ভারতকী প্রধানমন্ত্রী

ঐগী নুংশিরবা ইরৈবাকচাশিং, খুরুমজরি। মসি ২০১৮গী অহানবা ‘মন কী বাত’নি অমসুং নুমিৎ নিনিগী মমাংদা ঐখোয়না লৈবাক অসিগী গনতন্ত্র নুমিৎগী থৌরম্বু য়াম্না পুকনীং চংনা পাংথোকখ্রে লোইননা পুৱারীদা অহানবা ওইনা লৈবাক তরাগী মকোকশিংনা থৌরম অদুদা শরুক য়াখি।

ঐগী নুংশিজরবা ইরৈবাকচাশিং, ঙসি শ্রীমান প্রকাশ ত্রিপাথীনা নরেন্দ্র মোদী এপতা অশাংবা চিথী অমা ইবীরকই অমসুং ঐঙোন্দা মাগী চিথী অদুদা ইরিবা হিরমশিং অদু ময়েক শেংহন্নবা ফোংদোকপীরকই। মহাক্না ইরকই, ফেব্রুৱারী ১ অসি স্পেস্তা চৎখিবী কল্পনা চাওলাগী লৈখিদবা নুমিৎনি। কলম্বীয়া স্পেস ক্রাফকী লাইবক থিবা থৌদোক অদুদা মহাক্না ঐখোয়বু থাদোক্তুনা চৎখ্রে অদুবু মালেম অপুম্বগী নহারোল লাখ কয়াদা পাউজেল অমদি পীবীরম্মি। মাগী শাংলবা চিথী অসিগী অহৌবদা কল্পনা চাওলাগী কাইনা ৱারোলনা হৌবীরকপগীদমক ঐনা প্রকাশপু থাগৎচরি। ঐখোয়না কল্পনা চাওলাবু য়াম্না নৌনা কাইনখি। অদুবু মানা হিংলিঙৈদা তৌবীরম্বা থবকশিং অদুনা মালেমদা, মরু ওইনা ভারতকী নুপীমচাশিংদা নুপীগী পাঙ্গলগী ঙমখৈ লৈতে হায়বদু উৎথোক্লম্মি। নীংখ্রবা অমসুং তৌগে হায়না খনখ্রবদি তৌবা ঙমদবা করিসু লৈতে। ঙসি ভারত্তা নুপীশিংনা হিরম খুদিমক্তা মাংজিল থাদুনা লৈবাক্কী মিংচৎ হেনগৎহল্লিবা অসি উবদা য়াম্না নুংঙাইবা ফাওই।

থাইনা মমাংঙৈদগী হৌনা ঐখোয়গী লৈবাক্তা নুপীশিংবু ইকাই খুম্নবা, খুন্নাইদা মখোয়গী ফিভম অমদি মখোয়না থৌদাং য়াবীরম্বশিং, পুম্নমক অসিনা মালেম পুম্ববু ঙকহন্দুনা লাক্লি। ভারতকী লাইরিক হৈবীশিংগী শাংলবা চৎনবী অমা শেমদুনা লাক্লি। বেদশিং ইবদা ভারতকী লাইরিক হৈবী কয়াগী থৌদাং য়াওরিবনি। লোপামুদ্রা, গার্গী, মৈত্রেয়ীনচিংবা কয়া কয়ানি। ঙসি ঐখোয়না ‘বেতী বচাও, বেতী পঢ়াও’ হায়রি অদুবু য়াম্না কুইরবগী মমাংদা ঐখোয়গী শাস্ত্রদা, স্কন্দ পুরান্দা, হায়রি –

দসপুত্র, সমাকন্যা, দশপুত্রান প্রবর্ধ য়ন।

য়ৎ ফলং লভতেমর্ত্য, তৎ লভ্যং কন্যকৈকয়া॥

হায়বদি, ইচানুপী অমগা ইচানুপা তরাগা মান্নৈ। ইচা নুপা তরাদগী ফংবা পুন্যা অদুগা ইচা নুপী অমদগী ফংবা পুন্য অদুগা চপ মান্নৈ। মসিনা ঐখোয়গী খুন্নাইদা নুপীগী ফিভম অমসুং মগুন অদু ফোংদোকই। মরম অদুনা ঐখোয়গী খুন্নাইদা নুপীবু শক্তিগী থাক্তা থাংগৎলিবনি। নুপীগী অসিগুম্লবা শক্তি অসিনা খুন্নাই অমদি ইমুং-মনুংবু অমত্তা ওইনা পুন্সিল্লি। বেদগী মতমগী হৈথোই-শিংথোইরবী লোপামুদ্রা, গার্গী, মৈত্রেয়ীগী লৌশিং নত্রগা মহাদেবী অমসুং মীরাবাইগী লৌশিং অমসুং লাইনীংবু ওইরবসু নত্রগা অহিল্যাবাই হোলকরগী লৈঙাক-লোন নত্রগা রানী লক্ষ্মীবাইগী থৌনাবু ওইরবসু, অসিগুম্বা নুপীগী থৌনাশিং অসিনা ঐখোয়দা ইথিল পীদুনতা লাক্লি। লৈবাক অসিগী ইকাই খুম্নবা হেনগৎহন্দুনতা লাক্লি।

শ্রীমান প্রকাস ত্রিপাথীনা খুদম কয়া অমসু পীবীরকই। মহাক্না ইবীরকই ঐখোয়গী থৌনা ফবী ঙাক-শেলগী মন্ত্রী নির্মলা সীতারমন্না ফাইতর প্লেন সুখোই ৩০ পাইখিবা অদুনা মখোয়দা থৌনা হাপকনি। মহাক্না বার্তিকা জোশীনা লুচীংদুনা মালেম কোইরিবা আইএনএসভি তারিনীগী নুপী নেভী ক্র্যুশিংগী মরমদসু পল্লকখি। থৌনা ফবী নুপী ভাবনা কন্থ, মোহনা সিংহ অমসুং অবনী চতুর্বেদীনা ফাইতর পাইলোৎ ওইদুনা সুখোই-৩০গী ত্রেনিং তৌরি। ক্ষমতা বাজপেয়ীনা লুচীংবা ওল ৱুমেন ক্র্যুনা দিল্লিদগী অমেরিকাগী সন ফ্রান্সিস্কো ফাওবা হনগৎ হন্দা এয়র ইন্দিয়া বোইং জেৎ পাইখি পুম্নমক নুপী ঙাক্তনি। অদোম্না হায়বীরিবা অদু অচুম্বনি। ঙসিদি নুপীশিংনা হিরম খুদিংমক্তা মাংজিল থাবতা নত্তনা লুচীংবীসু ওইরক্লি। ঙসিদি হিরম খুদিংমক্তা মখোয়গী থৌনা হান্না উৎননবা হোৎনরক্লি। মাইলস্তোন অমা শেমগৎলি। নুমিৎ খরনিগী মমাংদা ইকাইখুম্নরবা রাষ্ট্রপতিনা ৱাফম অমা হৌদোকপীখি।

রাষ্ট্রপতিনা মশা মশাগী লমদা থোইদোক হেন্দোক্না থবক তৌরিবী অথোইবী নুপী কাংবু অমগা উন্নখি। মখোয় অদু লৈবাক অসিগী ৱুমেন এচিভর্স ঙাক্তনি, অহানবা নুপী মার্চেন্ত নেভী কেপ্তেন, পেসেঞ্জর ত্রেনগী অহানবা নুপী ত্রেন দ্রাইভর, অহানবা নুপী ফায়র ফাইতর, অহানবা নুপী বস দ্রাইভর, এন্তার্ক্তিকা য়ৌখিবী অহানবা নুপী, এবরেস্ত কাখিবী অহানবা নুপী, অসুম তৌনা হিরম খুদিংগী অহানবা নুপীশিং অসিনা খুন্নাইগী চৎনবী থাজনবীশিংবু থুগাইরগা ময়ামগা মান্নদবা মওংদা মিংচৎ উরোং খিল্লমখি। হোৎনবা কনবা, পুক্নীং চংবা অমদি ৱাশক চেৎপনা খুদোং থিবা কয়া অমসুং অথিংবা কয়াবু লান্থোক্তুনা অনৌবা লম্বী শেম্বা ঙম্মি হায়বসি উৎলি। মসিনা মশুং মমান্নবীশিংদা নত্তনা হৌরক্লিবা মীরোলশিংদসু ইথিল পীরি। অসিগুম্বা নুপী এচিভর্স, অহানবা নুপীশিংগী মরমদা লাইরিক অমসু শেম শারে মসিনা লৈবাক অসিগী নুপীশিংগী থৌনাগী মরমদা খঙহন্দুনা মখোয়গী পুন্সি অমসুং থবক্তগী ইথিল পোকহনবা ঙমগনি। মসি নরেন্দ্র মোদী ৱেবসাইত্তা ই-বুক ওইনা ফংবীগনি।

ঙসি লৈবাক অসিদা অফবা অহোংবা অমা লাক্লিবা অসিদা লৈবাক অসিগী নুপীশিংগী থৌনাগী থৌদাং চাওনা য়াওরি। নুপীশিংদা শক্তি শিন্নবগী নৈনরিঙৈ চৈরক অসিদা ঐ রেলৱে স্তেসন অমগী মরমদা পঞ্জগে। ময়াম্না খনবীরিবসি নুপীদা শক্তি শিন্নবগা রেলৱেগা করি মরি লৈনবগে হায়বা অসিনি। মুম্বৈগী মাতুঙ্গা স্তেসন অসি নুপী ঙাক্তনা থবক তৌবা ভারতকী অহানবা স্তেসন্নি। বিভাগ খুদিংমক্তা নুপী ঙাক্তনি। কমর্সিএল দিপার্তমেন্ত ওইরো, রেলৱে পুলিস ওইরো, তিকেৎ চেকিং ওইরো, এনাউন্সিং ওইরো, পোইন্ত পার্সন ওইরো, নুপী স্তাফ ৪০দগী হেন্না লৈ। হন্দক মীয়াম্না গনতন্ত্র নুমিৎকী পেরেদ য়েংলুরবা মতুংদা ত্বীত্তর অমদি অতৈ সোসিয়েল মীদিয়াদা ইনরক্লিবা অসি নুপীশিংতগী ওইবা বিএসএফকী বাইকর কন্তিংজেন্ত অদুগী মরমদনি। থৌনা ফনা পাংথোকখিবা থৌরম অদুদা মপান লৈবাক্তগী লাকখিবশিংনা অঙকপা পোক্নখি। মসি শক্তি শিন্নবা অমসুং মশা মরোমদোম লেপচবগী খুদম অমনি। ঙসিদি ঐখোয়গী নুপীশিংগী শক্তি অসিনা হিরম খুদিংমক্তা লুচীংলি, মশা মরোমদোম লেপচবা ঙমজরি। মতাং অসিদা ছতিসগরগী আদিবাসী নুপীশিংগী ৱাফম অমা নীংশিংলকই। মখোয়না অনৌবা শক্তম অমা উৎখ্রে। আদিবাসী নুপী হায়বসিদা ঐখোয়না মিত্তা উরিবা অসি উমং, খোং-লম্বী, কোক্তা শিং পুরগা চৎলিবী নুপীশিং অসিনি। ছতিসগরগী দান্তেবারা অসি মাওইস্তশিংগী চৈথেং ফংলবা লমদমনি। মীহাৎ-মীপুন, ওৎপা নৈবা, ভোম, নোংমৈ, পিস্তোল – শিজিন্নদুনা মাওইস্তশিংনা অকিবা ফিভম অমা ওইহল্লি। অসিগুম্বা খুদোং থিখ্রবা মফম অসিদা আদিবাসী নুপীশিং অসিনা ই-রিক্ষা থৌদুনা মশা মরোমদোম লেপচনবা হোৎনরি। তেনখ্রবা মতমগী মনুংদা নুপী কয়া শিনফম অসিদা খুৎলোইরক্লি। মসিনা হিরম অহুমদা কান্নবা পীরি, অমরোমদা মশানা মশাবু থবক পীজদুনা শক্তি লৈবী ওইহল্লে। মসিনা মাওইস্তশিংনা ওৎপী নৈবীরবা লমদম অদুগী শক্তম অদু হোংহল্লক্লি। লোইননা অকোইবগী ফিভম কনবদা মতেং পাংলি। মফম অসিগী দিস্ত্রিক্ত এদমিনিস্ত্রেসন্না গ্রান্ত পীবদগী হৌরগা ত্রেনীং ফংহনবা ফাওবদা মতেং পাংদুনা নুপীশিংগী মাই পাকপা অসিদা অচৌবা থৌদাং য়ারি।

ঐখোয়না ৱাফম অমা হঞ্জিন হঞ্জিন তারি। মীশিংনা ঙাংনৈ, ঐখোয়গী ৱাখল থৌনা হন্থদবগী মরম অমা লৈ। মদুদি ফ্লেক্সিবিলিতী, ত্রান্সফোর্মেসন্নি। মতাংনা মতম্না য়াদবা অদু থাদোকপা, তঙাইফদবা অদু শেমদোক-শেমজিন তৌবগী অয়াবা পীবা। অদুগা ঐখোয়গী খুন্নাইগী থোইদোকপা মগুন অমনা ইশানা ইশাবু শেমদোকচনবা লেপ্তনা হোৎনবা অসিনি। মসি ভারতকী চৎনবী অমা ওইনা লৈরক্লি। মশানা মশাবু শেমদোকচনবগী মওং লৈবা অসিনা খুন্নাই অদু হিংহল্লিবনি। খুন্নাইদা লান্না চৎনবা অমসুং লান্না লমজিংবগী মায়োক্তা লৈবাক অসিদা চহি চা কয়াদগী হোৎনদুনা লাক্লি। মতাং অসিদা বিহারদা নুংঙাইরবা থৌদোক অমা থোকখি। রাজ্য অদুদা খুন্নাইগী অরানবা চৎনবী অদু থিংনবা কিমি লিশিং ১৩ হেন্না শাংবা মালেমদা খ্বাইদগী শাংবা হ্যুমেন চেন শেমখি। খোংজং অসিনা মীয়াম্না অঙাং লুহোংবা অমদি অউনপোৎকী চৎনবীশিং অসিগী মায়োক্তা মীয়ামদা ৱাখল তাহনখি অমদি মসিগী মায়োক্তা লান্থেংননবা ৱাশকনখি। অঙাং, অহল, ঈ খেংগৎলক্লিবা নহারোলশিং, মমাশিং, মচল-মচেশিং পুম্নমক্না খোংজং অসিদা শরুক য়াখি। পতনাগী পুৱারীগা শাগোন্নরক্লবা গান্ধী মৈদান্দগী হৌরগা রাজ্যগী ঙমখৈ ফাওবা তৎহন্দনা শেমখি। অরানবা চৎনবীশিং অসিদগী নান্থোক্লবদি খুন্নাইদা লৈরিবা মীয়াম পুম্বা চাং মান্ননা চাওখৎমিন্নবা ঙমগনি। ঐখোয়না অমত্তা ওইনা ৱারেপ লৌদুনা অনৌবা ভারত, মশানা মরোমদোম লেপচবা অমসুং মতিক চাবা ভারত অমা শেম্লসি। খুন্নাই চাওখৎনবগী মাইকৈদা অসুম্না পাক চাওনা মপুং ফানা থৌদাং য়াখিবগীদমক ঐহাক্না বিহারগী মীয়াম, রাজ্য অসিগী মুখ্যমন্ত্রী, মফম অদুগী লৈঙাক অমদি হ্যুমেন চেন্দা শরুক য়াখিবা মীয়াম পুম্নমকপু থাগৎচরি।

ঐগী নুংশিজরবা ইরৈবাকচাশিং, মৈসুর, কর্নাতক্কী শ্রীমান দর্শন্না মাই গোবতা ইবীরকই – মহাক্কী মপাগী লায়েংবদা থা অমদা লুপা লিশিং ৬ চংলম্মি। অহানবদা মহাক প্রধানমন্ত্রী জন-ঔষধি য়োজনাগী মরমদা খঙলমদে। অদুবু হৌজিক্তি মহাক জন-ঔষধি কেন্দ্রগী মরমদা খঙবদগী মহাক্না মফম অদুদগী হিদাক লৈরে অদুনা মহাক্কী হিদাক্কী চাদিং চাদা ৭৫ হন্থরে। মহাক্না ঐঙোন্দা ৱাফম অসি মন কী বাত্তা ফোংদোক্নবা হায়বীরকই। মরমদি মসিনা মীয়ামদা পাউজেল অসি য়ৌহনবগা লোইননা কান্নবা লৌবা ঙমগনি। হিরম অসিদা মতম খরগী মমাংদগী মীওই কয়ানা ঐঙোন্দা ইবীরকখি। মসিগী কান্নবা ফংবগী ভিদিও কয়া সোসিএল মেদীয়াদা উবা ফংই। ৱাফমশিং অসি খঙজবদা ঐহাকসু য়াম্না নুংঙাইবা ফাওজৈ। শ্রীমান দর্শনজীনা মহাক্না ফংবা খুদোংচাবা অদু অতৈদসু ফংহন্নীংবগী ৱাখল্লোন অমা ফাওবীরিবা অদু য়াম্না নুংঙাইবা ফাওই। থৌরাং অসিগী পান্দমদি হেল্থ ক্যারবু এফোর্দেবল ওইহনবা অমসুং ইজ ওফ লিবিংবু পুক্নীং থৌগৎপনি। জন ঔষধিদা ফংবা হিদাকশিং অসি কৈথেলদা ফংবা ব্রান্দেদশিং অসিদগী ৫০%দগী ৭০% ফাওবা হোংই। মসিনা মীচম মীয়াম অমদি নুমিৎ খুদিংগী হিদাক চাবা অহল-লমলশিংদা থোইদোক্না কান্নবা ফংহনগনি। মসিদা ফংলিবা জেনরিক হিদাকশিং অসি ৱার্ল্দ হেল্থ ওর্গনাইজেসন্না লেপ্পা স্তেন্দর্দতা শেম্বনি। মরম অসিনা অফবা ক্বালিতীগী হিদাক্ত অহোংবা মমলদা ফংলে। লৈবাক অসিদা জন-ঔষধি কেন্দ্র লিশিং ৩দগী হেন্না লৈরে। মসিনা অহোংবা মমলদা হিদাক ফংহনবতা নত্তনা ইন্দবিজুএল ইন্ত্রপ্রিনরশিংদা থবক ফংবগী খুদোংচাবশিংসু হেনগৎহল্লে। অহোংবা মমলগী হিদাকশিং অসি প্রধানমন্ত্রী ভারতীয় জন-ঔষধি কেন্দ্রশিং অমসুং হোস্পিতালশিংগী ‘অমৃত স্তোরশিং’দা ফংগনি।

নুংশিরবা ইরৈবাকচাশিং, মহারাষ্ট্রদগী শ্রীমান মঙ্গেশনা নরেন্দ্র মোদী মোবাইল এপতা ফোতো অমা শ্যার তৌবীরকই। ফোতো অদু য়েংলুবদা ঐগী মিৎফম হোংবা ঙমখিদে। ফোতো অদুদা অঙাং অমনা মপুবোক্কা লোইননা ‘ক্লীন মোরনা রিভর’ শেংদোকপগী খোংজংদা শরুক য়ারি। ঐহাক্না তাজবদা অকোলাগী মীয়াম্না ‘স্বচ্ছ ভারত অভিয়ানগী’ মখাদা মোরনা তুরেল শেংদোকপগী খোংজং অমা চংশিল্লি। হান্নদি মোরনা তুরেল অসি চহি চুপ্পা চেল্লম্মি। অদুবু হৌজিক্তি নোংজু থাগী মতম খক্তদা চেল্লে। হেন্না নুংঙাইতবা ৱাফম অমনা তুরেল অসি নাপী-শিংনাংতনা পীক থনখ্রে। তুরেল খোংনুং অমসুং মপান্দা অমোৎপা কয়া হুঞ্জিল্লে। এক্সন প্লান অমা শেম্লগা মক্র সংক্রান্তী নোংমা মাংজৌননা জনুৱারী ১৩দগী ‘মিশন ক্লীন মোরনা’গী অহানবা তাঙ্কক ওইনা কিলোমিতর মরিগী অশাংবদা মফম তরা মরিদা মোরনা তুরেলগী তোর্বান্দ অনিমক শেংদোকখ্রে। ‘মিশন ক্লীন মোরনা’গী শেংলবা থবক অসিদা মীওই লিশিং তরুক্তগী হেন্না, এনজিও ১০০ হেন্না, কোলেজশিং, মহৈরোইশিং, অঙাংশিং অহলশিং, ইমা-ইচল/ইচেশিং পুম্নমক্না মসিদা শরুক য়াখি। জনুৱারী ২০, ২০১৮ ফাওবা লুবা নানবগী খোংজং অসি চৎথখি অমসুং ঐঙোন্দা তমখি মদুদি মোরনা তুরেল অসিনা মপুং ফানা তরু তনান্দ্রি ফাওবা থাংজা খুদিংগী অয়ুক খুদিংগী চৎথখিগনি। তৌগেবু নীংলবদি ঙমদবা লৈতে হায়বা ৱাফম অসিমা ঐহাক উবা ফংজরে। ময়াম্না হোৎনবীরিবা অসিগীদমক হন্না হন্না থাগৎচরি।

ঐগী নুংশিরবা ইরৈবাকচাশিং, মতম অসিদা অদোম্না পদ্ম এৱার্দকী মরমদা য়াম্না তাবীরমগনি। পাউ-চে অমসুং তিভিদসু মসিগী মতাংদা পুক্নীং চিংশিন্নরি। মুন্না য়েংবীরগদি ঐখোয়গী লৈবাক অসিদা শক্নাইরবা মীওই কয়া লৈরি হায়না অদোমসু পুক্নীংদা চাওথোকপা ফাওবীরমগনি। চহি খুদিংগী পদ্ম এৱার্দ পীবগী চৎনবী লৈ। অদুবু মসিগী মওং মতৌদি হৌখিবা চহি অহুম অসিদগী পুমহোং হোংলে। হৌজিক্তি মীওই অমনা কনাগুম্বা অমবু হেক্তা নোমিনেৎ তৌবা য়ারে। থবকশিং অসি ওনলাইন ওইরকপদগী ত্রান্সপিরেন্সী ওইরে। অমরোমদা মনা অসি পীবগী মওংদা ত্রান্সফোর্মেসন লাক্লে। ময়াম্নসু উবীরম্লগনি মীচম মীয়ামসু পদ্ম এৱার্দ ফংলে। অচৌবা শহরশিং, পাউ-চে, তিভি অমসুং থৌরমশিংদা উদবা মীওই কয়াদা পদ্ম এৱার্দ পীরে। অদোম্না তাবীরম্লগনি শ্রীমান অর্বিন্দ গুপ্তজী, আইআইতি কানপুরগী মহৈরোই অমা ওইরকপা অসিনা পুন্সি চুপ্পা অঙাংশিংগী শান্নপোৎ শাবদা লেল্লি। মহাক্না চহি নিফু অসি শিজিন্নরুরবা পোৎশিংদগী শান্নপোৎ শারগা অঙাংশিংদা বিজ্ঞানগী মাইকৈদা পুক্নীং চিংশিন্নবা হোৎনৈ। অঙাংশিংনা কান্নদ্রবা পোৎ-চৈশিংদগী বৈজ্ঞানিক ওইবা মওংদা শিজিন্ননবগীদমক মহাক্না লৈবাক অসিগী স্কুল লিশিং ৩দা চৎতুনা লোন ১৮দা নম্বা ফিল্ম অঙাংশিংদা উৎলি। মহাক্কী অঙকপা পুন্সি অমসুং কৎথোকপা অসি অমুক্তা য়েংবীয়ু। মসিগা চপ মান্ননা কর্নাতক্কী সিতাৱা জোদ্দতী কৌবী অমসু লৈরি। মহাক ‘নুপীদা থৌনা হাপ্লিবী লাইরেম্বী’ হায়না অসুম্না হেক্তা কৌনখিবা নত্তে। হৌখিবা চহি কুন্থ্রা অসিদা মহাক্না বেলাগৱীদা মশিং থিঙমদ্রবা নুপী কয়াগী পুন্সিদা অওনবা পুরকপদা অচৌবা থৌদাং লৌখি। মশাগী চহি তরেৎ শুরকপদা মহাক্না মশাবু দেবদাসী ওইনা কৎথোকখি। অদুবু মহাক্না মপুন্সি চুপ্পা মখোয়গী য়াইফ-থৌরাং পাইখৎনবগীদমক কৎথোকখি। মসিদা নত্তনা মহাক্না শোত্থহৌরবী নুপীশিংগীদমকসু কন্না হোৎনখি। মধ্য প্রদেশকী ভজ্জু শ্যামগী মিং তাবীরম্লগনি, শ্রীমান ভজ্জু শ্যাম তশেংনা লাইরবা ইমুং অমদা, আদিবাসীগী ইমুং অমদা পোকখি। মহাক্না হিংননবগীদমক য়াম্না চম্বা থবক মচা অমখক তৌই অদুবু মহাক থাইনদগী চৎনরক্লবা আদিবাসীগী লাই য়েকপা য়াম্না পামজৈ। পামজবা অসিনা মহাকপু ভারত্তদা নত্তনা মালেম অপুম্বদা ইকাই খুম্নবীরি। নিদর্লেন্দস, জর্মনী, ইংলেন্দ, ইতলীগুম্বা লৈবাক কয়ামরুমদা মাগী অয়েকপা লাইগী এগজিবিসন পাংথোকখ্রে। মীরমদা ভারতকী মিংচৎ ফংহল্লিবা ভজ্জু শ্যামজীগী হৈ-শিংববু শক খঙবীখ্রে অমসুং মঙোন্দা পদ্মশ্রী পীখ্রে।

কেরলগী আদিবাসী নুপী লক্ষ্মীকুত্তীগী ৱারি তারগা অদোম নুংঙাইবগা লোইননা অঙকপা ফাওবীগনি। লক্ষ্মীকুত্তী, কল্লারদা ওজা ওইরি অমসুং হৌজিকসু মহাক অশুকপা উমংদা আদিবাসী মরক্তা খাংপোকশঙ অমদা লৈরি। মহাক্না মনা-মশিংদগী হার্বেল মেদিসিন ৫০০ শেমখ্রে। লিন্না চিকপগী হিদাক শেম্বদা মহাক মমিং চৎলি। হর্বেল হিদাকশিংগী মতেংনা মহাক্না লেপ্পা লৈতনা খুন্নাইগী সেবা তৌরি। মসিবু শক খঙবীবা ওইনা মঙোন্দা পদ্মশ্রী পীদুনা ইকাই খুম্নবা উৎখ্রে। ঙসি ঐহাক অতোপ্পা মিং অমগা পনজবা পাম্মি। মহাক অদুদি নোংচুপ বেঙ্গলগী চহি ৭৫ শুরবী সুভাসিনী মিস্ত্রীনি। মহাক মনা অসি পীনবা খনখ্রে। সুভাসিনী মিস্ত্রী অসি হোস্পিতাল শানবগীদমক মীগী য়ুমদা কোন ফেংখিবী, য়েঞ্ছাং-নাপী য়োনখিবী নুপী অমনি। মশাগী চহি ২৩ শুবদা মতিক চানা লায়েংবা ঙমদবদগী মহাক্কী মপুরোইবা লৈখিদে অমসুং থৌদোক অদুদগী মহাক্না লৈত-লাইরশিংগী লায়েংশঙ অমা শাগে হায়বগী ৱাখল ফাওরকখি। ঙসি মহাক্না কন্না হোৎনজদুনা লিংখৎখিবা লায়েংশঙ অসিদা লাইরবা লিশিং কয়া মমল তিংদনা লায়েংলি। ঐহাক্না থাজৈ, ঐখোয়গী ইরক্তা মমল য়াম্লবা, মীনা খঙবীদবা নুপী-নুপা কয়ামরুম অমা লৈরি। পদ্ম এৱার্দশিং অসিনা মখোয়বু মীয়ামদা শক তাকপগী পাম্বৈ অমনি। অদুবু ঐহাক্না লৈবাক মীয়ামদা হায়জনীংবদি মখোয়না লৌরিবা থৌদাং অসি মনা ফংনবা খক্কী খল্লগা তৌবা নত্তে। অদুবু মখোয়গী থবকশিং অসিনা থৌনা পীরি। স্কুল, কোলেজশিংদা কৌরগা মখোয়গী ৱাখল্লোন অদুবু পাউদম হনবা য়াই। মনাশিং অসিদগী হেনবা, খুন্নাই অসিদা করিগুম্বা খরদি তৌগদবনি।

ঐগী নুংশিরবা ইরৈবাকচাশিং, চহি খুদিংগী ঐখোয়না জনুৱারী ৯দা প্রবাসী ভারতীয় নুমিৎ পাংথোক্লি। নুমিৎ অসিমক্তদনি মহাত্মা গান্ধীজীনা সাউথ অফ্রিকাদগী ভারত্তা হল্লকখিবদু । নুমিৎ অসিদা ভারত অমসুং মালেম পুম্নমক্তা লৈরিবা ভারত মচাশিংগী মরক্তা লৈরিবা তৎন-থান য়াদ্রবা মরিগী কুম্মৈ পাংথোকই। কুমশি চহিগী প্রবাসী ভারতীয় নুমিত্তা থৌরম অমা পাংথোকখি। মদুদা মালেম অপুনবদা লৈরিবা ভারত মচা পার্লিমেন্তরিয়ন অমসুং মেয়োরশিং বার্তন তৌখি। তাবদা ময়াম্না হেন্না নুংঙাইবীগদবদি থৌরম অদুদা মলেশিয়া, ন্যু জিলেন্দ, স্বিৎজর্লেন্দ, পোর্তুগল, মৌরিসস, ফিজী, তেঞ্জানীয়া, কেন্যা, কনাদা, ব্রিতেন, সুরিনাম, খা অফ্রিকা অমসুং অমেরিকাদগী ভারত মচা মেয়র অমসুং পার্লিয়ামেন্তরিয়ানশিংনা শরুক য়াখি। মখোয়না অতোপ্পা লৈবাকশিংগীদমক থবক তৌবগা লোইননা ভারতকসু অফবা মরি থম্বগীদমক ঐহাক্না থোইদোক হোন্দোক্না নুংঙাইবা পোকচৈ। য়ুরোপিয়ন য়ুনিয়ন্না হন্দক ঐঙোন্দা কেলেন্দর অমা থাবীরকই মদুদা য়ুরোপকী তোঙান তোঙানবা মফমশিংদা লৈবা ভারত মচাশিংনা তোঙান তোঙানবা হিরমশিংদা লৌবা থৌদাংশিংবু য়াম্না ফজনা উৎলি। ভারত মচাশিং অসিনা সাইবর সেক্যুরিতী, আয়ুর্বেদ, ইশৈ-নোংমাই, সাহিত্যনচিংবা হিরমশিংদা অচৌবা থৌদাং লৌরি। কনা অমনা ক্লাইমেৎ চেঞ্জদা থিজিল-হুমজিল্লি অদুগা খরনা ভারতকী অরিবা লাইরিকশিংদা থিজিল-হুমজিল্লি। কনা অমনা ত্রক থৌরগা গুরুদ্বার লিংখৎখ্রে, অদুগা কনাগুম্বনা মসজিদ শাখ্রে। হায়বদি ঐখোয়গী মীশিং অসিনা মখোয়না লৈবা মফমশিং অদুবু মওং কয়ামরুমদা লৈতেংলি। য়ুরোপিয়ন য়ুনিয়নগী থবক অসিগীদমক ঐহাক্না থাগৎপা ফোংদোকচরি।

জনুৱারী ৩০ অসি, ঐখোয়দা অনৌবা লম্বী অমা তাকপীরম্বা বাপুজীনা লৈখিদবা নুমিৎনি। নুমিৎ অসি ঐখোয়না ‘শহীদ দিবস’ হায়না পাংথোকই। ঐখোয়না নুমিৎ অসিদা লৈবাক্কীদমক থৱাই কৎপীখ্রবশিংদা অয়ুক পুং ১১ তাবা মতমদা শ্রদ্ধাঞ্জলি কৎলি। শান্তি অমসুং অহিংসানা বাপুজীগী লম্বী ওইখি। মহাক্না তাকপীরম্বা ৱাফমশিং অদু ঙসিসু অসুম্মক চন্নরি। মহাক্কী লম্বেল অদুদা চৎপনা অশেংবা শ্রদ্ধাঞ্জলি ওইগনি।

ঐগী নুংশিরবা ইরৈবাকচাশিং, ময়ামদা ২০১৮গী য়াইফ-পাউজেল পীজরি। ঙসিগীদি মতাং অসিদা লোইশিঞ্জরগে। হন্না হন্না থাগৎচরি। খুরুমজরি।