ভারতকী প্রধানমন্ত্রী
ভারতনা G20গী প্রসিদেন্সী লৌরিবা অসি মালেমগী ওইবা ইসু কয়া অমা শেমগৎপদা লৈবাক অসিনা মতেং পাংলিবা অসি য়াম্না মরু ওইবা তাঞ্জা অমনি। মখোয়শিং অসিগী মনুংদা মল্তিলেতরেল দিবেলপমেন্ত বেঙ্কশিং শেমদোকপা, অফ্রিকান য়ুনিয়ন য়াওহনবা অমসুং ক্লাইমেৎ এক্সনদা মীৎয়েং থম্বা য়াওরি। চহি অসিদা G20বু মাংলোমদা পুখৎলক্লিবা মরুওইবা মীশক অমা ওইনা, প্রধান মন্ত্রী নরেন্দ্র মোদীনা গ্লোবেল সাউথকী অৱাবা মায়োক্নবদা ভারতনা মরুওইবা থৌদাং অমা লৌবা ঙম্লে।
G20 লিদর্স সম্মিৎকী নুমিৎ খরনিগী মমাংদা লোক কল্যান মার্গ 7দা লৈবা মহাক্কী পাক চাউবা, ফজরবা ওফিসতা বিজিনেস তুদেগা লোয়ননা মিনিত 40গী মতম শাংবা এক্সক্লুসিব ওইবা ৱারী ৱাতায় শাবদা, মোদীনা – নীংথিজরবা ফিরোল শেৎ-চাদুনা অমসুং য়াম্না চিং লেম্না -ভারতনা মালেমগী অৱাবা মফমশিংদা মতেং পাংবগী খুদোংচাবা লৈবগী মতাংদা পুক্নিং চিংশিন্দুনা ৱা ঙাংখি। লৈবাক অসিগী দিজিতেল পব্লিক ইনফ্রাস্ত্রকচর অসি মালেমগী থোইদোক হেন্দোকপা মফম অমা, ভারত অসি পোতেন্সিএল মেন্যুফেকচরিং হব অমা অমসুং অতোপ্পা কয়া অমা ওইরকখি।
Q: G20গী ভারতকী প্রসিদেন্সী অসি ইন্তর্নেস্নেল এজেন্সীশিংনা ভারতকী শেন্মিৎলোনগী গ্রোথ পোতেন্সিএলগী মতাংদা থাজবা থম্লিবা মতম অসিদা লাক্লি। অদোমগী মীৎয়েংদা G20 সম্মিৎ অসিনা ভারতপু ইকনোমিক পাৱর অমা ওইনা অমসুং মালেমগী ইকনোমিক প্লেৎফোর্মশিংদা থাজবা য়াবা ভোইস অমা ওইনা মীংচৎ হেনগৎহনবদা মতেং পাংগদৌরিব্রা?
A: লৈবাক অমগী ইমেজ অমসুং মাগী ব্রান্দিং অসি সম্মিৎ অমগী খুত্থাংদা মপাঙ্গল কনখৎহনবা ঙমগনি হায়না ঐনা থাজদে। শেল-থুমগী মালেম অসি অরুবা ফেক্তশিংদা য়ুম্ফম ওইদুনা থবক তৌই। মসিনা পার্ফোমেন্সতা থবক তৌই অদুগা পর্সেপ্সন্দা নত্তে।
ভারতনা কোবিদ-19গী লাইচৎ অসি থেংনবা ঙম্বা অমসুং অতৈ লৈবাকশিংবু মতেং পাংখিবা, ঐখোয়গী শেন্মিৎলোনবু খোংজেল য়াংনা চাউখৎপা ওইহন্নবা ঐখোয়না হোৎনখিবা, ঐখোয়গী শেল-থুম অমসুং বেঙ্কিং সিস্তেম্না মপাঙ্গল কনখৎলকপা, ঙসি মালেম অসিনা ভারতকী খোঙচৎ অদু খঙলে। মরম অদুনা, মীফম অমা ইমেজ শেমগৎপগী প্রিজমগী থোংদা য়েংবনা ভারতকী গ্রোথকী ৱারীবু মাঙহল্লি।
G20 সম্মিৎ অসি মালেমগী ওইবা মওংদা য়েংবা তাই। কোবিদ-19গী লাইচৎ মনুংদা অমসুং মসিগী মতুংদা, মালেম অসি অৱাবা কয়া মায়োক্নখি অমসুং মহৌশানা G20গী লৈবাকশিংগী কাঙলুপনসু অৱাবা কয়া মায়োক্নখি।
G20গী লৈবাকশিংনা বিলিয়ন অমসুং ত্রিলিয়ন কয়াগী মতাংদা ঙাংবদা ইম্পেক্ত লৈতে অমসুং হ্যুমেন-সেন্ত্রিক দিবেলপমেন্ততা মীৎয়েং থমগদবনি হায়নসু খল্লি।
ঐহাক্কী এক্সপরিয়েন্সনা তাক্লি মদুদি G20গী ঐখোয়গী প্রসিদেন্সীগী মতমদা খন্ন-নৈনবগী থৌওং অসি চৎথরি। মীফম অমসুং খন্ন-নৈনবগী থৌরম কয়াদা ঐখোয়না অনৌবা মীৎয়েং অমা উবা ফংদুনা অরিবা থাক্তা লৈরম্বা ফিরেপশিংদগী হোংলকপা উবা ফংখি।
চাউখৎলবা লৈবাকশিং অমসুং চাউখৎলক্লিবা লৈবাকশিং অসিনা অহানবা ওইনা পুন্না চৎমিন্নগনি অমসুং মালেমগী ওইবা সমস্যাশিংগী সোলুসনশিং পুথোক্কনি। ঐখোয়না অফ্রিকান য়ুনিয়নবু কৌদুনা ইনক্লুসিবিতীগী য়ুম্ফম থোনখ্রে।
ঐখোয়গী G20 প্রসিদেন্সীদা শরুক য়াবগী চাং অসি মমাংদা অমুক্তা ওইখিদ্রি অমসুং শরুক য়ারিবা মীওইশিংগী অপুনবগী ওইবা ৱাখল্লোন অসি মমাংদা অমুক্তা ওইখিদ্রি। ঐহাক্না থাজবা থম্লি মদুদি মসিনা মায় পাকপা পুরক্কনি, মসি লৈবাক পুম্বনা শরুক য়াদুনা ঙমহনগনি।
ভারত অমসুং ভারতকী G20না অনৌবা মালেমগী ওইবা চৎন-কাঙলোনগীদমক কেতালাইতিক এজেন্ত অমা ওইনা থবক তৌগনি।
Q: অদোমগী সরকারনা G20গী ভারতকী প্রসিদেন্সী শেম্বদা ইনর্জী য়াম্না থাদখ্রে। ভারতকী প্রসিদেন্সীগী অরোইবা শরুক্তা অদোম্না ফংলক্কদবা মরুওইবা মহৈশিং অদু করি করিনো?
A: ভারতনা হোৎনরিবশিং অদু য়েংবগীদমক্তা ঐহাক্না অদোমগী মফমদা থাগৎপা ফোংদোকচরি। ঙসিদি, রিফোর্মশিং লৈতবনা, মল্তিলেতরেল ইন্সতিত্যুসনশিংনা মালেম শীনবা থুংনা ক্রেদিবিলিতী অমসুং থাজবা মাঙশিল্লি। অমরোমদা, অপীকপা কাঙলুপ কয়া অমা থোরক্লি।
মালেমনা G20না মল্তিলেতরেল ইন্সতিত্যুসনশিংগী মতাংদা ঙসি লৈরিবা ভেক্যুম অদু মেনখৎনবা করম্না শেমগৎলিবগে হায়বদু য়েংলি। মালেমনা G20বু মালেমদা থৌনা পীবা শক্তি অমা ওইনা থোরক্নবা অমসুং মীওইবা খুন্নাইগী তুংলমচৎ শেমগৎনবা পোলিসীশিং শেমগৎপদা মতেং পাংনবা মীৎয়েং থম্লি। G20 কাংলুপ অসি মালেমনা আশাগী মঙাল অমা ওইনা উরি অমসুং মসিগীদমক ভারতনা G20গী প্রসিদেন্সী পায়রি। তৌখিবা থবকশিং অমসুং থাজবা থম্লিবা মহৈশিং অসি পুম্নমক তুংলমচৎকীনি।
G20 অসিনা গ্লোবেল সাউথকী ৱা ঙাংলিবা অমসুং শীংনবশিং অদু উৎলি। G20 অসিনা নুপীশিংনা লুচিংবা চাউখৎ-থৌরাংগী খোঙজেল য়াংখৎহল্লি। তেক্নোলোজীনা তুংলমচৎতা অচৌবা থৌদাং অমা লৌগদৌরিবা অসিদা, G20 অসিনা AI অমসুং DPI [দিজিতেল পব্লিক ইনফ্রাস্ত্রকচর]গী লমদা চাউনা খুমাং চাউশিল্লি।
ভারতনা G20গী প্রসিদেন্সী পায়রকপা অসিনা লমদম অসিদা অহোংবা পুরক্নবা গ্রীন ইনিসিএতিবশিংগী মওংদা ৱান আর্থকী মায়কৈদা মতেং পাংগনি।
ভারতনা G20গী প্রসিদেন্সী লৌরকপা অসিনা ইনক্লুসিব অমসুং হোলিস্তিক গ্রোথকী মায়কৈদা পুৱারী ওইরবা হোৎনবা কয়াগী মওংদা ৱান ফেমিলীগী মায়কৈদা মতেং পাংগনি।
ভারতনা G20গী প্রসিদেন্সী পায়রকপা অসিনা গ্লোবেল সাউথকী ৱা ঙাংবগা লোয়ননা AI অমসুং DPI গী মওংদা তেক্নোলোজীগী লমদা তেংবাং পীনবদা অচৌবা খোঙথাং লৌখৎতুনা ৱান ফ্যুচরগী মায়কৈদা মতেং পাংগনি।
“G20 অসিনা গ্লোবেল সাউথকী ৱা ঙাংলিবা অমসুং শীংনবশিং অদু উৎলি। G20 অসিনা নুপীশিংনা লুচিংবা চাউখৎ-থৌরাংগী খোঙজেল য়াংখৎহল্লি। তেক্নোলোজীনা তুংগী মতমদা অচৌবা থৌদাং অমা লৌগদৌরিবা অসিদা, G20 অসিনা AI অমসুং DPI [দিজিতেল পব্লিক ইনফ্রাস্ত্রকচর]গী লমদা চাউনা খুমাং চাউশিল্লি”।
Q: এক্সত্রিম ৱেদর ইভেন্তশিং অমসুং ক্লাইমেৎ চেঞ্জ থেংনবগী তঙাইফদবা অসি মালেমগী ওইবা ইসু অমা ওইরকপগা লোয়ননা, G20দা অদোম্না করি খুমাং চাউশিনবা পুরকপা পাম্বিবগে?
A: মীওইবনা ঐখোয় ইশামক্না মসিগী প্রোব্লেম অসিগী হৌরকফম্নি হায়বা য়াগদবনি। হোয়, মখল কয়াগী ময়েক লারবা ৱাফমশিং লৈরি। হৌজিক ওইরিবা ফীভম অসিগীদমক অতোপ্পশিংদগী হেন্না থৌদাং লৈবা মীওইশিং লৈরি। অদুবু ঐখোয়না মীওইবনা গ্রহ অসিদা পীরিবা ইথিলগী অশেংবা মশক অদু খঙবা তাই। ঐখোয়না মসিবু মপুং ফানা য়াবা নুমিত্তা, ৱাফম অসি অৱাবা নত্ত্রগা প্রোব্লেম অমা ওইনা উররোই। তেক্নোলোজীগী খুত্থাংদা ওইরবসু, পুন্সি মহিংগী খুত্থাংদা ওইরবসু, ঐখোয়না খুদক্তা সোলুসনশিং থিগনি।
ঙসিদি, মালেম অসিদা মসিগী ৱাফম অসিগা মরী লৈননা অথিংবা পীনবা ৱাখল্লোন অমা লৈরি। লিমিতেসনশিংগী মতাংদা ৱা ঙাংলি অমসুং ক্লাইমেৎ এক্সনশিংগী মতাংদা ক্রিতিসিজমগী ফীভম অমা লৈরি। মরম অদুনা ক্লাইমেৎ এক্সনগী মতাংদা লৈবাকশিংগী মরক্তা অয়েৎপা লৈ। করিগুম্বা পাংথোক্কদৌরিবা অদুগী মহুত্তা করি তৌরোইদগে হায়বদুদা মীৎয়েং থমদুনা শক্তি পুম্নমক শীজিন্নরবদি, অসিগুম্বা থৌওং অসিনা থবক পাংথোকপা ঙমহল্লোই।
মসিগী মথক্তা, খায়দোক্লবা মালেম অমনা মান্নবা শীংনববু মায়োক্নবা ঙম্লোই। মরম অসিনা G20 প্রসিদেন্সীগী মতমদা অমসুং অতোপ্পা মতমদা ঐখোয়গী এপ্রোচ অসি মালেম অসিবু মসিগী হীরম অসিদা অমত্তা ওইনা পুনশিন্নবা অমসুং করি তৌবা য়াবগে হায়বসিনি।
লায়রবশিং অমসুং গ্রহ অনিমকপু মতেং পাংবা মথৌ তাই। ভারতনা মসিগী মায়কৈদা অফবা ৱাখল্লোন অমগা লোয়ননা খোঙজেল য়াংনা চংশিল্লি। ঐখোয়গী ‘ৱার্ল্দ ৱান, ৱান সন, ৱান গ্রিদ’কী খোঙথাং অসিসু অসিগুম্বা পোজিতিব ওইবা খোঙথাং অমনি।
ৱাখল্লোন অসি থবক ওইনা পাংথোক্নবা হোৎনবা মথৌ তাই। তেক্নোলোজী ত্রান্সফর তৌদ্রবদি, লায়রবা লৈবাকশিংনা অইং-অশা হোংলকপা হন্থহন্নবা করম্না থবক তৌগনি? করিগুম্বা ক্লাইমেৎ ফাইনান্সিং মতিক চানা লৈত্রবদি, লায়রবা লৈবাকশিংনা ক্লাইমেৎ চেঞ্জ হন্থহন্নবা থবক পায়খৎপা ঙমগদ্রা?
ঐখোয়গী প্রসিদেন্সীনা ক্লাইমেৎ ফাইনান্সিংগীদমক্তা রিসোর্স মোবিলাইজেসনবু প্রাইওরিতী পীরি, লৈবাক অমমমগী মথৌ তাবশিংদা ত্রাঞ্জিসনগীদমক্তা মতেং পীনবা। অনৌবা গ্রীন তেক্নোলোজীশিংগী তঙাই ফদবা অদু খঙলদুনা, ঐখোয়না কার্বোন হন্থবা সোলুসনশিং পুথোকপদা অমসুং শীজিন্নবদা প্রাইবেৎ ইনভেস্তমেন্ত পুক্নিং থৌগৎনবা ফাইনান্সিএল সোলুসনশিং, পোলিসীশিং অমসুং ইন্সেন্তিবশিংদা মরুওইবা পীরি।
G20গী প্রসিদেন্সীগী মখাদা, ভারতনা ত্রাঞ্জিসনগী মতাংদা তোঙান তোঙানবা মালেমগী পোলিসী পেলেৎ অমগীদমক এদভোকেৎ তৌরি। মসিনা লৈবাকশিংদা মখোয়গী অখন্নবা ফীভমদা য়ুম্ফম ওইদুনা কার্বোন তেক্সতগী গ্রীন তেক্নোলোজী স্তেন্দর্দ ফাওবদা তোঙান তোঙানবা প্রাইসিং অমসুং নন-প্রাইসিং স্ত্রেতেজিশিংদগী খনবগী খুদোংচাবা পীরি।
মখা তানা, ভারতকী এক্সপরিয়েন্সনা হায়রি মদুদি অশেংবা ত্রান্সফোর্মেসন অসি মীয়ামগী খোঙজংদগী, মীয়ামগী শরুক য়াবদগী লাকপা ঙম্মি। ঐখোয়গী মিসন লাইফনা লাইফস্তাইল ত্রান্সফোর্মেসনদা মীৎয়েং থমদুনা ক্লাইমেৎ চেঞ্জগী মায়োক্তা লান্থেংনরিবা অসি মাস মুভমেন্ত অমা ওইহন্নবা হোৎনরি। মীওই খুদিংমক্না মখোয়না গ্রহ অসিগী য়াইফনবা হকথেংননা অহোংবা পুরকপা ঙম্মি হায়বা খঙলকপা মতমদা, মহৈশিং অসি হেন্না ব্রোদ-বেজ ওইগনি।
“ঐখোয়গী প্রসিদেন্সীনা ক্লাইমেৎ ফাইনান্সিংগীদমক্তা রিসোর্স মোবিলাইজেসনবু প্রাইওরিতী পীরি, লৈবাক অমগী অখন্নবা মথৌ তাবশিংদা ত্রাঞ্জিসনগীদমক্তা মতেং পীনবা। ”
Q: ভারতকী G20 এজেন্দাগী শরুক অমা ওইরিবা অতোপ্পা মরুওইবা শেন-থুমগী ইসুশিংসু লৈরি, মদুদা লৈবাকশিংদা অৱাংবা থাক্কী সোভরেন দেত থেংনরিবা লৈবাকশিংগীদমক দেত রস্ত্রকচর য়াওরি। মসিগী মতাংদা খুমাং চাউশিল্লকপা অসি করিনো অমসুং ভারতকী প্রসিদেন্সীগী মতমদা হিরমশিং অসিগী মতাংদা য়ানবা পুরকপা ঙমগনি হায়না অদোম্না করম্না আশা তৌবগে?
A: লৈবাক খুদিংমক্কী ওইনা ফাইনান্সিএল দিসিপ্লিন অসি য়াম্না মরু ওই। লৈবাক খুদিংমক্না শেল-থুমগী লমদা ইনদিসিপ্লিনদগী ঙাকথোকপা অসি মখোয়গী মথৌনি। অদুবু মসিগা লোয়ননা, দেত ক্রাইসিস থোকহন্দুনা অশোইবা খুদোংচাবা লৌনবা হোৎনখিবা মীওইশিং লৈরি। হায়রিবা ফোর্সশিং অসিনা অতোপ্পা লৈবাকশিংগী অৱাবা অদুদা কেপিতালাইজ তৌই অমসুং মখোয়বু দেত ত্রাপশিংদা থুহনখি।
2021দগী হৌনা G20না লায়রবা অমসুং ময়াই ওইবা ইনকম লৈবা লৈবাকশিংদা লৈবা দেতকী খুদোংচাদবশিং কোকহন্নবা মরুওইবা পীরি। 2030 SDG এজেন্দা ফংহনবা অসি লৈবাকশিং অসিগী খুমাং চাউশিল্লকপগী মখা পোল্লি, অদুম ওইনমক, দেত সর্ভিসিংনা SDG ইনভেস্তমেন্তশিংগীদমক্তা ফিস্কল স্পেসকী অকক্নবা লৈহন্দুনা মখোয়গী হোৎনরিবশিং অদু থিংলি।
2023দা, ভারতকী প্রসিদেন্সীগী মখাদা, G20না কম্মন ফ্রেমৱার্ক্কী খুত্থাংদা দেত রিস্ত্রকচরিংদা চাউনা মতেং পাংখি। ভারতনা মাংজৌননা চত্থদ্রিঙৈ মমাংদা, চাদ খক্তনা ফ্রেমৱার্ক অসিগী মখাদা দেত রিস্ত্রকচর তৌখি। ভারতনা মীৎয়েং চংলকপগা লোয়ননা, জাম্বিয়া, ইথিওপিয়া অমসুং ঘানানা মশক থোক্না খুমাং চাউশিল্লক্লি।
ভারতনা মরুওইবা ক্রেদিতর অমা ওইনা মরুওইবা থৌদাং অমা লৌখি। কম্মন ফ্রেমৱার্ক্কী মপান্দা, G20 ফোরমশিংনা ভারত, জাপান অমসুং ফ্রান্সনা কো-প্রসিদেন্ত ওইবা কম্মিতী অমগা লোয়ননা শ্রীলঙ্কাগীদমক দেত রিস্ত্রকচরিংগী কোওর্দিনেসন তৌবদা মতেং পাংখি।
ইন্দিয়ন প্রসিদেন্সীগী মতমদা গ্লোবেল সোভরেন দেত রাউন্দ তেবল হৌদোকখি মসি IMF, ৱার্ল্দ বেঙ্ক অমসুং G20 প্রসিদেন্সীনা পুন্না চেয়র লৌখি। কম্মন ফ্রেমৱার্ক্কী মনুংদা অমসুং মপান্দা লৈরিবা মরুওইবা স্তেকহোল্দরশিংগী মরক্তা কম্ম্যুনিকেসন মপাঙ্গল কনখৎহন্নবা অমসুং কান্নবা দেত ত্রীৎমেন্তশিং লাইথোকহন্নবগীদমক মান্নবা ৱাখল্লোন অমা পোকহন্নবগী পান্দমদা রাউন্দতেবল অসি পাংথোক্লি।
Q: ক্রিপ্তোকরেন্সীগী রেগুলেসনগী মালেমগী ফ্রেমৱার্ক অমগী মতাংদা ৱা ঙাংখ্রে। মসিগী মতাংদা খুমাং চাউশিল্লক্লিবা অসি করিনো?
A: তেক্নোলোজিগী অঙকপা খোঙজেল অসি তশেংনমক্কী ওইরক্লি। মসি খঙহন্দবা নৎত্রগা মসিদগী লাপথোক্নবা হায়রবদি কান্নবা লৈতে। মদুগী মহুত্তা, এদোপ্সন, দেমোক্রেতাইজেসন অমসুং য়ুনিফাইদ এপ্রোচতা মীৎয়েং থমগদবনি। মসিগা লোয়ননা মসিগী অকোয়বদা লৈরিবা কাংলোনশিং, রেগুলেসনশিং অমসুং ফ্রেমৱার্কশিং অসি লৈবাক অমখক্তগী নৎত্রগা লৈবাকশিংগী কাংলুপ খক্তগী ওইবা য়াবা নত্তে।
মরম অদুনা ক্রিপ্তো খক্তমক নত্তনা, হৌগৎলক্লিবা তেক্নোলোজী খুদিংমক মালেমগী ফ্রেমৱার্ক অমসুং রেগুলেসন অমা মথৌ তাই।
গ্লোবেল কন্সেন্সসতা য়ুম্ফম ওইবা মোদেল অমা মথৌ তাই, মরুওইনা গ্লোবেল সাউথকী অৱাবা য়েংলিবা মোদেল অমা। ঐখোয়না এভিএসনগী লমদগী তমজবা য়াই। এয়র ত্রাফিক কন্ত্রোল নৎত্রগা এয়র সেক্যুরিতী ওইগেরা, সেক্তর অসিদা চৎনগদবা মালেমগী চৎন-কাঙলোন অমসুং রেগুলেসনশিং লৈ।
হৌখিবা থা মাপলঅসিদা, কন্না হোৎনখিবশিং অমসুং ইনর্জীশিং অসি দেত অমসুং ক্রিপ্তো এজেন্দাশিংদা চেনেল তৌখ্রে। ভারতনা G20গী প্রসিদেন্সী ওইরিঙৈদা ক্রিপ্তোগী মতাংদা ফাইনান্সিএল ইস্তেবিলিতীগী ৱাংমদা খন্ন-নৈনখি অমসুং মসিগী পাক-চাউবা মেক্রোইকনোমিক ইম্প্লিকেসনশিং, মরুওইনা হৌগৎলক্লিবা মার্কেৎশিং অমসুং চাউখৎলক্লিবা ইকনোমীশিংগীদমক্তা খন্নখি। G20না ৱাফমশিং অসিদা য়ানবা পুরকখি অমসুং স্তেন্দর্দ সেতিং বোদীশিংদা মদুগী মতুং ইন্না লমজিং-লমতাক পীখি। ঐখোয়গী প্রসিদেন্সী অসিনা ক্রিপ্তো এসেৎশিংগী মতাংদা হেন্না চেৎশিলহন্দুনা মগুন লৈবা সেমিনার অমসুং খন্ন-নৈনবগী থৌরমশিংসু পাংথোকখি।
ঐখোয়না মতৌ করম্না মাংলোমদা চংশিনগদগে হায়বগী ৱাখল্লোন পুথোকপদা লেপখিদে। ঐখোয়না মাংলোমদা চংশিনগদৌরিবা লম্বীগী মতাংদা অমসুং ঐখোয়না মতৌ করম্না খোঙজেল য়াংনা চংশিনগদগে হায়বগী মতাংদা ময়েক শেংবা অকুপ্পা মরোলশিংসু পুথোক্লে। মরম অদুনা, ঐখোয়গী রোদ মেপ অসি অকুপ্পা মরোল অমসুং এক্সন-ওরিএন্তেদ ওই।
“G20 কাংলুপ অসি মালেম অসিনা আশাগী মঙাল অমা ওইনা উরি অমসুং মসিগীদমক ভারতনা G20গী প্রসিদেন্সী পায়রিঙৈদা য়ুম্ফম শেমগৎলি”।
Q: ভারতনা মল্তিলেতরেল দিবেলপমেন্ত বেঙ্ক (MDB) গী মওং-মতৌদা অহোংবা পুরক্নবা মরুওইবা এজেন্দা লৌখৎলি। মমাংগী হোৎনবা কয়া অসিনা অচৌবা ইথিল পীবা ঙমখিদে। ভারতকী প্রসিদেন্সী অসিনা মরুওইবা এজেন্দা অসি কয়া য়াম্না মাংলোমদা চংশিনগনি হায়না অদোম্না থাজবা থম্লি?
A: MDBগী এজেন্দাদা, G20গী হোৎনরিবশিং অসি হৌজিত্তি মখোয়গী রিসোর্সশিংবু মতিক চাবা মওংদা শীজিন্ননবা মখোয়গী বেলেন্স শীৎশিংবু মতিক চাবা মওংদা করম্না শীজিন্নবা য়াবগে হায়বদুদা মরুওইনা মীৎয়েং থম্লি।
অদুম ওইনমক, লাইচৎ অসিনা মরম ওইদুনা, MDB শিংনা মখোয়গী মরুওইবা দিবেলপমেন্ত মেন্দেতকী মনুংদা ক্লাইমেৎ চেঞ্জ, লাইচৎ অসিনচিংবা মালেমগী ওইবা শীংনবশিং অসি পুনশিনবা মথৌ তাই হায়বা খঙলকখি। মসিনা MDB শিংগী ফঙ্কসনশিংগী হৌজিক লৈরিবা ফ্রেমৱার্কশিংদা রিফোর্ম অমা অমসুং মখোয়গী হৌজিক লৈরিবা ফাইনান্সিএল রিসোর্সশিং পাকথোক চাউথোকহনবগী মথৌ তাই। মসি মালেমগী খা থংবা শরুক পুম্নমক্তা মথৌ তাবা অমনি হায়না ফাওখি।
ঐখোয়গী প্রসিদেন্সীগী মতমদা ঐখোয়না মসিগী হীরম অসি ইফেক্তিব ওইনা লমজিংবা ঙমখি। মমাংগী মতমগা মান্নদবা মওংদা, MDB শিংগী রিফোর্মশিংগী খোলাউ অসি হৌজিক্তি MDBশিংগী শেয়রহোল্দরশিংদগী লাক্লি অমসুং মসিনা ভারতকী প্রসিদেন্সীগী MDB এজেন্দাগী অকোইবদা হেন্না কান্নবা ফংহনখ্রে। MDBশিংগী শেয়রহোল্দরশিংনা ইশু অসিগী মরুওইবা অদু হৌজিক খঙলে।
প্রসিদেন্সীনা MDBশিং মপাঙ্গল কনখৎহন্নবা G20 ইন্দিপেন্দেন্ত এক্সপর্ত গ্রুপ লিংখৎখি। গ্রুপ অসিদা ইন্তর্নেস্নেল ফাইনান্সিএল আর্কিতেকচরগী খ্বাইদগী ফবা মালেমগী ৱাখল্লোনশিং য়াওরি। গ্রুপ অসিনা মসিগী রিপোর্তকী ভোল্যুম 1 পীশিনখ্রে, অমসুং ভোল্যুম 2 অসি ওক্তোবরদা পীশিনগনি।
এক্সপর্ত গ্রুপকী রিকমেন্দেসনশিং অসিনা MDB শিংগী ফাইনান্সিএল স্ত্রেথ হেনগৎহনবা, লোন পীবগী থাক হেনগৎহনবা অমসুং মালেমগী ওইবা অৱাবা কয়া থেংনবগী তুংগী পান্দমশিং ফংনবা ভারতকী ৱাখল্লোনশিং অদু মপূং ফানা শন্দোক্না তাক্লি। রিপোর্ত অসিগী খুত্থাংদা অমসুং কনসেন্সস শেমগৎনবা ৱারী শানবশিংগী খুত্থাংদা, ভারতনা MDBগী রিফোর্মশিংগী মতাংদা হেন্না চাউবা মালেমগী ৱারী শানবদা গ্লোবেল সাউথকী প্রাইওরিতিশিংবু ইফেক্তিব ওইনা য়াওহনখ্রে।
“লায়রবশিং অমসুং গ্রহ অনিমকপু মতেং পাংবীবা মথৌ তাই। ভারতনা মসিগী মতাংদা পোজিতিব ওইবা ৱাখল্লোন অমখক্তা নত্তনা সোলুসনশিং পুথোক্নবা মাইন্দসেত অমগা লোয়ননা মাংলোমদা চংশিল্লি”।
Q: ইন্দিয়া স্তেককী দিজিতেল পব্লিক ইনফ্রাস্ত্রকচর অমসুং আধার, UPI, Co-WIN অমসুং প্রধান মন্ত্রী জন ধন য়োজনাগুম্বা সর্ভিসশিং অসি কান্নবা ফংলবা মীওইশিংদা হকথেংননা সর্ভিসশিং ফংহনবদা য়াম্না মায় পাক্লি। ভারতনা G20দা চাউখৎ-থৌরাংগী ওইথোকপা য়াবা মোদেল অমা ওইনা মসি কয়া য়াম্না উৎপা ঙমখ্রে অমসুং অতোপ্পা লৈবাকশিংনা মসি মায় পাক্না শীজিন্নবদা মতেং পাংলিবগে?
A: ইনক্লুসিব গ্রোথ অসি সোসিএল জস্তিসকী অহানবা মথৌ তাবনি অমসুং ইনক্লুসিব গ্রোথ অসিদা অরোইবা মাইল দেলিভরী মথৌ তাই। ভারতনা তাক্লে মদুদি তেক্নোলোজীনা অরোইবা মাইলগী দেলিভরী ফংহনবদা অচৌবা মতেং ওইগনি। তেক্নোলোজীনা ভারতপু পান্দম থম্লিবা য়াইফ-থৌরাং ফংহনবদা মতেং পাংলি।
ঐখোয়গী তেক্নোলোজী শীজিন্নবগী পান্দমদি ইনক্লুসিব গ্রোথ অমসুং ফোর্মেলাইজেসননি। এস্পিরেস্নেল দিস্ত্রিক্তশিংদা তেক্নোলোজী শীজিন্নবনা ইন্দিকেতর কয়াদা মশক থোকপা ফগৎলকপা পুরক্লে। মসিনা অফবা ফোর্মেলাইজেসন অমা পুরকপতা নত্তনা লায়রবশিংগীদমক মমল হোংবা ক্রেদিৎ অমসুং অতোপ্পা খুদোংচাবশিং ফংহনখি।
ঙসিদি, ঐখোয়গী মীয়ামগী সোসিও-ইকনোমিক দিবেলপমেন্তকী মায়কৈদা দিজিতেল পব্লিক ইনফ্রাস্ত্রকচর প্রমোৎ তৌবা অমসুং শীজিন্নবদা ভারতনা মায় পাক্লকপগী মালেম্না য়ানরে। মালেমগী দিজিতেল পেমেন্ত ত্রাঞ্জেক্সনশিংগী 46% হৌজিক ভারত্তা ওইরিবা অসি ঐখোয়গী পোলিসীশিং মায়পাকপগী মশক থোকপা খুদম অমনি। ঙসি মালেমনা ভারতপু ইন্নোবেসনগী ইনক্যুবেতর ওইনা উরি।
মালেমগী অখঙ-অহৈশিংনা ভারতনা দিজিতেল পব্লিক ইনফ্রাস্ত্রকচর শীজিন্নরিবা অসি থাগৎপা ফোংদোকপতা নত্তনা মালেমগী লুচিংবশিংগা উনবদা ঐহাক্না ইন্তরেস্ত য়াম্না লৈ হায়নসু ফাওই।
ভারতকী দিজিতেল পব্লিক ইনফ্রাস্ত্রকচরদা গ্লোবেল সাউথ অমসুং দিবেলপ তৌরবা মালেম অনিমক্তা কান্নবা ফংলিবা পোত্থোক কয়া অমা লৈ লৈবাক কয়ানা ঐখোয়গী এক্সপরিয়েন্সতগী তমজবা পাম্মি অমসুং ঐখোয়না য়ামদ্রবদা লৈবাক তরানিথোইগা লোয়ননা কোওপরেসন মায় পাক্না হৌদোক্লে।
ঐখোয়না দিজিতেল পব্লিক ইনফ্রাস্ত্রকচরগীদমক মান্নবা এপ্রোচ অমগী খুত্থাংদা দিজিতেল পব্লিক গুদসকী ৱাখল্লোন প্রমোৎ তৌদুনা, তেক্নোলোজী শীজিন্নদুনা মালেমগী চাউখৎপা খোঙজেল য়াংশিন্নবা G20 লৈবাকশিংগা লোয়ননা থবক তৌরি। অমসুং মসি G20 মেম্বরশিপনা য়াম্না থাগৎপা ফোংদোকখি।
ভারতকী দিজিতেল পব্লিক ইনফ্রাস্ত্রকচরগী হেনগৎলক্লিবা মীয়াম্না পাম্নবা অসিনা মালেমগী শেন-থুমগী লমদা ইনক্লুজন অমসুং ইজ ওফ লিভিং তপথহন্নবা য়াম্না কন্না হোৎনগনি হায়না ঐখোয়না থাজবা থম্লি।
“ঐখোয়গী মায় পাকপগী মওং অসিদা অমসুং মালেমগী ওইনা স্তার্ত-অপশিংগী মরুওইবা অদু খঙলদুনা, ভারতনা G20গী লুচিংবা ওইনা স্তার্ত-অপ 20 এঙ্গেজমেন্ত গ্রুপ লিংখৎতুনা মশক থোকপা খোঙথাং অমা লৌখৎখি। মসি G20গী মখাদা অসিগুম্বা মখলগী অহানবা খোঙথাং ওইরি”
Q: মালেমগী স্তার্ত-অপ ইকোসিস্তেম অমা শেমগৎপদা মতেং পাংনবা G20 প্লেৎফোর্ম শীজিন্নবগী মতাংদা খন্ন-নৈনখ্রে। মসিগী মতাংদা অদোমগী সরকারনা মতৌ করম্না মাংলোমদা চংশিনবা পাম্বিবগে?
A: ঐখোয়না পুৱারীদা য়েংলবদি, মতম কয়াগী মমাংদগী তপ্না তপ্না চাউখৎপগী মতম অমা লৈরকখি। অদুবু ঙসিদি, ফীভম অসি হোংখ্রে। তপ্না-তপ্না অহোংবা পুরকপা মতমদগী, ঐখোয়না অওনবা পুরকপা ইন্নোবেসনগী মতমদা চংশিল্লি। চহি 100গী মমাংদা উখিবা অহোংবা অদু হৌজিক চহি 10 খক্তদা উবা ফংলে! মসিনা তাকপদি সরকার অমসুং খুন্নাইনা অঙকপা অহোংবশিং অসি থেংননবা শেম-শাদুনা লৈগদবনি হায়বনি।
ঐখোয়না ভারতকী এক্সপরিয়েন্স অসি য়েংলবদি, ঐখোয়না স্তার্ত-অপশিংগী পোতেন্সিএল অদু খঙবতা নত্তনা, মখোয়বু হৌদোক্নবা পেকেজসু পীখি। ঐখোয়না নহারোলশিংদা খুদোংচাবা কয়া পীনবা হোৎনখি।
ঐখোয়না অতল ইন্নোবেসন মিসন অমসুং অতল তিঙ্করিং লেবশিং হৌদোক্লে। ঙসি, অতল তিঙ্করিং লেব 10,000 লৈরি, মসিদা মহৈরোই লাখ 75না ইন্নোবেসন প্রোজেক্ত লাখ কয়াদা থবক তৌরি। ঐখোয়না ইনক্যুবেসন সেন্তরশিং লিংখৎলে অমসুং হেকাথোন কয়া অমা পাংথোকখি। ঐখোয়না তোঙান তোঙানবা লৈবাকশিংগা খুৎশম্নদুনা হেক্কাথোনশিংসু পাংথোক্লি। মসিনা “প্রোব্লেম সোল্বিং”গী ৱাখল্লোন অমা শেমগৎলকখি।
মসিগী ইন্তর্ভেন্সন পুম্নমক অসিনা স্তার্ত-অপশিং অসুম-অসুম হেনগৎলক্লি অমসুং স্তার্ত-অপশিং অসিনা অওনবা পুরক্লি।
ঙসিদি, ভারত্তা স্তার্ত অপ লিশিং 100 অমসুং য়ুনিকোর্ন 100 রোম লৈরে। এক্সপর্ত কয়ানা ভারত অসি স্তার্ত-অপশিংগী হব অমা ওইনা উরি। মসি ঐখোয়গী বেসিক গবর্নান্স ফিলোসোফি ওইবনা ঐখোয়না মালেমগী থাক্তা মসিগী খুদোংচাবা লৌবা পাম্বা অসি মহৌশানা ওই।
ঐখোয়গী মায় পাকপগী মওং অসিদা অমসুং মালেমগী থাক্তা স্তার্ত-অপশিংগী মরুওইবা খঙবদগী, ভারতনা G20গী লুচিংবা ওইনা স্তার্ত-অপ 20 এঙ্গেজমেন্ত গ্রুপ লিংখৎতুনা মশক থোকপা খোঙথাং অমা লৌখৎখি। মসি G20গী মখাদা অসিগুম্বা মখলগী অহানবা খোঙথাংনি। গ্রুপিং অসিনা মালেমগী স্তার্ত-অপ ইকোসিস্তেমগী ৱা ঙাংদুনা তোঙান তোঙানবা স্তেকহোল্দরশিংবু মান্নবা প্লেৎফোর্ম অমদা পুনশিল্লি।
মসিনা স্তার্ত-অপশিং শৌগৎনবা অমসুং স্তার্ত-অপশিং, কোর্পোরেতশিং, ইনভেস্তরশিং, ইন্নোবেসন এজেন্সীশিং অমসুং অতোপ্পা মরুওইবা ইকোসিস্তেম স্তেকহোল্দরশিংগী মরক্তা সিনর্জীশিং ওইহনবা ঙম্নবা মালেমগী ওইবা নরেতিব অমা শেম্নবা পান্দম থম্লি।
মখোয়না কেপাসিতী বিল্দিং, ফন্দিং গেপশিং মশক খঙদোকপা, থবক ফংহন্নবগী খুদোংচাবশিং হেনগৎহনবা, SDGগী পান্দমশিং ফংহনবা, অমসুং ইনক্লুসিব ইকোসিস্তেম চাউখৎহনবা অসিগুম্বা হিরমশিংদা অকনবা খোঙথাংশিং লৌখৎপা ঙম্লগনি হায়না ঐখোয়না থাজবা থম্লি।
অনৌবা এনগেজমেন্ত গ্রুপ অসিগী মীফমশিংনা য়াম্না চাউনা পুক্নিং চিংশিনখি অমসুং মসি G20 প্রোসেসকী মরুওইবা য়ুম্বী অমা ওইনা মশক তাক্কনি হায়না ঐখোয়না আশা তৌরি।
“ভারতনা তাক্লে মদুদি তেক্নোলোজীনা অরোইবা মাইলগী দেলিভরী ফংহনবদা অচৌবা মতেং অমা ওইগনি। তেক্নোলোজীনা ভারতপু পান্দম থম্লিবা য়াইফ-থৌরাং ফংহনবদা মতেং পাংলি।”
Q: IMFনা হায়খি মদুদি ভারত অসি মালেমদা খোঙজেল য়াংনা চাউখৎলক্লিবা শেন্মিৎলোন অমনি অমসুং চহি অসিগী ওইনা চাদা 6.1গী গ্রোথ লৈগনি হায়না পানরি। মেক্রো ইকনোমিক ইন্দিকেতর অয়াম্বনা মপাঙ্গল লৈরি অমসুং দিমান্দ অমুক হন্না ফগৎলকপগী মায়কৈদা পুক্নিং চিংশিল্লি হায়না পল্লদুনা ইকনোমী অসিনা হন্দক্কী ফিস্কল অসিদা মাংজৌননা পান্দম থমখিবদগী হেন্না ফগৎলক্লগনি হায়না অদোম্না থাজবরা?
A: হৌখিবা চহি খরা অসিদা ভারতনা মাংজৌননা পানখিবা অদুদগী হেন্না ফবা থবকশিং পাংথোক্লে। মসি ঐখোয়গী ত্রেক রেকোর্দনি।
ঙসিদি, ঐখোয়না লৈবাক অয়াম্বদগী হেন্না খুমাং চাউশিল্লি অমসুং মসিগীদমক ঐখোয়গী মীয়ামবু থাগৎফম থোকই। হৌজিক, ঐখোয়না হেন্না থুনা চাউখৎনবা হোৎনবা মতমদা, ঐখোয়গী মীয়ামদা অচৌবা থৌদাং অমা লৈ। ঐখোয়না চাউখৎপগী মথংগী খোঙথাং লৌখৎপদা ঐখোয়গী নেস্নেল কেরেক্তরনা অচৌবা থৌদাং অমা লৌগনি। স্বদেশী আন্দোলন্না ঐখোয়গী নীংতম লান মতমদা অচৌবা পাঙ্গল পীখিবগুম্না, ঙসিগী মীয়ামগী খোঙজংশিংনা চাউখৎপগী মথংগী লম্বীদা পাঙ্গল পীগনি।
মসি ভোকেল ফোর লোকেল, আত্মনির্ভর ভারত, মেনুফেকচরিংদা জিরো দিফেক্ত অমসুং জিরো ইফেক্ত, জিরো ইম্পোর্ত, এগ্রিকলচরদা মক্সিমম এক্সপোর্ত অমসুং ইনর্জীগী মথৌ তাবশিংদা মশা-মরোমদোম লেপচবা হায়বা মন্ত্রশিংগী খুত্থাংদা ওইগনি।
ঐখোয়গী নাগরিকশিংনা হায়রিবা প্রিন্সিপলশিং অসি থবক ওইনা পাংথোকপা হৌরকপগা লোয়ননা, ঐখোয়না ঐখোয়গী পান্দমশিং অদুদা হেন্না নকশিল্লি। মালেমগী মেনুফেকচর্রশিংনা ভারত্তা লাক্লি অমসুং মমাংদা অমুক্তা ওইখিদ্রিবা মওংদা থবক ফংহন্নবগী মতম অমা হৌরে। অমসুং ঐহাক্না ভোকেল ফোর লোকেল হায়রকপা মতমদা, ঐহাক্কী ওইনা, ভারত্তা ভারতমচাশিংগী হুমাং মমলনা শাবা পুম্নমক অসি লোকেলনি।
চহি 10 রোমগী মমাংদা, ভারত অসি ফ্রেজাইল 5 লৈবাকশিংগী মরক্তা লৈরম্মি। ভারত অসি মসিগী মপুং ফাবা পোতেন্সিএল অদু পুথোকপা ঙমদবা লৈবাক অমা ওইনা উরি।
চহি 10গী মনুংদা, ভারতনা মালেমগী খ্বাইদগী চাউবা ইকনোমীগী 10শুবা মফমদগী মালেমগী খ্বাইদগী চাউবা ইকোনোমীগী 5শুবা মফমদা ওন্থোকখ্রে। চহি 10গী মনুংদা, ভারত অসি হৌজিক্তি শিংথানিংঙাই ওইবা থবকশিং পাংথোক্তুনা অচৌবা ওইথোকপা য়াবা লৈবাক অমা ওইনা উবা ফংলে।
হৌখিবা চহিশিংদা লৈঙাক্না ইনফ্রাস্ত্রকচরদা হোৎনখিবা অসিনা প্রাইভেৎ কেপেক্সতা মী পুনবদা মতেং পাংলি। ভারতকী অপুনবা ফিক্স কেপিতেল ফোর্মেসন অসি GDPগী চাদা 34 ওইরি, মসি 2013-14দগী খ্বাইদগী ৱাংবা ওইরি। 2022-23দা ক্রেদিৎ গ্রোথ অসি চাউরাক্না চহি তরাগী মনুংদা খ্বাইদগী মপাঙ্গল কনখৎলদুনা চাউরাক্না 15% ওইখি। ইন্দিকেতরশিং অসিনা অনৌবা প্রাইবেৎ কেপেক্স সাইকল অমা হৌরকপগী ইঙ্গিৎ পীরি।
খুঙ্গং অমসুং শহর অনিমক্কী দোমেস্তিক কঞ্জুম্পসন অসি মপাঙ্গল কনখৎলবা অদুমক লৈরি। ইনফ্লেসন হন্থরক্লি, চৎলিবা চহি অসিদা ফোরেক্স ফ্লোশিং মপাঙ্গল কন্না লৈরি। ইন্দিকেতর খুদিংমক হেনগৎলকপগা লোয়ননা, গ্রোথ অসি মপাঙ্গল কনখৎহনগনি। হৌখিবা চহি মাপল অসিদা, FDI ইনফ্লো অসি শরুক অনি হেনগৎখ্রে, ফোরেক্স রিজর্বশিং শরুক অনি হেনগৎখ্রে, কেন্দ্র সরকারগী কেপেক্স অসি শরুক মঙা হেনগৎখ্রে, বেঙ্ককী বেলেন্স শীৎশিং শেমজিনখ্রে অমসুং মখোয়না শেন্দোং ফংলি।
ভারতকী শেন্মিৎলোন অসি মখা তানা ফজনা থবক তৌগনি অমসুং ঐখোয়গী মীয়ামগীদমক মমাংদা অমুক্তা ওইখিদ্রিবা খুদোংচাবশিং অমসুং চাউখৎপা পুরক্লগনি হায়না ঐহাক্না থাজবা থম্লি।
“ঐখোয়না চাউখৎলক্লিবা লৈবাকশিং য়াওদ্রবদি, ভসুধৈব কুতুম্বকম অসি ঐখোয়না করম্না ফংগনি? করম্না ৱান আর্থ, ৱান ফেমিলী, ৱান ফ্যুচর লৈরকপা ঙমগনি? ”
Q: এপল অমসুং তেসলাগুম্বা কম্পনীশিংনা ভারত্তা মেনুফেকচরিং সেন্তরশিং শেমগৎপদা পুক্নিং চংলি। অদোমগী মীৎয়েংদা লৈবাক অসিনা চাইনাগী মহুৎ শিনবা মালেমগী পোত্থোক পুথোকপগী মফম অমা ওইরকপদা কয়া য়াম্না খুমাং চাউশিল্লবগে? মেক ইন ইন্দিয়া প্রোগ্রামগী থবক পায়খৎপা অসি নহাক্না করম্না য়েংশিনবগে অমসুং মালেমগী সপ্লাই চেনশিংদা চাইনা+1গী পিবোত অসিদগী ভারতনা কান্নবা ফংবা ঙম্নবগীদমক্তা মখা তানা করি তৌবা মথৌ তাগনি হায়না অদোম্না খনবগে?
A: অদোমগী ৱাহং অসিনা ঐঙোন্দা অঙকপা পোকহল্লি। করিগুম্বা মীওই অমনা মহাক্কী হকশেল ফগৎহন্নবগীদমক্তা এক্সরসাইজ তৌরবদি, মসি মহাক্না অতোপ্পা মীওই অমগা লান্থেংননবা শেম-শাবা ওইনা উগদরা?
মালেমগী খ্বাইদগী নহা ওইরিবা অমসুং খ্বাইদগী হৈথোই-শিংথোইবা নহাশিংগী মরক্তগী অমা ঐখোয়গী ইনাক্তা লৈরি। মখোয়না চাউখৎপগী মঙলান মঙবগী হক ফংফম থোক্তব্রা? ভারতনা অসিগুম্লবা অচৌবা কৈথেল অমা লৈরবদি, মসিসু মেন্যুফেকচরিং পাৱর অমা ওইরকপগী মঙলান শাগৎলোইদ্রা? ঐহাক্না ঐহাক্কী শহরগী মীওইশিংদা চাউখৎলবা লৈবাকশিংগা মান্নবা খুদোংচাবশিং ফংহনবা পাম্মি। মালেমনা ঙসি ভারতকী শক্তিবু মশক খঙলে। মখোয়গী কম্পনী, মখোয়গী পোত্থোক অমসুং মখোয়গী শেন্দোংগীদমক্তা অফবা ওইবনা মরম ওইদুনা মখোয় মফমসিদা লাক্লি। ঐখোয়না 2014দগী হৌনা হোৎনরিবশিং অসি চহি 40-45গী মমাংদা তৌরম্বা ওইরম্বা য়াই। মতম অদুদা লৈবাক অসিনা তৌগদবা অচুম্বা থবকশিং অদু খঙলম্মি, অদুবু ৱারেপ লৌরিবা মীওইশিংনা অরানবা ৱারেপশিং লৌখি।
ঐখোয়না মেনুফেকচরিং হেনগৎহনবা অমসুং ইজ ওফ দুইং বিজিনেস ফগৎহনবদা 2014দগী মীৎয়েং থম্লি। মালেমগী থাক্কী ইনফ্রাস্ত্রকচরদা মীৎয়েং থমদুনা, ঐখোয়গী থবক শুরিবা মীওইশিংগী স্কিল দিবেলপমেন্ত, সপোর্তিব পোলিসীশিং অমসুং অপেনবা ফিস্কল ইন্সেন্তিবশিংগী খুত্থাংদা, ঐখোয়না ঐখোয়গী মেন্যুফেকচরিং সেক্তরদা অহোংবা পুরক্লি।
ভারত্তা এপলগী মেনুফেকচরিংগী খোঙজং হেনগৎলকপা, ভারত্তা সেমিকন্দক্তর এসেমব্লী লিংখৎনবা মাইক্রোনগী ৱারেপ অসিনা মেনুফেকচরিংগী মফম অমা ওইনা ভারতকী পুক্নিং চিংশিনবা হেনগৎলক্লিবা অদু উৎলি।
ভারতপু কম্পিতিতিব ওইবা অতোপ্পা গ্লোবেল প্রদক্সন হব অমা ওইহন্নবা স্কেল অমসুং ভোল্যুম শেমগৎপা অসি য়াম্না মরু ওই। মসিদি সপ্লাই চেন চাউখৎহন্নবগীদমক ইনভেস্তমেন্তশিং পুক্নিং চিংশিনবা অমসুং মেন্যুফেকচরিং কেপাসিতীশিং শেমগৎপা অসি তঙাই ফদবনি। ঐখোয়গী PLI স্কীমশিং অসি কম্পনীশিংবু মখোয়গী মেন্যুফেকচরিং কেপাসিতীশিং অমসুং লোকেল ভেল্যু এদিসন চহিগী মতুং ইন্না হেনগৎহন্নবা পুক্নিং থৌগৎনবগীদমক শেমগৎপনি।
Q: জিওপোলিতিকেলগী ওইবা মায়োক্নরিবা ফীভমশিং, মরু ওইনা রসিয়া-য়ুক্রেনগী লান অসিনা মালেমগী ওইবা কনসেন্সস অমা শেমগৎপগী থবক অসি অরুবা ওইহল্লি। ভারতকী প্রসিদেন্সীগী মতমদা মালেমগী ওইনা কন্সেন্সস ফংবা অরুবা ওইরিবা হীরমশিং অসি করম্না মায়োক্নগনি হায়না অদোম্না থাজবা থম্বগে? ঐখোয়না তোঙান তোঙানবা লৈবাকশিংনা রসিয়া অমসুং য়ুক্রেনগী মরক্তা শান্তি পুরক্নবা পাম্বৈ অমা পুথোক্নবা হোৎনরি। G20গী প্রসিদেন্ত অমা ওইনা, রসিয়া-য়ুক্রেনগী লানদগী লান্থোক্নবগী পাম্বৈ অমা পুথোকপদা মতেং পাংগদবা থৌরাং অমা অদোমগী লৈব্রা?
A: অদোমগী বিজিনেস স্ত্রেতেজীগী মতুং ইন্না, অদোম্না G20গী মতাংদা অখন্নবা ইসু অমা পুথোক্লি। অদুম ওইনমক, অদোমগী ৱাহং অসি পোলিতিকেল দিবেৎকী মরমদা হেন্না ওই। মরম অদুনা, G20 নৎত্রগা ঐখোয়গী G20 প্রসিদেন্সী অসি ইসু অসিগা মরী লৈনহনবা পাম্বিবরা হায়বসি অদোম্না খন্নগদবনি।
ঐনা অদোমদা হংনীংই মদুদি করিগীদমক্তা অদোম্না মালেম অসিদা প্রোব্লেম অমখক্তমক লৈবগুম্না মসিগী হীরম অসিগী মতাংদা হংনীংবগে? করিগীদমক অদোম্না সিরিয়া, অফ্রিকাগী লৈবাক খরা, নোংপোক এসিয়া, লেতিন অমেরিকাগুম্বা মালেমগী অতোপ্পা মফমশিংদা প্রোব্লেমশিং লৈ হায়বা খঙদবনো? বিজিনেস মেগাজিন অমা ওইনা, পোলিতিকেল দিবেৎশিংদা মীৎয়েং চংবগী মহুত্তা হৌজিক ফাওবদা পাংথোকখিবা G20গী মীফমশিংদা মীৎয়েং চংনবা করিগীদমক্তা নহাক্না খনদবনো?
হায়রিবা হীরমশিং অসিদা মীৎয়েং চঙবা UNগুম্বা ইন্তর্নেস্নেল ওর্গনাইজেসনশিং লৈ। ঐহাক্কী মীৎয়েংদি ঐখোয়না G20গী প্রসিদেন্সী অসি গ্লোবেল সাউথকী মরুওইবা চাউখৎ-থৌরাংগী ইসুশিংদা কমন পোজিসনশিং শেমগৎনবা লমজিংগনি।
Q: অদোম্না অফ্রিকান য়ুনিয়নবু G20গী মেম্বর ওইহনবগীদমক্তা কন্না হোৎনখি। G20দা অফ্রিকান য়ুনিয়ননা করি থৌদাং লৌগনি হায়না অদোম্না খল্লি অমসুং অনৌবা মালেমগী কাঙলোন শেমগৎপদা অফ্রিকান কন্তিনেন্তনা লৌগদবা থৌদাং অদুগী মতাংদা অদোমগী ৱাখল্লোন অদু শেয়র তৌবা য়াব্রা?
A: 2015গী ওক্তোবরদা ঐখোয়না নই দিল্লীদা ইন্দিয়া-অফ্রিকাগী অচৌবা সম্মিৎ অমা পাংথোকখি। মসি অফ্রিকান কন্তিনেন্তকী লৈবাক 54গী লুচিংবশিংনা ভারত্তা লাকখিবা অচৌবা খোঙথাং অমনি। অখন্নবা ইসু অমা পুথোক্নবা অসি য়াম্না চুনবা থৌরম অমনি। লাইবক থিবদি, ঐখোয়গী লৈবাক অসিগী মীদিয়ানা থৌরম অদুগী মরুওইবা অমসুং তোপ তোপ্পা অদু খঙখিদে। তশেংনমক, অদোম্না অদোমগী মেগাজিননা সম্মিৎ অদুদা কয়া য়াম্না কভরেজ পীবগে হায়বদুসু য়েংবীগদবনি।
ঐহাক্না নুংঙাইবা ফাওই মদুদি খরা মখৈদি হৌজিক্তি অদোম্না অফ্রিকান য়ুনিয়নগী মরমদা খনবা হৌখ্রে অমসুং ঐঙোন্দা ৱাহং অসি হংলক্লি।
মালেমগী খা থংবা লৈবাকশিংগীদমক ঐনা থম্মোই শেংনা নুংশিজৈ। মালেমগী চাউখৎ-থৌরাংগী এজেন্দাদা ঐখোয়না খুমাং চাউশিলহন্নবা হোৎনবদা ঐখোয়না চাউখৎলক্লিবা লৈবাকশিংবু মরুওইবা পীবা মথৌ তাই হায়না ঐহাক্না চেৎনা থাজৈ। ঐখোয়না মখোয়দা চাউথোকচনীংঙাই ওইবা মফম অমা পীবীরবদি, মখোয়বু পুক্নিং তাবীরবদি, মখোয়গী মরুওইবশিং খঙবীরবদি, মখোয়দা মালেমগী কান্নবগীদমক্তা মতেং পাংনবা কেপাসিতী অমসুং তৌবা ঙম্বশিং লৈগনি।
ঐহাক্না গুজরাতকী মুখ্য মন্ত্রী ওইরিঙৈদা অহানবা ওইনা অহমদাবাদতা অফ্রিকা দিবেলপমেন্ত বেঙ্ককী সম্মিৎ পাংথোকখি। মখোয়না অফ্রিকাগী মপান্দা অহানবা ওইনা মীফম পাংথোকখিবা অদুসু মসিনা ওইখি। মসি য়াম্না মায় পাকখি।
মসিগী মতম অসিদা, ঐখোয়না G20 প্রসিদেন্সীগী মোতো ওইনা ভসুধৈব কুতুম্বকম থম্নবা ৱারেপ লৌরে। মসি ঐখোয়গী মরুওইবা থাজবা অমসুং ইথোসতা য়ুম্ফম ওই।
করিগুম্বা ঐখোয়না চাউখৎলক্লিবা লৈবাকশিং য়াওদ্রবদি, মতৌ করম্না ঐখোয়না ভসুধৈব কুতুম্বকমবু মপুং ফাহনগনি? করম্না ৱান আর্থ, ৱান ফেমিলী, ৱান ফ্যুচর লৈরকপা ঙমগনি?
মরম অসিনা G20গী প্রসিদেন্সী লৌরবা মতুংদা ঐহাক্না ইহান হানবা ওইনা পাংথোকখিবা থৌরমদি চহি অসিগী জনুৱারীদা পাংথোকখিবা ভোইস ওফ গ্লোবেল সাউথ সম্মিৎনি। মখোয়গী ৱারোলশিং, মখোয়গী মরুওইবশিং অমসুং অৱাবাশিং খঙলবা মতুংদা, ঐখোয়না G20 প্রসিদেন্সীগী এজেন্দা লেপখি। ঐখোয়না G20গী এজেন্দাদা গ্লোবেল সাউথকী প্রাইওরিতিশিং পুশিল্লে অমসুং ঐখোয়না খুমাং চাউশিল্লে।
অসিগুম্বা ৱাখল্লোন অসিগা লোয়ননা ঐহাক্না ঐখোয়গী প্রসিদেন্সীগী মতমদা অফ্রিকান য়ুনিয়নবু G20গী পর্মানেন্ত মেম্বর অমা ওইহন্নবগী ইনিসিএতিব লৌখৎখি। ঐহাক্না থাজবা থম্লি মদুদি ঐখোয়না মসি পাংথোক্নবগীদমক মতেং ভোইস পীগনি।
লৈবাকশিংনা মখোয়গী ৱাখল্লোন, সমস্যাশিং অসি ৱারেপ লৌবদা খন্নদে হায়না খল্লকপা মতমদা মালেমগী ওইবা কাংলোনগী অচৌবা খুদোংথীবা অমা থোক্লকই।
চাউখৎলক্লিবা মালেমগী ভোইস অমসুং শরুক য়াবা য়াওদনা মালেমগী ওইবা শীংনবশিং অসিগী তুং কোইনা চৎকদবা পাম্বৈশিং পুথোকপা ঙম্লোই হায়বসি ঐখোয়গী থাজবনি।
মালেমগী লৈঙাক পায়বগী ইন্সতিত্যুসনশিংদা অফ্রিকাগী মফম অসি অখন্ননা মশক খঙবা অমসুং মফম পীবা ঙমদ্রি। ভারত অমসুং অফ্রিকাগী মরক্তা অখন্নবা মরী অমা লৈরি অমসুং মালেমগী থৌওংশিংদা অফ্রিকাগী অচৌবা থৌদাং অমা লৈহন্নবগীদমক ভারতনা লেপ্পা লৈতনা হোৎনরি।
G20দা ঐখোয়না প্রসিদেন্সী পাইরিঙৈ মতমদা, ঐখোয়না G20দা অফ্রিকান য়ুনিয়নগী পর্মানেন্ত সিৎ অমা ফংহন্নবা ইনিসিএতিব লৌখি অমসুং ঐখোয়গী ৱাফম অসি G20গী অতোপ্পা মেম্বরশিংনা শৌগৎকনি হায়না ঐখোয়না থাজৈ।
ঐখোয়না থাজৈ মদুদি খোঙথাং অসিনা অফ্রিকাগী মহাদেশ অসি মালেমগী থাক্তা মখোয়গী সমস্যাশিং অমসুং ৱাখল্লোনশিংবু হেন্না ময়েক শেংনা ফোংদোকপা ঙম্নবা শক্তি পীগনি, অমসুং মালেমগী কাংলোন শেম্বদা মরুওইবা থৌদাং অমা লৌগনি।
