ভারতকী প্রধানমন্ত্রী

ঐগী নুংশিরবা ইরৈচাশিং, খুরুমজরি! ঐখোয়গী মন কী বাত অসিসু কোরোনাগী চৈথেং ফংদবা নত্তে। মমাংদা ঐনা নখোয়দা মন কী বাত্তা ৱা ঙাংখিবা মতম অদুদা মী পুবা ত্রেনশিং, বসশিং অমসুং ফ্লাইৎশিং থবক লেপখি। হন্দক্তি শ্রমিক স্পিসিয়েল ত্রেনশিং থবক হৌরে; অতোপ্পা অখন্নবা ত্রেনশিংসু চেনবা হৌরে। চেকশিন-থৌরাংশিং পায়খৎতুনা ফ্লাইৎশিং অমুক পাইবা হৌরে; উদ্যোগসু হান্নগুম থবক হৌরে; অসুম্না শেন-থুমগী মরুওইবা শরুক অমা হাংদোকপা হৌরে। অসিগুম্বা ফিবম অমদা, ঐখোয় হেন্না চেকশিনবা অমসুং মিকুপ-নাহুম শিংবা দরকার ওইরি। ফীৎ ৬ থাপ্না লৈবা, মাইখুম উপ্পা নৎত্রগা য়ুমদা লেংদনা লৈবা দরকার ওইরবসু, ঐখোয়গী পুন্সি মহিংদা কোমথোকপা অমত্তা তৌরোইদবনি।

অপুনবা থবকশিং পায়খৎতুনা লৈবাক অসিদা কোরোনাগী মায়োক্তা অকনবা লাল শোক্নরি। ঐখোয়না মালেমগী ফিবম অসি য়েংবদা, তশেংনা ঐখোয় ভারতকী মীয়ামগী মাইপাকপশিং অদু উবা ফংলি। ঐখোয়গী অপুনবা মীশিং অসি লৈবাক কয়াগী অপুনবা মীশিংদগী শরুক কয়া হেল্লিবনি। লৈবাক অসিনা থেংনরিবা খুদোংচাদবশিং অসিসু তোঙাল্লি, অদুবু মালেমগী অতৈ লৈবাকশিংদা শন্দোক্লিবা অদুগুম্না লৈবাক অসিদদি য়াংনা শন্দোক্তে। ঐখোয়গী লৈবাক অসিনা কোরোনানা শিবগী চাংসু য়াম্না নেম্লি। ঐখোয়গী লৈবাক্কী লৈখিদ্রবশিং অদুগীদমক ঐখোয় পুম্নমক অৱাবা ফোংদোক্লি। অদুবু ঐখোয়না থৱায় কয়া কনবা ঙম্লিবা অসি লৈবাক অসিনা অপুনবা ৱারেপ অমা লৌবগী মহৈনি। ঐখোয়গী অসিগুম্না চাউবা লৈবাক অমদা, মী খুদিংমক থেংননবা ৱারেপ লৌখি; খোঙজং অসি মীয়াম্না লমজিংবনি।

মরূপশিং, মসিগী লানফম অসিদা, ঐখোয়গী ইরৈচাশিংগী ৱারেপকী মথক্তা, অতোপ্পা খ্বাইদগী চাউবা থৌনাদি মীয়ামগী থবক তৌনীংবগী ৱাখল্লোন অদুনি। মসিগী লাইচৎ মনুং অসিদা, থবক তৌবা অমসুং কৎথোকপা অসি ঐখোয়গী ফিবম খক নত্তনা, মসি ভারতকী পুন্সি মহিং অমনি হায়বা ভারতকী মীয়াম্না ময়েক শেংনবা প্রমান তৌরে। ‘সেবা পারমো ধর্ম’, থবক তৌবা অসি নুংঙাইবা অমনি… থবক তৌবা অসি মশামক অপেনবা অমনি হায়বা ৱাখল্লোল অসিগা ঐখোয়গা অমত্তা ওইরি। অতোপ্পশিংগী থবক তৌনবা কৎথোক্লিবা মীওই অমা কৈদৌঙৈদা নীংবা কাইবা নৎত্রগা শাওনীংবা অমত্তা লৈতে হায়বা নহাক্না খঙগদবনি। মহাক্কী পুন্সিগী মিকুপ খুদিং অমসুং পুন্সিদা য়েংলিবা মিৎয়েং অদুদা মশা-মরোমদোম থাজবা, অফবা অমসুং অচুম্বা য়াওরি।

মরূপশিং,

ঐখোয়গী দোক্তরশিং, নর্সশিং, সেনিতেসনগী শিন্মীশিং, পুলিসকী মীওইশিং অমসুং পাউমীশিংগী থবক তৌবগী ৱাখল্লোন ঐনা য়াম্না তোইনা পল্লি। মসিগী মন কী বাত অসিদসু ঐনা পল্লি। মীয়ামগী থবক তৌনীংবা মশিং থিঙমদ্রবা মীওই কয়া লৈরি। অসিগুম্বা মীওইশিংগী মনুংদা তামিলনাদুগী কে.সি. মোহনসু অমনি। মোহনজীনা মুদুরাইদা সেলুন অমা হাংখি। থবক কন্না শুদুনা, মহাক্না মহাক্কী মচানুপী লুহোংনবা লুপা লাখ ৫ তুংশিনখি। অদুবু হায়রিবা শেনফম অদু মহাক্না ৱারবা মতম অসিদা লায়রবশিং অমসুং তোল্লবশিংগীদমক শিজিন্নখি। হেন্দকার্ত অমা থৌরিবা অগরতালাগী গৌতম দাসজীনা মহাক্না তুংশিন্দুনা থম্লিবা নোংমগী তাল্লকপা শেনফমশিংদগী চেং অমসুং হৱাই লৈদুনা লায়রবশিংদা পীজখি। মসিগা মান্নবা খুদম অমা, ঐনা পঞ্জাবগী পাথানকোৎতগী তাখি। দিব্যাং রাজুনা অপীকপা শেনফম অমা পুথোক্লগা অতোপ্পশিংগী মতেংগা লোয়ননা মাক্স লিশিং অহুম শাখি অমসুং মীয়ামদা য়েন্থোকখি। ৱারবা মতম অসিদা রাজুনা ইমুং ১০০ রোমগী চানবা থৌরাং তৌখি।

নুপীশিংগী সেল্ফ হেল্প গ্রুপশিংগী মাইপাকপগী ৱারী কয়া লৈবাক্কী মফম কয়াদগী লাক্লি। খুঙ্গংশিং অমসুং অপীকপা তাউনশিংদা, ঐখোয়গী ইচলশিং অমসুং ইচানুপীশিংনা নোংমদা মাক্স লিশিং কয়া শারি। মসিগী থবক অসিদা মীয়ামগী লুপ কয়ানা মখোয়গী মতেং পাংলি।

কনাগুম্বা অমনা অসিগুম্বা খুদম কয়া নোংম-নোংমগী তারি অমসুং উরি। নমো এপ অমসুং অতোপ্পা মীদিয়াগী খুৎথাদা ঐঙোন্দা মীওই কয়ানা মখোয়গী ৱারীশিং লিরি। মতম ফংদবনা মরম ওইদুনা ঐনা মীয়াম, লুপশিং অমসুং ইন্সতিত্যুসনশিংগী মমিং পনবা ঙমদ্রে। অতোপ্পশিং মতেং পাংলিবা মীওইশিং ঐনা থাগৎলি। ঐনা মখোয় ইকায়খুম্নবা উৎলি অমসুং ঐগী থমোয়দগী মখোয়বু থাগৎলি।

ৱারবা তাঞ্জা অসিদা অনৌবা থবক কয়া পায়খৎপা অসি ঐগী থমোয়দা অপেনবা অমা ওইরে। লৈবাক অসিগী খুঙ্গংশিং অমসুং শহরশিংদা, অপীকপা ললোনবশিংগী হৌরগা স্তার্ত অপশিং, লেবশিংনা কোরোনা থেংননবা অনৌবা থবকশিং পায়খৎলি, অনৌবা পোৎলম কয়া পুথোক্লি।

নাসিক্কী রাজেন্দ্র য়াদবনা পায়খৎলিবা থবকশিং য়াম্না নুংঙাই। রাজেন্দ্রজী নাসিক্কী সাতনা খুঙ্গংগী লৌমী অমনি। কোরোনাদগী মহাক্কী খুঙ্গং কন্নবা, মহাকনা মহাক্কী ত্রেক্তরদা হাপ্নবা সেনিতাইজ তৌনবা মেছিন অমা পুথোকখি অমসুং মসিগী অনৌবা থবক অসি য়াম্না কান্নখি। ঐনা সোসিয়েল মীদিয়াদা ফোতো কয়া উখি। ফুৎ ৬ থাপ্না লৈনবা দুকান ফম্বা মীওইশিংনা মখোয়গী দুকানশিংদা অচৌবা পাইপ কয়া থমখি। পাইপ মচিন্দগী থাদরকপা পোৎ-চৈ অদু লৈবা লাকলিবশিংনা পাইপ মতোন্দা ওকখি। লাইরিক তম্বগী ওইনা অনৌবা থৌরাং কয়া পুথোক্নবা ওজাশিং অমসুং মহৈরোইশিং পুনখি। ওনলাইন ক্লাসশিং অমসুং ভিদিও ক্লাসশিং পায়খৎলে।।

কোরোনা তিকা পুথোক্নবা ঐখোয়গী লেবশিংদা পায়খৎলিবা থবকশিং মালেম্না য়েংনরি অমসুং মসিদা ঐখোয়না থাজবা থম্লি। হৌজিক ওইরিবা ফিবম অসি অহোংবা পুরকপদা, অনৌবা পুথোকপা অমা দরকার ওইরি। লেপ্তনা অনৌবা পুথোক্তুনা লাকপা মরম্না চহি লিশিং কয়া শুরবা মীওইবা খুন্নাইগী খোঙচৎ অসি ঙসিগী অনৌবা তাঙ্কক অসি য়ৌরকপনি। অসুম্না, হায়রিবা অখন্নবা অনৌবা পুথোকপা অসিনা ঐখোয়না লাইচৎ অসি মাইথিবা পীবা ঙমগনি।

মরূপশিং,

ঐখোয়না কোরোনা থেংনগদবা অসি য়াম্না ৱাৎলি। মসি মালেমগী ওইনা হিদাক লৈত্রিবা লাইচৎ অমনি মমাংদা থেংনখিবগী লৌশিং অমত্তা লৈত্রি। ফিবম অসিদা ঐখোয় অনৌবা খুদোংচাদবা অমসুং অৱাবা কয়া মায়োক্নরি। ভারত য়াওনা মালেমগী লৈবাক খুদিংমক কোরোনানা শোকহল্লি। ঐখোয় লৈবাক অসিদা লাইচৎ অসিনা শোকহন্দবা কাংলুপ অমত্তা লৈতে। শিন্মীশিংনা হেন্না শোকহল্লি। মখোয়গী অৱাবশিং অদু ৱাহৈশিংনা ফোংদোকপা ঙম্লোই। মখোয় অমসুং মখোয়গী ইমুংগী থেংনরিবা অৱাশিং ঐখোয়না খঙবা ঙম্লোই। ঐখোয় খুদিংমক্না… লৈবাক পুম্নমক্না মখোয়গী অৱাবা কোকহন্নবা হোৎনরি। মসিদা ঐখোয়গী রেলৱেজগী মীওইশিং অহিং-নুংথিল থবক তৌরি। কেন্দ্র, রাজ্যশিং, লোকেল বোদীশিং অমসুং মী খুদিংমক নুমিৎ চুপ্পা থবক তৌরি। চোকথবা লৈতনা থবক তৌরিবা ঐখোয়গী রেলৱেজগী মীওইশিং অসিসু কোরোনা লান্মীশিংনি। ত্রেনশিং অমসুং বসশিংদা শিন্মী লাখ কয়া পুরি, মখোয়গী চানবা পীরি, জীলা খুদিংমক্তা মখোয় ক্বরেনতাইন তৌরি, চাংয়েং তৌরি অমসুং লায়েংলি। হৌজিক থেংনরিবা ফিবম অসি লৈবাক অসি মিকপ থোক্নবা অমা ওইরি, মসি তুংগী পারা ওইহৌনবা খুদোংচাবা অমনি। ঙসি লৈবাক অসিগী নোংপোক থংবা শরুক্তা শিন্মী লৈতবগী অৱাবা থেংনরি। শিন্মী য়াম্না লৈবা লমদম অমনা লৈবাক অদু চাউখৎহনবদা মতেং পাংই, নোংপোক থংবা লমদম অসি চাউখৎহনবা দরকার ওইরি। নোংপোক থংবা লমদম অসি চাউখৎহল্লবা মতমদা লৈবাক অসিগী থোং মান্নবা শেন-থুমগী চাউখৎপা পুরকপা ঙমগনি। থবক তৌনবা মীয়াম্না ঐঙোন্দা খুদোংচাবা অমা পীরকপদগী, ঐখোয়না ভারতকী নোংপোক থংবা শরুক অসি মিৎয়েং চংলি। হৌখিবা চহী খরা অসিদা মসিগী মাইকৈদা থবক কয়া পায়খৎপা অসিদা ঐঙোন্দা অপেনবা পোকই।

রাজ্যশিংগী মরক্তা কোইনা চৎতুনা থবক শুরিবা শিন্মীশিংগী য়াইফনবা থবক কয়া পায়খৎলে। খুদম ওইনা, শিন্মীশিংগী স্কিল মেপ্পিংগী থবক পায়খৎলে; মফম খরদা মসিগী থবক অসি স্তার্ত অপশিংনা পায়খৎলে; মাইগ্রেসন কমিসন অমা লিংখৎনবা খন্নরি। খুঙ্গংদা থবক ফংহন্নবা, মশা মরোমদোম থবক পীজনবা অমসুং অপীকপা উদ্যোগশিং পায়খৎনবা হন্দক কেন্দ্র সরকারনা ৱারেপ লৌরে। লৌখিবা ৱারেপশিং অদুগী পান্দমদি ফিবম অসিদা পাম্বৈশিং থিদুনা মশা-মরোমদোম লেপচবা ভারত অমা শেমগৎপনি। ঐখোয়গী খুঙ্গংশিং, তাউনশিং, জীলাশিং অমসুং রাজ্যশিং মশা-মরোমদোম লেপচবা ঙম্লবদি, অসিগুম্বা ফিবম অসিদা অৱাবশিং থেংনরোই হায়বসি ঙসি ওইরিবা ফিবম অসিনা খুদম ওইরি।

অদুবু অমম্বদগী অঙানবদা লাকপা অসি মীওইবগী চৎনবী অমনি। অৱাবা কয়াগী মরক্তা, মশা-মরোমদোম লেপচবা ভারত অমগীদমক, আত্মনির্ভর ভারতকী মতাংদা লৈবাক মীয়ামদা ফোংদোকপা অসিনা ঐ হরাওই। হৌজিক মীয়াম্না মসি মখোয়গী খোঙজং অমা ওইনা লৌরে। মখোয়গী অনকপদা শাবা পোৎচৈশিংগী পরেং অমা মখোয়না শেমলে হায়না মীওই অয়াম্বনা ফোংদোক্লি। হায়রিবা মীওইশিং অসিনা হৌজিক অনকপদা শাবা পোৎচৈশিং খক লৈরে, ‘ইরৈবাক্কী পোৎ লৈবা’ অসি পুক্নিং থৌগৎলি। পুক্নিং থৌগৎনবা “মেক ইন ইন্দিয়া” অসি মীওই খুদিংমক্কী ৱাশক ওইরে।

ভারতনা মপান লৈবাকশিংদগী পোৎ লৈবা হন্থরকপা নুমিৎ অদুগী মহাক্না মঙ মঙলি হায়না নমো এপতা বিহারদগী শ্রীমান হিমানসুনা ঐঙোন্দা ইরকখি, পোৎলমশিং অদু পেত্রোল, দিজল, ইলেক্ত্রোনিক্কী পোৎলমশিং, য়ুরিয়া নৎত্রগা চানবা থাও ওইবা য়াই। মহাক্কী ৱাখল্লোনশিং অদু ঐ খঙই। মপান্দগী লৈরিবা পোৎচৈ কয়া অসিনা তেক্স থিবা মীওইশিংদা অরেম্বদা চাদিং তৌহল্লি। পোৎচৈশিং অদুগী মহুৎ ইরাই লাইনা ভারত্তা শাবা য়াগনি।

নুপীশিংনা শাবা ৱাগী পোৎথোকশিং মহাক্না ললোন-ইতিক তৌই হায়না অসমদগী সুদিপনা ঐঙোন্দা ইরকখি। মথং চহি ২দা মহাক্কী ৱাগী পোৎথোকশিং অসি মহাক্না মালেমগী ব্রান্দ অমা ওইহনগনি হায়না মহাক্না ৱারেপ লৌখি। চৎলিবা দেকেদ অসিদা আত্মনির্ভর ভারত কেম্পেন্না লৈবাক অসি অৱাংবা থাকশিংদা পুখৎকনি হায়না ঐনা চেৎনা থাজবা থম্লি।

ঐগী নুংশিরবা ইরৈচাশিং,

কোরোনাগী অৱাবা মরক অসিদা ঐনা মালেমগী লুচিংবা কয়াগা ৱারী শানখি। মালেমগী লুচিংবশিংগা ৱারী শানবা মনুংদা, য়োগ অমসুং অয়ুর্বেদ পাম্বগী অনীংবা ফোংদোরকখি। কোরোনাগী লাইচৎ অসি থেংনবদা য়োগ অমসুং অয়ুর্বেদনা মতেং পাংবা ঙমগদরা হায়না ঐঙোন্দা লুচিংবা কয়ানা হংলকখি।

মরূপশিং, মালেমগী য়োগ নুমিৎ লাক্লগনি। য়োগ অসি মীয়ামগী পুন্সি অমসুং মখোয়গী হকশেলগা অমত্তা ওইরি, মসি লেপ্তনা মীয়াম মরক্তা শানবা হেনগৎলকলি। কোরোনা লাইচৎ মনুংদা, হোলিৱুদতগী হৌরগা হরিদ্বার ফাওবা য়ুমদা লৈরিঙৈদা, মীয়াম্না থৱায় য়াওনা য়োগ শান্নখি। মফম খুদিংমক্তা মীয়াম্না য়োগ অমসুং অয়ুর্বেদগী মরমদা খঙবা পামখি অমসুং মসি পুন্সিগী শরুক অমা ওইনা লৌখি। মপুন্সিদা য়োগ শানদ্রিবা মীওই কয়া ওনলাইন য়োগ ক্লাসশিং শরুক য়াখি নৎত্রগা ওনলাইন ভিদিওশিংগী খুৎথাংদা য়োগ তমখি। তশেংনা য়োগ অসি মীয়ামগী, লায়না ঙাকথোক্নবা অমসুং অপুনবা শক্তমগী অফবা অমনি।

ভাইরস অসিনা ঐখোয়গী শ্বর হোনবগী কয়াৎশিং খ্বাইদগী শোকহনবা মরম্না, হৌজিক লাইচৎ মনুং অসিদা য়োগ অসি য়াম্না মরুওইরে। য়োগদা, ঐখোয়গী শ্বর হোনবগী কয়াৎশিং মপাঙ্গল কনখৎহনবা প্রনায়ম মখল কয়া লৈরি। মখোয় অসি মতম শাংনা শান্নরকপগী খঙলবা ঙাক্তনি অমসুং মখোয় মশাগী ওইবা কান্নবা কয়া লৈরি। মীওই অয়াম্বনা ‘কাপালবাতী’ অমসুং ‘অনুলোম-বিলোম প্রনায়াম’ খঙলে। ‘বাস্ত্রিকা’ ‘সিতালী’, ‘ব্রমরী’নচিংবা অতোপ্পা মওংশিংগী প্রনায়ম কয়া লৈরি। য়োগ শানবা হেনগৎহন্নবা আয়ুশ মন্ত্রালয়না থবক কয়া পায়খৎলে। আয়ুশ মন্ত্রালয়না ‘মাই লাইফ, মাই য়োগ’ কৌবা মালেমগী ভিদিও ব্লোগ চাংদম্নবা অমা হৌদোক্লে।

ভারত মচাশিং খক নত্তনা, মালেমগী মফম কয়াগী মীওইশিং মসিগী চাংদম্নবা অসিদা শরুক য়াবা য়াগনি। মসিগী মালেমগী ভিদিও ব্লোগ চাংদম্নবা অসিদা শরুক য়ানবা নহাক্না মিনিৎ অহুমগী ভিদিও অমা শেম্লগা মদু অপলোদ তৌগদবনি। ভিদিও অদুনা নহাক্না য়োগ শানবা উৎকদবনি অমসুং য়োগনা নহাক্কী পুন্সিদা পুরকপা অহোংবশিং ফোংদোক্কদবনি। মালেমগী য়োগ নুমিৎকী শরুক অমা ওইনা নহাক্না মসিগী চাংদম্না অসিদা শরুক য়ানবা ঐনা নখোয় ময়ামদা হায়জরি।

মরূপশিং, ঐখোয়গী লৈবাক্তা, চহি কয়া লায়রবা মীওই করোর কয়া করিগুম্বা মখোয় নারবদি লায়েংনবা নৎত্রগা মখোয়গী ইমুং পুনবা শেন তানবগী মতাংদা থৱায় ৱানা হিংদুনা লাক্লি। মসিগী অৱাবা অসি খঙলদুনা, মসিগী অৱাবা অসি কোকহন্নবা চহি অমগা মখাইগী মমাংদা আয়ুশ্মান ভারত স্কিম হৌদোকখি। নুমিৎ খরনিগী মমাংদা, আয়ুশ্মান ভারতকী কান্নবা ফংলবা মীওই করোর অমা হেনখ্রে। ঐখোয়গী লৈবাক্কী ইমুং করোর ১ হেনবগী মীওই করোর ১ হেন্না কান্নবা ফংলে। অনাবা মীওই করোর ১ হায়রিবা অসিগী ৱাহন্থোক নহাক খঙলবরা? মসিনা তাক্লিবসি তেল্লবা মতম অসিদা নোরৱে অনি অমসুং শিঙ্গাপুর অনিগী অপুনবা মীশিং লেম্না লায়েংখ্রে হায়বনি।

করিগুম্বা লায়রবশিংনা লায়েংলবা মতুংদা শেন পীগদবা ওইরবদি, মখোয় মশাগী ফুরিৎখাওদগী চাউরাক্না লুপা করোর লিশিং ১৪ রোম চাদিং তৌগনি। আয়ুশ্মান ভারত স্কিমনা লায়রবশিংনা চাদিং তৌগদবা য়াম্লবা শেনফম অসি কনবা ঙমলে। আয়ুশ্মান ভারতকী বেনিফিসরীশিং খক থাগৎপা নত্তনা, স্কিম অসিগী মখাদা অনাবশিং লায়েংলিবা দোক্তরশিং, নর্সশিং অমসুং মেদিকেল স্তাফশিং ঐনা থাগৎলি। স্কিম অসি মফম হোংদোক হোংজিন য়াবা অসিনা লৈবাক অসিগী অপুনবা শক্তম অমা শেমগৎপদা মতেং পাংলি, হায়বদি বিহারদগী মীওই অমা মসিগী মেদিকেলগী কান্নবা অসি কর্নাতাকাদা ফংবা য়াগনি। করিগুম্বা মহারাস্ত্রগী লায়রবা মীওই অমা তমিল নাদুদা লায়েংবা য়াগনি। মসিগী স্কিম অসিনা মরম ওইদুনা, মেদিকেলগী খুদোংচাবা ৱাৎনা লৈবা মফম অমগী লায়রবা মীওই অমনা লৈবাক অসিগী মফম অমদা লৈবা খ্বাইদগী ফবা লায়েংবগী খুদোংচাবা লৌবা য়াগনি। কান্নবা ফংলবা মীওইশিংগী চাদা ৮০ লৈবাক অসিগী খুঙ্গংশিংদগীনি হায়বা খঙবদা নহাক অঙকপা পোক্কনি। কান্নবা ফংলবা মীওইশিংগী চাদা ৫০ ঐখোয়গী ইমাশিং, ইচলশিং অমসুং ইচানুপীশিংনি। মখোয়গী মনুংদা চাদা ৭০ ওপরেসন পাংথোকখি। হায়রিবা মীওইশিং অসি কমদৌনা মখোয়গী অৱাবশিং কোকখিবগে হায়বা নহাক খল্লু।

মনিপুরগী চুরচান্দপুরদগী চহি ৬শুরবা কেলাশাং আয়ুশ্মান ভারত স্কিমদগী নৌবা মপোক অমা পোকখি। কেলাশাং ব্রেনগী শাথিরবা অনাবা অমা মায়োক্নখি। কেলাশাংগী মমা-মপা লায়রবা শিন্মী অমা ওইবনা মখোয়গী মচা লায়েংবদা অৱাবা ওইখি। অদুবু আয়ুশ্মান ভারত স্কিমনা মরম ওইদুনা হৌজিক মখোয়গী মচানুপা লেম্না লায়েংবা ফংলে। পুদুচেরীগী অমুরথা ভাল্লীসু লেম্না লায়েংবগী খুদোংচাবা ফংখি। অমুরথা ভাল্লীগী মপুরোইবা থমোয়গী লায়না অমনা শিখি। চহি ২৭ শুরবা মহাক্কী মচানুপা জীবসু থমোয়গী অনাবা লৈখি অমসুং দোক্তরশিংনা জীবা সর্জরী পাংথোক্নবা হায়খি, অদুবু জীবা নোংমগী শুরগা হিংবা শিন্মী অমা ওইবনা অসিগুম্বা অচৌবা ওপরেসন অসি পাংথোকপা ঙমখিদে। অদুবু অমুরথা ভাল্লীনা মহাক্কী মচানুপা আয়ুশ্মান ভারত স্কিমদা মিংচনখি অমসুং নুমিৎ ৯গী মতুংদা জীবা ওপরেসন পাংথোকখি।

মরূপশিং, ঐনা শুপ্নগী ৱারী অহুম-মরি খক লিরি অদুবু আয়ুশ্মান ভারতকা মরী লৈনবা ৱারী করোর কয়া লৈরি। নহাক্কী মতম শংবা মতমদা আয়ুশ্মান ভারত স্কিমগী মখাদা লায়েংবগী খুদোংচাবা ফংলবা মীওইশিংগা ৱারী শাননবা ঐনা হায়জরি। ঐখোয়গী লৈবাক্কী পুকচেল শেংনা তেক্স থিরিবা মীওইশিংদা ঐনা হায়নীংলি মদুদি নখোয়না পুকচেল শেংনা তেক্স পীরকপদগী অমসুং অফবা থবক কয়া তৌবদগী আয়ুশ্মান ভারত স্কিমগী মখাদা মীওই করোর কয়া লেম্না লায়েংবা ফংলিবনি।

ঐগী নুংশিরবা ইরৈচাশিং,

অতোপ্পা অমদা কোরোনা লাইচৎ থেংননবা ঐখোয় থবক চিল্লি অদুগা অতোপ্পা অমদা, ভারতকী নোংপোক থংবা মফম খরদা ঐখোয় নোংলৈ-নুংশিৎকী অৱাবা মায়োক্নখি। হৌখিবা চয়োলশিংদা নোংলৈ-নুংশিৎ অম্ফান্না নোংচুপ বঙ্গাল অমসুং ওরিশাদা অমাং-অতা থোকহনখি। য়ুম কয়া তেকখি। লৌমীশিং য়াম্না মাংখি। হৌখিবা চয়োলদা ঐ নোংচুপ বঙ্গাল অমসুং ওরিশাগী ফিবম য়েংখি। অৱাবা অসি থৌনা ফনা থেংনখিবা নোংচুপ বঙ্গাল অমসুং ওরিশাগী মীয়ামগী থৌনা অদু থাগৎলি। মসিগী ৱারবা মতম অসিদা রাজ্য অনি অসিগী মীয়ামগীদমক লৈবাক অসিনা অমত্তা ওইনা লেপ্লি।

মরূপশিং, ভারতকী নোংপোক থংবা মফম খরদা ঐখোয় নোংলৈ-নুংশিৎকী অৱাবা মায়োক্নরি, অদুগা লৈবাক্কী অতোপ্পা মফম খরদা কৌজেংশিংনা লান্দারকখি। কৌজেংগী লাল অসি নুমিৎ কয়ানি চংখি অমসুং পাক্লবা মফমশিং শোকহনখি। লৌমীশিং মতেং পাংনবা খক নত্তনা ৱারবা তাঞ্জা অসিদা অমাং-অতা থোকপা হন্থনবা ভারত সরকার, রাজ্য সরকারশিংনা অনৌবা তেক্নোলোজী কয়া শীজিন্নরি। অনৌবা থবকশিং পায়খৎনবা পুক্নিং চংলি অমসুং মসিনা ঐখোয়গী লৌউ-শিংউগী থবকশিংদা পীরকলিবা অকায়বশিং লাকশিনগনি হায়না ঐনা থাজবা থমলি।

মরূপশিং,

লাকলিবা জুন ৫দা মালেমগী অকোয়বগী ফিভমগী নুমিৎ পাংথোক্কনি। চহি অসিগী মালেমগী অকোয়বগী ফিভমগী নুমিৎগী পান্দমদি ‘বাইওদাইবর্সিতী’ হায়বনি। মসিগী পান্দম অসি হৌজিক্কী ফিবম অসিগা চুনরে। অথিংবা থমলিবা মনুংদা পুন্সিগী খোঙজেলদা তপথরবসু ঐখোয়গী অকোয়বগী ফিবম অসি অমুক হনগৎনবা য়েংনবগী খুদোংচাবা অমা লোকদাউন্না ঐখোয়দা পীরে। খোঞ্জেল অমসুং নুংশিৎকী পোলুসন্না মরম ওইদুনা উবা ফংখিদ্রবা উচেক মখল কয়া হৌজিক চহি কয়াগী মতুংদা মীয়াম্না মখোয়গী ফজরবা খোঞ্জেল তাবা ফংলে।

শা-উচেকশিংগী মতাংদা সোসিয়েল মীদিয়াদা নহাক্না পারে অমসুং ক্লিপ কয়া উরে। মীয়াম্না মখোয়গী য়ুমশিংদগী য়াম্না থাপ্না লৈবা চীং কয়া উবা ঙম্লে হায়না ফোতো থাগৎপা, ইবা অমসুং কমেন্ত পীবা থেংনরে। হায়রিবা ফোতোশিং অসি উবদা, ঐখোয় ময়ামগী থমোয়দা ৱাশক অমা লৌগদবনি – ঐখোয়না ফজরবা অকোয়বগী ফিবম অসি মতম চুপ্পগী ওইনা কনবা ঙমগদরা? হায়রিবা ফোতোশিং অসিনা অকোয়বগী ফিবম কন্নবা করিগুম্বা খরা পাংথোক্নবা মীয়ামদা ইথিল পীখি। শা-উচেকশিং মনীং তম্না লৈনবা অমসুং অতিয়া অসি অমোৎপা লৈতনবা, পুন্সি অসি অকোয়গী ফিবমগা নুংশিননা লৈমিন্ননবা ঐখোয় হোৎনগদবনি।

ঐগী নুংশিরবা ইরৈচাশিং,

ঈশিংনা থৱায়নি হায়বা ঐখোয় তোইনা তারে। ঈশিং লৈরবদি হয়েং লৈগনি, অদুবু ঈশিং ফংনবা ঐখোয়গী থৌদাং লৈরি। ঐখোয়না নোংগী ঈশিং তুংশিনগদবনি। মরিক খুদিংমক তুংশিনগদবনি। কমদৌনা ঐখোয়না নোংগী ঈশিং তুংশিনগনি। করিগুম্বা ঈশিং অসি নুমিৎ ৫ নৎত্রগা চয়োল অমা থমলবদি, মসিনা মালেম ইমাগী খৌরাংবা কোকহনগনি, ঈশিং অদু লৈনুংদা চুপশিনখিগনি, মরম অদুনা নোংজু থা লাকপদা ঐখোয়না ঈশিং তুংশিন্দুনা থমহৌগদবনি।

ঐগী নুংশিরবা ইরৈচাশিং,

লু-নানবা অকোয়বগী ফিবম অমা লৈহনবা অসি ঐখোয়গী পুন্সিগী শরুক অমনি অমসুং ঐখোয়গী অঙাংশিংগী তুংগী ওইহৌগনি। মরম অদুনা মসিগী ৱাফম অসি ঐখোয় খুদিংমক্না খঙজিনগদবনি। হন্দক্কী মালেমগী অকোয়বা ফিবম নুমিৎ অসিদা উ খরা থানবা অমসুং মহৌশাগা লোয়ননা হিংমিন্নবা ৱারেপ খর লৌনবা ঐনা নখোয়দা হায়জরি। হৌজিক কালেন য়ৌরক্লে, মরম অদুনা উচেকশিং ঈশিং পীথকপা কাউগনু।

মরূপশিং,

ঐখোয় খুদিংমক্না পুক্নিংদা খনগদবনি মদুদি অসুক য়াম্না অৱাবা খাংলবা মতুংদা, লৈবাক অসিনা ফিবম অসি লাকশিন্নবা মায়োক্নরিবা অসি লেম্না মাংলোই। মসিগী লাল অসিদা ঐখোয় শোন্থরোইদবনি। চেকশিন্দবা তৌরোইদবনি। কোরোনা থেংনবা অসি হৌজিক ফাওবা অরুবা ওইরি!

নহাক, নহাক্কী ইমুং-মনুং হৌজিক ফাওবা কোরোনাগী খুদোংথিবা মায়োক্নরি। ঐখোয়না মীওইবা খুদিংমক্কী পুন্সি কনগদবনি, মরম অদুনা ফুৎ ৬ থাপ্নবা, মাক্স উপ্পা অমসুং খুৎ হাম্বগী চেকশিন-থৌরাংশিং অসি মমাংদা পাংথোকখিবা অদুগুম্না চেকশিন্না ইনগদবনি। হায়রিবা চেকশিন-থৌরাংশিং অসি নশামক্কী, নহাক্কী নুংশিরবা মীওইশিংগী অমসুং নহাক্কী লৈবাক্কীদমক নহাক্না ইনগনি হায়না ঐনা থাজবা থম্লি। মসিগা লোয়ননা, নখোয় হকচাং ফনা লৈনবা ঐগী য়াইফ-পাউজেল পীজরি। অনৌবা হীরমশিংগা লোয়ননা মথং থাগী ‘মন কী বাত’কী অতোপ্পা তাঙ্কক্তা ঐখোয় উনগনি।

অদোম্বু থাগৎচরি।

***