ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି କଲୋମ୍ବୋର ବନ୍ଦରନାଏକ ସ୍ମାରକୀ ଅନ୍ତର୍ଜାତୀୟ ସମ୍ମିଳନୀ କକ୍ଷରେ ଅନ୍ତର୍ଜାତୀୟ ଭେଶକ ଦିବସ ସମାରୋହର ଉଦ୍ଘାଟନୀ ଉତ୍ସବରେ ଉଦ୍ବୋଧନ ଦେଇଥିଲେ  ।

କାର୍ଯ୍ୟକ୍ରମସ୍ଥଳରେ ପହଂଚିବା ପରେ ପ୍ରଧାନମନ୍ତ୍ରୀଙ୍କୁ ଶ୍ରୀଲଙ୍କା ରାଷ୍ଟ୍ରପତି ମୈତ୍ରିପାଲା ସିରିସେନା ଏବଂ ଶ୍ରୀଲଙ୍କା ପ୍ରଧାନମନ୍ତ୍ରୀ ରାନିଲ୍ ବିକ୍ରମସିଂଘେ ସ୍ୱାଗତ ଜଣାଇଥିଲେ  । ପ୍ରଧାନମନ୍ତ୍ରୀ ମୋଦୀଙ୍କୁ ବାଜା ଏବଂ ନୃତ୍ୟ ପରିବେଷଣ କରି ସ୍ୱାଗତ କରାଯାଇଥିଲା ଏବଂ ସେ ପ୍ରଦୀପ ଜାଳି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ  ।

5ଟି ବୁଦ୍ଧ ଉପଦେଶ ଉଚ୍ଚାରଣ କରାଯାଇ ସମାରୋହ ଆରମ୍ଭ କରାଯାଇଥିଲା । ଶ୍ରୀଲଙ୍କାର ବୁଦ୍ଧ ଶାସନ ଏବଂ ନ୍ୟାୟ ମନ୍ତ୍ରୀ ବିଜୟଦାସ ରାଜପାକ୍ଷେ ସ୍ୱାଗତ ଭାଷଣ ଦେଇଥିଲେ । ଶ୍ରୀ ନରେନ୍ଦ୍ର ମୋଦୀଙ୍କ ଉଦ୍ଦେଶ୍ୟରେ ସେ କହିଥିଲେ ଯେ ଶ୍ରୀଲଙ୍କାରେ ଆପଣ ଆମମାନଙ୍କ ମଧ୍ୟରୁ ଜଣେ  ।

ଶ୍ରୀଲଙ୍କା ରାଷ୍ଟ୍ରପତି ମୈତ୍ରିପାଲା ସିରିସେନା କହିଲେ ଯେ ଆମ ପାଇଁ ସୌଭାଗ୍ୟର ବିଷୟରେ ଯେ ଭାରତର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆମ ଗହଣରେ ଉପସ୍ଥିତ ଅଛନ୍ତି । ଦୁଇ ଦେଶ ମଧ୍ୟରେ ରହିଥିବା ପୁରାତନ ସମ୍ପର୍କ ବିଷୟରେ ସେ କହିଥିଲେ ଏବଂ କହିଥିଲେ ଯେ ଭେଶକ ଦିବସ ଅବସରରେ ପ୍ରଧାନମନ୍ତ୍ରୀ ମୋଦୀଙ୍କ ଉପସ୍ଥିତି ବିଶେଷ ଗୁରୁତ୍ୱବହନ କରୁଛି ଏବଂ ସାରା ବିଶ୍ୱ ଏଥିପ୍ରତି ଦୃଷ୍ଟି ରଖିଛି  । ସେ ବନ୍ଧୁତ୍ୱ ଏବଂ ଶାନ୍ତିର ବାର୍ତ୍ତା ନେଇ ଆସିଛନ୍ତି  ।

ପ୍ରଧାନମନ୍ତ୍ରୀ ମୋଦୀ ତାଙ୍କ ଭାଷଣରେ ଭେଶକ ଦିବସକୁ ସବୁଠୁ ପବିତ୍ର ଦିବସ ଭାବେ ବର୍ଣ୍ଣନା କରିଥିଲେ ଏବଂ କହିଥିଲେ ଏହି ଦିନ ସାରା ମାନବ ଜଗତ ଭଗବାନ ବୁଦ୍ଧଙ୍କ ଜନ୍ମ, ଜ୍ଞାନପ୍ରାପ୍ତି ଏବଂ ପରିନିର୍ବାଣକୁ ପାଳନ କରୁଛି । ସେ ଆହୁରି କହିଥିଲେ ଯେ, ଏହି ଦିବସ ପରମ ସତ୍ୟ, ଚିରସ୍ଥାୟୀ ଧମ୍ମ ଏବଂ 4ଟି ମହାନ ସତ୍ୟକୁ ହୃଦୟଙ୍ଗମ କରିବାର ଦିନ  ।

କଲୋମ୍ବୋରେ ଆୟୋଜିତ ହେଉଥିବା ଅନ୍ତର୍ଜାତୀୟ ଭେଶକ ଦିବସରେ ମୁଖ୍ୟ ଅତିଥି ଭାବେ ତାଙ୍କୁ ଆମନ୍ତ୍ରଣ କରିଥିବାରୁ ସେ ଶ୍ରୀଲଙ୍କା ରାଷ୍ଟ୍ରପତି ମୈତ୍ରିପାଲା ସିରିସେନା, ପ୍ରଧାନମନ୍ତ୍ରୀ ରାନିଲ ବିକ୍ରମସିଂଘେ ଏବଂ ଶ୍ରୀଲଙ୍କାର ଜନସାଧାରଣଙ୍କ ନିକଟରେ କୃତଜ୍ଞ ବୋଲି ପ୍ରଧାନମନ୍ତ୍ରୀ କହିଥିଲେ  ।

“ଏହି ପବିତ୍ର ଅବସରରେ ସମ୍ପୂର୍ଣ୍ଣ ଆତ୍ମଜାଗୃତ ସମ୍ୟକ ବୁଦ୍ଧଙ୍କ ଭୂମିର 125 କୋଟି ଲୋକମାନଙ୍କ ଶୁଭକାମନା ନେଇ ମୁଁ ଆସିଛି”, ବୋଲି ପ୍ରଧାନମନ୍ତ୍ରୀ କହିଥିଲେ ।

ପ୍ରଧାନମନ୍ତ୍ରୀଙ୍କ ଅଭିଭାଷଣର ମୁଖ୍ୟାଂଶ :

ଯୁବରାଜ ସିଦ୍ଧାର୍ଥ ବୁଦ୍ଧତ୍ୱ ପ୍ରାପ୍ତି କରିଥିବା ସ୍ଥାନ ଭାରତର ବୋଦ୍ଧଗୟା ସମଗ୍ର ବୌଦ୍ଧ ଜଗତର କେନ୍ଦ୍ରସ୍ଥଳୀ ଭାବେ ବିବେଚିତ ହୋଇଥାଏ  ।

ଧମ୍ମଚକ୍ର ସ୍ଥାପନ କରିବାରେ ସହାୟକ ହୋଇଥିବା ଭଗବାନ ବୁଦ୍ଧଙ୍କ ପ୍ରଥମ ଉପଦେଶ ପ୍ରଦାନସ୍ଥଳୀ ବାରାଣାସୀରୁ ମୁଁ ସଂସଦକୁ ନିର୍ବାଚିତ ହେବାର ସୌଭାଗ୍ୟ ଲାଭ କରିଛି  ।

ବୌଦ୍ଧଧର୍ମରୁ ଅନୁପ୍ରାଣୀତ ହୋଇ ଆମର ଗୁରୁତ୍ୱପୂର୍ଣ୍ଣ ଜାତୀୟ ସ୍ତମ୍ଭ ନିର୍ମାଣ କରାଯାଇଛି  ।

ଆମର ପ୍ରଶାସନ, ସଂସ୍କୃତି ଏବଂ ଦର୍ଶନରେ ବୌଦ୍ଧଧର୍ମ ଏବଂ ଏହାର ବିଭିନ୍ନ ଅଙ୍ଗର ଗଭୀର ପ୍ରଭାବ ରହିଛି  ।

ବୌଦ୍ଧଧର୍ମର ପବିତ୍ର ସୁଗନ୍ଧ ଭାରତରୁ ସାରା ଜଗତରେ ପରିବ୍ୟାପ୍ତ ହୋଇଛି  ।

ଶ୍ରେଷ୍ଠ ଧମ୍ମ ଉପହାର ଦେବା ଲାଗି ସମ୍ରାଟ ଅଶୋକଙ୍କ ଦୁଇ ସନ୍ତାନ ମହେନ୍ଦ୍ର ଏବଂ ସଂଘମିତ୍ରା ଭାରତରୁ ଶ୍ରୀଲଙ୍କାକୁ ଧମ୍ମଦୂତ ଭାବେ ଆସିଥିଲେ  ।

ବୌଦ୍ଧ ଜ୍ଞାନ ଏବଂ ଶିକ୍ଷା କେନ୍ଦ୍ର ଭାବେ ଶ୍ରୀଲଙ୍କା ଏବେ ପ୍ରସିଦ୍ଧି ଲାଭ କରିଛି  ।

ବୌଦ୍ଧ ଧର୍ମର ଅଭ୍ୟୁଦୟ ସ୍ଥଳୀରେ ବୌଦ୍ଧ ଧର୍ମର ପୁନରୁତ୍ଥାନ ପାଇଁ କିଛି ଶତାବ୍ଦୀ ପରେ ଅନଗାରିକା ଏବଂ ଧର୍ମପାଳ ଶ୍ରୀଲଙ୍କାରୁ ଭାରତକୁ ଯାତ୍ରା କରିଥିଲେ  ।

ଆପଣମାନେ ହିଁ ଆମକୁ ଆମ ମୂଳଦୁଆ ସହିତ ପରିଚୟ କରାଇବାରେ ସହାୟକ ହୋଇଛନ୍ତି  ।

ବୌଦ୍ଧ ଐତିହ୍ୟକୁ ସଂରକ୍ଷିତ କରି ରଖିବାରେ ସଫଳ ହୋଇଥିବାରୁ ସାରା ବିଶ୍ୱ ଶ୍ରୀଲଙ୍କା ନିକଟରେ ଋଣୀ ହୋଇ ରହିବ  ।

ବୌଦ୍ଧ ଧର୍ମର ଅବିଚ୍ଛିନ୍ନ ଐତିହ୍ୟକୁ ପାଳନ କରିବାର ଦିନ ହେଉଛି ବୈଶାଖ  ।

ଏହି ଐତିହ୍ୟ ଶହ ଶହ ବର୍ଷ ଏବଂ ପିଢ଼ି ପରେ ପିଢ଼ି ଧରି ଆମ ସମାଜକୁ ଏକତ୍ର କରି ରଖିଛି  ।

ମହାଗୁରୁଙ୍କ ସମୟରୁ ହିଁ ଭାରତ ଏବଂ ଶ୍ରୀଲଙ୍କା ମଧ୍ୟରେ ବନ୍ଧୁତାର ମୂଳଦୁଆ ପ୍ରତିଷ୍ଠା ହୋଇଥିଲା  ।

ଆମ ସମ୍ପର୍କରେ ବୁଦ୍ଧ ଧର୍ମର ଏକ ଦୀର୍ଘସ୍ଥାୟୀ ପ୍ରଭାବ ରହିଛି  ।

ପଡ଼ୋଶୀ ଭାବେ ଆମର ସମ୍ପର୍କ ବିଭିନ୍ନ ସ୍ତର ଦେଇ ପରିବ୍ୟାପ୍ତ ହୋଇଛି  ।

ବୌଦ୍ଧଧର୍ମର ମୂଲ୍ୟବୋଧ ଏବଂ ଆମର ସହଭାଗୀ ଭବିଷ୍ୟତର ସମ୍ଭାବନା ଉପରେ ଆମ ସମ୍ପର୍କର ଦୃଢ଼ତା ପ୍ରତିଷ୍ଠିତ ହୋଇଛି  ।

ଆମର ବନ୍ଧୁତା ଆମ ଲୋକମାନଙ୍କ ହୃଦୟରେ ଏବଂ ସମାଜର ଆବରଣରେ ରହିଛି  ।

ବୌଦ୍ଧ ଐତିହ୍ୟକୁ ସମ୍ମାନ ଜଣାଇବା ଏବଂ ଆମର ସମ୍ପର୍କୃକୁ ଆହୁରି ଗଭୀର କରିବା ଉଦ୍ଦେଶ୍ୟରେ ମୁଁ ଆନନ୍ଦର ସହ ଘୋଷଣା କରୁଛି ଯେ ଚଳିତ ବର୍ଷ ଅଗଷ୍ଟରୁ କଲୋମ୍ବୋରୁ ବାରାଣାସୀ ମଧ୍ୟରେ ଏଆର ଇଣ୍ଡିଆ ପକ୍ଷରୁ ସିଧାସଳଖ ବିମାନ ଚଳାଚଳ କରାଯିବ  ।

ଏହାଦ୍ୱାରା ମୋର ଶ୍ରୀଲଙ୍କାର ଭାଇ ଓ ଭଉଣୀମାନେ ବୁଦ୍ଧଙ୍କ ଭୂମିକୁ ସହଜରେ ଭ୍ରମଣ ଯାଇପାରିବେ ଏବଂ ସିଧାସଳଖ ଶ୍ରାବତ୍ସୀ, କୁଶୀନଗର, ସଙ୍କାସ, କୌଶାମ୍ବୀ ଏବଂ ସାରନାଥକୁ ଯାଇପାରିବେ  ।

ମୋର ତାମିଲ ଭାଇ ଓ ଭଉଣୀମାନେ ମଧ୍ୟ ସିଧାସଳଖ କାଶୀ ବିଶ୍ୱନାଥଙ୍କ ଭୂମି ବାରାଣାସୀ ଯାଇପାରିବେ  ।

ମୋର ବିଶ୍ୱାସ ଯେ ଶ୍ରୀଲଙ୍କା ସହିତ ଆମ ସମ୍ପର୍କର ଅପୂର୍ବ ମୁହୂର୍ତ୍ତରେ ଆମେ ରହିଛୁ  ।

ବିଭିନ୍ନ କ୍ଷେତ୍ରରେ ଆମ ଭାଗିଦାରୀତା ଆହୁରି ଉପରକୁ ଯିବାର ଭରପୂର ସୁଯୋଗ ରହିଛି  ।

ଆମର ଉନ୍ନତି ଏବଂ ସଫଳତାରେ ଆମର ବନ୍ଧୁତା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ  ।

ଆମର ଶ୍ରୀଲଙ୍କା ଭାଇ ଓ ଭଉଣୀମାନଙ୍କ ଆର୍ଥିକ ଉନ୍ନତି ଲାଗି ଆମେ ପ୍ରତିଶ୍ରୁତିବଦ୍ଧ  ।

ସକାରାତ୍ମକ ପରିବର୍ତ୍ତନ ଏବଂ ଅର୍ଥନୈତିକ ଅଭିବୃଦ୍ଧି ଲାଗି ଆମେ ନିବେଶ ଜାରି ରଖିବୁ ଯାହା ଆମର ବିକାଶମୂଳକ ସହଯୋଗକୁ ଆହୁରି ସୁଦୃଢ଼ କରିବ  ।

ଜ୍ଞାନ, ଦକ୍ଷତା ଏବଂ ସମୃଦ୍ଧି ଆଦାନପ୍ରଦାନ ଦ୍ୱାରା ଆମର ସମ୍ପର୍କ ସୁଦୃଢ଼ ହୋଇପାରିବ  ।

ବାଣିଜ୍ୟ ଏବଂ ନିବେଶରେ ଆମେ ଗୁରୁତ୍ୱପୂର୍ଣ୍ଣ ସହଯୋଗୀ  ।

ବିଶ୍ୱାସ କରୁଛି ଆମର ଆପୋଷ ଲାଭ ପାଇଁ ସୀମାପାର ବ୍ୟବସାୟ, ନିବେଶ, ଟେକ୍ନୋଲଜି ଏବଂ ଜ୍ଞାନର ଆଦାନପ୍ରଦାନ ସହାୟକ ହୋଇପାରିବ  ।

ଭାରତର ଦ୍ରୁତ ଅଭିବୃଦ୍ଧି ସମଗ୍ର ଅଂଚଳ ପାଇଁ ବିଶେଷ କରି ଶ୍ରୀଲଙ୍କା ପାଇଁ ଲାଭଜନକ ହେବ  ।

ଭିତ୍ତିଭୂମି ଏବଂ ଯୋଗାଯୋଗ, ପରିବହନ ଏବଂ ଶକ୍ତି କ୍ଷେତ୍ରରେ ଆମର ସହଯୋଗ ଜାରି ରଖିବା ଲାଗି ଆମେ ପ୍ରତିଶ୍ରୁତିବଦ୍ଧ  ।

ଆମର ବିକାଶ ଭାଗିଦାରୀତା ମାନବୀୟ କାର୍ଯ୍ୟର ବିଭିନ୍ନ କ୍ଷେତ୍ର ଯେପରିକି କୃଷି, ଶିକ୍ଷା, ସ୍ୱାସ୍ଥ୍ୟ, ପୁନଃଥଇଥାନ, ପରିବହନ, ଶକ୍ତି, ସଂସ୍କୃତି, ଜଳ, ଆବାସ, କ୍ରୀଡ଼ା ଏବଂ ମାନବ ସମ୍ବଳ ଆଦିକୁ ପରିବ୍ୟାପ୍ତ  ।

ଆଜି, ଶ୍ରୀଲଙ୍କା ସହ ଭାରତର ବିକାଶ ସହଯୋଗ 2.6 ବିଲିୟନ ଆମେରିକୀୟ ଡଲାରରେ ପହଂଚିଛି  ।

ଲୋକମାନଙ୍କ ଶାନ୍ତିପୂର୍ଣ୍ଣ, ସମୃଦ୍ଧ ଏବଂ ନିରାପଦ ଭବିଷ୍ୟତ ପାଇଁ ଶ୍ରୀଲଙ୍କାକୁ ସହଯୋଗ ଜାରି ରହିବ  ।

କାରଣ ଶ୍ରୀଲଙ୍କାର ଲୋକମାନଙ୍କ ଅର୍ଥନୈତିକ ଏବଂ ସାମାଜିକ ଉନ୍ନତି ସହିତ 125 କୋଟି ଭାରତୀୟଙ୍କ ଉନ୍ନତି ଯୋଡ଼ି ହୋଇ ରହିଛି  ।

କାରଣ ସ୍ଥଳଭାଗରେ ହେଉ କିମ୍ବା ଭାରତ ମହାସାଗରର ଜଳଭାଗରେ ହେଉ ଆମ ସମାଜର ସୁରକ୍ଷା ଅବିଭାଜ୍ୟ  ।

ରାଷ୍ଟ୍ରପତି ସିରିସେନା ଏବଂ ପ୍ରଧାନମନ୍ତ୍ରୀ ବିକ୍ରମସିଂଘେଙ୍କ ସହ ମୋର ଆଲୋଚନା ସମୟରେ କେବଳ ସାର୍ବଜନୀନ ଲାଭ ହାସଲ ଲାଗି ପରସ୍ପର ସହ ହାତ ମିଳାଇବା ଲାଗି ଆମର ଇଚ୍ଛାଶକ୍ତି ପ୍ରତି ଗୁରୁତ୍ୱ ଦିଆଯାଇଥିଲା  ।

ଆପଣଙ୍କ ସମାଜର ସଂହତି ଏବଂ ଉନ୍ନତି ପାଇଁ ଆପଣ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଲେ ଭାରତ ଆପଣମାନଙ୍କୁ ଆପଣଙ୍କ ରାଷ୍ଟ୍ର ନିର୍ମାଣ କାର୍ଯ୍ୟରେ ସର୍ବଦା ସହଯୋଗ ଯୋଗାଇଦେବ  ।

ଅଢ଼େଇ ହଜାର ବର୍ଷ ତଳେ ଭଗବାନ ବୁଦ୍ଧଙ୍କ ଉପଦେଶର ଯେତିକି ଗୁରୁତ୍ୱ ଥିଲା, ଆଜି ବି ସେତିକି ଗୁରୁତ୍ୱ ରହିଛି  ।

ବୁଦ୍ଧଙ୍କ ପ୍ରଦର୍ଶିତ ମଧ୍ୟମ ମାର୍ଗ ଆଜି ଆମକୁ ବିଶେଷ ବାର୍ତ୍ତା ହେଉଛି  ।

ଏହାର ସର୍ବଗ୍ରହିତା ଏବଂ ଚିରନ୍ତନତା ମର୍ମସ୍ପର୍ଶୀ  ।

ଏହା ରାଷ୍ଟ୍ରଗୁଡ଼ିକ ପାଇଁ ଏକଜୁଟ ହେବାର ଶକ୍ତି ଭାବେ କାର୍ଯ୍ୟ କରିଆସିଛି  ।

ଦକ୍ଷିଣ, କେନ୍ଦ୍ରୀୟ, ଦକ୍ଷିଣ ପୂର୍ବ ଏବଂ ପୂର୍ବ ଏସୀୟ ରାଷ୍ଟ୍ରଗୁଡ଼ିକ ବୁଦ୍ଧଙ୍କ ଭୂମି ସହ ସେମାନଙ୍କ ସମ୍ପର୍କକୁ ନେଇ ଗର୍ବିତ  ।

ଭେଶକ ଦିବସର ବିଷୟବସ୍ତୁ ସାମାଜିକ ନ୍ୟାୟ ଏବଂ ଚିରସ୍ଥାୟୀ ବିଶ୍ୱଶାନ୍ତିର ବୁଦ୍ଧଙ୍କ ଉପଦେଶ ସହ ଗଭୀର ସମ୍ପର୍କ ରହିଛି  ।

ବିଷୟବସ୍ତୁ ହୁଏତ’ ସ୍ୱାଧୀନ ଭାବେ ଆସିଥାଇପାରେ  ।

କିନ୍ତୁ ଏହା ଗଭୀର ଭାବେ ଆନ୍ତଃନିର୍ଭରଶୀଳ ଏବଂ ଆନ୍ତଃସଂଯୁକ୍ତ  ।

ସାମାଜିକ ନ୍ୟାୟ ପ୍ରସଙ୍ଗର ଗୋଷ୍ଠୀଗୁଡ଼ିକ ମଧ୍ୟରେ ବିବାଦ ସହ ସମ୍ପର୍କ ରହିଛି  ।

ଲୋଭକୁ ପ୍ରୋତ୍ସାହନ ଦେଉଥିବା ତୃଷ୍ଣା କାରଣରୁ ଏପରି ହେଉଛି  ।

ଲୋଭ କାରଣରୁ ମଣିଷ ଆମର ପ୍ରାକୃତିକ ଆବାସସ୍ଥଳୀ ଉପରେ ଆଧିପତ୍ୟ ବିସ୍ତାର କରିବା ଏବଂ ଏହାକୁ କ୍ଷତି ପହଂଚାଇବା ଲାଗି ଚେଷ୍ଟା କରୁଛି  ।

ସବୁ ଇଚ୍ଛା ପୂରଣ କରିବା ଲାଗି ଆମର ପ୍ରଚେଷ୍ଟା ଗୋଷ୍ଠୀଗୁଡ଼ିକ ମଧ୍ୟରେ ଆୟ ଅସମାନତା ସୃଷ୍ଟି କରିବା ସହ ସାମାଜିକ ସଂହତି ପ୍ରତି କ୍ଷତି ପହଂଚାଉଛି  ।

ରାଷ୍ଟ୍ର ରାଜ୍ୟ ମଧ୍ୟରେ ବିବାଦ କାରଣରୁ ଯେ କେବଳ ବିଶ୍ୱଶାନ୍ତି ପ୍ରତିହତ ହେଉଛି ତାହା ନୁହେଁ କିଛି ଲୋକଙ୍କ ମନୋଭାବ, ଚିନ୍ତାଧାରା, ଘୃଣା ଏବଂ ହିଂସାକୁ ପ୍ରୋତ୍ସାହନ ଦେବା ଦିଗରେ କାର୍ଯ୍ୟ କରିବା ଏହାର ମଧ୍ୟ କାରଣ  ।

ଆମ ଅଂଚଳରେ ଆତଙ୍କବାଦର ବିପଦ ଏହି ବିନାଶକାରୀ ମନୋଭାବର ପ୍ରତିଫଳନ  ।

ଦୁଃଖର କଥା ହେଉଛି ଆମ ଅଂଚଳରେ ଏପରି ବିଚାରାଧାରା ରଖୁଥିବା ଲୋକ ଏବଂ ସେମାନଙ୍କ ସମର୍ଥକମାନେ ଆଲୋଚନା ପାଇଁ ରାଜି ନୁହନ୍ତି ତେଣୁ ସେମାନେ କେବଳ ମୃତ୍ୟୁ ଏବଂ ବିନାଶ କରି ଚାଲିଛନ୍ତି  ।

ସାରା ବିଶ୍ୱରେ ବୃଦ୍ଧି ପାଉଥିବା ହିଂସାର ଉତ୍ତର କେବଳ ବୌଦ୍ଧ ଧର୍ମର ଉପଦେଶରେ ନିହିତ ରହିଛି ବୋଲି ମୁଁ ବିଶ୍ୱାସ କରେ  ।

କେବଳ ବିବାଦର ଉପସ୍ଥିତିରୁ ପ୍ରାପ୍ତି ସାମୟିକ ଶାନ୍ତି ନୁହେଁ,

ଆଲୋଚନା, ସମତା ଏବଂ ନ୍ୟାୟକୁ ପ୍ରୋତ୍ସାହନ ଦେଉଥିବା କରୁଣା ଏବଂ ପ୍ରଜ୍ଞା ଉପରେ ଆଧାରିତ ସକ୍ରିୟ ଶାନ୍ତିର ଆବଶ୍ୟକତା ରହିଛି  ।

ଶାନ୍ତି ଠାରୁ ଅଧିକ ଉଚ୍ଚ ବରଦାନ ନାହିଁ ବୋଲି ବୁଦ୍ଧ କହିଥିଲେ  ।

ଭେଶକ ଅବସରରେ ମୁଁ ଆଶା କରୁଛି ଯେ ଭାରତ ଏବଂ ଶ୍ରୀଲଙ୍କା ମିଳିତ ଭାବେ ଭଗବାନ ବୁଦ୍ଧଙ୍କ ଆଦର୍ଶର ପ୍ରଚାର କରିବା, ଶାନ୍ତିର ମୂଲ୍ୟବୋଧକୁ ପ୍ରସାର କରିବା, ଆମ ସରକାରଙ୍କ ନୀତି ଏବଂ କାର୍ଯ୍ୟରେ ଆବାସ, ସମାବେଶ ଏବଂ ଦୟା ପ୍ରତିଫଳିତ କରିବା ଦିଗରେ କାର୍ଯ୍ୟ କରିବେ  ।

ବ୍ୟକ୍ତିଗତ, ପାରିବାରିକ, ସାମାଜିକ, ଜାତୀୟ ଏବଂ ବିଶ୍ୱ ଶାନ୍ତି ପାଇଁ ଲୋଭ, ଘୃଣା ଏବଂ ଅଜ୍ଞତା ଭଳି ତିନୋଟି ବିଷକୁ ପରିତ୍ୟାଗ କରିବା ଜରୁରୀ  ।

ପବିତ୍ର ଭେଶକ ଦିବସ ଅବସରରେ ଆସନ୍ତୁ ଅନ୍ଧକାର ଦୂର କରିବା ଲାଗି ଆଲୋକର ଦୀପ ଜାଳିବା; ନିଜ ଭିତରକୁ ଟିକିଏ ଦେଖିବା ଏବଂ ଅନ୍ୟ କିଛି ନୁହେଁ କେବଳ ସତ୍ୟକୁ ଧାରଣ କରିବା;

ଏବଂ ସାରା ବିଶ୍ୱକୁ ଆଲୋକିତ କରୁଥିବା ବୁଦ୍ଧଙ୍କ ମାର୍ଗରେ ଯିବା ଲାଗି ସମର୍ପିତ ପ୍ରୟାସ କରିବା  ।

ଧମ୍ମପଦର ୩୮୭ତମ ଉପଦେଶ ଅନୁଯାୟୀ :

ଦିବସରେ ସୂର୍ଯ୍ୟ ଉଦ୍ଭାସିତ ହୁଅନ୍ତି,

ରାତ୍ରୀରେ ଚନ୍ଦ୍ରମା ଉଦ୍ଭାସିତ ହୁଏ,

ଶସ୍ତ୍ର ଦ୍ୱାରା ଯୋଦ୍ଧା ଚମକିଥାଏ,

ଧ୍ୟାନ ଦ୍ୱାରା ବ୍ରାହ୍ମଣ ଚମକିଥାନ୍ତି,

କିନ୍ତୁ ଆତ୍ମଜାଗୃତ ମନୁଷ୍ୟ ନିଜର କାନ୍ତି ଦ୍ୱାରା ଦିନ ରାତି ଚମକୁଥାଏ  ।

ଆପଣମାନଙ୍କ ସହ ରହିବାର ସମ୍ମାନ ପାଇଥିବାରୁ ଆପଣମାନଙ୍କୁ ପୁଣିଥରେ ଧନ୍ୟବାଦ  ।

କାଣ୍ଡି ଠାରେ ଆଜି ଅପରାହ୍ଣରେ ପବିତ୍ର ଦନ୍ତାବଶେଷ ମନ୍ଦିର ଶ୍ରୀ ଦାଲିଦା ମାଲିଗାୱା ଦର୍ଶନ ପାଇଁ ମୁଁ ଇଚ୍ଛୁକ  ।

ତିନି ରତ୍ନ ବୁଦ୍ଧ, ଧମ୍ମ ଏବଂ ସଂଘ ଆମକୁ ଆଶୀର୍ବାଦ ଦିଅନ୍ତୁ  ।