ପିଏମଇଣ୍ଡିଆ

ବନ୍ଧୁଗଣ,

ମୁଁ ଆଜି କନ୍ୟାକୁମାରୀକୁ ଆସି ବେଶ୍‌ ଆନନ୍ଦ ଅନୁଭବ କରୁଛି ।

ମୁଁ ଆମ୍ମା, ଜୟଲଳିତାଜୀଙ୍କୁ ମୋର ଭକ୍ତିପୂତ ଶ୍ରଦ୍ଧାଞ୍ଜଳି ଜ୍ଞାପନ କରି ମୋର ବକ୍ତବ୍ୟ ଆରମ୍ଭ କରୁଛି ।

ତାମିଲନାଡ଼ୁବାସୀଙ୍କ ପାଇଁ ସେ କରିଥିବା ଅନେକ ଉତ୍ତମ କାର୍ଯ୍ୟକୁ ଲୋକମାନେ ପିଢ଼ି ପିଢ଼ି ଧରି ସ୍ମରଣ ରଖିବେ ।

ମୁଁ ଅତ୍ୟନ୍ତ ଖୁସି ଯେ ତାମିଲନାଡ଼ୁ ସରକାର ତାଙ୍କର ବିକାଶର ପରିକଳ୍ପନାକୁ ସାକାର କରିବା ସକାଶେ ଅତ୍ୟନ୍ତ ଶ୍ରମ ସ୍ୱୀକାର କରି କାର୍ଯ୍ୟ କରୁଛନ୍ତି ।

ମୁଁ ଗର୍ବିତ ଯେ ଭାରତର ପ୍ରଥମ ପ୍ରତିରକ୍ଷା ମନ୍ତ୍ରୀ ନିର୍ମଳାଜୀ ମଧ୍ୟ ଏହି ତାମିଲନାଡ଼ୁ ରାଜ୍ୟର ।

ୱିଙ୍ଗ କମାଣ୍ଡର ଅଭିନନ୍ଦନ ମଧ୍ୟ ଏହି ତାମିଲନାଡ଼ୁ ରାଜ୍ୟର, ଯାହାଙ୍କ ପାଇଁ ପ୍ରତ୍ୟେକ ଭାରତୀୟ ଗର୍ବ ଓ ଗୌରବ ଅନୁଭବ କରନ୍ତି ।

ମୁଁ ମଧ୍ୟ ବିବେକାନନ୍ଦ କେନ୍ଦ୍ରକୁ ଅଭିନନ୍ଦନ ଜ୍ଞାପନ କରୁଛି ଯିଏ ମାତ୍ର କିଛି ଦିନ ପୂର୍ବେ ଗାନ୍ଧୀ ଶାନ୍ତି ପୁରସ୍କାର ଲାଭ କରିଛନ୍ତି ।

ଏହି କେନ୍ଦ୍ରର ଗୋଷ୍ଠୀ ବିକାଶ କାର୍ଯ୍ୟକ୍ରମ ବେଶ୍‌ ଉଲ୍ଲେଖନୀୟ ଏବଂ ପ୍ରେରଣାଦୀୟୀ ।

ବନ୍ଧୁଗଣ,

ମାତ୍ର ଅଳ୍ପ ସମୟ ପୂର୍ବରୁ, ଆମେ ଆଜି ଅନେକ ସଡ଼କ, ରେଳ ଏବଂ ରାଜପଥ ବିକାଶ କାର୍ଯ୍ୟକ୍ରମର ଶୁଭାରମ୍ଭ, ଏବଂ ଶିଳାନ୍ୟାସ କାର୍ଯ୍ୟକ୍ରମ ସଂପାଦନ କରିଛେ ।

ମୁଁ ମଦୁରାଇ ଏବଂ ଚେନ୍ନାଇ ମଧ୍ୟରେ ଯାତାୟାତ କରୁଥିବା ତେଜସ୍‌ ଏକ୍ସପ୍ରେସକୁ ପତାକା ଦେଖାଇ ଏହାର ଶୁଭାରମ୍ଭ କରିଛି ।

ଏହା ଏକ ଅତ୍ୟାଧୁନିକ ଟ୍ରେନ ଏବଂ “ମେକ୍‌ ଇନ୍‌ ଇଣ୍ଡିଆ”ର ଏହା ମହାନ ଉଦାହରଣ ଯାହାକି ଚେନ୍ନାଇସ୍ଥିତ ଇଣ୍ଟିଗ୍ରାଲ କୋଚ୍‌ ତିଆରି କାରଖାନାରେ ନିର୍ମାଣ କରାଯାଇଛି ।

ସେହିଭଳି ଆଜି ରାମେଶ୍ୱରମ୍‌ ଏବଂ ଧନୁସ୍କୋଡ଼ି ମଧ୍ୟରେ ନିର୍ମାଣ କରାଯିବାକୁ ଥିବା ଏକ ରେଳଲାଇନର ଶିଳାନ୍ୟାସ କରିଛି ।

ଏହି ରେଳଲାଇନ୍‌ ଆଜକୁ ପ୍ରାୟ ପଚାଶ ବର୍ଷ ପୂର୍ବେ 1964 ମସିହାର ଏକ ବିପର୍ଯ୍ୟୟରେ ନଷ୍ଟ ହୋଇଯାଇଥିଲା ଏବଂ ଏହାର ମରାମତି ପ୍ରତି ଆଦୌ ଧ୍ୟାନ ଦିଆଯାଇ ନଥିଲା ।

କିନ୍ତୁ, ବିଳମ୍ବରେ ହେଉ ପଛେ ଏହି କାର୍ଯ୍ୟ ଏବେ ଆରମ୍ଭ ହେବ!     

ଆପଣମାନେ ଏକଥା ଜାଣି ଖୁସି ହେବେ ଯେ ପମ୍ବନ ରେଳ ପୋଲ ଏବେ ପୁଣି ଥରେ ନିର୍ମାଣ ହେବାକୁ ଯାଉଛି ।

ବନ୍ଧୁଗଣ,

ଆଜି ଭାରତ ବିଶ୍ୱର ଦ୍ରୁତତମ ଅର୍ଥ ବ୍ୟବସ୍ଥା ଭାବେ ପ୍ରଗତି କରିଚାଲିଛି ।

ଭାରତ  ଏକ ରେକର୍ଡ଼ ଗତିରେ ପରବର୍ତ୍ତୀ ପିଢ଼ିର ଭିତ୍ତିଭୂମି ନିର୍ମାଣ କରିଚାଲିଛି ।

ଆମେ ବିଶ୍ୱର ସର୍ବବୃହତ୍‌ ଷ୍ଟାର୍ଟ ଅପ୍‌ ଇକୋ ସିଷ୍ଟମମାନଙ୍କ ମଧ୍ୟରୁ ଅନ୍ୟତମ ।

ଭାରତ ମଧ୍ୟ ବିଶ୍ୱର ସର୍ବବୃହତ୍‌ ସ୍ୱାସ୍ଥ୍ୟସେବା କାର୍ଯ୍ୟକ୍ରମ- ଆୟୁଷ୍ମାନ ଭାରତର ଅଧିକାରୀ ।

ବନ୍ଧୁଗଣ,

ଏକବିଂଶ ଶତାବ୍ଦୀର ଭାରତକୁ ଉଭୟ ଦ୍ରୁତ ବେଗ ଏବଂ ମାତ୍ରାରେ କାର୍ଯ୍ୟ କରିବାକୁ ହେବ ଯାହାକି ଏନଡ଼ିଏ ସରକାର କରିଆସୁଛି ।

ଏଇ ଗଲା ରବିବାର ଦିନ, ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି କାର୍ଯ୍ୟକ୍ରମ ଯାହାକି ଚଳିତ ବର୍ଷର ବଜେଟରେ ଘୋଷଣା କରାଯାଇଥିଲା ତାହାର ଶୁଭାରମ୍ଭ କରାଯାଇଛି ।

ଏହି ଯୋଜନା ମାଧ୍ୟମରେ, କୃଷକମାନେ ଯେଉଁମାନଙ୍କର କି ପାଞ୍ଚ ଏକର ପର୍ଯ୍ୟନ୍ତ ଚାଷଜମି ରହିଛି ସେମାନଙ୍କୁ ବର୍ଷକୁ ଛଅ ହଜାର ଟଙ୍କା ପର୍ଯ୍ୟନ୍ତ ରାଶି କେନ୍ଦ୍ର ସରକାର ତିନୋଟି କିସ୍ତିରେ ପ୍ରଦାନ କରିବେ ।

ଏଯାବତ୍‌ ଏହି ଯୋଜନା ମାଧ୍ୟମରେ 1.1 କୋଟି କୃଷକଙ୍କୁ ସେମାନଙ୍କର ପ୍ରଥମ କିସ୍ତି ରାଶି ସିଧାସଳଖ ଭାବେ ସେମାନଙ୍କ ବ୍ୟାଙ୍କ ଜମାଖାତାରେ ପୈଠ କରାଯାଇ ସାରିଛି ।

ଆପଣମାନେ ଅନୁମାନ କରନ୍ତୁ, ଗୋଟିଏ ଯୋଜନା ଯାହା ଫେବୃଆରୀ ପହିଲାରେ ଆରମ୍ଭ ହେଲା, ତାହା ସେହି ଗୋଟିଏ ମାସ ଭିତରେ ବାସ୍ତବତାରେ ପରିଣତ ହୋଇସାରିଛି ।

ଆମେ ନିରନ୍ତର ଭାବେ ଦିନକୁ ଚବିଶ ଘଣ୍ଟା ନିରବଚ୍ଛିନ୍ନ ଭାବେ କାମ କରି ଏହି ଯୋଜନାକୁ ଚବିଶ ଦିନ ଭିତରେ ବାସ୍ତବତାରେ ପରିଣତ କରିପାରିଛୁ ।

ବନ୍ଧୁଗଣ,

ଅଧିବର୍ଷ ପରି ଏବଂ ଫୁଟବଲ ବିଶ୍ୱ କପ୍‌ ପରି ଯାହାକି ପ୍ରତି ଚାରିବର୍ଷରେ ଥରେ ଆମ ନିକଟକୁ ଆସିଥାଏ କଂଗ୍ରେସ ଅମଳର ଅସମାପ୍ତ ଋଣଛାଡ଼ କଥା ନିର୍ବାଚନ ପୂର୍ବରୁ ଆମ ସାମ୍ନାକୁ ଆସିଛି ।

କୃଷକମାନଙ୍କ ସକାଶେ କିଛି ନକରି, ସେମାନେ ଶେଷରେ ଆସି ପହଞ୍ଚିଯିବେ ଏବଂ କହିବେ- ଆମେ ଆପଣମାନଙ୍କ ଋଣ ଛାଡ଼ କରିଦେବୁ ।

ବାସ୍ତବରେ, କଂଗ୍ରେସର ଋଣ ଛାଡ଼ ମାତ୍ର କିଛି କୃଷକଙ୍କୁ ହିଁ ଫାଇଦା ପହଞ୍ଚାଇବ ।

ଏନଡ଼ିଏ ସରକାରଙ୍କ କିଷାନ ସମ୍ମାନ ନିଧି କିଛି ବର୍ଷରେ ଥରେ କାର୍ଯ୍ୟକାରୀ ହେଉଥିବା ଯୋଜନା ନୁହେଁ ।

ଏହି ଯୋଜନା ମାଧ୍ୟମରେ ପ୍ରତିବର୍ଷ ଏଭଳି ସୁବିଧା ଯୋଗାଇ ଦିଆଯିବ ଏବଂ ଦଶ ବର୍ଷରେ ମୋଟ 7.5 ଲକ୍ଷ କୋଟି ଟଙ୍କା କଠିନ ପରିଶ୍ରମ କରୁଥିବା ଶ୍ରମିକମାନେ ପାଇପାରିବେ ।

ଯେତେବେଳେ ଏକ ସରକାର କ୍ଷିପ୍ରତା ଏବଂ ବ୍ୟାପକ ମାତ୍ରାରେ କାର୍ଯ୍ୟକରେ, ଏହା ତା’ର କାର୍ଯ୍ୟରୁ ହିଁ ପ୍ରତିଫଳିତ ହୋଇଥାଏ ।

ବନ୍ଧୁଗଣ,

ମହାନ ଋଷି ଥିରୁଭଲ୍ଲୁଭର କହିଛନ୍ତି “ଯେତେବେଳେ କୌଣସି ଏକ ବିରଳ ସୁଯୋଗ ଆସେ, ତାହାକୁ ଆହରଣ କରି ସେହିଭଳି କିଛି ବିରଳ କାର୍ଯ୍ୟ କର ।”

2014ରେ, ଗୋଟିଏ ଦଳ ତିରିଶ ବର୍ଷ ଧରି ସଂସଦରେ ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରି ସରକାର ଗଢ଼ିବାର ସୁଯୋଗ ପାଇଥିଲା ।

ଏଥିରୁ ଲୋକମାନଙ୍କ ବାର୍ତ୍ତା ସ୍ପଷ୍ଟ ଥିଲା- ସେମାନେ ଚାହୁଁଥିଲେ ଯେ ଯେଉଁ ସରକାର ଦେଶର ନେତୃତ୍ୱ ନେବ ତାହା ଦୃଢ଼ ଏବଂ କଠିନ ନିଷ୍ପତ୍ତି ନେବା ଦରକାର ।

ଲୋକମାନେ ସାଧୁତା ଚାହାନ୍ତି, ବଂଶବାଦ ଶାସନ ନୁହେଁ ।

ଲୋକମାନେ ବିକାଶ ଚାହାନ୍ତି, ବିଳମ୍ବ ନୁହେଁ ।

ଲୋକମାନେ ପ୍ରଗତି ଚାହାନ୍ତି, ପଲିସି ପାରାଲିସିସ ନୁହେଁ ।

ଲୋକମାନେ ସୁଯୋଗ ଚାହାନ୍ତି, ପ୍ରତିବନ୍ଧକ ନୁହେଁ ।

ଲୋକମାନେ ନିରାପତ୍ତା ଚାହାନ୍ତି, କୌଣସି ସ୍ଥାଣୁତା ନୁହେଁ ।

ଲୋକମାନେ ସମାବେଶୀ ବିକାଶ ଚାହାନ୍ତି, କୌଣସି ଭୋଟବ୍ୟାଙ୍କ ରାଜନୀତି ନୁହେଁ ।

“ସବକା ସାଥ, ସବକା ବିକାଶ” ନୀତି ଦ୍ୱାରା ଅନୁପ୍ରେରିତ ହୋଇ ଏବଂ 130 କୋଟି ଭାରତୀୟଙ୍କ ସକ୍ରିୟ ସହଯୋଗ ଦ୍ୱାରା ଏନଡ଼ିଏ ସରକାର ଜାତୀୟ ସ୍ୱାର୍ଥ ଦୃଷ୍ଟିରୁ କେତେଗୁଡ଼ିଏ ଅତି ଜଟିଳ ଐତିହାସିକ ନିଷ୍ପତ୍ତି ଗ୍ରହଣ କରିପାରିଛି ।

ମୁଁ ଆପଣମାନଙ୍କୁ ସେହିଭଳି କେତୋଟି ସ୍ଥାନୀୟ ଏବଂ ଜାତୀୟ ଉଦାହରଣ ପ୍ରଦାନ କରୁଛି ।

ତାମିଲନାଡ଼ୁ ଏକ ତଟୀୟ ରାଜ୍ୟ ଯେଉଁଠି ମାଛଧରା ସେକ୍ଟର ବେଶ୍‌ ସକ୍ରିୟ ।

ଆମର ଅନେକ ମତ୍ସ୍ୟଜୀବୀ ଭାଇ ଓ ଭଉଣୀ କଠିନ ପରିଶ୍ରମ କରି ସେମାନଙ୍କର ଜୀବନଧାରଣ ପାଇଁ ଉପାର୍ଜନ କରିଥାନ୍ତି ।

ଏନଡ଼ିଏ ସରକାର ହିଁ ସେମାନଙ୍କ ସକଳ ପ୍ରକାର କଲ୍ୟାଣ ସାଧନ ସକାଶେ ସେମାନଙ୍କ ପାଇଁ ଏକ ସ୍ୱତନ୍ତ୍ର ବିଭାଗ ସୃଷ୍ଟି କରିବାର ଗୌରବ ଅର୍ଜନ କରିଛି ।

ପୂର୍ବ ସରକାରମାନେ ଆପଣମାନଙ୍କ ଠାରୁ କେବଳ ଭୋଟ ନେବାକୁ ଆପଣଙ୍କ ପାଖକୁ ଦଉଡ଼ି ଆସୁଥିଲେ କିନ୍ତୁ ଯେତେବେଳେ ମତ୍ସ୍ୟଜୀବୀ ଭାଇଭଉଣୀମାନଙ୍କ ପାଇଁ କିଛି କରିବାର ଆବଶ୍ୟକତା ପଡେ ସେମାନଙ୍କ ପାଖରେ ସେପରି କିଛି କରିବାକୁ ନଥାଏ ।

ମତ୍ସ୍ୟଜୀବୀ ଭାଇ ଓ ଭଉଣୀମାନଙ୍କ ପାଇଁ ଏବେ କିଷାନ କ୍ରେଡ଼ିଟ କାର୍ଡ଼ ମଧ୍ୟ ଉପକାରସିଦ୍ଧ ହୋଇଛି ଏବଂ ସେମାନେ ଏଥିରୁ ଫାଇଦା ହାସଲ କରିପାରିବେ ।

କେବଳ ତାମିଲନାଡ଼ୁରେ ଗଭୀର ସମୁଦ୍ରରେ ମାଛ ଧରିବା ସକାଶେ ତରୀ ନିର୍ମାଣ ସକାଶେ କେନ୍ଦ୍ର ତିନି ଶହ କୋଟି ଟଙ୍କାରୁ ଅଧିକ ରାଶି ପ୍ରଦାନ କରିଛି ।

ଏବେ ମହାକାଶରେ ଅବସ୍ଥାପିତ ଉପଗ୍ରହ ଜରିଆରେ ମଧ୍ୟ ମତ୍ସ୍ୟଜୀବୀମାନେ ସମୁଦ୍ରରେ ମାଛ ଧରିବାବେଳେ ସୁବିଧା ଉପଯୋଗ କରିପାରିବେ ।

ଭାରତୀୟ ମହାକାଶ ଗବେଷଣା ସଂସ୍ଥା ଦ୍ୱାରା ବିକଶିତ ନାଭିକ୍‌ ବ୍ୟବସ୍ଥା ସହାୟତା ଏବେ ଆମେ ମତ୍ସ୍ୟଜୀବୀମାନଙ୍କୁ ଯୋଗାଇ ଦେଇଛୁ । ଏହା ସ୍ଥାନୀୟ ଭାଷାରେ ସକଳ ପ୍ରକାର ସୂଚନା ଯୋଗାଇଦେବ ।

ଏହି ପ୍ରଦକ୍ଷିଣ ବ୍ୟବସ୍ଥା କେବଳ ମାଛଧରା ଜୋନ ସଂପର୍କର ବିସ୍ତୃତ ସୂଚନା ପ୍ରଦାନ କରିବ ନାହିଁ ଅପରନ୍ତୁ ଏହା ମତ୍ସ୍ୟଜୀବୀମାନଙ୍କୁ ପାଣିପାଗ ସଂପର୍କରେ ସକଳ ପ୍ରକାର ଆଗୁଆ ସୂଚନା ମଧ୍ୟ ଯୋଗାଇବ ।

ବନ୍ଧୁଗଣ,

ଆମେ ବୁଝୁଛୁ ଯେ ଯଦି ଆମକୁ ମତ୍ସ୍ୟଜୀବୀ ଭାଇ ଓ ଭଉଣୀମାନଙ୍କ ଉପାର୍ଜନ ବୃଦ୍ଧି କରିବାକୁ ପଡ଼ିବ ତେବେ ଆମକୁ ମାଛଧରା ସହ ସଂଶ୍ଳିଷ୍ଟ ଅନ୍ୟାନ୍ୟ ସାଧନର ମଧ୍ୟ ବିକାଶ ଘଟାଯିବା ଜରୁରି ।

ସେହି ଉଦ୍ଦେଶ୍ୟରେ ରାମନାଥପୁରମ୍‌ ଜିଲ୍ଲାର ମୁକାୟୁର ମାଛଧରା ବନ୍ଦର ଏବଂ ନାଗପଟ୍ଟିନମର ପୁମ୍ପୁହାର ମାଛଧରା ବନ୍ଦରର ନିର୍ମାଣ କାର୍ଯ୍ୟ ଏବେ ଶେଷ ହେବା ଉପରେ ।

ବନ୍ଧୁଗଣ,

ମତ୍ସ୍ୟଜୀବୀମାନଙ୍କ ନିରାପତ୍ତା ଏବଂ କଲ୍ୟାଣ ସକାଶେ ସରକାର ବେଶ୍‌ ସଚେତନ ଅଛନ୍ତି ।

ନିରବଚ୍ଛିନ୍ନ ଭାବେ କୂଟନୈତିକ ପ୍ରୟାସ ଫଳରେ 2014 ମସିହା ମେ ମାସରେ ଶ୍ରୀଲଙ୍କା ସରକାର ପ୍ରାୟ ଉଣେଇଶ ଶହ ଭାରତୀୟ ମତ୍ସ୍ୟଜୀବୀମାନଙ୍କୁ ମୁକ୍ତ କରିଛନ୍ତି ।

ବନ୍ଧୁଗଣ,

ଏନଡ଼ିଏ ସରକାର ଆମର ତଟୀୟ କ୍ଷେତ୍ରର ବିକାଶ ପ୍ରତି ବିଶେଷ ଧ୍ୟାନ ଦେଇ ଆସୁଛନ୍ତି ଏବଂ ସେଥିରେ ସଂଯୋଗୀକରଣ ଏବଂ ବିକାଶ ମୁଖ୍ୟ ପ୍ରସଙ୍ଗ ହୋଇଛି ।

ବନ୍ଦରଭିତ୍ତିକ ବିକାଶ ବ୍ୟତିରେକ ଆମେ ଆଉ ଗୋଟିଏ ପାଦ ଆଗକୁ ଆଗେଇଛୁ ।

ଅଧିକରୁ ଅଧିକ ବନ୍ଦର ନିର୍ମାଣ କରାଯାଉଛି ।

ଏବେ କାର୍ଯ୍ୟ କରୁଥିବା ବନ୍ଦରଗୁଡ଼ିକର କ୍ଷମତା ଏବଂ ସକ୍ରିୟତାରେ ଉନ୍ନତି ଘଟାଯାଉଛି  । ସାଗରମାଳା ପ୍ରକଳ୍ପ ଆମର ଏହି ପରିକଳ୍ପନାର ଅଂଶବିଶେଷ ।

ଏହି ପ୍ରକଳ୍ପ ଉପରେ ଏବେ କାର୍ଯ୍ୟ ଜାରି ରହିଛି ଏବଂ ଏଥିରେ କେବଳ ବର୍ତ୍ତମାନର ଆବଶ୍ୟକତା ପୂରଣକୁ ଦୃଷ୍ଟି ଦିଆଯାଇନାହିଁ, ଅପରନ୍ତୁ ଭବିଷ୍ୟତ ପିଢ଼ିର ଆବଶ୍ୟକତାକୁ ମଧ୍ୟ ସ୍ମରଣ ରଖାଯାଇଛି ।

ବନ୍ଧୁଗଣ,

ପ୍ରତିରକ୍ଷା ଏବଂ ନିରାପତ୍ତା ସଂପର୍କରେ ମୁଁ କିଛି ସୂଚୀତ କରିବାକୁ ଚାହେଁ ।

ଆମର ପୂର୍ବତନ ସେନା କର୍ମଚାରୀମାନଙ୍କ ଆଶୀର୍ବାଦ ସହ. ଆମେ ୱାନ ରେଙ୍କ୍‌, ୱାନ ପେନସନ୍‌ ଯୋଜନାକୁ ବାସ୍ତବତାରେ ପରିଣତ କରିବା ନିଷ୍ପତ୍ତିକୁ ସାକାର କରିଛୁ ।

ଏଭଳି କରି ଆମେ ଏକ ଯଥାର୍ଥ କାର୍ଯ୍ୟ କରିଛୁ ବୋଲି ମନେକରୁ ।

ଯେଉଁମାନେ ଏ ଦେଶକୁ ଦୀର୍ଘ ଏତେ ବର୍ଷ ଧରି ଶାସନ କରିଆସୁଥିଲେ ସେମାନେ ଓଆରଓପି ସଂପର୍କରେ ଉଚିତ ଭାବେ କେବେ ଚିନ୍ତା ସୁଦ୍ଧା କରିବାର ଆବଶ୍ୟକତା ମନେ କରିନଥିଲେ ।

ବନ୍ଧୁଗଣ,

ଭାରତ ଦୀର୍ଘ ବର୍ଷ ଧରି ଆତଙ୍କବାଦର କଷଣ ସହି ଆସୁଅଛି ।

କିନ୍ତୁ, ଏବେ ସେଥିରେ ଏକ ବିରାଟ ପରିବର୍ତ୍ତନ ଆସିଛି- ଆତଙ୍କବାଦ ପାଇଁ ଭାରତ ଆଉ ଏଣିକି ନିଜକୁ ଅସହାୟ ବୋଲି ମନେ  କରିବନାହିଁ ।

2004 ମସିହା ଠାରୁ 2014 ମସିହା ମଧ୍ୟରେ ଦେଶରେ ଅନେକ ଆଦଙ୍କବାଦୀ ଆକ୍ରମଣ ଘଟିସାରିଛି ।

ହାଇଦ୍ରାବାଦ, ଅହମ୍ମଦାବାଦ, ଜୟପୁର, ବେଙ୍ଗାଲୁରୁ, ଦିଲ୍ଲୀ, ମୁମ୍ବାଇ, ପୁନେ ଓ ଆହୁରି ଅନେକ ସ୍ଥାନରେ ଆତଙ୍କବାଦୀ ବିସ୍ଫୋରଣ ଘଟିଛି ।

ଭାରତ ଆଶା କରୁଥିଲା ଯେଉଁମାନେ ଏଭଳି ଉଗ୍ରବାଦୀ କାଣ୍ଡ ପାଇଁ ଦାୟୀ ସେମାନଙ୍କୁ ଦଣ୍ଡ ମିଳିବ, କିନ୍ତୁ ସେପରି କିଛି ଘଟିଲାନାହିଁ ।

26/11ଭଳି ଘଟଣା ଘଟିଲା, ଭାରତ ଆଶା କରୁଥିଲା ଯେ ଆତଙ୍କବାଦୀମାନଙ୍କ ବିରୋଧରେ କିଛି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

କିନ୍ତୁ ଯେତେବେଳେ ଉରି କାଣ୍ଡ ଘଟିଲା, ଆପଣମାନେ ଦେଖିଛନ୍ତି ଆମର ବୀର ଯବାନମାନେ କ’ଣ କାର୍ଯ୍ୟାନୁଷ୍ଠାନ କଲେ ।

ପୁଲୱାମା କାଣ୍ଡ ଘଟିଲା ଏବଂ ଆପଣମାନେ ଦେଖିଲେ ଆମର ବାୟୁସେନାର ଲଢ଼ୁଆ ବୀରମାନେ କଣ କଲେ ।

ଯେଉଁମାନେ ଦେଶପାଇଁ ଏଭଳି ସେବା ଓ ତ୍ୟାଗ କରୁଛନ୍ତି ସେମାନଙ୍କୁ ମୁଁ ନମନ କରୁଛି ।

ସେମାନଙ୍କ ସତର୍କତା ହିଁ ଆମ ରାଷ୍ଟ୍ରକୁ ନିରାପଦ ରଖିପାରିଛି ।

ଏଭଳି ସମୟ ଥିଲା ଯେତେବେଳେ ଖବର ଆସୁଥିଲା- 26/11 ଆତଙ୍କବାଦୀ ଆକ୍ରମଣ ପରେ ଆମର ବାୟୁସେନା ଯେତେବେଳେ ଆକ୍ରମଣ କରିବାକୁ ଚାହୁଁଥିଲା, ତାକୁ ୟୁପିଏ ସରକାର ଅଟକାଇ ଦେଇଥିଲା ।

ଆଉ ଆଜି, ଆମେ ଏଭଳି ଏକ ସମୟରେ ଆସି ପହଞ୍ଚିଛେ ଯେତେବେଳେ ଖବର ମିଳୁଛି, ଆତଙ୍କବାଦୀଙ୍କ ବିରୋଧରେ ଯାହା କାର୍ଯ୍ୟାନୁଷ୍ଠାନ ଗ୍ରହଣ କରିବା କଥା ସେଥିପାଇଁ ସଶସ୍ତ୍ର ବାହିନୀକୁ ପୂର୍ଣ୍ଣ ସ୍ୱାଧୀନତା ଦିଆଯାଇଛି ।

ଏବେ ଆତଙ୍କବାଦୀ ଓ ଆତଙ୍କବାଦର ପ୍ରଭାବକୁ ହ୍ରାସ କରାଯାଇଛି ଏବଂ ଭବିଷ୍ୟତରେ ଏହାକୁ ଆହୁରି ପ୍ରତିହତ କରାଯିବ ।

ଏହା ହେଉଛି ନୂତନ ଭାରତ ।

ଏହା ସେଇ ଭାରତ ଯାହା ଆତଙ୍କବାଦୀମାନେ ଯେମିତି କାଣ୍ଡ ଭିଆଇବେ ସେମାନଙ୍କୁ ସୁଧମୂଳ କରି ଶୁଝାଇ ଦିଆଯିବ ।

ବନ୍ଧୁଗଣ,

ଗତ କିଛି ଦିନର ଘଟଣାବଳୀ ପ୍ରଦର୍ଶିତ କରିଛି ଯେ ଆମର ସଶସ୍ତ୍ର ସେନା କିଭଳି ଭାବେ ସେମାନଙ୍କର ସାମର୍ଥ୍ୟ ପ୍ରଦର୍ଶନ କରିପାରନ୍ତି ।

ଏହ ଦେଶବାସୀଙ୍କୁ ଅଧିକ ନିକଟତର କରିପାରିଛି ।

ରାଷ୍ଟ୍ର ସଶସ୍ତ୍ର ସେନାଙ୍କୁ ଏଭଳି ଭାବେ ସମର୍ଥନ ଜଣାଇଛି ଯେ ତାହା ଅଭୂତପୂର୍ବ ଏବଂ ମୁଁ ସେଥିପାଇଁ ପ୍ରତ୍ୟେକ ଭାରତୀୟ ନାଗରିକଙ୍କ ନିକଟରେ ମୁଣ୍ଡ ନୁଆଇଁ ସମ୍ମାନ ଜଣାଉଛି ।

ଦୁଃଖର କଥା, କେତେକ ରାଜନୈତିକ ଦଳ, ସେମାନଙ୍କ ମୋଦୀ ବିରୋଧୀ ଚିନ୍ତାଧାରାକୁ ଚରିତାର୍ଥ କରିବା ସକାଶେ ଭାରତକୁ ଘୃଣା କରିବା ଆରମ୍ଭ କରିଛନ୍ତି ।

ଏଥିରେ ଆଶ୍ଚର୍ଯ୍ୟ ହେବାର କିଛି ନାହିଁ । ଯେତେବେଳେ ସମଗ୍ର ରାଷ୍ଟ୍ର ଆମର ସଶସ୍ତ୍ର ସେନାଙ୍କୁ ସମର୍ଥନ କରୁଛନ୍ତି, ସେମାନେ ଆମ ସେନାଙ୍କ ସାମର୍ଥ୍ୟ ଉପରେ ସନ୍ଦେହ କରୁଛନ୍ତି ।

ଆତଙ୍କବାଦ ବିରୋଧରେ ଭାରତର ସଂଗ୍ରାମକୁ ସମଗ୍ର ବିଶ୍ୱ ସମର୍ଥନ ଜଣାଉଛି କିନ୍ତୁ କିଛି ରାଜନୈତିକ ଦଳ ଆମର ଆତଙ୍କବାଦ ବିରୋଧୀ କାର୍ଯ୍ୟନୁଷ୍ଠାନକୁ ସନ୍ଦେହ ଚକ୍ଷୁରେ ଦେଖୁଛନ୍ତି ।

ଏଭଳି କିଛି ବ୍ୟକ୍ତିବିଶେଷ ଅଛନ୍ତି ଯେଉଁମାନଙ୍କ ବିବୃତ୍ତି ପାକିସ୍ତାନକୁ ସାହାଯ୍ୟ କରୁଛି ଏବଂ ଭାରତକୁ କ୍ଷତି ପହଞ୍ଚାଉଛି ।

ସେମାନେ ସେହି ଲୋକ ଯେଉଁମାନଙ୍କ ବିବୃତ୍ତି ପାକିସ୍ତାନର ପାର୍ଲାମେଣ୍ଟରେ ଅବତାରଣା କରାଯାଉଛି ଏବଂ ପାକିସ୍ତାନ ରେଡ଼ିଓରେ ପ୍ରଚାର କରାଯାଉଛି ।

ମୁଁ ସେମାନଙ୍କୁ ପଚାରିବାକୁ ଚାହେଁ- ଆପଣମାନେ ନିଜର ସଶସ୍ତ୍ର ସେନାଙ୍କ କାର୍ଯ୍ୟକୁ ସମର୍ଥନ କରୁଛନ୍ତି ନା ସେମାନଙ୍କୁ ସନ୍ଦେହ କରୁଛନ୍ତି ?

ସେସମାନେ ତାହା ସ୍ପଷ୍ଟ କରିବା ଉଚିତ – ସେମାନେ ଆମ ସଶସ୍ତ୍ର ସେନାଙ୍କୁ ବିଶ୍ୱାସ କରନ୍ତି ନା ଯେଉଁମାନେ ଆତଙ୍କବାଦୀଙ୍କୁ ସମର୍ଥନ କରି ଆମ ବିରୋଧରେ ଉପଯୋଗ କରୁଛନ୍ତି ସେମାନଙ୍କ ବିଶ୍ୱାସ କରନ୍ତି ?

ମୁଁ ସେହିସବୁ ଦଳମାନଙ୍କୁ କହିବାକୁ ଚାହେଁ – ମୋଦୀ ଆସିବ, ମୋଦୀ ଯିବ, କିନ୍ତୁ ଭାରତ ରହିଥିବ ।

ଦୟାପୂର୍ବକ ନିଜ ଦଳକୁ ମଜଭୁତ କରିବା ନିଶାରେ ଭାରତକୁ ଦୁର୍ବଳ କରିବାର ମାନସିକତାରୁ କ୍ଷାନ୍ତ ରହନ୍ତୁ ।

ପ୍ରତିରକ୍ଷା ଓ ଜାତୀୟ ନିରାପତ୍ତା ପ୍ରସଙ୍ଗରେ ଆମେ ପ୍ରଥମେ ଭାରତୀୟ ଏବଂ କେବଳ ଭାରତୀୟ ।

ବନ୍ଧୁଗଣ,

ଏବେ ଦୁର୍ନୀତି ଏବଂ କଳା ଟଙ୍କା କଥା ଧରାଯାଉ ।

ଭାରତ ପ୍ରଧାନମନ୍ତ୍ରୀଙ୍କୁ ଅତୀତରେ ଦେଖିସାରିଛି ଯିଏ କହୁଥିଲେ-  ପ୍ରତି ଟଙ୍କାରୁ ମାତ୍ର ପନ୍ଦର ପଇସାର ସୁଫଳ ଲୋକମାନଙ୍କ ନିକଟରେ ପହଞ୍ଚୁଛି ।

ଭାରତ ଏଭଳି ଅହଂକାରୀ କ୍ୟାବିନେଟ ମନ୍ତ୍ରୀଙ୍କୁ ଦେଖିଛି ଯିଏ ଲକ୍ଷ ଲକ୍ଷ କୋଟି ଟଙ୍କାର ଦୁର୍ନୀତିକୁ କହୁଥିଲେ “ଜିରୋ ଲସ୍‌” ।

କିଛି ଲୋକ କହନ୍ତି ଦୁର୍ନୀତି ହେଉଛି ଜୀବନର ସ୍ୱାଭାବିକ ଧାରା ।

ସେମାନଙ୍କ ପାଇଁ ଏହା ଗ୍ରହଣୀୟ ହୋଇପାରେ, ମୋ ପାଇଁ ନୁହେଁ ।

ଏନଡ଼ିଏ ସରକାର ଦୁର୍ନୀତି ବିରୋଧରେ ଐତିହାସିକ ପଦକ୍ଷେପ ଗ୍ରହଣ କରିଛି ।

ନକଲି କମ୍ପାନୀମାନଙ୍କୁ ବନ୍ଦ୍‌ କରିଦିଆଯାଇଛି, ନକଲି ହିତାଧିକାରୀମାନଙ୍କୁ ଚୁପ୍‌ କରିଦିଆଯାଇଛି ।

ଦୁର୍ନୀତିଖୋରମାନଙ୍କୁ ଏବେ ସେମାନଙ୍କର କୃତକର୍ମର ଜବାବ ଦେବାକୁ ପଡ଼ିବ ।

ପ୍ରସିଦ୍ଧ କୁହାଳିଆ ମନ୍ତ୍ରୀ ଜଣେ ଯିଏକି ଲୋକମାନଙ୍କୁ ଅତି ଦୁର୍ବ୍ୟବହାର ପ୍ରଦର୍ଶନ କରୁଥିଲେ, ମଧ୍ୟମ ବର୍ଗଙ୍କୁ ଅପମାନିତ କରୁଥିଲେ, ସିଏ ଏବେ ଜାମିନ ପାଇଁ ଫାମିଲି ପ୍ୟାକ୍‌ ଲାଗି ଆବେଦନ କରୁଛନ୍ତି, ଠିକ୍‌ ତାଙ୍କ ଦଳର ପ୍ରଥମ ପରିବାର ପରି ।

ବନ୍ଧୁଗଣ,

ଆମେ ଯେତେବେଳେ ଦୁର୍ନୀତି ଉପରେ ଏଭଳି କଡ଼ା ପଦକ୍ଷେପ ଗ୍ରହଣ କରିଛୁ, ସେହିପରି ସଚ୍ଚୋଟ ଟିକସଦାତାଙ୍କୁ ପୁରସ୍କୃତ କରିବା ଦିଗରେ ପଦକ୍ଷେପ ଗ୍ରହଣ କରିଛୁ ।

ଠିକ୍‌ ମାସକ ତଳେ ବଜେଟ ଉପସ୍ଥାପନ ବେଳେ, ଘୋଷଣା କରାଯାଇଥିଲା ଯେ ଯେଉଁମାନେ ପାଞ୍ଚଲକ୍ଷ ଟଙ୍କା ପର୍ଯ୍ୟନ୍ତ ଉପାର୍ଜନ କରୁଛନ୍ତି ସେମାନଙ୍କୁ ଟିକସ ଦେବାକୁ ପଡ଼ିବନାହିଁ ।

ଯେଉଁମାନେ ଭାରତକୁ ଏତେ ଦୀର୍ଘ ବର୍ଷ ଧରି ଶାସନ କରୁଥିଲେ ସେମାନେ କେବେ ମଧ୍ୟମ ବର୍ଗଙ୍କ ପାଇଁ ଏକଥା ଚିନ୍ତା କରିଥିଲେ କି ସେମାନଙ୍କୁ ଟିକସରୁ ରିହାତି ଦେବାକଥା ଚିନ୍ତା କରିଥିଲେ କି ?

ବନ୍ଧୁଗଣ,

ଅନେକ ବର୍ଷ ଧରି, କଂଗ୍ରେସ ଗୋଟିଏ ଆର୍ଥିକ ସଂସ୍କୃତିର ବିକାଶ ଘଟାଇଥିଲା ଯେ କେବଳ ବନ୍ଧୁମାନଙ୍କୁ ଏବଂ ବିଗ୍‌ ଡ଼ାଇନେଷ୍ଟି ପରିବାରର ସଦସ୍ୟମାନଙ୍କୁ ଯେଭଳି ସୁଫଳ ମିଳିପାରିବ ।

ସାଧାରଣ ଲୋକଙ୍କୁ କୌଣସି ପ୍ରୋତ୍ସାହନ ନାହିଁ କି ସେମାନଙ୍କୁ ଆର୍ଥିକ ଦୃଷ୍ଟିରୁ ସମୃଦ୍ଧ ହେବାର କୌଣସି ସୁଯୋଗ ନାହିଁ ।

ଯଦି କେହି ଜଣେ କଂଗ୍ରେସର ଏଭଳି ଆର୍ଥିକ ସଂସ୍କୃତି ବିରୋଧରେ ସ୍ୱର ଉତ୍ତୋଳନ କରୁଥିଲା ସିଏ ହେଲେ ତାମିଲନାଡ଼ୁର ସୁଯୋଗ୍ୟ ପୁତ୍ର ସି ରାଜଗୋପାଳାଚାରୀ ।

ଆଜି ଆମେ ରାଜାଜୀଙ୍କ ସ୍ୱପ୍ନକୁ ସାକାର କରିବାକୁ ଯାଉଛୁ ଏବଂ ସେଥିପାଇଁ ଏଭଳି ଏକ ଅର୍ଥନୀତିର ବିକାଶ ଘଟାଯାଉଛି ଯାହା ସଂସ୍କାରଧର୍ମୀ ଏବଂ ଲୋକାଭିମୁଖୀ ।

“ଇଜ୍‌ ଅଫ ଡ଼ୁଇଂ ବିଜିନେସ” ସୂଚୀରେ ଭାରତ 65 ପାଦ ଆଗକୁ ଉଠିପାରିଛି ।

ଚାରିବର୍ଷ ତଳେ ଆମେ 142ତମ ସ୍ଥାନରେ ଥିବାବେଳେ ଏବେ ବିଶ୍ୱରେ ଆମ ସ୍ଥାନ 77ରେ ପହଞ୍ଚିଛି ।

କେନ୍ଦ୍ର ସରକାର ଏମଏସଏମଇ ସେକ୍ଟର ପାଇଁ ଗତ ବର୍ଷ ଅନେକ ଗୁଡ଼ିଏ କାର୍ଯ୍ୟକ୍ରମ ଘୋଷଣା  କରିଛନ୍ତି ।

ଏବେ ମାତ୍ର 59 ମିନିଟ ଭିତରେ ଉଦ୍ଦ୍ୟୋଗୀମାନଙ୍କୁ ଏକ କୋଟି ଟଙ୍କା ପର୍ଯ୍ୟନ୍ତ ବ୍ୟାଙ୍କ୍‌ ଋଣ ସହଜରେ ମିଳିପାରୁଛି ।

ଆପଣମାନେ ଏଠାରୁ ଯାଇ ଚେନ୍ନାଇରେ ପହଞ୍ଚିବା ସମୟଠାରୁ ବି ଏହା କମ୍‌ ଅବଧି ।

ବନ୍ଧୁଗଣ,

ଆମେ ଏବେ ଭାରତର ଯୁବଶକ୍ତି ଓ ସେମାନଙ୍କ ସାମର୍ଥ୍ୟ ଉପରେ ସଂପୂର୍ଣ୍ଣ ରୂପେ ନିର୍ଭରଶୀଳ । ସେମାନଙ୍କ ସାମର୍ଥ୍ୟ ଉପରେ ଆମର ଅଖଣ୍ଡ ବିଶ୍ୱାସ ରହିଛି ।

ସେଇଥିପାଇଁ ମୁଦ୍ରା ଯୋଜନାର ଶୁଭାରମ୍ଭ କରାଯାଇଛି ଯାହାକି ଯୁବ ଭାରତୀୟ ଉଦ୍ଦ୍ୟୋଗୀଙ୍କ ଆଶା ଆକାଂକ୍ଷାକୁ ପକ୍ଷ ପ୍ରଦାନ କରିଛି ।

ମୁଦ୍ରା ଯୋଜନାରେ, 15 କୋଟି ଲୋକ ଋଣ ପାଇ ପାରିଛନ୍ତି ଯାହାର ମୋଟ ପରିମାଣ ହୋଲା ସାତଲକ୍ଷ କୋଟି ଟଙ୍କାରୁ ଅଧିକ ।

ତାମିଲନାଡ଼ୁ  ସେଭଳି ଋଣ ପାଇଥିବା ଅଗ୍ରଣୀ ରାଜ୍ୟମାନଙ୍କ ମଧ୍ୟରୁ ଅନ୍ୟତମ ।

ବନ୍ଧୁଗଣ,

ବିରୋଧୀ ଦଳମାନଙ୍କର ସାମାଜିକ ନ୍ୟାୟ ସକାଶେ ମନରେ ସାମାନ୍ୟତମ ପ୍ରତିବଦ୍ଧତା ନାହିଁ ।

କଂଗ୍ରେସ ଶାସନକାଳରେ ଦେଶରେ ଦଳିତମାନଙ୍କ ଉପରେ ସବୁଠାରୁ ଘୃଣ୍ୟ ଅତ୍ୟାଚାର ଘଟିଛି ।

କଂଗ୍ରେସ ଡ଼କ୍ଟର ବାବାସାହେବ ଆମ୍ବେଦକରଙ୍କୁ ଥରେ ନୁହେଁ ଦୁଇ ଦୁଇଥର ହରାଇଥିଲେ ।

କଂଗ୍ରେସ ଡ଼କ୍ଟର ଆମ୍ବେଦକରଙ୍କୁ ଚାଳିଶ ବର୍ଷ ପର୍ଯ୍ୟନ୍ତ ଭାରତ ରତ୍ନ ସୁଦ୍ଧା ଦେଇନଥିଲେ । ଏପରିକି ସଂସଦର କେନ୍ଦ୍ରୀୟ କକ୍ଷରେ ଡ଼କ୍ଟର ଆମ୍ବେଦକରଙ୍କର ଫଟୋଚିତ୍ରଟିଏ ସୁଦ୍ଧା ସ୍ଥାପନ କରିନଥିଲେ ।

ବିଜେପି ସମର୍ଥିତ ଅଣ କଂଗ୍ରେସ ସରକାର ହିଁ ଏଭଳି ଦୁଇଟି କାର୍ଯ୍ୟ ସଂପାଦନ କରିଛି ।

ବନ୍ଧୁଗଣ,

ବର୍ତ୍ତମାନର ଏନଡ଼ିଏ ସରକାର ଏସସି ଏବଂ ଏସଟି ଆଇନରେ ଦୃଢ଼ତମ ସଂଶୋଧନ ଘଟାଇଛି ।

ଆର୍ଥିକ ଏବଂ ସାମାଜିକ ନ୍ୟାୟ ହେଉଛି ଆମମାନଙ୍କ ଲାଗି ଏହାର ଆସ୍ଥାର ଧାର, ଏହା କେବଳ ଭୋଟ ସାଉଁଟିବା ସକାଶେ ସ୍ଲୋଗାନ ନୁହେଁ ।

ବନ୍ଧୁଗଣ,

2019 ଲୋକସଭା ନିର୍ବାଚନର ଦୁଇଟି ପ୍ରମୁଖ ପାର୍ଶ୍ଵ ରହିଛି ।

ଆମ ପକ୍ଷ ଦୃଢ଼ତା ଓ ସ୍ଥିରତା ପ୍ରଦାନ ପାଇଁ ଉଦ୍ଦିଷ୍ଟ ।

ଅନ୍ୟ ପକ୍ଷଟି ଦୁର୍ବଳତା ଏବଂ ଆଶଙ୍କାର ପକ୍ଷ ।

ଆମ ନେତୃତ୍ୱ ଓ କାର୍ଯ୍ୟ ସଂସ୍କୃତି ଭାରତ ସାରା ସମସ୍ତଙ୍କୁ ଜଣା ।

ଅନ୍ୟ ପକ୍ଷ କିନ୍ତୁ ବିଚଳିତ ।

ଦେଶକୁ ପରବର୍ତ୍ତୀ ନେତୃତ୍ୱ ଦେବା ପାଇଁ ସେମାନଙ୍କ ନିକଟରେ ଘୋଷଣା କରିବାକୁ କୌଣସି ନାମ ନାହିଁ ।

ଭାରତର ବିକାଶ ପାଇଁ କୌଣସି ଲକ୍ଷ୍ୟ କି ପରିକଳ୍ପନା ନାହିଁ ।

ଏପରିକି ରେକର୍ଡ଼ ଦୁର୍ନୀତି କରିଥିବାରୁ ସେମାନଙ୍କ ନିକଟରେ ଲଜ୍ଜା ସୁଦ୍ଧା ନାହିଁ ।

ଭାରତ 2009 କଥା ସ୍ମରଣ ରଖିଛି ଏବଂ କିପରି ଡ଼ିଏମକେ ଓ କଂଗ୍ରେସ ନିର୍ବାଚନ ପରେ ମନ୍ତ୍ରୀପଦ ବାଣ୍ଟିଥିଲେ ସେକଥା ବି ଲୋକଙ୍କ ସ୍ମୃତିରେ ରହିଛି ।

ପ୍ରଧାନମନ୍ତ୍ରୀ ସେତେବେଳେ ତାଙ୍କର ମନ୍ତ୍ରୀଙ୍କୁ ଚୟନ କରିନଥିଲେ ବରଂ ଜନସେବାରେ ଯାହାଙ୍କର କିଛି ନେଣଦେଣ ନଥିଲା ସେମାନେ ହିଁ ଏହା ଚୟନ କରିଥିଲେ ।

ମନ୍ତ୍ରୀପଦ ପାଇଁ ଟେଲିଫୋନରେ ସଉଦା ହେଉଥିଲା ।

ମହା ମିଲାବଟ କିମ୍ବା ଅପମିଶ୍ରଣ ସରକାରକୁ କିଛି ଲୋକଙ୍କ ଅହଂକାର ଓ ବଂଶବାଦର ମହତ୍ତ୍ୱାକାଂକ୍ଷା ବନ୍ଦୀ କରି ରଖିବେ ।

ମୋର ଏକମାତ୍ର ପରିବାର ହେଲେ 130 କୋଟି ଭାରତୀୟ ।

ମୁଁ ସେମାନଙ୍କ ପାଇଁ ବଞ୍ଚିବି, ସେମାନଙ୍କ ପାଇଁ ମରିବି ।

ମୋର ବଂଶର ଲାଭ ପାଇଁ ମୁଁ ଜନ ଜୀବନରେ ରହି କାର୍ଯ୍ୟ କରୁନାହିଁ ।

ମୁଁ ଏଠାକୁ ସେଇଥିପାଇଁ ଆସିଛି ଯାହା ଫଳରେ ଭାରତର ବିକାଶ ପାଇଁ ମୁଁ କିଛି କରିପାରିବି ।

ମୁଁ ଏଇଥିପାଇଁ ଆପଣମାନଙ୍କ ସମର୍ଥନ ଓ ଆଶୀର୍ବାଦ କାମନା କରେ ଯାହା ଫଳରେ ଏଭଳି ଏକ ଭାରତ ଗଠନ କରାଯାଇପାରିବ ଯେଉଁଠାରେ ଦରିଦ୍ରତମ ଲୋକଙ୍କ ସ୍ଵପ୍ନ ବି ସାକାରିତ ହୋଇପାରିବ ।

ଆଜି ଏହି ଜନସମାବେଶରେ ଏତେ ସଂଖ୍ୟାରେ ଆପଣମାନେ ଯୋଗ ଦେଇଥିବାରୁ ଆପଣମାନଙ୍କୁ ସମସ୍ତଙ୍କୁ ଧନ୍ୟବାଦ ।

ଭାରତ ମାତା କୀ ଜୟ ।

**************