ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି କୁଏତର ଶେଖ ସାଦ ଅଲ ଅବଦୁଲ୍ଲା ଇଣ୍ଡୋର ସ୍ପୋର୍ଟସ କମ୍ପ୍ଲେକ୍ସରେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ‘ହାଲା ମୋଦୀ‘ରେ ଭାରତୀୟ ସମ୍ପ୍ରଦାୟର ଏକ ବିଶାଳ ସମାବେଶକୁ ସମ୍ବୋଧିତ କରିଛନ୍ତି । ଏହି କାର୍ଯ୍ୟକ୍ରମରେ କୁଏତରେ ସମ୍ପ୍ରଦାୟର ବିଭିନ୍ନ ବର୍ଗର ପ୍ରତିନିଧିତ୍ୱ କରୁଥିବା ଭାରତୀୟ ନାଗରିକମାନେ ଯୋଗ ଦେଇଥିଲେ।

ସମ୍ପ୍ରଦାୟ ପକ୍ଷରୁ ପ୍ରଧାନମନ୍ତ୍ରୀଙ୍କୁ ଅସାଧାରଣ ଉତ୍ସାହର ସହ ସ୍ୱାଗତ କରାଯାଇଥିଲା । ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଭାରତ–କୁଏତ ସମ୍ପର୍କ ଭାରତୀୟ ସମ୍ପ୍ରଦାୟ ଦ୍ୱାରା ଗଭୀର ଭାବରେ ସମୃଦ୍ଧ, ଯାହା ଦୁଇ ଦେଶ ମଧ୍ୟରେ ସମ୍ପର୍କକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ । ଏହି ନିମନ୍ତ୍ରଣ ପାଇଁ କୁଏତର ଅମୀରଙ୍କୁ ଧନ୍ୟବାଦ ଜଣାଇ ସେ କହିଛନ୍ତି ଯେ ୪୩ ବର୍ଷ ପରେ ଜଣେ ଭାରତୀୟ ପ୍ରଧାନମନ୍ତ୍ରୀ ଦୀର୍ଘ ବର୍ଷର ବନ୍ଧୁତାକୁ ସୁଦୃଢ଼ କରିବା ପାଇଁ କୁଏତ ଗସ୍ତ କରୁଛନ୍ତି।

ପ୍ରଧାନମନ୍ତ୍ରୀ କୁଏତର ବିକାଶରେ ସମୁଦାୟର କଠିନ ପରିଶ୍ରମ, ସଫଳତା ଏବଂ ଅବଦାନକୁ ପ୍ରଶଂସା କରିଥିଲେ, ଯାହାକୁ ସ୍ଥାନୀୟ ସରକାର ଏବଂ ସମାଜ ବ୍ୟାପକ ସ୍ୱୀକୃତି ଦେଇଥିଲେ ବୋଲି ସେ କହିଥିଲେ । ଭାରତୀୟ ସମ୍ପ୍ରଦାୟର କଲ୍ୟାଣ ପାଇଁ ସେ କୁଏତର ନେତୃତ୍ୱଙ୍କୁ ଧନ୍ୟବାଦ ଦେଇଥିଲେ। କୁଏତ୍ ଏବଂ ଉପସାଗରୀୟ ଅଞ୍ଚଳର ଭାରତୀୟ ଶ୍ରମିକମାନଙ୍କୁ ସହାୟତା କରିବା ପାଇଁ ଭାରତର ଦୃଢ଼ ପ୍ରତିବଦ୍ଧତାକୁ ପ୍ରତିଫଳିତ କରି ସେ ଇ–ମାଇଗ୍ରେଟ୍ ପୋର୍ଟାଲ୍ ଭଳି ସରକାରଙ୍କ ଦ୍ୱାରା ଗ୍ରହଣ କରାଯାଇଥିବା ଟେକ୍ନୋଲୋଜି ଭିତ୍ତିକ ପଦକ୍ଷେପ ବିଷୟରେ ଆଲୋଚନା କରିଥିଲେ।

ବିଶ୍ୱବନ୍ଧୁ ଭାବରେ ଭାରତର ଆଭିମୁଖ୍ୟକୁ ପ୍ରଧାନମନ୍ତ୍ରୀ ଦର୍ଶାଇଥିଲେ । ବିଶେଷ କରି ବୈଷୟିକ ଜ୍ଞାନକୌଶଳ, ଭିତ୍ତିଭୂମି ଏବଂ ସ୍ଥାୟୀତା କ୍ଷେତ୍ରରେ ଭାରତର ଦ୍ରୁତ ପ୍ରଗତି ଓ ରୂପାନ୍ତର ସମ୍ପର୍କରେ ସେ ବିସ୍ତୃତ ଭାବେ ସୂଚନା ଦେଇଥିଲେ। ସେ ଉଲ୍ଲେଖ କରିଥିଲେ ଯେ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି ହେବା ବ୍ୟତୀତ, ଭାରତ ଫିନଟେକରେ ବିଶ୍ୱସ୍ତରୀୟ ନେତୃତ୍ୱ ନେଉଥିଲା, ଯାହା ଷ୍ଟାର୍ଟଅପ୍ କ୍ଷେତ୍ରରେ ବିଶ୍ବରେ ତୃତୀୟ ବୃହତ୍ତମ ଏବଂ ବିଶ୍ୱର ସର୍ବାଧିକ ଡିଜିଟାଲ୍ ସଂଯୋଜିତ ସମାଜ ମଧ୍ୟରୁ ଅନ୍ୟତମ । ସେ ଆର୍ଥିକ ଅନ୍ତର୍ଭୁକ୍ତୀକରଣ, ମହିଳାଙ୍କ ନେତୃତ୍ବାଧୀନ ବିକାଶ ଏବଂ ଅନ୍ତର୍ଭୁକ୍ତ ଅଭିବୃଦ୍ଧି ଭଳି ସଫଳତା ଉପରେ ଆଲୋକପାତ କରିଥିଲେ। ଦୁଇ ଦେଶର ବିକାଶ ଭାରତ ଏବଂ ନ୍ୟୁ କୁଏତର ମିଳିତ ଆକାଂକ୍ଷା ଉପରେ ଆଲୋକପାତ କରି ସେ କହିଥିଲେ ଯେ ଭାରତ ଏବଂ କୁଏତ ପାଇଁ ଏକାଠି କାମ କରିବାର ବିପୁଳ ସୁଯୋଗ ରହିଛି । ଭାରତର ଦକ୍ଷତା ଏବଂ ଉଦ୍ଭାବନ ଦୁଇ ଦେଶ ମଧ୍ୟରେ ନୂତନ ଭାଗିଦାରୀକୁ ପ୍ରୋତ୍ସାହିତ କରିପାରିବ ।

ଜାନୁଆରୀ ୨୦୨୫ ରେ ଭାରତରେ ଆୟୋଜିତ ହେବାକୁ ଥିବା ପ୍ରବାସୀ ଭାରତୀୟ ଦିବସ ଏବଂ ମହାକୁମ୍ଭରେ ଅଂଶଗ୍ରହଣ କରିବାକୁ ପ୍ରଧାନମନ୍ତ୍ରୀ ପ୍ରବାସୀ ସଦସ୍ୟମାନଙ୍କୁ ନିମନ୍ତ୍ରଣ କରିଥିଲେ ।

BS