ପିଏମଇଣ୍ଡିଆ

ମହାମାନ୍ୟ ପ୍ରଧାନମନ୍ତ୍ରୀ ଆବେ

ବନ୍ଧୁଗଣ,

ମିନା ସାମା, କୋମ୍ବାନ-ୱା!

ଜଣେ ବୌଦ୍ଧଗୁରୁ ଜାପାନୀରେ କହିଥିଲେ – ଇଚିଗୋ ଇଚି, ଯାହାର ଅର୍ଥ ଆମର ପ୍ରତି ଭୋଟ ସ୍ୱତନ୍ତ୍ର ଏବଂ ଆମେ ପ୍ରତିଟି ମୁହୂର୍ତ୍ତକୁ ସାଇତି ରଖିବା ଉଚିତ ।

ମୁଁ ଜାପାନ ଅନେକ ଥର ଆସିଛି, ପ୍ରଧାନମନ୍ତ୍ରୀ ଭାବେ ଏହା ମୋର ଦ୍ୱିତୀୟ ଗସ୍ତ । ଏବଂ ପ୍ରତିଟି ଗସ୍ତ ସ୍ୱତନ୍ତ୍ର, ବିଶେଷ ଧରଣର, ଶିକ୍ଷଣୀୟ ଏବଂ ଅତ୍ୟନ୍ତ ଫଳପ୍ରଦ ।

ମୁଁ ମହାମାନ୍ୟ ଆବେଙ୍କୁ ଜାପାନରେ ଏବଂ ବିଶ୍ୱର ବିଭିନ୍ନ ସ୍ଥାନରେ ଅନେକ ଥର ଭେଟିଛି । ବିଗତ କିଛି ବର୍ଷ ମଧ୍ୟରେ ଭାରତରେ ଜାପାନର ରାଜନୀତି ଏବଂ ବ୍ୟବସାୟ ଜଗତର ଅନେକ ପ୍ରମୁଖ ବ୍ୟକ୍ତିଙ୍କୁ ସ୍ୱାଗତ କରିବାର ସୌଭାଗ୍ୟ ପାଇଛି ।

ଆମର ନିୟମିତ ଭାବ ବିନିମୟ, ଆମ ବନ୍ଧୁତ୍ୱର ଗତିଶୀଳତା ଓ ପ୍ରଗାଢ଼ତାକୁ ପ୍ରଦର୍ଶନ କରୁଛି । ଏହା ମଧ୍ୟ ଗୁରୁତ୍ୱପୂର୍ଣ୍ଣ ଓ ବିଶ୍ୱସ୍ତରୀୟ ଭାଗୀଦାରିତାର ପ୍ରତିବଦ୍ଧତାକୁ ଅନୁଭବ କରାଉଛି ।

ବନ୍ଧୁଗଣ, ଗତ ଶିଖର ସମ୍ମିଳନୀ ପରେ ଆମର ବନ୍ଧୁତ୍ୱରେ କେତେ ଅଗ୍ରଗତି ହୋଇଛି ସେ ସମ୍ପର୍କରେ ଆଜି ପ୍ରଧାନମନ୍ତ୍ରୀ ଆବେ ଏବଂ ମୁଁ ଆଲୋଚନା କରିଛୁ । ଆମେ ଉଭୟ ଜାଣିପାରିଛୁ ଯେ ଆମର ଭାଗୀଦାରିତା ବିଭିନ୍ନ କ୍ଷେତ୍ରରେ ବେଶ୍ ଅଗ୍ରଗତି କରିଛି ।

ବ୍ୟାପକ ଅର୍ଥନୈତିକ ଚୁକ୍ତି, ବ୍ୟବସାୟିକ ଅଭିବୃଦ୍ଧି, ନିର୍ମାଣ ଏବଂ ନିବେଶ ବନ୍ଧୁତ୍ୱ, ସ୍ୱଚ୍ଛ ଶକ୍ତିକୁ ଗୁରୁତ୍ୱ, ଆମ ନାଗରିକଙ୍କ ନିରାପତ୍ତାରେ ସହଯୋଗିତା, ଆନୁସଙ୍ଗିକ କ୍ଷେତ୍ର ଏବଂ ଦକ୍ଷତା ବିକାଶର ଉତ୍କର୍ଷକୁ ଆମେ ଅଧିକ ଗୁରୁତ୍ୱ ଦେଉଛୁ ।

ପରମାଣୁ ଶକ୍ତିର ଶାନ୍ତିପୂର୍ଣ୍ଣ ବ୍ୟବହାର କ୍ଷେତ୍ରରେ ଆଜି ଆମେ କରିଥିବା ବୁଝାମଣା ସ୍ୱଚ୍ଛ ଶକ୍ତି ସହଯୋଗିତା କ୍ଷେତ୍ରରେ ଏକ ଐତିହାସିକ ପଦକ୍ଷେପ ।

ଜଳବାୟୁ ପରିବର୍ତ୍ତନ କ୍ଷେତ୍ରରେ ସୃଷ୍ଟି ହେଉଥିବା ଆହ୍ୱାନର ସମ୍ମୁଖିନ ହେବାରେ ଏହା ଆମକୁ ସହାୟକ ହେବ । ଜାପାନ ପାଇଁ ଏହି ବୁଝାମଣାର ଗୁରୁତ୍ୱ ଥିବା ମଧ୍ୟ ମୁଁ ସ୍ୱୀକାର କରୁଛି ।

ଏହି ବୁଝାମଣାକୁ ସମର୍ଥନ କରିଥିବାରୁ ପ୍ରଧାନମନ୍ତ୍ରୀ ଆବେ, ଜାପାନ ସରକାର ଏବଂ ସଂସଦକୁ ମୁଁ ଧନ୍ୟବାଦ ଜଣାଉଛି ।

ବନ୍ଧୁଗଣ,

ଭାରତ ଏବଂ ଏହାର ଅର୍ଥବ୍ୟବସ୍ଥା ଏବେ ଅନେକ ପରିବର୍ତ୍ତନକୁ ଅନୁଧାବନ କରୁଛି । ନିର୍ମାଣ, ନିବେଶ ଏବଂ ଏକବିଂଶ ଶତାବ୍ଦୀର ଜ୍ଞାନଭିତ୍ତିକ ଉଦ୍ୟୋଗରେ ଏକ ଗୁରୁତ୍ୱପୂର୍ଣ୍ଣ କେନ୍ଦ୍ରସ୍ଥଳ ହେବା ଆମଲକ୍ଷ୍ୟ । ଏବଂ ଏହି ଯାତ୍ରାରେ ଜାପାନକୁ ଆମେ ଆମର ସହଯୋଗୀ ଭାବେ ଗଣ୍ୟ କରୁଛୁ । ପୁଞ୍ଜି, ପ୍ରଯୁକ୍ତିବିଦ୍ୟା କିମ୍ବା ମାନବ ସମ୍ବଳ ପ୍ରତି କ୍ଷେତ୍ରରେ ଉଭୟ ରାଷ୍ଟ୍ରର ଫାଇଦା ପାଇଁ ଅନେକ ସୁଯୋଗ ଥିବା ଆମେ ବିଶ୍ୱାସ କରୁଛୁ ।

ନିର୍ଦ୍ଦିଷ୍ଟ ପ୍ରକଳ୍ପ ହିସାବରେ, ମୁମ୍ବାଇ-ଅହମ୍ମଦାବାଦ ହାଇ ସ୍ପିଡ୍ ରେଳ ପ୍ରକଳ୍ପ(Bullet Train)କୁ ଆମେ ଗୁରୁତ୍ୱ ଦେଉଛୁ । ଆର୍ଥିକ କ୍ଷେତ୍ରରେ ଆମର ସହଯୋଗିତା ଏବଂ ବୁଝାମଣା ଆନୁସଙ୍ଗିକ ବିକାଶ କ୍ଷେତ୍ରରେ ଏକ ବଡ଼ ସମ୍ବଳ ହୋଇପାରିବ ।

ଦକ୍ଷତା ବିକାଶ ଏବଂ ପ୍ରଶିକ୍ଷଣ କ୍ଷେତ୍ରରେ ଆମର ଆଲୋଚନା ଅର୍ଥନୈତିକ ସହଯୋଗ କ୍ଷେତ୍ରରେ ଏକ ବୃହତର ଦିଗ । ମହାକାଶ ବିଜ୍ଞାନ, ସାମୁଦ୍ରିକ ଏବଂ ଭୂବିଜ୍ଞାନ, ବୟନ, କ୍ରୀଡ଼ା, କୃଷି ଏବଂ ପୋଷ୍ଟାଲ ବ୍ୟାଙ୍କିଂ କ୍ଷେତ୍ରରେ ମଧ୍ୟ ନୂତନ ସହଯୋଗ ପାଇଁ ଆମେ ଲକ୍ଷ୍ୟ ରଖିଛୁ ।

ବନ୍ଧୁଗଣ,

ଆମର ଗୁରୁତ୍ୱପୂର୍ଣ୍ଣ ସହଯୋଗିତା କେବଳ ଆମ ସମାଜର ମଙ୍ଗଳ ଓ ନିରାପତ୍ତା ପାଇଁ ନୁହେଁ, ଏହା ମଧ୍ୟ ସମଗ୍ର ଅଞ୍ଚଳରେ ଶାନ୍ତି, ସ୍ଥିରତା ଓ ସନ୍ତୁଳନ ଆଣିବ । ଏସିଆ ପ୍ରଶାନ୍ତ-ମହାସାଗର କ୍ଷେତ୍ରରେ ସୃଷ୍ଟି ହେଉଥିବା ସୁଯୋଗ ଓ ଆହ୍ୱାନ ପ୍ରତି ଏହା ମଧ୍ୟ ତତ୍ପର ଓ ସଜାଗ ରହିଛି ।

ଦେଶ ସମୂହର ସମଷ୍ଟିଗତ ଦୃଷ୍ଟିଭଙ୍ଗୀକୁ ଲକ୍ଷ୍ୟ କରି ଆମ ଅଞ୍ଚଳରେ ଯୋଗାଯୋଗ, ଆନୁସଙ୍ଗିକ ବ୍ୟବସ୍ଥା ଏବଂ ଦକ୍ଷତା ନିର୍ମାଣରେ ସହଯୋଗ ପାଇଁ ଆମେ ସମ୍ମତ ହୋଇଛୁ, ଯାହାକି ଭାରତ-ପ୍ରଶାନ୍ତ ମହାସାଗର ଜଳପଥକୁ ସଂଯୋଜତି କରୁଛି ।

ଭାରତ-ପ୍ରଶାନ୍ତ ମହାସାଗର ଜଳପଥର ସମ୍ପ୍ରସାରଣକୁ ଆମେ କେତେ ଗୁରୁତ୍ୱ ଦେଉଛୁ ତାହା ନିକଟରେ ସଫଳତାର ସହ ଶେଷ ହୋଇଥିବା ମାଲାବାର ନୌ-ଅଭ୍ୟାସର ଗୁରୁତ୍ୱରୁ ଜଣାପଡ଼ୁଛି ।

ଗଣତନ୍ତ୍ର ଭାବେ ଆମେ ମୁକ୍ତ ବ୍ୟବସ୍ଥା, ସ୍ୱଚ୍ଛତା ଏବଂ ଆଇନର ଅନୁଶାସନକୁ ସମର୍ଥନ ଜଣାଉଛୁ । ଆତଙ୍କବାଦ, ବିଶେଷ କରି ସୀମାପାର ଆତଙ୍କବାଦର ମୁକାବିଲା ପାଇଁ ଆମେ ମଧ୍ୟ ଏକତ୍ର ହୋଇଛୁ ।

ବନ୍ଧୁଗଣ

ଜନ-ଜନ ମଧ୍ୟରେ ବନ୍ଧୁତା ଏବଂ ଦୃଢ ସାଂସ୍କୃତିକ ସମ୍ବନ୍ଧ ଆମ ଦୁଇ ଦେଶର ସମ୍ପର୍କକୁ ନିବିଡ କରିଛି । ଏହାର ସମ୍ପ୍ରସାରଣ ପାଇଁ ପ୍ରଧାନମନ୍ତ୍ରୀ ଆବେ ଗତ ବର୍ଷ ଡିସେମ୍ବରରେ ଭାରତ ଗସ୍ତରେ ଯାଇଥିବା ବେଳେ ମୁଁ ପ୍ରତିଶ୍ରୁତି ଦେଇଥିଲି ।

ଏହାର ଫଳସ୍ୱରୂପ, ୨୦୧୬ ମାର୍ଚ୍ଚରୁ ଭାରତରେ ଜାପାନୀ ନାଗରିକଙ୍କ ପାଇଁ ‘ପହଞ୍ଚିବା କ୍ଷଣି ଭିସା’ ଯୋଜନା ଆରମ୍ଭ କରାଯାଇଛି । ସର୍ତ୍ତ ପୂରଣ କରୁଥିବା ଜାପାନୀ ବ୍ୟବସାୟୀମାନଙ୍କୁ ମଧ୍ୟ ୧୦ ବର୍ଷର ଦୀର୍ଘକାଳୀନ ଭିସା ଦେବା ଆରମ୍ଭ କରିଛୁ ।

ବନ୍ଧୁଗଣ

ଆଞ୍ଚଳିକ ଏବଂ ଆନ୍ତର୍ଜାତିକ କ୍ଷେତ୍ରରେ ଭାରତ ଓ ଜାପାନ ମଧ୍ୟ ନିଜ ମଧ୍ୟରେ ସହଭାଗିତା ରକ୍ଷା କରିଆସିଛନ୍ତି । ଜାତିସଂଘ ନିରାପତ୍ତା ପରିଷଦରେ ଆମ ସ୍ଥାନ ନିଶ୍ଚିତ କରିବା ଏବଂ ଜାତିସଂଘର ସଂସ୍କାର ଦିଗରେ ମଧ୍ୟ ଆମେ ମିଳିତ ଭାବେ କାମ କରିବୁ ।

ପରମାଣୁ ଯୋଗାଣକାରୀ ଗୋଷ୍ଠୀ(NSG)ରେ ଭାରତର ସଦସ୍ୟତା ପ୍ରତି ସମର୍ଥନ ଜଣାଇଥିବାରୁ ମୁଁ ପ୍ରଧାନମନ୍ତ୍ରୀ ଆବେଙ୍କୁ ଧନ୍ୟବାଦ ଜଣାଉଛି ।

ମହାମାନ୍ୟ ଆବେ

ଆମ ସମ୍ପର୍କର ଭବିଷ୍ୟତ ସମୃଦ୍ଧ ଏବଂ ବଳିଷ୍ଠ ବୋଲି ଆମେ ସ୍ଵୀକାର କରୁ । ଆମ ପାଇଁ ତଥା ଆମ ଅଞ୍ଚଳର ବିକାଶ ପାଇ ଆମେ କ’ଣ କରିପାରିବୁ ତାହାର କୌଣସି ସୀମା ନାହିଁ ।

ଏହାର ଅନ୍ୟତମ ମୂଳ କାରଣ ଆପଣଙ୍କ ପ୍ରଭାବୀ ଏବଂ ଦୃଢ଼ ନେତୃତ୍ୱ । ଆପଣଙ୍କ ସହଯୋଗୀ ଓ ବନ୍ଧୁ ହେବା ମୋ ପାଇଁ ସମ୍ମାନର ବିଷୟ । ଏହି ଶିଖର ସମ୍ମିଳନୀର ସଫଳତା ତଥା ଆପଣଙ୍କ ବଦାନ୍ୟ ଆତିଥେୟତା ପାଇଁ ମୁଁ ଆପଣଙ୍କୁ ଧନ୍ୟବାଦ ଜଣାଉଛି ।

ଅନାତା ନୋ ଓ ମୋତେନାସି ଓ ଆରିଗାତୋ ଗୋଜାଇମାସିତା

(ଆପଣଙ୍କ ବଦାନ୍ୟ ଆତିଥେୟତା ପାଇଁ ଧନ୍ୟବାଦ)

ଧନ୍ୟବାଦ, ବହୁତ ବହୁତ ଧନ୍ୟବାଦ ।

**********