ভারতকী প্রধানমন্ত্রী

এক্সিলেন্সীশিং,

BRICS বিজিনেস কম্ম্যুনিতীগী লুচিংবশিংবু খুরুমজরি!

খা অফ্রিকাগী লমদমদা হেক থুংবগা BRICS বিজিনেস ফোরমগী খুত্থাংদা ঐখোয়গী থৌরম অসি হৌবদা ঐহাক্না নুংঙাইবা পোকই।

অহানবদা ঐহাক্না রাস্ত্রপতি রামাফোসাবু মহাক্না বর্তন তৌবীরকপা অমসুং মীফম অসি শিনবীবগীদমক থাগৎপা ফোঙদোকচনীংই।

BRICS বিজিনেস কাউন্সিলগী 10শুবা কুমওন্না লাকপদা ঐহাক্না থমোয় শেংনা নুংঙাইবা ফোঙদোকচরি  অমসুং য়াইফ-পাউজেল পীজরি।

হৌখিবা চহি তরা অসিদা BRICS বিজিনেস কাউন্সিলনা ঐখোয়গী ইকনোমিক কোওপরেসন মপাঙ্গল কনখৎহনবদা য়াম্না মরু ওইবা থৌদাং লৌখি।

2009দা অহানবা BRICS সম্মিৎ পাঙথোকপা মতমদা মালেম অসি অচৌবা ইকনোমিক ক্রাইসিস অমদগী থোরকপা মতম ওইখি।

মতম অদুদা BRICS অসি গ্লোবেল ইকনোমীগী আশাগী মঙাল অমা ওইনা উনখি।

হৌজিক্কী মতম অসিদসু কোবিদ লাইচৎ, লানগী চৈরক্তা মালেমনা ইকনোমীগী শীংনবশিং মায়োক্নরি।

অসিগুম্বা তানফম অসিদা BRICS লৈবাকশিংনা অমুক হন্না অচৌবা থৌদাং লৌগদবনি।

মরুপশিং,

গ্লোবেল ইকনোমীদা চৈথেং নংলবসু ভারতনা খ্বাইদগী খোঙজেল য়াংনা খুমাং চাউশিল্লিবা  মালেমগী মরু ওইবা ইকনোমী ওইরি।

অথুবদা ভারতনা ত্রিলিয়ন দোলর মঙাগী ইকনোমী ওইবা ঙম্লগনি।

তুংদা লাক্কদবা চহিশিংদা ভারতনা মালেমগী গ্রোথ ইঞ্জিন ওইরক্কনি হায়বা ৱাফম অসিদা চীংনবা লৈত্রে।

মসিগী মরমদি ভারতনা অৱাবা অমসুং শীংনবনা থল্লবা তানফমবু ইকনোমিক রিফোর্মশিং পুরক্নবা খুদোংচাবা অমদা ওন্থোকখি।

হৌখিবা চহি খরা অসিদা মিসন মোদতা ঐখোয়না রিফোর্মশিং পুরকখিবনা ভারতকী ইজ ওফ দুইং বিজিনেসতা লেপ্পা লৈতনা ফগৎহনবা ঙমখি।

ঐখোয়না কমপ্লায়েন্সকী পোৎলুম হন্থহনখি।

ঐখোয়না রেদ তেপকী মহুৎ রেদ কার্পেৎনা শিনখি।

GST (গুদস এন্দ সর্ভিসেস তেক্স) অমসুং ইনসোলভেন্সী এন্দ বেঙ্ক্রপসী কোদ ইমপ্লিমেন্ত তৌখিবনা ইনভেস্তরগী থাজবা হেনগৎহনখি।

মমাংদা অথিংবশিং লৈরমখিবা দিফেন্স অমসুং স্পেসগুম্বা সেক্তরশিং অসি হৌজিক প্রাইবেৎ  সেক্তরগীদমক হাংদোক্লে।

ঐখোয়না মরু ওইনা পব্লিক সর্ভিস দেলিবরী অমসুং গুদ গভর্নান্সতা মীৎয়েং চংখি।

তেক্নোলোজী শীজিন্নবগী খুত্থাংদা ভারতনা ফাইনান্সিএল ইনক্লুজন্দা চাউনা খুমাং চাউশীনখি।

মসিগী খ্বাইদগী চাউবা কান্নবা অসি ঐখোয়গী খুঙ্গংগী নুপীশিংনা ফংখি।

ঙসি ভারতকী মীওই মিলিয়ন কয়ানা শুপ্নগী ক্লিক অমদা দাইরেক্ত বেনিফিৎ ত্রান্সফরশিং ফংলি।
 

হৌজিক ফাওবদা অসিগুম্বা ত্রান্সফর বিলিয়ন দোলর 360 হেন্না তৌখ্রে।

মসিনা সর্ভিস দেলিবরীদা ত্রান্সপরেন্সী হেনগৎহনখি, শেঞ্জা-থুমজা হন্থহনখি অমসুং মিদলমেন মিনিমাইজ তৌখি।

ভারত অসি গীগাবাইৎ দেতা অমগী মমল খ্বাইদগী হোংবা লৈবাক ওইরি।

ঙসি ত্রাঞ্জেক্সনশিং তৌবদা স্ত্রীৎ ভেন্দরশিংদগী অচৌবা শোপ্পিং মোলশিংদা য়ুনিফাইদ পেমেন্ত ইন্তরফেস (UPI) শীজিন্নরি।

ঙসি ভারতনা মালেমগী ওইনা দিজিতেল ত্রাঞ্জেক্সনশিং খ্বাইদগী মশিং য়াম্না তৌবা লৈবাক অমা ওইরি।

UAE, সিংগাপুর অমসুং ফ্রান্সগুম্বা লৈবাকশিংনা প্লেৎফোর্ম অসিদসু  য়াওশিল্লক্লি।

মসিদা BRICS লৈবাকশিংগা লোয়ননা থবক তৌমিন্নবা য়াবগী ওইথোকপা য়াবা কয়ামরুমসু লৈ।

ভারতকী ইনফ্রাস্ত্রকচরদা চাউনা ইনভেস্তমেন্তশিং তৌবা অসিনা লৈবাক্কী লেন্দস্কেপতা অওনবা পুরক্লি।

চহি অসিগী বজেৎতা ঐখোয়না ইনফ্রাস্ত্রকচরগীদমক বিলিয়ন দোলর 120 রোম এল্লোকেৎ তৌখি।

ইনভেস্তমেন্ত অসিগী খুত্থাংদা ঐখোয়না তুংলমচৎকীদমক অনৌবা ভারত অমগী শক্তি লৈরবা য়ুম্ফম অমা থোল্লি।

রেল, রোদ, ৱাতরৱেজ অমসুং এয়রৱেজতা খোঙজেল য়াংনা অওনবা পুরক্লি।

চহি অমদা কিলোমিতর লিশিং তরাগী চাংদা ভারত্তা অনৌবা হায়ৱেজশিং শেমগৎলি।

হৌখিবা চহি 9দা এয়রপোর্তশিংগী মশিং অসি শরুক অনি ওইহনবা ঙমখি।

ইনভেস্তমেন্ত অমসুং প্রদক্সন হেনগৎহন্নবা ঐখোয়না প্রদক্সন লিঙ্ক ইনসেন্তিব স্কিম হৌদোকখি।

লোজিস্তিক্সকী মমলশিং হন্থহনবনা ভারতকী মেন্যুফেকচরিং সেক্তর হেন্না কম্পিতিতিব ওইহনখি।

রিন্যুএবল ইনর্জীগী লমদা ভারত অসি মালেমগী লুচিংবশিংগী মনুংদা অমা ওইরি।

ঐখোয়না সোলর ইনর্জী, ৱিন্দ ইনর্জী, ইলেক্ত্রিক ভেহিকল, গ্রীন হাইদ্রোজেন অমসুং গ্রীন এমোনিয়াগুম্বা সেক্তরশিংদা ভারতপু গ্লোবেল মেন্যুফেকচরিং হব অমা ওইহন্নবা খোঙথাংশিং পাইখৎলি।

মসিনা ভারত্তা রিন্যুএবল তেক্নোলোজীগী সস্তেনেবল মার্কেৎ অমা শেমগৎলগনি।

ঙসি ভারত অসি মালেমগী অহুমশুবা খ্বাইদগী চাউবা স্তার্রঅপ ইকোসিস্তেম অমা ওইরি।

ভারত্তা য়ুনিকোর্ন চামা হেন্না লৈ।

IT, তেলিকোম, ফিনতেক, AI, অমসুং সেমিকন্দক্তরগুম্বা সেক্তরশিংদা ঐখোয়না “মেক ইন ইন্দিয়া, মেক ফো দি ৱর্ল্দ”গী বিজন প্রমোৎ তৌরি।

খোঙথাং পুম্নমক অসিনা মীচম মীয়ামগী পুন্সিদা হকথেংননা কান্নবা পীরি।

হৌখিবা চহি মাপন অসিদা মীয়ামগী ইনকমশিংদা শরুক অহুমগী ময়া নক্না হেনগৎলকখি।

নুপীশিংনা ভারতকী ইকনোমিক দিবেলপমেন্তদা অচৌবা কন্ত্রিব্যুতর অমা ওইখি।

ITদগী স্পেস ফাওবা, বেঙ্কিংদগী হেল্থকিয়র ফাওবা, নুপীনা নুপাশিংগা খুৎশম্নদুনা লৈবাক অসিবু চাউখৎ মাইকৈদা পুরি।

2047ফাওবগী মনুংদা ভারতকী মীয়াম্না চাউখৎপা লৈবাক অমা ওইহন্নবা ৱাশক লৌখি।

মরুপশিং,

ভারতকী চাউখৎ খোঙচৎকী শরুক অমা ওইনবা ময়ামদা ঐহাক্না বর্তন তৌজরি।

 
কোবিদ লাইচৎনা ঐখোয়দা মপাঙ্গল কনবা অমসুং ইক্লুসিব ওইবা সপ্লাই চেনশিংগী মরু ওইবা অদু তাকপীখ্রে।

মসিগীদমক অমনা অমদা থাজবা থম্বা অমসুং ত্রান্সপরেন্সী মরু ওই।

ময়ামগী শক্তি অসি পুনশিন্দুনা ঐখোয়না মালেম পুম্বগী মরু ওইনা গ্লোবেল সাউথকী য়াইফনবা থবক তৌবদা চাউনা শরুক তমগনি।

এক্সিলেন্সীশিং,

অমুক হন্না ঐহাক্না মখোয়না শরুক তমখিবশিং অদুগীদমক BRICS বিজিনেস কম্ম্যুনিতীগী লুচিংবশিংদা থাগৎপা ফোঙদোকচরি।

ঐহাক্না ফজরবা থৌরম অসি পাঙথোকপীবগীদমক রাস্ত্রপতি রামাফোসাবুসু তৌবীমল খঙবা উৎচরি।

থাগৎচরি।

খঙহনজবা – মসি প্রধান মন্ত্রীগী প্রেস স্তেৎমেন্তগী চাউরাকপা ৱাহন্থোক্নি। তশেংবা প্রেস স্তেৎমেন্তদি হিন্দীদা পীখিবনি।

***