ପିଏମଇଣ୍ଡିଆ

ଏକ ଐତିହାସିକ ପଦକ୍ଷେପ ସ୍ୱରୂପ ଭାରତ ସରକାର ଦୁର୍ନୀତି, କଳାଟଙ୍କା, ଅର୍ଥ ଠକେଇ (Money Laundering), ଆତଙ୍କବାଦ, ଆର୍ଥିକ ଆତଙ୍କବାଦ ଓ ଜାଲ୍ ନୋଟ ପ୍ରଚଳନ ବିରୋଧରେ କଠୋର ଲଢ଼େଇ ପାଇଁ ୨୦୧୬ ନଭେମ୍ବର ୮ ମଧ୍ୟରାତ୍ରିରୁ ସମସ୍ତ ୫୦୦ ଓ ୧୦୦୦ ଟଙ୍କିଆ ନୋଟକୁ ଅସିଦ୍ଧ ଘୋଷଣା ପାଇଁ ନିଷ୍ପତ୍ତି ନେଇଛନ୍ତି ।

ଏହା ବଦଳରେ ପ୍ରଥମ କରି ଦୁଇ ହଜାର ଟଙ୍କିଆ ନୋଟ ଓ ନୂଆ ୫୦୦ଟଙ୍କିଆ ନୋଟ ପ୍ରଚଳନ କରିବା ପାଇଁ ରିଜର୍ଭ ବ୍ୟାଙ୍କର ସୁପାରିସକୁ ସରକାର ଗ୍ରହଣ କରିଛନ୍ତି ।

୧୦୦, ୫୦,୨୦,୧୦, ୫, ୨ ଓ ୧ଟଙ୍କିଆ ନୋଟ୍ ପୂର୍ବ ଭଳି କାର୍ଯ୍ୟ କରିବ ଓ ଆଜିର ନିଷ୍ପତ୍ତିରେ ଏହା ପ୍ରଭାବିତ ହେବ ନାହିଁ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୮ତାରିଖ ମଙ୍ଗଳବାର ସନ୍ଧ୍ୟାରେ ଦେଶକୁ ସମ୍ବୋଧିତ କରି ଏହି ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି । ସେ କହିଛନ୍ତି ଯେ ଏହି ନିଷ୍ପତ୍ତି ଭାରତର ସଚ୍ଚୋଟ ଓ ପରିଶ୍ରମୀ ନାଗରିକଙ୍କ ପୂର୍ଣ୍ଣ ସ୍ୱାର୍ଥ ରକ୍ଷା କରିବ ଏବଂ ଯେଉଁ ଦେଶ ବିରୋଧୀ ଏବଂ ଅସାମାଜିକ ଗୋଷ୍ଠୀ ଦ୍ୱାରା ୫୦୦ ଓ ୧୦୦୦ଟଙ୍କିଆ ନୋଟ ଠୁଳ କରାଯାଇଛି ତାହା କେବଳ କାଗଜ ଖଣ୍ଡ ପାଲଟିଯିବ ।

ପ୍ରଧାନମନ୍ତ୍ରୀ କହିଛନ୍ତି ଯେ ସରକାରଙ୍କ ଦ୍ୱାରା ନିଆଯାଇଥିବା ପଦକ୍ଷେପ ଦୁର୍ନୀତି, କଳାଟଙ୍କା ଓ ଜାଲ ନୋଟ ବିରୋଧରେ ସାଧାରଣ ଲୋକଙ୍କ ଲଢ଼େଇକୁ ଅଧିକ ସୁଦୃଢ଼ କରାଇବ ।

ଆଗାମୀ ଦିନରେ ସାଧାରଣ ନାଗରିକମାନଙ୍କୁ କିଛି ସମସ୍ୟାର ସମ୍ମୁଖୀନ ହେବାକୁ ପଡ଼ିପାରେ ବୋଲି ଅବଗତ ଥାଇ ସରକାର କେତେକ ଧାରାବାହିକ ପଦକ୍ଷେପ ନେଇଛନ୍ତି ଯାହା ଏସବୁ ସମସ୍ୟାରୁ ମୁକୁଳିବାରେ ସହାୟକ ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ପୁରୁଣା ୫୦୦ ଓ ୧୦୦୦ ଟଙ୍କିଆ ନୋଟ ରଖିଥିବା ବ୍ୟକ୍ତିମାନେ ଏହାକୁ ବ୍ୟାଙ୍କ କିମ୍ବା ଡାକଘରେ ନଭେମ୍ବର ୧୦ପରଠାରୁ ଡିସେମ୍ବର ୩୦ତାରିଖ ମଧ୍ୟରେ ଜମା କରିପାରିବେ ବୋଲି ପ୍ରଧାନମନ୍ତ୍ରୀ ଘୋଷଣା କରିଛନ୍ତି । ତେବେ ଏଟିଏମ୍ ଓ ବ୍ୟାଙ୍କରୁ ଟଙ୍କା ଉଠାଣର ପରିମାଣ ଉପରେ କିଛି ସମୟ ପାଇଁ ସୀମା ନିର୍ଦ୍ଧାରଣ କରାଯାଇଛି ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ମାନବିକତା ଦୃଷ୍ଟିରୁ ୫୦୦ ଓ ୧୦୦୦ ଟଙ୍କିଆ ନୋଟ ସମସ୍ତ ସରକାରୀ ହସ୍ପିଟାଲ, ସରକାରୀ ଔଷଧ ଦୋକାନୀ (ଡାକ୍ତରଙ୍କ ପ୍ରେସ୍କ୍ରିପସନ୍ ସହ), ରେଳବାଇ ଟିକେଟ୍ କାଉଂଟର, ସରକାରୀ ବସ୍, ବିମାନ ଟିକେଟ୍ କାଉଂଟର, ପେଟ୍ରୋଲ ଓ ଡିଜେଲ ପମ୍ପ ତଥା ରାଷ୍ଟ୍ରାୟତ୍ତ ତୈଳ କମ୍ପାନୀର ଗ୍ୟାସ ଷ୍ଟେସନ୍, ରାଜ୍ୟ ଓ କେନ୍ଦ୍ର ସରକାରଙ୍କ ସ୍ୱୀକୃତିପ୍ରାପ୍ତ ଖାଉଟି ସମବାୟ ଷ୍ଟୋର ଓ ଶବସଂସ୍କାର ସ୍ଥଳୀରେ ଗ୍ରହଣୀୟ ହେବ ।

ତେବେ ସମସ୍ତ ପ୍ରକାରର ଚେକ୍, ଡିମାଣ୍ଡ ଡ୍ରାଫ୍ଟ, ଡେବିଟ୍ ଓ କ୍ରେଡିଟ୍ କାର୍ଡ ଏବଂ ଇଲେକ୍ଟ୍ରୋନିକ ଫଣ୍ଡ ଟ୍ରାନ୍ସଫର୍ ମାଧ୍ୟମରେ ଅଣନଗଦ ପୈଠ ଉପରେ କୌଣସି କଟକଣା ନାହିଁ ବୋଲି ପ୍ରଧାନମନ୍ତ୍ରୀ ମୋଦୀ ଗୁରୁତ୍ୱ ଦେଇଛନ୍ତି ।

ନିଜର ସମ୍ବୋଧନରେ ପ୍ରଧାନମନ୍ତ୍ରୀ ମୁଦ୍ରାସ୍ପୀତି ସହ ନଗଦ ପ୍ରଚଳନ କିଭଳି ଜଡ଼ିତ ରହିଛି ତାହାର ଭିତରି କଥା ତଥା ଅସାଧୁ ଉପାୟରେ ନଗଦ କାରବାର ଯୋଗୁ ମୁଦ୍ରାସ୍ପୀତିର ସ୍ଥିତି କେତେ ଖରାପ ହୋଇଛି ସେ ସମ୍ପର୍କରେ ଅବଗତ କରାଇଛନ୍ତି । ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ଏହା ଗରିବ ଓ ନବ-ମଧ୍ୟବର୍ଗୀୟ ଲୋକଙ୍କ ଉପରେ ପ୍ରତିକୂଳ ପ୍ରଭାବ ପକାଉଛି । ଘର କିଣିବା ସମୟରେ ଦେଶର ସଚ୍ଚୋଟ ନାଗରିକ କେତେ ସମସ୍ୟାର ସମ୍ମୁଖୀନ ହେଉଛି ତାହା ସେ କହିଥିଲେ ।

କଳା ଧନକୁ ମୂଳପୋଛ କରିବା ପାଇଁ ଏହା ସମୟ ଦ୍ୱାରା ପରିକ୍ଷିତ ପ୍ରତିବଦ୍ଧତା ।
ପ୍ରଧାନମନ୍ତ୍ରୀ ବାରମ୍ବାର କହିଛନ୍ତି ଯେ ସରକାର କଳାଟଙ୍କାର ନିୟନ୍ତ୍ରଣକୁ ସୁନିଶ୍ଚିତ କରିବାକୁ ପ୍ରତିଶ୍ରୁତିବଦ୍ଧ । ଏନଡିଏ ସରକାର ବିଗତ ଅଢ଼େଇ ବର୍ଷର କାର୍ଯ୍ୟକାଳରେ ଏହା କରୁଛି ଓ ସେ ଉଦାହରଣ ସୃଷ୍ଟି କରିଛନ୍ତି ।

ଏନଡିଏ ସରକାରର ପ୍ରଧାନମନ୍ତ୍ରୀ ଭାବେ ସର୍ବପ୍ରଥମେ କଳାଟଙ୍କା ପାଇଁ ଏସ୍ଆଇଟି ଗଠନ ନିମନ୍ତେ ସେ ନିଷ୍ପତ୍ତି ନେଇଥିଲେ ।

ବିଦେଶୀ ବ୍ୟାଙ୍କ ଏକାଉଂଟ ସମ୍ପର୍କରେ ସୂଚନା ନିମନ୍ତେ ୨୦୧୫ ମସିହାରେ ଏକ ଆଇନ ପ୍ରଣୟନ କରାଯାଇଥିଲା । ୨୦୧୬ ଅଗଷ୍ଟ ମାସରେ ବେନାମି କାରବାର ଉପରେ କଟକଣା ପାଇଁ ଏକ କଠୋର ନିୟମ ପ୍ରଣୟନ କରାଯାଇଥିଲା । ଏହି ସମୟରେ କଳାଟଙ୍କା ଘୋଷଣା ପାଇଁ ଏକ ଯୋଜନା ଆରମ୍ଭ ହୋଇଥିଲା ।

ଗତ ଅଢ଼େଇ ବର୍ଷ ଧରି ଫଳପ୍ରଦ ପ୍ରୟାସ ଯୋଗୁ ୧.୨୫ଲକ୍ଷ କୋଟି ଟଙ୍କାରୁ ଉର୍ଦ୍ଧ୍ଵ କଳା ଧନ ପ୍ରଘଟ ହୋଇପାରିଛି ।

ବିଶ୍ୱ ଦରବାରରେ କଳାଟଙ୍କା ପ୍ରସଙ୍ଗ ଉତ୍ଥାପନ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରମ୍ବାର କଳାଧନ ପ୍ରସଙ୍ଗକୁ ବିଶ୍ୱ ଦରବାରରେ ଉଠାଇଛନ୍ତି । ବିଭିନ୍ନ ଗୁରୁତ୍ୱପୂର୍ଣ୍ଣ ବହୁପାକ୍ଷିକ ସମ୍ମିଳନୀ ଓ ଦ୍ୱିପାକ୍ଷିକ ବୈଠକ ବେଳେ ନେତାମାନଙ୍କ ସହ ଏହି ପ୍ରସଙ୍ଗ ଉଠାଇଛନ୍ତି ।

ଗତ ଅଢ଼େଇବର୍ଷ ମଧ୍ୟରେ ରେକର୍ଡ ବୃଦ୍ଧି

ପ୍ରଧାନମନ୍ତ୍ରୀ କହିଛନ୍ତି ଯେ ସରକାରଙ୍କ ପ୍ରୟାସ ଯୋଗୁ ଭାରତ ଏବେ ବିଶ୍ୱ ଅର୍ଥବ୍ୟବସ୍ଥାରେ ଏକ ଉଜ୍ୱଳ ସ୍ଥାନ ନେଇଛି । ଭାରତ ଏବେ ନିବେଶର ପସନ୍ଦ ସ୍ଥଳୀ ପାଲଟିଛି ଓ ବ୍ୟବସାୟ ପାଇଁ ସହଜ ସ୍ଥାନ ହୋଇଛି । ଅଗ୍ରଣୀ ଆର୍ଥିକ ଏଜେନ୍ସୀ ମଧ୍ୟ ଭାରତର ଅଭିବୃଦ୍ଧିକୁ ନେଇ ଆଶାବାଦୀ ରହିଛନ୍ତି । ଏସବୁ ସହ ‘ମେକ ଇନ ଇଣ୍ଡିଆ’, ‘ଷ୍ଟାର୍ଟ ଅପ ଇଣ୍ଡିଆ’ ଓ ‘ଷ୍ଟାଣ୍ଡ ଅପ୍ ଇଣ୍ଡିଆ’ ପ୍ରୟାସ ଯୋଗୁ ଭାରତୀୟ ଉଦ୍ୟୋଗ ଓ ନବସୃଜନକୁ ପ୍ରୋତ୍ସାହନ ମିଳିଛି ।

ପ୍ରଧାନମନ୍ତ୍ରୀଙ୍କ ଏହି ଐତିହାସିକ ଘୋଷଣା କେନ୍ଦ୍ର ସରକାରଙ୍କ ଦ୍ୱାରା ଜାରି ରହିଥିବା ବିକାଶ ଓ ସଂସ୍କାରମୂଳକ ପ୍ରୟାସକୁ ଅଧିକ ବଳ ଦେବା ସହିତ ମୂଲ୍ୟଯୁକ୍ତ କରାଇବ ।