ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଅପରାହ୍ଣରେ ନୂଆଦିଲ୍ଲୀଠାରେ ଆଫଗାନିସ୍ତାନର ମୁଖ୍ୟ କାର୍ଯ୍ୟନିର୍ବାହୀ ଡ. ଅବଦୁଲ୍ଲା ଅବୁଦୁଲ୍ଲାଙ୍କୁ ସାକ୍ଷାତ କରିଛନ୍ତି ।

ଦୁଇ ଦିନିଆ ଗସ୍ତରେ ଆସିଥିବା ଡ. ଅବଦୁଲ୍ଲାଙ୍କୁ ପ୍ରଧାନମନ୍ତ୍ରୀ ସାଦର ସ୍ୱାଗତ କରିଥିଲେ ।

ଭାରତ ଏବଂ ଆଫଗାନିସ୍ତାନ ମଧ୍ୟରେ ରହିଥିବା ବହୁମୁଖୀ ରଣନୀତିକ ଭାଗିଦାରୀକୁ ସୁଦୃଢ଼ କରିବା ଏବଂ ଆହୁରି ନିବିଡ଼ି କରିବା ଲାଗି ପ୍ରତିବଦ୍ଧତାକୁ ଦୋହରାଇଥିଲେ । ନୂଆଦିଲ୍ଲୀଠାରେ ଆୟୋଜିତ ରଣନୀତିକ ଭାଗିଦାରୀ ପରିଷଦ ବୈଠକ ସମୟରେ ନୂଆ ବିକାଶ ଭାଗିଦାରୀ ଘୋଷଣା ସମେତ ପାରସ୍ପରିକ ସହଯୋଗ ତ୍ୱରାନ୍ୱିତ କରାଯିବାକୁ ଉଭୟ ନେତା ସ୍ୱାଗତ କରିଥିଲେ । ସେମାନେ ପରିବର୍ଦ୍ଧିତ ଅର୍ଥନୈତିକ, ବିକାଶ ସହଯୋଗ ଏବଂ ଏ କ୍ଷେତ୍ରରେ ରହିଥିବା ଅପାର ସମ୍ଭାବନା ନେଇ ଆଲୋଚନା କରିଥିଲେ ।

ଆଫଗାନିସ୍ତାନର କ୍ଷମତା ଓ ସାମର୍ଥ୍ୟ ନିର୍ମାଣ ଏବଂ ଭିତ୍ତିଭୂମି ବିକାଶ ଲାଗି ଭାରତର ନିରନ୍ତର ସହଯୋଗ ପାଇଁ ଡ. ଅବଦୁଲ୍ଲା ଆଫଗାନିସ୍ତାନ ପକ୍ଷରୁ ଗଭୀର କୃତଜ୍ଞତା ପ୍ରକାଶ କରିଥିଲେ ।

ପ୍ରଧାନମନ୍ତ୍ରୀ ଦୋହରାଇଥିଲେ ଯେ ଏକ ଶାନ୍ତିପୂର୍ଣ୍ଣ, ସଂଗଠିତ, ସମୃଦ୍ଧ, ସାମଗ୍ରୀକ ଭାବେ ଉନ୍ନତ ତଥା ଗଣତାନ୍ତ୍ରିକ ଆଫଗାନିସ୍ତାନ ନିର୍ମାଣ ପାଇଁ ଆଫଗାନ ସରକାରଙ୍କ ଉଦ୍ୟମକୁ ଭାରତ ପୂର୍ଣ୍ଣ ସହଯୋଗ ଦେବ ।

ଆଫଗାନିସ୍ତାନ ଏବଂ ବିସ୍ତୃତ ଅଂଚଳରେ ସୁରକ୍ଷା ପରିବେଶ ନେଇ ଉଭୟ ନେତା ଆଲୋଚନା କରିଥିଲେ । ଏହି କ୍ଷେତ୍ରରେ ପାରସ୍ପରିକ ସହଯୋଗ ଏବଂ ସମନ୍ୱୟ ଜାରି ରଖିବା ଲାଗି ସହମତ ହୋଇଥିଲେ ।

ବୈଠକ ଶେଷରେ ଦୁଇ ନେତାଙ୍କ ଉପସ୍ଥିତିରେ ପୋଲିସ ତାଲିମ ଏବଂ ବିକାଶ ପାଇଁ ବୈଷୟିକ ସହଯୋଗ ନିମନ୍ତେ ଏକ ବୁଝାମଣାପତ୍ର ସ୍ୱାକ୍ଷରିତ ହୋଇଥିଲା ।

ଏହି ଅବସରରେ ଡ. ଅବଦୁଲ୍ଲା ଉପହାର ସ୍ୱରୂପ ପ୍ରଧାନମନ୍ତ୍ରୀଙ୍କୁ ଏକ ମୋଜାଇକ ଚିତ୍ର ପ୍ରଦାନ କରିଥିଲେ, ଯାହାକୁ ପ୍ରଧାନମନ୍ତ୍ରୀ ସାଦରେ ଗ୍ରହଣ କରିଥିଲେ ।