ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଗୁଜୁରାଟର ଗାନ୍ଧୀନଗରର ମହାତ୍ମା ମନ୍ଦିର କନଭେନସନ ଏବଂ ପ୍ରଦର୍ଶନୀ କେନ୍ଦ୍ରରେ ଡିଫେନ୍ସ ଏକ୍ସପୋ (ପ୍ରତିରକ୍ଷା ପ୍ରଦର୍ଶନୀ) ୨୨ ର ଉଦଘାଟନ କରିଛନ୍ତି । ଇଣ୍ଡିଆ ପାଭିଲିୟନରେ ପ୍ରଧାନମନ୍ତ୍ରୀ ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ୍ ଦ୍ୱାରା ଡିଜାଇନ୍ ହୋଇଥିବା ସ୍ୱଦେଶୀ ପ୍ରଶିକ୍ଷକ ବିମାନ ଏଚଟିଟି–୪୦କୁ ଉନ୍ମୋଚନ କରିଛନ୍ତି । ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମିଶନ୍ ମହାକାଶ ପ୍ରତିରକ୍ଷା ମଧ୍ୟ ଆରମ୍ଭ କରି ଗୁଜୁରାଟରେ ଦିଶା ବିମାନବନ୍ଦରର ଭିତ୍ତିପ୍ରସ୍ତର ସ୍ଥାପନ କରିଛନ୍ତି ।

ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ଉଭୟ ପ୍ରଧାନମନ୍ତ୍ରୀ ତଥା ଗୁଜୁରାଟର ପୁତ୍ର ଭାବରେ ଦକ୍ଷ ତଥା ଆତ୍ମନିର୍ଭର ଭାରତର ପ୍ରତୀକ ଏହି କାର୍ଯ୍ୟକ୍ରମରେ ପ୍ରତିନିଧିମାନଙ୍କୁ ସ୍ୱାଗତ କରିଥିଲେ ।

ପ୍ରତିରକ୍ଷା ପ୍ରଦର୍ଶନୀ  ୨୦୨୨ ର ସଂଗଠନ ବିଷୟରେ ସୂଚନା ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ ଏହା ନୂତନ ଭାରତ ଏବଂ ଏହାର ସାମର୍ଥ୍ୟର ଚିତ୍ର ଆଙ୍କିଛି, ଯାହାର ସଙ୍କଳ୍ପ ଅମୃତ କାଳ ସମୟରେ ହୋଇଛି । ସେ ଆହୁରି ମଧ୍ୟ କହିଛନ୍ତି ଯେ ଏହା ଦେଶର ବିକାଶ ସହିତ ରାଜ୍ୟଗୁଡ଼ିକର ସହଯୋଗର ମିଶ୍ରଣ ଅଟେ । ଏଥିରେ ଯୁବକମାନଙ୍କର ଶକ୍ତି ଏବଂ ସ୍ୱପ୍ନ ଅଛି, ଏଥିରେ ଯୁବପୀଢିଙ୍କ ସଂକଳ୍ପ ଏବଂ ସାମର୍ଥ୍ୟ ରହିଛି । ବିଶ୍ୱ ପାଇଁ ଆଶା ଏବଂ ବନ୍ଧୁ ଦେଶ ପାଇଁ ସୁଯୋଗ ରହିଛି ବୋଲି  ପ୍ରଧାନମନ୍ତ୍ରୀ କହିଛନ୍ତି ।

ପ୍ରତିରକ୍ଷା ପ୍ରଦର୍ଶନୀର ଏହି ସଂସ୍କରଣର ସ୍ୱତନ୍ତ୍ରତା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି ଯେ ଏହା ହେଉଛି ପ୍ରଥମ ପ୍ରତିରକ୍ଷା ପ୍ରଦର୍ଶନୀ ଯେଉଁଠାରେ କେବଳ ଭାରତୀୟ କମ୍ପାନୀ ଅଂଶଗ୍ରହଣ କରୁଛନ୍ତି ଏବଂ ଏଥିରେ କେବଳ ମେଡ୍ ଇନ୍ ଇଣ୍ଡିଆ ଉପକରଣ ରହିଛି । ସେ ଘୋଷଣା କରିଛନ୍ତି ଆଇରନ୍ ମ୍ୟାନ୍ ସର୍ଦ୍ଦାର ପଟେଲଙ୍କ ଏହି ମାଟିରୁ ଆମେ ବିଶ୍ୱକୁ ଭାରତର ସାମର୍ଥ୍ୟର ଏକ ଉଦାହରଣ ସୃଷ୍ଟି କରୁଛୁ । ଏହି ପ୍ରଦର୍ଶନୀରେ ୧୩୦୦ ରୁ ଅଧିକ ସଂସ୍ଥା ଅଛନ୍ତି ଯେଉଁଥିରେ ଭାରତର ପ୍ରତିରକ୍ଷା ଶିଳ୍ପ, ଭାରତୀୟ ପ୍ରତିରକ୍ଷା ଶିଳ୍ପର ସହଯୋଗୀ ସଂସ୍ଥା, ଏମଏସଏମଇ ଏବଂ ୧୦୦ ରୁ ଅଧିକ ଷ୍ଟାର୍ଟଅପ୍ ସହିତ ଜଡିତ କେତେକ ମିଳିତ ଉଦ୍ୟୋଗ ଅନ୍ତର୍ଭୁକ୍ତ । ପ୍ରଧାନମନ୍ତ୍ରୀ ମନ୍ତବ୍ୟ ଦେଇଛନ୍ତି ଯେ ଏହା ଗୋଟିଏ ଫ୍ରେମରେ ଭାରତର ସାମର୍ଥ୍ୟ ଏବଂ ସମ୍ଭାବନା ବିଷୟରେ ଝଲକ ପ୍ରଦାନ କରୁଛି । ସେ ଆହୁରି ମଧ୍ୟ ସୂଚନା ଦେଇଛନ୍ତି ଯେ ପ୍ରଥମ ଥର ପାଇଁ ୪୦୦ ରୁ ଅଧିକ ରାଜିନାମା ସ୍ୱାକ୍ଷରିତ ହୋଇଛି ।

ବିଭିନ୍ନ ଦେଶର ସକରାତ୍ମକ ପ୍ରତିକ୍ରିୟାକୁ ଲକ୍ଷ୍ୟ କରି ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଛନ୍ତି ଯେ ଯେତେବେଳେ ଭାରତ ନିଜ ସ୍ୱପ୍ନକୁ ରୂପ ଦେଉଛି, ଆଫ୍ରିକାର ୫୩ ଟି ବନ୍ଧୁ ଦେଶ ଆମ ସହ ଚାଲୁଛନ୍ତି । ଏହି ଅବସରରେ ଦ୍ୱିତୀୟ ଭାରତ–ଆଫ୍ରିକା ପ୍ରତିରକ୍ଷା କଥାବାର୍ତ୍ତା ମଧ୍ୟ ଅନୁଷ୍ଠିତ ହେବ ବୋଲି ପ୍ରଧାନମନ୍ତ୍ରୀ ସୂଚନା ଦେଇଛନ୍ତି । ପ୍ରଧାନମନ୍ତ୍ରୀ ଆହୁରି କହିଛନ୍ତି, ଭାରତ ଏବଂ ଆଫ୍ରିକା ମଧ୍ୟରେ ଏହି ସମ୍ପର୍କ ସମୟ–ପରୀକ୍ଷିତ ବିଶ୍ୱାସ ଉପରେ ଆଧାରିତ, ଯାହା ସମୟର ଗତି ସହିତ ଅଧିକ ଗଭୀର ଏବଂ ସ୍ପର୍ଶ କରୁଛି । ଆଫ୍ରିକା ଏବଂ ଗୁଜୁରାଟ ମଧ୍ୟରେ ଥିବା ପୁରୁଣା ସମ୍ପର୍କ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ମନେ ପକାଇଛନ୍ତି ଯେ ଆଫ୍ରିକାର ପ୍ରଥମ ରେଳ ଲାଇନଗୁଡ଼ିକରେ କଚ୍ଛର ଲୋକ ଅଂଶଗ୍ରହଣ କରିଥିଲେ । ଆଫ୍ରିକାରେ ଦୈନନ୍ଦିନ ଜୀବନରେ ବ୍ୟବହୃତ ଅନେକ ଶବ୍ଦର ଉତ୍ପତ୍ତି ଆଫ୍ରିକାର ଗୁଜରାଟୀ ସମ୍ପ୍ରଦାୟରୁ । ମହାତ୍ମା ଗାନ୍ଧୀଙ୍କ ପରି ଜଣେ ବିଶ୍ୱସ୍ତରୀୟ ନେତା, ଯଦିଓ ଗୁଜୁରାଟ ତାଙ୍କ ଜନ୍ମସ୍ଥାନ ଥିଲା, ତେବେ ଆଫ୍ରିକା ତାଙ୍କର ପ୍ରଥମ ‘କର୍ମଭୂମି’ ଥିଲା । ଆଫ୍ରିକା ପାଇଁ ଏହି ସମ୍ପର୍କ ଭାରତର ବୈଦେଶିକ ନୀତିର କେନ୍ଦ୍ର ଅଟେ । କରୋନା ଅବଧି ସମୟରେ, ଯେତେବେଳେ ସମଗ୍ର ବିଶ୍ୱ ଟିକାକୁ ନେଇ ଚିନ୍ତିତ ଥିଲା, ବନ୍ଧୁ ରାଷ୍ଟ୍ର ଆଫ୍ରିକାକୁ ଭାରତ ଏହି ଟିକା ଅଗ୍ରାଧିକାର ଭିତ୍ତିରେ ପ୍ରଦାନ କରିଥିଲା ବୋଲି ସେ କହିଛନ୍ତି ।

ଏହି ପ୍ରଦର୍ଶନୀରେ ଦ୍ୱିତୀୟ ଭାରତୀୟ ମହାସାଗରୀୟ ଅଞ୍ଚଳ+ (ଆଇଓଆର +) ସମ୍ମିଳନୀ ମଧ୍ୟ ଅନୁଷ୍ଠିତ ହେବ, ଯାହା ପ୍ରଧାନମନ୍ତ୍ରୀଙ୍କ ଦୃଷ୍ଟିଭଙ୍ଗୀ ଅନୁଯାୟୀ ସମଗ୍ର ଅଞ୍ଚଳରେ ଶାନ୍ତି, ଅଭିବୃଦ୍ଧି, ସ୍ଥିରତା ଏବଂ ସମୃଦ୍ଧତା (ସାଗର) ପାଇଁ ଆଇଓଆର+ ଦେଶ ମଧ୍ୟରେ ପ୍ରତିରକ୍ଷା ସହଯୋଗକୁ ପ୍ରୋତ୍ସାହିତ କରିବା ପାଇଁ ଏକ ବିସ୍ତୃତ ଆଲୋଚନା ପାଇଁ ଏକ ମଞ୍ଚ ପ୍ରଦାନ କରିବ ।  ପ୍ରଧାନମନ୍ତ୍ରୀ କହିଛନ୍ତି, ଆଜି ଆନ୍ତର୍ଜାତୀୟ ସୁରକ୍ଷା ଠାରୁ ଆରମ୍ଭ କରି ବିଶ୍ୱ ବାଣିଜ୍ୟ ପର୍ଯ୍ୟନ୍ତ ସବୁ କ୍ଷେତ୍ରରେ ସାମୁଦ୍ରିକ ସୁରକ୍ଷା ଏକ ବିଶ୍ୱ ପ୍ରାଥମିକତା ଭାବରେ ଉଭା ହୋଇଛି । ଜଗତୀକରଣ ଯୁଗରେ ମର୍ଚ୍ଚାଣ୍ଟ ନାଭିର ଭୂମିକା ମଧ୍ୟ ସମ୍ପ୍ରସାରିତ ହୋଇଛି । ବକ୍ତବ୍ୟ ଜାରି ରଖି ସେ କହିଛନ୍ତି, ଭାରତ ଠାରୁ ବିଶ୍ୱ ଅଧିକ କିଛି ଆଶା କରୁଛି ଏବଂ ମୁଁ ବିଶ୍ୱ ସମ୍ପ୍ରଦାୟକୁ ନିଶ୍ଚିତ କରୁଛି ଯେ ଭାରତ ତାହା ପୂରଣ କରିବ । ତେଣୁ ଏହି ପ୍ରତିରକ୍ଷା ପ୍ରଦର୍ଶନୀ ମଧ୍ୟ ଭାରତ ପ୍ରତି ବିଶ୍ୱସ୍ତରୀୟ ବିଶ୍ୱାସର ପ୍ରତୀକ ଅଟେ ।

ବିକାଶ ଏବଂ ଶିଳ୍ପ ଦକ୍ଷତା ସମ୍ବନ୍ଧରେ ଗୁଜରାଟର ପରିଚୟକୁ ପ୍ରଧାନମନ୍ତ୍ରୀ ସ୍ୱୀକାର କରିଛନ୍ତି । ସେ କହିଛନ୍ତି ଯେ ଏହି ପ୍ରତିରକ୍ଷା ପ୍ରଦର୍ଶନୀ ଏହି ପରିଚୟକୁ ଏକ ନୂତନ ଉଚ୍ଚତାକୁ ନେଇଛି । ସେ ଆହୁରି ମଧ୍ୟ କହିଛନ୍ତି ଯେ ଗୁଜରାଟ ଆଗାମୀ ଦିନରେ ପ୍ରତିରକ୍ଷା ଶିଳ୍ପର ଏକ ପ୍ରମୁଖ କେନ୍ଦ୍ର ଭାବରେ ଉଭା ହେବ ।

ଗୁଜୁରାଟରେ ଦିଶା ବିମାନବନ୍ଦରର ଭିତ୍ତିପ୍ରସ୍ତର ସ୍ଥାପନ କରି ପ୍ରଧାନମନ୍ତ୍ରୀ କହିଛନ୍ତି ଯେ ଆଗୁଆ ବାୟୁସେନା ଘାଟୀ ଦେଶର ସୁରକ୍ଷାକୁ ଅଧିକ ମଜବୁତ କରିବ । ସୀମା ନିକଟରେ ଦିଶାକୁ ଲକ୍ଷ୍ୟ କରି ପ୍ରଧାନମନ୍ତ୍ରୀ କହିଛନ୍ତି ଯେ ପଶ୍ଚିମ ସୀମାରେ ଥିବା କୌଣସି ପ୍ରତିକୂଳ ପରିସ୍ଥିତିର ମୁକାବିଲା ପାଇଁ ଭାରତ ବର୍ତ୍ତମାନ ପ୍ରସ୍ତୁତ ଅଛି । ସରକାର ଆସିବା ପରେ ଆମେ ଦିଶାରେ ଏକ ଘାଟୀ ସ୍ଥାପନ କରିବାକୁ ନିଷ୍ପତ୍ତି ନେଇଥିଲୁ ଏବଂ ଆମର ସେନାବାହିନୀର ଏହି ଆଶା ଆଜି ପୂରଣ ହେଉଛି । ଏହି ଅଞ୍ଚଳ ବର୍ତ୍ତମାନ ଦେଶର ନିରାପତ୍ତାର ଏକ ପ୍ରଭାବଶାଳୀ କେନ୍ଦ୍ରରେ ପରିଣତ ହେବ ବୋଲି ଶ୍ରୀ ମୋଦୀ କହିଛନ୍ତି ।

ଭବିଷ୍ୟତରେ କୌଣସି ଶକ୍ତିଶାଳୀ ରାଷ୍ଟ୍ର ପାଇଁ ସୁରକ୍ଷା କ‘ଣ ତାହାର ଏକ ଉଦାହରଣ ହେଉଛି ମହାକାଶ ଜ୍ଞାନକୌଶଳ । ଏହି କ୍ଷେତ୍ରର ବିଭିନ୍ନ ଆହ୍ୱାନକୁ ତିନୋଟି ସେବା ଦ୍ୱାରା ସମୀକ୍ଷା ଏବଂ ଚିହ୍ନଟ କରାଯାଇଛି । ସେଗୁଡିକର ସମାଧାନ ପାଇଁ ଆମକୁ ଶୀଘ୍ର କାର୍ଯ୍ୟ କରିବାକୁ ପଡିବ ।  ସେ କହିଛନ୍ତି, ମିଶନ୍ ମହାକାଶ ପ୍ରତିରକ୍ଷା କେବଳ ନବସୃଜନକୁ ଉତ୍ସାହିତ ଏବଂ ଆମର ଶକ୍ତିକୁ ମଜବୁତ କରିବ ନାହିଁ ବରଂ ନୂତନ ଏବଂ ଅଭିନବ ସମାଧାନ ମଧ୍ୟ ପ୍ରଦାନ କରିବ । ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି ଯେ ମହାକାଶ ପ୍ରଯୁକ୍ତିବିଦ୍ୟା ଭାରତର ଉଦାର ମହାକାଶ କୂଟନୀତିର ନୂତନ ସଂଜ୍ଞା ଗଠନ କରୁଛି ଏବଂ ନୂତନ ସମ୍ଭାବନା ସୃଷ୍ଟି କରୁଛି । ସେ ଆହୁରି ମଧ୍ୟ କହିଛନ୍ତି ଯେ ଅନେକ ଆଫ୍ରିକୀୟ ଦେଶ ଏବଂ ଅନ୍ୟାନ୍ୟ ଛୋଟ ଦେଶ ଏଥିରୁ ଉପକୃତ ହେଉଛନ୍ତି । ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ଯେ ୬୦ ରୁ ଅଧିକ ବିକାଶଶୀଳ ଦେଶ ଅଛନ୍ତି ଯେଉଁମାନଙ୍କ ସହ ଭାରତ ଏହାର ମହାକାଶ ଜ୍ଞାନକୌଶଳକୁ ସେୟାର କରୁଛି । ଦକ୍ଷିଣ ଏସିଆ ଉପଗ୍ରହ ଏହାର ଏକ ପ୍ରଭାବଶାଳୀ ଉଦାହରଣ । ଆସନ୍ତା ବର୍ଷ ସୁଦ୍ଧା ଦଶଟି ଏସିଆନ ଦେଶ ମଧ୍ୟ ଭାରତର ଉପଗ୍ରହ ତଥ୍ୟକୁ ବ୍ୟବହାର କରିବେ । ୟୁରୋପ ଏବଂ ଆମେରିକା ଭଳି ବିକଶିତ ଦେଶ ମଧ୍ୟ ଆମର ଉପଗ୍ରହ ତଥ୍ୟ ବ୍ୟବହାର କରୁଛନ୍ତି ବୋଲି ସେ କହିଛନ୍ତି ।

ପ୍ରତିରକ୍ଷା କ୍ଷେତ୍ର ସଂକ୍ରାନ୍ତରେ ପ୍ରଧାନମନ୍ତ୍ରୀ କହିଛନ୍ତି, ଉଦ୍ଦେଶ୍ୟ, ଉଦ୍ଭାବନ ଏବଂ କାର୍ଯ୍ୟକାରିତାର ମନ୍ତ୍ର ସହିତ ନୂତନ ଭାରତ ଆଗକୁ ବଢୁଛି । ୮ ବର୍ଷ ପୂର୍ବେ ଭାରତ ବିଶ୍ୱର ସର୍ବବୃହତ ପ୍ରତିରକ୍ଷା ଆମଦାନୀକାରୀ ଭାବରେ ମାନ୍ୟତା ପାଇଥିଲା ।  କିନ୍ତୁ ନୂଆ ଭାରତ ଉଦ୍ଦେଶ୍ୟ ଦେଖାଇଲା, ଇଚ୍ଛାଶକ୍ତି ଦେଖାଇଲା ଏବଂ ‘ମେକ୍ ଇନ୍ ଇଣ୍ଡିଆ‘ ଆଜି ପ୍ରତିରକ୍ଷା କ୍ଷେତ୍ରରେ ଏକ ସଫଳ କାହାଣୀ ପାଲଟିଛି । ଆମର ପ୍ରତିରକ୍ଷା ରପ୍ତାନି ଗତ ୫ ବର୍ଷରେ ୮ ଗୁଣ ବୃଦ୍ଧି ପାଇଛି । ଆମେ ବିଶ୍ୱର ୭୫ ରୁ ଅଧିକ ଦେଶକୁ ପ୍ରତିରକ୍ଷା ସାମଗ୍ରୀ ଏବଂ ଉପକରଣ ରପ୍ତାନି କରୁଛୁ । ୨୦୨୧–୨୨ ମସିହାରେ ଭାରତରୁ ପ୍ରତିରକ୍ଷା ରପ୍ତାନି ୧.୫୯ ବିଲିୟନ ଡଲାର ଅର୍ଥାତ ପ୍ରାୟ ୧୩ ହଜାର କୋଟି ଟଙ୍କାରେ ପହଞ୍ଚିଛି । ଏବଂ ଆଗାମୀ ସମୟରେ ଆମେ ୫ ବିଲିୟନ ଡ଼ଲାର ଅର୍ଥାତ ୪୦ ହଜାର କୋଟି ଟଙ୍କାରେ ପହଞ୍ଚବାକୁ ଲକ୍ଷ୍ୟ ରଖିଛୁ ବୋଲି ସେ କହିଛନ୍ତି ।

ବିଶ୍ୱ ଆଜି ଭାରତର ଜ୍ଞାନକୌଶଳ ଉପରେ ର୍ନିଭର କରୁଛି କାରଣ ଭାରତୀୟ ସୈନ୍ୟବାହିନୀ ସେମାନଙ୍କର ସାମର୍ଥ୍ୟ ପ୍ରମାଣ କରିଛନ୍ତି । ଭାରତୀୟ ନୌସେନା ଏହାର ନୌଭେଳାରେ ଆଇଏନଏସ୍‍-ବିକ୍ରାନ୍ତ ପରି ସ୍ୱଦେଶୀ ଅତ୍ୟାଧୁନିକ ବିମାନ ପରିବହନକାରୀ ଜାହାଜକୁ ଅନ୍ତର୍ଭୁକ୍ତ କରିଛି । ଏହା ସ୍ୱଦେଶୀ ଜ୍ଞାନକୌଶଳରେ କୋଚିନ୍‍ ସିପ୍‍ୟାର୍ଡ ଲିମିଟେଡ ଦ୍ୱାରା ନିର୍ମାଣ କରାଯାଇଛି । ସେ କହିଛନ୍ତି ଯେ ଭାରତୀୟ ବାୟୁସେନା ଦ୍ୱାରା ପ୍ରସ୍ତୁତ ‘ମେଡ୍‍ ଇନ୍ ଇଣ୍ଡିଆ‘ ପଦକ୍ଷେପ ଅନୁଯାୟୀ ବିକଶିତ ହୋଇଥିବା ‘ପ୍ରଚଣ୍ଡ’ ହାଲୁକା ଲଢୁଆ ହେଲିକପ୍ଟରଗୁଡ଼ିକ ଭାରତର ପ୍ରତିରକ୍ଷା କ୍ଷମତାର ଏକ ସ୍ପଷ୍ଟ ଉଦାହରଣ ।

ଭାରତର ପ୍ରତିରକ୍ଷା କ୍ଷେତ୍ରକୁ ଆତ୍ମର୍ନିଭରଶୀଳ କରିବା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି ଯେ ସୈନ୍ୟବାହିନୀ ମଧ୍ୟ ଉପକରଣର ଦୁଇଟି ତାଲିକା ଚୂଡାନ୍ତ କରିଛନ୍ତି ଯାହା କେବଳ ଦେଶ ମଧ୍ୟରେ କ୍ରୟ କରାଯିବ । ଏହିପରି ୧୦୧ ଟି ସାମଗ୍ରୀର ତାଲିକା ଆଜି ପ୍ରକାଶ ପାଇଛି । ଏହି ନିଷ୍ପତ୍ତିଗୁଡ଼ିକ ଏକ ଆତ୍ମର୍ନିଭରଶୀଳ ଭାରତର ସମ୍ଭାବନାକୁ ମଧ୍ୟ ଦର୍ଶାଏ । ଏହି ତାଲିକା ପରେ ପ୍ରତିରକ୍ଷା କ୍ଷେତ୍ରର ୪୧୧ ଟି ଉପକରଣ ଏବଂ ଯନ୍ତ୍ରପାତି ରହିବ, ଯାହା କେବଳ ମେକ୍ ଇନ୍ ଇଣ୍ଡିଆ ଅଧୀନରେ କିଣାଯିବ । ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ଯେ ଏତେ ବଡ଼ ବଜେଟ୍ ଭାରତୀୟ କମ୍ପାନୀର ଭିତ୍ତିଭୂମିକୁ ମଜବୁତ କରିବ ଏବଂ ସେମାନଙ୍କୁ ନୂତନ ଉଚ୍ଚତାକୁ ନେଇଯିବ । ଏଥିସହ ସେ କହିଛନ୍ତି ଯେ ଦେଶର ଯୁବକମାନେ ଏଥିରୁ ଅଧିକ ଲାଭବାନ ହେବେ ।

ପ୍ରଧାନମନ୍ତ୍ରୀ ଦର୍ଶାଇଛନ୍ତି ଯେ ପ୍ରତିରକ୍ଷା ଯୋଗାଣ କ୍ଷେତ୍ରରେ କିଛି କମ୍ପାନୀ ସୃଷ୍ଟି କରିଥିବା ଏକଚାଟିଆ ବ୍ୟବସ୍ଥାକୁ ବଦଳାଇବା ପାଇଁ ର୍ନିଭରଯୋଗ୍ୟ ବିକଳ୍ପଗୁଡ଼ିକ ବର୍ତ୍ତମାନ ବୃଦ୍ଧି ପାଉଛି । ପ୍ରତିରକ୍ଷା ଶିଳ୍ପରେ ଏହି ଏକଚାଟିଆତାକୁ ଭାଙ୍ଗିବା ପାଇଁ ଭାରତର ଯୁବକମାନେ ଶକ୍ତି ପ୍ରଦର୍ଶନ କରିଛନ୍ତି ଏବଂ ଆମର ଯୁବପୀଢିଙ୍କ ଏହି ପ୍ରୟାସ ବିଶ୍ୱର ମଙ୍ଗଳ ପାଇଁ ବୋଲି ଶ୍ରୀ ମୋଦୀ କହିଛନ୍ତି । ସେ ଦର୍ଶାଇଛନ୍ତି ଯେ ସମ୍ବଳ ଅଭାବରୁ ନିଜ ସୁରକ୍ଷା କ୍ଷେତ୍ରରେ ପଛରେ ରହିଯାଇଥିବା ବିଶ୍ୱର ଛୋଟ ଦେଶମାନେ ଏଥିରୁ ବହୁତ ଲାଭ ପାଇବେ ।

ପ୍ରଧାନମନ୍ତ୍ରୀ ସୂଚାଇ ଦେଇଛନ୍ତି ଯେ ଭାରତ ପ୍ରତିରକ୍ଷା କ୍ଷେତ୍ରକୁ ସୁଯୋଗର ଅସୀମ ଆକାଶ ଭାବରେ ଦେଖୁଛି । ପ୍ରତିରକ୍ଷା କ୍ଷେତ୍ରରେ ପୁଞ୍ଜି ବିନିଯୋଗର ସୁଯୋଗ ସମ୍ପର୍କରେ ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ଯେ ଉତ୍ତରପ୍ରଦେଶ ଏବଂ ତାମିଲନାଡୁରେ ଭାରତ ଦୁଇଟି ପ୍ରତିରକ୍ଷା କରିଡର ର୍ନିମାଣ କରୁଛି ଏବଂ ବିଶ୍ୱର ବହୁ ବଡ କମ୍ପାନୀ ଭାରତରେ ନିବେଶ କରିବାକୁ ଆସୁଛନ୍ତି । ସେ ମଧ୍ୟ ଏହି କ୍ଷେତ୍ରରେ ଏମଏସଏମଇର ଶକ୍ତି ଉପରେ ଆଲୋକପାତ କରି ସୂଚନା ଦେଇଛନ୍ତି ଯେ ଏହି ପୁଞ୍ଜି ବିନିଯୋଗ ପଛରେ ଏକ ବୃହତ ଯୋଗାଣ ନେଟୱାର୍କ ସୃଷ୍ଟି କରୁଥିବାବେଳେ ଏହି ବଡ କମ୍ପାନୀଗୁଡିକ ଆମର ଏମଏସଏମଇ ଦ୍ୱାରା ସମର୍ଥନ ପାଇବେ ।  ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ଏହି କ୍ଷେତ୍ରରେ ଏହି ପରିମାଣର ପୁଞ୍ଜି ବିନିଯୋଗ ସେହି ଅଞ୍ଚଳର ଯୁବକମାନଙ୍କ ପାଇଁ ଏକ ବଡ଼ ନିଯୁକ୍ତି ସୁଯୋଗ ସୃଷ୍ଟି କରିବ ଯାହା ପୂର୍ବରୁ ମଧ୍ୟ ଚିନ୍ତା କରାଯାଇ ନଥିଲା ।

ପ୍ରତିରକ୍ଷା ପ୍ରଦର୍ଶନୀରେ ଉପସ୍ଥିତ ଥିବା ସମସ୍ତ କମ୍ପାନୀକୁ ପ୍ରଧାନମନ୍ତ୍ରୀ ଆହ୍ୱାନ କରିଛନ୍ତି ଏବଂ ଭବିଷ୍ୟତର ଭାରତକୁ କେନ୍ଦ୍ରରେ ରଖିବା ପାଇଁ ଏହି ସୁଯୋଗଗୁଡିକୁ ଗ୍ରହଣ କରିବାକୁ ଅନୁରୋଧ କରିଛନ୍ତି । ତୁମେ ଅଭିନବ କର, ଦୁନିଆର ଶ୍ରେଷ୍ଠ ହେବାକୁ ପ୍ରତିଜ୍ଞା କର ଏବଂ ଏକ ଶକ୍ତିଶାଳୀ ବିକଶିତ ଭାରତର ସ୍ୱପ୍ନକୁ ସାକାର କର । ତୁମେ ମୋତେ ସର୍ବଦା ସେଠାରେ ସମର୍ଥନ କରୁଥିବା ଦେଖିବାକୁ ପାଇବ କହି ସେ ତାଙ୍କର ଅଭିଭାଷଣ ଶେଷ କରିଥିଲେ ।

ଗୁଜୁରାଟର ମୁଖ୍ୟମନ୍ତ୍ରୀ ଶ୍ରୀ ଭୁପେନ୍ଦ୍ର ପଟେଲ, ଗୁଜୁରାଟର ରାଜ୍ୟପାଳ ଶ୍ରୀ ଆଚାର୍ଯ୍ୟ ଦେବବ୍ରତ, କେନ୍ଦ୍ର ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହ, ଚିଫ୍‍ ଡିଫେନ୍ସ ଷ୍ଟାଫ୍‍ ଜେନେରାଲ ଅନିଲ ଚୌହାନ, ସ୍ଥଳସେନା ମୁଖ୍ୟ ଜେନେରାଲ ମନୋଜ ପାଣ୍ଡେ, ବାୟୁସେନା ମୁଖ୍ୟ,ଏୟାର ମାର୍ଶାଲ ଭି ଆର ଚୌଧୁରୀ, ନୌସେନା ମୁଖ୍ୟ ଆଡମିରାଲ ଆର ହରି କୁମାର ଏବଂ ଭାରତ ସରକାରଙ୍କ ପ୍ରତିରକ୍ଷା ସଚିବ ଡକ୍ଟର ଅଜୟ କୁମାର ପ୍ରମୁଖ ଅନ୍ୟମାନଙ୍କ ଗହଣରେ ଉପସ୍ଥିତ ଥିଲେ ।

ପୃଷ୍ଠଭୂମି

ପ୍ରଧାନମନ୍ତ୍ରୀ ପ୍ରତିରକ୍ଷା ପ୍ରଦର୍ଶନୀ ୨୨ ର ଉଦଘାଟନ କରିଥିଲେ, ‘ପ୍ୟାଥ ଟୁ ପ୍ରାଇଡ୍‍’ ବିଷୟବସ୍ତୁ ଅଧୀନରେ ଆୟୋଜିତ ହୋଇଥିବା ଏହି ପ୍ରଦର୍ଶନୀ ଆଜି ପର୍ଯ୍ୟନ୍ତ ଆୟୋଜିତ ଭାରତୀୟ ପ୍ରତିରକ୍ଷା ପ୍ରଦର୍ଶନୀ ମଧ୍ୟରେ ସର୍ବ ବୃହତ ଅଂଶଗ୍ରହଣର ସାକ୍ଷୀ ଅଟେ । ପ୍ରଥମ ଥର ପାଇଁ ଏହା ଏକ ପ୍ରତିରକ୍ଷା ପ୍ରଦର୍ଶନର ସାକ୍ଷୀ ହୋଇଛି ଯାହା ବିଦେଶୀ ଓଇଏମ୍‍ଏସ୍‍ର ଭାରତୀୟ ସହାୟକ କମ୍ପାନୀ, ଭାରତରେ ପଞ୍ଜୀକୃତ କମ୍ପାନୀ ଡିଭିଜନ୍‌, ଏକ ଭାରତୀୟ କମ୍ପାନୀ ସହିତ ଯୌଥ ଉଦ୍ୟୋଗ ପ୍ରଦର୍ଶନୀ ସହିତ ଭାରତୀୟ କମ୍ପାନୀଗୁଡିକ ପାଇଁ ସ୍ୱତନ୍ତ୍ର ଭାବରେ ଆୟୋଜିତ ହେଉଛି ।  ଏହି କାର୍ଯ୍ୟକ୍ରମରେ ଭାରତୀୟ ପ୍ରତିରକ୍ଷା ଉତ୍ପାଦନ କ୍ଷମତାର ବିସ୍ତାର ପରିସର ଏବଂ ପ୍ରଦର୍ଶିତ ହେଉଛି ।  ଏହି ପ୍ରଦର୍ଶନୀରେ ଏକ ଇଣ୍ଡିଆ ପାଭିଲିୟନ୍ ଏବଂ ଦଶଟି ରାଜ୍ୟ ପ୍ୟାଭିଲିୟନ୍ ରହିଛି ।  ଇଣ୍ଡିଆ ପାଭିଲିୟନରେ ପ୍ରଧାନମନ୍ତ୍ରୀ ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ୍ (ହାଲ୍‍) ଦ୍ୱାରା ପରିକଳ୍ପିତ ସ୍ୱଦେଶୀ ପ୍ରଶିକ୍ଷକ ବିମାନ ଏଚଟିଟି–୪୦ ର ଉନ୍ମୋଚନ କରିଛନ୍ତି । ଏହି ବିମାନରେ ଆଧୁନିକ ସମସାମୟିକ ପ୍ରଣାଳୀ ରହିଛି ଏବଂ ପାଇଲଟ୍‌-ଅନୁକୂଳ ବୈଶିଷ୍ଟ୍ୟ ସହିତ ଡିଜାଇନ୍ କରାଯାଇଛି ।

ଏହି କାର୍ଯ୍ୟକ୍ରମ ଅବସରରେ ପ୍ରଧାନମନ୍ତ୍ରୀ ମିଶନ୍ ମହାକାଶ ପ୍ରତିରକ୍ଷା ମଧ୍ୟ ଆରମ୍ଭ କରିଛନ୍ତି – ଶିଳ୍ପ ଷ୍ଟାର୍ଟଅପ୍ ମାଧ୍ୟମରେ ସ୍ପେସ୍ ଡୋମେନରେ ପ୍ରତିରକ୍ଷା ବାହିନୀ ପାଇଁ ଅଭିନବ ସମାଧାନର ବିକାଶ ପାଇଁ । ପ୍ରଧାନମନ୍ତ୍ରୀ ମଧ୍ୟ ଗୁଜୁରାଟର ଦିଶା ବମାନବନ୍ଦରର ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ଏହି ଆଗୁଆ ବାୟସେନା ଘାଟୀ ଦେଶର ସୁରକ୍ଷାକୁ ନୂତନ ସ୍ଥାପତ୍ୟ ପ୍ରଦାନ କରିବ ।

ଏହି ପ୍ରଦର୍ଶନୀରେ ‘ଭାରତ–ଆଫ୍ରିକା: ପ୍ରତିରକ୍ଷା ଏବଂ ସୁରକ୍ଷା ସହଯୋଗକୁ ଏକତ୍ର କରିବା ପାଇଁ ରଣନୀତି ଗ୍ରହଣ‘ ବିଷୟବସ୍ତୁ ଅଧୀନରେ ଦ୍ୱିତୀୟ ଭାରତ–ଆଫ୍ରିକା ପ୍ରତିରକ୍ଷା ଆଲୋଚନାର ସାକ୍ଷୀ ରହିବ । ଏହି ପ୍ରଦର୍ଶନୀରେ ଦ୍ୱିତୀୟ ଭାରତ ମହାସାଗରୀୟ ଅଞ୍ଚଳ+ (ଆଇଓଆର +) ସମ୍ମିଳନୀ ମଧ୍ୟ ଅନୁଷ୍ଠିତ ହେବ, ଯାହା ପ୍ରଧାନମନ୍ତ୍ରୀଙ୍କ ଦୃଷ୍ଟିଭଙ୍ଗୀ ଅନୁଯାୟୀ ଶାନ୍ତି, ଅଭିବୃଦ୍ଧି, ସ୍ଥିରତା ଏବଂ ସମୃଦ୍ଧତା (ସାଗର) ବୃଦ୍ଧି ପାଇଁ ଆଇଓଆର + ଦେଶ ମଧ୍ୟରେ ପ୍ରତିରକ୍ଷା ସହଯୋଗକୁ ପ୍ରୋତ୍ସାହିତ କରିବା ପାଇଁ ଏକ ବିସ୍ତୃତ କଥାବାର୍ତ୍ତା ଲାଗି ଏକ ମଞ୍ଚଞ୍ଚ ପ୍ରଦାନ କରିବ । ପ୍ରଦର୍ଶନୀ ସମୟରେ ପ୍ରତିରକ୍ଷା ପାଇଁ ପ୍ରଥମ ଥର ସକାଶେ ନିବେଶକଙ୍କ ବୈଠକ ଅନୁଷ୍ଠିତ ହେବ । ଏହା ମଧ୍ୟ ଶହେରୁ ଅଧିକ ଷ୍ଟାର୍ଟଅପ୍ ମନ୍ଥନ ୨୦୨୨ ରେ ସେମାନଙ୍କର ଅଭିନବ ପ୍ରଦର୍ଶନ, ପ୍ରତିରକ୍ଷା ଉଦ୍ଭାବନ, ଇଭେଣ୍ଟ ଅଫ୍‍ ଆଇଇଡିଏକ୍ସ (ଇନୋଭେସନ୍ସ ଫର ଡିଫେନ୍ସ ଏକ୍ସଲେନ୍ସ) ରେ ସେମାନଙ୍କର ପ୍ରଦର୍ଶନ କରିବାର ସୁଯୋଗ ପାଇବେ । କାର୍ଯ୍ୟକ୍ରମ ‘ବନ୍ଧନ’ ମାଧ୍ୟମରେ ଏହା ୪୫୧ ଭାଗିଦାରୀ / ଶୁଭାରମ୍ଭର ସଙ୍କଳ୍ପ ମଧ୍ୟ ଦେଖିବ ।

HS