ପିଏମଇଣ୍ଡିଆ

ରାଜସ୍ଥାନର ରାଜ୍ୟପାଳ ଶ୍ରୀ ହରିଭାଉ ବାଗଡେ ଜୀ, ରାଜସ୍ଥାନର ଲୋକପ୍ରିୟ ମୁଖ୍ୟମନ୍ତ୍ରୀ ଶ୍ରୀ ଭଜନ ଲାଲ ଜୀ ଶର୍ମା, ରାଜସ୍ଥାନ ସରକାରଙ୍କ ମନ୍ତ୍ରୀଗଣ, ସାଂସଦଗଣ, ବିଧାୟକଗଣ, ଶିଳ୍ପଜଗତର ସାଥିମାନେ, ବିଭିନ୍ନ ରାଷ୍ଟ୍ରଦୂତ, ଦୂତାବାସର ପ୍ରତିନିଧି, ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତି, ମହିଳା ଏବଂ ଭଦ୍ରବ୍ୟକ୍ତିମାନେ।

ରାଜସ୍ଥାନର ବିକାଶ ଯାତ୍ରାରେ, ଆଜି ଆଉ ଏକ ଗୁରୁତ୍ୱପୂର୍ଣ୍ଣ ଦିନ । ଦେଶ ବିଦେଶରୁ ବହୁ ସଂଖ୍ୟାରେ ପ୍ରତିନିଧି ଓ ନିବେଶକ ଏଠିକାର ପିଙ୍କ ସିଟିକୁ ଆସି ପହଞ୍ଚିଛନ୍ତି। ଉଦ୍ୟୋଗ ଜଗତର ଅନେକ ବନ୍ଧୁ ମଧ୍ୟ ଏଠାରେ ଉପସ୍ଥିତ ଅଛନ୍ତି । ରାଇଜିଂ ରାଜସ୍ଥାନ ଶିଖର ସମ୍ମିଳନୀରେ ଆପଣ ସମସ୍ତଙ୍କୁ ଅଭିନନ୍ଦନ । ମୁଁ ରାଜସ୍ଥାନର ବିଜେପି ସରକାରଙ୍କୁ ଏହି ଭବ୍ୟ କାର୍ଯ୍ୟକ୍ରମ ପାଇଁ ଅଭିନନ୍ଦନ ଜଣାଉଛି ।

ସାଥୀମାନେ

ଆଜି ବିଶ୍ୱର ପ୍ରତ୍ୟେକ ବିଶେଷଜ୍ଞ ଓ ନିବେଶକ ଭାରତକୁ ନେଇ ବେଶ୍ ଉତ୍ସାହିତ ଅଛନ୍ତି। ସଂସ୍କାର-ପ୍ରଦର୍ଶନ-ପରିବର୍ତ୍ତନର ମନ୍ତ୍ର ଅନୁସରଣ କରି ଭାରତ ଯେଉଁ ବିକାଶ ହାସଲ କରିଛି ତାହା ସବୁ କ୍ଷେତ୍ରରେ ଦୃଶ୍ୟମାନ ହେଉଛି। ସ୍ୱାଧୀନତାର ୭ ଦଶନ୍ଧି ମଧ୍ୟରେ ଭାରତ ବିଶ୍ୱର ଏକାଦଶ ବୃହତ୍ତମ ଅର୍ଥନୀତି ରେ ପରିଣତ ହେବାରେ ସକ୍ଷମ ହୋଇଥିଲା । ବିଗତ ୧୦ ବର୍ଷ ମଧ୍ୟରେ ଭାରତ ଦଶମ ବୃହତ୍ତମ ଅର୍ଥନୀତିରୁ ପଞ୍ଚମ ବୃହତ୍ତମ ଅର୍ଥନୀତିରେ ପରିଣତ ହୋଇଛି। ବିଗତ ୧୦ ବର୍ଷ ମଧ୍ୟରେ ଭାରତ ଏହାର ଅର୍ଥନୀତିର ଆକାରକୁ ପ୍ରାୟ ଦ୍ୱିଗୁଣିତ କରିଛି। ବିଗତ ୧୦ ବର୍ଷ ମଧ୍ୟରେ ଭାରତର ରପ୍ତାନି ପ୍ରାୟ ଦ୍ୱିଗୁଣିତ ହୋଇଛି। ୨୦୧୪ ପୂର୍ବ ଦଶନ୍ଧି ତୁଳନାରେ ଗତ ଦଶନ୍ଧିରେ ଏଫଡିଆଇ ମଧ୍ୟ ଦ୍ୱିଗୁଣିତ ହୋଇଛି। ଏହି ସମୟରେ ଭାରତ ଭିତ୍ତିଭୂମି ର ମୂଲ୍ୟ ପ୍ରାୟ ୨ ଟ୍ରିଲିୟନ ଟଙ୍କାରୁ ୧୧ ଟ୍ରିଲିୟନ ଟଙ୍କାକୁ ବୃଦ୍ଧି କରିଛି ।

ସାଥୀମାନେ

ଗଣତନ୍ତ୍ର, ଜନସଂଖ୍ୟା, ଡିଜିଟାଲ ଡାଟା ଏବଂ ବିତରଣର ଶକ୍ତି କ’ଣ ହୋଇଥାଏ, ଏହା ଭାରତର ସଫଳତାରେ ପ୍ରତିଫଳିତ ହୋଇଛି । ଭାରତ ଭଳି ଏକ ବିବିଧତାପୂର୍ଣ୍ଣ ଦେଶରେ, ଗଣତନ୍ତ୍ର ର ବିକାଶ ହେଉଛି, ଏତେ ସଶକ୍ତ ହେଉଛି, ଏହା ନିଜେ ଏକ ବଡ଼ ଉପଲବ୍ଧି । ଗଣତାନ୍ତ୍ରିକ ହୋଇଥିବା ବେଳେ, ମାନବିକତାର କଲ୍ୟାଣ, ଏହା ଭାରତର ଦର୍ଶନ ଶାସ୍ତ୍ରର ମୂଳରେ ରହିଛି, ଏହା ହେଉଛି ଭାରତର ମୌଳିକ ଚରିତ୍ର। ଆଜି ଭାରତବାସୀ, ନିଜର ଗଣତାନ୍ତ୍ରିକ ଅଧିକାର ମାଧ୍ୟମରେ ଭାରତରେ ଏକ ସ୍ଥିର ସରକାର ପାଇଁ ଭୋଟ୍ ଦେଉଛନ୍ତି।

ସାଥୀମାନେ

ଆମର ଜନସଂଖ୍ୟା ଅର୍ଥାତ୍ ଯୁବଶକ୍ତି ଭାରତର ଏହି ପ୍ରାଚୀନ ମୂଲ୍ୟବୋଧକୁ ଆଗକୁ ବଢ଼ାଉଛି। ଆଗାମୀ ଅନେକ ବର୍ଷ ଧରି ଭାରତ ବିଶ୍ୱର ସବୁଠାରୁ ଯୁବ ଦେଶମାନଙ୍କ ମଧ୍ୟରେ ରହିବାକୁ ଯାଉଛି । ତେଣୁ ଭାରତରେ ସବୁଠାରୁ ଅଧିକ ଦକ୍ଷ ଯୁବ ରହିବ। ଏଥିପାଇଁ ସରକାର ଗୋଟିଏ ପରେ ଗୋଟିଏ ଅନେକ ନିଷ୍ପତ୍ତି ନେଉଛନ୍ତି।

ସାଥୀମାନେ

ବିଗତ ଦଶନ୍ଧିମଧ୍ୟରେ ଭାରତର ଯୁବଶକ୍ତି ଏହାର ସାମର୍ଥ୍ୟରେ ଆଉ ଏକ ଦିଗ ଯୋଡ଼ିଛି। ଏହି ନୂଆ ଦିଗ ହେଉଛି ଭାରତର ବୈଷୟିକ ଶକ୍ତି, ଭାରତର ଡାଟା ପାୱାର । ଆପଣ ସମସ୍ତେ ଜାଣନ୍ତି ଆଜି ପ୍ରତ୍ୟେକ କ୍ଷେତ୍ରରେ ଟେକ୍ନୋଲୋଜି ଏବଂ ଡାଟା କେତେ ଗୁରୁତ୍ୱପୂର୍ଣ୍ଣ | ଏହି ଶତାବ୍ଦୀ ପ୍ରଯୁକ୍ତି ଭିତ୍ତିକ, ତଥ୍ୟ ଭିତ୍ତିକ। ଗତ ଏକ ଦଶନ୍ଧି ମଧ୍ୟରେ ଭାରତରେ ଇଣ୍ଟରନେଟ୍ ବ୍ୟବହାରକାରୀଙ୍କ ସଂଖ୍ୟା ପାଖାପାଖି ୪ ଗୁଣ ବୃଦ୍ଧି ପାଇଛି। ଡିଜିଟାଲ କାରବାରରେ ନୂଆ ରେକର୍ଡ ସୃଷ୍ଟି ହେଉଛି ଏବଂ ଏହା କେବଳ ଆରମ୍ଭ । ଭାରତ, ବିଶ୍ୱକୁ ଗଣତନ୍ତ୍ର, ଜନସଂଖ୍ୟା ଓ ତଥ୍ୟର ପ୍ରକୃତ ଶକ୍ତି ଦେଖାଉଛି। ଡିଜିଟାଲ ଟେକ୍ନୋଲୋଜିର ଗଣତାନ୍ତ୍ରିକୀକରଣ କିପରି ପ୍ରତ୍ୟେକ କ୍ଷେତ୍ର, ପ୍ରତ୍ୟେକ ବର୍ଗକୁ ଉପକୃତ କରୁଛି ତାହା ଭାରତ ଦେଖାଇଛି । ଭାରତର ୟୁପିଆଇ, ଭାରତର ବେନିଫିଟ୍ ଟ୍ରାନ୍ସଫର ସ୍କିମ୍ ସିଷ୍ଟମ, ଜିଇଏମ୍, ଗଭର୍ଣ୍ଣମେଣ୍ଟ ଇ-ମାର୍କେଟପ୍ଲେସ୍, ଓ.ଏନ୍.ଡି.ସି- ଓପନ୍ ନେଟୱାର୍କ ଫର୍ ଡିଜିଟାଲ୍ କମର୍ସ, ଏଭଳି ଅନେକ ପ୍ଲାଟଫର୍ମ, ଯାହା ଡିଜିଟାଲ ଇକୋସିଷ୍ଟମର ଶକ୍ତିକୁ ଦର୍ଶାଉଛି। ଆମେ ଏହାର ବିପୁଳ ଲାଭ, ଏବଂ ବହୁତ ବଡ ପ୍ରଭାବ ଆମେ ରାଜସ୍ଥାନରେ ମଧ୍ୟ ଏହାର ବିପୁଳ ପ୍ରଭାବ ଦେଖିବାକୁ ଯାଉଛୁ । ମୁଁ ସର୍ବଦା ରାଜ୍ୟର ବିକାଶ ମାଧ୍ୟମରେ ଦେଶର ବିକାଶକୁ ବିଶ୍ୱାସ କରେ । ରାଜସ୍ଥାନ ବିକାଶର ନୂଆ ଶୀର୍ଷରେ ପହଞ୍ଚିବା ପରେ ଦେଶକୁ ମଧ୍ୟ ନୂଆ ଉଚ୍ଚତା ମିଳିବ।

ସାଥୀମାନେ

ଆୟତନ ଦୃଷ୍ଟିରୁ ରାଜସ୍ଥାନ ଭାରତର ସବୁଠାରୁ ବଡ ରାଜ୍ୟ ଅଟେ । ଏବଂ ରାଜସ୍ଥାନବାସୀଙ୍କ ହୃଦୟ ମଧ୍ୟ ସେତିକି ବଡ଼ । ଏଠାକାର ଲୋକଙ୍କ କଠିନ ପରିଶ୍ରମ, ସେମାନଙ୍କର ସଚ୍ଚୋଟତା, ସବୁଠାରୁ କଠିନ ଲକ୍ଷ୍ୟ ହାସଲ କରିବାର ଇଚ୍ଛାଶକ୍ତି, ଦେଶକୁ ପ୍ରାଥମିକତା ଦେବାର ଭାବନା, ଦେଶ ପାଇଁ କିଛି ବି କରିବାର ପ୍ରେରଣା, ଏହା ରାଜସ୍ଥାନର ପ୍ରତ୍ୟେକ କଣିକାରେ ଦେଖିବାକୁ ମିଳିଥାଏ । ସ୍ୱାଧୀନତା ପରେ ସରକାରମାନଙ୍କର ପ୍ରାଥମିକତା ନା’ ଦେଶର ବିକାଶ ଥିଲା ନା’ ଦେଶର ଐତିହ୍ୟ । ଏଥିରେ ରାଜସ୍ଥାନର ବହୁତ ବଡ କ୍ଷତି ହୋଇଛି। କିନ୍ତୁ ଆଜି ଆମ ସରକାର ବିକାଶ ଓ ଐତିହ୍ୟ ମନ୍ତ୍ରରେ ଚାଲିଛି । ଏବଂ ରାଜସ୍ଥାନ ଏଥିରୁ ବହୁତ ଲାଭବାନ ହେଉଛି ।

ସାଥୀମାନେ

ରାଜସ୍ଥାନ କେବଳ ବୃଦ୍ଧି ପାଉନାହିଁ ବରଂ ଭରସାଯୋଗ୍ୟ ମଧ୍ୟ। ରାଜସ୍ଥାନ ମଧ୍ୟ ଗ୍ରହଣୀୟ ଏବଂ ସମୟ କ୍ରମେ ନିଜକୁ କିପରି ସଂଶୋଧିତ କରିବାକୁ ଜାଣେ | ରାଜସ୍ଥାନ ହେଉଛି ଆହ୍ୱାନର ମୁକାବିଲା କରିବାର ନାମ, ନୂଆ ସୁଯୋଗ ସୃଷ୍ଟି କରିବାର ନାମ ହେଉଛି ରାଜସ୍ଥାନ । ଏବେ ରାଜସ୍ଥାନର ଏହି ଆର-ଫ୍ୟାକ୍ଟରରେ ଆଉ ଏକ ଦିଗ ଯୋଡ଼ି ହୋଇଛି। ରାଜସ୍ଥାନବାସୀ ବିପୁଳ ସଂଖ୍ୟାଗରିଷ୍ଠତା ସହ ବିଜେପିର ଏକ ଉତ୍ତରଦାୟୀ ଏବଂ ସଂସ୍କାରମୂଳକ ସରକାର ଗଠନ କରିଛନ୍ତି। ଖୁବ୍ କମ୍ ସମୟ ମଧ୍ୟରେ ଭଜନ ଲାଲ ଜୀ ଏବଂ ତାଙ୍କ ପୂରା ଟିମ୍ ଏଠାରେ ଚମତ୍କାର ଭାବରେ କାମ କରିଛନ୍ତି। ଆଉ କିଛି ଦିନ ମଧ୍ୟରେ ରାଜ୍ୟ ସରକାର ନିଜ ଅସ୍ତିତ୍ୱର ଏକ ବର୍ଷ ପୂରଣ କରିବାକୁ ଯାଉଛନ୍ତି । ରାଜସ୍ଥାନର ଦ୍ରୁତ ବିକାଶରେ ଭଜନ ଲାଲ ଜୀ ଏବଂ ତାଙ୍କ ଦଳ କମ ସମୟ ମଧ୍ୟରେ ଯେଉଁ ଦକ୍ଷତା ଏବଂ ପ୍ରତିବଦ୍ଧତା ସହିତ ନିୟୋଜିତ ଅଛନ୍ତି ତାହା ପ୍ରଶଂସନୀୟ । ଗରିବଙ୍କ କଲ୍ୟାଣ ହେଉ, କୃଷକ କଲ୍ୟାଣ ହେଉ, ଯୁବକମାନଙ୍କ ପାଇଁ ନୂଆ ସୁଯୋଗ ସୃଷ୍ଟି ହେଉ, ରାସ୍ତା, ବିଜୁଳି, ପାଣି ହେଉ, ରାଜସ୍ଥାନରେ ସବୁ ପ୍ରକାର ବିକାଶମୂଳକ କାର୍ଯ୍ୟ ଦ୍ରୁତ ଗତିରେ ଚାଲିଛି। ଅପରାଧ ଓ ଦୁର୍ନୀତି ନିୟନ୍ତ୍ରଣ ଦିଗରେ ସରକାର ଯେଉଁ ତତ୍ପରତା ଦେଖାଇଛନ୍ତି ତାହା ନାଗରିକ ଓ ନିବେଶକଙ୍କ ମଧ୍ୟରେ ନୂଆ ଉତ୍ସାହ ଆଣିଛି।   

ସାଥୀମାନେ

ରାଜସ୍ଥାନର ଉନ୍ନତିକୁ ଅଧିକ ଅନୁଭବ କରିବାକୁ ହେଲେ ରାଜସ୍ଥାନର ପ୍ରକୃତ ସମ୍ଭାବନାକୁ ଉପଲବ୍ଧି କରିବା ଅତ୍ୟନ୍ତ ଜରୁରୀ । ରାଜସ୍ଥାନରେ ପ୍ରଚୁର ପ୍ରାକୃତିକ ସମ୍ପଦ ରହିଛି। ରାଜସ୍ଥାନରେ ଆଧୁନିକ ଯୋଗାଯୋଗର ନେଟୱାର୍କ, ଏକ ସମୃଦ୍ଧ ଐତିହ୍ୟ, ଏକ ବିଶାଳ ଭୂଖଣ୍ଡ ଏବଂ ଏକ ଅତ୍ୟନ୍ତ ଦକ୍ଷ ଯୁବ ଶକ୍ତି ଅଛି | ଅର୍ଥାତ୍ ସଡ଼କଠାରୁ ଆରମ୍ଭ କରି ରେଳବାଇ, ଆତିଥେୟତାଠାରୁ ଆରମ୍ଭ କରି ହସ୍ତଶିଳ୍ପ, ଚାଷ ଜମିଠାରୁ ଦୁର୍ଗ ପର୍ଯ୍ୟନ୍ତ, ରାଜସ୍ଥାନରେ ଅନେକ କିଛି ରହିଛି। ରାଜସ୍ଥାନର ଏହି ସମ୍ଭାବନା ରାଜ୍ୟକୁ ପୁଞ୍ଜିନିବେଶ ପାଇଁ ଏକ ଅତ୍ୟନ୍ତ ଆକର୍ଷଣୀୟ ସ୍ଥାନ ରେ ପରିଣତ କରିଛି । ରାଜସ୍ଥାନର ଆଉ ଏକ ବୈଶିଷ୍ଟ୍ୟ ରହିଛି । ରାଜସ୍ଥାନରେ ଶିକ୍ଷାର ଗୁଣବତ୍ତା, ସାମର୍ଥ୍ୟ ବଢ଼ାଇବାର ଗୁଣ ରହିଛି। ଆଉ ସେଥିପାଇଁ ଏବେ ବାଲୁକା ପଡ଼ିଆରେ ମଧ୍ୟ ଗଛରେ ଫଳ ଭର୍ତ୍ତି ହେଉଛି, ଥିବାରୁ ଅଲିଭ୍ ଓ ଜାଟ୍ରୋପା ଚାଷ ବଢ଼ିବାରେ ଲାଗିଛି। ଜୟପୁରର ନୀଳ ମାଟିପାତ୍ର, ପ୍ରତାପଗଡ଼ର ଥେଭା ଗହଣା ଏବଂ ଭିଲୱାଡାରୁ ଟେକ୍ସଟାଇଲ ଇନୋଭେସନ… ସେମାନଙ୍କର ଏକ ଭିନ୍ନ ଗୌରବ ରହିଛି। ମକ୍ରାନାର ମାର୍ବଲ ଏବଂ କୋଟା ଡୋରିଆ ସମଗ୍ର ବିଶ୍ୱରେ ପରିଚିତ । ନାଗୌରରେ, ନାଗୌର ପାନ ମେଥିର ସୁଗନ୍ଧ ମଧ୍ୟ ନିଆରା । ଆଉ ଆଜିର ବିଜେପି ସରକାର, ପ୍ରତ୍ୟେକ ଜିଲ୍ଲାର ସାମର୍ଥ୍ୟକୁ ଚିହ୍ନି କାମ କରୁଛନ୍ତି ।

ସାଥୀମାନେ

ଆପଣମାନେ ମଧ୍ୟ ଜାଣନ୍ତି ଯେ ଭାରତର ଖଣିଜ ଭଣ୍ଡାରର ଏକ ବଡ଼ ଅଂଶ ରାଜସ୍ଥାନରେ ରହିଛି । ଏଥିରେ ଜିଙ୍କ, ସିସା, ତମ୍ବା, ମାର୍ବଲ, ଚୂନପଥର, ଗ୍ରାନାଇଟ୍, ପୋଟାସ ଭଳି ଅନେକ ଖଣିଜ ପଦାର୍ଥ ରହିଛି। ଏହା ହେଉଛି ଆତ୍ମନିର୍ଭର ଭାରତର ମଜଭୁତ ଭିତ୍ତିଭୂମି। ଭାରତର ଶକ୍ତି ନିରାପତ୍ତା କ୍ଷେତ୍ରରେ ରାଜସ୍ଥାନର ପ୍ରମୁଖ ଯୋଗଦାନ ରହିଛି। ଏହି ଦଶନ୍ଧି ଶେଷ ସୁଦ୍ଧା ଭାରତ ୫୦୦ ଗିଗାୱାଟ ଅକ୍ଷୟ ଶକ୍ତି କ୍ଷମତା ସୃଷ୍ଟି କରିବାକୁ ଲକ୍ଷ୍ୟ ରଖିଛି। ଏଥିରେ ମଧ୍ୟ ରାଜସ୍ଥାନର ବଡ଼ ଭୂମିକା ରହିଛି। ଭାରତର ଅନେକ ବୃହତ୍ତମ ସୌର ପାର୍କ ଏଠାରେ ନିର୍ମାଣ କରାଯାଉଛି ।

ସାଥୀମାନେ

ରାଜସ୍ଥାନ ଅର୍ଥନୀତିର ଦୁଇଟି ପ୍ରମୁଖ କେନ୍ଦ୍ର ଯଥା ଦିଲ୍ଲୀ ଓ ମୁମ୍ବାଇକୁ ସଂଯୋଗ କରୁଛି। ଏହା ରାଜସ୍ଥାନ, ମହାରାଷ୍ଟ୍ର ଏବଂ ଗୁଜରାଟ ବନ୍ଦରକୁ ଉତ୍ତର ଭାରତ ସହିତ ସଂଯୋଗ କରୁଛି । ଦେଖନ୍ତୁ, ଦିଲ୍ଲୀ-ମୁମ୍ବାଇ ଇଣ୍ଡଷ୍ଟ୍ରିଆଲ କରିଡରର ୨୫୦ କିଲୋମିଟର ରାଜସ୍ଥାନରେ ରହିଛି । ଏହା ଦ୍ୱାରା ରାଜସ୍ଥାନର ଅଲୱାର, ଭରତପୁର, ଦୌସା, ସୱାଇ ମାଧୋପୁର, ଟଙ୍କ, ବୁନ୍ଦି ଏବଂ କୋଟା ଜିଲ୍ଲା ବହୁତ ଉପକୃତ ହେବେ । ଡେଡିକେଟେଡ୍ ଫ୍ରେଟ୍ କରିଡର ଭଳି ୩୦୦ କିଲୋମିଟର ଆଧୁନିକ ରେଳ ନେଟୱାର୍କ ରାଜସ୍ଥାନରେ ଅଛି । ଏହି କରିଡର ଜୟପୁର, ଆଜମେର, ସିକର, ନାଗୌର ଏବଂ ଅଲୱାର ଜିଲ୍ଲା ଦେଇ ଯାଇଥାଏ । ଏଭଳି ବୃହତ୍ ଯୋଗାଯୋଗ ପ୍ରକଳ୍ପର କେନ୍ଦ୍ର ହୋଇଥିବାରୁ ରାଜସ୍ଥାନ ହେଉଛି ପୁଞ୍ଜିନିବେଶ ପାଇଁ ସର୍ବୋତ୍ତମ ଗନ୍ତବ୍ୟସ୍ଥଳ। ବିଶେଷ କରି ଶୁଖିଲା ବନ୍ଦର ଓ ଲଜିଷ୍ଟିକ୍ କ୍ଷେତ୍ର ପାଇଁ ଏଠାରେ ପ୍ରଚୁର ସମ୍ଭାବନା ରହିଛି। ଆମେ ଏଠାରେ ଏକ ମଲ୍ଟି-ମୋଡାଲ ଲଜିଷ୍ଟିକ୍ ପାର୍କ ବିକଶିତ କରୁଛୁ । ଏଠାରେ ପ୍ରାୟ ଦୁଇ ଡର୍ଜନ ସେକ୍ଟର ନିର୍ଦ୍ଦିଷ୍ଟ ଶିଳ୍ପ ପାର୍କ ନିର୍ମାଣ କରାଯାଉଛି। ୨ଟି ଏୟାର କାର୍ଗୋ କମ୍ପ୍ଲେକ୍ସ ମଧ୍ୟ ନିର୍ମାଣ କରାଯାଇଛି। ଏହାଦ୍ୱାରା ରାଜସ୍ଥାନରେ ଶିଳ୍ପ ପ୍ରତିଷ୍ଠା କରିବା ସହଜ ହେବ ଏବଂ ଶିଳ୍ପ ସଂଯୋଗ ମଧ୍ୟ ଉନ୍ନତ ହେବ ।

ସାଥୀମାନେ

ଭାରତର ସମୃଦ୍ଧ ଭବିଷ୍ୟତରେ ଆମେ ପର୍ଯ୍ୟଟନର ବିପୁଳ ସମ୍ଭାବନା ଦେଖୁଛୁ । ଭାରତରେ ପ୍ରକୃତି, ସଂସ୍କୃତି, ଦୁଃସାହସିକତା, ସମ୍ମିଳନୀ, ଡେଷ୍ଟିନେସନ୍ ୱେଡିଂ ଏବଂ ଐତିହ୍ୟ ପର୍ଯ୍ୟଟନର ପ୍ରଚୁର ସମ୍ଭାବନା ରହିଛି। ରାଜସ୍ଥାନ ଭାରତର ପର୍ଯ୍ୟଟନ ମାନଚିତ୍ରର ମୁଖ୍ୟ କେନ୍ଦ୍ର । ଇତିହାସ, ଐତିହ୍ୟ, ବିଶାଳ ମରୁଭୂମି ଏବଂ ସୁନ୍ଦର ହ୍ରଦ ମଧ୍ୟ ରହିଛି । ଏଠାକାର ଗୀତ, ସଙ୍ଗୀତ ଓ ଖାଦ୍ୟପେୟ ତାଙ୍କ ପାଇଁ କିଛି କହିନଥାଏ। ଭ୍ରମଣ, ପର୍ଯ୍ୟଟନ ଏବଂ ଆତିଥେୟତା କ୍ଷେତ୍ରକୁ ଯାହା ବି ଦରକାର, ତାହା କେବଳ ରାଜସ୍ଥାନରେ ଅଛି । ବିବାହ ଭଳି ଜୀବନର ମୁହୂର୍ତ୍ତକୁ ସ୍ମରଣୀୟ କରିବା ପାଇଁ ଲୋକମାନେ ରାଜସ୍ଥାନ କୁ ଆସିବାକୁ ଚାହାଁନ୍ତି, ସେଥିମଧ୍ୟରୁ ରାଜସ୍ଥାନ ଅନ୍ୟତମ । ରାଜସ୍ଥାନରେ ବନ୍ୟପ୍ରାଣୀ ପର୍ଯ୍ୟଟନ ପାଇଁ ମଧ୍ୟ ବହୁତ ସୁଯୋଗ ରହିଛି। ରଣଥମ୍ବୋର ହେଉ, ସରିସ୍କା ହେଉ, ମୁକୁନ୍ଦରା ହିଲ୍ସ ହେଉ, କେଓଲାଦେଓ ହେଉ, ଏମିତି ଅନେକ ସ୍ଥାନ ରହିଛି, ଯେଉଁମାନେ ବନ୍ୟଜନ୍ତୁଙ୍କୁ ପସନ୍ଦ କରୁଥିବା ଲୋକ ଅଛନ୍ତି ସେମାନଙ୍କ ପାଇଁ ସ୍ୱର୍ଗ। ମୁଁ ଖୁସି ଯେ ରାଜସ୍ଥାନ ସରକାର ଏହାର ପର୍ଯ୍ୟଟନସ୍ଥଳୀ, ଐତିହ୍ୟ କେନ୍ଦ୍ରଗୁଡ଼ିକୁ ଉନ୍ନତ ସଂଯୋଗ ସହିତ ସଂଯୋଗ କରୁଛନ୍ତି । ଭାରତ ସରକାର ମଧ୍ୟ ପ୍ରାୟ ଭିନ୍ନ ଭିନ୍ନ ଥିମ୍ ସର୍କିଟ୍ ସମ୍ବନ୍ଧୀୟ ଯୋଜନା ଆରମ୍ଭ କରିଛନ୍ତି। ୨୦୦୪ରୁ ୨୦୧୪ ମଧ୍ୟରେ ଗତ ୧୦ ବର୍ଷ ମଧ୍ୟରେ, ଭାରତକୁ ୫୦ ନିୟୁତ ବିଦେଶୀ ପର୍ଯ୍ୟଟକ ଆସିଛନ୍ତି। ତେବେ ୨୦୧୪ରୁ ୨୦୨୪ ମଧ୍ୟରେ ୭ କୋଟିରୁ ଅଧିକ ବିଦେଶୀ ପର୍ଯ୍ୟଟକ ଭାରତକୁ ଆସିଥିବା ବେଳେ ଏହି ୧୦ ବର୍ଷ ମଧ୍ୟରେ ସମଗ୍ର ବିଶ୍ୱର ୩-୪ ବର୍ଷ ହେବ କରୋନା ମୁକାବିଲାରେ ବିତିଗଲା। କରୋନା କାଳରେ ପର୍ଯ୍ୟଟନ ଠପ୍ ହୋଇଯାଇଥିଲା। ଏହା ସତ୍ତ୍ୱେ ଭାରତକୁ ଆସୁଥିବା ପର୍ଯ୍ୟଟକଙ୍କ ସଂଖ୍ୟା ଏତେ ବଢ଼ିଯାଇଛି। ଅନେକ ଦେଶର ପର୍ଯ୍ୟଟକଙ୍କୁ ଭାରତ ପକ୍ଷରୁ ଦିଆଯାଉଥିବା ଇ-ଭିସା ସୁବିଧା ବିଦେଶୀ ଅତିଥିଙ୍କୁ ବହୁତ ସାହାଯ୍ୟ କରୁଛି। ଆଜି ଘରୋଇ ପର୍ଯ୍ୟଟନ କ୍ଷେତ୍ରରେ ମଧ୍ୟ ଭାରତରେ ନୂଆ ନୂଆ ରେକର୍ଡ ସୃଷ୍ଟି କରୁଛି, ଉଡାନ ଯୋଜନା ହେଉ, ବନ୍ଦେ ଭାରତ ଟ୍ରେନ୍ ହେଉ, ପ୍ରସାଦ ଯୋଜନା ହେଉ, ଏସବୁର ଲାଭ ରାଜସ୍ଥାନକୁ ମିଳୁଛି । ଭାରତର ଭାଇବ୍ରେଣ୍ଟ ଭିଲେଜ୍ ଭଳି କାର୍ଯ୍ୟକ୍ରମରୁ ରାଜସ୍ଥାନ ମଧ୍ୟ ବହୁତ ଉପକୃତ ହେଉଛି। ମୁଁ ଦେଶବାସୀଙ୍କୁ ‘ୱେଡେ ଇନ୍ ଇଣ୍ଡିଆ’ ପାଳନ କରିବାକୁ ଆହ୍ୱାନ କରିଛି। ରାଜସ୍ଥାନ ମଧ୍ୟ ଏଥିରୁ ଲାଭବାନ ନିଶ୍ଚିତ ହେବା । ରାଜସ୍ଥାନର ଐତିହ୍ୟ ପର୍ଯ୍ୟଟନ, ଚଳଚ୍ଚିତ୍ର ପର୍ଯ୍ୟଟନ, ପରିବେଶ ପର୍ଯ୍ୟଟନ, ଗ୍ରାମୀଣ ପର୍ଯ୍ୟଟନ, ସୀମାନ୍ତ ଅଞ୍ଚଳ ପର୍ଯ୍ୟଟନ ଏହାକୁ ବୃଦ୍ଧି କରିବାର ପ୍ରଚୁର ସମ୍ଭାବନା ରହିଛି। ଏହି ସବୁ କ୍ଷେତ୍ରରେ ଆପଣଙ୍କ ନିବେଶ ରାଜସ୍ଥାନର ପର୍ଯ୍ୟଟନ କ୍ଷେତ୍ରକୁ ଶକ୍ତି ପ୍ରଦାନ କରିବ ଏବଂ ଆପଣଙ୍କ ବ୍ୟବସାୟକୁ ମଧ୍ୟ ବୃଦ୍ଧି କରିବ ।

ସାଥୀମାନେ

ଆପଣ ସମସ୍ତେ ବିଶ୍ୱ ଯୋଗାଣ ଏବଂ ମୂଲ୍ୟ ଶୃଙ୍ଖଳା ସହିତ ଜଡିତ ଆହ୍ୱାନ ଗୁଡିକ ସହିତ ପରିଚିତ । ଆଜି ବିଶ୍ଵକୁ ଏପରି ଏକ ଅର୍ଥନୀତିର ଆବଶ୍ୟକତା ରହିଛି ଯାହା ସବୁଠାରୁ ବଡ଼ ସଙ୍କଟ ସମୟରେ ମଧ୍ୟ ଦୃଢ଼ ଭାବେ ଚାଲୁଛି, ସେଥିରେ ଯେପରି କୌଣସି ବାଧା ନ ଆସୁ। ଏଥିପାଇଁ ଭାରତରେ ଏକ ବୃହତ ଉତ୍ପାଦନ ଭିତ୍ତିଭୂମି ରହିବା ଅତ୍ୟନ୍ତ ଜରୁରୀ । ଏହା କେବଳ ଭାରତ ପାଇଁ ନୁହେଁ ବରଂ ବିଶ୍ୱ ଅର୍ଥନୀତି ପାଇଁ ମଧ୍ୟ ଜରୁରୀ । ଏହି ଦାୟିତ୍ୱବୋଧକୁ ଅନୁଭବ କରି ଭାରତ ଉତ୍ପାଦନ କ୍ଷେତ୍ରରେ ଆତ୍ମନିର୍ଭରଶୀଳତା ପାଇଁ ଏକ ବଡ଼ ସଂକଳ୍ପ ନେଇଛି। ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମ ଅଧୀନରେ ଭାରତ କମ୍ ମୂଲ୍ୟର ଉତ୍ପାଦନ ଉପରେ ଗୁରୁତ୍ୱ ଦେଉଛି। ଭାରତର ପେଟ୍ରୋଲିୟମ ଉତ୍ପାଦ, ଭାରତର ଔଷଧ ଓ ଟିକା, ଭାରତର ଇଲେକ୍ଟ୍ରୋନିକ୍ ସାମଗ୍ରୀ, ଏଥିରେ ଭାରତର ରେକର୍ଡ ଉତ୍ପାଦନ ଦ୍ୱାରା ବିଶ୍ୱ ବହୁତ ଲାଭବାନ ହେଉଛି । ଗତବର୍ଷ ମଧ୍ୟ ରାଜସ୍ଥାନ ୮୪ ହଜାର କୋଟି ଟଙ୍କାର ପ୍ରାୟ ୮୪ ହଜାର କୋଟି ଟଙ୍କାର ରପ୍ତାନି କରିଥିଲା। ଏଥିରେ ଇଞ୍ଜିନିୟରିଂ ସାମଗ୍ରୀ, ରତ୍ନ ଓ ଅଳଙ୍କାର, ବୟନଶିଳ୍ପ, ହସ୍ତଶିଳ୍ପ, କୃଷି ଖାଦ୍ୟ ଉତ୍ପାଦ ଅନ୍ତର୍ଭୁକ୍ତ।

ସାଥୀମାନେ

ଭାରତରେ ଉତ୍ପାଦନ ବୃଦ୍ଧି ରେ ପିଏଲଆଇ ଯୋଜନାର ଭୂମିକା ମଧ୍ୟ କ୍ରମାଗତ ଭାବରେ ବୃଦ୍ଧି ପାଉଛି । ଆଜି ଇଲେକ୍ଟ୍ରୋନିକ୍ସ, ସ୍ପେଶାଲିଟି ଷ୍ଟିଲ, ଅଟୋମୋବାଇଲଏବଂ ଅଟୋ କମ୍ପୋନେଣ୍ଟ, ସୋଲାର ପିଭି, ଫାର୍ମାସ୍ୟୁଟିକାଲ ଔଷଧ… ଏସବୁ କ୍ଷେତ୍ରରେ ବେଶ୍ ଉତ୍ସାହ ଦେଖିବାକୁ ମିଳୁଛି। ପିଏଲଆଇ ଯୋଜନା ଯୋଗୁଁ ପ୍ରାୟ ୧.୨୫ ଲକ୍ଷ କୋଟି ଟଙ୍କା ବିନିଯୋଗ ହୋଇଛି, ପ୍ରାୟ ୧୧ ଲକ୍ଷ କୋଟି ଟଙ୍କାର ଉତ୍ପାଦ ତିଆରି ହୋଇଛି ଏବଂ ରପ୍ତାନି ୪ ଲକ୍ଷ କୋଟି ଟଙ୍କା ବୃଦ୍ଧି ପାଇଛି । ଲକ୍ଷ ଲକ୍ଷ ଯୁବକଯୁବତୀଙ୍କୁ ନୂଆ ଚାକିରି ମଧ୍ୟ ମିଳିଛି। ଏଠାରେ ରାଜସ୍ଥାନରେ ଅଟୋମୋଟିଭ୍ ଏବଂ ଅଟୋ କମ୍ପୋନେଣ୍ଟ ଇଣ୍ଡଷ୍ଟ୍ରିର ଏକ ଭଲ ବେସ୍ ପ୍ରସ୍ତୁତ କରାଯାଇଛି। ଏଠାରେ ଇଲେକ୍ଟ୍ରିକ୍ ଯାନ ଉତ୍ପାଦନ ପାଇଁ ବହୁ ସମ୍ଭାବନା ରହିଛି। ଇଲେକ୍ଟ୍ରୋନିକ୍ସ ଉତ୍ପାଦନ ପାଇଁ ଆବଶ୍ୟକ ଭିତ୍ତିଭୂମି ମଧ୍ୟ ରାଜସ୍ଥାନରେ ଉପଲବ୍ଧ । ମୁଁ ସମସ୍ତ ନିବେଶକମାନଙ୍କୁ ଅନୁରୋଧ କରିବି, ମୁଁ ସମସ୍ତ ଏନଭେଷ୍ଟରସଙ୍କୁ ଅନୁରୋଧ କରିବି, ଉତ୍ପାଦନ କ୍ଷମତା ଅନୁସନ୍ଧାନ କରିବାକୁ ଅନୁରୋଧ କରିବାକୁ ଚାହେଁ ।

ସାଥୀମାନେ

ଉଦୀୟମାନ ରାଜସ୍ଥାନରେ ଏକ ବିରାଟ ଶକ୍ତି ହେଉଛି- ଏମଏସଏମଇ । ଏମଏସଏମଇ କ୍ଷେତ୍ରରେ ରାଜସ୍ଥାନ ଭାରତର ଶ୍ରେଷ୍ଠ ୫ଟି ରାଜ୍ୟ ମଧ୍ୟରୁ ଅନ୍ୟତମ । ଏହି ଶିଖର ସମ୍ମିଳନୀରେ ଏମଏସଏମଇ ଉପରେ ଏକ ପୃଥକ କନକ୍ଲେଭ ମଧ୍ୟ ହେବାକୁ ଯାଉଛି । ରାଜସ୍ଥାନର ୨୭ ଲକ୍ଷରୁ ଅଧିକ କ୍ଷୁଦ୍ର ଶିଳ୍ପ ଏବଂ ଲଘୁ ଉଦ୍ୟୋଗ, ଲଘୁ ଉଦ୍ୟୋଗରେ କାମ କରୁଥିବା ୫୦ ଲକ୍ଷରୁ ଅଧିକ ଲୋକ, ରାଜସ୍ଥାନର ଭାଗ୍ୟ ବଦଳାଇବାର ସମ୍ଭାବନା ରଖିଛନ୍ତି। ମୁଁ ଖୁସି ଯେ ରାଜସ୍ଥାନରେ ନୂଆ ସରକାର ଗଠନ ହେବା ମାତ୍ରେ ଅଳ୍ପ ସମୟ ମଧ୍ୟରେ ନୂଆ ଏମଏସଏମଇ ନୀତି ଆରମ୍ଭ ହୋଇଛି । ଭାରତ ସରକାର ମଧ୍ୟ ନିଜର ନୀତି ଓ ନିଷ୍ପତି ଦ୍ୱାରା ଏମଏସଏମଇକୁ କ୍ରମାଗତ ଭାବେ ସୁଦୃଢ଼ କରୁଛନ୍ତି । ଭାରତର ଏମଏସଏମଇ କେବଳ ଭାରତରେ ନୁହେଁ ବରଂ ବିଶ୍ୱ ଯୋଗାଣ ଏବଂ ମୂଲ୍ୟ ଶୃଙ୍ଖଳାକୁ ସଶକ୍ତ କରିବାରେ ମଧ୍ୟ ଏକ ବଡ ଭୂମିକା ଗ୍ରହଣ କରୁଛି । କରୋନା ସମୟରେ ଆମେ ଦେଖିଥିଲୁ, ଯେତେବେଳେ ବିଶ୍ୱରେ ଫାର୍ମା ସମ୍ବନ୍ଧୀୟ ଯୋଗାଣ ଶୃଙ୍ଖଳା ସଙ୍କଟରେ ପଡ଼ିଥିଲା, ସେତେବେଳେ ଭାରତର ଫାର୍ମା ସେକ୍ଟର ବିଶ୍ୱକୁ ସାହାଯ୍ୟ କରିଥିଲା। ଭାରତର ଫାର୍ମା ସେକ୍ଟର ବହୁତ ଶକ୍ତିଶାଳୀ ହୋଇଥିବାରୁ ଏହା ସମ୍ଭବ ହୋଇପାରିଛି । ସେହିଭଳି ଭାରତକୁ ଅନ୍ୟାନ୍ୟ ଉତ୍ପାଦ ଉତ୍ପାଦନ ପାଇଁ ମଧ୍ୟ ଏକ ମଜଭୁତ ଭିତ୍ତିଭୂମି କରିବାକୁ ହେବ। ଏବଂ ଆମର ଏମଏସଏମଇ ମାନେ ଏଥିରେ ଏକ ବଡ ଭୂମିକା ଗ୍ରହଣ କରିବାକୁ ଯାଉଛନ୍ତି ।

ସାଥୀମାନେ

ଆମ ସରକାର ଏମଏସଏମଇର ସଂଜ୍ଞାପରିବର୍ତ୍ତନ କରିଛନ୍ତି ଯାହାଦ୍ୱାରା ସେମାନେ ଅଭିବୃଦ୍ଧି ପାଇଁ ଅଧିକ ସୁଯୋଗ ପାଇପାରିବେ । କେନ୍ଦ୍ର ସରକାର ପ୍ରାୟ ୫ କୋଟି ଏମଏସଏମଇକୁ ଆନୁଷ୍ଠାନିକ ଅର୍ଥନୀତି ସହ ଯୋଡ଼ିଛନ୍ତି । ଫଳରେ ଏହି ଶିଳ୍ପଗୁଡ଼ିକ ପାଇଁ ଋଣ ପାଇବା ସହଜ ହୋଇଛି। ଆମେ ଏକ କ୍ରେଡିଟ୍ ଗ୍ୟାରେଣ୍ଟି ଲିଙ୍କ୍ ସ୍କିମ୍ ମଧ୍ୟ ସୃଷ୍ଟି କରିଛୁ। ଏହା ଅଧୀନରେ କ୍ଷୁଦ୍ର ଶିଳ୍ପଗୁଡ଼ିକୁ ପାଖାପାଖି ୭ ଲକ୍ଷ କୋଟି ଟଙ୍କା ଦିଆଯାଇଛି। ଗତ ଏକ ଦଶନ୍ଧି ମଧ୍ୟରେ ଏମଏସଏମଇଗୁଡ଼ିକୁ ଋଣ ପ୍ରବାହ, ଦୁଇ ଗୁଣରୁ ଅଧିକ ବୃଦ୍ଧି ପାଇଛି । ୨୦୧୪ରେ ଏହା ପ୍ରାୟ ୧୦ ଲକ୍ଷ କୋଟି ଟଙ୍କା ଥିବା ବେଳେ ଆଜି ଏହା ୨୨ ଲକ୍ଷ କୋଟି ଟପିଛି। ରାଜସ୍ଥାନ ମଧ୍ୟ ଏହାର ବହୁତ ବଡ ଲାଭ ପ୍ରମୁଖ ଫାଇଦା ଉଠାଇଛି। ଏମଏସଏମଇର ଏହି ବଢୁଥିବା ଶକ୍ତି, ରାଜସ୍ଥାନର ବିକାଶକୁ ଏକ ନୂତନ ଉଚ୍ଚତାକୁ ନେଇଯିବ ।

ସାଥୀମାନେ

ଆତ୍ମନିର୍ଭର ଭାରତର ଏକ ନୂଆ ଯାତ୍ରା ଆରମ୍ଭ କରିଛୁ। ଆତ୍ମନିର୍ଭର ଭାରତର ଅଭିଯାନ, ଏହି ପରିକଳ୍ପନା ବିଶ୍ୱସ୍ତରୀୟ ଏବଂ ଏହାର ପ୍ରଭାବ ମଧ୍ୟ ବିଶ୍ୱସ୍ତରୀୟ । ସରକାରୀ ସ୍ତରରେ ଆମେ, ସମଗ୍ର ସରକାରୀ ଆଭିମୁଖ୍ୟ ନେଇ ଆଗକୁ ବଢ଼ୁଛୁ। ଶିଳ୍ପ ଅଭିବୃଦ୍ଧି ପାଇଁ ଆମେ ପ୍ରତ୍ୟେକ କ୍ଷେତ୍ରକୁ, ପ୍ରତ୍ୟେକ ଅଂଶକୁ ଏକାଠି ପ୍ରୋତ୍ସାହିତ କରୁଛୁ। ମୋର ବିଶ୍ୱାସ ଯେ ‘ସବକା ପ୍ରୟାସ’ର ଏହି ଭାବନା ଏକ ବିକଶିତ ରାଜସ୍ଥାନ ଗଠନ କରିବ ଏବଂ ଏକ ବିକଶିତ ଭାରତ ଗଠନ କରିବ ।

ସାଥୀମାନେ

ଦେଶ ବିଦେଶରୁ ଅନେକ ପ୍ରତିନିଧି ଏଠାକୁ ଆସିଛନ୍ତି, ଏହା ଅନେକ ବନ୍ଧୁଙ୍କର ପ୍ରଥମ ଭାରତ ଗସ୍ତ ହେବ, ବୋଧହୁଏ ସେମାନଙ୍କର ପ୍ରଥମ ରାଜସ୍ଥାନ ଗସ୍ତ ମଧ୍ୟ ହେବ । ଶେଷରେ, ମୁଁ ଏହା କହିବି ଯେ ଘରକୁ ଫେରିବା ପୂର୍ବରୁ ଆପଣ ରାଜସ୍ଥାନକୁ , ଭାରତକୁ ନିଶ୍ଚିତ ଭାବରେ ଅନ୍ଵେଷଣ କରନ୍ତୁ । ରାଜସ୍ଥାନର ରଙ୍ଗୀନ ବଜାରର ସପିଂ ଅନୁଭୂତି, ଏଠାକାର ଲୋକଙ୍କ ହସଖୁସିଆ ମନୋଭାବକୁ ରହସ୍ୟକୁ ଆପଣ କେବେ ଭୁଲିପାରିବେ ନାହିଁ । ପୁଣି ଥରେ ଆପଣ ସମସ୍ତ ନିବେଶକଙ୍କୁ ରାଇଜିଂ ରାଜସ୍ଥାନର ସଂକଳ୍ପ ପାଇଁ , ଆପଣ ସମସ୍ତଙ୍କୁ ବହୁତ ବହୁତଶୁ ଭକାମନା ।

ଧନ୍ୟବାଦ।

*****

NS/SLP