ପିଏମଇଣ୍ଡିଆ

ଅକ୍ଟୋବର ୯ ତାରିଖ ଦିନ ଦ୍ୱିପ୍ରହର ପ୍ରାୟ ୧ଟା ବେଳେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭିଡିଓ କନଫରେନ୍ସିଂ ଯୋଗେ ମହାରାଷ୍ଟ୍ରରେ ୭୬୦୦ କୋଟି ଟଙ୍କାର ବିଭିନ୍ନ ବିକାଶମୂଳକ ପ୍ରକଳ୍ପର ଶିଳାନ୍ୟାସ କରିବେ ।

ପ୍ରଧାନମନ୍ତ୍ରୀ ନାଗପୁରସ୍ଥିତ ଡ. ବାବାସାହେବ ଆମ୍ବେଦକର ଆନ୍ତର୍ଜାତିକ ବିମାନବନ୍ଦରର ଉନ୍ନତିକରଣ ପାଇଁ ଶିଳାନ୍ୟାସ କରିବେ । ୭୦୦୦ କୋଟି ଟଙ୍କାରେ ଏହି ବିକାଶ କରାଯାଉଛି । ନାଗପୁର ସହର ଏବଂ ବିଦର୍ଭ ଅଞ୍ଚଳରେ ନିର୍ମାଣ କ୍ଷେତ୍ର, ବିମାନ ଚଳାଚଳ, ପର୍ଯ୍ୟଟନ, ଲଜିଷ୍ଟିକ୍ସ, ସ୍ୱାସ୍ଥ୍ୟସେବା ଆଦି ବହୁମୁଖୀ ବିକାଶ ଦିଗରେ ଏହି ପ୍ରକଳ୍ପ ସହାୟକ ହୋଇପାରିବ ।

ଶିରିଡ଼ି ବିମାନବନ୍ଦରରେ ୬୪୫ କୋଟି ଟଙ୍କା ବ୍ୟୟରେ ହେବାକୁ ଥିବା ନୂତନ ସମନ୍ୱିତ ଟର୍ମିନଲ ବିଲ୍ଡିଂର ଶିଳାନ୍ୟାସ କରିବେ ପ୍ରଧାନମନ୍ତ୍ରୀ । ଶିରିଡ଼ି ଆସୁଥିବା ଧାର୍ମିକ ପର୍ଯ୍ୟଟକମାନଙ୍କୁ ଏହା ବିଶ୍ୱସ୍ତରୀୟ ସୁବିଧା ପ୍ରଦାନ କରିବ । ସାଇବାବାଙ୍କ ଆଧ୍ୟାତ୍ମିକ ନିମ୍ବ ଗଛ ଥିମ୍ ଆଧାରରେ ଏହି ବିଲ୍‌ଡିଂ ନିର୍ମାଣ କରାଯିବ ।

ସମସ୍ତଙ୍କୁ ସ୍ୱାସ୍ଥ୍ୟସେବା ପ୍ରଦାନ ପାଇଁ ତାଙ୍କ ପ୍ରତିବଦ୍ଧତା ସ୍ୱରୂପ ମହାରାଷ୍ଟ୍ରରେ ୧୦ଟି ମେଡିକାଲ କଲେଜକୁ କାର୍ଯ୍ୟକ୍ଷମ କରାଇବେ ପ୍ରଧାନମନ୍ତ୍ରୀ । ମୁମ୍ବାଇ, ନାସିକ, ଜଲନା, ଅମରାବତୀ, ଗଡ଼ଚିରୋଲି, ବୁଲଧାନା, ୱାସିମ, ଭଣ୍ଡାରା, ହିଙ୍ଗୋଲି ଏବଂ ଅମ୍ବରନାଥ (ଥାନେ)ରେ ଏସବୁ ମେଡିକାଲ କଲେଜ ନିର୍ମାଣ କରାଯାଇଛି । ଏସବୁ କଲେଜରେ ସ୍ନାତକ ଓ ସ୍ନାତକୋତ୍ତର ସିଟ୍ ରହିବା ସହ ଜନସାଧାରଣଙ୍କୁ ବିଶେଷ ତୃତୀୟକ ସ୍ୱାସ୍ଥ୍ୟସେବା ମଧ୍ୟ ପ୍ରଦାନ କରିବ ।

ଭାରତକୁ ‘ସ୍କିଲ କ୍ୟାପିଟାଲ ଅଫ ଦ ୱାର୍ଲ୍ଡ’ ଭାବେ ପରିଚୟ ଦେବାକୁ ଥିବା ଦୃଷ୍ଟିକୋଣକୁ ସଫଳ କରିବା ଲକ୍ଷ୍ୟରେ ପ୍ରଧାନମନ୍ତ୍ରୀ ମୁମ୍ବାଇରେ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ସ୍କିଲ୍ସ (ଆଇଆଇଏସ୍‌)କୁ ଉଦଘାଟନ କରିବେ । ଏହା ଉଦ୍ୟୋଗ କ୍ଷେତ୍ର ପାଇଁ ଅଗ୍ରଣୀ ପ୍ରଯୁକ୍ତି ବିଦ୍ୟାରେ ପାରଙ୍ଗମ ଥିବା ଶ୍ରମ ଶକ୍ତି ପ୍ରସ୍ତୁତ କରିବ । ପବ୍ଲିକ-ପ୍ରାଇଭେଟ ପାର୍ଟନରସିପ୍ ମଡେଲରେ ଏହା ଟାଟା ଏଜୁକେସନ ଆଣ୍ଡ ଡେଭଲପମେଣ୍ଟ ଟ୍ରଷ୍ଟ ଏବଂ ଭାରତ ସରକାରଙ୍କ ସହଭାଗିତାରେ ପ୍ରତିଷ୍ଠା କରାଯାଇଛି । ମେକାଟ୍ରୋନିକ୍ସ, ଆର୍ଟିଫିସିଆଲ ଇଣ୍ଟେଲିଜେନ୍ସ, ଡାଟା ଆନାଲିଟିକ୍ସ, ଇଣ୍ଡଷ୍ଟ୍ରିଆଲ ଅଟୋମେସନ ଏବଂ ରୋବୋଟିକ୍ସ ଆଦି କ୍ଷେତ୍ରରେ ଏହି ଇନଷ୍ଟିଚ୍ୟୁଟ ପ୍ରଶିକ୍ଷଣ ପ୍ରଦାନ କରିବ ।

ପ୍ରଧାନମନ୍ତ୍ରୀ ମଧ୍ୟ ମହାରାଷ୍ଟ୍ରରେ ବିଦ୍ୟା ସମୀକ୍ଷା କେନ୍ଦ୍ର (ଭିଏସକେ) କୁ ଉଦଘାଟନ କରିବେ । ସ୍ମାର୍ଟ ଉପସ୍ଥିତି, ସ୍ୱାଧ୍ୟାୟ ଭଳି ଟାଟ୍‌ବଟ ମାଧ୍ୟମରେ ଛାତ୍ରଛାତ୍ରୀ, ଶିକ୍ଷକ ଏବଂ ପ୍ରଶାସକ ମାନଙ୍କୁ ଭିଏସକେ ଗୁରୁତ୍ୱପୂର୍ଣ୍ଣ ଏକାଡେମିକ ଓ ପ୍ରଶାସନିକ ତଥ୍ୟ ଉପଲବ୍ଧ କରାଇବ । ସ୍କୁଲ ଗୁଡ଼ିକୁ ପ୍ରଭାବୀ ଢଙ୍ଗରେ ପରିଚାଳନା କରିବା, ଅଭିଭାବକ ଓ ରାଜ୍ୟ ମଧ୍ୟରେ ସମ୍ପର୍କକୁ ମଜବୁତ୍ କରିବା ଏବଂ ଉତ୍ତରଦାୟୀ ସହାୟତା ପ୍ରଦାନ କରିବା ପାଇଁ ଉଚ୍ଚ ଗୁଣବତ୍ତାସୂଚକ ତଥ୍ୟ ଏହା ପ୍ରଦାନ କରିବ । ଶିକ୍ଷା ପ୍ରଦାନ ଶୈଳୀ ଏବଂ ଶିକ୍ଷା ବ୍ୟବସ୍ଥାର ମାନ ବୃଦ୍ଧି ପାଇଁ ଏହା ନିର୍ଦ୍ଦେଶାତ୍ମକ ସମ୍ବଳ ମଧ୍ୟ ଦେବ ।    

SR