ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭାରତ ସରକାରଙ୍କ ସମସ୍ତ ସଚିବଙ୍କୁ ଭେଟିଛନ୍ତି । ଏହି ବୈଠକ ବେଳେ କେନ୍ଦ୍ରମନ୍ତ୍ରୀ ଏବଂ ସ୍ଵାଧୀନ ଦାୟିତ୍ଵରେ ଥିବା ମନ୍ତ୍ରୀମାନେ ଉପସ୍ଥିତ ଥିଲେ ।

ବୈଠକରେ କେବିନେଟ ସଚିବ, ଚଳିତ ବର୍ଷ ଜାନୁଆରୀ ମାସରେ 8 ଟି ସଚିବ ଗୋଷ୍ଠୀଙ୍କ ପକ୍ଷରୁ ପ୍ରଧାନମନ୍ତ୍ରୀଙ୍କୁ ପ୍ରଦାନ କରାଯାଇଥିବା ରିପୋର୍ଟ ଏବଂ ତତପରବର୍ତ୍ତୀ କାର୍ଯ୍ୟ ସମ୍ପର୍କରେ ସମ୍ୟକ ସୂଚନା ଦେଇଥିଲେ । ସେମାନଙ୍କ ଗୋଷ୍ଠୀ ଦ୍ଵାରା ପ୍ରଦତ୍ତ ସୁପାରିଶ ପ୍ରବର୍ତ୍ତନର ସଦ୍ୟତମ ସ୍ଥିତି ସମ୍ପର୍କରେ ଦୁଇଜଣ ରାପୋର୍ଟିୟର ପ୍ରଧାନମନ୍ତ୍ରୀଙ୍କୁ ଉପସ୍ଥାପନା ମାଧ୍ୟମରେ ଅବଗତ କରାଇଥିଲେ ।

ଏବେ 10 ଟି ନୂତନ ସଚିବ ଗୋଷ୍ଠୀ ଗଠନ କରାଯାଇଛି ଏବଂ ସେମାନେ ଆଗାମୀ ନଭେମ୍ବର ଶେଷ ସୁଦ୍ଧା ଶାସନ ସମ୍ପର୍କୀତ ବିଭିନ୍ନ ପ୍ରସଙ୍ଗରେ ସରକାରଙ୍କୁ ସେମାନଙ୍କର ରିପୋର୍ଟ ପ୍ରଦାନ କରିବେ । ପୂର୍ବ ଗୋଷ୍ଠୀ ନିର୍ଦ୍ଦିଷ୍ଟ ପ୍ରସଙ୍ଗ ଉପରେ କାର୍ଯ୍ୟ କରୁଥିବାବେଳେ ଚଳିତ ଥର ଗଠନ କରାଯାଇଥିବା ଗୋଷ୍ଠୀଙ୍କୁ ସେକ୍ଟର ୱାରୀ ରିପୋର୍ଟ ପ୍ରସ୍ତୁତ ଲାଗି କୁହାଯାଇଛି । ସେମାନେ କୃଷି, ଶକ୍ତି, ପରିବହନ ଆଦି କ୍ଷେତ୍ର ଉପରେ ସେମାନଙ୍କର ଅଧ୍ୟୟନ ରିପୋର୍ଟ ପ୍ରସ୍ତୁତ କରିବେ ।

ସଚିବମାନଙ୍କୁ ସେମାନଙ୍କ କାର୍ଯ୍ୟ ଲାଗି ଅଭିନନ୍ଦନ ଜଣାଇବା ସହ ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଲେ ଯେ ବିଭିନ୍ନ କ୍ଷେତ୍ରରେ କେନ୍ଦ୍ର ସରକାର ଏ ପର୍ଯ୍ୟନ୍ତ କରିଥିବା କାର୍ଯ୍ୟ ସମ୍ପର୍କରେ ସେମାନେ ଗୁରୁତ୍ଵର ସହ ସମୀକ୍ଷା କରି ରିପୋର୍ଟ ପ୍ରସ୍ତୁତ କରିବା ଆବଶ୍ୟକ । ଯୁବ ଅଫିସରମାନଙ୍କୁ ଏଭଳି ଗବେଷଣାତ୍ମକ ଅଧ୍ୟୟନ କାର୍ଯ୍ୟରେ ନିୟୋଜିତ କରାଯିବା ଉପରେ ସେ ଗୁରୁତ୍ଵ ଆରୋପ କରିଥିଲେ । ପ୍ରତ୍ୟେକ ସଚିବ ଗୋଷ୍ଠୀ ଜନସଂଖ୍ୟାଜନିତ ସାମର୍ଥ୍ୟ ନେଇ ଅଧ୍ୟୟନ କରିବା ସହ ଦେଶର 800 ନିୟୁତ ଯୁବ ଶକ୍ତିକୁ କିପରି ସକାରାତ୍ମକ ଭାବେ ଦେଶ ନିର୍ମାଣ କାର୍ଯ୍ୟରେ ନିୟୋଜିତ କରାଯାଇପାରିବ ତାର ଉପାୟ ସ୍ଥିର କରିବେ । ଏହି ସବୁ ଗୋଷ୍ଠୀଙ୍କର ଭାରତବାସୀଙ୍କ ଆଶା ଆକାଂକ୍ଷାକୁ ପୂରଣ କରିବା ଭଳି ସାମର୍ଥ୍ୟ ଓ ଜ୍ଞାନ ରହିଛି । ଏହି ଦିଗରେ ସେମାନେ କାର୍ଯ୍ୟ କରିବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ ।