୟ ଆୟୋଜନ କରାଯିବ । ରିଟର୍ଣ୍ଣ ଅଫ୍ ଟ୍ରେଜର ପ୍ରଦର୍ଶନୀରେ ଦେଶକୁ ଫେରାଇ ଅଣାଯାଇଥିବା କିଛି କଳାକୃତି ପ୍ରଦର୍ଶିତ ହେବ । ବର୍ତ୍ତମାନ ସୁଦ୍ଧା ୩୫୦ରୁ ଅଧିକ କଳାକୃତି ଫେରାଇ ଅଣାଯାଇଛି । ଏହାବ୍ୟତୀତ , ଅତ୍ୟାଧୁନିକ ଏଆର ଏବଂ ଭିଆର ଟେକ୍ନୋଲୋଜି ବ୍ୟବହାର କରି ଭାରତର ୩ଟି ବିଶ୍ୱ ଐତିହ୍ୟ ସ୍ଥଳ: ରାଣୀ କି ଭାବ, ପାତନ, ଗୁଜରାଟ, କୈଳାସ ମନ୍ଦିର, ଏଲୋରା ଗୁମ୍ଫା, ମହାରାଷ୍ଟ୍ର; ଏବଂ ହୋୟଶାଲା ମନ୍ଦିର, ହାଲେବିଡ, କର୍ଣ୍ଣାଟକ ପାଇଁ ଏକ ଗହନ ଅନୁଭୂତି ପ୍ରଦାନ କରାଯିବ । । ସୂଚନା ପ୍ରଯୁକ୍ତି ବିଦ୍ୟା ଏବଂ ଭିତ୍ତିଭୂମି କ୍ଷେତ୍ରରେ ଆଧୁନିକ ବିକାଶ ସହିତ ଭାରତର ସମୃଦ୍ଧ ସାଂସ୍କୃତିକ ଐତିହ୍ୟ, ପୁରାତନ ସଭ୍ୟତା, ଭୌଗୋଳିକ ବିବିଧତା, ପର୍ଯ୍ୟଟନସ୍ଥଳୀ ଉପରେ ଆଲୋକପାତ କରିବା ପାଇଁ ଏକ ‘ଅତୁଳନୀୟ ଭାରତ’ ପ୍ରଦର୍ଶନୀ ଆୟୋଜିତ କରାଯିବ ।

***

SSP