ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ବାରାଣାସୀର କାଶୀ ବିଶ୍ୱନାଥ ମନ୍ଦିରରେ ପୂଜାର୍ଚ୍ଚନା କରିଥିଲେ । ସେ କାଶୀ ବିଶ୍ୱନାଥ ମନ୍ଦିର ପରିସରରେ ଏକ ସାଂକେତିକ ଶିଳାନ୍ୟାସ ସମାରୋହ ପରେ ଉପସ୍ଥିତ ସମାରୋହକୁ ସମ୍ବୋଧିତ କରିଥିଲେ । ସେ କହିଥିଲେ ଯେ କାଶୀ ବିଶ୍ୱନାଥ ଧାମ ପ୍ରକଳ୍ପ ସହିତ ଯୋଡ଼ି ହେବା ତାଙ୍କ ପାଇଁ ଈଶ୍ୱରଙ୍କ ଆଶୀର୍ବାଦ ସଦୃଶ । ସମର୍ପଣର ସହିତ ସେମାନଙ୍କ ଦାୟିତ୍ୱ ସମ୍ପାଦନ କରିଥିବାରୁ କାଶୀ ବିଶ୍ୱନାଥ ଧାମ ପ୍ରକଳ୍ପରେ ଜଡ଼ିତ ଅଧିକାରୀମାନଙ୍କୁ ସେ ପ୍ରଶଂସା କରିଥିଲେ । ମନ୍ଦିର ଚାରିପାଖେ ନିଜସ୍ୱ ସମ୍ପତ୍ତି ଥିବା ଏବଂ ପ୍ରକଳ୍ପ ପାଇଁ ଏହାର ଅଧିଗ୍ରହଣକୁ ଅନୁମତି ଦେଇଥିବା ସବୁଲୋକମାନଙ୍କୁ ସେ ଧନ୍ୟବାଦ ଜ୍ଞାପନ କରିଥିଲେ ।

ଅନେକ ଶତାବ୍ଦୀ ଧରି ଅତ୍ୟାଚାର ସହି ସୁଦ୍ଧା କାଶୀ ବିଶ୍ୱନାଥ ମନ୍ଦିର ନିଜର ଅସ୍ତିତ୍ୱ ବଜାୟ ରଖିଥିବା ସେ କହିଥିଲେ । ଦୁଇ ଶତାବ୍ଦୀ ପୂର୍ବେ କାଶୀ ବିଶ୍ୱନାଥ ମନ୍ଦିରର ପୁନରୁଦ୍ଧାରରେ ରାଣୀ ଅହଲ୍ୟାବାଇ ହୋଲକରଙ୍କ କାର୍ଯ୍ୟକୁ ସେ ସ୍ମରଣ କରି ପ୍ରଶଂସା କରିଥିଲେ ।

ସେ କହିଥିଲେ ଯେ ସେବେଠାରୁ କ୍ଷମତାରେ ଥିବା ଲୋକମାନେ ମନ୍ଦିରର ପାର୍ଶ୍ଵବର୍ତ୍ତୀ ସମଗ୍ର ଅଂଚଳ ପାଇଁ ବିଶେଷ ଚିନ୍ତା କରିନଥିଲେ । ସେ କହିଥିଲେ, କାଶୀ ବିଶ୍ୱନାଥ ମନ୍ଦିର ନିକଟରେ ଥିବା ପାଖାପାଖି 40ଟି ମନ୍ଦିର ସମୟକ୍ରମେ ଜବରଦଖଲ କରାଯାଇଥିଲା, ଏବଂ ବର୍ତ୍ତମାନ ଏହା ଜବରଦଖଲ ମୁକ୍ତ ହୋଇସାରିଛି । ସେ କହିଥିଲେ ସମଗ୍ର ମନ୍ଦିର ପରିସର ବର୍ତ୍ତମାନ ନୂଆରୂପ ପାଇବାର ପ୍ରକ୍ରିୟାରେ ରହିଛି ଏବଂ ଏହାର ଫଳ ଏବେ ଦେଖିବାକୁ ମିଳୁଛି । ସେ କହିଥିଲେ ଗଙ୍ଗା ନଦୀ ଏବଂ କାଶୀ ବିଶ୍ୱନାଥ ମନ୍ଦିର ମଧ୍ୟରେ ଏକ ସିଧାସଳଖ ସମ୍ପର୍କ ପ୍ରତିଷ୍ଠା କରାଯାଉଛି ।

ସେ କହିଥିଲେ ଏହି ପ୍ରକଳ୍ପ ଅନ୍ୟସ୍ଥାନରେ ଏପରି ପ୍ରକଳ୍ପ ନିର୍ମାଣ ପାଇଁ ଆଦର୍ଶ ପାଲଟିବ ତଥା କାଶୀକୁ ବିଶ୍ୱସ୍ତରରେ ଏକ ନୂଆ ପରିଚୟ ପ୍ରଦାନ କରିବ ।