ପିଏମଇଣ୍ଡିଆ

ଋଷିଆ ମହାସଂଘର ଗତକାଲି ଅନୁଷ୍ଠିତ ରାଷ୍ଟ୍ରପତି ନିର୍ବାଚନରେ ଭ୍ଲାଡିମିର ପୁଟିନ ପୁଣି ଥରେ ବିଜୟୀ ହୋଇଛନ୍ତି । ଏହି ବିଜୟ ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଟେଲିଫୋନ ଯୋଗେ ରାଷ୍ଟ୍ରପତି ପୁଟିନଙ୍କୁ ଅଭିନନ୍ଦନ ଜଣାଇଛନ୍ତି । ନିଜର ଶୁଭେଚ୍ଛା ଓ ଅଭିନନ୍ଦନ ଜଣାଇ ପ୍ରଧାନମନ୍ତ୍ରୀ ଭାରତ-ଋଷ ମଧ୍ୟରେ ରହି ଆସିଥିବା ‘ସ୍ଵତନ୍ତ୍ର ଓ ବିଶେଷାଧିକାରପ୍ରାପ୍ତ ରଣନୀତିକ ଭାଗିଦାରୀତା’ ଋଷ ରାଷ୍ଟ୍ରପତି ମିଷ୍ଟର ପୁଟିନଙ୍କ ନେତୃତ୍ଵରେ ଅଧିକରୁ ଅଧିକ ମଜବୁତ ଓ ଶକ୍ତିଶାଳୀ ହେବ ବୋଲି ଆଶା ପ୍ରକାଶ କରିଛନ୍ତି । ଚଳିତ ବର୍ଷ ଶେଷ ଭାଗରେ ଭାରତରେ ହେବାକୁ ଥିବା ଦ୍ଵିପାକ୍ଷିକ ବାର୍ଷିକ ଶିଖର ସମ୍ମିଳନୀ ପାଇଁ ସେ ରାଷ୍ଟ୍ରପତି ପୁଟିନଙ୍କୁ ଭବ୍ୟ ସ୍ଵାଗତ ଜଣାଇବା ଲାଗି ଅପେକ୍ଷା କରିଛନ୍ତି ବୋଲି କହିଥିଲେ ।

ଟେଲିଫୋନ ଯୋଗେ ଅଭିନନ୍ଦନ ଓ ବାର୍ତ୍ତାଳାପ ପାଇଁ ରାଷ୍ଟ୍ରପତି ପୁଟିନ ପ୍ରଧାନମନ୍ତ୍ରୀଙ୍କୁ ଅଶେଷ ଧନ୍ୟବାଦ ଜଣାଇଥିଲେ । ଭାରତ-ରୁଷିଆ ସମ୍ବନ୍ଧକୁ ସବୁ ସ୍ତର ଓ କ୍ଷେତ୍ରରେ ଅଧିକ ମଜବୁତ କରିବା ଲାଗି ନିଜର ପ୍ରତିବଦ୍ଧତା ପ୍ରକଟ କରି ରାଷ୍ଟ୍ରପତି ପୁଟିନ ଭାରତର ଜନସାଧାରଣ ଓ ଏହାର କ୍ରମବର୍ଦ୍ଧମାନ ପ୍ରଗତି ପାଇଁ ଶୁଭେଚ୍ଛା ଜଣାଇଥିଲେ ।

**********